အခန်း (၆၂) အကျဉ်းထောင်ကို ဖောက်ထွင်းခြင်း

"အား မဖြစ်နိုင်ဘူး"

တိုက်ပွဲစတင်ပြီး မကြာမီမှာပင် ရှန့်မင်းဆက်မှ သူတော်စင်တစ်ပိုင်းတစ်ဦး စတင်ကြွေလွင့်သွားခဲ့သည်။

ဘာရန်ပြည်နယ်တစ်ခုလုံးသည် သွေးချောင်းစီးသော စစ်မြေပြင်ကြီးအဖြစ်သို့ ပြောင်းလဲသွားပြီး လူသားအင်အားစုအသီးသီး၏ အလံများကြားတွင် မဟာချင်မင်းဆက်၏ တပ်မဟာများလည်း ပါဝင်တိုက်ခိုက်နေကြသည်။

မဟာချင်နန်းတော်အတွင်း၌ ကျင့်ကြံနေသော ယင်ချီသည် တိုက်ပွဲထဲသို့ ပါဝင်ရန် ပြင်ဆင်နေစဉ် ဟင်းလင်းပြင်ကို ဖြတ်ကျော်ကာ ပေပေါင်းသောင်းချီ ရှည်လျားသော အရိပ်မည်းကြီးတစ်ခု ပေါ်ထွက်လာခဲ့သည်။

၎င်းမှာ ဧရာမပင့်ကူစက်ရုပ်ကြီးတစ်ရုပ် ဖြစ်ပြီး ၎င်း၏ ခြေလှမ်းတိုင်းက သတ္တုချင်း ပွတ်တိုက်သံနှင့်အတူ ပြင်းထန်သော တုန်ခါမှုများကို ဖြစ်ပေါ်စေသည်။

ထိုစက်ရုပ်ကြီးအတွင်းမှ စက်သံနှောနေသော အသံတစ်သံသည် ဘာရန်ပြည်နယ်တစ်ခုလုံးကို ဟိန်းထွက်သွားစေသည်။

ဒီနေ့ကစပြီး ဘာရန်ပြည်နယ်ဟာ အကျဉ်းထောင် မဟုတ်တော့ဘူး ငါတို့ ချုံးလန်မင်းဆက်ကနေ ဘာရန်ပြည်နယ်သားတွေကို အပြစ်သားအဖြစ်ကနေ ကင်းလွတ်ခွင့်ပေးလိုက်ပြီ။

ပြီးတော့ ငါတို့မင်းဆက်ကိုလည်း ချုံးလန် မြင့်မြတ်သောမင်းဆက်လို့ ဒီနေ့မှာပဲ အမည်ပြောင်းလိုက်တယ်။

၎င်းစက်ရုပ်ကြီးမှာ သူတော်စင်အဆင့်ဖိအားများကို ထုတ်ဖော်နေပြီး ၎င်း၏တိုက်ခိုက်မှုတိုင်းမှာ သူတော်စင်အဆင့် အယောက်ပေါင်း ရာနှင့်ချီ၍ တစ်ပြိုင်နက် တိုက်ခိုက်နေသကဲ့သို့ ပြင်းထန်လှသည်။

၎င်းသည် ဘာရန်ပြည်နယ်ကို ပိတ်လှောင်ထားသော ပထမဆုံး အစီအရင်အလွှာကို ခြေဦးဖြင့်ပင် နင်းခြေဖျက်ဆီးပစ်လိုက်သည်။

ချုံးလန်ဘိုးဘေးကြီးသည် စက်ရုပ်ကြီးပေါ်တွင် ရပ်နေရင်း ရှန့်မင်းဆက်၏ ရိတ်သိမ်းသူများကို တစ်ဖက်သတ် ချေမှုန်းနေသည်။

ချုံးလန်ဧကရာဇ်က ဤအခွင့်အရေးကို အသုံးချ၍ မိမိတို့အား နယ်မြေရွှေ့ပြောင်းခိုင်းခဲ့သော မဟာချင်မင်းဆက်ကိုပါ တစ်လက်စတည်း ကလဲ့စားချေရန် ဘိုးဘေးကြီးကို တောင်းဆိုခဲ့သည်။

သို့သော် ဘိုးဘေးကြီးက တည်ငြိမ်စွာဖြင့် ငြင်းပယ်လိုက်သည်။

အနာဂတ်မှာ မင်းဆက်သစ်တစ်ခု တည်ထောင်ဖို့ဆိုရင် သနားညှာတာမှုရော၊ သံမဏိလို စွမ်းအားမျိုးရောရှိရမယ်။

မဟာချင်ဆိုတာ ငါတို့အတွက်တော့ အန္တရာယ်မရှိတဲ့ အဖွဲ့အစည်းလေးတစ်ခုပဲ။ 

သူတို့ကို ခွင့်လွှတ်ပေးလိုက်ခြင်းက ငါတို့ရဲ့ သဘောထားကြီးမှုကို ပြသရာရောက်တယ်။ ငါတို့ရဲ့ တကယ့်ရန်သူက ရှန့်မင်းဆက်ပဲ။

ပင့်ကူစက်ရုပ်ကြီး၏ ဖျက်ဆီးမှုကြောင့် ဘာရန်ပြည်နယ်ကို ပိတ်ဆို့ထားသော အစီအရင်များ ပြိုကွဲကုန်ပြီး ကမ္ဘာကြီးမှာ ပြန်လည်လင်းထိုင်လာခဲ့သည်။

ပြည်သူအပေါင်းမှာ ချုံးလန်မင်းဆက်ကို အသက်သခင်အဖြစ် ဝိုင်းဝန်းကိုးကွယ်ဆုတောင်းကြတော့သည်။

အကျဉ်းထောင်တံခါးများ ပွင့်သွားပါက ဘာရန်ပြည်နယ်၏ မပြည့်စုံသော ဥပဒေသများ ပြန်လည်ပြည့်စုံလာမည်ဖြစ်ပြီး သူတော်စင်အဆင့်သို့ တက်လှမ်းနိုင်မည့် ခေတ်သစ်ကြီး ရောက်ရှိလာတော့မည်ဟု အားလုံးက ယုံကြည်နေကြသည်။

သို့သော်မဟာချင်ဧကရာဇ်ယင်ချီကမူကောင်းကင်ထက်ရှိထူထပ်သောတိမ်တိုက်မည်းကြီးများကိုကြည့်ကာဤမျှလွယ်ကူမည်မဟုတ်ကြောင်းရိပ်မိနေသည်။