အခန်း (၁၄) ကျန်းမျိုးနွယ်စုမှမသေမျိုးဘုရင်

ဝေါ... ဝေါ

ယင်ချီသည် မျက်လုံးများကို ဖွင့်လိုက်သည်။

သူသည် သူ၏ နတ်ဘုရားအာရုံကို ဖြန့်ကျက်ပြီး မိုင်တစ်ထောင်အတွင်း ရှာဖွေလိုက်သော်လည်း မည်သည့်ခြေရာလက်ရာမျှ မတွေ့ရပေ။ သို့သော် ထိုသို့ ဘာမှမတွေ့ရလေလေ သူ ပို၍စိုးရိမ်လာလေလေ ဖြစ်သည်။

"ရှန့်မင်းဆက်က အစွမ်းထက်တဲ့ ကျွမ်းကျင်သူတစ်ယောက်လား"

ဒါမှမဟုတ် ငါ့ရဲ့ညီနောင်မင်းသားတွေထဲက တစ်ယောက်ယောက်က ငါ့ကို စောင့်ကြည့်ဖို့ ကျွမ်းကျင်သူတစ်ယောက် လွှတ်လိုက်တာလား။

ကျောက်ကုတင်ပေါ်တွင် တင်ပျဉ်ခွေထိုင်ရင်း ယင်ချီ၏စိတ်ထဲတွင် အတွေးပေါင်းစုံ ပေါ်လာပြီး စိတ်လေးလံသွားရသည်။

လက်ရှိတွင် သူသည် အားနည်းလွန်းနေသေးသည်။ သူ၏ အစွမ်းထက်လှသော ဟုန်းမုန်မသေမျိုးခန္ဓာကို အသုံးပြု၍ အသေအလဲ တိုက်ခိုက်လျှင်ပင် စစ်မှန်သောနတ်ဘုရားတစ်ပါးကိုသာ ယှဉ်နိုင်ဦးမည် ဖြစ်သည်။

အကယ်၍ နတ်ဘုရားအဆင့်သို့မဟုတ် နတ်ဘုရားဘုရင်အဆင့်ရှိသူတစ်ဦးသာ လှုပ်ရှားလာပါက သူ့ကို နှိမ်နင်းရန်မှာ လက်ဖျောက်တစ်ချက်တီးသလောက်ပင် လွယ်ကူလိမ့်မည်။

"သူငယ်ချင်းလေး... စိတ်မပူပါနဲ့။"

ဒီဧကရီက မင်းအပေါ် မကောင်းတဲ့ ရည်ရွယ်ချက် မရှိပါဘူး။

ယင်ချီအစွမ်းကုန် သတိထားနေစဉ်မှာပင် မိုးရေစက်တစ်စက်သည် ဟင်းလင်းပြင်ကို ဖြတ်ကျော်ကာ သူ၏ ဘေးနားသို့ ကျရောက်လာသည်။

ထိုမိုးရေစက်အတွင်း၌ အရပ်ရှည်ရှည်နှင့် အလွန်လှပသော အမျိုးသမီးပုံရိပ်တစ်ခု တိတ်ဆိတ်စွာ ရပ်နေသည်။

၎င်းမှာ ဝေဝါးသော ပုံရိပ်ယောင်တစ်ခုသာ ဖြစ်သော်လည်း ယင်ချီအနေဖြင့် သူမ၏ မြင့်မြတ်သောအရှိန်အဝါကို ခံစားနေရသည်။

သူမရှိနေရုံမျှဖြင့် ကမ္ဘာလောက၏ နိယာမများကို လွှမ်းမိုးထားနိုင်သကဲ့သို့ ခံစားရသည်။

ယင်ချီသည် ရှန့်မင်းဆက်၏ မင်းသားတစ်ပါး ဖြစ်ခဲ့ဖူးသဖြင့် သူတော်စင်တစ်ပိုင်းအဆင့် ကျွမ်းကျင်သူများနှင့် ဆုံဖူးသည်။ သို့သော် ဤအမျိုးသမီး၏ နက်နဲမှုမှာ ထိုအဆင့်များကို ကျော်လွန်ကာ သူတော်စင်ထက်ပင် ပိုမိုမြင့်မားနေသည်ကို သူ သတိထားမိလိုက်သည်။

စီနီယာ့ကို ဂျူနီယာ ယင်ချီက ဂါရဝပြုပါတယ်။

စီနီယာ ကျွန်တော့်ကို တစ်စုံတစ်ခု ညွှန်ကြားချင်လို့လားခင်ဗျာ ကျွန်တော့်ဘက်က တတ်နိုင်တာမှန်သမျှ အသက်ပေးပြီး ဆောင်ရွက်ပေးဖို့ အသင့်ပါပဲ။

ယင်ချီသည် မိုးရေစက်အတွင်းရှိ ပုံရိပ်ကို ကြည့်ကာ အလွန်နှိမ့်ချသော သဘောထားကို ပြလိုက်သည်။ အားနည်းသူဖြစ်လျှင် ဦးညွှတ်တတ်ရန် သင်ယူထားရမည် မဟုတ်ပါလား။ 

တစ်ချိန်တည်းမှာပင် သူသည် သူ၏ စိတ်ထဲမှနေ၍ ကံကြမ္မာဘီးကို အပြင်းအထန်ခေါ်ဆိုနေခဲ့သည်။ ၎င်းမှာ သူ၏တစ်ခုတည်းသော အားကိုးရာ ဖြစ်သည်။

"သခင်"

"ကံကြမ္မာဘီး မင်းရဲ့ စွမ်းအားနဲ့ ငါ့ရှေ့ကလူရဲ့ ကျင့်စဉ်အဆင့်ကို သိနိုင်မလား တကယ်လို့ သူက ငါ့အပေါ် ရန်လိုလာရင် ခုခံနိုင်မယ့်နည်းလမ်းရှိလား"

ယင်ချီ၏ အမေးကို ကံကြမ္မာဘီးက တိုးညှင်းစွာ ပြန်ဖြေလိုက်သည်။

သခင်  ဒီမိုးရေစက်ထဲမှာ ရှိနေတဲ့ တည်ရှိမှုဟာ မသေမျိုးဘုရင်တစ်ပါး ဖြစ်ပါတယ်။

၎င်းကို ကြားလိုက်ရချိန်တွင် ယင်ချီ၏ မျက်နှာမှာ တည်ငြိမ်နေသော်လည်း စိတ်ထဲတွင်မူ မုန်တိုင်းထန်သွားခဲ့သည်။

သူ နေထိုင်သည့် ကမ္ဘာတွင် အမြင့်ဆုံးအဆင့်မှာ မသေမျိုးကြွင်းကျန်အဆင့်သာ ဖြစ်သည်။ မသေမျိုးဘုရင် ဆိုသည်မှာ ဒဏ္ဍာရီထဲတွင်ပင် ရှာရခက်သော အဆင့်အတန်း ဖြစ်သည်။

ဒါပေမဲ့ သခင် သူမဟာ ကိုယ်ပွားတောင် မဟုတ်ပါဘူး ကျန်ရစ်နေတဲ့ ပုံရိပ်ယောင်တစ်ခုသာ ဖြစ်ပါတယ်။ သူမရဲ့ စွမ်းအားတွေကလည်း ကုန်ခမ်းနေပါပြီ။

သခင်ကို ရန်ပြုဖို့နေနေသာသာ သာမန် ခန္ဓာကိုယ်လေ့ကျင့်ခြင်းအဆင့် ကျင့်ကြံသူကိုတောင် အန္တရာယ် မပေးနိုင်ပါဘူး။

ကံကြမ္မာဘီး၏ ရှင်းပြချက်ကြောင့် ယင်ချီစိတ်သက်သာရာ ရသွားသော်လည်း မပေါ့ဆရဲပေ။ မသေမျိုးဘုရင်ကြီးများ၏ စွမ်းအားမှာ ခန့်မှန်းရခက်လှသည်။

"ဟဲဟဲ"

သူငယ်ချင်းလေး... မင်း အရမ်း စိုးရိမ်နေတာပဲ။ ဒီဧကရီက တကယ်ပဲ စေတနာနဲ့ လာတာပါ။

မိုးရေစက်ထဲမှ အမျိုးသမီးမှာ ယင်ချီ၏ အတွေးကို ဖတ်နိုင်ပုံရသည်။ သူမက ပြုံးလျက် ဆက်ပြောသည်။

ငါ့နာမည်က ကျန်းချင်းရွှယ်ပါ နောင်တစ်ချိန်မှာ မင်းအနေနဲ့ မသေမျိုးလောကကို ရောက်လာလို့ အခက်အခဲရှိရင် ကျန်းမျိုးနွယ်စုမှာ ငါ့ကိုလာရှာနိုင်ပါတယ်။

သူငယ်ချင်းလေး... ငါတို့ မသေမျိုးလောကမှာ ပြန်ဆုံကြတာပေါ့။

ပြောပြီးသည်နှင့် ပုံရိပ်မှာ ပျောက်ကွယ်သွားပြီး မိုးရေစက်မှာ ယင်ချီ၏ လက်ပေါ်သို့ ကျရောက်ကာ ကြည်လင်သော ဆွဲသီးလေးတစ်ခုအဖြစ် ပြောင်းလဲသွားသည်။

ဆွဲသီးပေါ်တွင် ရှေးဟောင်းကျန်းဟူသော စာလုံးလေး ထွင်းထုထားသည်။ ယင်ချီသည် ထိုဆွဲသီးကို သေချာစွာ သိမ်းဆည်းထားလိုက်သည်။

ဒေါင်ယွဲ့မြို့  မိုးနတ်မင်းဒိုင်း ပျက်စီးသွားပြီးနောက် ဒေါင်လျိုယွဲ့သည် အခြားသော ကာကွယ်ရေး ပစ္စည်းများကို ထုတ်သုံးခဲ့သော်လည်း သွေးရိပ်၏တိုက်ကွက်အောက်တွင် ဒဏ်ရာအပြင်းအထန် ရရှိသွားခဲ့သည်။

ငါ မင်းကို နောက်ဆုံးတစ်ကြိမ် အခွင့်အရေး ထပ်ပေးမယ်  ချင်နယ်စားမင်းဆီမှာ အညံ့ခံလိုက်စမ်း။

မဟုတ်ရင် မင်းတင်မကဘူး ဒီမြို့နဲ့ ဒေါင်လျိုမျိုးနွယ်စုတစ်ခုလုံး ဒီနေ့မှာ အဆုံးသတ်သွားလိမ့်မယ်။

ချင်နယ်စားမင်းက သဘောထားကြီးလို့ အညံ့ခံဖို့ အခွင့်အရေး ပေးထားတာ။ ဒါပေမဲ့ ငါ့ရဲ့သည်းခံနိုင်စွမ်းကတော့ အကန့်အသတ် ရှိတယ်။

သွေးရိပ်သည် ဒဏ်ရာများဖြင့် ဇွဲနပဲနှင့် ခုခံနေသော ဒေါင်လျိုယွဲ့ကို ကြည့်ကာ စိတ်ထဲတွင် အနည်းငယ် ချီးကျူးမိသည်။ သို့သော် သူ၏ ဓားရှည်မှာ သွေးရောင်များ စတင် တောက်ပလာပြီ ဖြစ်သည်။

သူသည်သူ၏အပြင်းထန်ဆုံးတိုက်ကွက်ကိုသုံး၍ဒေါင်လျိုယွဲ့ကိုသတ်ဖြတ်ပြီးတစ်မြို့လုံးကိုမြေလှန်ပစ်ရန်ပြင်လိုက်သည်။ချင်နယ်စားမင်း၏ရှေ့တိုးခရီးကိုပိတ်ဆို့သူမှန်သမျှငရဲသို့သွားရပေလိမ့်မည်။