အခန်း (၆၈)  အထွတ်အထိပ် ရွှေကြာပန်း

မင်းလေးကတော့ တကယ့်ကို အဆော့သန်တာပဲ။ တခြားဂိုဏ်းက တပည့်တွေကို ခိုးယူတဲ့ အကျင့်ဆိုး ဘယ်တုန်းက ရသွားတာလဲ။

ဂိုဏ်းကြီး (၇) ဂိုဏ်းသည် တစ်သားတည်း ရှိနေကြသည်ဟု မဆိုနိုင်သော်လည်း မဟာ​ေဝနိုင်ငံ၏ ထိပ်တန်းဂိုဏ်းများဖြစ်သည့်အတွက် အချင်းချင်း မျက်နှာပူစရာများကိုတော့ ထည့်တွက်ကြရသည်။

ဝိညာဉ်ဓားဂိုဏ်းက မကြာသေးမီနှစ်တွေအတွင်း ဆုတ်ယုတ်လာတယ်ဆိုပေမဲ့ သူတို့မှာ အစဉ်အလာ အမွေအနှစ်တွေ ရှိနေတုန်းပဲ။ မင်းက ငါတို့ဂိုဏ်းနှစ်ခုကြားမှာ ပဋိပက္ခဖြစ်အောင် တကယ်ပဲဆွပေးချင်တာလား။

ဘိုးဘေးအဘွားအိုသည် သူမ၏ တုန်ရီနေသော လက်ညှိုးလေးဖြင့် ယွီလင်လုံ၏ နဖူးကို အသာအယာ တောက်လိုက်ပြီး ချစ်စဖွယ် အပြစ်တင်သည့် လေသံဖြင့် ပြောလိုက်သည်။

သူတို့က ပါရမီရှင်ကို တန်ဖိုးမထားတာပဲ မြေးမကို ဘာလို့ အပြစ်တင်တာလဲ ရှောင်ချီအပေါ် သူတို့ ဘာတွေလုပ်ခဲ့သလဲဆိုတာ ဘိုးဘေးကြီး မသိလို့ပါဟုဆိုကာ ယွီလင်လုံသည် ရှောင်ချီ ဝိညာဉ်ဓားဂိုဏ်းတွင် ကြုံတွေ့ခဲ့ရသော မတရားမှုများကို လက်ဟန်ခြေဟန်များဖြင့် အားရပါးရ ရှင်းပြတော့သည်။

"အဲ့ဒီလိုဆိုရင်တော့ သူ့ကို တောင်နောက်ဘက်ကို အရင်ခေါ်လာခဲ့ပါ သူ့ရဲ့စရိုက်ကို ငါ အကဲခတ်ကြည့်မယ်။ သူက လူကောင်းတစ်ယောက်ဆိုရင်တော့ ငါ စည်းကမ်းဖောက်ပြီး ငါ့ရဲ့ နောက်ဆုံးတပည့်အဖြစ် လက်ခံပေးပါ့မယ်။" ဇရပ်ထဲတွင် အတော်ကြာ စဉ်းစားပြီးနောက် ဘိုးဘေးအဘွားအိုသည် နောက်ဆုံးတွင် ခေါင်းညိတ်ကာ သဘောတူလိုက်သည်။

"ကျေးဇူးတင်ပါတယ် ဘိုးဘေးကြီး မြေးမ အခုပဲ သွားခေါ်လိုက်ပါ့မယ်" ယွီလင်လုံသည် ရယ်မောရင်း မတ်တပ်ထရပ်ကာ တောင်နောက်ဘက်မှ ခုန်ပေါက်ကာ ထွက်ခွာသွားတော့သည်။

ဤဘိုးဘေးအဘွားအို၏ အဆင့်အတန်းမှာ အမှန်တကယ်ပင် ကြီးကျယ်လှပေသည်။ သူမသည် ကျောက်စိမ်းကညာဂိုဏ်းကို စတင်တည်ထောင်သူ ဘိုးဘေးကြီး၏ နောက်ဆုံးတပည့်ဖြစ်ပြီး အသက် (၆၀၀) ကျော် ရှိပြီဖြစ်သည်။

သူမသည် လက်ရှိ​ မဟာ​ဝေနိုင်ငံကျင့်စဉ်လောကတွင်ရှိသမျှသော အစွမ်းအထက်ဆုံးနှင့် သက်တမ်းအရင့်ဆုံး ပုဂ္ဂိုလ်ကြီးများထဲမှ တစ်ဦးပင် ဖြစ်သည်။

ရှောင်ချီသည် တောင်ခြေတွင် စောင့်နေသည်မှာ ကြာပြီဖြစ်သည်။ ယုလုံလင်၏ ခေါ်ယူမှုကို ရရှိသည်နှင့် သူသည် သူမနောက်မှ လိုက်ကာ ကျောက်စိမ်းကညာတောင်ပေါ်သို့ ပြန်တက်လာခဲ့သည်။

အမျိုးသမီး တပည့်အုပ်စု၏ လက်ညှိုးထိုး အတင်းပြောခြင်းကို ခံရပြီးနောက် နောက်ဆုံးတွင် တောင်နောက်ဘက်သို့ ရောက်ရှိကာ ဘိုးဘေးကြီးနှင့် တွေ့ဆုံခွင့် ရခဲ့သည်။

"မြေးမတော် ရှောင်ချီက ရှင်းယွဲ့ ဘိုးဘေးကြီးကို ဂါရဝပြုပါတယ်" လမ်းမှာ ယွီလင်လုံက ဘိုးဘေးကြီး၏ ဘွဲ့အမည်ကို ပြောပြထားသဖြင့် ရှောင်ချီသည် အဘွားအိုကို မြင်သောအခါ မှန်ကန်စွာ နှုတ်ဆက်နိုင်ခဲ့သည်။

ရှောင်ချီသည် ခေါင်းကို အသာအယာသာ ညွှတ်၍ အလေးပြုပြီး ဒူးထောက် အလေးမပြုသည်ကို မြင်သောအခါ အဘွားအို၏ မျက်ဝန်းများ အနည်းငယ် ကျဉ်းမြောင်းသွားသည်။

သို့သော် သူမသည် ချက်ချင်းပင် ပြန်လည် တည်ငြိမ်သွားသည်။ သူမသည် လောကီရေးရာများကို စွန့်ခွာခဲ့သည်မှာ ကြာပြီဖြစ်၍ ထိုကဲ့သို့သော အခမ်းအနား အဆောင်အယောင်များကို သိပ်ပြီး ဂရုမစိုက်တော့ပေ။

သို့သော် ဘေးတွင် ရပ်နေသော ယွီလင်လုံကတော့ မနေနိုင်ပေ။ သူမသည် ရှောင်ချီကို မျက်စောင်းခဲကာ ကြည့်လိုက်သည်။ တစ်ခုခု ပြောချင်သော်လည်း ဘိုးဘေးကြီး၏ ရှေ့မှောက်ဖြစ်နေသဖြင့် ပြဿနာ မရှာရဲပေ။

တကယ်ကို အလားအလာရှိတဲ့ ပျိုးပင်လေးပဲ အခြေခံကလည်း ခိုင်မာတယ် ကျင့်စဉ်ကလည်း နက်ရှိုင်းပြီး ပါရမီကလည်း တစ်သောင်းမှာ တစ်ယောက် ပေါ်ထွန်းခဲတဲ့ ပါရမီမျိုးပဲ။ ဒါပေမဲ့ မင်းက မိစ္ဆာလမ်းကို ရောက်နေပုံရပေမဲ့ မင်းဆီကနေ မိစ္ဆာစွမ်းအင်တွေ အပြင်ကို လျှံထွက်မနေဘူး။ မင်းက မင်းရဲ့ စိတ်နှလုံးမိစ္ဆာကို ထိန်းချုပ်နိုင်တာလား။

အဘွားအိုသည် သူမ၏ မှုန်ဝါးနေသော မျက်လုံးများကို ဖြည်းဖြည်းချင်း ဖွင့်ကာ ရှောင်ချီကို စိတ်ဝင်တစား ကြည့်ရင်း မေးလိုက်သည်။

"ကျွန်တော် တစ်ချိန်က မိစ္ဆာလမ်းကို ရောက်ခဲ့တာ မှန်ပါတယ်။ ဒါပေမဲ့ သာမန် စိတ်နှလုံးမိစ္ဆာ တစ်ခုကတော့ ကျွန်တော့်ကို ထိန်းချုပ်ဖို့ မလုံလောက်ပါဘူး" ရှောင်ချီ၏ အဖြေမှာ တိုတုတ်ပြီး ရှင်းလင်းလှသည်။ မည်သည့်အရာကိုမျှ ရည်ရွယ်ချက်ရှိရှိ ရှောင်လွှဲခြင်း မရှိပေ။

ခန္ဓာကိုယ်တစ်ခုလုံးက မိစ္ဆာစွမ်းအင်တွေနဲ့ ဖုံးအုပ်နေပြီး စိတ်ထဲမှာလည်း သတ်ဖြတ်လိုစိတ်တွေ ပြည့်နေပေမဲ့ မင်းရဲ့ ဝိညာဉ်အာရုံကတော့ အင်မတန် ကြည်လင်နေပါလား။

တကယ်ကို ထူးဆန်းတဲ့ပါရမီပဲ နှစ်ပေါင်းများစွာ အသက်ရှင်ခဲ့တဲ့ ဒီအဘွားကြီးတောင် ပါရမီရှင်ကို မြေတောင်မြှောက်ပေးချင်တဲ့ စိတ်တွေ ပေါ်လာရတယ်။

မင်းက ဝိညာဉ်ဓားဂိုဏ်းကို စွန့်လွှတ်ပြီး ငါ့ရဲ့ တပည့်အဖြစ် ခံယူချင်သလား ဒါပေါ့ မင်း ဝိညာဉ်ဓားဂိုဏ်းကို မစွန့်ချင်ရင်လည်း ကိစ္စမရှိပါဘူး။ ငါက မင်းကို ငါ့တပည့်အဖြစ်ပဲ လက်ခံမှာပါ ကျောက်စိမ်းကညာဂိုဏ်းထဲ ဝင်ဖို့ မတောင်းဆိုပါဘူး အဘွားအိုက ရှောင်ချီကို ကြည့်ကာ ပြုံးလျက် မေးလိုက်သည်။

ဤကဲ့သို့သော အခြေအနေမျိုးကို ကြားလိုက်ရသဖြင့် ရှောင်ချီမှာ သဘာဝကျကျပင် စိတ်လှုပ်ရှားသွားသည်။ သို့သော် သေချာစဉ်းစားကြည့်လျှင် အဘွားအို၏ စကားထဲတွင် ဖုံးကွယ်ထားသော အဓိပ္ပာယ်ကို မြင်နိုင်ပါသည်။

ဂိုဏ်းထဲမဝင်ဘဲ တပည့်အဖြစ်သာ လက်ခံခြင်းမှာ သူသည် လုံလောက်သော အကာအကွယ်ကို ရရှိမည်မဟုတ်ဟု ဆိုလိုခြင်းဖြစ်သည်။

အကယ်၍ သူသာ ဝိညာဉ်ဓားဂိုဏ်းမှ ထွက်ခွာခဲ့လျှင် အစွမ်းထက်သော ဆရာတစ်ယောက် ရှိနေသော်လည်း မည်သူ့ကိုမျှ အားကိုး၍မရသော လွတ်လပ်သည့်ကျင့်ကြံသူတစ်ဦးသာ ဖြစ်သွားပေလိမ့်မည်။

သို့သော် သူသည် ဝိညာဉ်ဓားဂိုဏ်းမှ လက်ရှိအချိန်တွင် မထွက်သေးပါက သူသည် နှစ်ဖက်လုံးမှ အကျိုးအမြတ်ကို ရယူနိုင်ပြီး ဘယ်နေရာမှာပဲဖြစ်ဖြစ် ရှုံးနိမ့်မည်မဟုတ်ပေ။

ဒါပေမဲ့ ကြိုတင်လုပ်ဆောင်ရမည့်အရာ တစ်ခုရှိသည် ၎င်းမှာ နတ်သမီးလင်းယွင် နှင့် ဆရာတပည့်အဖြစ် အဆက်အသွယ် ဖြတ်တောက်ရန် ဖြစ်သည်။

ကျင့်စဉ်လောကတွင် မရေးထားသော စည်းကမ်းတစ်ခု ရှိသည် ၎င်းမှာ တပည့်တစ်ဦးတွင် ဆရာတစ်ယောက်သာ ရှိရမည်ဟူသော စည်းကမ်းပင်။ ဒါကတော့ အစဉ်အလာအရသာ ဖြစ်ပြီး တရားဝင် ပြဋ္ဌာန်းထားသော စည်းကမ်းမျိုးတော့ မဟုတ်ပေ။

"စီနီယာကြီးရဲ့ တပည့်ဖြစ်လာမယ်ဆိုရင် ကျွန်တော့်အတွက် ဘာအကျိုးကျေးဇူးတွေ ရှိမှာလဲ" ရှောင်ချီက ချက်ချင်း သဘောမတူသေးပေ။ သူကျောက်စိမ်းကညာဂိုဏ်းကို စိတ်ဝင်စားရခြင်း၏ အဓိက အကြောင်းရင်းမှာ ဂိုဏ်း၏ရတနာဖြစ်သော ကျောက်စိမ်းသန့်စင်ပုလင်းကြောင့်သာ ဖြစ်သည်။

နောက်ထပ် အကြောင်းရင်းတစ်ခုမှာ သူ၏ ညီမလေးအတွက် ကောင်းမွန်သော နေရာတစ်ခု ရှာပေးချင်၍ဖြစ်သည်။ ဝိညာဉ်ဓားဂိုဏ်းက ခရမ်းရောင်တိမ်တိုက်တောင်ကဲ့သို့သော နေရာမျိုးမှာ သူမအရွယ် မိန်းကလေးတစ်ဦးအတွက် မသင့်တော်ပေ။

အကယ်၍ သူ လုံလောက်သော အကျိုးအမြတ် မရရှိပါက ရှောင်ချီအနေနှင့် ကျောက်စိမ်းကညာဂိုဏ်းသို့ ဝင်ရန် အကြောင်းပြချက်မရှိပေ။

ကျင့်စဉ်လောကတွင် အစွမ်းထက်သော ဂိုဏ်းပေါင်း များစွာ ရှိသည်။ မဟာဝေနိုင်ငံအတွင်းမှာပင် ဂိုဏ်းကြီး (၇) ဂိုဏ်း ရှိသည်။ နယ်စပ်ကျော်လွန်လျှင်လည်း ကြောက်စရာကောင်းသော ဂိုဏ်းအင်အားစုများစွာ ရှိသည်။

ရှောင်ချီ၏ ပါရမီနှင့်ဆိုလျှင် သူသာ တကယ် ဝင်ချင်ပါက မည်သည့်ဂိုဏ်းကမဆို လက်ခံကြမည်မှာ မခက်ခဲပေ။ ကျောက်စိမ်းကညာဂိုဏ်းကိုပဲ ဖက်တွယ်ထားစရာ မလိုပေ။

"မင်းလေးက တော်တော်လေး လောဘကြီးတာပဲ မင်း ဘာလိုချင်လို့လဲ" ရှောင်ချီ၏ အမူအရာကြောင့် အဘွားအိုမှာ ဒေါသထွက်မသွားဘဲ ထိုအစား ငါ မင်းကို နားလည်ပါတယ်ဆိုသည့် အမူအရာမျိုး ပြသခဲ့သည်။

"ကျွန်တော် ကျောက်စိမ်းသန့်စင်ပုလင်းကို အသုံးပြုခွင့် ရချင်ပါတယ် ပြီးတော့ ကျွန်တော့်ရဲ့ ညီမလေးကိုလည်း သင့်တင့်တဲ့ အဆင့်အတန်းတစ်ခုနဲ့ ကျောက်စိမ်းကညာဂိုဏ်းမှာ ထားပေးစေချင်ပါတယ်" ရှောင်ချီက ပွင့်ပွင့်လင်းလင်း တိုက်ရိုက် တောင်းဆိုလိုက်သည်။

သူ၏ တောင်းဆိုမှုကြောင့် ဘေးတွင် ရှိနေသော ယွီလင်လုံမှာ လန့်သွားရသည်။ ဤတောင်းဆိုချက်များမှာ တကယ်ကို လွန်လွန်းလှသည်။

ဥပမာအားဖြင့် ပြောရလျှင် ယုလုံလင်က ဝိညာဉ်ဓားဂိုဏ်းသို့ သွားရောက်ပြီး သူမ ထိုဂိုဏ်းထဲ ဝင်ချင်သော်လည်း ဝိညာဉ်ဓားဂိုဏ်းချုပ်ဖြစ်ရမည် ပြီးလျှင် ကောင်းကင်စေတီကို အသုံးပြုခွင့် ရရမည်ဟု တောင်းဆိုသကဲ့သို့ပင် ဖြစ်သည်။

မင်းလေးက တကယ်ကို လောဘကြီးတာပဲ ကျောက်စိမ်းသန့်စင်ပုလင်းဆိုတာ ဂိုဏ်းချုပ်ရဲ့ အာဏာကို ကိုယ်စားပြုတဲ့အရာပဲ။ ဒီအရာကိုတော့ မင်းကို ပေးလို့မရဘူး တစ်နေ့မှာ မင်း ကျောက်စိမ်းကညာဂိုဏ်းရဲ့ ဂိုဏ်းချုပ် ဖြစ်လာရင်တော့ တစ်မျိုးပေါ့။

ဒါပေမဲ့ မင်းက ငါ့တပည့်အဖြစ် တကယ် ခံယူချင်တယ်ဆိုရင်တော့ မင်းရဲ့ ဆရာဖြစ်မယ့် ငါ့မှာ မင်းကို ပေးနိုင်တဲ့ မှော်ရတနာတစ်ခုတော့ ရှိပါတယ်။

ရှင်းယွဲ့ ဘိုးဘေးကြီး၏ စကားကို ကြားလိုက်ရသဖြင့် ရှောင်ချီမှာ စိတ်ပျက်သွားမိသည်။ သူ ဤနေရာကို လာရခြင်းမှာ ကျောက်စိမ်းသန့်စင်ပုလင်း အတွက်ကြောင့်သာ ဖြစ်သည်။ အကယ်၍ ထိုရတနာကို မရလျှင် သူ၏ ကျောက်စိမ်းကညာဂိုဏ်း ခရီးစဉ်မှာ ကျရှုံးခြင်းဟုပင် ဆိုရမည်။

ရှောင်ချီက ငြင်းပယ်ရန် ပါးစပ်ပြင်လိုက်စဉ်မှာပင် ဘိုးဘေးကြီးသည် သူမ၏ ခါးမှ သိုလှောင်အိတ်ကို ထုတ်ယူလိုက်သည်ကို မြင်လိုက်ရသည်။

ထို့နောက် လက်ချောင်းလေးဖြင့် အသာအယာ တောက်လိုက်ရာ သိုလှောင်အိတ်မှာ ပွင့်သွားပြီး ရွှေရောင်အလင်းတန်းတစ်ခု ပျံထွက်လာသည်။ ကြာပွင့်ဖတ် (၁၂) ဖတ်ပါသော ရွှေရောင်ကြာပန်းတစ်ပွင့်မှာ ရှောင်ချီ၏ မျက်စိရှေ့တွင် ဖြည်းဖြည်းချင်း ပေါ်ထွက်လာတော့သည်။

ဒီအရာကို ကျိသောက် ရွှေကြာပန်းလို့ ခေါ်တယ်။ ဒါက ငါ့ရဲ့ဆရာကြီးက ငါ့ဆရာကို ပေးခဲ့တဲ့ မှော်ရတနာပဲ နောက်တော့ငါ့ဆရာက ငါ့ကို ထပ်ပေးခဲ့တာ။ မင်းသာ ငါ့ရဲ့ တပည့်ဖြစ်လာမယ်ဆိုရင် ဒါကမင်းအပိုင် ဖြစ်လာလိမ့်မယ်။

ဘိုးဘေးကြီးသည် အလွန်တောက်ပလှသော ရွှေကြာပန်းကို ညွှန်ပြရင်း ရှောင်ချီကို ကြည့်ကာ အေးဆေးစွာ ပြောလိုက်သည်။

ထိုအချိန်တွင် ရှောင်ချီ၏ ပါးစပ်မှာ ကြက်ဥတစ်လုံး ဝင်လောက်အောင် ဟသွားပြီး လုံးဝ ဆွံ့အသွားတော့သည်။ ဤမှော်ရတနာမှာလည်း နတ်သန္ဓေမှော်ရတနာတစ်ခုဖြစ်ပြီး ကြောက်မက်ဖွယ်ကောင်းသော နတ်သန္ဓေ ဝိညာဉ်စွမ်းအင်များ ကိန်းအောင်းနေသည်။

၎င်းက ဘယ်လောက်အထိ ကြောက်စရာကောင်းသလဲ ရိုးရိုးရှင်းရှင်း ပြောရလျှင် ရှောင်ချီ မြင်ခဲ့ဖူးသော ကောင်းကင်စေတီ နှင့် ကျောက်စိမ်းကညာဂိုဏ်း၏ ကျောက်စိမ်းသန့်စင်ပုလင်းနှစ်ခုလုံးကို ပေါင်းလိုက်လျှင်ပင် ၎င်းတို့အတွင်းရှိ စွမ်းအင်များမှာ ဤရွှေကြာပန်းထဲက စွမ်းအင်၏ တစ်ဝက်ကိုတောင် မမီနိုင်ပေ။

ဒါ... ဒီရတနာက ကျောက်စိမ်းသန့်စင်ပုလင်းထက် အများကြီး ပိုစွမ်းတာပဲ မဟုတ်လား ဒါကို ဘာလို့ဂိုဏ်းရဲ့ ရတနာအဖြစ် မသတ်မှတ်ဘဲ ကျောက်စိမ်းသန့်စင်ပုလင်းကိုပဲ ရှေ့တန်းတင်ထားရတာလဲ။

အကယ်၍ ဤရတနာသာ ကျောက်စိမ်းကညာဂိုဏ်း၏ရတနာ ဖြစ်ခဲ့လျှင် ၎င်းသည် ကျင့်စဉ်လောက၏ ရတနာအဆင့်သတ်မှတ်ချက်တွင် ထိပ်ဆုံးနေရာကို သေချာပေါက် ရယူနိုင်လိမ့်မည်။

ရှောင်ချီသည် ရွှေကြာပန်းကို မယုံကြည်နိုင်လောက်အောင် ကြည့်လိုက်ပြီးနောက် အဘွားအိုကို ပြန်ကြည့်လိုက်သည်။

ယခုအခါ သူဘိုးဘေးကြီးကို ကြည့်သော အကြည့်မှာ ရိုသေလေးစားမှုများဖြင့် ပြည့်နှက်နေတော့သည်။ သူ့ရှေ့က အလွန်အိုမင်းနေသော ဤအဘွားအိုမှာ မြင်ရသလောက် မရိုးရှင်းသည်မှာ သေချာသည်။ သူမသည် အမှန်တကယ်ပင် ဝှက်ဖဲဖြစ်သော အစွမ်းထက် ကျွမ်းကျင်သူတစ်ဦး ဖြစ်ပေလိမ့်မည်။