အခန်း (၅၁)  ဆရာ မှားသွားတာသိပါပြီ

ရှောင်ချီသည် မိမိနောက်ဘက်ရှိ နတ်ဘုရားအရှိန်အဝါများ ဝန်းရံနေသည့် နူးညံ့သိမ်မွေ့သော ပုံရိပ်ကို အေးစက်စွာ လှမ်းကြည့်လိုက်သည်။

ဒီတစ်ကြိမ်တွင်တော့ သူသည် ချက်ချင်း ပျံသန်းထွက်ခွာသွားခြင်း မရှိဘဲ လင်ယွင်နှင့် သေသေချာချာ စကားပြောရန် ဆုံးဖြတ်လိုက်သည်။

ယခင်ဘဝ၏ အနှစ် (၂၀) အတွေ့အကြုံနှင့် ယခုဘဝ၏ (၁၀) နှစ်တာ လေ့ကျင့်မှုများက သူ၏ စိတ်ဓာတ်ကို အထွတ်အထိပ်သို့ ရောက်ရှိစေခဲ့ပြီဖြစ်သည်။

ယခုအချိန်တွင် သူသည် မည်သည့် လေပြင်းမုန်တိုင်းကိုမဆို မတုန်မလှုပ် ရင်ဆိုင်နိုင်စွမ်း ရှိနေပြီဖြစ်ရာ လင်ယွင်ကဲ့သို့သော အမျိုးသမီးကို အဘယ်ကြောင့် ဂရုစိုက်နေတော့မည်နည်း။

မေးစရာရှိရင် တိုက်ရိုက်သာမေးပါ ဒီနေ့ ငါ စိတ်ကြည်နေတာမို့ လျှို့ဝှက်ချက်တချို့ကို ပြောပြရင် ပြောပြမိမှာပါ။

ရှောင်ချီသည် ခြေလှမ်းများကို ရပ်လိုက်ပြီး ဂိုဏ်းတံခါးဝမှ လျှောက်လာသော နတ်သမီး လင်ယွင်ကို ကြည့်ကာ တည်ငြိမ်စွာ ပြောလိုက်သည်။

ငါနဲ့ ယဲ့ဖန်ကြားမှာ ဖြစ်ခဲ့တဲ့ အဲ့ဒီကိစ္စတုန်းက ဘေးမှာ ဘယ်သူမှ မရှိခဲ့ဘူး။ ဒီလောက်အထိ သီးသန့်ဖြစ်တဲ့ ကိစ္စကို မင်းက ဘယ်လိုလုပ် သိနေတာလဲ။

ငါးနှစ်တာ ကာလကုန်ဆုံးသွားပြီးနောက် နတ်သမီး လင်ယွင်သည် ယဲ့ဖန်၏ လှည့်ကွက်များနှင့် သူမ၏ အတွေ့အကြုံများကို အတော်အတန် လက်ခံနိုင်နေပြီ ဖြစ်သည်။

သို့သော် သူမ သိချင်နေသည့် အချက်တချို့ ရှိနေသေးသည် အရင်က ခမ်းမကြီးထဲတွင် ရှောင်ချီသည် သူမနှင့် ယဲ့ဖန်တို့၏ လျှို့ဝှက်ချက်ကို အပိုင်ပြောနိုင်ခဲ့ခြင်းမှာ ယနေ့တိုင် သူမ နားမလည်နိုင်သည့် အချက်ပင် ဖြစ်သည်။

ပြောပြလို့ရပါတယ် စေ့စပ်ပွဲ ပျက်သွားပြီးတဲ့နောက်မှာ ငါဟာ အနာဂတ်ကို ခဏတာ မြင်နိုင်တဲ့ စွမ်းအားတစ်ခု ရခဲ့တယ်။

မင်းနဲ့ ယဲ့ဖန်အကြောင်းကို ငါသိခဲ့တာဟာ အချိန်ကြေးမုံထဲမှာ အဖြေကို မြင်ခဲ့ရလို့ပဲ။

ဒါပေမဲ့ ငါမြင်ခဲ့တဲ့ အနာဂတ်မှာတော့ မင်းနဲ့ ယဲ့ဖန်က ပေါင်းဖက်သွားကြတယ်။

မင်းက သူ့အတွက် အသက်ပေးခဲ့ပြီး သူကတော့ မင်းကိုရှင်သန်အောင် လုပ်ဖို့အတွက် တစ်ဘဝလုံး နတ်ဆေးပင်တွေကို လိုက်ရှာခဲ့တယ်။

မင်းတို့နှစ်ယောက် ဒီလိုမျိုး လမ်းခွဲသွားကြလိမ့်မယ်လို့ ငါ လုံးဝ မထင်ထားခဲ့ဘူး။ ငါမြင်ခဲ့တဲ့ အနာဂတ်က မှားနေတာများလား။

ရှောင်ချီက နတ်သမီး လင်ယွင်ကို ကြည့်ကာ အေးအေးဆေးဆေး ပြောလိုက်သည်။

ဤသို့ပြောခြင်းမှာ သူမထံမှ သတင်းအချက်အလက်ကို ပြန်ပြီး စမ်းသပ်ကြည့်ခြင်းလည်းဖြစ်သည်။

အဘယ်ကြောင့်ဆိုသော် သူ၏ ယခင်ဘဝ မှတ်ဉာဏ်များတွင် သူမနှင့် ယဲ့ဖန်သည် ပေါင်းဖက်သွားကြပြီး တစ်လောကလုံး အားကျရသည့် ကျင့်ကြံဖော်တွေ ဖြစ်ခဲ့ကြသောကြောင့်ဖြစ်သည်။

သူမသည် ယဲ့ဖန်၏ မိန်းမအများအပြားထဲမှ တစ်ဦးသာ ဖြစ်သော်လည်း ၎င်းကပင် ကျင့်ကြံခြင်းလောကရှိ အမျိုးသမီးများအားလုံးကို မနာလို ဖြစ်စေခဲ့သည်။

သို့သော် ယခုဘဝတွင်မူ အဘယ်ကြောင့် ဤလူနှစ်ဦး၏ လမ်းကြောင်းမှာ မူလအတိုင်း မဟုတ်ဘဲ လွဲချော်သွားရသနည်း။

 ညီမလေး (လင်ယုရှု) ပြောပြချက်အရဆိုလျှင် ဤနှစ်ယောက်မှာ တစ်ယောက်နှင့်တစ်ယောက် ရန်သူလို ဖြစ်နေကြပြီး လင်ယွင်က ယဲ့ဖန်ကို အခွင့်ရတိုင်း ဒုက္ခပေးနေသည်ဟု သိရသည်။

ဒါကြောင့်ကိုး... မင်းက ကံကြမ္မာကို မြင်နိုင်တာပေါ့ ဒါဆို ဘာလို့ ငါ့ကို မပြောခဲ့တာလဲ။

နတ်သမီး လင်ယွင်၏ မျက်ဝန်းများမှာ ခဏတာ မှေးမှိန်သွားပြီးနောက် ရှောင်ချီကို ကြည့်ကာ နားမလည်နိုင်စွာ မေးလိုက်သည်။

ငါက ဘာလို့ မင်းကို ပြောပြရမှာလဲ မင်း သေတာ ရှင်တာက ငါနဲ့ဘာဆိုင်လို့လဲ ရှောင်ချီက ဟာသတစ်ခုကို ကြားလိုက်ရသလို လှောင်ရယ်လိုက်ပြီး မထီမဲ့မြင် ပြောလိုက်သည်။

အနာဂတ်မှာ... ငါက မင်းအပေါ် တကယ်ပဲ အဲ့လောက်အထိ ဆိုးခဲ့တာလား ငါဟာ မင်းရဲ့ ဆရာတစ်ယောက်အနေနဲ့ မင်းရဲ့ ယုံကြည်မှုတွေ အကုန်လုံး ပျက်စီးသွားရအောင် လုပ်ခဲ့မိလို့လား လင်ယွင်သည် လူအ မဟုတ်ပေ။

ရှောင်ချီ၏ စကားထဲက အဓိပ္ပာယ်ကို ချက်ချင်း ရိပ်မိလိုက်သည်။ အနာဂတ်မှာ သူမသည် မိမိတပည့်၏ နှလုံးသားကို အစိမ်းလိုက် ခွဲခဲ့မိသည်မှာ သေချာပါသည်။

မှန်တယ် အတိအကျပဲ ငါမြင်ခဲ့တဲ့ ကံကြမ္မာမှာတော့ ငါဟာ စေ့စပ်ပွဲကို ချက်ချင်း မဖျက်ခဲ့ဘူး ဒါကြောင့် ငါ့ကို နောင်တရတောင်ကမ်းပါးမှာ အကျဉ်းမချခဲ့ဘူး။

ဒါပေမဲ့ ဂိုဏ်းရဲ့ အဖိုးတန် ရတနာဖြစ်တဲ့ ဟောက်ထျန်းစေတီကို ခိုးယူပါတယ်ဆိုပြီး တစ်ဂိုဏ်းလုံးက ငါ့ကို မတရား စွပ်စွဲခဲ့ကြတယ်။

အဲ့ဒီနောက်မှာ ငါဟာ ဂိုဏ်းရဲ့ အပယ်ခံ ရာဇဝတ်သားကြီး ဖြစ်သွားခဲ့ရတယ်။

အဲ့ဒီအချိန်မှာ မင်းနဲ့ စီနီယာအစ်မ နှစ်ယောက်ဟာ ငါနဲ့ ပတ်သက်သမျှ အကုန်ဖြတ်ပြီး ငါ့ကို အရင်ဆုံး စွန့်ပစ်ခဲ့ကြတဲ့သူတွေပဲ။

စေတီတော် အခိုးခံရတုန်းက အရေးကြီးဆုံး အစိတ်အပိုင်းဖြစ်တဲ့ မွေးရာပါ ဝိညာဉ်အဆီအနှစ်ပျောက်ဆုံးသွားခဲ့တယ်။

ဥပဒေထိန်းသိမ်းရေးဌာနက ငါ့ကို ခုနစ်ရက် ခုနစ်လီ နှိပ်စက်စစ်ဆေးခဲ့ပေမဲ့ အဲ့ဒီ ဝိညာဉ်အဆီအနှစ် ဘယ်ရောက်သွားလဲဆိုတာ သူတို့ ရှာမတွေ့ခဲ့ကြဘူး။

နောက်ဆုံးတော့ ဘာမှလုပ်မရတဲ့အဆုံး ငါ့ကို တောင်နောက်ဘက်က နောင်တရတောင်ကမ်းပါးမှာ သုံးနှစ် အကျဉ်းချလိုက်ကြတယ်။

ငါ အကျဉ်းထောင်က ထွက်လာတဲ့အခါမှာတော့ ငါ့ရဲ့ဘဝဟာ ပျက်စီးသွားပြီး လူပုံတောင် မပေါက်တော့ဘူး။

အဲ့ဒီမှာ မင်း ပထမဆုံး လုပ်ခဲ့တဲ့အရာက ငါတို့ရဲ့ ဆရာတပည့် သံယောဇဉ်ကို ဖြတ်တောက်ပစ်ပြီး ငါ့ကို ခရမ်းရောင်တိမ်တိုက်တောင်ကနေ နှင်ထုတ်ခဲ့တာပဲ။

ငါဟာ လူသူမရှိတဲ့ တောင်ထိပ်တစ်ခုမှာ ဆယ်နှစ်တိုင်တိုင် တစ်ယောက်တည်း နေခဲ့ရတယ်။

ဘယ်သူမှ လာမမေးသလို ဘယ်သူမှလည်း ဂရုမစိုက်ခဲ့ကြဘူး။

ရွှေယွမ်တစ်ယောက်ပဲ ရံဖန်ရံခါ လာပြီး ထမင်းကျွေး စကားလာပြောပေးခဲ့တာ။

ယခင်ဘဝက အဖြစ်အပျက်တွေကို ပြောပြနေစဉ်မှာ ရှောင်ချီ၏ စိတ်နှလုံးမှာ အေးဆေးတည်ငြိမ်နေသည်။

သူသည် အတိတ်ကို တည်ငြိမ်စွာ ရင်ဆိုင်နိုင်နေပြီဖြစ်သလို မိမိခန္ဓာကိုယ်အတွင်းရှိ မကောင်းဆိုးဝါး စွမ်းအားများကိုလည်း ထိန်းချုပ်နိုင်နေပြီ ဖြစ်သည်။

မိုးကြိုးရေကန်ထဲမှာ ဆယ်နှစ်ကြာ နေထိုင်ခဲ့စဉ် သူသည် တစ်ကိုယ်တည်း အထီးကျန်မှုကို ခံစားခဲ့ရသလို ခန္ဓာကိုယ်နှင့် စိတ်ဓာတ်ကိုလည်း သံမဏိလို မာကျောအောင် လေ့ကျင့်ခဲ့သည်။

နတ်သမီး လင်ယွင်သည် မိမိရှေ့က တပည့်ကို ကြည့်ကာ ရင်ထဲမှာ ခံစားချက်ပေါင်းစုံ ဖြစ်ပေါ်နေတော့သည်။

သူမ၏စရိုက်ကို သူမကိုယ်တိုင် အသိဆုံးပင် ရှောင်ချီ ပြောပြသည့် အရာများကို သူမ အမှန်တကယ် လုပ်မိမှာသေချာပါသည်။

တကယ်တော့ ယခုဘဝမှာတောင် သူမသည် ထိုထက်ပိုပြီး ဆိုးရွားခဲ့ပုံရသည်။

မူလက ရှောင်ချီသည် သုံးနှစ်သာ အကျဉ်းကျခံရမည် ဖြစ်သော်လည်း သူမကြောင့် ရှောင်ချီသည် မိစ္ဆာလမ်းစဉ်ထဲ ရောက်သွားခဲ့ရသလို ပြစ်ဒဏ်ကာလမှာလည်း (၁၃) နှစ်အထိ တိုးသွားခဲ့သည်။

ဒီနှစ်တွေမှာ သူသည် မိုးကြိုးရေကန်ထဲမှာ လျှပ်စီးပေါင်း သောင်းခြောက်ထောင်ရဲ့ အကိုက်အခဲကို ခံစားရင်း ဒုက္ခရောက်ခဲ့ရသည် မဟုတ်ပါလား။

နတ်သမီး လင်ယွင်က ထပ်မေးချင်သေးသော်လည်း ရှောင်ချီမှာ လှည့်ထွက်သွားဖို့ ပြင်နေပြီ ဖြစ်သည်။

"မင်းမြင်ခဲ့တဲ့ အနာဂတ်မှာ... မင်းရဲ့ နောက်ဆုံး ရလဒ်က ဘာလဲ" နတ်သမီး လင်ယွင်သည် သူမ၏လက်ကို လှမ်းဆန့်ကာ တုန်ယင်နေသော အသံဖြင့် မေးလိုက်သည်။

သူမသည် သူမ၏ အနာဂတ်ကို မမေးခဲ့ဘဲ ရှောင်ချီ၏ အနာဂတ်ကိုသာ မေးခဲ့ခြင်း ဖြစ်သည်။

ဘာကြောင့်လဲဆိုတော့ သူမနှင့် ယဲ့ဖန်ကြားမှာ ဘာမှဖြစ်နိုင်ခြေ မရှိတော့မှန်း သူမ သိထားပြီးဖြစ်ရာ အနာဂတ်ကို သိနေဖို့ မလိုအပ်တော့ပေ သို့သော် သူမသည် ရှောင်ချီကို မည်မျှအထိ နာကျင်အောင် လုပ်မိခဲ့သလဲနှင့် အမှားပြင်ဖို့ အခွင့်အရေး ရှိသေးသလားဆိုသည်ကိုသာ သိချင်နေခြင်း ဖြစ်သည်။

ငါ့ရဲ့ စိတ်ဓာတ်တွေ ပျက်စီးသွားပြီး အသုံးမကျတဲ့ လူတစ်ယောက် ဖြစ်သွားခဲ့တယ်။

အနှစ် ၂၀ တိုင်တိုင် ကျင့်ကြံခဲ့ပေမဲ့ ငါ့ရဲ့ ကျင့်စဉ်အဆင့်က နတ်သန္ဓေသားအဆင့်မှာပဲ ရပ်တန့်နေခဲ့တယ် ရှောင်ချီက ရိုးရှင်းသော စကားတစ်ခွန်းဖြင့် သူ၏အနာဂတ်ကို ပြောပြလိုက်သည်။

ဝုန်း... နတ်သမီး လင်ယွင်မှာ မြေပြင်ပေါ်သို့ ဒူးထောက်ပြိုလဲသွားတော့သည် သူမ၏ မျက်ဝန်းအိမ်မှ မျက်ရည်များမှာ အလိုအလျောက် စီးကျလာသည်။

"တပည့်လေး... ဆရာ့ကို နောက်ထပ် အခွင့်အရေး တစ်ကြိမ်လောက် ပေးလို့ မရဘူးလား မင်းကိုတစ်ဘဝလုံး ကောင်းကောင်း စောင့်ရှောက်ပါ့မယ်လို့ ဆရာကတိပေးပါတယ်"

လင်ယွင်သည် သူမ၏မာနတွေကို ဘေးဖယ်ထားကာ ရှောင်ချီ၏ ခြေထောက်ကို ဖက်တွယ်ပြီး ရှိုက်ကြီးတငင် ငိုကြွေးကာ တောင်းပန်နေတော့သည်။

မလိုအပ်တော့ပါဘူး ဒီဘဝမှာပဲဖြစ်ဖြစ် ငါမြင်ခဲ့တဲ့ အနာဂတ်မှာပဲဖြစ်ဖြစ် မင်းအပေါ် ငါ လုံးဝ စိတ်ကုန်သွားပြီ။

တောင်းစားနေတဲ့ ဘဝကနေ ကျင့်ကြံခြင်း ဂိုဏ်းထဲကို ခေါ်လာပေးခဲ့တဲ့အတွက်တော့ ကျေးဇူးတင်ပါတယ်။

ဒါပေမဲ့ အဲ့ဒီကျေးဇူးတွေကို ငါဆပ်ခဲ့တာ ကြာပါပြီ မင်း ငါ့ကို မိစ္ဆာလမ်းစဉ်ထဲ ရောက်အောင် တွန်းပို့ခဲ့တယ် မိုးကြိုးရေကန်ထဲမှာ ဆယ်နှစ်တိုင်တိုင် ပိတ်လှောင်ခဲ့တယ်။

ပြီးတော့ မိုးကြိုးနှင်တံနဲ့ အချက် ၃၀ ရိုက်ခဲ့တာကိုကော ဘယ်လောက် နာကျင်လဲဆိုတာ မင်းသိလား။

ဒါတွေ အားလုံးက ငါတို့ကြားက ဆရာတပည့် သံယောဇဉ်ကို ဖျက်ဆီးပစ်ဖို့ လုံလောက်နေပါပြီ အခု ငါတို့ကြားမှာ ကျန်နေတာက အမုန်းတရားတစ်ခုပဲ။

ရှောင်ချီသည် နတ်သမီး လင်ယွင်ကို အေးစက်စွာ တစ်ချက်ကြည့်လိုက်ပြီး တုံ့ဆိုင်းမနေဘဲ သူ၏ ဂျူနီယာညီမလေးနှင့်အတူ ကောင်းကင်ယံသို့ ပျံသန်းထွက်ခွာသွားတော့သည်။

ဒီတစ်ကြိမ်တွင်တော့ နတ်သမီး လင်ယွင်လိုက်မလာတော့ပေ သူမ သိချင်နေသည့် အရာအားလုံးကို သိသွားခဲ့ပြီဖြစ်သည်။

သို့သော် သူမ၏ စိတ်နှလုံးမှာတော့ ဗရုတ်ဗရက် ဖြစ်နေရသည်။

ရှောင်ချီ၊ ယဲ့ဖန်နှင့် သူမ၏ စီနီယာအစ်ကိုတို့ကို ဘယ်လို ရင်ဆိုင်ရမည်ဆိုသည်ကို မသိတော့ပေ။

ရှောင်ချီမှာ သူမ၏ တပည့်ဖြစ်သော်လည်း သူမကြောင့် မိစ္ဆာလမ်းစဉ်ထဲ ရောက်သွားခဲ့ရသည်။

နောင်တစ်ချိန်တွင် သူသည် သူမကို ကလဲ့စားချေမှာ သေချာသည်။

ယဲ့ဖန်နှင့်လည်း သူမမှာ ပတ်သက်မှုတွေ ရှိခဲ့သည်။ ပုံမှန်အတိုင်းဆိုလျှင် သူမသည် သူ၏ မိန်းမတစ်ဦး ဖြစ်လာပေလိမ့်မည်။

ယခုအခါ ယဲ့ဖန်၏ လှည့်ကွက်တွေကို သိသွားပြီဖြစ်ရာ သူမသည် သူနှင့် အမြဲတမ်းအတွက် လမ်းခွဲလိုက်ပြီဖြစ်သည်။ နောင်တွင် ရန်သူများသာ ဖြစ်ကြပေလိမ့်မည်။

သို့သော် ယဲ့ဖန်၏ပါရမီမှာ အလွန်ကြီးမားလှသဖြင့် ရှောင်ချီနှင့် စီနီယာအစ်ကိုတို့ထက်ပင် သာလွန်နေသည်။

အကယ်၍ တစ်နေ့တွင် ယဲ့ဖန်၏ ကျင့်စဉ်မှာ လူတိုင်းကို ကျော်လွန်သွားခဲ့လျှင် သူသည် ထိုမှတ်တမ်းတင်ထားသော အရာများကို လူသိရှင်ကြားထုတ်ပြလိမ့်မည်လား ဒါဟာ နတ်သမီး လင်ယွင်အကြောက်ဆုံး အရာပင် ဖြစ်တော့သည်။