အခန်း (၄) သံနွားမျိုးနွယ်စုနှင့် သူတို့၏ နောက်ခံအင်အား

ကုမျိုးနွယ်စုမှ ခရမ်းရောင်နန်းတော်အဆင့်ကျင့်ကြံသူနှစ်ဦး ထွက်ခွာသွားပြီးနောက် ယင်ချီသည် ယန်ဝူးမြို့၏ လူဦးရေ၊ နယ်မြေအကျယ်အဝန်းနှင့် ပတ်ဝန်းကျင် အခြေအနေများကို အသေးစိတ် ရေးသားထားသော စာအုပ်ကို ထုတ်ယူကာ ဂရုတစိုက်ဖတ်ရှုတော့သည်။

ဟွမ်ကျိုးနယ်မြေကို အလယ်ပိုင်း၊ အရှေ့ပိုင်း၊ တောင်ပိုင်း၊ အနောက်ပိုင်းနှင့် မြောက်ပိုင်းဟူ၍ ဒေသငါးခုခွဲခြားထားသည်။ ယန်ဝူးမြို့သည် မြောက်ပိုင်းဒေသတွင် တည်ရှိပြီး တိတိကျကျ ပြောရလျှင် မူယာမင်းဆက်၏ လက်အောက်ခံ နယ်မြေဖြစ်သည်။

မူယာမင်းဆက်သည် မြောက်ပိုင်း ဟွမ်ကျိုးရှိ ဝိညာဉ်မဲ့နတ်ဘုရားအဆင့် မင်းဆက်များစွာထဲမှတစ်ခုဖြစ်ပြီး မိုင်ငါးသိန်းခန့်ကျယ်ဝန်းသောနယ်မြေကို အုပ်ချုပ်ကာ မြို့ပေါင်းများစွာနှင့် နယ်စားမင်းမျိုးနွယ်စုများကို ကွပ်ကဲထားသည်။

သို့သော် လွန်ခဲ့သော နှစ်ပေါင်းနှစ်ရာခန့်မှစ၍ မူယာမင်းဆက်အတွင်း မင်းသားများကြား ပုန်ကန်မှုများ ဖြစ်ပွားနေသဖြင့် ယန်ဝူးမြို့ကဲ့သို့သော အင်အားစုအသေးလေးများကို ဂရုမစိုက်နိုင်ဘဲဖြစ်နေသည်။

ယန်ဝူးမြို့၏မိုင်တစ်ထောင်ပတ်လည်တွင် လူဦးရေ တစ်သန်းကျော်ရှိသော မြို့ကြီး လေးမြို့နှင့် လူဦးရေငါးသိန်းကျော်ရှိသော မြို့ငယ် ဒါဇင်ဝက်ခန့် ရှိသည်။

ထိုထက်ဝေးသော နေရာများမှာမူ နယ်စားမင်း အင်အားစုများ၏ နယ်မြေများ ဖြစ်ကြသည်။

ယန်ဝူးမြို့နှင့် အနီးဆုံး နယ်စားမင်း အင်အားစုမှာ ဆုန့်မျိုးနွယ်စုဖြစ်သည်။ ဆုန့်မျိုးနွယ်စုသည် ကောင်းကင်ဖြစ်စဉ်နယ်စားမင်းငါးဦးရှိသော မျိုးနွယ်စုကြီးဖြစ်ပြီး မူယာမင်းဆက်၏ ပုန်ကန်မှုများတွင်လည်း ပါဝင်ပတ်သက်နေသည်။

"ဟူး..."

ပတ်ဝန်းကျင် အခြေအနေကို အကြမ်းဖျင်း နားလည်သွားပြီးနောက် ယင်ချီသည် စာအုပ်ကို ဖြည်းဖြည်းချင်းပိတ်လိုက်သည်။ မိုင်တစ်ထောင်အတွင်း ယင်ချီကို ယှဉ်နိုင်မည့် အင်အားစု မရှိသလိုမိုင်တစ်ထောင်ကျော်တွင်လည်း သူ့ကို ခြိမ်းခြောက်နိုင်သည့် အင်အားစုမှာ အလွန်နည်းပါးလှသည်။

သို့သော်မူယာမင်းဆက် တစ်ခုလုံးနှင့် ယှဉ်လျှင်မူ ယင်ချီ၏ လက်ရှိအင်အားမှာ အနည်းငယ်အားနည်းနေသေးသည်။

နယ်စားမင်း အင်အားစု အသေးစားများကို သူ ကိုင်တွယ်နိုင်သော်လည်း ကောင်းကင်ဖြစ်စဉ်အဆင့်ကျွမ်းကျင်သူ အများအပြားနှင့် စစ်သည်သန်းချီရှိသော အင်အားစုကြီးများကို ရင်ဆိုင်ရလျှင်မူ အနည်းငယ် အခက်တွေ့နိုင်ပေသည်။

သို့သော် အခက်တွေ့ရုံသာ ရှိမည်။ ဝိညာဉ်မဲ့နတ်ဘုရားတစ်ယောက် ကိုယ်တိုင်ပါဝင်မလာသရွေ့ ကောင်းကင်ဖြစ်စဉ်ပြီးပြည့်စုံခြင်းအဆင့်ကျွမ်းကျင်သူ ဒါဇင်ဝက်ခန့် ရှိနေလျှင်ပင် ယင်ချီကို ဒဏ်ရာရအောင် မလုပ်နိုင်ပေ။

အဘယ်ကြောင့်ဆိုသော် ယင်ချီလေ့ကျင့်ထားသော ကျင့်စဉ်မှာ ရှန့်မင်းဆက်မှဖြစ်ပြီး ဟွမ်ကျိုးရှိကျင့်ကြံသူများ၏ ကျင့်စဉ်နှင့် အဆင့်အတန်းချင်း လုံးဝ မတူသောကြောင့် ဖြစ်သည်။

ဟွမ်ကျိုးတစ်ခုလုံးသည် ရှန့်မင်းဆက်က တည်ဆောက်ထားသော လှောင်အိမ်တစ်ခုသာ ဖြစ်ကြောင်း ယင်ချီကောင်းကောင်းသိသည်။

ထို့ကြောင့် သူသည်ဟွမ်ကျိုးရှိ နယ်စားမင်းများ သို့မဟုတ် မင်းဆက်များကို အစကတည်းက အလေးအနက် မထားခဲ့ပေ။

သူ၏ အကြီးမားဆုံးရန်သူမှာ နှစ်ပေါင်းသန်းချီ စိုးမိုးလာပြီး ရဟန္တာအဆင့်ဘိုးဘေးရှိသော ရှန့်မင်းဆက်သာ ဖြစ်သည်။

ယင်ချီသည် အစီအစဉ်တစ်ခုကို စိတ်ကူးထားပြီးဖြစ်သည်။ နောက် ၁၀ နှစ်အတွင်း ဟွမ်ကျိုးတစ်ခုလုံးကို မင်းဆက်တစ်ခုတည်းအောက်တွင် စုစည်းမည် ထို့နောက် ကံကြမ္မာစက်ဝန်းကို အသုံးပြု၍ ပိုမိုအစွမ်းထက်သော ပုဂ္ဂိုလ်များနှင့် ရင်းမြစ်များကို ဆင့်ခေါ်မည်။

ဤနည်းဖြင့်သာ ဟွမ်ကျိုးလှောင်အိမ်ကို ဖျက်ဆီးပြီး ရှန့်မင်းဆက်ကို ပြန်လည် တိုက်ခိုက်နိုင်မည် ဖြစ်သည်။

ဆယ်နှစ်တစ်ကြိမ် ရှန့်မင်းဆက်သည် ဟွမ်ကျိုးတွင် ကြီးမားသော ရိတ်သိမ်းမှုကို ပြုလုပ်လေ့ရှိသည်။ ထိုရိတ်သိမ်းမှု၏ ပစ်မှတ်များမှာ စစ်မှန်သောနတ်ဘုရားနှင့် ကောင်းကင်နတ်ဘုရားအဆင့် ကျွမ်းကျင်သူများ ဖြစ်သည်။

ယင်ချီပြည်နှင်ဒဏ် မခံရမီကပင် ရိတ်သိမ်းမှုတစ်ခု ပြီးဆုံးသွားခဲ့သဖြင့် နောက် ၁၀ နှစ်အတွင်း နတ်ဘုရားဘုရင် သို့မဟုတ် ရဟန္တာတုအဆင့်ရှိသော ရိတ်သိမ်းသူများ ဆင်းလာဦးမည် မဟုတ်ပေ။

သို့သော်လည်း ယင်ချီ မပေါ့ဆရဲပေ။ သူ အသက်ရှင်လိုလျှင် စစ်မှန်သောနတ်ဘုရား အဆင့်သို့ မတက်ဘဲ အချိန်ဆွဲနေရမည် သို့မဟုတ်ပါက အစွမ်းကုန်ကြိုးစား၍ နတ်ဘုရားဘုရင် သို့မဟုတ် ရဟန္တာတုအဆင့် အစွမ်းများကို ပိုင်ဆိုင်နိုင်အောင် လုပ်ရမည်။

ရဟန္တာတုအဆင့်အစွမ်းရှိမှသာ ရှန့်မင်းဆက်ကို ရင်ဆိုင်ရန် အရည်အချင်းရှိမည် ဖြစ်သည်။

တစ်ဖက်တွင် ကုမျိုးနွယ်စုမှ ကျင့်ကြံသူ နှစ်ဦးက ပတ်ဝန်းကျင်ရှိ အင်အားစုများဆီသို့ သတိပေးချက် ထုတ်ပြန်လိုက်သောအခါ မြို့အသီးသီးမှ မျိုးနွယ်စုများမှာ တစ်ခုပြီးတစ်ခု တုံ့ပြန်လာကြသည်။

နာရီပိုင်းအတွင်းမှာပင် မျိုးနွယ်စုအများအပြားက ကိုယ်စားလှယ်များ စေလွှတ်လာကြသည်။ ကောင်းကင်ဖြစ်စဉ်နယ်စားမင်းတစ်ဦး၏ ဂုဏ်သတင်းမှာ သာမန်မျိုးနွယ်စုများအတွက် မလွန်ဆန်နိုင်သော အရာဖြစ်သည်။

သို့သော် အရာရာတွင် ခြွင်းချက်ရှိမြဲ ဖြစ်သည်။

ယွီမြို့ရှိ ခန့်ညားသော ခန်းမဆောင်တစ်ခုအတွင်း။

လျူမျိုးနွယ်စု၊ ဖုန်းယမျိုးနွယ်စု နှင့် သံနွား မျိုးနွယ်စု အပါအဝင် မျိုးနွယ်စု ပေါင်းများစွာမှ ခေါင်းဆောင်များ စုဝေးနေကြသည်။

ဒီချင်နယ်စားမင်းဆိုတဲ့ လူအကြောင်း မင်းတို့ ဘယ်လို ထင်ကြလဲ။

အမြင့်ပိုင်းထိုင်ခုံမှ သံနွားမျိုးနွယ်စု ခေါင်းဆောင်က ရွှေရောင် သားရေဝတ်စုံကို ဝတ်ဆင်ကာ တောင်ဝှေးကို အားပြုရင်း အခြားခေါင်းဆောင်များကို မေးမြန်းလိုက်သည်။

နာမည်မသိတဲ့နယ်စားမင်းတစ်ယောက်ကို ရုတ်တရက် သွားရန်စမိရင် ငါတို့ ယွီမြို့အတွက် ဘေးအန္တရာယ် ဖြစ်လာမှာ စိုးရိမ်မိတယ်။

ဒါပေမဲ့ လွန်ခဲ့တဲ့နှစ်ပေါင်းနှစ်ရာလုံး ငါတို့ ယွီမြို့ဟာ ဆုန့်မျိုးနွယ်စုရဲ့ အမိန့်ကိုပဲ နာခံလာခဲ့တာ မဟုတ်လား။

သံနွားမျိုးနွယ်စု ခေါင်းဆောင် ပြောပြီးသည်နှင့် ဆံပင်နီနီနှင့် အဘွားအိုတစ်ဦးက တည်ငြိမ်စွာ ပြောလိုက်သည်။

သူမ၏ အရှိန်အဝါမှာလည်း မနည်းလှဘဲ ခရမ်းရောင်နန်းတော်အဆင့်ကျင့်ကြံသူတစ်ဦး ဖြစ်သည်။ ယွီမြို့၏အာဏာတည်ဆောက်ပုံမှာ ယန်ဝူးမြို့နှင့် ဆင်တူပြီး မျိုးနွယ်စု အများအပြားက ပူးတွဲအုပ်ချုပ်ထားခြင်း ဖြစ်သည်။

၎င်းတို့ထဲတွင် အဓိကအာဏာရှိသူများမှာ လျူမျိုးနွယ်စု၊ ဖုန်းယမျိုးနွယ်စုနှင့် သံနွားမျိုးနွယ်စုတို့ ဖြစ်ကြသည်။

သံနွားမျိုးနွယ်စုတွင် ခရမ်းရောင်နန်းတော်အဆင့်ငါးဦးရှိသည့်အပြင် ကောင်းကင်ဖြစ်စဉ်အဆင့်သို့ ရောက်ရန် ခြေတစ်လှမ်းသာ လိုတော့သည့်ဘိုးဘေးတစ်ဦးလည်း ရှိသည်။

ပို၍ အရေးကြီးသည်မှာ သံနွားမျိုးနွယ်စု၏ ဆက်ခံသူမှာ ဆုန့်မျိုးနွယ်စုမှ ကောင်းကင်ဖြစ်စဉ်နယ်စားမင်းတစ်ဦး၏ တိုက်ရိုက်တပည့်အဖြစ် သတ်မှတ်ခြင်း ခံထားရခြင်းပင်။

"ဘာကို ကြောက်နေတာလဲ"

နာမည်မရှိတဲ့ကောင်းကင်ဖြစ်စဉ် နယ်စားမင်းတစ်ယောက်တည်းကိုလား ငါတို့ ယွီမြို့ရဲ့ နောက်ကွယ်မှာ ဆုန့်မျိုးနွယ်စုရှိတယ်လေ။

ဒီမူယာမင်းဆက်မှာ ဆုန့်မျိုးနွယ်စုရဲ့ ရှေ့ရောက်ရင် ဘယ်နယ်စားမင်းမဆို သူ့ကိုယ်သူ ဘယ်လောက် အရေးပါလဲဆိုတာ အရင်ချိန်ဆရလိမ့်မယ်။

အခြားသော ခရမ်းရောင်နန်းတော်အဆင့် ကျင့်ကြံသူတစ်ဦးက ပြောလိုက်သည်။ သူသည် အရပ်ရှည်ပြီး ဗလကောင်းသူဖြစ်ကာ ရှေးဟောင်း ဝက်ဝံကြီးတစ်ကောင်နှင့် တူသည်။ သူသည် သံနွားမျိုးနွယ်စုမှ အကြီးအကဲတစ်ဦးဖြစ်ပြီး သူ၏ စကားများတွင် ယုံကြည်မှုနှင့် မောက်မာမှုများ ပြည့်နှက်နေသည်။

ဆုန့်မျိုးနွယ်စုကို အားကိုးပြီးနာမည်မသိသော နယ်စားမင်းတစ်ဦး၏ ရှေ့တွင် သူတို့သံနွားမျိုးနွယ်စုမှာ ယုံကြည်မှု အပြည့်ရှိနေသည်။

ထို့ပြင် နယ်စားမင်းများကြားတွင်လည်း အင်အားချင်း ကွာခြားမှု ရှိပေသည်။ ဆုန့်မျိုးနွယ်စု၏ရှေ့တွင် သာမန်ကောင်းကင်ဖြစ်စဉ် အစောပိုင်းအဆင့် ကျွမ်းကျင်သူမှာ ဘာမှ မဟုတ်ပေ။ ဆုန့်မျိုးနွယ်စုတွင် နယ်စားမင်း ငါးဦးစလုံးမှာ ကောင်းကင်ဖြစ်စဉ် ပြီးပြည့်စုံခြင်းအဆင့်များ ဖြစ်ကြသည်ကို လူတိုင်း သိထားကြသည်။

ထိုကဲ့သို့ အခြေခံအုတ်မြစ် ရှိသောကြောင့်သာ ဆုန့်မျိုးနွယ်စုသည် မူယာမင်းဆက်၏ ပုန်ကန်မှုများတွင် ဝင်ရောက် ပါဝင်ရဲခြင်း ဖြစ်သည်။

အကယ်၍ ဆုန့်မျိုးနွယ်စုမှ ဝိညာဉ်မဲ့နတ်ဘုရားတစ်ယောက်သာ ထွက်ပေါ်လာပါက သူတို့သည် ဧကရာဇ်မျိုးနွယ်စုအဖြစ် သတ်မှတ်ခံရပြီး မင်းဆက်တစ်ခုကိုပင် တည်ထောင်နိုင်မည် ဖြစ်သည်။

"ကောင်းပြီ"

"အားလုံးငြိမ်ကြစမ်း။"

ခန်းမအတွင်း အခြေအနေ ရှုပ်ထွေးတော့မည့်အခြေအနေတွင် သံနွားမျိုးနွယ်စု ခေါင်းဆောင်က ပြန်ပြောလိုက်သည်။

သူ ပြောလိုက်သည်နှင့် အားလုံး ချက်ချင်း တိတ်ဆိတ်သွားကြသည်။

မျိုးနွယ်စုခေါင်းဆောင်မှာကျေနပ်သွားပြီးဆက်ပြောလိုက်သည်မှာ "အားလုံးငါ့စကားကိုနားထောင်ကြ"