အခန်း (၂၈) ချူမင်းဆက်၏ဒေါသ

ပိုင်ချီ၏ အချက်အလက်အားလုံးကို နားလည်ပြီးနောက် ယင်ချီသည် ခဏမျှ စဉ်းစားခန်းဝင်သွားသည်။ အကယ်၍ သွေးရိပ်သည် တတိယတန်းစား စစ်သူကြီးဆိုလျှင် ပိုင်ချီမှာမူ ထိပ်တန်းအဆင့် စစ်သေနာပတိချုပ် ဖြစ်သည်မှာသေချာလှသည်။

သူ၏ထူးခြားစွမ်းရည်မှာ စစ်တပ်တစ်ခုလုံး၏ တိုက်ခိုက်ရေးစွမ်းရည်ကို အဆပေါင်းများစွာ မြှင့်တင်ပေးနိုင်သဖြင့် ဤသည်မှာ လက်နက်မဲ့ တပ်သားများကိုပါ အစွမ်းထက်သည့် စစ်သည်တော်များအဖြစ် ပြောင်းလဲပေးနိုင်သော အံ့မခန်းစွမ်းအား ဖြစ်သည်။

ပိုင်ချီ၏ သွေးရူးသွပ်သူတော်စင်ခန္ဓာမှာလည်း တိုက်ပွဲအတွက် မွေးဖွားလာခြင်း ဖြစ်ပြီး အနာဂတ်တွင် သူတော်စင် သို့မဟုတ် ဧကရာဇ်တစ်ပိုင်းအဆင့်အထိ တက်လှမ်းနိုင်မည့် အလားအလာရှိသည်။

ပိုင်ချီ ငါ့ရဲ့အမိန့်ကို နာခံစေ မင်းကို မဟာချင်ရဲ့စစ်သေနာပတိချုပ်အဖြစ် ခန့်အပ်တယ်။ မဟာချင်မင်းဆက်ရဲ့ လေးသန်းသော မှောင်မိုက်ရိပ်တပ်မတော်ဟာ မင်းရဲ့အမိန့်အောက်မှာ ရှိစေရမယ်။

မင်းကိုဆယ်ရက် အချိန်ပေးမယ် ဝူးမြစ်တောင်ဘက်ကမိုင်ပေါင်း ငါးသိန်းပတ်လည် နယ်မြေကို သိမ်းပိုက်ပြီး ဆုန့်မျိုးနွယ်စုကို အပြတ်အသတ် ချေမှုန်းပစ်လိုက်ပါ။

နောက်ပြီး မကြာခင်မှာ ချူမင်းဆက်က ငါတို့ဆီ ကျူးကျော်လာလိမ့်မယ်။ အဲဒါအတွက်လည်း အသင့်ပြင်ထားပါ။

ယင်ချီသည် သူ၏စွမ်းအားဖြင့် စစ်မိန့်တံဆိပ်ကို ပိုင်ချီ၏လက်ထဲသို့ ပေးလိုက်သည်။

ကျွန်တော်မျိုးပိုင်ချီ အရှင်မင်းကြီးရဲ့ ကျေးဇူးတော်ကိုခံယူပါတယ်။ ဆုန့်မျိုးနွယ်စုအတွက် ဆယ်ရက်မလိုပါဘူး။ နှစ်ရက်အတွင်းမှာပဲ အကုန်ရှင်းပစ်ပါ့မယ်။ အကယ်၍ ချူမင်းဆက်က ကျူးကျော်လာခဲ့ရင်လည်း သူတို့ရဲ့ဝိညာဉ်တွေ လွင့်စင်ပြီး အရိုးတွေ ဖုန်ဖြစ်သွားအောင် ကျွန်တော်မျိုး လုပ်ဆောင်ပါ့မယ်။

ပိုင်ချီက ယုံကြည်မှုအပြည့်ဖြင့် ကတိပေးလိုက်သည်။ ပိုင်ချီသည် ရန်သူများကို အမြစ်ပြတ် သုတ်သင်ပြီး အရှင်လတ်လတ် မြေမြှုပ်ပစ်တတ်သည့် အလေ့အထရှိသူ ဖြစ်သည်။

ယင်ချီသည် သွေးရိပ်ကို ပြစ်မှုဆိုင်ရာဌာန အကြီးအကဲအဖြစ် ခန့်အပ်လိုက်ပြီး ကုမျိုးနွယ်၊ ကျန်းမျိုးနွယ် စသည့် မျိုးနွယ်စု ခြောက်ခုမှ လူများကိုလည်း အဆင့်အလိုက် အရာရှိရာထူးများ ပေးအပ်ခဲ့သည်။

ထို့နောက် ယင်ချေသည် ကံစမ်းမဲမှ ရရှိထားသော အထူးတပ်သား ၂ သိန်း၊ သွေးရိပ်အစောင့်တပ် ၃၀၀ နှင့် ထောက်လှမ်းရေးအဖွဲ့ ထျန်းကျီဂေတို့ကိုလည်း နေရာချထားပေးလိုက်သည်။

ယင်ချီသည် ရှန့်မင်းဆက်၏ရိတ်သိမ်းချိန်မရောက်မီ အဆင်သင့် ဖြစ်နေစေရန် အပြင်းအထန် ကျင့်ကြံအားထုတ်ရန် ဆုံးဖြတ်လိုက်သည်။

သူ၏ရည်မှန်းချက်မှာ ရိတ်သိမ်းချိန်မတိုင်မီ သူတော်စင်တစ်ပိုင်းအဆင့်သို့ ရောက်ရှိရန်နှင့် ဘာရန်ပြည်နယ်တစ်ခုလုံးကို စုစည်းကာ အကျဉ်းထောင်မှ လွတ်မြောက်ရန် ဖြစ်သည်။

တစ်ချိန်တည်းမှာပင် မဟာချူမင်းဆက်၏ ဧကရာဇ်မြို့တော်ရှိ ဝိညာဉ်ဆီမီးဆောင်၌

ဝိညာဉ်ဆီမီးများကို စောင့်ကြပ်နေသော ဝိညာဉ်မဲ့နတ်ဘုရားအဆင့် အကြီးအကဲတစ်ဦးမှာ မျက်နှာပျက်သွားခဲ့သည်။

အိမ်ရှေ့စံချူလုံထန်၊ ဘိုးဘေး ချူဟွိုက်ရှင်း နှင့် ချူဟန်ယာ တို့၏ဝိညာဉ်ဆီမီးများမှာ တစ်ခုပြီးတစ်ခု ငြိမ်းသွားသောကြောင့် ဖြစ်သည်။

"ဒုက္ခပဲ... တကယ့်ကို ကပ်ဘေးဆိုက်ပြီ"

ထိုအကြီးအကဲမှာ တုန်တုန်ရင်ရင်ဖြင့် ဘိုးဘေးများ တရားထိုင်ရာ လျှို့ဝှက်နယ်မြေသို့ အပြေးအလွှား သတင်းပို့ခဲ့သည်။

ချူမင်းဆက်၏နိုးထလာသော စစ်မှန်သောနတ်ဘုရားဘိုးဘေးကြီးများသည် ချူလုံထန် သေဆုံးသွားသည်ကို ကြားသောအခါ ရူးသွပ်မတတ် ဒေါသထွက်ကုန်ကြသည်။

ချူလုံထန်မှာ ချူမင်းဆက်၏ အနာဂတ်နှင့် ကံကြမ္မာကို ထမ်းပိုးထားသူဖြစ်သဖြင့် သူ သေဆုံးခြင်းမှာ ချူမင်းဆက်၏ အခြေခံအုတ်မြစ်ကြီးကို ဖြိုဖျက်လိုက်ခြင်းပင် ဖြစ်သည်။

"ဘယ်သူလုပ်တာလဲ ဘယ်သူလဲ"

ငါတို့ ချူမင်းဆက်ရဲ့ အခြေခံကို ဖျက်ဆီးတဲ့သူဟာ ဘယ်သူပဲဖြစ်ဖြစ် ဘယ်အင်အားစုပဲဖြစ်ဖြစ် သွေးကြွေးပြန်ဆပ်စေရမယ်။

ချူမင်းဆက်ဘိုးဘေးကြီးများ၏ဒေါသတကြီးဟိန်းဟောက်သံများမှာမိုင်ပေါင်းသိန်းချီသောနယ်မြေအထိပဲ့တင်ထပ်သွားတော့သည်။