အခန်း (၁၄၇)  ထူးဆန်းသော ဘိုးဘေးမြေ

"အားလုံး မထိတ်လန့်ကြနဲ့"

"ငါတို့မျိုးနွယ်စုဟာ ဘေးဒုက္ခနဲ့ ရင်ဆိုင်နေရလို့ မင်းတို့ရဲ့ စတေးမှု လိုအပ်နေတာပဲအားလုံး အခြေအနေငြိမ်သက်သွားရင် မင်းတို့ကို ဘိုးဘေးမြေကနေ ပြန်လည်ရှင်သန်ခွင့်ပေးမယ်လို့ ငါကတိပေးတယ်"

ဘိုးဘေးယွမ်ဟဲ၏ အသံသည် ဟိန်းထွက်လာပြီး ထိတ်လန့်နေသော အမှောင်မျိုးနွယ်စုဝင်များကို စည်းရုံးလိုက်သည်။

သူ၏ စကားအဆုံးတွင် အမှောင်သတ္တဝါများသည် ကြောက်ရွံ့မှုများ ပျောက်ကွယ်သွားပြီး ဘိုးဘေးကြီးအတွက် အသက်ပေးရန် အသင့်ဖြစ်သွားကြတော့သည်။

ဘိုးဘေးယွမ်ဟဲသည် ၎င်းတို့၏ အသက်စွမ်းအားနှင့် သွေးများကို စုပ်ယူကာ သူ၏ ဒဏ်ရာများကို တည်ငြိမ်အောင် လုပ်ဆောင်နိုင်ခဲ့သော်လည်း ရန်ကျန့်ကို ရင်ဆိုင်ရန် မဝံ့သေးဘဲ ထွက်ပြေးနှုန်းကိုသာ မြှင့်တင်လိုက်သည်။

နာမည်မဲ့ဧကရာဇ်သည် အသက်ပေးရန် အသင့်ဖြစ်နေသော အမှောင်သတ္တဝါများကို ကြည့်ကာ မျက်မှောင်ကြုတ်လိုက်ပြီး သူ၏ လေးကို ဆွဲကာပစ်ခတ်လိုက်သည်။

မြားချက်များအောက်တွင် အမှောင်သတ္တဝါ အမြောက်အမြား အပိုင်းပိုင်းပြတ်ကာ သေဆုံးကုန်ကြသဖြင့် ဘိုးဘေးယွမ်ဟဲ စုပ်ယူနေသည့် အရှိန်မှာလည်း နှေးကွေးသွားခဲ့သည်။

တစ်ဖက်တွင်မူ နယ်ခြားပင်လယ်ရှိ ဘိုးဘေးထော့နန်မှာ အလွန်အားနည်းနေပြီဖြစ်သည်။

နတ်ဘုရားလောကမှ ပညာရှင်များ၏ ဝိုင်းဝန်းတိုက်ခိုက်မှုအောက်တွင် သူသည် အစွမ်းကုန် ခုခံခဲ့သော်လည်း နောက်ဆုံးတွင် အမှောင်မြူခိုးများအဖြစ် ပြောင်းလဲကာ ပျောက်ကွယ်သွားတော့သည်။

သူ၏ ကျဆုံးမှုကြောင့် သူ၏လက်အောက်ခံ မျိုးနွယ်စုဝင်များမှာလည်း အနာဂတ်အတွက် အားကိုးရာမဲ့ကာ ထိတ်လန့်ကုန်ကြသည်။

ဘိုးဘေးထော့နန် ကျဆုံးသွားသည်နှင့်အမျှ အမှောင်စစ်တပ်မှာ ချန်းအာတုဘက်သို့ စတင်ဆုတ်ခွာကြသည်။

သို့သော် နတ်ဘုရားလောကမှ ပညာရှင်များမှာ ထိုအခွင့်အရေးကို အသုံးချကာ  လိုက်လံတိုက်ခိုက်ကြသည်။

ရှေးဟောင်း ထိုက်ချူဂိုဏ်းတည်ထောင်သူနှင့် ကျောက်မိသားစုမှ ပညာရှင်များမှာ ဦးဆောင်၍ အမှောင်သတ္တဝါများကို ခြေမှုန်းကြသည်။

ကျောက်မိသားစုမှ ပညာရှင်တစ်ဦးသည် သူ၏ နတ်ဘုရားမျှော်စင်ကို အသုံးပြု၍ အမှောင်သတ္တဝါ သန်းပေါင်းများစွာကို တစ်ချက်တည်းဖြင့် အမှုန့်ပြုလိုက်ရာ သူ၏ အရှိန်အဝါမှာ အတိတ်က တားမြစ်ပညာရှင်တစ်ဦးကဲ့သို့ပင်ထူးခြားလှသည်။

ချန်းအာတုအတွင်း၌ ရန်ကျန့်၏ နဖူးပေါ်ရှိ မျက်လုံးမှ ထွက်ပေါ်လာသော အလင်းတန်းများသည် တောင်တန်းနှင့် လျှိုမြောင်များကို ပြိုပျက်စေသည်။

သူသည် သူ၏လှံရှည်ကို ဘိုးဘေးယွမ်ဟဲထံသို့ အားကုန်လွှဲပစ်လိုက်သလို နာမည်မဲ့ဧကရာဇ်ကလည်း မြားဖြင့် ပစ်ခတ်လိုက်သည်။

ထိုတိုက်ကွက်နှစ်ခုကြောင့် ဘိုးဘေးယွမ်ဟဲ၏ ခန္ဓာကိုယ်မှာ ပေါက်ကွဲသွားသော်လည်း သူသည် ချက်ချင်း ပြန်လည် နိုးထလာနိုင်သည်။

သို့သော် သူ၏ ဝိညာဉ်စွမ်းအားမှာ များစွာ လျော့နည်းသွားခဲ့သည်။ သူသည် မိမိကိုယ်ကို ကာကွယ်ရန်အတွက် အမှောင်မျိုးနွယ်စုအားလုံးကို ဘိုးဘေးမြေသို့ ဆုတ်ခွာရန် အမိန့်ပေးလိုက်သည်။

ဘိုးဘေးမြေသည် ချန်းအာတု၏ အနက်ရှိုင်းဆုံးနေရာတွင်ရှိပြီး အဆုံးမဲ့ ထူးဆန်းမှုများနှင့် ပြည့်နှက်နေသည်။

ထိုနေရာသို့ ဝင်ရောက်နိုင်ပါက တားမြစ်ချက်ပုဂ္ဂိုလ်များပင်လျှင် ရှာဖွေရန် ခဲယဉ်းသွားပေလိမ့်မည်။

အတိတ်က နတ်ဘုရားဧကရာဇ်နှင့် အခြားသော တားမြစ်ပညာရှင် အချို့မှာ ထိုနေရာသို့ ဝင်ရောက်တိုက်ခိုက်ခဲ့ဖူးသော်လည်း မည်သူမျှ ပြန်မလာနိုင်ခဲ့ကြပေ။

ဘိုးဘေးယွမ်ဟဲလွတ်မြောက်တော့မည့်အချိန်တွင်ရန်ကျန့်သည်သူ၏မန္တန်စွမ်းအားအားလုံးကိုထုတ်ဖော်လိုက်ရာသူ၏ခန္ဓာကိုယ်မှာတစ်လောကလုံးကိုဖုံးလွှမ်းနိုင်လောက်အောင်ကြီးမားလာပြီးသူ၏အရှိန်အဝါမှာလည်းစစ်မှန်သောတားမြစ်ချက်အဆင့်သို့ရောက်ရှိသွားတော့သည်။