အခန်း (၁၃)  မိုးကာဒိုင်းအတွင်းရှိဆန္ဒ

"ဒါက... ဓားဆန္ဒလား"

ဒေါင်လျိုယွဲ့သည် သွေးရိပ်ကို ကြည့်ရင်း အံ့အားသင့်နေသည်။ သူမ၏ လှံရှည်မှာ မမြင်ရသော အင်အားတစ်ခု၏ ချုပ်ကိုင်မှုကို ခံထားရပြီး သူမ၏ စွမ်းအားများကို မည်မျှပင် ထုတ်သုံးပါစေ သွေးရိပ်အနားသို့ အမှန်တကယ် မကပ်နိုင်ဘဲဖြစ်နေသည်။

တစ်ချိန်တည်းမှာပင် ဟင်းလင်းပြင်ကို ဖြတ်သန်းကာ သူမ၏ ခန္ဓာကိုယ်ဆီသို့ တိုက်ရိုက်ဦးတည်လာသော နီရဲသည့် ဓားအလင်းတန်းတစ်ခုကို သူမ မြင်လိုက်ရသည်။

ဓားအလင်းတန်း ကျရောက်ခါနီးအချိန်တွင်မှ ဒေါင်လျိုယွဲ့သည် အစစ်အမှန် ကြောက်ရွံ့မှုကို ခံစားလိုက်ရတော့သည်။

ဤတိုက်ကွက်ကိုသာ တိုက်ရိုက်ရင်ဆိုင်လိုက်ပါက သူမ ဧကန်အမှန် သေဆုံးသွားလိမ့်မည်ဟု သူမ၏ အသိစိတ်က သတိပေးနေသည်။

ထိုအရေးပေါ် အခြေအနေတွင် သူမသည် စိမ်းဖန့်ဖန့် အရောင်ရှိသော ဒိုင်းတစ်ခုကို အမြန်ဆုံး ထုတ်ယူလိုက်သည်။

ဤဒိုင်း၏ မျက်နှာပြင်မှာ အက်ကွဲကြောင်းများဖြင့် ပြည့်နှက်နေပြီး ဆွေးမြည့်ပျက်စီးနေကာ အချိန်မရွေး ကြွေလွင့်သွားနိုင်မည့်ပုံ ပေါက်နေသည်။

သို့သော် ဒေါင်လျိုယွဲ့က ဂါထာမန္တန်တစ်ခုကို ရွတ်ဆိုလိုက်သည်နှင့် ထိုဒိုင်းမှာ စူးရှတောက်ပသော အလင်းတန်းများ ချက်ချင်း ထွက်ပေါ်လာတော့သည်။

ဘာ... မျိုးနွယ်စုခေါင်းဆောင်က မိုးနတ်မင်းဒိုင်းကိုတောင် သုံးလိုက်ပြီလား။

ဒါဆိုရင် ငါတို့ ခေါင်းဆောင်တောင် အဲဒီ အနက်ရောင်ဝတ်စုံနဲ့ တပ်မှူးကို မယှဉ်နိုင်ဘူးပေါ့။

ငါတို့ ခေါင်းဆောင်က ကောင်းကင်ဖြစ်စဉ် ပြီးပြည့်စုံခြင်းအဆင့်မှာရှိတာလေ။

နတ်ဘုရား သို့မဟုတ် မိစ္ဆာတစ်ပါးကဲ့သို့ အစွမ်းထက်နေသော သွေးရိပ်ကို ကြည့်ပြီး ဒေါင်လျိုမျိုးနွယ်စုမှ နယ်စားမင်းများမှာ မျက်နှာပျက်သွားကြပြီး စိတ်ထဲတွင် မကောင်းသော နိမိတ်တစ်ခုကို ခံစားလိုက်ရသည်။

ဒေါင်လျိုယွဲ့ လက်ထဲရှိမိုးနတ်မင်းဒိုင်းမှာ ဒေါင်လျိုမျိုးနွယ်စု၏ အဖိုးတန် ရတနာတစ်ခု ဖြစ်သည်။

၎င်းမှာ နတ်ဘုရားတစ်ပါးက သွန်းလုပ်ထားခြင်းဖြစ်ပြီး ဝိညာဉ်မဲ့နတ်ဘုရားတစ်ပါး၏ ဆန္ဒကိန်းအောင်းနေသည်။

ဤဒိုင်းကို အသုံးပြုခြင်းဖြင့် နတ်ဘုရားတစ်ပါး၏ ကာကွယ်မှုကို ခေတ္တ ရရှိနိုင်သည်။ သို့သော် ၎င်းကို အကန့်အသတ်မရှိ သုံး၍မရပေ။

အသုံးပြုသည့် အကြိမ်တိုင်းတွင် ကိန်းအောင်းနေသော နတ်ဘုရားဆန္ဒမှာ တဖြည်းဖြည်း လျော့ပါးသွားမည် ဖြစ်သည်။

ဒိုင်း၏ အကာအကွယ်ကြောင့် ဒေါင်လျိုယွဲ့၏ ပတ်ပတ်လည်တွင် စိမ်းရောင်ရှိသော ရေစီးကြောင်း အတားအဆီးတစ်ခု ပေါ်လာသည်။

သို့သော် ဤဒိုင်းရှိနေသည့်တိုင် သူမမှာ လုံခြုံသည်ဟု မခံစားရပေ။ သွေးရိပ်၏ ဤတိုက်ကွက်မှာ သူမ၏ ကျင့်ကြံသူစိတ်ဓာတ်ကိုပင် ပြိုကွဲလုနီးပါး ဖြစ်စေခဲ့သည်။

အဆင့်ချင်းတူသော်လည်း သွေးရိပ်မှာ ကြွက်သားအမြောင်းမြောင်းနှင့် သန်မာသော ယောက်ျားကြီးတစ်ဦးကဲ့သို့ ဖြစ်နေပြီး သူမမှာမူ ကြက်တစ်ကောင်ကိုပင် ဖမ်းရန် အားမရှိသည့် သာမန်လူတစ်ဦးကဲ့သို့ ခံစားနေရသည်။

ဖောက်

ဒေါင်လျိုယွဲ့ စိုးရိမ်နေသည့်အတိုင်း အဆိုးရွားဆုံးအရာ ဖြစ်ပျက်လာတော့သည်။ သွေးရိပ်၏ရိုက်ချက်အောက်တွင် အက်ကွဲကြောင်းများဖြင့် ပြည့်နေသော မိုးနတ်မင်းဒိုင်းမှာ နောက်ထပ် အက်ကွဲကြောင်းကြီး နှစ်ခု ထပ်မံ ပေါ်ထွက်လာသည်။

သူမကို ကာကွယ်ထားသော ရေအတားအဆီးမှာလည်း တဖြည်းဖြည်း မှိန်ဖျော့သွားသည်။ ဒိုင်းအတွင်းရှိ နတ်ဘုရားဆန္ဒမှာ ပျောက်ကွယ်လုနီးပါး ဖြစ်နေပြီမှာ ထင်ရှားလှသည်။

ငါ မျိုးနွယ်စုဘိုးဘေးကြီးဆီကို သတင်းပို့ထားပြီးပြီ။

မိုးနတ်မင်းဒိုင်း လုံးဝ မပျက်စီးခင် ဘိုးဘေးကြီး အမြန်ဆုံးရောက်လာဖို့ပဲ မျှော်လင့်ရတော့မယ်။

ဒေါင်လျိုမျိုးနွယ်စုမှ နယ်စားမင်းတစ်ဦးက လေးလံသော လေသံဖြင့် ပြောလိုက်သည်။ အခြားသူများမှာလည်း တိတ်ဆိတ်နေကြသည်။

ဒေါင်လျိုမျိုးနွယ်စု၏ ဘိုးဘေးကြီးမှာ အသက် တစ်ထောင်ကျော်ပြီဖြစ်သော ပုဂ္ဂိုလ်ကြီး ဖြစ်သော်လည်း သွေးရိပ်ကို တားဆီးနိုင်မည်လားဆိုသည်မှာ သံသယဖြစ်ဖွယ် ကောင်းလှသည်။

အကယ်၍ အခြေအနေတွေက ပြန်လှည့်လို့ မရတော့ဘူးဆိုရင် မျိုးနွယ်စု ဆက်လက် တည်တံ့ဖို့အတွက် ချင်နယ်စားမင်း ဆီမှာ အညံ့ခံလိုက်တာကလည်း မဆိုးပါဘူး။

ငါတို့ မျိုးနွယ်စုက အရင်ကလည်း မူယာမင်းဆက်ဆီမှာ အညံ့ခံခဲ့တာပဲ မဟုတ်လား။

အဖြူရောင်ဆံပင် မုတ်ဆိတ်များဖြင့် တောင်ဝှေးကို အားပြုထားသော ဒေါင်လျိုမူ ဟုခေါ်သည့် အဘွားအိုက ရေရွတ်လိုက်သည်။

သူမသည် မျိုးနွယ်စုတွင် ဝါရင့်သူဖြစ်ပြီး လက်ရှိ ခေါင်းဆောင် ဒေါင်လျိုယွဲ့၏ ဘွားတော်တော်စပ်သူ ဖြစ်သည်။

ဟင်း... ယွဲ့လေးက စိတ်ထား အရမ်းပြင်းထန်လွန်းတယ်။ သူက မိန်းကလေး ဖြစ်နေပေမဲ့ ဒေါင်လျိုမျိုးနွယ်စုကို ဦးဆောင်ပြီး ဒေါင်လျိုမင်းဆက်တည်ထောင်ဖို့ အမြဲတမ်း အိပ်မက်မက်နေခဲ့တာ။

ဒါပေမဲ့ မင်းဆက်တစ်ခု တည်ထောင်ဖို့ဆိုတာ ဘယ်လောက်တောင်ခက်ခဲလဲ ဝိညာဉ်မဲ့နတ်ဘုရားရှိတဲ့ မျိုးနွယ်စုတွေတောင် အခြေခံ မခိုင်မာရင် မင်းဆက် တည်ထောင်ဖို့ ခက်ခဲကြတာပဲ။

ဒေါင်လျိုမူ၏ စကားကို ကျန်သည့် နယ်စားမင်းများကလည်း အပြည့်အဝ ထောက်ခံကြသည်။ သွေးရိပ် တစ်ယောက်တည်းကပင် မျိုးနွယ်စုကို ဤမျှအကျပ်ရိုက်အောင် လုပ်နိုင်သည်ဆိုပါကသူ၏ သခင်ဖြစ်သော လျှို့ဝှက်ဆန်းကြယ်သည့် ချင်နယ်စားမင်း ရောက်လာလျှင် မည်သို့ ခုခံနိုင်ပါမည်နည်း။ 

သို့သော် ဘိုးဘေးကြီး မရောက်လာမချင်း မည်သူမျှ အတိအကျ ဆုံးဖြတ်ချက် မချဝံ့ကြပေ။

အချိန်များ တဖြည်းဖြည်း ကုန်ဆုံးသွားသည်။ သွေးရိပ်သည် သူ၏ သားရဲကြီးကို စီးနင်းလျက် ကောင်းကင်ယံတွင် ကြောက်မက်ဖွယ်ကောင်းသော ဓားအလင်းတန်းများကို ဆက်လက် ထုတ်လွှတ်နေသည်။

ဒေါင်လျိုယွဲ့ လက်ထဲရှိ မိုးနတ်မင်းဒိုင်းမှာလည်း နောက်ဆုံးအဆင့်သို့ ရောက်ရှိလာတော့သည်။

ဒိုင်း

နောက်ဆုံးတွင် သွေးရိပ်၏ အလွန်ပြင်းထန်သော တိုက်ကွက်တစ်ခုအောက်၌ ဒေါင်လျိုယွဲ့ လက်ထဲရှိ ဒိုင်းမှာ တိုက်ရိုက် ပေါက်ကွဲသွားတော့သည်။

ဝေါ

ဒိုင်းကြီး ပြိုကွဲသွားသည်နှင့် တစ်ပြိုင်နက် ကောင်းကင်ယံမှ မိုးသည်းထန်စွာ ရွာသွန်းလာတော့သည်။ ဒိုင်းအတွင်း ကိန်းအောင်းနေသော နတ်ဘုရားဆန္ဒမှာလည်း မိုးရေများနှင့်အတူ ကောင်းကင်နှင့် မြေကြီးကြားသို့ ပြန်လည် ပျံ့နှံ့သွားခဲ့သည်။

ထိုမိုးရေစက်များကြားတွင် သွေးရိပ်သည် ဝေဝါးသော ပုံရိပ်တစ်ခုကို ဖျတ်ခနဲ မြင်လိုက်ရသည်။

၎င်းမှာ မိုးထဲတွင် ရပ်နေသော အမျိုးသမီးတစ်ဦး၏ပုံသဏ္ဌာန် ဖြစ်သည်။ သူမထံမှ သန့်ရှင်းစင်ကြယ်ခြင်း၊ ကြင်နာသနားခြင်းနှင့် မြင့်မြတ်သော နတ်ဘုရားအာဏာများ ထွက်ပေါ်နေသည်။

သူမသည် သွေးရိပ်ကို တစ်ချက်ကြည့်ပြီးနောက် ယန်ဝူးမြို့ဘက်သို့ လှမ်းကြည့်ကာ အံ့သြသည့် အပြုံးလေးတစ်ခု ပြလိုက်ပြီး မိုးမြူများကြားတွင် ပျောက်ကွယ်သွားတော့သည်။

"ဟင်... အဲဒါ ဘယ်သူလဲ"

ဝေးကွာလှသော ယန်ဝူးမြို့၏လျှို့ဝှက်ခန်းမအတွင်း၌ ကျင့်ကြံနေသော ယင်ချီသည် ရုတ်တရက် တစ်ကိုယ်လုံး တုန်ခါသွားသလို ခံစားလိုက်ရသည်။

ဟင်းလင်းပြင်၏အနက်ရှိုင်းဆုံးတစ်နေရာမှတစ်စုံတစ်ဦးကသူ့ကိုလှမ်းကြည့်နေသကဲ့သို့ခံစားလိုက်ရခြင်းပင်။