အခန်း (၂၃) ဓားနဂါးစစ်ဗျူဟာနှင့် ချူဟန်ယာ

ချူဟန်ယာသည် ကောင်းကင်ယံသို့ တစ်လှမ်းချင်း တက်လှမ်းသွားစဉ် မိုင်ပေါင်း တစ်သိန်းပတ်လည်အတွင်းရှိ ကျင့်ကြံသူအားလုံး၏ ဓားရှည်များသည် ဘုရင်တစ်ပါးကို အရိုအသေပေးသည့်အလား ငြိမ့်ညောင်းသော မြည်ဟည်းသံများ ထွက်ပေါ်လာသည်။

ငါဟာ အသက်သုံးနှစ်မှာ ဓားကျင့်စဉ်ကို စတင်ခဲ့ပြီး ဆယ်နှစ်မှာအခြေခံအောင်မြင်ခဲ့တယ်။ အသက်သုံးရာမှာတော့ ငါ့ရဲ့ဓားနဲ့ပဲ နတ်ဘုရားမီးလျှံကို ထွန်းညှိပြီး နတ်ဘုရားတစ်ပါး ဖြစ်လာခဲ့တာ။ ငါ့ရဲ့ဓားချက်နဲ့ သေရတာဟာ မင်းဘဝအတွက် ကံကောင်းခြင်းတစ်ခုပဲ။

ချူဟန်ယာ၏ လက်ထဲတွင် အရိုးဖြူဓားတစ်လက် ပေါ်ပေါက်လာပြီး သူ၏အိုမင်းရင့်ရော်နေသော ရုပ်သွင်မှာလည်း နုပျိုသော လူငယ်လေးတစ်ဦးအဖြစ် ပြောင်းလဲသွားသည်။ 

သူသည် ဓားကိုဝှေ့ယမ်းကာ သွေးရိပ်ထံသို့ တိုက်ခိုက်လိုက်ရာ မိုင်ပေါင်းထောင်ချီသော လေစီးကြောင်းများ တုန်ခါသွားတော့သည်။

သွေးရိပ်သည် ထိုကြောက်မက်ဖွယ် ဓားချက်ကို ရင်ဆိုင်ရာတွင် တည်ငြိမ်နေဆဲ ဖြစ်သည်။ သူ၏ ဘေးပတ်လည်တွင် သွေးရောင်အလင်းတံတိုင်းများဖြင့် ကာကွယ်ထားသည်။

အလကားပဲ ငါ့ရဲ့ဒီဓားချက်ကို မင်းတောင့်ခံနိုင်မှာ မဟုတ်ဘူး။ ငါ နောက်ထပ် နှစ်ချက်ပဲ တိုက်ခိုက်မယ်။ ဒါဟာ မင်းရဲ့နတ်ဘုရားမီးလျှံကို ငြိမ်းသတ်ပြီး မင်းရဲ့ဝိညာဉ်ကိုပါ လောင်ကျွမ်းစေလိမ့်မယ်။

ချူဟန်ယာသည် သူ၏အရိုးဖြူဓားကို အသုံးပြု၍ ဒုတိယနှင့် တတိယ ဓားချက်များကို ဆက်တိုက် ထုတ်ဖော်လိုက်သည်။ ဓားအတွင်းမှ မိုင်ပေါင်းထောင်ချီ ရှည်လျားသော နဂါးနက်ကြီးတစ်ကောင် ထွက်ပေါ်လာပြီး သွေးရိပ်ကို ဝါးမြိုရန် ကြိုးစားတော့သည်။

ဤမြင်ကွင်းကို ကြည့်ပြီး တိုင်းပြည်အသီးသီးမှ သံတမန်များမှာ ဟိုးလေးတကျော် ဖြစ်ကုန်ကြသည်။ အထူးသဖြင့် ဆုန့်မျိုးနွယ်စုမှ သံတမန် ဆုန့်ရွှေဟိုမှာမူ အလွန်ပင် ဝမ်းသာနေသည်။ အကယ်၍ ယင်ချီနှင့် ချူမင်းဆက်တို့ အသေအလဲ တိုက်ခိုက်ကြပါက ဆုန့်မျိုးနွယ်စုအတွက် အခွင့်ကောင်းပင် မဟုတ်ပါလား။

အခြားတစ်ဖက်တွင် ချုံလန်မင်းဆက် မှ သံတမန်သည် သွေးရိပ်ကို ကူညီရန် အသင့်ပြင်နေသည်။ သို့သော် သူ ရှေ့သို့ ထွက်မည့်အချိန်၌ပင် မှင်တက်သွားရသည်။ ချူဟန်ယာ၏ ပြင်းထန်သော ဓားချက်သုံးချက်အောက်တွင် သွေးရိပ်မှာ အထိအခိုက်မရှိ ရပ်နေနိုင်သောကြောင့် ဖြစ်သည်။

"ဒါ မင်းရဲ့ဓားလမ်းစဉ်လား ဒီလောက်ပဲလား"

ကောင်းကင်ယံတွင် သွေးရိပ်၏ခန္ဓာကိုယ်မှာ သွေးစက်များအဖြစ် ပြောင်းလဲသွားပြီး ချူဟန်ယာ၏ ဓားစွမ်းအင်များကို ထူးဆန်းစွာ စုပ်ယူပယ်ဖျက်ပစ်လိုက်သည်။

"ဟင်း ဒါကလှည့်ကွက်တစ်ခုပါပဲ။ ငါ့ရဲ့ ဓားချက်သုံးချက်ကို တားနိုင်ရုံနဲ့ မပြီးသေးဘူး။ အခု တကယ့်အစ်အမှန်ကို ခံစားကြည့်လိုက်စမ်း ဓားနဂါးစစ်ဗျူဟာ ထွက်ပေါ်လာစမ်း"

ချူဟန်ယာသည် သူ၏စွမ်းအားအားလုံးကို ထုတ်သုံးလိုက်ရာ အရိုးဖြူဓားမှာ နဂါးနက်ကြီးနှင့် ပေါင်းစပ်သွားပြီး မိုင်ပေါင်းထောင်ချီ လွှမ်းခြုံသော သတ်ဖြတ်ရေး စစ်ဗျူဟာကြီးအဖြစ် ပြောင်းလဲသွားသည်။ ဤစစ်ဗျူဟာမှာ ချူမင်းဆက်၏အထွတ်အထိပ် နည်းစနစ်တစ်ခု ဖြစ်သည်။

"ဘာ... ချူဟန်ယာ မင်း ရူးနေတာလား"

ယန်ဝူးမြို့တော် တစ်ခုလုံးကို ဖုံးလွှမ်းသွားသော စစ်ဗျူဟာကြီးကို မြင်သောအခါ အခြားသံတမန်များမှာ ထိတ်လန့်သွားကြသည်။

အကယ်၍ ဤစစ်ဗျူဟာသာ အသက်ဝင်လာပါက မြို့တော်အတွင်းရှိ လူဦးရေ သန်းတစ်ရာနီးပါးမှာ အစုလိုက်အပြုံလိုက် သေဆုံးသွားနိုင်သောကြောင့် ဖြစ်သည်။ ဤသည်မှာ လူမျိုးတူချင်း သတ်ဖြတ်သည့် အလွန်ရက်စက်သော လုပ်ရပ်ပင် ဖြစ်သည်။

"ချူဟန်ယာ... မင်း စည်းကျော်နေပြီ ဒါဟာ ဘာရန်ပြည်နယ်ရဲ့ နိယာမတွေကို စိန်ခေါ်နေတာပဲ"

အချို့သော နယ်စားမင်းများက အော်ဟစ်တားဆီးကြသော်လည်း ဝိညာဉ်မဲ့နတ်ဘုရားအဆင့်ရှိသော သံတမန်များကမူ မတားဆီးကြပေ။ သူတို့သည် မဟာချင်၏ ဧကရာဇ်သစ်က ဤအခြေအနေကို မည်သို့ကိုင်တွယ်မည်နည်း ဆိုသည်ကိုသာ စောင့်ကြည့်လိုနေကြသည်။