အခန်း (၂၅)  ကံကြမ္မာရွှေနဂါး

ဟင်းလင်းပြင်အတွင်း၌ ချူဟန်ယာ၏ ဝိညာဉ် လုံးဝဥဿုံ ပျက်သုဉ်းသွားပြီးနောက်မှသာ ယင်ချီ၏ ပုံရိပ်မှာ ဖြည်းညှင်းစွာ ထွက်ပေါ်လာသည်။

သူ ယခုလေးတင် အသုံးပြုခဲ့သော သတ်ဖြတ်ခြင်း နတ်ဘုရားပညာရပ်မှာ ကိုးလုံးသစ္စာစကားဖြစ်ပြီး ၎င်း၏ အဆင့်အတန်းမှာ သူတော်စင်အဆင့်ကိုပင် ကျော်လွန်နေပြီ ဖြစ်သည်။

မဟာချင်ဧကရာဇ် သက်တော်ရာကျော် ရှည်ပါစေ... မဟာချင်မင်းဆက်ထာဝရ တည်တံ့ပါစေ"

ယင်​ချီပေါ်လာသည်နှင့် တစ်ပြိုင်နက် ယန်ဝူးမြို့ရှိ ကျင့်ကြံသူ မြောက်မြားစွာတို့သည် မြေပြင်ပေါ်တွင် ဝပ်စတွား၍ အရိုအသေပြု ကြည်ညိုကြတော့သည်။

တိုင်းပြည်အသီးသီးမှ စေလွှတ်လိုက်သော ဝိညာဉ်မဲ့နတ်ဘုရားဘိုးဘေးများပင်လျှင် ဒူးတစ်ဖက်ထောက်ကာ ခန့်ညားထည်ဝါသော အရှိန်အဝါကြောင့် အံ့ဩတုန်လှုပ်နေကြရသည်။

နက်မှောင်သော ဧကရာဇ်ဝတ်စုံကို ဝတ်ဆင်ထားပြီး နောက်ကျောတွင် နတ်ဘုရားအလင်းကွင်း နှစ်ထပ် ရှိနေသော ယင်ချီကို မြင်သောအခါ ဆုန့်နယ်စားမင်း၏ စိတ်ဓာတ်မှာ လုံးဝ အောက်ခြေသို့ ထိုးဆင်းသွားတော့သည်။ စစ်မှန်သော နတ်ဘုရားတစ်ပါးကို သူ၏ ဆုန့်မျိုးနွယ်စုက မည်သို့ ခုခံနိုင်မည်နည်း။

ချူမင်းဆက်၏ သံတမန်အဖွဲ့တွင်မူ ချူလုံထန်သည် သူ၏ ဘိုးဘေး အသတ်ခံလိုက်ရသဖြင့် မျက်နှာပျက်သွားသော်လည်း အကြောက်အလန့် မရှိသေးပေ။

သူသည် သူတော်စင်အမွေအနှစ်နှင့် ဘိုးဘေးလက်နက်များ ရှိနေသည်ဟု ယုံကြည်နေဆဲ ဖြစ်သည်။ သို့သော် သူ၏ ထိုယုံကြည်မှုမှာ ခဏချင်းပင် ပြိုလဲသွားခဲ့သည်။

ယင်ချီသည် လက်ကိုမြှောက်ကာ ဟင်းလင်းပြင်ကို ဖြတ်၍ ချူမင်းဆက် သံတမန်အဖွဲ့ကို လှမ်းဖမ်းလိုက်ရာ ချူလုံထန် အပါအဝင် တပ်သားထောင်ပေါင်းများစွာမှာ ယင်ချီ၏လက်ဝါးပြင်ကြီးအတွင်း၌ အဖမ်းခံလိုက်ရတော့သည်။

"ဒီချင်ဧကရာဇ်က ချူလုံထန်ကို တကယ်ပဲ သတ်တော့မှာလား"

ချုံလန်မင်းဆက် မှ သံတမန်မှာ နဖူးမှ ချွေးစများ ထွက်လာသည်။ ချူလုံထန်ကို သတ်ခြင်းသည် ချူမင်းဆက်၏ဘိုးဘေးသင်္ချိုင်းကို တူးခြင်းထက်ပင် ပို၍ ကြီးလေးသော ကိစ္စဖြစ်သည်။ထို့ကြောင့် သူက ရှေ့သို့ ထွက်ကာ ယင်ချီကို ဖျောင်းဖျရန် ကြိုးစားသည်။

အရှင်မင်းကြီး စိတ်အေးအေးထားပါ ချူမင်းဆက်ရဲ့ တပ်သားတွေနဲ့ ဘိုးဘေးဟန်ယာကို သတ်လိုက်တာက ကိစ္စမရှိပေမယ့် အိမ်ရှေ့စံကိုတော့ ချမ်းသာပေးစေချင်ပါတယ်။ မဟာချင်က အခုမှ တည်ထောင်ကာစမို့ ရန်သူအင်အားကြီးတွေ မထားတာ ပိုကောင်းပါလိမ့်မယ်။

ယင်ချီသည် လက်ရှိတွင် ချူမင်းဆက်နှင့် စစ်ဖြစ်ရန် မသင့်တော်သည်ကို သိသည်။ ချူမင်းဆက်တွင် ဝိညာဉ်မဲ့နတ်ဘုရား ဆယ်ဂဏန်းနှင့် စစ်မှန်သော နတ်ဘုရားအချို့လည်း ပုန်းကွယ်နေနိုင်သောကြောင့် ဖြစ်သည်။ သို့သော် ထိုစဉ်မှာပင် သူ၏ စိတ်ထဲ၌ကံကြမ္မာစက်ဝန်းမှ အချက်ပေးသံတစ်ခု ပေါ်လာသည်။

 သခင်သည် ကံကြမ္မာသားတော်ချူလုံထန်ကို တွေ့ရှိသည်။ ၎င်းတွင် ကံကြမ္မာတန်ဖိုး ၁၀၀,၀၀၀ ရှိသည်။ သခင်အနေဖြင့် သူ့ကို အမြန်ဆုံး သုတ်သင်ရန် အကြံပြုပါသည်။

အကယ်၍ သုတ်သင်နိုင်ပါက သခင်၏ အဖွဲ့အစည်းတွင် ကံကြမ္မာတန်ဖိုး ၁၀၀,၀၀၀ တိုးလာမည့်အပြင် ကံစမ်းမဲ ၁၀ ကြိမ် ရရှိပါမည်။

ဤသတင်းစကားကြောင့် ယင်ချီ၏စိတ်မှာ လုံးဝ ပြတ်သားသွားတော့သည်။ ဝတ္ထုများထဲတွင် ကံကြမ္မာသားတော်များကို အသက်ချမ်းသာပေးခဲ့သော ဗီလိန်များမှာ နောက်ဆုံးတွင် အသတ်ခံရမြဲ မဟုတ်ပါလား။

မဟာချင်ရဲ့ ဂုဏ်သိက္ခာကို ဘယ်သူမှ နင်းခြေလို့ မရဘူး။

ဒီနေ့ကစပြီး ငါ့ရဲ့မဟာချင်ဟာ ဘာရန်ပြည်နယ်မှာ အခိုင်အမာ ရပ်တည်လိုက်ပြီ။

ဂျိန်း

ယင်ချေ၏ ကြေညာချက်အပြီးတွင် ကောင်းကင်ယံ၌ မိုးကြိုးသံများ မြည်ဟည်းသွားကာ ယန်ဝူးမြို့တော်အထက်တွင် ခရမ်းရောင် မင်္ဂလာအရှိန်အဝါများ စုစည်းလာပြီး ကံကြမ္မာ၏ရွှေနဂါးတစ်ကောင် ပေါ်ထွက်လာတော့သည်။

တစ်ချိန်တည်းမှာပင်ယင်ချီ၏လက်ဝါးအတွင်း၌ရှိနေသောချူလုံထန်နှင့်ချူမင်းဆက်သံတမန်အားလုံး၏ဝိညာဉ်များသည်တစစီကြေမွပျက်စီးသွားကြတော့သည်။