အခန်း (၅၇)  ဝူချိန်ဂိုဏ်းမှ ကျိဝူထျန်း

ရှောင်ချီသည် ပန်းရောင်ကျောက်စိမ်းရုပ်လေးကဲ့သို့ ချစ်စရာကောင်းသော မိန်းကလေးငယ်ကို စိတ်ဝင်တစား ကြည့်လိုက်သည်။

"ကလေးမလေး... မင်း ငါ့ကို မကြောက်ဘူးလား ပြီးတော့ ငါ့ဆီမှာ တပည့်ခံချင်သေးတယ်ပေါ့" ရှောင်ချီက ထိုကလေးမလေးကို ခြောက်လှန့်ရန်အတွက် ကြောက်စရာကောင်းသော မျက်နှာပေးမျိုး လုပ်ပြလိုက်သည်။

ကျွန်မ အစ်ကိုကြီးကို နည်းနည်းလေးမှ မကြောက်ပါဘူး။ အစ်ကိုကြီးဆီမှာ သတ်ဖြတ်လိုစိတ်နဲ့ မိစ္ဆာစွမ်းအားတွေ ရှိနေပေမဲ့ အစ်ကိုကြီးရဲ့ ဝိညာဉ်ထဲမှာတော့ အလွန်မြင့်မြတ်တဲ့ နတ်ဘုရားတစ်ပါး ကိန်းဝပ်နေသလိုပဲ။

အဲ့ဒီအစွမ်းက အစ်ကိုကြီးဆီက သတ်ဖြတ်လိုစိတ်နဲ့ မိစ္ဆာစွမ်းအားတွေကို အလွယ်တကူ နှိမ်နင်းပေးနိုင်တာ ကျွန်မ မြင်နေရတယ်ဟု

မိန်းကလေးငယ်လေးက ခေါင်းခါကာ အပြစ်ကင်းစင်သော မျက်နှာပေးဖြင့် ပြန်ပြောလိုက်သည်။

ရှောင်ချီသည် ထိုကလေးမလေးကို ထူးဆန်းစွာ ကြည့်လိုက်မိသည် မင်းက လူတွေရဲ့ စိတ်နှလုံးကို ထိုးဖောက်မြင်နိုင်တာလား။

သို့သော် ရှောင်ချီက ဤကလေးမလေးကို စိတ်ဝင်တစား မေးမြန်းရန် ပြင်လိုက်စဉ်မှာပင် အပြင်ဘက်မှ ကျင့်ကြံသူအုပ်စုကြီး တစ်စု ထပ်မံ ရောက်ရှိလာပြန်သည်။

"ဘယ်သူက ငါတို့ ကျောက်စိမ်းကညာဂိုဏ်းရဲ့ တံခါးဝမှာ လာပြီး ပြဿနာရှာနေတာလဲ"

ပြင်းထန်သော အရှိန်အဝါရှိပြီး အရပ်ရှည်ရှည် ဗိုက်တုတ်တုတ်နှင့် အမျိုးသမီးတစ်ဦး စားသောက်ဆိုင်ထဲသို့ ခြေလှမ်းကျကျ ဝင်လာသည်။

သူမ၏ မျက်လုံးများက စားပွဲတွင် အေးအေးဆေးဆေး ထိုင်နေသော ရှောင်ချီထံသို့ ချက်ချင်း ရောက်သွားတော့သည်။

"မင်းတို့က ဘယ်သူတွေလဲ မင်းတို့ ကျောက်စိမ်းကညာဂိုဏ်းက ကိစ္စတွေကို တစ်ခါတည်း အပြတ်မရှင်းနိုင်ဘူးလားဘာလို့ လူတွေကို တစ်သုတ်ပြီး တစ်သုတ် လွှတ်နေရတာလဲ"

ရှောင်ချီက မျက်မှောင်ကြုတ်ကာ ထိုအမျိုးသမီးကို လှမ်းမေးလိုက်သည်။

"ငါက ကျောက်စိမ်းကညာဂိုဏ်း စည်းကမ်းထိန်းသိမ်းရေးဌာနရဲ့ ဒုတိယဌာနမှူး ပိုင်ချိုးထန်ပဲ ဒီနေ့ မင်းလို လူယုတ်မာကို လာပြီး ဖမ်းဆီးတာ"

ဤအမျိုးသမီးကြီးသည် လူပုံသဏ္ဌာန်ရှိသော သားရဲတစ်ကောင်ကဲ့သို့ ပြင်းထန်သော ဖိအားများကို ထုတ်ဖော်နေသည်။ သို့သော် ကံဆိုးသည်မှာ သူမ ရင်ဆိုင်နေရသူမှာ ရှောင်ချီ ဖြစ်နေခြင်းပင်။ လောကဓံမျိုးစုံကို ဖြတ်သန်းခဲ့သော ရှောင်ချီအဖို့ ဒုတိယဌာနမှူးအဆင့်လောက်ကို ကြောက်ရွံ့နေစရာ အကြောင်းမရှိပေ။

"ဘာပြောလိုက်တယ် မင်းက ဒုတိယဌာနမှူး ဟုတ်လား ငါက ဒီမှာ အေးအေးဆေးဆေး ထမင်းစားနေတာလေ အဲ့ဒါ မင်းတို့ ကျောက်စိမ်းကညာဂိုဏ်းနဲ့ ဘာဆိုင်လို့လဲ"

ရှောင်ချီက အလျင်မလိုတော့ဘဲ ထိုင်ခုံတွင် မှီလိုက်ကာ ပိုင်ချိုးထန်ကို ခပ်ရိုးရိုးပင် ကြည့်နေလိုက်သည်။

ဝေနိုင်ငံတော်တစ်ခုလုံးမှာ ချင်းချန်တောင်ဟာ ငါတို့ ကျောက်စိမ်းကညာဂိုဏ်းရဲ့ ပိုင်နက်ဆိုတာ ဘယ်သူမဆို သိကြတယ်။

ဒီမှာ လာပြီး ပြဿနာရှာတာဟာ ငါတို့ဂိုဏ်းကို စစ်ကြေညာတာနဲ့ အတူတူပဲ

မင်း ကိုယ့်ကိုယ်ကိုယ် ကောင်းစေချင်ရင် စားသောက်ဆိုင်ရှေ့က လူကို အခုချက်ချင်း ပြန်ချပေးပါ။ မဟုတ်ရင်တော့ မင်းကို ငါကိုယ်တိုင် ဖမ်းပြီး စည်းကမ်းထိန်းသိမ်းရေးဌာနရဲ့ ထောင်ထဲကို ပစ်ထည့်လိုက်မယ်။

ပိုင်ချိုးထန်သည် စိတ်ရှည်မှု ကုန်ဆုံးလုနီးပါး ဖြစ်နေပြီ။ သူမ၏ အရှိန်အဝါများကို အကုန်ထုတ်လွှတ်လိုက်ရာ စားသောက်ဆိုင်အတွင်း ဖိအားများ ပြည့်နှက်သွားတော့သည်။

ရှောင်ချီအနေနှင့် ဤလူ၏ ကျင့်စဉ်မှာ မနိမ့်ကြောင်း အာရုံခံမိသည်။ အနည်းဆုံးတော့ အပြင်က လက်ဝဲအကာအကွယ်ပေးသူ ချင်အန်းထက် သာလွန်သည်။

ဟိုလူကိုတော့ ငါဒီအတိုင်းပဲ ချိတ်ထားမှာပဲ။ သူ့ကို လာထိတဲ့သူက ငါ့ရဲ့ရန်သူပဲ။ ငါ ခုနစ်ရက်ပြည့်ရင် ငါ့ဘာသာငါ ထွက်သွားမယ်။

ရှောင်ချီသည် စကားဖြင့် ဆွေးနွေး၍ မရတော့ကြောင်း သိလိုက်သဖြင့် သူ၏ အရှိန်အဝါကိုပါ ထုတ်ဖော်လိုက်သည်။ ရှောင်ချီ၏ ကျင့်စဉ်အဆင့်က ပိုင်ချိုးထန်ထက် အနည်းငယ် နိမ့်သော်လည်း သူ၏ ကြောက်မက်ဖွယ် အရှိန်အဝါကြောင့် ပိုင်ချိုးထန်မှာ အနောက်သို့ ထပ်ခါတလဲလဲ ဆုတ်သွားရတော့သည်။

"ဒါ... ဒါ ဘယ်လိုဖြစ်နိုင်မှာလဲ လူငယ်မျိုးဆက်ထဲမှာ ဒီလောက်အထိ ကြောက်စရာကောင်းတဲ့ အစွမ်းရှိတဲ့သူ ဘယ်သူရှိလို့လဲ"

ပိုင်ချိုးထန်၏ မျက်နှာတွင် မယုံကြည်နိုင်မှုများဖြင့် ပြည့်နှက်သွားတော့သည်။

မကြာသေးမီ နှစ်များအတွင်း ဝေနိုင်ငံတော်၏ ကျင့်ကြံခြင်းလောကတွင် ထူးချွန်သော လူငယ်ပါရမီရှင်များစွာ ပေါ်ထွက်လာခဲ့သည်။

ဝိညာဉ်ဓားဂိုဏ်းမှ ယဲ့ဖန်အပြင်၊ သားရဲယဉ်ပါးဂိုဏ်းမှ ပါရမီရှင် ချောင်ကျိရှူးလည်း ရှိသေးသည်။

ဝူချိန်ဂိုဏ်းမှ သူတော်စင် ကျိဝူထျန်းနှင့် ကျောက်စိမ်းကညာဂိုဏ်းမှ သူတော်စင်မ ယုလင်လုံတို့လည်း ရှိကြသည်။

ဤသူများမှာ ဝေနိုင်ငံတော်၏ ပြိုင်ဘက်ကင်း လူငယ်ပါရမီရှင်များ ဖြစ်ကြသည်။

အထူးသဖြင့် ကျိဝူထျန်းသည် လွန်ခဲ့သော နှစ်နှစ်က ဂိုဏ်းခုနစ်ဂိုဏ်း ပြိုင်ပွဲတွင် ပထမ ရရှိခဲ့သူ ဖြစ်သည်။ ယခု အသက် ၃၀ ကျော်ပြီဖြစ်ရာ သူ၏ကျင့်စဉ်မှာ စီနီယာ ကျွမ်းကျင်သူများနှင့်ပင် ရင်ပေါင်တန်းနိုင်နေပြီ ဖြစ်သည်။

ပိုင်ချိုးထန် နားမလည်နိုင်သည်မှာ ဤလူငယ်သည် ကျိဝူထျန်းထက်ပင် ငယ်ပုံရသော်လည်း အဘယ်ကြောင့် ဤမျှ ကြောက်စရာကောင်းသော အစွမ်းကို ပိုင်ဆိုင်ထားရသနည်းဆိုသည့်အချက်ပင်။

အကယ်၍ သူသာ ဤမျှ အစွမ်းထက်ပါက အဘယ်ကြောင့် နာမည်ကျော်ကြားရန် ဂိုဏ်းခုနစ်ဂိုဏ်း ပြိုင်ပွဲတွင် မဝင်ပြိုင်ခဲ့သနည်း ဤအစွမ်းမျိုးနှင့်ဆိုလျှင် အနည်းဆုံး ထိပ်တန်း သုံးယောက်ထဲတွင် ပါဝင်နိုင်သည် မဟုတ်ပါလား။

"ဒီကလေးက ငါ့ကို ခြောက်နေတာလား သူက သူ၏ အရှိန်အဝါကို ခဏတဖြုတ် မြှင့်တင်ပေးနိုင်တဲ့ မှော်ရတနာတစ်ခုခုကို သုံးထားတာလား" ပိုင်ချိုးထန်သည် ဟိုဟိုဒီဒီ လမ်းလျှောက်ရင်း ရှောင်ချီကို သံသယဖြင့် ကြည့်နေမိသည်။

"ဟေ့... မင်းက တိုက်လည်း မတိုက်ဘူး ပြန်လည်း မပြန်ဘူး ဘာလုပ်နေတာလဲ မင်း ဆုံးဖြတ်ချက် မချနိုင်ရင်လည်း မင်းတို့ဂိုဏ်းကို ပြန်သွားပြီး ဒီထက်တော်တဲ့သူကို ခေါ်ခဲ့လေ ဒါမှမဟုတ် မင်းတို့ ဂိုဏ်းချုပ်နဲ့ အကြီးအကဲတွေကိုပါ တစ်ခါတည်း ပင့်ခဲ့လိုက်"

ရှောင်ချီက ဝေခွဲမရဖြစ်နေသော ပိုင်ချိုးထန်ကို ကြည့်ကာ စိတ်ပျက်လက်ပျက် ပြောလိုက်သည်။

"ဟမ့်... ဒါဆိုရင်တော့ မင်းရဲ့ အစွမ်းကို ငါ စမ်းကြည့်ရသေးတာပေါ့" ပိုင်ချိုးထန်က ရုတ်တရက် တိုက်ခိုက်လိုက်သည်။ သူမသည် လက်ဝါးထဲတွင် ပြင်းထန်သော စွမ်းအားများကို စုစည်းကာ ရှောင်ချီ၏ မျက်ခုံးနှစ်ခုကြားသို့ ပစ်လွှတ်လိုက်တော့သည်။

သို့သော် ရှောင်ချီက ထိုနေရာမှာတင် အေးအေးဆေးဆေး ထိုင်နေဆဲ ဖြစ်သည်။

သူ၏ ခန္ဓာကိုယ်မှ လျှပ်စီးစွမ်းအားများ ထွက်ပေါ်လာပြီး သူ့ကိုယ်သူ အကာအကွယ် ပေးထားလိုက်သည်။

"ဒါ... ဒါ မဖြစ်နိုင်ဘူး" ရှောင်ချီ၏ အနီးသို့ပင် မကပ်နိုင်သည်ကို မြင်လိုက်ရသောအခါ ပိုင်ချိုးထန်၏ မျက်လုံးထဲတွင် ကြောက်ရွံ့မှုများ ပေါ်လာသည်။

သူမသည် ဟင်းလင်းပြင်ပြန်လည်ရောက်ရှိခြင်းအဆင့်တွင်ရှိနေသူ ဖြစ်ပြီး ဤအဆင့်မှာ နှစ်ပေါင်း တစ်ရာနီးပါး ကြာမြင့်နေပြီ ဖြစ်သည်။

လူငယ်လေးတစ်ယောက်၏ ခုခံမှုကို သူမ မဖောက်ထွင်းနိုင်ဘူးလား လောကကြီးက ဘယ်တုန်းက ဒီလောက်အထိ ကြောက်စရာကောင်းသွားရတာလဲ။

ဝုန်း... ရှောင်ချီက သူ၏ လက်ကို အသာအယာ မြှောက်လိုက်ရာ ကြောက်မက်ဖွယ်ကောင်းသော လျှပ်စီးစွမ်းအားများမှာ ပိုင်ချိုးထန်၏ ခန္ဓာကိုယ်တစ်ခုလုံးသို့ ပျံ့နှံ့သွားတော့သည်။

ဒိုင်း... ပိုင်ချိုးထန်သည် စားသောက်ဆိုင် အပြင်ဘက်သို့ လွင့်ထွက်သွားပြီး နံရံတစ်ခုကို တိုက်မိကာ လမ်းမပေါ်သို့ ပြုတ်ကျသွားတော့သည်။

ရှောင်ချီသည် နေရာမှ ထရပ်ကာ အကြောဆန့်လိုက်ပြီး ဤစားသောက်ဆိုင်အနီးရှိ တည်းခိုခန်းတစ်ခုတွင် တည်းခိုရန် ပြင်ဆင်လိုက်တော့သည်။

ပိုင်ချိုးထန်သည် ခက်ခက်ခဲခဲ ပြန်ထရပ်ကာ သူမ၏ နောက်လိုက်များနှင့်အတူ ထွက်ခွာသွားတော့သည်။ တစ်ချိန်တည်းမှာပင် သူမသည် ဤလမ်းပိုင်းကို ယာယီပိတ်ဆို့ထားရန်နှင့် ပြင်ပလူများ မဝင်ရောက်ရန် အမိန့်ပေးလိုက်သည်။

တပည့်ခံချင်နေသော ချိုးရှင်းလေးလည်း အတင်းခေါ်ဆောင်သွားခြင်း ခံလိုက်ရသည်။

"စီနီယာအစ်မ... ဘာလို့ ကျွန်မကို ဆွဲခေါ်သွားတာလဲ ကျွန်မ အဲ့ဒီအစ်ကိုကြီးဆီမှာ တပည့်ခံချင်လို့ပါဆို" လေထဲတွင် တွဲလောင်းပါသွားသော ချိုးရှင်းက မကျေမနပ် အော်ဟစ်နေတော့သည်။

"မင်းကတော့ တကယ်ကို ဆိုးလာပြီနော်။ အဲ့ဒီလောက်အထိ အစွမ်းထက်တဲ့လူကို သွားပြီး စိန်ခေါ်ရဲတယ်ပေါ့"

"သူ လူသတ်တာကို မင်း မမြင်ဘူးလား သတိထားဦး မင်းရဲ့ လက်တွေ ခြေထောက်တွေကိုပါ သူ ဖြတ်ပစ်လိုက်လိမ့်မယ်"

ချိုးရင်းက ရုန်းကန်နေသော သူမ၏ ဂျူနီယာကို အော်ဟစ်ဆုံးမနေတော့သည်။

"သူက အဲ့လိုလူမျိုး မဟုတ်ပါဘူး ကျွန်မ သူ့ရဲ့ စိတ်နှလုံးကို မြင်နိုင်တယ်" မိန်းကလေးငယ်လေးက ရှောင်ချီဘက်ကနေ ကာကွယ်ပြောနေဆဲ ဖြစ်သည်။

သို့သော် သူမ၏ စီနီယာက အခွင့်အရေး မပေးတော့ပေ။ သူမသည် လေထဲသို့ ပျံတက်ကာ ထိုကလေးမလေးကို အတင်းအကျပ် ခေါ်ဆောင်သွားတော့သည်။

"ဒီလောက်အထိ မောက်မာတဲ့ လူရူးက ဘယ်က ရောက်လာတာလဲ ငါတို့ ကျောက်စိမ်းကညာဂိုဏ်းကို တစ်ယောက်တည်းနဲ့ အရှက်ခွဲသွားတယ်ပေါ့"

ကျောက်စိမ်းကညာဂိုဏ်း၏ ခမ်းမကြီးအတွင်း အမျိုးသမီးကျင့်ကြံသူ ရာဂဏန်းခန့် စုဝေးနေကြသည်။ ဂိုဏ်းချုပ်နေရာတွင် ခရမ်းရောင် ဝတ်စုံကို ဝတ်ဆင်ထားသော လှပသည့် အမျိုးသမီးတစ်ဦး ထိုင်နေသည်။

သူမသည် ခမ်းမအောက်တွင် ဒူးထောက်ကာ တုန်ရီနေသော ပိုင်ချိုးထန်ကို ကြည့်ရင်း ဒေါသတကြီး မေးမြန်းနေခြင်း ဖြစ်သည်။

"သူ့ရဲ့ အဆင့်အတန်းကိုတော့ အခုထိ မသိရသေးပါဘူး။ ဒါပေမဲ့ သူ့ရဲ့ လုပ်ရပ်တွေကို ကြည့်ရရင် သူဟာ ယဲ့ဖန်နဲ့ ရန်ငြိုးရှိပုံရတယ်" အမျိုးသမီး အကြီးအကဲတစ်ဦးက နေရာမှ ထရပ်ကာ ဂိုဏ်းချုပ်ကို ပြန်လည် ဖြေကြားလိုက်သည်။

စုံစမ်းကြစမ်း သူ့ရဲ့ အဆင့်အတန်းကို သေချာအောင် စုံစမ်းရမယ် သူ့အကြောင်း သေသေချာချာ မသိရသေးခင်အထိ သူ့ကို သွားပြီး မစော်ကားကြနဲ့ဦး။

ဂိုဏ်းချုပ်သည်နှာခေါင်းရှုံ့ကာသူမ၏ဒေါသကိုအတတ်နိုင်ဆုံးထိန်းလိုက်တော့သည်။