အခန်း (၇၃)  လင်ယွင်နတ်သမီး၏ ရူးသွပ်စွာ အော်ဟစ်မှု

"ချီအာ... ပြန်လာတာ မင်းလား" ရှောင်ချီတစ်ယောက် ပစ္စည်းသိမ်းနေစဉ်မှာပင် ဂူအပြင်ဘက်မှ အားနည်းသော မိန်းမပျိုတစ်ဦး၏ အသံ ရုတ်တရက် ထွက်ပေါ်လာသည်။

ရှောင်ချီနှင့် လင်ယုရှုတို့သည် တစ်ပြိုင်နက်တည်း ခေါင်းလှည့်ကြည့်လိုက်ကြသည်။ သူတို့နောက်တွင် ရပ်နေသော ထိုပုံရိပ်ကို ကြည့်ရင်း...။

ဤအချိန်တွင် ရှောင်ချီ၏ နတ်ဘုရားဂူထဲသို့ လာရဲသူမှာ လင်ယွင်နတ်သမီးမှတစ်ပါး အခြားသူ မရှိနိုင်ပေ။

"ခင်ဗျားကိုး လာတာ အချိန်ကိုက်ပဲ ကျွန်တော်လည်း ခင်ဗျားကို သွားရှာမလို့ပဲ" ရှောင်ချီက အေးဆေးစွာ ပြုံးရင်း ပန်းပွင့်လေးတစ်ပွင့်လို လှပသော ထိုမျက်နှာကို တည်ငြိမ်စွာ စိုက်ကြည့်လိုက်သည်။

လင်ယွင်နတ်သမီးမှာ ခဏမျှ ဆွံ့အသွားရသည်။ ရှောင်ချီက သူမကို ဆရာလို့ မခေါ်လိုက်ဘူး မဟုတ်လား။

ထို့အပြင် သူ၏ လေသံမှာ အင်မတန် အေးစက်လှပြီး အကြိမ်အနည်းငယ်သာ တွေ့ဖူးသည့် သူစိမ်းတစ်ယောက်ကို နှုတ်ဆက်သကဲ့သို့ ဖြစ်နေသည်။

"ချီအာ မင်းကိုလည်း ကြည့်ပါဦး လျှပ်စီးကန်က ထွက်လာတာနဲ့ တောင်အောက်ကို အတင်းဆင်းသွားတာပဲ ငါက မင်းအတွက် ကြိုဆိုပွဲလေး လုပ်ပေးမလို့ စဉ်းစားထားတာ။ တော်သေးတာပေါ့ မင်း တောင်အောက်ဆင်းသွားတာ ရှစ်ရက် ကိုးရက်ပဲ ရှိသေးလို့"

"ကလေးတို့ ငါနဲ့အတူ ဂူထဲကို ပြန်လိုက်ခဲ့ကြစို့။ ခဏနေရင် ငါ တောင်ခြေက ဈေးကိုသွားပြီး ဝိညာဉ်ဟင်းသီးဟင်းရွက်တွေ ဝယ်လာခဲ့မယ် မင်းတို့ နှစ်ယောက်လုံးအတွက် ကြိုဆိုပွဲ ဟင်းကောင်းကောင်းလေးတွေ ချက်ကျွေးမယ်လေ"

လင်ယွင်နတ်သမီးသည် ရှေ့သို့ အမြန်လှမ်းလာပြီး ရှောင်ချီ၏လက်ထဲမှ အထုပ်အပိုးများကို လုယူကာ တောင့်တောင့်ကြီး ဖြစ်နေသော အပြုံးဖြင့်ပြောလိုက်သည်။

ရှောင်ချီ ဘာလုပ်ချင်နေသလဲဆိုတာကို သူမ ခန့်မှန်းမိပုံရသော်လည်း အခုချိန်တွင် သူမ လုပ်နိုင်သည်မှာ မသိနားမလည်ဟန် ဆောင်ခြင်းသာ ဖြစ်သည်။

"ကျွန်တော် ထမင်းစားဖို့ မနေတော့ဘူး ဟိုလူကြီးဝူသောက်ကျီက ကျွန်တော့်ကို ဂိုဏ်းက ထုတ်ပယ်လိုက်ပြီလို့ ကြားတယ်။ အဲ့ဒီအတွက် စာရွက်စာတမ်း ဒါမှမဟုတ် အထောက်အထား ဘာမှမရှိဘူးလား" ရှောင်ချီသည် သူမကို ဂရုမစိုက်ဘဲ ပစ္စည်းများကိုသာ ဆက်သိမ်းရင်း မေးလိုက်သည်။

"စီနီယာအစ်ကို ဝူသောက်ကျီက ဒေါသထွက်လို့ ပြောလိုက်တာပါ။ ခဏနေရင် ငါ မင်းကို ပင်မတောင်ထိပ်ဆီ ခေါ်သွားပြီး သူ့ကို တောင်းပန်ခိုင်းမယ် အဲ့ဒါဆို အားလုံး အဆင်ပြေသွားမှာပေါ့" လင်ယွမ်နတ်သမီးသည် ရှောင်ချီ၏ လက်ကို လှမ်းကိုင်ရန် ကြိုးစားသော်လည်း သူက အသာအယာ ရှောင်လိုက်သည်။

မလိုပါဘူး သူ့ရဲ့ဆုံးဖြတ်ချက်ကို ကျွန်တော်က အပြည့်အဝ ထောက်ခံတယ်။ ကျွန်တော့်ကို ဂိုဏ်းက ထုတ်ပယ်တာက ခင်ဗျားအတွက်ရော ကျွန်တော့်အတွက်ရော သူ့အတွက်ပါ အားလုံးအတွက် ကောင်းပါတယ်။

ဒါနဲ့ ကျွန်တော်တို့ရဲ့ ဆရာတပည့် ဆက်ဆံရေးကိုလည်း ဘယ်တော့လောက် ဖျက်သိမ်းကြမလဲဆိုတာ ကြည့်ရအောင်။

ရှောင်ချီက သူမကို လှည့်မကြည့်ဘဲ ပြောလိုက်သည်။ သူသည် အဓိပ္ပာယ်မရှိတော့သော သူ၏ အသုံးအဆောင်ဟောင်းများနှင့် အဝတ်အစားများကိုသာ အာရုံစိုက် သိမ်းဆည်းနေတော့သည်။

ရှောင်ချီ ပြီးခဲ့တဲ့ ရက်ပိုင်းအတွင်းမှာ ငါ နင့်အပေါ်မှာ တော်တော်လေး နှိမ့်ချပေးခဲ့တာ မဟုတ်ဘူးလား ဟုတ်တယ် အတိတ်မှာ ငါ အမှားတချို့ လုပ်ခဲ့တယ် ဒါပေမဲ့ အဲ့ဒါတွေက အတိတ်မှာ ကျန်ခဲ့ပြီ မဟုတ်လား။

ဘဝမှာ ဘယ်သူက အမှားမလုပ်ဖူးလို့လဲ ငါ အမှားလုပ်ခဲ့မှန်းသိလို့ အခု အဲ့ဒါတွေကို ပြင်ဆင်နေတာလေ နင် ငါ့ကို ခွင့်မလွှတ်နိုင်ဘူးလား။

တခြား ဘယ်ဆရာကများ သူ့တပည့်အပေါ်မှာ တစ်နေ့လုံး ဒီလောက် နှိမ့်ချပြီး စကားပြောနေလို့လဲ ငါနင့်ကိုနေ့တိုင်း ချော့မော့နေတာ ငါ့ရဲ့ အပြုအမူကို နင် မမြင်ဘူးလား။

လင်ယွင်နတ်သမီးသည် ဟန်ဆောင်နေသော လေသံကို ဖျောက်လိုက်ပြီး သူမ၏ အသံမှာ စူးရှသွားတော့သည်။

ပြီးတော့ နင် အရင်က ဘယ်လောက် သနားစရာကောင်းခဲ့လဲဆိုတာ မေ့သွားပြီလား။

နင် သူတောင်းစားတွေကြားမှာ ထမင်းတောင်းစားနေတုန်းက ဘယ်သူက နင့်ကို ထမင်းတစ်လုတ်ကျွေးပြီး ဂိုဏ်းကို ခေါ်လာခဲ့တာလဲ ဘယ်သူက နင့်ကို စိတ်နှစ်ပြီး သင်ကြားပေးခဲ့တာလဲ။

အခု ငါက အမှားလေး တစ်ခုပဲ လုပ်မိတာကို နင်က ဒီလောက်အထိ အလျှော့မပေးဘဲ လုပ်နေတာလား။

နင့်မှာ အသိတရား အနည်းငယ်လေးပဲ ရှိရင်တောင် အခုချိန်မှာ ငါ့ရှေ့မှာ ဒူးထောက်ပြီး နင့်အမှားကို နင်ဝန်ခံသင့်တယ်။

ဒီနေ့ကစပြီး ငါတို့ကြားက ရန်ငြိုးတွေအားလုံးကို အဆုံးသတ်လိုက်ရအောင် အနာဂတ်မှာ ငါနင့်ကို သေချာဂရုစိုက်ပြီး ငါသိသမျှ အကုန်လုံးကို သင်ပေးမယ်။

နောက်ဆိုရင် ဒီ ခရမ်းရောင်တိမ်တိုက်တောင် ကလည်း နင့်အပိုင် ဖြစ်လာမှာပါ။

လင်ယွင်နတ်သမီးသည် လွန်ခဲ့သော နှစ်ပေါင်းများစွာက ရှောင်ချီကို သူတောင်းစားများကြားမှ ခေါ်ဆောင်လာခဲ့သည့် ကိစ္စကို ထုတ်ပြောရင်း သူမ၏ လေသံမှာ ပြန်လည် နူးညံ့သွားပြန်သည်။

ဤတစ်ကြိမ်တွင် လင်ယွင်သည် နည်းလမ်းအမျိုးမျိုးကို သုံးနေခြင်းဖြစ်သည် အရင်ဆုံး ပြင်းပြင်းထန်ထန် ပြောလိုက်ပြီးမှ ပြန်ချော့ခြင်းပင် ဖြစ်သည်။

သူမသည် အတိတ်က ကျေးဇူးကို ဖော်ထုတ်ပြီး ရှောင်ချီကို ကျေးဇူးဆပ်ရန် တောင်းဆိုနေခြင်း ဖြစ်သည်။

ရှောင်ချီ ဂိုဏ်းမှာ မရှိတဲ့အချိန်မှာ လင်ယွင်နတ်သမီးတစ်ယောက် အများကြီး စဉ်းစားခဲ့ပုံရသည်။ ဤစကားလုံးများကို သူမ အချိန်ယူ ပြင်ဆင်ထားခဲ့ခြင်းဖြစ်မည်။

သူမသည် ရှောင်ချီကို အာရုံမစိုက်ခဲ့သော်လည်း သူ၏အကျင့်စရိုက်ကိုတော့ အနည်းငယ် နားလည်သည်။ ဤကလေးသည် သံယောဇဉ်ကြီးသူ ကျေးဇူးသိတတ်သူ ဖြစ်သည် ထိုနှစ်က အကြောင်းအရာများကို ခဏခဏ ပြောပြနေလျှင် သူ ဧကန်မုချ ခွင့်လွှတ်လိမ့်မည်ဟု သူမ ယုံကြည်နေသည်။

ပြောလို့ ပြီးပြီလား ခင်ဗျားက တကယ်ကို ရွံစရာကောင်းတာပဲ ကျွန်တော် အကြိမ်ကြိမ် ပြောပြီးပြီ ဆယ်နှစ်ကြာ အကျဉ်းကျခဲ့တဲ့ ဒုက္ခ လျှပ်စီးရိုက်ချက် အချက်ပေါင်း သုံးဆယ်ရဲ့ အသားထဲအထိ နာကျင်မှု အဲ့ဒီဆယ်နှစ်အတွင်းမှာ ကျွန်တော့်ရဲ့ဝိညာဉ်၊ အရိုးနဲ့ သွေးကြောတွေကို လျှပ်စီးတွေ လောင်မြိုက်ခဲ့တဲ့ နာကျင်မှု.အဲ့ဒါတွေနဲ့တင် ခင်ဗျားရဲ့ ကျေးဇူးတွေကို ကျွန်တော် အကြွေးဆပ်ပြီးသွားပြီ။ အဲ့ဒီကိစ္စတွေကို ထပ်ပြောရဲရင် ခင်ဗျားကို အခုချက်ချင်း သတ်ပစ်မယ်။

ရှောင်ချီသည် လင်ယွင်နတ်သမီးကို အေးစက်စွာ တစ်ချက်ကြည့်လိုက်ရာ သူ၏ ခန္ဓာကိုယ်မှ ဖိအားများ စတင်ထွက်ပေါ်လာသည်။ သူသည် နောက်တစ်စက္ကန့်မှာပဲ ပေါက်ကွဲထွက်တော့မည့်အတိုင်းပင်။

ဟွန့်... အခုတော့ ခွံ့ကျွေးတဲ့ လက်ကိုပြန်ကိုက်ချင်နေတာလား မစောလွန်းဘူးလား ဒီအထုပ်အပိုးတွေကို သိမ်းပြီး ဘာလုပ်မလို့လဲ ငါ မသိဘူး မထင်နဲ့ ငါ့အနားကနေ ထွက်သွားချင်နေတာ မဟုတ်လား။

အခုတော့ ငါ့ကို ရန်ထောင်ပြနေတာလား မင်းကို လက်ဖျားနဲ့တောင် တို့ရဲမလားလို့ ကြည့်နေတာလား မင်းမှာ ကျင့်စဉ်အနည်းငယ် ရှိလာတာနဲ့ပဲ ဒီမှာ လာပြီး ဆရာကြီး လုပ်နိုင်မယ် ထင်နေတာလား။

ငါ ယဲ့ဖန်ကိုတော့ မနာကျင်စေချင်ဘူး ဒါပေမဲ့ မင်းကိုတော့ ငါ လုပ်နိုင်တာပေါ့ ဒီနေ့သာ ဒီဂူထဲကနေ ခြေတစ်လှမ်း ထွက်ကြည့်လိုက် မင်းရဲ့ ခြေထောက်တွေကို ငါရိုက်ကျိုးပစ်မယ်။

စကားအကောင်းပြောလို့ မရမှန်း သိလိုက်သောအခါ လင်ယွင်နတ်သမီး၏ လေသံမှာ ပြန်လည် မာကြောလာပြန်သည်။

ရှောင်ချီကိုသာ အခုချိန်မှာ ဆွဲထားနိုင်ရင် အနာဂတ်မှာ သူ့ကို ကောင်းကောင်း ဆက်ဆံပြီး အတိတ်က အမှားတွေကို ပြန်ပြင်နိုင်လိမ့်မည်ဟု သူမ ယုံကြည်နေသည်။ ဤတပည့်နှစ်ယောက် သူမဆီကို တဖြည်းဖြည်း ပြန်ရောက်လာလိမ့်မည်ဟု သူမ မျှော်လင့်နေခြင်း ဖြစ်သည်။

"ညီမလေး... အကုန်သိမ်းပြီးပြီလား" ရှောင်ချီက ရုတ်တရက် ခေါင်းလှည့်ပြီး လင်ယုရှုကို မေးလိုက်သည်။

လင်ယုရှုမှာ သူမ၏ စီနီယာအစ်ကိုနှင့် ဆရာတို့ ရန်ဖြစ်တော့မည်ကို စိုးရိမ်တုန်လှုပ်စွာ ကြည့်နေခဲ့ခြင်း ဖြစ်သည်။ သူမ၏ စီနီယာအစ်ကိုက ရုတ်တရက် သူမကို လှည့်မေးလိမ့်မည်ဟု မထင်ထားခဲ့ပေ။

"ဟုတ်... ဟုတ်ကဲ့ အကုန် အဆင်သင့်ဖြစ်ပါပြီ" လင်ယုရှုက ကြောင်တောင်တောင်ဖြင့် ခေါင်းညိတ်ဖြေကြားလိုက်သည်။

"ဒါဆိုရင် ဘာစောင့်နေတာလဲ သူတို့က ငါတို့ကို ဂိုဏ်းကတောင် ထုတ်ပယ်ပြီးပြီပဲ ငါတို့ ဒီမှာ ဘာလုပ်နေဦးမှာလဲ သွားကြစို့"

ရှောင်ချီသည် လက်ယမ်းပြကာ ဂူအဝင်ဝဆီသို့ ဦးဆောင် ထွက်ခွာခဲ့သည်။

ဂူအတွင်းရှိ ပန်းပင်နှင့် မြက်ပင်လေးများသည် သူ၏ ခြေလှမ်းများနှင့်အတူ အသာအယာ ယိမ်းနွဲ့နေကြသည် ၎င်းတို့၏ သခင်ကို နှုတ်ဆက်နေကြသကဲ့သို့ပင်။

ဝုန်း... ဝိညာဉ်စွမ်းအင်များ ရုတ်တရက် ပေါက်ကွဲထွက်လာသည် လင်ယွင်နတ်သမီးသည် ရှောင်ချီကို ဦးတည်ကာ လက်ဝါးဖြင့် ပြင်းထန်စွာ ရိုက်ထုတ်လိုက်သည်။ သူမ လုံးဝ လက်ရှောင်ခြင်း မရှိပေ။

ဘာပဲဖြစ်ဖြစ် သူမ ရှောင်ချီကို ပေးမထွက်နိုင်ဘူး အခုချိန်မှာ ခရမ်းရောင်တိမ်တိုက်တောင်က အင်မတန် အေးစက်ခြောက်ကပ်နေပြီ။

ကျေးဇူးမသိတဲ့ မူဝမ်အာ နဲ့ လျူချန်းအာတို့ကလည်း သူတို့ရဲ့ နှလုံးသားတွေကို ယဲ့ဖန်ဆီမှာပဲ ပုံအပ်ထားကြတာ။ သူတို့အတွက် ဆရာဖြစ်တဲ့ သူမက သူစိမ်းတစ်ယောက်လိုပဲ။

အကယ်၍ ရှောင်ချီနဲ့ ရွှေယွမ်ကိုပါ ထပ်ပြီး ဆုံးရှုံးရမယ်ဆိုရင် သူမရဲ့ ကျန်ရှိတဲ့ ဘဝသက်တမ်းက ဘယ်လောက်တောင် အထီးကျန်ဆန်မလဲဆိုတာ လင်ယွင်နတ်သမီး မတွေးရဲအောင်ပင်။

သူမသည် ခရမ်းရောင်တိမ်တိုက်တောင်က ပန်းပင် မြက်ပင်တွေနဲ့ပဲ အဖော်ပြုပြီး အိုမင်းမစွမ်းဖြစ်ကာ တစ်ယောက်တည်း သေဆုံးသွားရလိမ့်မည်။

ထို့အပြင် လင်ယွမ်နတ်သမီး အခု အလိုချင်ဆုံးအရာမှာ စိတ်ပိုင်းဆိုင်ရာ လွတ်မြောက်မှုပင် ဖြစ်သည်။

သူမသည် ရှောင်ချီအပေါ်မှာ တကယ်ပဲ မှားခဲ့တယ်လို့ ခံစားနေရပြီး အခုလို အခြေအနေမျိုး ရောက်ရတာက သူမရဲ့အပြစ်လို့ မြင်နေသည်။

ဤရှုပ်ထွေးနေသော အခြေအနေတွင် သူမ၏ အနာဂတ်မှာ မှောင်မိုက်နေသလိုပင်။ ရှောင်ချီ၏ ခွင့်လွှတ်မှုကို ရရှိမှသာ သူမ၏ ဘဝက အဓိပ္ပာယ် ရှိလာလိမ့်မည်ဟု သူမယူဆနေသည်။

ရှောင်ချီ၏ ခွင့်လွှတ်မှုကို ရမှသာ သူမ၏ စိတ်ထဲက မိစ္ဆာတွေကို ဖယ်ရှားနိုင်မည်ဖြစ်ပြီး သူမ၏ ကျင့်စဉ်လမ်းကြောင်းကလည်း ချောမွေ့လာလိမ့်မည်။

ဒါကလည်း သူမ၏ တစ်ကိုယ်ကောင်းဆန်မှုပင်ဖြစ်သည်။ သူမသည် ရှောင်ချီကို အသုံးချကာ သူမ၏ တပည့်နှစ်ယောက်၏ သစ္စာဖောက်မှုကို ကုစားချင်နေသည်။

သူမ စီနီယာအစ်ကို၏ အမုန်းတရားများကို ရှောင်ချီဖြင့် ပြန်လည် ဖြည့်ဆည်းချင်နေသည်။ ထို့အပြင် ယဲ့ဖန်၏ သူမအပေါ် ကြံစည်မှုများကိုလည်း ရှောင်ချီဖြင့်ပင် အစားထိုးချင်နေခြင်းဖြစ်သည်။