အခန်း (၈၆)  မောက်မာလာသော လူမိုက် ကျားနက်၏ ရည်မှန်းချက်

ရှောင်ချီ ထိုတောအုပ်သို့ ရောက်ရှိသွားသောအခါ အလောင်းအချို့ကို သားရဲများ ကိုက်ခဲထားသကဲ့သို့ တွေ့လိုက်ရသည်။ တစ်ခုခုက စားသောက်သွားသည့် ပုံစံမျိုးပင်။

သို့သော် ခဏအကြာတွင် ရှောင်ချီသည် သံသယဖြစ်ဖွယ် အချက်အချို့ကို ရှာဖွေတွေ့ရှိသွားသည်။ ထိုသူများ၏ အလောင်းမှာ သားရဲကိုက်ထားသည့် ဒဏ်ရာမျိုး မဟုတ်ဘဲ ထက်ရှသော လက်နက်တစ်မျိုးမျိုးဖြင့် ပိုင်းဖြတ်ခံထားရသည့် ပုံစံမျိုး ဖြစ်နေသည်။

ရှောင်ချီသည် ထိုနေရာတွင် အကြာကြီး မနေခဲ့ပေ။ အပေါ်ယံ စစ်ဆေးပြီးနောက် တောင်ခြေရှိ တဲများရှိရာသို့ အမြန်ပြန်လာခဲ့သည်။

ဤကဲ့သို့ အထီးကျန်ကျွန်းပေါ်တွင် လူအများစုပေါင်း နေထိုင်ခြင်းကသာ လုံခြုံမှုအရှိဆုံး ခံစားချက်ကို ပေးနိုင်သည် မဟုတ်ပါလား။

"မိသားစုခေါင်းဆောင် အခြေအနေ မကောင်းတော့ဘူး ကျွန်တော်တို့ လူတွေ ကျွန်းပေါ်က သားရဲဆိုးတွေရဲ့ စားတာ ခံလိုက်ရပြီ" ရှောင်ချီ ပြန်ရောက်လာချိန်တွင် ကျင့်ကြံသူတစ်ဦးက ချန်ရှင်းဟေထံသို့ အရှိကို အဆပွားကာ အစီရင်ခံနေသည်ကို ကြားလိုက်ရသည်။

"ငါတို့ အခေါက်ခေါက်အခါခါ စစ်ဆေးခဲ့တာပဲ။ ဒီကျွန်းပေါ်မှာ သားရဲဆိုးတွေ ဘယ်လိုလုပ် ရှိနိုင်မှာလဲ" ထိုအစောင့်၏ စကားကို ကြားလိုက်ရချိန်တွင် ချန်ရှင်းဟေ၏ မျက်နှာမှာ ချက်ချင်းပင် မှိုင်တွေသွားတော့သည်။

သူကိုယ်တိုင် လူအုပ်ကို ဦးဆောင်ကာ ဤကျွန်း၏ လက်မတင်မက နေရာတိုင်းကို စူးစမ်းခဲ့ဖူးသည်။ အလွန်ဆုံးရှိလှ အကောင်ငယ်လေးများသာ ရှိသည်။ အခုမှ ဘာကြောင့် ဒီလောက် ကြောက်စရာကောင်းတဲ့ သားရဲတွေ ရုတ်တရက် ပေါ်လာရတာလဲ။

"မိသားစုခေါင်းဆောင် ကျွန်တော်တို့ လူခွဲပြီး လိုက်ရှာကြည့်ရင်ကော ဘယ်လိုလဲ" ကြွက်သားအဖုအထစ်များဖြင့် ဗူးသီးပုံသဏ္ဍာန် ခန္ဓာကိုယ်ရှိသည့် လူကုလားကြီးတစ်ဦး ချန်ရှင်းဟေ၏ရှေ့သို့ ရောက်လာပြီး ဟိန်းဟောက်သော အသံဖြင့် ပြောလိုက်သည်။

ထိုသူ၏ အမည်မှာ ကျားနက်ဖြစ်သည်။ သူသည် မူလက ချန်ရှင်းဟေ၏ အစောင့်ခေါင်းဆောင် ဖြစ်ပြီး အရင်က ကျင့်စဉ်မှာ ဝိညာဉ်အသွင်ပြောင်းအဆင့်ရှိသည်။ ချန်ရှင်းဟေ၊ ကျန်းခွမ်းနှင့် လီဖုန်းတို့ သုံးဦးကို ဖယ်လိုက်လျှင် သူသည် ဤအုပ်စုထဲတွင် အသန်မာဆုံးသူဖြစ်သည်။

ထို့အပြင် ဤလူသည် စစ်မှန်သော ခန္ဓာကျင့်ကြံသူတစ်ဦး ဖြစ်သည်။ ဝိညာဉ်စွမ်းအား ကျင့်ကြံခြင်းထက် ခန္ဓာကိုယ် ကြံ့ခိုင်မှုကို ပိုမို အာရုံစိုက်သူ ဖြစ်သည်။

ယခုအခါ ဤကျွန်း၏နိယာမများကြောင့် လူတိုင်း၏ ကျင့်စဉ်များမှာ လုံးဝနီးပါး ကွယ်ပျောက်သွားပြီ ဖြစ်သည်။

သူတို့၏ ခန္ဓာကိုယ် ကြံ့ခိုင်မှုမှာလည်း ဖိနှိပ်ခံထားရသော်လည်း ကျင့်စဉ်များနှင့် နှိုင်းယှဉ်လျှင်တော့ အများကြီး ပိုကောင်းနေသေးသည်။

လွန်ခဲ့သော ငါးရက်ခန့်က ကျားနက်သည် ချန်ရှင်းဟေကို အာခံခဲ့ဖူးသည်။ အစောင့်တစ်ဦးက သူ့ကို ပညာပေးရန် ကြိုးစားခဲ့သော်လည်း ကျားနက်၏လက်ချက်ဖြင့် ချက်ချင်း အသတ်ခံလိုက်ရသည်။

ထိုတိုက်ပွဲက ကျားနက်၏ အစွမ်းကို ဖော်ပြလိုက်ခြင်းပင် ထိုစဉ်က ချန်ရှင်းဟေမှာစွမ်းအား အနည်းငယ် ကျန်နေသေးသော်လည်း ကျားနက်နှင့် ထိပ်တိုက်တွေ့လျှင် အသက်အန္တရာယ် ရှိနိုင်သည်ဟု တွက်ဆကာ ဘာမှ မလုပ်ဝံ့ခဲ့ပေ။

ယခုအချိန်တွင် ကျားနက်သည် အပေါ်ယံအားဖြင့် ချန်ရှင်းဟေ၏ လက်အောက်ငယ်သား ဖြစ်နေသော်လည်း လက်တွေ့တွင်မူ သူနှင့် ရင်ပေါင်တန်းနိုင်သည့် အနေအထားသို့ ရောက်ရှိနေပြီ ဖြစ်သည်။

အစောင့်အများစုမှာလည်း ကျားနက်၏ အစွမ်းကို ကြောက်သဖြင့် သူ့ဘက်သို့ တစ်ယောက်ပြီးတစ်ယောက် ကူးပြောင်းကုန်ကြသည်။

ချန်ရှင်းဟေသည် ကျားနက်ကို အေးစက်သော အကြည့်ဖြင့် တစ်ချက် ကြည့်လိုက်သည် သူ့ရင်ထဲတွင် နောင်တကြီးစွာ ရနေမိသည်။ အစောကတည်းက ကျန်းခွမ်း၏ စကားကို နားထောင်ပြီး သူ့ကိုခြိမ်းခြောက်နိုင်မည့်သူများကို သတ်ပစ်ခဲ့သင့်သည်။

ယခု တောထဲတွင် သေဆုံးသွားသူများမှာ ချန်ရှင်းဟေ၏ အသစ္စာဆုံး လူယုံများ ဖြစ်ကြသည်။ သူတို့အားလုံးသည် အရင်က ကျားနက်နှင့် ပြဿနာ ဖြစ်ဖူးသူများဖြစ်ပြီး ရက်အနည်းငယ်အကြာမှာပင် အခုလို သေဆုံးသွားခြင်းက ကျားနက်၏ လက်ချက်ဖြစ်ကြောင်း သံသယဝင်စရာပင်။

ကျားနက် မင်းပဲ လူအချို့ကိုခေါ်ပြီး သူတို့ရဲ့ အလောင်းတွေကို သွားသယ်ပေးပါ။ ငါကတော့ ညီအစ်ကိုတွေကိုခေါ်ပြီး ပင်လယ်မှာ ငါးဖမ်းရင်း ဖြတ်သွားမယ့် သင်္ဘောရှိမလား စောင့်ကြည့်လိုက်မယ်။

ခဏမျှ စဉ်းစားပြီးနောက် ချန်ရှင်းဟေက လေးလံသော လေသံဖြင့် ကျားနက်ကို ခိုင်းလိုက်သည်။

ဒါဟာ ကျားနက် ခင်းထားတဲ့ ထောင်ချောက်လားဆိုတာ သူမသေချာသဖြင့် ထိုတောအုပ်ထဲသို့ သူကိုယ်တိုင် အလွယ်တကူ မဝင်ဝံ့ပေ

ကျားနက်၏ ရည်မှန်းချက်မှာ အခုဆိုလျှင် လူတိုင်း မြင်သာနေပြီဖြစ်သည်။

ချန်ရှင်းဟေ အစိုးရိမ်ဆုံးက သူ၏ သမီးနှစ်ယောက်အတွက်ပင် ကျားနက်သည် သူ၏ သမီးနှစ်ယောက်ကို ရမ္မက်ဇောများဖြင့် ကြည့်နေသည်ကို ချန်ရှင်းဟေ ရံဖန်ရံခါမြင်တွေ့နေရသည်။

ကျားနက်သည် ဤကျွန်းပေါ်တွင် ဘုရင်လုပ်ချင်နေပြီဆိုတာ အခုတော့ သေချာသလောက် ရှိနေပြီ။ အချို့လူများသည် အစွမ်းရလာသည်နှင့် မူလစိတ်ထားများကို မေ့လျော့ကာ ဘဝင်မြင့်တတ်ကြသည် မဟုတ်ပါလား။

မူလက ချန်ရှင်းဟေသည် သူခေါ်လာသော လူအားလုံးမှာ သူ့အပေါ် သစ္စာရှိကြလိမ့်မည်ဟု ယုံကြည်ခဲ့သည်။ ဘယ်သူ့ကိုမှ မသံသယဖြစ်ခဲ့ပေ ထို့ကြောင့် ကျန်းခွမ်း၏ အကြံပေးချက်ကို ပယ်ချခဲ့ခြင်း ဖြစ်သော်လည်း အခုတော့ ဒါဟာ သူ့ကိုယ်သူ ပြန်ပြီး ဒုက္ခပေးသလို ဖြစ်သွားရသည်။

"မိသားစုခေါင်းဆောင် တောထဲက အရမ်းနက်ပြီး အန္တရာယ်များတယ်။ အားလုံး အတူတူ သွားကြတာက ပိုကောင်းပါလိမ့်မယ်" ကျားနက်၏ မျက်လုံးထဲတွင် ထူးဆန်းသော အရိပ်အယောင်တစ်ခု ဖြတ်ပြေးသွားပြီး လက်အုပ်ချီကာ ပြန်ပြောလိုက်သည်။ သူ၏ လေသံမှာ အရင်ကထက် ပို၍တင်းမာနေသည်မှာ သိသာသည်။

"ဘာလဲ ကျားနက် မင်းက ပုန်ကန်ချင်နေတာလား" လွန်ခဲ့သော ရက်အနည်းငယ်ကတည်းက ကျားနက်သည် သူ့ကို ဤကဲ့သို့ ပြောဆိုနေခြင်းမှာ ပထမဆုံးအကြိမ် မဟုတ်သဖြင့် ချန်ရှင်းဟေ အရင်ကလို ဒေါသမထွက်တော့ပေ။

သို့သော် သူသည် စားပွဲကို ရိုက်ကာ ထရပ်လိုက်ပြီး ကျားနက်ကို ဒေါသတကြီး စိုက်ကြည့်ကာ သူ၏ ရပ်တည်ချက်ကို ပြသလိုက်သည်။

မိသားစုခေါင်းဆောင် စိတ်မဆိုးပါနဲ့ ခင်ဗျားက ကျွန်တော်နဲ့ မလိုက်ချင်ဘူးဆိုရင်လည်း ကျွန်တော်ပဲ အဲ့ဒီလူတွေရဲ့ အလောင်းကို သွားသယ်ပါ့မယ်။ ခင်ဗျားကတော့ ပင်လယ်မှာ ငါးဖမ်းရင်း ဖြတ်သွားမယ့် သင်္ဘောကိုပဲ အေးအေးဆေးဆေး စောင့်ကြည့်နေလိုက်ပါ။

ကျားနက်က ခေါင်းညိတ်ပြပြီး ချန်ရှင်းဟေကို ထပ်ပြီး အကျပ်မကိုင်တော့ပေ။ ထို့အစား သူ၏ လူယုံများကို ခေါ်ကာ တောနက်ထဲသို့ ဝင်သွားတော့သည်။

"ညီအစ်ကိုချန်... ငါ အရင်က ပြောခဲ့တာတွေကို ပြန်ကြည့်စမ်း အခုတော့ နောင်တရပြီမလား" ကျန်းခွမ်းသည် သူ၏ မြေးဖြစ်သူနှင့်အတူ အသားကင်နေရင်း ကျားနက် ထွက်သွားသည်ကို မြင်သောအခါ ချန်ရှင်းဟေ၏ ဘေးသို့ လာကာ သက်ပြင်းချလျက် ပြောလိုက်သည်။

"သူက ဒီလိုလူမျိုးမှန်း သိရင် သူ့အရိုးတွေကို ချိုးပြီး ခွေးကျွေးခဲ့တာ ကြာလှပြီ။ အခုမှတော့ ဒါတွေ ပြောနေလည်း နောက်ကျသွားပါပြီ"

ချန်ရှင်းဟေသည် ကျားနက်၏ ကျောပြင်ကို ကြည့်ကာ လက်သီးကို တင်းတင်းဆုပ်ထားမိသည်။

ယနေ့အထိ ဤကျွန်းပေါ်တွင် လူပေါင်း ရှစ်ဆယ်ခန့်သာ ကျန်တော့သည်။ ကျန်တဲ့လူတွေကတော့ မတော်တဆမှု အမျိုးမျိုးဖြင့် သေဆုံးကုန်ကြသည်။ သို့သော် အခြေအနေကို ရိပ်မိသူတိုင်းကတော့ ထိုသေဆုံးသူများမှာ ချန်ရှင်းဟေ၏ လူယုံများဖြစ်ပြီး ကျားနက်၏ လက်ချက်ဖြင့် အသတ်ခံရခြင်းဖြစ်ကြောင်း သိကြသည်။

အခုဆိုလျှင် ကျွန်းပေါ်ရှိ လူတိုင်းမှာ စိုးရိမ်ထိတ်လန့်နေကြပြီး ကျားနက်ဘက်သို့ ကူးပြောင်းသင့် မသင့် စဉ်းစားနေကြရသည်။

ကျွန်းပေါ်ရှိ လူများကို အုပ်စုသုံးစု ခွဲခြားနိုင်သည်။ ပထမအုပ်စုမှာ ဘယ်လိုအခြေအနေမျိုးမှာမဆို ချန်ရှင်းဟေအပေါ် သစ္စာရှိကြမည့်သူများ။

ဒုတိယအုပ်စုမှာ ကျားနက်၏ အစွမ်းကို ကြောက်သဖြင့် သူ့ဘက်သို့ ကူးပြောင်းသွားကြသူများ ဖြစ်သည်။ သူတို့သည် ယခုအခါ ကျွန်းပေါ်တွင် အတော်လေး ရမ်းကားနေကြသည်။

တတိယအုပ်စုမှာတော့ ချန်ရှင်းဟေနှင့် ကျားနက်တို့ကြားက ကိစ္စများတွင် မပါဝင်ချင်သဖြင့် မိမိဘာသာ အဖွဲ့ငယ်လေးဖွဲ့ကာ နေထိုင်ကြသည့် လူအယောက်နှစ်ဆယ်ခန့် ဖြစ်သည်။

ညီအစ်ကိုချန် အခုက နောက်ဆုံးအခွင့်အရေးပဲ ငါတို့မှာ ဝိညာဥ်စွမ်းအား အနည်းငယ် ကျန်နေသေးချိန်မှာ ကျားနက်ကို အမြန်ဆုံး ရှင်းပစ်ရမယ်။ မဟုတ်ရင် ဒီကျားဆိုးက ငါတို့ သုံးယောက်လုံးကို စားပစ်လိမ့်မယ်။

လီဖုန်းသည်လည်း ချန်ရှင်းဟေ၏ ဘေးသို့ လာကာ ပြတ်သားသော မျက်နှာထားဖြင့် ပြောလိုက်သည်။

"ဟုတ်တယ်အဖေ အစ်ကိုချင်းရှန်းသာ သမီးရဲ့ ဘေးကနေ အမြဲတမ်း စောင့်ရှောက်မပေးခဲ့ရင် မနေ့တစ်နေ့ကတင် ဟိုလူယုတ်မာ ကျားနက်ရဲ့ နှောင့်ယှက်တာကို ခံရတော့မှာ" ချန်နန်းနန်းက တောအုပ်ဘက်ကို ဒေါသတကြီး ကြည့်ကာ နာကျည်းစွာ ပြောလိုက်သည်။

"ကောင်းပြီ ဒီည ငါတို့ စတင် လှုပ်ရှားကြမယ်။ ဒီသစ္စာဖောက်ကို ငါကိုယ်တိုင် သတ်ပစ်မယ်" ချန်ရှင်းဟေသည် ဆုံးဖြတ်ချက် တစ်ခု ချလိုက်ပုံရပြီး သူ၏ ပေါင်ကို ရိုက်ကာ ရက်စက်သော အကြည့်ဖြင့် ပြောလိုက်သည်။

ရှောင်ချီသည် ဖြစ်ပျက်နေသမျှကို ကြည့်ရင်း စိတ်ထဲမှ တိတ်တဆိတ် ခေါင်းခါမိသည်။

ရှောင်ချီသည် သူတို့၏ ပဋိပက္ခတွင် ပါဝင်ရန် အစီအစဉ်မရှိပေ အပေါ်ယံအားဖြင့်တော့ ရှောင်ချီသည် လက်ရှိတွင် ချန်ရှင်းဟေ၏ လက်အောက်ငယ်သား တစ်ဦးဖြစ်နေသည်။

ဘာလို့လဲဆိုတော့ ဤကျွန်းပေါ်တွင် ကြားနေလုပ်ခြင်းက ကောင်းလှသည့် ကိစ္စမဟုတ်သောကြောင့် ဖြစ်သည်။

ထို့ကြောင့် အသက်ကယ်ကျေးဇူးကို ဆပ်သည့် အနေဖြင့် ရှောင်ချီသည် ချန်ရှင်းဟေ၏ အဖွဲ့ထဲသို့ ဝင်ကာ သူရှိနေမှန်း မသိအောင် အတတ်နိုင်ဆုံး ငြိမ်နေခဲ့ခြင်း ဖြစ်သည်။

ခဏအကြာတွင် ကျားနက်သည် သူ၏ လူများနှင့်အတူ အလောင်းပုံကြီးနှင့် အစားအစာအချို့ကို သယ်ကာ တောင်ပေါ်မှ ပြန်ဆင်းလာခဲ့သည်။

ထို ဖြူဖျော့ပြီး ကြောက်စရာကောင်းအောင် သေဆုံးနေသည့် အလောင်းများကို ကြည့်ကာ စခန်းအနီးရှိ လူအားလုံးမှာ လေးလံသော တိတ်ဆိတ်မှုထဲသို့ ကျရောက်သွားကြတော့သည်။