အခန်း (၅၂) - ဝိညာဉ်စုပ်ဘူးသီး

သူမ၏ စီနီယာအစ်ကို နတ်ဆရာ လင်းယွီမှာမူ သူမ၏ နှလုံးသားထဲတွင် ပို၍ပင် နက်ရှိုင်းသော ဒဏ်ရာတစ်ခု ဖြစ်နေခဲ့သည်။

သူမသည် စီနီယာအစ်ကိုကို အသက် (၁၃) နှစ်အရွယ်ကတည်းက စွဲလန်းခဲ့သည်မှာ အခုဆိုလျှင် နှစ်ပေါင်း တစ်ရာနီးပါး ရှိခဲ့ပြီ။

သို့သော် အခုတော့ သူမတွင် သူ့ကို ဆက်ပြီး ချစ်မြတ်နိုးပိုင်ခွင့်ပင် မရှိတော့ပေ။

အရင်ကတော့ သူမသည် အဝေးကနေ သူ့ကျောပြင်ကို တိတ်တဆိတ် ငေးကြည့်ပိုင်ခွင့် ရှိခဲ့သေးသည်။

သို့သော် ယခုမူ သူမကိုယ်သူမ အလွန်ပင် ရွံရှာမိပြီး စီနီယာအစ်ကိုကို ချစ်ဖို့လုံးဝ မထိုက်တန်တော့ဘူးဟု ခံစားနေရသည်။

...

"စီနီယာအစ်ကို... ကျွန်မတို့ နောက်ဘယ်ကို သွားကြမလဲ" ရှောင်ချီ၏ လက်ကို ဆုပ်ကိုင်ထားရင်း မိန်းကလေးငယ်သည် အလွန်ပင် နွေးထွေးမှုကို ခံစားနေရသည်။

သူမ၏ နှုတ်ခမ်းထောင့်မှ အပြုံးကို ဘယ်လိုမှ ထိန်းမရပေ။ ရှောင်ချီ၏ ဘေးတိုက်ပုံစံကို ငေးကြည့်ရင်း သူမက တိုးတိုးလေး မေးလိုက်သည်။

"အခု ယဲ့ဖန် ဘယ်လိုရှိနေပြီလဲ သူ ဘယ်လောက်အထိ အစွမ်းထက်တဲ့ မွေးရာပါ ရတနာတွေ ရထားပြီလဲ" ရှောင်ချီက ညီမလေး၏ မေးခွန်းကို မဖြေဘဲ ပြန်ပြီး မေးခွန်းထုတ်လိုက်သည်။

မွေးရာပါ ရတနာ ဆိုသည်မှာ မွေးရာပါ ဝိညာဉ်အဆီအနှစ်ကိန်းအောင်းနေသော မှော်လက်နက်များနှင့် ရတနာပစ္စည်းများကို ခေါ်ခြင်းဖြစ်သည်။

ကျင့်ကြံခြင်းလောကတွင် အဆင့်အမြင့်ဆုံး အဆင့် (၁၀) အတွင်းရှိသော လက်နက်အားလုံးနီးပါးမှာ ဤမွေးရာပါ ရတနာများပင် ဖြစ်သည်။

ထိပ်တန်း (၁၀) ခုအပြင် အခြားသော ထူးခြားသည့် မွေးရာပါ ရတနာများစွာလည်း ရှိနေပြီး တစ်ခုချင်းစီတွင် မတူညီသော အစွမ်းများ ရှိကြသည်။

အခုအချိန်မှာ ယဲ့ဖန်ကတော့ ကျင့်ကြံခြင်းလောကမှာ တကယ့်ကို နာမည်ကြီးနေတာပဲ ဂိုဏ်းကြီးတွေရဲ့ သူတော်စင်မတွေနဲ့ တိုင်းပြည်ရဲ့ မင်းသမီးတွေတောင် သူ့ကို အရမ်းအားကျနေကြတာ။

ဒါပေမဲ့ သူ ဘယ်လောက်အထိ ရတနာတွေ ရထားလဲဆိုတာတော့ ကျွန်မအတိအကျ မသိဘူး သတင်းတွေအရဆိုရင်တော့ သူ့မှာ လူတွေရဲ့ ဝိညာဉ်ကိုစုပ်ယူနိုင်တဲ့ ဘူးသီးတစ်လုံး ရှိတယ်တဲ့ ပြီးတော့ ဟင်းလင်းပြင်ကို ဖြတ်တောက်နိုင်တဲ့ ဓားမြှောင်တစ်လက်လည်း ရှိတယ်လို့ ကြားတယ်။

ခဏမျှ စဉ်းစားပြီးနောက် ညီမလေးက သူမသိသမျှကို ရှောင်ချီအား အကုန်ပြောပြလိုက်သည်။

ဒီကောင့်ရဲ့ အခွင့်အရေးတွေက တကယ်ကို ကြောက်ဖို့ကောင်းတာပဲ ဝိညာဉ်စုပ်ဘူးသီးရော ဟင်းလင်းပြင်ဓားမြှောင်ရော သူ ရသွားပြီပေါ့။

ရှောင်ချီသည် လေထဲတွင် ပျံသန်းနေရင်း စိတ်ထဲမှ တိတ်တဆိတ် ရေရွတ်လိုက်သည်။

"စီနီယာအစ်ကို... အဲ့ဒီ ရတနာ နှစ်ခုက အရမ်း အစွမ်းထက်လို့လား" ရှောင်ချီ၏ တင်းမာသွားသော မျက်နှာအမူအရာကို ကြည့်ပြီး ညီမလေးက နားမလည်စွာ မေးလိုက်သည်။

ဟုတ်တယ် အရမ်း အစွမ်းထက်တယ်။ အဲ့ဒီလို လက်နက်တွေက သူ့ရဲ့ အစွမ်းကို အနည်းဆုံး ၁၀ ရာခိုင်နှုန်းကနေ ၂၀ ရာခိုင်နှုန်းအထိ တိုးစေနိုင်တယ်။

ဒါ့အပြင် အဲ့ဒီထဲမှာရှိတဲ့ ဝိညာဉ်အဆီအနှစ်တွေကို စုပ်ယူပြီးရင် အဲ့ဒီ ရတနာတွေကို စိတ်ကြိုက် ထိန်းချုပ်နိုင်ရုံတင်မကဘဲ ဝိညာဉ်နဲ့ ကျင့်ကြံခြင်း အမြုတေကိုပါ ပြုစုပျိုးထောင်ပေးနိုင်တဲ့ အံ့မခန်း အကျိုးကျေးဇူးတွေ ရှိတယ်ဟု ရှောင်ချီက အနည်းငယ် မနာလိုစိတ်ဖြင့် ပြောလိုက်သည်။

ယခင်ဘဝမှာ ယဲ့ဖန် ဒီလောက်အထိ သန်မာခဲ့တာဟာ သူ မွေးရာပါ ရတနာ အမြောက်အမြားရခဲ့လို့ပဲ။

ကျင့်စဉ်တွေရဲ့ အထောက်အပံ့နဲ့ပေါင်းပြီး သူဟာ ရွယ်တူတွေကြားမှာ ထိပ်ဆုံးကနေ ရပ်တည်နိုင်ခဲ့တာ။

ငါတို့ ပထမဆုံးအမှတ်အနေနဲ့ ကျောက်စိမ်းကညာဂိုဏ်းကို သွားကြမယ် ကျောက်စိမ်းကညာဂိုဏ်းရဲ့ ကျောက်စိမ်းစင်ကြယ်ပုလင်းက ယဲ့ဖန်လက်ထဲ မရောက်သေးဘူးလို့ ထင်ရတယ်။

လေထဲတွင် ခေတ္တ စဉ်းစားပြီးနောက် ရှောင်ချီက ပြတ်ပြတ်သားသား ဆုံးဖြတ်လိုက်သည်။

ဤကျောက်စိမ်းစင်ကြယ်ပုလင်းသည် ကျင့်ကြံခြင်းလောက၏ ရတနာများထဲတွင် အဆင့် (၁၃) ရှိပြီး ၎င်း၏ အာနိသင်နှင့် တိုက်ခိုက်နိုင်စွမ်းမှာ အလွန်ပင် ထူးကဲလှသည်။

ဒါပေမဲ့ ယဲ့ဖန်နဲ့ ကျောက်စိမ်းကညာဂိုဏ်းရဲ့ သူတော်စင်မတို့ ပတ်သက်နေတယ်ဆိုတဲ့ သတင်းတွေက လွန်ခဲ့တဲ့ ခြောက်နှစ်ကတည်းက ထွက်နေတာလေ။ ယဲ့ဖန် အဲ့ဒီပုလင်းကို ရသွားလောက်ပြီ မဟုတ်ဘူးလား။

သူမ၏ စီနီယာအစ်ကို ယုံကြည်မှုရှိနေသည်ကို မြင်သော်လည်း ညီမလေးက စိုးရိမ်တကြီး သတိပေးလိုက်သည်။

ယဲ့ဖန်သည် အမျိုးသမီးများနှင့် ပတ်သက်မှုများစွာ ရှိသူဖြစ်ပြီး ကျောက်စိမ်းကညာဂိုဏ်း၏ နံပါတ်တစ် အလှလေးဖြစ်သူ သူတော်စင်မပင်လျှင် သူ့အပေါ် စွဲလန်းခဲ့သည်ဆိုခြင်းမှာ သူ၏ဆွဲဆောင်မှု မည်မျှကြီးမားကြောင်း ပြသနေသည်။

"ကိစ္စမရှိပါဘူး။ ကျောက်စိမ်းကညာဂိုဏ်းရဲ့ သူတော်စင်မက သူ့အပေါ် စိတ်မပါသေးဘူးလို့ ငါသံသယရှိတယ်" ရှောင်ချီက ယုံကြည်မှုအပြည့်နှင့် ပြုံးကာ ပြောလိုက်သည်။

သူ ဤသို့ပြောရခြင်းမှာ ယခင်ဘဝက ယဲ့ဖန်၏အမျိုးသမီး ၈ ဦးထဲတွင် ကျောက်စိမ်းကညာဂိုဏ်း၏ သူတော်စင်မ မပါဝင်ခဲ့သည်ကို သတိရသောကြောင့် ဖြစ်သည်။

ထိုသူတော်စင်မကို ယဲ့ဖန်က အစောကြီး စွန့်ပစ်ခဲ့ခြင်း ဖြစ်နိုင်သလို သို့မဟုတ် သူမက ယဲ့ဖန်၏ မမှန်ကန်သော အချက်တွေကို သိသွားပြီး လမ်းခွဲခဲ့ခြင်းလည်း ဖြစ်နိုင်သည်။

ဘယ်လိုပဲဖြစ်ဖြစ် ရှောင်ချီအနေနှင့် ကျောက်စိမ်းကညာဂိုဏ်းသို့ သွားရန် အကြောင်းပြချက်ရှိပါသည်။

မွေးရာပါ ရတနာကို ရရှိမှသာ ရှောင်ချီ၏ ကျင့်စဉ်မှာ ပိုမို တိုးတက်လာမည်ဖြစ်ပြီး ယဲ့ဖန်ကို ရင်ဆိုင်ရန် နည်းလမ်းများစွာ ပိုရှိလာမည် ဖြစ်သည်။

ဤမွေးရာပါ ဝိညာဉ်အဆီအနှစ်သည် ခန္ဓာကိုယ်နှင့် ဝိညာဉ်ကို ပြုစုပေးနိုင်ရုံတင်မကဘဲ ကျင့်ကြံခြင်း အရှိန်ကိုပါ မြန်ဆန်စေသည်။

ဒါဟာ ယဲ့ဖန် ကျင့်ကြံခြင်းမှာ ဒီလောက်အထိ မြန်ဆန်နေရတဲ့ အဓိကအကြောင်းရင်းပင် ဖြစ်သည်။ အကယ်၍ ယဲ့ဖန်တွင် ဤကဲ့သို့သော ပြင်ပအထောက်အပံ့များ မရှိလျှင် သူ၏ ကျင့်ကြံခြင်းအရှိန်မှာ ရှောင်ချီနှင့် သိပ်ကွာမည် မဟုတ်ပေ။

ဆုံးဖြတ်ချက် ချပြီးသည်နှင့် သူတို့၏ အရှိန်မှာ သိသိသာသာ မြန်ဆန်သွားတော့သည်။

အချိန်ကုန်သက်သာစေရန် ရှောင်ချီသည် ညီမလေးကို ခေါ်ကာ ကျောက်စိမ်းကညာဂိုဏ်း တည်ရှိရာ ချင်းချန်တောင်ဘက်သို့ ဓားပျံစီးကာ ဦးတည်လိုက်သည်။

ချင်းချန်တောင်သည် လူ့လောကနှင့် ကျင့်ကြံခြင်းလောက ဆုံစည်းရာ နေရာဖြစ်ပြီး ကျောက်စိမ်းကညာဂိုဏ်းက အဓိက ထိန်းချုပ်ထားသည်။

ထိုနေရာမှာ အေးချမ်းသာယာလှပြီး မဟာဝေနိုင်ငံ၏ အုပ်ချုပ်မှုအောက်တွင် မရှိသောကြောင့် ထိုနေရာတွင် နေထိုင်သော သာမန်လူများမှာ အခွန်ပေးဆောင်ရန် မလိုပေ။

သူတို့သည် တစ်နှစ်လျှင် ရက်အနည်းငယ်မျှသာ ကျင့်ကြံသူများအတွက် ဝိညာဉ်ကျောက်တုံးများ တူးဖော်ပေးရန်နှင့် အဆောက်အအုံများ ဆောက်လုပ်ပေးရန်သာ လိုအပ်သည်။

ထို့ကြောင့် ချင်းချန်တောင် ပတ်လည် မိုင် ၈၀ အတွင်းမှာ သာမန်လူဦးရေ တစ်သန်းနီးပါး ရှိနေပြီး မဟာဝေနိုင်ငံ၏ အစည်ကားဆုံးသော သာမန်လူတို့ မြို့တော်အဖြစ် လူသိများသည်။

မဟာဝေနိုင်ငံ၏ ဧကရာဇ်သည်လည်း ဤမြေကို မက်မောသော်လည်း ကျောက်စိမ်းကညာဂိုဏ်းနှင့် စစ်မဖြစ်လိုသဖြင့် အဝေးကနေသာ ကြည့်နေရသည်။

စုစုပေါင်း ၇ နာရီခန့် ခရီးနှင်ပြီးနောက် ရှောင်ချီသည် ညီမလေးကို ခေါ်ကာ ထိုမြို့ထဲသို့ ရောက်ရှိလာခဲ့ပြီ။

ယခုအခါ သူ၏ ကျင့်စဉ်မှာ ဝိညာဉ်ပြောင်းလဲခြင်းအဆင့်၏ အထွတ်အထိပ်သို့ ရောက်ရှိနေပြီ ဖြစ်ရာ သူ၏ စွမ်းအားမှာ အရင်ကထက် အဆပေါင်းများစွာ သာလွန်နေပြီဖြစ်သည်။

အရင်က ဂိုဏ်းကနေ ယွီချွမ်းမြို့ကို သွားရလျှင် အချိန်အတော်ပေးရသော်လည်း ယခုမူ ရှောင်ချီအနေနှင့် တစ်နာရီမပြည့်ခင် ရောက်အောင် သွားနိုင်စွမ်း ရှိသည်။

အခု ချင်းချန်တောင်သို့ ၇ နာရီကြာ သွားခဲ့ရခြင်းမှာ ခရီး မည်မျှအထိ ဝေးကွာကြောင်း ပြသနေသည်။

ဝိညာဉ်ဓားဂိုဏ်းအတွင်း၌။

နတ်သမီး လင်ယွင်သည် စိတ်ပျက်အားလျော့စွာဖြင့် ဂိုဏ်း၏ ခမ်းမကြီးအတွင်းသို့ ပြန်ရောက်လာပြီး သူမ၏ နေရာတွင် ထိုင်ချလိုက်သည်။

လင်ယွင်တစ်ယောက်တည်း ပြန်လာသည်ကို မြင်လိုက်ရသည့်အခါ ဂိုဏ်းချုပ် ဝူသောက်ကျိသည် ရှောင်ချီကို သူမ ပြန်ခေါ်မလာနိုင်ခဲ့မှန်း သိလိုက်သည်။

ဝူသောက်ကျိသည်လည်း ဤကိစ္စကို ပြန်မစဘဲ သူ၏ မိန့်ခွန်းများကိုသာ ဆက်လက် ပြောကြားနေပြီး တောင်ထိပ်သခင်များနှင့် တပည့်များကို အနာဂတ်အတွက် ရည်မှန်းချက်ကြီးကြီးထားရန်သာ လှုံ့ဆော်နေတော့သည်။

"စီနီယာညီမလေး ဇီယီ ရှောင်ချီရဲ့ ကျင့်စဉ်အဆင့်က အခု ဘယ်လောက်လောက် ရှိမယ်လို့ ထင်လဲ" ခမ်းမထောင့်တစ်နေရာတွင် အကြီးအကဲ ချန်က ခရမ်းရောင်ဝတ်စုံနှင့် လှပသော အမျိုးသမီးကို တိုးတိုးလေး မေးလိုက်သည်။

ယွီချွမ်းမြို့တွင် အတူတကွ အန္တရာယ်ကို ကျော်ဖြတ်ခဲ့ပြီးနောက် ဤအကြီးအကဲ နှစ်ဦး၏ဆက်ဆံရေးမှာ ပိုမို ကောင်းမွန်လာခဲ့သည်။

သူ့ရဲ့ အရှိန်အဝါက တည်ငြိမ်ပြီး ရှည်လျားတယ် စွမ်းအားတွေကလည်း နက်ရှိုင်းတယ်။ သူဟာ တောင်ထိပ်သခင် အဆင့်ရှိတဲ့ ပုဂ္ဂိုလ်တစ်ယောက်ထက် မနိမ့်ဘူးဆိုတာတော့ သေချာတယ် အကြီးအကဲ ဇီယီ၏ အသံမှာ နူးညံ့သော်လည်း သူမ၏စကားကြောင့် ဘေးက အကြီးအကဲ ချန်မှာ ပါးစပ်အဟောင်းသား ဖြစ်သွားရသည်။

တောင်ထိပ်သခင်ထက် မနိမ့်ဘူးလား အဲ့ဒါက ဘာကို ဆိုလိုတာလဲ ရှောင်ချီက အာကာသပြန်လည်ရောက်ရှိခြင်းအဆင့်ကိုတောင် ချိုးဖျက်နိုင်သွားပြီလား။

နတ်သမီးလင်ယွင် သူ့ကို မတားနိုင်ခဲ့သည်မှာ မထူးဆန်းတော့ပေ။ ရှောင်ချီ၏ တိုက်ခိုက်ရေးပါရမီမှာ မူလကတည်းက ကြောက်စရာကောင်းလှသည်။

အခု သူက နတ်သမီး လင်ယွင်နှင့် တန်းတူ အဆင့်တစ်ခုကို ရောက်နေပြီဆိုလျှင် သူ၏ အစွမ်းမှာ ခန့်မှန်းရပင် ခက်ခဲလှပေလိမ့်မည်။

"ဒါက ကျွန်မရဲ့ ခန့်မှန်းချက်သက်သက်ပါပဲ။ အကြီးအကဲ ချန်... အဲ့လောက်အထိ အံ့သြမနေပါနဲ့ဦး" အကြီးအကဲ ဇီယီက ခပ်ဖွဖွလေး ပြုံးကာ ခေါင်းခါပြလိုက်သည်။