အခန်း (၉၇) ကျင့်ကြံခြင်းလောကတွင် ယဲ့ဖန်၏ အဆင့်အတန်း

ဇီယွမ်သည် တစ်ခုခုကို ရုတ်တရက် သတိရသွားသကဲ့သို့ သူမ၏ ခေါင်းလေးကို ပုတ်လိုက်သည် ထို့နောက် သူမ၏ ခန္ဓာကိုယ်မှ မီးတောက်ကလေးတစ်ခု ပွင့်ထွက်လာပြီး တဖြည်းဖြည်း ကြီးထွားလာသည်။

ထိုမီးလျှံများသည် ဇီယွမ်၏ ကိုယ်ပေါ်တွင် အနီရောင် ပိုးသားနွယ်များသဖွယ် ရစ်ပတ်နေပြီး သူမအား လူ့လောကသို့ ဆင်းသက်လာသည့် ကိုးဘုံကောင်းကင်မှ နတ်သမီးတစ်ပါးကဲ့သို့ ထင်မှတ်ရစေသည်။

ဝေနိုင်ငံတော်၏ တော်ဝင်မိသားစုအတွင်း၌ မွေးဖွားလာသည်နှင့်တပြိုင်နက် ဖီးနစ်သွေးမျိုးဆက်နိုးထလာသည့် တိုက်ရိုက်အနွယ်ဝင်အချို့ ရှိတတ်ကြသည်။

၎င်းတို့မှာ ဖီးနစ်မျိုးနွယ်စု၏ အနွယ်ဝင်များ ဖြစ်သောကြောင့် နိုင်ငံတော်၏ ကံကြမ္မာကို တည်ငြိမ်အောင် ထိန်းထားနိုင်ပြီး နှစ်ပေါင်းသောင်းချီတိုင်အောင် မဆုတ်ယုတ်ဘဲ တည်တံ့နေခြင်းဖြစ်သည်ဟု အချို့က ဆိုကြသည်။

"မင်းသမီးလေးကို ဂါရဝပြုပါတယ်" ဤမျှ ပြင်းထန်လှသော မီးစွမ်းအင်ကို မြင်လိုက်ရသည့်အခါ ဂိတ်စောင့်နေသော တပည့်မှာ ကြောက်ကြောက်ရွံ့ရွံ့ဖြင့် ချက်ချင်းပင် ဒူးထောက်ကာ ဇီယွမ်ကို အရိုအသေပေးလိုက်တော့သည်။

"မင်းသမီးလေးကို ဂါရဝပြုပါတယ်" ဝိညာဉ်ဓားဂိုဏ်း တောင်တံခါးဝရှိ အခြားသူများမှာလည်း တစ်ယောက်ပြီးတစ်ယောက် ဒူးထောက်လိုက်ကြသည်။

သို့သော် အခြား ဂိုဏ်းကြီးခုနစ်ခုမှ တိုက်ရိုက်တပည့်များကမူ ဤမြင်ကွင်းကို မြင်သော်လည်း အသက် ၁၆ နှစ်အရွယ် မိန်းကလေးတစ်ဦးရှေ့တွင် ဒူးထောက်ကာ မိမိကိုယ်ကို နှိမ့်ချခြင်း မရှိကြပေ။

၎င်းတို့မှာ ကိုယ်ပိုင်မာန်မာနရှိကြပြီး မိမိတို့၏ ဂိုဏ်းများအပေါ် ဂုဏ်ယူကြသူများ ဖြစ်ကြရာ တော်ဝင်အာဏာအောက်သို့ လုံးလုံးလျားလျား ဒူးထောက်ရန်မှာ မဖြစ်နိုင်ပေ။

"ဟင်း... အားလုံး ထကြပါ" ဇီယွမ်သည်လည်း ဤမျှ ကြီးကျယ်သော မြင်ကွင်းကြောင့် ခဏတာ မှင်တက်သွားပြီးနောက် ချောင်းနှစ်ချက်ဟန့်ကာ အလျင်အမြန် ပြောလိုက်သည်။

"အခု ငါ အထဲဝင်လို့ ရပြီလား" ဇီယွမ်သည် စောစောက သူမကို တားဆီးခဲ့သော ဂိတ်စောင့်တပည့်ကို ကြည့်ကာ အေးစက်သော လေသံဖြင့် မေးလိုက်သည်။

"ရပါတယ် ရပါတယ်ခင်ဗျာ။ အနိမ့်ဆုံးကျွန်တော်မျိုးက လမ်းပြပေးရမလား" စောစောက မောက်မာနေသော ဂိတ်စောင့်တပည့်မှာ ယခုအခါ လွန်စွာ ရိုသေကိုင်းညွတ်သွားပြီး ဖားဖားဝေဝေ မျက်နှာပေးဖြင့် ဖိတ်ခေါ်သည့် အမူအရာ ပြုလုပ်နေတော့သည်။

ရှောင်ချီသည် ဘေးမှနေ၍ ဤမြင်ကွင်းကို ကြည့်ကာ တိတ်တဆိတ် ခေါင်းခါမိသည်။

ဤဝိညာဉ်ဓားဂိုဏ်းသားများ၏ ဗီဇအရ ပါလာသော ကျွန်စိတ်မှာ တကယ်ကို ပြောင်းလဲ၍ မရနိုင်ချေ။

အခြားဂိုဏ်းများမှ တပည့်များသည် တော်ဝင်မိသားစုဝင်များကို မြင်လျှင် အလွန်လေးစားကြသော်လည်း ဤမျှအထိ ဖားယားခြင်းမျိုး မရှိကြပေ။

ဝိညာဉ်ဓားဂိုဏ်းသည် မကြာသေးမီ နှစ်များအတွင်း ပြင်ပဖိအားများကို အလွန်အမင်း ခံစားခဲ့ရသောကြောင့် ဂိုဏ်းသားများကြားတွင် မိမိကိုယ်ကိုယ် ယုံကြည်မှု ပြင်းထန်စွာ ကင်းမဲ့နေခြင်းဖြစ်နိုင်ပါသည်။ မသိစိတ်ထဲတွင် သူတို့သည် အခြားသူများထက် နိမ့်ကျသည်ဟု ခံစားနေရပုံပေါ်သည်။

"မလိုပါဘူး မင်းရဲ့ တာဝန်ကိုပဲ ဆက်လုပ်ပါ" ဇီယွမ်က ခေါင်းကို ခပ်ဖွဖွခါလိုက်သည်။ သူမသည် လက်ကို နောက်ပစ်ကာ မိန်းကလေးအချို့နှင့် ရှောင်ချီကို ဦးဆောင်၍ ဝိညာဉ်ဓားဂိုဏ်း၏ တံခါးမကြီးအတွင်းသို့ ဝင်သွားတော့သည်။

ဇီယွမ်သည် လမ်းလျှောက်နေရင်း အနောက်မှ ရှောင်ချီ၏ မျက်နှာတွင် ထိတ်လန့်တုန်လှုပ်နေသည့် အရိပ်အယောင်ကို မြင်တွေ့လိုသဖြင့် ခဏခဏ လှည့်ကြည့်နေသည်။

သူမက တော်ဝင်မင်းသမီးတစ်ပါး ဖြစ်သည်။ ဒီကောင်က ခုနတင်ပဲ သူမကို ခြိမ်းခြောက်ပြီး အခွင့်ကောင်းယူခဲ့သည် မဟုတ်ပါလား။ အခုဆိုလျှင် သူ အလွန်ကြောက်ရွံ့နေသင့်သည်။

သို့သော် သူမ လှည့်ကြည့်လိုက်သည့်အခါ ရှောင်ချီ၏ တည်ငြိမ်အေးစက်သော မျက်နှာပေးကို မြင်ရသောကြောင့် ဒေါသပင် ထွက်သွားရသည်။

သူမသည် အစောပိုင်းက သူမ၏ အဆင့်အတန်းကို ပြောပြခဲ့သော်လည်း ထိုအချိန်တွင် သက်သေမရှိသဖြင့် ရှောင်ချီက မယုံကြည်ခဲ့ခြင်းမှာ သဘာဝကျသည်။

သို့သော် ယခုမူ သူမသည် လူအများရှေ့တွင် ဖီးနစ်မီးလျှံကို ထုတ်ပြခဲ့ပြီး လူအများကလည်း ဒူးထောက်ဂါရဝပြုခဲ့ကြသည်။ ဒီရှောင်ချီက ဘာလို့ ဘာမှမဖြစ်သလို နေနိုင်ရတာလဲ သူကအရူးများလား။

"ဒါ... မင်းသမီးဇီယွမ်ပေါ့နော် ကျွန်တော့်ကို အထဲခေါ်လာပေးလို့ ကျေးဇူးတင်ပါတယ်။ နောက်မှ ပြန်တွေ့ကြတာပေါ့" ရှောင်ချီသည် နှုတ်ဆက်လိုက်ပြီးနောက် လူအုပ်ထဲသို့ အလျင်အမြန် တိုးဝင် ပျောက်ကွယ်သွားတော့သည်။

"ဟေ့... ဒီလူယုတ်မာ ပြန်လာခဲ့ဦး" ဇီယွမ်သည် သူမ၏ မင်းသမီးအရှိန်အဝါကို ထုတ်ပြချင်ရုံရှိသေးသည် ဒီလူက နှုတ်ဆက်ပြီး ထွက်သွားပြီ ဖြစ်ရာ တကယ့်ကို ယဉ်ကျေးမှု မရှိသူပင်။

ရာထူးဆက်ခံပွဲမှာ နောက်ထပ် နှစ်ရက်ခန့် လိုသေးသည်။ စောစောရောက်လာသော ကျင့်ကြံသူများကို ဝိညာဉ်ဓားဂိုဏ်းသားများက တည်းခိုဆောင်များတွင် နေရာချပေးကြသည်။ ဝေနိုင်ငံတော်မှ လူကုံထံကြီးများလည်း တစ်ယောက်ပြီးတစ်ယောက် ရောက်ရှိလာကြလိမ့်မည်။

ဤငါးနှစ်အတွင်း ယဲ့ဖန်၏ ကျော်ကြားမှုမှာ ထိပ်ဆုံးသို့ ရောက်ရှိနေပြီ ဖြစ်သည်။

လွန်ခဲ့သော နှစ်နှစ်က ဂိုဏ်းခုနစ်ခု မဟာပြိုင်ပွဲ တွင် သူသည် ထိပ်ဆုံး သုံးဦးစာရင်းဝင်ခဲ့သည်။ ထိုအချိန်မှာပင် သူ၏ တောက်ပသော အခိုက်အတန့် စတင်ခဲ့ခြင်းဖြစ်သည်။

လွန်ခဲ့သော တစ်နှစ်ခွဲက သူတည်ထောင်ထားသော နတ်ဘုရားနန်းတော်ကို ဦးဆောင်ကာ လူသား-မိစ္ဆာစစ်တလင်း တွင် မိစ္ဆာ ၃၀၀ ကို သုတ်သင်ပြီး စွမ်းဆောင်ရည်ကြီးများ ပြသခဲ့သည်။ သူသည် နာမည်ကျော်ကြားလာရုံသာမက မိန်းမပျိုများစွာ၏ စိတ်ဝင်စားမှုကိုလည်း ရရှိခဲ့သည်။

နန်းတွင်းထဲတွင်သာ ကြီးပြင်းလာရသော ဇီယွမ်ကဲ့သို့ အမျိုးသမီးများအတွက် ယဲ့ဖန်နှင့် ပတ်သက်သည့် ကောလာဟလများကို ကြားရသည့်အခါ သူ့ကို အိပ်မက်ထဲက မင်းသားလေးအဖြစ် သတ်မှတ်ထားကြသည်။

ယဲ့ဖန်၏ ကံကြမ္မာရှင်အရှိန်အဝါမှာ အထင်အရှား ထွက်ပေါ်လာနေပြီ ဖြစ်သည်။ 

ယခုအခါ များစွာသော တာအိုလမ်းစဉ် ကျင့်ကြံသူများသည် မိမိတို့၏ မူလအင်အားစုများကို စွန့်ခွာကာယဲ့ဖန်၏ နတ်ဘုရားနန်းတော်သို့ ဝင်ရောက်လိုနေကြသည်။

ယဲ့ဖန်သည် ဝိညာဉ်ဓားဂိုဏ်း၏ ဂိုဏ်းချုပ်ဖြစ်လာမည်ဟူသော သတင်းထွက်ပေါ်လာသည့်အခါ အင်အားစုအသီးသီးမှာ ရိုက်ခတ်သွားတော့သည်။

နတ်ဘုရားနန်းတော်သည် အားကောင်းသော်လည်း တကယ့်ပညာရှင်ကြီးများ၏ အမြင်တွင်မူ ၎င်းမှာ အတောင်အစုံမစုံသေးသော အင်အားစုငယ်လေးမျှသာ ဖြစ်သည်။

သို့သော် ဝိညာဉ်ဓားဂိုဏ်းမှာမူ ဂိုဏ်းကြီးခုနစ်ခုထဲမှ တစ်ခုဖြစ်ပြီး ဝေနိုင်ငံတော် တစ်ခုလုံးတွင် ထိပ်တန်းအင်အားစုဖြစ်သည်။

ယဲ့ဖန်ကဲ့သို့ ငယ်ရွယ်သူတစ်ဦးက ဤမျှကြီးမားသော ဂိုဏ်း၏အကြီးအကဲ ဖြစ်လာခြင်းမှာ သူ၏ အတိတ်က အောင်မြင်မှုများနှင့် ပေါင်းစပ်လိုက်သည့်အခါ ယဲ့​ဖန် ဟူသော နာမည်မှာ ဒဏ္ဍာရီဆန်ဆန် ဖြစ်သွားတော့သည်။

ထို့ကြောင့်ပင် ယဲ့ဖန်၏ရာထူးဆက်ခံပွဲမှာ ယခင်ကထက် ပိုမို ခမ်းနားနေခြင်း ဖြစ်သည်။ အချို့ကမူ ဤပွဲကို ဝေနိုင်ငံတော် ဘုရင်၏ နန်းတင်ပွဲနှင့်ပင် ခိုင်းနှိုင်းနေကြသည်။

ကျင့်ကြံခြင်းလောကတွင် နိုင်ငံတော်၏ ဘုရင်ပင်လျှင် ကျင့်ကြံနိုင်သည် သို့သော် ရာထူးတစ်ခုတည်းတွင် အကြာကြီးနေ၍ ပုပ်သိုးမသွားစေရန် ဝေနိုင်ငံတော်၏ ဘုရင်မှာ ၃၀ နှစ်တစ်ကြိမ် လဲလှယ်ရသည်။

အားလုံးမှာ ကျောက်မျိုးနွယ်ဝင်များပင် ဖြစ်သော်လည်း အလှည့်ကျစနစ်ကို ကျင့်သုံးကြဆဲ ဖြစ်သည်။

ရှောင်ချီကဲ့သို့ အဆင့်အတန်းမရှိသော ဧည့်သည်ငယ်တစ်ဦးမှာ အောက်တန်းအခန်းများတွင်သာ နေရာရသည်။

ဤတစ်ကြိမ်တွင် ဝိညာဉ်ဓားဂိုဏ်းသည် လာရောက်ဂုဏ်ပြုသူများကို ရိုးရှင်းစွာ အဆင့်ခွဲခြားထားသည်။

ဝေနိုင်ငံတော်မှ အဆင့်မြင့်ပုဂ္ဂိုလ်များနှင့် ဂိုဏ်းကြီးခုနစ်ခုမှ လူကြီးပိုင်းများကို အမြင့်မြတ်ဆုံး ဧည့်သည်များအဖြစ် သတ်မှတ်ကာ အထက်တန်းအခန်းများတွင် နေရာချပေးသည်။

အခြားအင်အားစုများမှ သာမန်တပည့်များ သို့မဟုတ် အဆင့်နိမ့် အရာရှိများကိုမူ အလယ်တန်းအခန်းများတွင် နေရာချပေးသည်။

နာမည်မကြီးသော်လည်း ဖိတ်စာပါလာသူများကိုမူ အောက်တန်းအခန်းများတွင် ထားရှိသည်။

အကယ်၍ ရှောင်ချီသာ ဇီယွမ်နှင့် ဆက်တွဲနေမည်ဆိုလျှင် အနည်းဆုံး အလယ်တန်းအခန်းတွင် နေရာရနိုင်ပေလိမ့်မည်။

ရှောင်ချီသည် ဤတည်းခိုဆောင်ဆိုသည်များကို စိတ်မဝင်စားပေ သူ လာရခြင်းမှာ ယဲ့ဖန်ကို ဒုက္ခပေးရန် ဖြစ်သည်။ သူ ဘယ်မှာနေသည်ဆိုသည်မှာ သိပ်အရေးမကြီးပါချေ။

တစ်ညတာ ကုန်ဆုံးပြီးနောက် နောက်တစ်နေ့ နံနက်စောစောတွင် ဝိညာဉ်ဓားဂိုဏ်း၏ တောင်တံခါးဝမှာ စည်ကားနေဆဲပင်

မိန်းမပျိုလေး နှစ်ဦးသည် လက်ချင်းချိတ်ကာ စိတ်လှုပ်ရှားစွာဖြင့် တောင်တံခါးထဲသို့ တိုက်ရိုက် ဝင်သွားရန် ပြင်လိုက်ကြသည်။

"ရပ်စမ်း မင်းတို့က ဘယ်သူတွေလဲ ဖိတ်စာ ပါလား" ဇီယွမ်ကို စောစောက တားခဲ့သော ဂိတ်စောင့်တပည့်က ရှေ့သို့ တစ်ဖန် တိုးလာပြီး ထိုအမျိုးသမီးနှစ်ဦးကို အေးစက်သော မျက်လုံးများဖြင့် ကြည့်လိုက်သည်။

သို့သော် ထိုအမျိုးသမီးများထဲမှ တစ်ဦးကို မြင်လိုက်ရသည့်အခါ သူ၏ မျက်မှောင်များ တွန့်သွားသည်။

ဝိညာဉ်ဓားဂိုဏ်းတွင် တပည့်ပေါင်း ၈၀၀ ကျော် ရှိရာ တပည့်တိုင်းမှာ တစ်ဦးကိုတစ်ဦး သိရန် မဖြစ်နိုင်ပေ။

သို့သော် လင်ယုရှုမှာမူ အတော်လေး နာမည်ကြီးသည်။ အဆုံးမှာတော့ ရှောင်ချီက သူမကို ခေါ်ပြီး ထွက်ပြေးခဲ့စဉ်က ဂိုဏ်းတစ်ခုလုံး ပွက်ပွက်ညံသွားခဲ့ပြီး အလွန်အဖိုးတန်သော ဟင်းလင်းပြင်ဖြတ်ကျော် ကျောက်စိမ်းလက်ဖွဲ့ကိုပင် အသုံးပြုခဲ့ရသည် မဟုတ်ပါလား။

နောက်ပိုင်းတွင် ဂိုဏ်းက ဤဒဏ္ဍာရီလာ မိန်းကလေး၏ပုံတူများကို ဝရမ်းထုတ်ကာ ချိတ်ဆွဲထားခဲ့သည်။

"မင်းက လင်းယုရှုလား ဂိုဏ်းရဲ့ သစ္စာဖောက်လား"

ရွှမ်း... ဂိတ်စောင့်တပည့်သည် သူ၏ ဓားရှည်ကို အမြန်ဆွဲထုတ်ကာ လင်းယုရှုကို ချိန်ရွယ်လျက် ဒေါသတကြီး မေးမြန်းလိုက်တော့သည်။

ဘာလုပ်တာလဲ ငါက ကျောက်စိမ်းကညာဂိုဏ်းရဲ့သူတော်စင်မပဲ ဒါကငါ့ရဲ့ ညီမလေး မင်းသာ သူမရဲ့ ဆံပင်တစ်ပင်ကို ထိရဲရင် ငါတို့ ကျောက်စိမ်းကညာဂိုဏ်းနဲ့ ရန်သူဖြစ်သွားမယ်။ မင်းက ဂိုဏ်းနှစ်ခုကြား စစ်ဖြစ်အောင် လုပ်ချင်နေတာလား။

ယွီလင်လုံသည် လင်းယုရှုကို သူမ၏ နောက်ကွယ်တွင် ကာကွယ်ထားပြီး ဓားထုတ်ထားသော တပည့်ကို စိုက်ကြည့်လိုက်သည်။

ယွီလင်လုံ၏ ခန္ဓာကိုယ်မှ ပြင်းထန်သော အရှိန်အဝါကို ခံစားလိုက်ရသည့်အခါ ဂိတ်စောင့်တပည့်မှာ အနည်းငယ် ကြောက်သွားသည်။ သူသည် ဓားကို အိမ်ထဲ ပြန်ထည့်လိုက်ပြီး ထိုအမျိုးသမီးနှစ်ဦးကို အကျပ်ရိုက်စွာ ကြည့်နေတော့သည်။