အခန်း (၅၄) နတ်ဘုရားနန်းတော်၏ လက်ဝဲအကာအကွယ်ပေးသူ ချင်အန်း

"ဒါ ဘာအနံ့လဲ"

"အရမ်းမွှေးတာပဲ"

"ဆိုင်ရှင်... ဟို မီးဖိုချောင်ထဲမှာ ချက်နေတဲ့ ဟင်းမျိုး ဆယ်ပွဲလောက် အခုချက်ချင်းပေး"

စားသောက်ဆိုင်အတွင်းရှိ စားသုံးသူများမှာ ချက်ချင်းပင် ရုတ်ရုတ်သဲသဲ ဖြစ်သွားကြပြီး နေရာမှ ထရပ်ကာ မီးဖိုချောင်ဘက်သို့ တိုးဝှေ့သွားကြတော့သည်။

သို့သော် မီးဖိုချောင်ထဲတွင် ချက်ပြုတ်နေသူမှာ အလွန်လှပသော မိန်းကလေးတစ်ဦး ဖြစ်နေသည်ကို မြင်လိုက်ရသောအခါ အားလုံးမှာ မှင်သက်သွားကြသည်။

"ဒါ ဘယ်အိမ်က နတ်သမီးလေးလဲ ဘာလို့ မီးဖိုချောင်ထဲမှာ ဟင်းချက်နေရတာလဲ"

"လောကကြီးက ထူးဆန်းလိုက်တာ ဒီလောက်လှတဲ့ နတ်သမီးလေးက ထမင်းချက်အလုပ် လုပ်နေတယ်ပေါ့"

"ညီမလေး... ဆက်မချက်နဲ့တော့ ငါ့အိမ်ကိုသာ လိုက်ခဲ့ပါ မင်းကို ငါ ကောင်းကောင်း စောင့်ရှောက်ထားပါ့မယ်"

သို့သော် လင်ယုရှုကို မြင်လိုက်ရသည့်အခါ လူအုပ်ကြီး၏ ဆာလောင်မှုများမှာ ပျောက်ကွယ်သွားပြီး သူတို့၏ အတွေးများမှာ ဤထူးကဲလှပသော မိန်းကလေးထံသို့သာ ရောက်ရှိသွားတော့သည်။

"ဆူညံလိုက်တာ..." ရှောင်ချီက အေးစက်စွာ နှာခေါင်းရှုံ့လိုက်သည်။ သူ၏ ညီမလေး ဟင်းချက်နေသည်ကို ဤလူများ အနှောင့်အယှက် မပေးနိုင်ရန် သူ၏ အရှိန်အဝါ အနည်းငယ်ကို တိတ်တဆိတ် ထုတ်လွှတ်လိုက်သည်။

ဝုန်း... မီးဖိုချောင်အနီးတွင် စုဝေးနေသော လူတစ်ဒါဇင်ခန့်မှာ ပြင်းထန်သော စွမ်းအားတစ်ခုကြောင့် လွင့်စင်ထွက်သွားပြီး စားသောက်ဆိုင်၏ ထောင့်အသီးသီးသို့ ပြုတ်ကျသွားကြတော့သည်။

ရှောင်ချီက ထိုလူများကို ဆုံးမလိုက်သည်ကို မြင်သောအခါ ဟင်းချက်နေဆဲဖြစ်သော လင်ယုရှု၏ နှုတ်ခမ်းထောင့်တွင် အပြုံးတစ်ခု ပေါ်လာသည်။

မကြာမီမှာပင် လက်ရာပြောင်မြောက်လှသော ဟင်းလျာရှစ်ပွဲမှာ ရှောင်ချီ၏ စားပွဲပေါ်သို့ ရောက်ရှိလာတော့သည်။

ထိုဟင်းများမှ ထွက်ပေါ်လာသော ဝိညာဉ်စွမ်းအားနှင့် ရနံ့များမှာ လမ်းပေါ်ရှိ လူများကိုပါ ဆွဲဆောင်နေတော့သည်။

"စီနီယာအစ်မ... အဲ့ဒါ ဘာအနံ့လဲ အရမ်းမွှေးတာပဲနော်" ဆံပင်ထုံးလေးနှင့် မိန်းကလေးငယ်တစ်ဦးက ဘေးနားရှိ အမျိုးသမီးကို ကြည့်ကာ စူးစမ်းစွာ မေးလိုက်သည်။

သူမ၏ နှာခေါင်းလေးမှာလည်း အနံ့နောက်သို့ လိုက်ပါနေသလို တလှုပ်လှုပ် ဖြစ်နေသည်။

"ဒါက ဝိညာဉ်ဟင်းလျာစားပွဲပဲ ဒါက ကျင့်စဉ်ကို တိုးတက်စေရုံတင်မကဘဲ ကျင့်ကြံသူတွေရဲ့ ခက်ခဲတဲ့ အရသာခံအာရုံကိုပါ ကျေနပ်စေနိုင်တယ်"

"ဒီလောက်အဆင့်ရှိတဲ့ ဝိညာဉ်ဟင်းလျာဆိုရင် ကျင့်ကြံသူအများစုက လုယူကြမှာပဲ မဟုတ်လား" ဘေးနားက ဓားလွယ်ထားသော အမျိုးသမီးငယ်၏ မျက်ဝန်းထဲတွင် အံ့သြမှုများ ပေါ်လာသည်။

သူတို့နှစ်ဦးစလုံးမှာ ခန္ဓာကိုယ်ကို ထိန်းချုပ်မရတော့ဘဲ စားသောက်ဆိုင်ဘက်သို့ အလိုအလျောက် လျှောက်သွားမိကြတော့သည်။

စားသောက်ဆိုင်အနီးသို့ ရောက်သောအခါ လူအုပ်ကြီး ဝန်းရံနေသည်ကို တွေ့ရသည်။ ထိုအထဲတွင် ကျင့်ကြံသူများလည်း ပါဝင်ပြီး သူမ၏ ဂိုဏ်းမှ ညီအစ်မအချို့ကိုပင် တွေ့လိုက်ရသည်။

ရှောင်ချီက တူကိုကိုင်ကာ စားရန် ပြင်လိုက်စဉ်မှာပင် ဘေးနားမှ မချေမငံသော အသံတစ်ခု ထွက်ပေါ်လာသည်  "ဒီဝိညာဉ်ဟင်းလျာတွေက ဘယ်လောက်လဲ အကုန်ယူမယ်"

ထိုအချိန်တွင် လူလတ်ပိုင်းအရွယ် အမျိုးသားတစ်ဦးသည် ရှောင်ချီ၏ ဘေးတွင် ရပ်နေပြီး အထက်စီးမှ ကြည့်နေသည်။ ရှောင်ချီက တူကို ပြန်ချလိုက်ပြီး ထိုလူကို စိတ်ဝင်တစား ကြည့်လိုက်သည်။

ဤလူ၏ ကျင့်စဉ်မှာ မနိမ့်ပေ။ သူသည် ဟင်းလင်းပြင်ပြန်လည်ရောက်ရှိခြင်းအဆင့်၏ အစောပိုင်းအဆင့်သို့ ရောက်ရှိနေသည်။

ဤအစွမ်းမှာ ဂိုဏ်းကြီး (၇) ဂိုဏ်းတွင် တောင်ထိပ်သခင်တစ်ဦး ဖြစ်နိုင်လောက်သော အစွမ်းမျိုး ဖြစ်သည်။

သို့သော် ပြဿနာမှာ ဤနေရာသည် ကျောက်စိမ်းကညာဂိုဏ်း၏ ပိုင်နက်ဖြစ်ခြင်းပင် ကျောက်စိမ်းကညာဂိုဏ်းတွင် အမျိုးသမီးများသာရှိပြီး အမျိုးသားများ မရှိဟု ဆိုကြသည်။

ထိုသို့ဆိုလျှင် ဤမျှ ကျင့်စဉ်မြင့်မားသော အမျိုးသားတစ်ဦးက ချင်းချန်တောင်အနီးတွင် ဘာလုပ်နေသနည်း။

"မင်းက ဘယ်သူ့ရဲ့ အကာအကွယ်ပေးသူလဲ" ရှောင်ချီက အထက်လူက လက်အောက်ငယ်သားကို မေးသလို အေးစက်စွာ မေးလိုက်သည်။

"မင်းက ငါ့ကို ဒီလိုစကားပြောရဲတယ်ပေါ့ မင်းမှာ အထက်အောက် စနစ်နဲ့ လေးစားမှုဆိုတာ မရှိဘူးလား သာမန် ဝိညာဉ်ပြောင်းလဲခြင်းအဆင့် ကျင့်ကြံသူတစ်ယောက်က ငါ့ရှေ့မှာ မောက်မာနေတာပဲ။ ငါ့လက်တစ်ဝါးတည်းနဲ့ မင်းကို ဖိသတ်လို့ရတယ်ဆိုတာ မင်းသိလား"

ထိုလူက ရှောင်ချီ၏ မျက်နှာချင်းဆိုင်တွင် ဝင်ထိုင်လိုက်ပြီး စားပွဲပေါ်မှ တူတစ်စုံကို ကောက်ကိုင်ကာ ရှောင်ချီကို အေးစက်စွာ စိုက်ကြည့်လိုက်သည်။

ရှူး... လျှပ်စီးကဲ့သို့ မြန်လှသော ဓားအလင်းတစ်ခုက ဟင်းလင်းပြင်ကို ဖြတ်တောက်ကာ ထွက်ပေါ်လာသည်။

ထိုလူ သတိပြုမိလိုက်ချိန်တွင် တူကို ကိုင်ထားသော သူ၏ ညာဘက်လက်မှာ ပြတ်တောက်သွားပြီ ဖြစ်သည်။ သွေးများမှာ ကြမ်းပြင်ပေါ်သို့ စီးကျသွားသော်လည်း ဟင်းလျာများပေါ်သို့ တစ်စက်ကလေးမျှ မကျပေ။

"မေးတာရှိရင် တိုက်ရိုက်ဖြေစမ်းပါ။ ငါ့ရှေ့မှာ လာပြီး ဟန်မဆောင်နဲ့" ရှောင်ချီက မြေပြင်ပေါ်မှာ တွန့်လိမ်နေသော လက်ပြတ်ကို တစ်ချက်ကြည့်ကာ အေးစက်စွာ ပြောလိုက်သည်။

ထိုလူသည် ရှောင်ချီကို ထိတ်လန့်တုန်လှုပ်စွာ ကြည့်နေတော့သည်။ ရှောင်ချီ တိုက်ခိုက်လိုက်သည်ကို သူ လုံးဝ သတိမထားမိခဲ့ပေ။

ထိုကြောက်မက်ဖွယ် အရှိန်အဝါ ပေါက်ကွဲထွက်လာချိန်တွင် သူသည် ငရဲမင်းကို မြင်လိုက်ရသလို ခံစားလိုက်ရသည်။

"ငါ... ငါက နတ်ဘုရားသားတော် ယဲ့ဖန်ရဲ့ လက်ဝဲအကာအကွယ်ပေးသူ ချင်အန်းပဲ မင်း ငါ့လက်ကို ဖြတ်ရဲတယ်ပေါ့ ပြင်းထန်တဲ့ ကလဲ့စားချေမှုကို မင်း မကြောက်ဘူးလား"

ချင်အန်းသည် သွေးထွက်မလွန်စေရန် သူ၏ ကျင့်စဉ်ဖြင့် သွေးကြောများကို အမြန် ပိတ်လိုက်သည်။ ရှောင်ချီ၏ တည်ငြိမ်လွန်းသော မျက်ဝန်းများကို ကြည့်ရင်း သူ၏ အဆင့်အတန်းကို ထုတ်ဖော်ပြောလိုက်သည်။

"အား... လူသတ်မှု ပြေးကြဟေ့" စားသောက်ဆိုင်အတွင်းရှိ သာမန်လူများမှာ သွေးသံရဲရဲ မြင်ကွင်းကြောင့် ထိတ်လန့်တကြား ထွက်ပြေးကြတော့သည်။ လူအုပ်ကြီးမှာ တိုးဝှေ့နေကြပြီး ရုန်းရင်းဆန်ခတ် ဖြစ်သွားကာ အော်ဟစ်သံများဖြင့် ပြည့်နှက်သွားတော့သည်။

"ဪ... မင်းက ယဲ့ဖန်ရဲ့ လက်ဝဲအကာအကွယ်ပေးသူလား။ သူက မင်းတို့ကို ဘယ်လိုအဆင့်အတန်းနဲ့ စုဆောင်းထားတာလဲ" ရှောင်ချီက ခလောက်ဆန်နေသော စားသောက်ဆိုင်ကို ဂရုမစိုက်ဘဲ ချင်အန်းကို စိတ်ဝင်တစား မေးလိုက်သည်။

"မင်း တကယ်ကို ဗဟုသုတ နည်းတာပဲ။ နတ်ဘုရားသားတော် ယဲ့ဖန်ဟာ ကျင့်ကြံခြင်းလောကမှာ နတ်ဘုရားနန်းတော်ကို တည်ထောင်ခဲ့ပြီး အခုဆိုရင် အင်အားကြီးတစ်ခုဖြစ်နေပြီ လက်ဝဲနဲ့ လက်ယာ အကာအကွယ်ပေးသူတွေက ဟင်းလင်း​ပြင် ပြန်လည်ရောက်ရှိခြင်းအဆင့် ကျွမ်းကျင်သူတွေချည်းပဲ" ချင်အန်းက မျက်နှာပျက်ပျက်နှင့် ဖြေလိုက်သည်။

၎င်းကို ကြားလိုက်ရသောအခါ ရှောင်ချီမှာ ခဏမျှ မှင်သက်သွားသည်။ သူ၏ ယခင်ဘဝတွင် ယဲ့ဖန်သည် ဤမျှစောစော စည်းရုံးရေး အင်အားစုများ မတည်ထောင်ခဲ့ပေ။

သူ၏ရောက်ရှိမှုကြောင့် သမိုင်းက ထပ်ပြီး ပြောင်းလဲသွားပြန်ပြီလား။

သူသိထားသော ကမ္ဘာကြီးမှာ တဖြည်းဖြတ် ပျောက်ကွယ်နေပြီဖြစ်သည်။ အရာအားလုံးအတွက် အတိတ်က အဖြစ်အပျက်များကိုသာ အကိုးအကား ပြု၍ မရတော့ပေ။

"အဲ့ဒီ ယဲ့ဖန်ကဘာများ ထူးခြားလို့လဲ လွန်ခဲ့တဲ့ နှစ်အနည်းငယ်က ငါ သူ့ကိုမြင်တုန်းက သူက သာမန်ဂျူနီယာလေးတစ်ယောက်ပဲလေ။ ဒီလောက်အထိ အစွမ်းထက်တဲ့လူတွေ သူ့နောက်ကို လိုက်ရလောက်အောင် သူက တန်ဖိုးရှိလို့လား"

ရှောင်ချီသည် ရုတ်တရက် အကြံရသွားပြီး ဤလူ့ပါးစပ်မှ ယဲ့ဖန်၏ အခြေအနေကို စုံစမ်းရန် ဆုံးဖြတ်လိုက်သည်။

အကယ်၍ သူက အဓမ္မ နှိပ်စက်စစ်မေးလျှင် ဤလူက သေချင်ယောင်ဆောင်နေနိုင်သဖြင့် ယဲ့ဖန်၏ အကြောင်းကို ချော့မော့မေးမြန်းခြင်းက ပိုကောင်းပေလိမ့်မည်။

"ဟမ့်... လွန်ခဲ့တဲ့ နှစ်နှစ်က ဂိုဏ်းပေါင်းစုံ ပြိုင်ပွဲမှာ ငါတို့ နတ်ဘုရားသားတော်က တတိယရခဲ့တယ်"

"ပါဝင်သူ တစ်သန်းထဲမှာ ငါတို့သားတော်က တတိယရခဲ့တာ။ အဲ့ဒါ ဘယ်လောက်အထိ အဓိပ္ပာယ်ရှိလဲ မင်းသိလား"

"ပြီးတော့ အဲ့ဒီပြိုင်ပွဲရဲ့ ကန့်သတ်ချက်က အသက် ၃၀ အောက်ပဲ။ ငါတို့သားတော်က အဲ့ဒီတုန်းက အသက် ၂၃ နှစ်ပဲရှိသေးတယ် ထိပ်တန်း ၁၀ ယောက်ထဲမှာ အသက်အငယ်ဆုံးပဲ"

အဲ့ဒီကတည်းက ငါတို့သားတော်က နတ်ဘုရားနန်းတော်ကို တည်ထောင်ခဲ့တာ တစ်ပြည်လုံးက ပါရမီရှင်တွေကို စုစည်းခဲ့တယ်။

နှစ်နှစ်အတွင်းမှာတင် နတ်ဘုရားနန်းတော်ရဲ့ နောက်လိုက်တွေက နှစ်သောင်းကျော်နေပြီ

ချင်အန်းက သူ၏ အောင်မြင်မှုများကို ပြောပြနေသလို ဂုဏ်ယူဝင့်ကြွားစွာ ပြောနေတော့သည်။

"ဒါဆို မင်းက ဘာလို့ နတ်ဘုရားနန်းတော်မှာ မနေဘဲ ဒီကိုရောက်နေတာလဲ" ရှောင်ချီက ချင်အန်း၏ စကားကို ထောက်ပြီး ဆက်မေးလိုက်သည်။

ချင်အန်းမှာ တကယ့်ကို ဉာဏ်နည်းပုံရသည်။ သူသာ ဘာမှမသိသလို ဟန်ဆောင်ပြီး ဆက်မေးနေလျှင် ချင်အန်းက ယဲ့ဖန်၏ လျှို့ဝှက်ချက်အားလုံးကို ထုတ်ပြောပေလိမ့်မည်။

ဤသည်မှာ မိမိ၏ အကြီးအကဲ မည်မျှအစွမ်းထက်ကြောင်း ကြွားချင်နေသည့် စိတ်ကြောင့် ဖြစ်ပေလိမ့်မည်။

ချင်အန်းမှာ ရှောင်ချီနှင့် ရန်သူဖြစ်နေသော်လည်း ယဲ့ဖန်၏ တော်ပုံကို ကြွားဝါချင်သည့်စိတ်ကို မထိန်းနိုင်ဘဲ ရှိနေသည်။

ယခု ချင်အန်းသည် ရှောင်ချီအနေနှင့် သူ၏ နတ်ဘုရားသားတော် မည်မျှ တော်ကြောင်း သိသွားလျှင် ကြောက်လန့်တုန်ရင်ကာ မြေပြင်ပေါ် ဒူးထောက်တောင်းပန်မည့် ပုံရိပ်ကို စိတ်ကူးယဉ်နေတော့သည်။