အခန်း (၆၅)  နတ်ဘုရားသားတော် ဆင်းသက်ခြင်း

ဝုန်း... ပြင်းထန်ပြီး အရှိန်အဝါကြီးမားလှသော စွမ်းအားတစ်ခုမှာ စားသောက်ဆိုင်လေးအနီးတွင် ချက်ချင်းပေါ်ပေါက်လာသည်။

မျက်စိတစ်မှိတ်အတွင်းမှာပင် လူပေါင်း တစ်ရာကျော် ပေါ်လာပြီး ရေတစ်စက်ပင် မယိုစိမ့်နိုင်လောက်အောင် ထိုနေရာကို ဝိုင်းရံထားလိုက်ကြသည်။

ရှောင်ချီသည် သူ၏ ဝိညာဉ်အာရုံဖြင့် ပတ်ဝန်းကျင်ကို တစ်ချက်ကြည့်လိုက်သော်လည်း ယဲ့ဖန်၏ အရိပ်အယောင်ကို မတွေ့ရသဖြင့် အနည်းငယ် စိတ်ပျက်သွားမိသည်။

ဒါဆို မင်းတို့က အဲ့ဒီ နတ်ဘုရားနန်းတော်ဆိုတဲ့ဟာရဲ့ ယုံကြည်သူတွေနဲ့ နောက်လိုက်တွေပေါ့ ဟုတ်လား မင်းတို့ရဲ့ နတ်ဘုရားသားတော်ကော ဘယ်မှာလဲ။

ရှောင်ချီသည် ရုတ်တရက် ပေါ်လာသော ဝတ်စုံနက်ဝတ် ကျင့်ကြံသူ တစ်ရာကျော်ကို ပျင်းရိငြီးငွေ့ဖွယ် အမူအရာဖြင့် ကြည့်ကာ မေးလိုက်သည်။

"ငါတို့ရဲ့ နတ်ဘုရားသားတော်က အခု လျှို့ဝှက်နယ်မြေတစ်ခုမှာ ကျင့်ကြံနေတာ။ မင်းလို အကောင်ပေါက်လေးကို လာတွေ့ဖို့ အချိန်မရှိဘူး" ဝိညာဉ်အသွင်ပြောင်းခြင်းအဆင့်နှောင်းပိုင်းရှိသည့် ဝတ်စုံနက်ဝတ် ကျင့်ကြံသူတစ်ဦးက လူအုပ်ထဲမှ ထွက်လာပြီး ရှောင်ချီကို မောက်မာစွာ ကြည့်ရင်း ပြောလိုက်သည်။

"ငါးစာလေးတွေပဲကို ဘာလာလုပ်တာလဲ အသက်ရှင်ရတာ ငြီးငွေ့လို့ သေမင်းကို လာရှာတာလား"

ရှောင်ချီသည် ခုနက စွမ်းအင်လှိုင်းကြောင့် လွင့်စဉ်သွားသော ယွီလင်လုံကို အရင်ဆုံး ဆွဲထူလိုက်သည်။

ထို့နောက် လူအုပ်ရှေ့သို့ တစ်လှမ်းချင်း လျှောက်သွားသည်။ ရုတ်တရက် ပေါ်လာသော လူတစ်ရာနီးပါးကို ရင်ဆိုင်ရသော်လည်း ရှောင်ချီသည် အနည်းငယ်မျှ တုန်လှုပ်ခြင်း မရှိပေ။

ထိုအစား သူတို့အား ကြည့်သော သူ၏ အကြည့်မှာ ကြက်ကလေး ငှက်ကလေးများကို ကြည့်နေသကဲ့သို့ပင်။

"ငါတို့ နတ်ဘုရားနန်းတော်ရဲ့ လက်ဝဲအကာအကွယ်ပေးသူကို ဒဏ်ရာရအောင် လုပ်တဲ့အတွက် မင်းဟာ ကိုယ့်သေတွင်းကိုယ် တူးလိုက်တာပဲ" သူတို့ခေါင်းဆောင်၏ အသံမှာ ဟိန်းထွက်လာသည်။

သို့သော် သူ၏ ဝိညာဉ်အသွင်ပြောင်းခြင်း အထွတ်အထိပ်ကျင့်စဉ်နှင့် ယှဉ်လျှင် ထိုအသံမှာ အနည်းငယ် အားနည်းနေသယောင် ရှိသည်။

ရှောင်ချီသည် ထိုသူများကို စိတ်ပျက်စွာ တစ်ချက်ကြည့်လိုက်ပြီး အဓိပ္ပာယ်မရှိဟု ချက်ချင်း ခံစားလိုက်ရသည်။ ယဲ့ဖန်ကို ဤနေရာသို့ မျှားမခေါ်နိုင်မှတော့ သူတို့ကို ဆက်ထားရန် မလိုအပ်တော့ပေ။

"လင်ရှောင်ဓားသိုင်းဒုတိယပုံစံ - ဝိညာဉ်ဖြတ်တောက်ခြင်း " ရှောင်ချီသည် ရုတ်တရက် ဓားကို ဆွဲထုတ်ကာ လူအုပ်ထံသို့ လွှဲခုတ်လိုက်တော့သည်။

ဓားအလင်းတန်းတစ်ခုသည် လူအုပ်၏ အလယ်ဗဟိုတွင် အလွန်လျှင်မြန်သော အရှိန်ဖြင့် ပေါ်လာပြီး သူတို့၏ အားနည်းလှသော ဝိညာဉ်များကို ဖျက်ဆီးရန် ကျဆင်းလာသည်။

"နတ်ဘုရားသားတော် ဆင်းသက်ခြင်း နယ်မြေကို အစိုးရခြင်း" မူလက ရှောင်ချီသည် ဤတစ်ကွက်တည်းနှင့် သူတို့ကို အပြတ်ရှင်းနိုင်မည်ဟု ထင်ထားခဲ့သည်။

သို့သော် ဓားအလင်းတန်းမှာ သူတို့ကို ထိတော့မည့်ဆဲဆဲတွင် နောက်လိုက် တစ်ရာကျော်မှာ တစ်ပြိုင်နက်တည်း ဂါထာများ ရွတ်ဖတ်လိုက်ကြသည်။

သူတို့၏ ခန္ဓာကိုယ်မှ ရွှေရောင်အလင်းတန်းများ ပေါက်ကွဲထွက်လာပြီး ထူးဆန်းသော ပုံစံများဖြင့် လူစုခွဲလိုက်ကြသည်။ ထူးခြားသော နေရာများတွင် နေရာယူလိုက်ပြီးနောက် ကြီးမားလှသော တိုက်ပွဲဝင်္ကပါတစ်ခုကို တည်ဆောက်ကာ ရှောင်ချီ၏ တိုက်ခိုက်မှုကို သီသီလေး တားဆီးလိုက်နိုင်ကြသည်။

ထိုငါးစာလေးများက သူ၏ တိုက်ခိုက်မှုကို တားဆီးနိုင်သော ဝင်္ကပါတစ်ခုကို အလွယ်တကူ တည်ဆောက်လိုက်သည်ကို မြင်သောအခါ ရှောင်ချီ၏ နှုတ်ခမ်းမှာ အလိုလို မဲ့သွားရသည်။

သူက စိတ်ထဲမှ တွေးလိုက်မိသည် ဒီကံကြမ္မာရှင်က တကယ်ပဲ ကောင်းကင်ကို အန်တုနိုင်လွန်းတာလားသူ့ရဲ့လက်အောက်ငယ်သားတွေကို ပေးထားတဲ့ သာမန်ဝင်္ကပါလေးကတောင် ဒီလောက် အစွမ်းထက်နေရတာလား။

"နတ်ဘုရားသားတော်သည် အနှိုင်းမဲ့၏၊ တိုက်ပွဲတိုင်းတွင် အောင်နိုင်သူဖြစ်၏" သို့သော် ရှောင်ချီ အတွေးလွန်နေသည့် ခဏမှာပင် ထိုအဖွဲ့၏ ဝင်္ကပါမှာ ရုတ်တရက် ပြောင်းလဲသွားသည်။

မူလက သူတို့ကို ကာကွယ်ပေးထားသော ရွှေရောင်အလင်းတန်း ဝင်္ကပါမှာ ယခုအခါ ကြီးမားလှသော ရွှေရောင်ဓားကြီးတစ်စင်းအဖြစ် ပြောင်းလဲသွားသည်။ ၎င်းသည် ဟင်းလင်းပြင်တွင် လွင့်ပျံနေပြီး ရှောင်ချီထံသို့ တည့်တည့်မတ်မတ် ပြေးဝင်လာတော့သည်။

ကောင်းကင်ယံက ရွှေရောင်ဓားကြီးကို ကြည့်ပြီး ရှောင်ချီ၏ မျက်နှာမှာ တည်ကြည်သွားသည်။ ဤတိုက်ခိုက်မှုမှာ ဟင်းလင်းပြင်ပြန်လည်ရောက်ရှိခြင်းအဆင့်အဆင့်လတ် သို့မဟုတ် အဆင့်နှောင်းပိုင်း ကျင့်ကြံသူတစ်ဦး၏ တိုက်ခိုက်မှုထက် မလျော့ကြောင်း သူ အာရုံခံမိသည်။

နတ်သန္ဓေအဆင့်နှင့် ဝိညာဉ်အသွင်ပြောင်းခြင်းအဆင့်ရှိသည့် ငါးစာလေးအုပ်စုက ပေါင်းလိုက်လျှင် ဤမျှ ကြောက်မက်ဖွယ်ကောင်းသော တိုက်ခိုက်ရေးစွမ်းအားကို ထုတ်ဖော်နိုင်သည်ဆိုတော့ ဤအရာမှာ ဘယ်လိုဝင်္ကပါမျိုးနည်း။ ယဲ့ဖန်ကိုယ်တိုင် ဖန်တီးထားတာလား ဒါမှမဟုတ် လျှို့ဝှက်နယ်မြေတွေထဲက ရှာတွေ့ခဲ့တာလား ဤမေးခွန်းများက ရှောင်ချီကို အတော်လေး စဉ်းစားရခက်စေသည်။

"လင်ရှောင်ကိုးဓား၊ တတိယပုံစံ - ဟင်းလင်းပြင်ခုတ်ချက်" သူ၏ လက်ညှိုးကို အသာအယာ လှုပ်ရှားလိုက်ရာ ဓားဦးတစ်ခုမှာ ဟင်းလင်းပြင်ထဲမှ ရုတ်တရက် ပေါ်ထွက်လာသည်။

ထို့နောက် ကြီးမားလှသော ဓားကြီးတစ်စင်းမှာ ဟင်းလင်းပြင်မှ ဖြည်းဖြည်းချင်း ပေါ်ထွက်လာပြီး ရွှေရောင်ဓားကြီးနှင့် ထိပ်တိုက်တွေ့သွားတော့သည်။

တောက်ပလှသော ရွှေရောင်အလင်းတန်းများမှာ ကောင်းကင်တစ်ခုလုံးကို လွှမ်းခြုံသွားသည်။

ဝုန်း... ပြင်းထန်လှသော ဟိန်းဟောက်သံနှင့်အတူ ကြီးမားလှသော ဓားရိပ်နှစ်ခုလုံးမှာ လေထဲတွင် အတူတကွ ပျက်စီးသွားကြသည်။ ၎င်းတို့သည် ရွှေရောင်အလင်းစက်လေးများအဖြစ် ပေါက်ကွဲထွက်သွားပြီး မြေပြင်ပေါ်သို့ ပျံ့နှံ့သွားတော့သည်။

ဂျိန်း... နတ်ဘုရားနန်းတော်အဖွဲ့က ကောင်းကင်ယံက တိုက်ခိုက်မှုကိုသာ အာရုံစိုက်နေစဉ်မှာပင် လျှပ်စီးတန်းတစ်ခုသည် ဟင်းလင်းပြင်ကို ဖြတ်သန်းကာ သူတို့လူအုပ်၏ အလယ်သို့ ချက်ချင်း ရောက်ရှိလာသည်။

အပြာရောင် လျှပ်စီးကွင်းများမှာ လူများကြားတွင် ပေါက်ကွဲထွက်ကုန်သည်။ လူအုပ်မှာ တုံ့ပြန်ရန် အချိန်မရလိုက်ဘဲ လျှပ်စစ်စီးကာ မည်းတူးသွားရတော့သည်။

ဤတစ်ကြိမ်တွင် ရှောင်ချီသည် ဘာမှချန်မထားဘဲ သူ၏ အစွမ်းအားလုံးကို ထုတ်သုံးလိုက်ခြင်းဖြစ်သည်။

ကျောက်စိမ်းကညာဂိုဏ်း၏ လေ့ကျင့်ရေးကွင်းတွင် သူ၏ အစွမ်း (၃၀) ရာခိုင်နှုန်းကိုသာ သုံးခဲ့လျှင် ယခုမူ အနည်းဆုံး (၉၈) ရာခိုင်နှုန်းအထိ အသုံးပြုလိုက်ခြင်း ဖြစ်သည်။

လူအုပ်ကြားတွင် ပေါ်လာသော လျှပ်စီးမှာ နျူကလီးယားဗုံးတစ်လုံးကဲ့သို့ ပေါက်ကွဲသွားသည်။ ကျင့်စဉ်နိမ့်သော နတ်ဘုရားနန်းတော် နောက်လိုက်အချို့မှာ ချက်ချင်းပင် ပြာဖြစ်သွားကြသည်။

ကျင့်စဉ်အနည်းငယ် မြင့်သောသူများမှာမူ အသက်မသေခဲ့သော်လည်း အပြင်းအထန် ဒဏ်ရာရသွားကြသည်။ သူတို့၏ ခန္ဓာကိုယ်များမှာ မည်းတူးနေသော မီးသွေးခဲများကဲ့သို့ မြေပြင်ပေါ်တွင် လှုပ်ရှားနိုင်စွမ်းမရှိဘဲ ခွေးသေများကဲ့သို့ လဲကျနေကြတော့သည်။

ခဏချင်းအတွင်းမှာပင် ရှောင်ချီသည် ဤဝင်္ကပါ၏ သေစေနိုင်သော အားနည်းချက်ကို သိမြင်လိုက်သည်။ တိုက်ခိုက်ရေးဖြစ်စေ ခုခံရေးဖြစ်စေ ဤဝင်္ကပါကို ထိပ်တန်းအဆင့်ဟု သတ်မှတ်နိုင်ပါသည်။

သို့သော် ၎င်း၏ အားနည်းချက်မှာ တိုက်ခိုက်နေစဉ်အတွင်း ခုခံ၍မရခြင်းနှင့် ခုခံနေစဉ်အတွင်း တိုက်ခိုက်၍မရခြင်းပင် ဖြစ်သည်။

ဤအားနည်းချက်မှာ သေးငယ်သည်ဟု ထင်ရသော်လည်း အစွမ်းထက်သော ရန်သူနှင့် ရင်ဆိုင်ရလျှင် ဝင်္ကပါအသုံးပြုသူများ၏ အသက်ကို ချက်ချင်း ဆုံးရှုံးစေနိုင်သည်။

ရှောင်ချီမှာ တိုက်ခိုက်ရာတွင် လျှင်မြန်လှသော တိုက်ချက်များကို ဆက်တိုက် ထုတ်ဖော်နိုင်သူ အမျိုးအစား ဖြစ်သည်။ ပထမတစ်ကွက် ထွက်လာပြီးနောက် ဒုတိယတစ်ကွက်မှာ ချက်ချင်း လိုက်လာနိုင်သည်။

သို့သော် ဤနောက်လိုက်များမှာ သူတို့၏ ဝင်္ကပါကို ထိုမျှလောက် မြန်မြန်ဆန်ဆန် မပြောင်းလဲနိုင်ပေ။ ထို့ကြောင့် သူတို့အတွက် သေခြင်းတရားသာ ကျန်ရှိတော့သည်။

ရှောင်ချီသည် ခေါင်းဆောင်ဖြစ်သူ ဝိညာဉ်အသွင်ပြောင်းခြင်းအဆင့်နှောင်းပိုင်း ကျွမ်းကျင်သူထံသို့ လျှောက်သွားပြီး ဆောင့်ကြောင့်ထိုင်လိုက်သည်။

မည်းတူးနေသော ခန္ဓာကိုယ်ကို ငုံ့ကြည့်ကာ သူက အသာအယာ မေးလိုက်သည် ဒီဝင်္ကပါရဲ့ဂါထာကို ပြောစမ်း ပြီးတော့ ယဲ့ဖန် မင်းတို့ကို သင်ပေးထားတဲ့ တခြားနည်းလမ်းတွေ အားလုံးကိုလည်း ပြောပြ ဒါဆိုရင်တော့ မင်းရဲ့ အသက်ကို ငါချမ်းသာပေးချင် ပေးဦးမယ်။

မြေပြင်ပေါ်တွင် လဲနေသော မည်းတူးနေသော ပုံရိပ်မှာ သူ၏ မည်းနက်နေသော မျက်တောင်များကို ခတ်လိုက်သည်။ မျက်လုံးကို ဖြည်းဖြည်းချင်း ဖွင့်ကာ ရှောင်ချီကို အထင်သေးသော အကြည့်ဖြင့် ကြည့်ပြီး အက်ကွဲသောအသံဖြင့် ပြောလိုက်သည်။

"ဟက် မင်းမှာ သတ္တိရှိရင် သတ်လိုက်စမ်းပါ။ နတ်ဘုရားသားတော်က ငါတို့အတွက် လက်စားချေလိမ့်မယ်"

မီးသွေးခဲနှင့် တူနေသော ထိုခေါင်းဆောင်မှာ မျက်လုံးကို ချက်ချင်း ပြန်ပိတ်လိုက်သည်။ ရှောင်ချီကို နောက်ထပ် စကားတစ်လုံးမှ မပြောချင်တော့သည့်ပုံပင်။

ရှောင်ချီက အနေရခက်စွာ ပြုံးလိုက်သည်။ မူလက သူသည် ယဲ့ဖန်ရှိနေသည့် နေရာကို မေးချင်နေခြင်း ဖြစ်သည်။ အခုတော့ ထိုသူ့ဆီကနေ ဘာမှ သိရတော့မည်မဟုတ်ပုံရသည်။

"ငါက ရှားရှားပါးပါး ဂရုဏာသက်ပြီး မင်းအသက်ကို ချမ်းသာပေးမလို့ ကြံတာပါ။ မင်းမှာ ကံမပါဘူး ထင်တယ်"

ရှောင်ချီသည် သက်ပြင်းချလိုက်ပြီး ထိုမည်းတူးနေသော ပုံရိပ်ရှေ့တွင် တရားထိုင်သကဲ့သို့ ထိုင်လိုက်သည်။ စိမ်းပြာရောင် မူလစွမ်းအင်တစ်ခုမှာ သူ၏ လက်ဖဝါးတွင် ဖြည်းဖြည်းချင်း ပေါ်ထွက်လာသည်။

ထိုစိမ်းပြာရောင် စွမ်းအင်ဖြင့် ဖုံးအုပ်ထားသော ရှောင်ချီ၏ လက်သည် မည်းတူးနေသော ခေါင်းဆောင်၏ ဦးနှောက်ထဲသို့ ဖြည်းဖြည်းချင်း ထိုးဝင်သွားတော့သည်။

"အား..." နာကျင်စွာ အော်ဟစ်သံတစ်ခုမှာ စားသောက်ဆိုင်အနီးတွင် ဟိန်းထွက်သွားသည်။

မည်းတူးနေသော ခေါင်းဆောင်မှာ မခံမရပ်နိုင်သော နှိပ်စက်မှုကို ခံစားနေရသကဲ့သို့ နာကျင်စွာ အော်ဟစ်နေတော့သည်။

ထိုစိမ်းပြာရောင်စွမ်းအင်မှာ ထိုသူ၏ စိတ်ထဲသို့ ဝင်သွားသည်နှင့်အမျှ သူ၏ မှတ်ဉာဏ်အပိုင်းအစများမှာ ရှောင်ချီ၏ ရှေ့တွင် ဖြည်းဖြည်းချင်း ပေါ်လာတော့သည်။

ဤဝတ်စုံနက်ဝတ်သူ၏ အမည်မှာ ထျဲနုဖြစ်ပြီး ရိုးသားဖြောင့်မတ်သော လယ်သမားတစ်ဦး ဖြစ်ခဲ့သည်။

အသက် (၁၇) နှစ်တွင် သူသည် မတော်တဆ ကျင့်စဉ်လောကထဲသို့ ရောက်ရှိသွားပြီး ကျင့်ကြံခွင့် ရရှိခဲ့သည်။

ဤလူ၏ ပါရမီမှာ အတော်လေး ကောင်းမွန်လှသည်။ နှစ်ပေါင်း တစ်ရာအတွင်း သူသည် ဝိညာဉ်အသွင်ပြောင်းခြင်းအဆင့်သို့ ရောက်ရှိခဲ့သည်။ ထို့နောက် နောက်ထပ် နှစ်ပေါင်း တစ်ရာအတွင်းမှာပင် ထိုအဆင့်၏ အထွတ်အထိပ်သို့ ရောက်ခဲ့သည်။

သူငယ်ချင်းတစ်ဦး၏ မိတ်ဆက်ပေးမှုကြောင့် သူသည် နတ်ဘုရားနန်းတော်သို့ ဝင်ရောက်ခဲ့သည်။ သူ၏ ထူးခြားသော အစွမ်းကြောင့် ယဲ့ဖန်က သူ့ကို ချက်ချင်း သတိထားမိခဲ့ပြီး ရှေ့ပြေးတပ်ရင်း၏ တပ်မှူးအဖြစ် ခန့်အပ်ခဲ့သည်။