ကုဒ် - ဇူလူ - အယ်လ်ဖာလ် - ကမ္ဘာပျက်ကပ်ထဲက ဉာဏ်ကြီးရှင်

နျူကလီးယားစစ်ပွဲ၊ လျှပ်စစ်လိုင်းများပြတ်တောက်မှု၊ စီးပွားရေးပျက်ကပ်နှင့် ဇွန်ဘီကပ်ရောဂါ။ ဒီနေ့ည ကမ္ဘာပျက်တော့မယ်ဆိုရင် သင် ဘာလုပ်မှာလဲ? လူအများစုအတွက်တော့ ဒါတွေ က ရုပ်ရှင် နှင့် စာအုပ်များထဲကလို စိတ်ကူးယဉ်သက်သက် သို့မဟုတ် အချိန်ဖြုန်းစရာ ခေါင်းစဉ်များသာ ဖြစ်ကောင်းဖြစ်လိမ့်မည်။ သို့သော် လိုအပ်လာသည့်အချိန်ကျမှ မရှိတာထက်စာလျှင် ရှိနေပြီး မလိုအပ်တာက ပိုကောင်းသည်ဟူသော ခံယူချက်ကို အစွဲအလမ်းကြီးစွာ ဆုပ်ကိုင်ထားသည့် အန္တရာယ်အတွက် ကြိုတင်ပြင်ဆင်တတ်သော ဉာဏ်ကြီးရှင် စကိုင်းအတွက်မူ ထိုသို့မဟုတ်ခဲ့ချေ။ သူသည် ဆန်ဒီယေဂို ပြပွဲတစ်ခုတွင် အမေရိကန်စစ်မြေပြင်ဆေးမှူးဟောင်း အော်စကာနှင့် ကံကြမ္မာအကြောင်းဖန်စွာ ဆုံစည်းခဲ့ပြီးနောက်၊ အန္တရာယ်အတွက် ကြိုတင်ပြင်ဆင်ခြင်းဆိုသည့် နက်နဲကျယ်ပြန့်သော နယ်ပယ်ထဲသို့ အရှိန်အဟုန်ဖြင့် တိုးဝင်ခဲ့သည်။ မြင်ရုံမျှဖြင့် အလွယ်တကူ ကွက်ကွက်ကွင်းကွင်း မှတ်မိနိုင်သော(photo graphic memory) ဉာဏ်ရည်ထက်မြက်မှုကို အသုံးချကာ စိုက်ပျိုးရေး၊ ဆေးဝါးဗေဒ၊ ကိုယ်ခံပညာမှသည် ပြင်းထန်လှသော စစ်သင်တန်းများအထိ အရာရာကို အနည်းငယ်စီ တတ်မြောက်ထားသူတစ်ယောက်ဖြစ်အောင် မရမက လေ့လာဆည်းပူးခဲ့သည်။ နောက်ဆုံးတွင် သူတို့နှစ်ဦးသည် ဖိလစ်ပိုင်နိုင်ငံ၊ မာလန်ဒေးရပ်ကွက်ရှိ ဝန်းအိမ်ရာကြီးတစ်ခုကို ပြင်ဆင်မှုမျိုးစုံ၊ နည်းပညာမျိုးစုံဖြင့် အဆင့်မြှင့်တင်ကာ မည်သည့်ကပ်ဆိုးမျိုးကိုမဆို ကြံ့ကြံ့ခံနိုင်မည့် ခံတပ်ကြီးတစ်ခုသဖွယ် လျှို့ဝှက်ကြိုတင်တည်ဆောက်ခဲ့ကြသည်။ သွေးပျက်ဖွယ်ရာ ကပ်ရောဂါဆိုးကြီး အမှန်တကယ် ကျရောက်လာပြီး မြို့ပြတစ်ခုလုံး သွေးချောင်းစီးစပြုချိန်တွင် စကိုင်း၏ နှစ်ပေါင်းများစွာ ကြိုတင်တွက်ချက် ပြင်ဆင်ထားမှုများက စတင်အသက်ဝင်လာခဲ့တော့သည်။ ဘေးကင်းလုံခြုံသော ဤခံတပ်ကြီးနောက်ကွယ်မှ လျှို့ဝှက်ချက်များနှင့်အတူ မိသားစုဝင်များ၊ လုပ်ဖော်ကိုင်ဖက်ဟောင်းများနှင့် ခိုလှုံသူများ ဝန်းအိမ်ရာကြီးအတွင်းသို့ တဖွဲဖွဲ ရောက်ရှိလာကြသည်။ အစိုးရက အခြေအနေမှန်ကို ဖုံးကွယ်ရန် ကြိုးစားနေဆဲဖြစ်သော်လည်း လာတော့မည့် အမှောင်ထုနှင့် ဇွန်ဘီအန္တရာယ်က ဝန်းအိမ်ရာတံတိုင်းကြီးများ၏ အပြင်ဘက်တွင် စောင့်ကြိုနေပြီဖြစ်သည်။ မိမိတို့ကိုယ်တိုင် မြင်တွေ့ခဲ့ရသည့် ထိုအရာ ကြောင့် အလျင်အစလို ခံတပ်တည်ဆောက်ခဲ့ရသော စကိုင်းတစ်ယောက် သူ၏ပုခုံးပေါ်သို့ ကျရောက်လာသည့် လူအများအပြား၏ အသက်ပေါင်းများစွာနှင့် လက်တွေ့ဆန်လှသော တာဝန်ယူမှုအရှိန်အဝါကို မည်သို့ထမ်းပိုးပြီး ဤကမ္ဘာပျက်ကပ်ဆိုးကြီးကို ရင်ဆိုင်ကျော်ဖြတ်သွားမည်နည်း။ ကမ္ဘာပျက်ကပ်အကြို လေထုနှင့်အတူ စနစ်တကျ တွက်ချက်ပြင်ဆင်မှုများဖြင့် ရင်သပ်ရှုမောဖွယ် အသက်ရှင်ကျန်ရစ်ရေး တိုက်ပွဲဝင်မည့် စိတ်လှုပ်ရှားဖွယ် အလှည့်အပြောင်းများကို ဖတ်ရှုရမည့် ကမ္ဘာပျက်ကပ်အသက်ရှင်ကျန်ရစ်ရေး စာစဥ် တစ်ခု ဖြစ်သည်။