အခန်း (၇) ယန်ဝူးမြို့သို့ဆိုက်ရောက်ခြင်း

ဘုန်း ဘုန်း...

ယွီမြို့မှ မျိုးနွယ်စုများ အကြံထုတ်နေကြစဉ်မှာပင် ဆုန့်မျိုးနွယ်စုမှ မသေမျိုး လှေသင်္ဘောငါးစင်းသည် အချိန်ဆွဲမနေဘဲ လေပြင်းများကို တိုက်ခတ်စေလျက် ယန်ဝူးမြို့ဆီသို့ ခန့်ညားထည်ဝါစွာ ဦးတည်ထွက်ခွာသွားတော့သည်။

"နယ်စားမင်းဝူကို ရိုသေစွာ ပို့ဆောင်နှုတ်ဆက်ပါတယ်"

"နယ်စားမင်းဝူကို ရိုသေစွာ ပို့ဆောင်နှုတ်ဆက်ပါတယ်"

ဆုန့်မျိုးနွယ်စု၏လှေသင်္ဘောများ ဝေးရာသို့ တဖြည်းဖြည်း ပျောက်ကွယ်သွားသည်ကို ကြည့်ရင်း ယွီမြို့ရှိ ကျင့်ကြံသူအများအပြားမှာ မြေပြင်ပေါ်တွင် ဝပ်စိုးကာ ရိုသေစွာ ဦးတိုက်ကျန်ရစ်ခဲ့ကြသည်။

ထို့နောက်တွင် လျူမျိုးနွယ်စု၊ သံနွားမျိုးနွယ်စုနှင့် ဖုန်းယမျိုးနွယ်စု ခေါင်းဆောင်များသည် ဆုန့်မျိုးနွယ်စုနောက်မှ လိုက်ပါတိုက်ခိုက်ရန်အတွက် မြို့စောင့်တပ်များကို ချက်ချင်း စတင်စုစည်းကြတော့သည်။

ဆုန့်မျိုးနွယ်စု၏ ပြတ်သားသော ရပ်တည်ချက်ကို မြင်လိုက်ရသဖြင့် ယွီမြို့မှ မျိုးနွယ်စုများမှာ မည်သည့် စိုးရိမ်မှုမျှ မရှိတော့ပေ။

ဆုန့်မျိုးနွယ်စု၏ ရှေ့မှောက်တွင် သာမန် ကောင်းကင်ဖြစ်စဉ် နယ်စားမင်းတစ်ဦးဆိုသည်မှာ အညံ့ခံရန် သို့မဟုတ် သေခြင်းတရားကို ရင်ဆိုင်ရန်သာ ရွေးချယ်စရာ ရှိတော့သည်။

"အားလုံး နားထောင်ကြ ငါတို့အတွက် ထူးခြားတဲ့ အောင်မြင်မှုတွေ ရယူဖို့ အခွင့်အရေး ရောက်လာပြီ"

"မဟာဆုန့်မင်းဆက်ကို မကြာခင် တည်ထောင်တော့မယ်။ ငါတို့သာ အစွမ်းကုန် ကြိုးစားမယ်ဆိုရင် နောင်တစ်ချိန်မှာ မင်းဆက်သစ်ရဲ့ အမှုထမ်းဟောင်းကြီးတွေ ဖြစ်လာကြမှာပဲ။ အဲဒီအချိန်ကျရင် ဆုန့်ဧကရာဇ်မိသားစုက ငါတို့ကို ဘွဲ့ထူးဂုဏ်ထူးတွေ ပေးအပ်မှာ သေချာတယ်"

ယွီမြို့ အပြင်ဘက်တွင် သံနွားမျိုးနွယ်စု ခေါင်းဆောင်သည် ရှေးဟောင်း သားရဲကြီးတစ်ကောင်ကို စီးနင်းလျက် ဟိန်းဟောက်လိုက်သည်။ သူ၏ အသံမှာ မိုင်ပေါင်းရာချီ ပျံ့နှံ့သွားပြီး ယွီမြို့ စစ်သည်တော်များ၏ နားထဲတွင် မိုးကြိုးပစ်သကဲ့သို့ ပဲ့တင်ထပ်သွားသည်။

၎င်းကို ကြားရသောအခါ သံချပ်ကာ ဝတ်စုံဝတ် စစ်သည်တော်များ၏ မျက်လုံးများတွင် တက်ကြွမှုများ ပြည့်နှက်သွားသည်။ ဆုန့်မျိုးနွယ်စု၏ ဂုဏ်သတင်းမှာ လူတိုင်း သိပြီးသား မဟုတ်ပါလား။

အကယ်၍ ဆုန့်မျိုးနွယ်စုနောက်သို့ လိုက်ပါခွင့် ရမည်ဆိုပါက သာမန် စစ်သည်တော်များမှာ ဝမ်းမြောက်ဝမ်းသာ လိုက်ပါကြမည်သာ ဖြစ်သည်။

ဆုန့်မျိုးနွယ်စုအတွက် တိုက်ခိုက်ခြင်းမှာ အသက်အန္တရာယ် ရှိနိုင်သော်လည်း အသက်ရှင်ကျန်ရစ်ခဲ့ပါက ရရှိမည့် ဆုလာဘ်များမှာ မနည်းလှပေ။

"ချီတက်က"

ယွီမြို့မှ သံချပ်ကာ စစ်သည်တော် တစ်သိန်း၏စိတ်ဓာတ်မှာ အထွတ်အထိပ်သို့ ရောက်နေသည်ကို မြင်သောအခါ သံနွားမျိုးနွယ်စု ခေါင်းဆောင်က အမိန့်ပေးလိုက်ပြီး သူ၏ သားရဲကြီးကို စီးကာ ရှေ့ဆုံးမှ ဦးဆောင် ထွက်ခွာသွားတော့သည်။

နာရီဝက်ခန့် ကြာပြီးနောက်တွင် ဆုန့်မျိုးနွယ်စု၏ မသေမျိုးလှေသင်္ဘောငါးစင်းမှာ ယန်ဝူးမြို့သို့ ဆိုက်ရောက်လာသည်။

နယ်စားမင်းဝူ... ဒါကတော့ ယန်ဝူးမြို့ပါပဲ။ သံနွားမျိုးနွယ်စုခေါင်းဆောင်ရဲ့ အဆိုအရ အဲဒီနာမည်မသိတဲ့ နယ်စားမင်းဟာ ဒီမြို့မှာ အခြေစိုက်နေတယ်လို့ သိရပါတယ်။

အလယ်ဗဟိုရှိ လှေသင်္ဘောအတွင်း၌ မိန်းမလျာပုံစံ လူတစ်ယောက်မှာ မြေပြင်ပေါ်တွင် ဒူးထောက်ကာ ကြောက်ရွံ့စွာ သတင်းပို့နေသည်။ ထိုလူ၏ ရှေ့တွင် အရပ်ရှည်ပြီး ပိန်သွယ်သော၊ ငွေရောင် ဆံပင်ရှည်များရှိသည့် လူငယ်တစ်ဦး ရပ်နေသည်။

ထိုလူငယ်မှာ နဂါးပုံစံ ဝတ်စုံကို ဝတ်ဆင်ထားပြီး သူ၏ပုံရိပ်မှာ မြူခိုးများဖြင့် ဝန်းရံနေသကဲ့သို့ ရှိသည်။ သူ ရပ်နေသည့် ပုံစံမှာ ဤကမ္ဘာကြီး၏ အလိုဆန္ဒကို ကိုယ်စားပြုနေသကဲ့သို့ပင်။

ဤလူငယ်မှာ ဆုန့်မျိုးနွယ်စု၏ နယ်စားမင်းငါးဦးထဲမှ တစ်ဦးဖြစ်သူ ဆုန့်ဝူနယ်စားမင်းဆုန့်ခို့ပင် ဖြစ်သည်။

"အင်း... နယ်စားမင်း တစ်ယောက်ပဲလေ။"

ငါတို့ မျိုးနွယ်စုရဲ့ဘိုးဘေးကြီးဟာ နတ်ဘုရားမီးလျှံကို ထွန်းညှိပြီးပြီ ဝိညာဉ်မဲ့နတ်ဘုရားဖြစ်တော့မယ်။ ရွှေဖီးနစ်မျိုးနွယ်စုတို့၊ မူမျိုးနွယ်စုတို့တောင် ငါတို့ဆုန့်မျိုးနွယ်စုကို ယှဉ်ဖို့ အရည်အချင်း မရှိတော့ဘူး။

အဲဒီ နယ်စားမင်းကသာ နားလည်တတ်ပြီး ငါတို့ ဆုန့်မျိုးနွယ်စုဆီ အညံ့ခံမယ်ဆိုရင် သူ့ကို မိုင်တစ်သောင်းလောက် ပေးထားလို့ ရပါတယ်။ ဒါပေမဲ့ သူကသာ အသိတရား မရှိဘူးဆိုရင်တော့ သူ အသက်ရှင်နေဖို့ မလိုတော့ဘူး။

ဆုန့်ဝူနယ်စားမင်း၏ အသံမှာ အေးစက်တည်ငြိမ်နေသည်။ သူ၏ အမြင်တွင် ကောင်းကင်ဖြစ်စဉ် နယ်စားမင်းတစ်ဦးမှာ ပုရွက်ဆိတ်တစ်ကောင်ကဲ့သို့သာ ဖြစ်ပုံရသည်။

"မှန်လှပါ မှန်လှပါပြီ"

ကံကြမ္မာကဆုန့်ဆီမှာ ရှိတာပါ။ ဆုန့်မျိုးနွယ်စုကို အဟန့်အတား လုပ်တဲ့ ဘယ်အင်အားစုမဆို အမှုန့်ဖြစ်သွားမှာပါပဲ။

မိန်းမလျာပုံစံရှိသူက ဆုန့်ဝူနယ်စားမင်းအား မြှောက်ပင့်ပြောဆိုလိုက်သည်။ ဆုန့်ဝူနယ်စားမင်းမှာ မျက်နှာက အေးစက်နေသော်လည်း ရင်ထဲတွင်မူ အလွန်ကျေနပ်သွားသည်။

 သို့သော် ဟန်ဆောင်၍ ပြန်လည် ဟန့်တားလိုက်သည်မှာ စကားကို လျှောက်မပြောနဲ့။ ငါက ဧကရာဇ်ထီးနန်းကို မက်မောတဲ့သူ မဟုတ်ဘူး။

မူယာမင်းဆက်ဟာ နှစ်ပေါင်းနှစ်ရာလောက် ရှုပ်ထွေးနေခဲ့ပြီး မျိုးနွယ်စုတွေကြားမှာ တိုက်ပွဲတွေ ခဏခဏ ဖြစ်နေတယ်။ ငါတို့ ဆုန့်မျိုးနွယ်စုက စနစ်တကျ ပြန်လည် ထိန်းသိမ်းပြီး သတ္တဝါအားလုံးကို အကာအကွယ်ပေးဖို့ပဲ ရည်ရွယ်တယ်။ ဒါကြောင့် ဧကရာဇ်ထီးနန်းကိစ္စကို နောက်တစ်ခါ ထပ်မပြောနဲ့တော့။

စကားပြောရင်း ဆုန့်ဝူနယ်စားမင်းသည် လှေသင်္ဘောပေါ်မှ ထွက်လာသည်။ ယွီမြို့ရှိ မျိုးနွယ်စုများကို ကိုင်တွယ်ရာတွင် သူ၏ အစေခံများကိုသာ ခိုင်းစေခဲ့သော်လည်း ကောင်းကင်ဖြစ်စဉ် နယ်စားမင်းတစ်ဦးနှင့် ရင်ဆိုင်ရာတွင်မူ သူကိုယ်တိုင် ပါဝင်ညှိနှိုင်းရမည် ဖြစ်သည်။ အဘယ်ကြောင့်ဆိုသော် သာမန် ကောင်းကင်ဖြစ်စဉ်အဆင့် ကျွမ်းကျင်သူ တစ်ဦးကို သူကိုယ်တိုင်၏ ခွန်အားနှင့် အရှိန်အဝါဖြင့်သာ ဖိနှိပ်နိုင်မည် ဖြစ်သောကြောင့်ပင်။

ဆုန့်ခို့သည် သူ၏ခွန်အားအပေါ် ယုံကြည်မှု အပြည့်ရှိသည်။ သူသည် ဆုန့်မျိုးနွယ်စုအတွက် အရပ်မျက်နှာ အားလုံးတွင် တိုက်ပွဲဝင်ခဲ့သူဖြစ်ပြီး ကောင်းကင်ဖြစ်စဉ်အဆင့် ကျွမ်းကျင်သူ ဒါဇင်ဝက်ခန့်မှာ သူ၏ လက်ချက်ဖြင့် သေဆုံးခဲ့ဖူးသည်။

မကြာသေးမီကပင် သူသည် လှံတစ်လက်တည်းဖြင့် ကောင်းကင်ဖြစ်စဉ် နောက်ဆုံးအဆင့် ကျွမ်းကျင်သူ နှစ်ဦးကို သတ်ဖြတ်နိုင်ခဲ့သည်။

သူ လှေပေါ်မှ ဆင်းလိုက်သည်နှင့် ဆုန့်ဝူနယ်စားမင်း၏ ဖိအားမှာ ယန်ဝူးမြို့ တစ်ခုလုံးကို လွှမ်းခြုံသွားတော့သည်။ သူသည် လေဟာနယ်၏ ထိပ်ဖျားတွင် ရပ်နေပြီး သူ၏ ဝတ်ရုံမှာ တဖျတ်ဖျတ် လွင့်နေသည်။

နေ့ခင်းဘက်ဖြစ်သော်လည်း မိုင်တစ်ထောင်အတွင်းရှိ ကောင်းကင်ကြီးမှာ ချက်ချင်းပင် ညဉ့်မှောင်အတိ ကျသွားတော့သည်။

ဤသည်မှာ ကောင်းကင်ဖြစ်စဉ်ကို ပြောင်းလဲကာ နေ့နှင့်ညကို ပြောင်းပြန်လှန်လိုက်ခြင်းပင်။

မိန်းမလျာပုံစံရှိသူက ဆုန့်ဝူနယ်စားမင်း၏ ဘေးတွင် လိုက်ပါလာပြီး ယန်ဝူးမြို့ဆီသို့ စူးရှသော အသံဖြင့် အော်ဟစ်လိုက်သည်။

"ဆုန့်မျိုးနွယ်စုရဲ့ နယ်စားမင်းဝူ ရောက်ရှိလာပြီ! မင်းတို့လို လူရိုင်းတွေက ဘာလို့ ဒူးမထောက် ဂါရဝမပြုကြသေးတာလဲ"

ထိုအသံ ထွက်ပေါ်လာသည်နှင့် မသေမျိုး လှေငါးစင်းပေါ်မှ ကြောက်မက်ဖွယ် ကောင်းသော တပ်မတော်ကြီးမှာ ကောင်းကင်စစ်သည်တော်များကဲ့သို့ ထွက်ပေါ်လာပြီး ယန်ဝူးမြို့ကို ဝိုင်းရံထားလိုက်ကြသည်။ ဆုန့်ဝူနယ်စားမင်း၏ ဖိအားနှင့်ပေါင်းစပ်လိုက်သောအခါ မြင်ကွင်းမှာ အလွန် ခမ်းနားထည်ဝါလှပေသည်။

သာမန် ကောင်းကင်ဖြစ်စဉ် အစောပိုင်းအဆင့် ကျွမ်းကျင်သူတစ်ဦးဆိုလျှင် ဤမြင်ကွင်းကို ကြည့်ပြီး ချက်ချင်း ဒူးထောက် အညံ့ခံသွားမည်မှာ သေချာသည်။

သို့သော် ခဏအကြာတွင် ဆုန့်ဝူနယ်စားမင်းမှာ တစ်စုံတစ်ခု မှားယွင်းနေသည်ကို ခံစားလိုက်ရသည်။

အဘယ်ကြောင့်ဆိုသော် ယန်ဝူးမြို့အတွင်း၌ အင်အားကြီးမားသော အရှိန်အဝါ နှစ်သောင်းကျော်နှင့် ကောင်းကင်ဖြစ်စဉ် ပြီးပြည့်စုံခြင်းအဆင့်ရှိသော ပြင်းထန်သည့် ဖိအားတစ်ခုကို သူ ခံစားလိုက်ရသောကြောင့် ဖြစ်သည်။

ခရမ်းရောင်နန်းတော်အဆင့် ကျွမ်းကျင်သူ နှစ်သောင်းနှင့် ကောင်းကင်ဖြစ်စဉ် ပြီးပြည့်စုံခြင်းအဆင့် ကျွမ်းကျင်သူ တစ်ဦး ဆုန့်မျိုးနွယ်စုမှ လာသော ဆုန့်ဝူနယ်စားမင်းပင်လျှင် ဤအခြေအနေကြောင့် အလွန်အမင်း အံ့အားသင့်သွားရသည်။

ထို ခရမ်းရောင်နန်းတော်အဆင့် ကျွမ်းကျင်သူ နှစ်သောင်းမှာ မှောင်မိုက်ရိပ်တပ်မတော်မှ စစ်သည်များ ဖြစ်ကြသည်။ ကောင်းကင်ဖြစ်စဉ် ပြီးပြည့်စုံခြင်းအဆင့် ဖိအားမှာမူ မှောင်မိုက်ရိပ်တပ်မတော်၏တပ်မှူး  သွေးရိပ်ထံမှ ဖြစ်သည်။ ယင်ချီ၏အရှိန်အဝါကိုမူ ဆုန့်ဝူနယ်စားမင်းအနေဖြင့် လုံးဝ သတိမထားမိပေ။

နှစ်ဦးကြားရှိ ခွန်အားနှင့် အခြေခံအုတ်မြစ်မှာ အလွန်ပင် ကွာဟလွန်းလှသည်။ ယင်ချီသည် ဟုန်မုန်းမသေမျိုး ခန္ဓာကိုယ်နှင့် မပေါင်းစပ်မီကပင် ဆုန့်ဝူနယ်စားမင်းကဲ့သို့သော ကျင့်ကြံသူကို အလွယ်တကူ နှိမ်နင်းနိုင်သူ ဖြစ်သည်။

"မိတ်ဆွေ... မင်းဟာ ဘယ်မင်းဆက်ကလဲဆိုတာ သိခွင့်ရမလား"

ဆုန့်ဝူနယ်စားမင်းသည် သွေးရိပ်ကို စေ့စေ့ကြည့်ရင်း စိုးရိမ်စိတ် အနည်းငယ်ဖြင့် မေးလိုက်သည်။ ယင်ချီ၏အရှိန်အဝါကို မခံစားရသဖြင့် သွေးရိပ်ကိုသာ ယန်ဝူးမြို့၏ သခင်အသစ်ဟု သူက ထင်မှတ်နေခြင်း ဖြစ်သည်။

သူ၏ အထင်အရ သွေးရိပ်မှာ ဝိညာဉ်မဲ့နတ်ဘုရားမင်းဆက်တစ်ခုခုမှ လာသူ ဖြစ်ရမည်။ အဘယ်ကြောင့်ဆိုသော် ထိုကဲ့သို့ အခြေခံရှိသော မင်းဆက်များသာလျှင် ခရမ်းရောင်နန်းတော်အဆင့်ကျွမ်းကျင်သူ သောင်းချီပါသော တပ်မတော်ကို စေလွှတ်နိုင်သောကြောင့် ဖြစ်သည်။