အခန်း (၇၃) အင်ပါယာ တည်ထောင်ခြင်း
ယဇ်ပလ္လင်ရှေ့တွင်ရပ်နေသော ယင်ချီ၏ နားထဲ၌ ကံကြမ္မာစက်ဝန်းထံမှ အကြောင်းကြားချက်များ ဆက်တိုက် ပဲ့တင်ထပ်နေသည်။
ဂုဏ်ယူပါတယ် သခင် သင်၏ နယ်မြေသည် မိုင်ပေါင်း ၅ ဘီလီယံအထိ ကျယ်ပြန့်သွားပါပြီ။ နိုင်ငံတော်ကံကြမ္မာ +၅ သင်၏ နိုင်ငံတော်ကံကြမ္မာ ၁၀ ကျော်သွားသဖြင့် အထူးစွမ်းရည်အသစ်တစ်ခုကို ရရှိပါပြီ။
ဂုဏ်ယူပါတယ် သခင် သင်၏နယ်မြေသည် မိုင်ပေါင်း ၅၀ ဘီလီယံအထိ ကျယ်ပြန့်သွားပါပြီ။ နိုင်ငံတော်ကံကြမ္မာ +၈၀။
နာရီဝက်အတွင်းမှာပင် ရှန့်မင်းဆက်၏ ပြည်နယ် ၉၀ ရာခိုင်နှုန်းခန့်သည် ယင်ချီထံ သစ္စာခံကြောင်း ကြေညာခဲ့ကြသည်။
ကျန်ရှိနေသော အနည်းငယ်သော ပြည်နယ်များမှာမူ ရှန့်မင်းဆက်၏ အမာခံနယ်မြေများဖြစ်ပြီး ယင်မျိုးနွယ်၏ တိုက်ရိုက်အနွယ်ဝင်များ အုပ်ချုပ်ရာဖြစ်သည်။
၎င်းတို့သည် ယင်ချီနှင့် ပူးပေါင်းရန် လုံးဝမဖြစ်နိုင်ပေ။
၎င်းအဆင့်မြင့်အရာရှိများသည် လွန်ခဲ့သော ဆယ်နှစ်က ယင်ချီ၏ မိခင်ကို ရက်ရက်စက်စက် သတ်ဖြတ်ရာတွင် ပါဝင်ခဲ့ကြသူများ ဖြစ်သည်။
ထို့ကြောင့် ယင်ချီက သူတို့ကို ခွင့်လွှတ်မည်မဟုတ်ကြောင်း သိထားကြသည်။
သို့သော် သူတို့တွင် မျှော်လင့်ချက်တစ်ခု ကျန်ရှိနေသေးသည်။
၎င်းမှာ ဒုတိယမြောက် တော်ဝင်မြေးတော် ယင်လီယန်ပင် ဖြစ်သည်။
သူသည် ဓားတစ်ထောင် ဧကရာဇ်ဂိုဏ်းတွင် အရှိန်အဝါရှိပြီး ဧကရာဇ်တစ်ပိုင်း အဆင့်ရှိသော ဆရာတစ်ဦး ရှိနေသောကြောင့် ဖြစ်သည်။
ယင်ချီဧကရာဇ်တစ်ပိုင်းအဆင့် စွမ်းအားကို ထုတ်ပြလိုက်သောအခါ တစ်ဖက်သတ် ငြိမ်သက်သွားခဲ့သော အင်အားစုများသည် ယခုအခါ ရှန့်မင်းဆက်ပျက်စီးတော့မည်ကို မြင်သောအခါ ယင်ချီထံတွင် အပြိုင်အဆိုင် သစ္စာခံလာကြသည်။
ဤသည်မှာ လက်တွေ့ကျလှသော လူ့သဘာဝပင် ဖြစ်သည်။
အခြားသော အင်အားစုများ၏ အမြင်တွင်မူ ယင်လီယန် ပြန်လာလျှင်ပင် ယင်ချီကို တားဆီးနိုင်မည်မဟုတ်ပေ။
အကြောင်းမှာ ဓားတစ်ထောင်ဂိုဏ်းသည် အလွန်ဝေးကွာလှပြီး ဧကရာဇ်တစ်ပိုင်းတစ်ဦးပင် လပေါင်းများစွာ ခရီးနှင်ရမည် ဖြစ်သည်။
ထို့ပြင် ဤနယ်မြေသည် ယန်ယွဲ့တောင်၏ စိုးမိုးမှုအောက်တွင် ရှိသည်။
ယန်ယွဲ့တောင်သခင်မှာ ဧကရာဇ်တစ်ပိုင်း အဆင့် ၇အထိ ရှိပြီး ပြင်ပအင်အားစုများ သူ၏နယ်မြေအတွင်း ဝင်ရောက်ရှုပ်ရှုက်ခတ်သည်ကို ခွင့်ပြုမည်မဟုတ်ပေ။
ပန်းထုံက ယင်ချီ၏ ဘေးနားသို့ တိုးကပ်လာပြီး တိုးတိုးလေး သတိပေးလိုက်သည်။
အရှင်မင်းမြတ်... အခု သစ္စာခံနေတဲ့ အင်အားစုတွေဟာ အခွင့်အရေးသမားတွေပဲ ဖြစ်ပါတယ်။
ခဏတဖြုတ်တော့ အသုံးချလို့ရပေမဲ့ မဟာချင် ပိုမိုကြီးပွားဖို့အတွက်ဆိုရင် ဒီမျိုးနွယ်စုတွေကို အချိန်တန်ရင် ဖျက်သိမ်းပစ်ရပါလိမ့်မယ်။ သူတို့ရှိနေတာဟာ အန္တရာယ်တစ်ခုပါပဲ။
ယင်ချီက ခေါင်းညိတ်လိုက်သည်။ သူသည်လည်း ဤအချက်ကို သိရှိပြီးသားဖြစ်သည်။
အခြေအနေ တည်ငြိမ်သွားပါက ထိုရမ္မက်ကြီးသော မျိုးနွယ်စုများကို ဖြည်းဖြည်းချင်း စီရင်ရန် သူစီစဉ်ထားသည်။
ယင်ချီသည် ယဇ်ပလ္လင်အလယ်ရှိ အိုးကြီးအတွင်းသို့ မီးရှူးတိုင်ကို ပစ်ထည့်လိုက်ပြီး မဟာချင်မင်းဆက်ကို မဟာချင်အင်ပါယာ အဖြစ် တရားဝင် အဆင့်မြှင့်တင်ကြောင်း ကြေညာလိုက်သည်။
သူသည် ရှန့်မင်းဆက်ကို သိမ်းပိုက်ရန် အမိန့်ထုတ်ပြန်လိုက်ပြီး သာမန်ယင်မျိုးနွယ်ဝင်များကိုမူ မသတ်ဖြတ်ဘဲ ချန်ထားမည်ဟု ကတိပေးလိုက်သည်။
သို့သော် သူ့ကို ဒုက္ခပေးခဲ့သော အဆင့်မြင့်အရာရှိများကိုမူ အမြစ်ပြတ် သုတ်သင်မည်ဖြစ်သည်။
မြက်ပင်ကိုရိပ်ရင် အမြစ်ပါ တူးထုတ်ရမယ် မဟုတ်ရင် နောင်တစ်ချိန်မှာ ဘာဖြစ်လာမလဲ မသိနိုင်ဘူးဟု ယင်ချီက တွေးတောရင်း ပြတ်သားစွာ ဆုံးဖြတ်လိုက်သည်။
ယင်ချီကိုယ်တိုင် ဤတိုက်ပွဲတွင် ပါဝင်စရာ မလိုတော့ပေ။ သူ့ထံ သစ္စာခံထားသော ပြည်နယ် ၇၂ ခုမှ အင်အားစုများကပင် ကျန်ရှိနေသောရှန့်မင်းဆက်၏ အကြွင်းအကျန်များကို အလွယ်တကူ ချေမှုန်းနိုင်ပြီ ဖြစ်သည်။