အခန်း (၂၄) စကားတစ်ခွန်းဖြင့် ဝိညာဉ်မဲ့နတ်ဘုရား သေဆုံးခြင်း

ယန်ဝူးဧကရာဇ်မြို့တော်၏ သတ်ဖြတ်ရေးစစ်ဗျူဟာများ ခင်းကျင်းထားသော လျှို့ဝှက်အခန်းအတွင်း၌ ယင်ချီသည် ကြမ်းပြင်ပေါ်တွင် တင်ပလ္လင်ခွေထိုင်နေပြီး သူ၏ အရှိန်အဝါမှာ ဝိညာဉ်မဲ့နတ်ဘုရားအဆင့်မှ စစ်မှန်သောနတ်ဘုရား အစောပိုင်းအဆင့်သို့ လုံးလုံးလျားလျား ကူးပြောင်းသွားခဲ့ပြီ ဖြစ်သည်။ သူ၏ အရှိန်အဝါမှာ အဆင့်တက်လာသူနှင့်မတူဘဲ အလွန်ပင် တည်ငြိမ်လှသည်။

အမှန်စင်စစ်သူသည် ကျင့်စဉ်ကို ဆက်လက်တက်လှမ်းနိုင်သော်လည်း အပြင်ဘက်မှ အခြေအနေမှာ အလွန်ဆိုးရွားနေပြီဖြစ်သည်။ အကယ်၍ သူသာ လက်ပိုက်ကြည့်နေပါက ခြောက်လကြာ ပြုစုပျိုးထောင်ခဲ့သော ယန်ဝူးမြို့တော်မှာ ပျက်စီးသွားပေလိမည်။

"မဟာချူမင်းဆက်"

"မင်းတို့က တကယ်ပဲ သေတွင်းတူးနေကြတာပဲ"

ယင်ချီသည် တရားထိုင်ရာမှ ဖြည်းညှင်းစွာ ထလိုက်သည်။ သူသည် အပြင်ဘက်တွင် ဖြစ်ပျက်သမျှကို သိရှိပြီး ဖြစ်သည်။ ဤဖြစ်ရပ်ကြောင့် မဟာချင်မင်းဆက်တွင် အစွမ်းထက်သော ကာကွယ်ရေး စစ်ဗျူဟာများ လိုအပ်နေသေးကြောင်း သူသဘောပေါက်လိုက်သည်။

ကောင်းကင်ယံအောက်တွင် ချူဟန်ယာ၏ မျက်နှာမှာ ရက်စက်ကြမ်းကြုတ်မှုများဖြင့် ပြည့်နှက်နေသည်။ ဝိညာဉ်မဲ့နတ်ဘုရား အစောပိုင်းအဆင့်ရှိသူ (သွေးရိပ်) ထံတွင် အရှက်ရခဲ့သဖြင့် သူသည် ဒေါသတကြီးဖြင့် မြို့ကို အစုလိုက်အပြုံလိုက် သတ်ဖြတ်ရန် ဆုံးဖြတ်လိုက်ခြင်း ဖြစ်သည်။

ချူမင်းဆက်၏ အိမ်ရှေ့စံ ချူလုံထန်မှာမူ ချူဟန်ယာ၏ လုပ်ရပ်မှာ အနည်းငယ် အသိဉာဏ်ကင်းမဲ့သည်ဟု ထင်သော်လည်း တားဆီးခြင်း မပြုခဲ့ပေ။

ဓားနဂါးစစ်ဗျူဟာ၏ အောက်တွင် ယန်ဝူးမြို့တော်ရှိ လူသန်းပေါင်းများစွာမှာ မျှော်လင့်ချက်မဲ့စွာဖြင့် မြို့စားနန်းတော်ရှိရာသို့ ဦးညွှတ်ကာ ဆုတောင်းနေကြသည်။

"အရှင်မင်းကြီး... ကယ်တော်မူပါ"

"မဟာချင်ဧကရာဇ်... ကယ်တော်မူပါ"

တိုင်းသူပြည်သားများ၏ အော်ဟစ်သံများကြားတွင် ယင်ချီ၏အကြည့်မှာ ချူဟန်ယာနှင့် ဓားနဂါးစစ်ဗျူဟာထံသို့ ကျရောက်သွားသည်။

"လင်ရောက်ရှိစေသတည်း"

နောက်တစ်စက္ကန့်တွင် ယင်ချီသည် တည်ငြိမ်ရိုးရှင်းသော စကားလုံးတစ်လုံးကို မြွက်ဟလိုက်သည်။ တစ်ခဏအတွင်းမှာပင် ကောင်းကင်ယံကြီးမှာ အက်ကွဲသွားသကဲ့သို့ ဖြစ်သွားပြီး ရွှေရောင်အလင်းတန်းများ မြစ်ချောင်းအင်းအိုင်များအထိ ဖြာကျလာတော့သည်။

ထို "လင်" ဟူသော စကားလုံး ကျဆင်းလာသည်နှင့် ယန်ဝူးမြို့တော်အထက်ရှိ ဓားနဂါးစစ်ဗျူဟာကြီးမှာတိုက်ရိုက်ပင် ပြိုကွဲပျက်စီးသွားတော့သည်။

"ဝူး... ဝူး"

မိုင်ပေါင်းထောင်ချီ ရှည်လျားသော နဂါးနက်ကြီးမှာ စူးစူးဝါးဝါး အော်ဟစ်ကာ သေဆုံးသွားပြီး ချူဟန်ယာ၏အသက်သွေးကြောဖြစ်သော အရိုးဖြူဓားမှာလည်း အစိတ်စိတ်အမွှာမွှာ ကြေမွသွားခဲ့သည်။

ချူဟန်ယာသည် ပါးစပ်မှ နတ်ဘုရားသွေးများကို အန်ထုတ်လိုက်ရပြီး သူ၏ မျက်လုံးများမှာ ထိတ်လန့်မှုများဖြင့် ပြည့်နှက်သွားသည်။

သူသည် ယင်ချီ၏ ပုံရိပ်ကိုပင် မမြင်ရသေးဘဲ စကားတစ်ခွန်းတည်းဖြင့် သူ၏ အစွမ်းထက်ဆုံး ပညာရပ်များမှာ အဖျက်ဆီးခံလိုက်ရခြင်း ဖြစ်သည်။ ဤသည်မှာစစ်မှန်သောနတ်ဘုရားသာ တတ်နိုင်သော အစွမ်းမျိုး ဖြစ်သည်။

ချူဟန်ယာသည် သတိပြန်ဝင်လာပြီး ထွက်ပြေးရန် ကြိုးစားသော်လည်း သူ၏ ခန္ဓာကိုယ်မှာ နေရောင်အောက်ရှိ ရေပူဖောင်းလေးများကဲ့သို့ တဖြည်းဖြည်း ပျော်ကျပျောက်ကွယ်လာသည်ကို ထိတ်လန့်ဖွယ် တွေ့ရှိလိုက်ရသည်။

"ဟင့်အင်း"

နောက်ဆုံးတွင် ရွှေရောင်အလင်းတန်းများအောက်၌ ချူဟန်ယာသည် အော်ဟစ်ချိန်ပင်မရဘဲ လုံးဝ ပျောက်ကွယ် ပျက်သုဉ်းသွားတော့သည်။

ဤကြောက်မက်ဖွယ် မြင်ကွင်းကြောင့် ချုံလန်မင်းဆက်မှ ဝိညာဉ်မဲ့နတ်ဘုရား သံတမန်ပင်လျှင် ကြက်သီးမွေးညင်း ထသွားရသည်။

ဝိညာဉ်မဲ့နတ်ဘုရားပြီးပြည့်စုံခြင်းအဆင့်နှင့်နီးစပ်သူတစ်ဦးကိုလူကိုယ်တိုင်ပင်မပြဘဲစကားတစ်ခွန်းတည်းဖြင့်အစပျောက်အောင်သတ်ဖြတ်နိုင်ခြင်းမှာသာမန်စစ်မှန်သောနတ်ဘုရားအစောပိုင်းအဆင့်ထက်များစွာသာလွန်သောစွမ်းအားမျိုးပင်ဖြစ်တော့သည်။