အခန်း (၄၅) ရုပ်ပိုင်းဆိုင်ရာရော စိတ်ပိုင်းဆိုင်ရာပါ နွမ်းနယ်နေရသည့် လင်းကျောင်လန်

နတ်သမီး လင်ယွင်သည် ပါးစပ်ကလေး အဟောင်းသားဖြင့် ခဏမျှ မှင်တက်သွားပြီး ဘာပြောရမှန်း မသိဘဲ ဖြစ်နေရှာသည်။

သူမသည် ဤတပည့်နှစ်ဦး၏ နှလုံးသားထဲတွင် သူမ၏ ပုံရိပ်မှာ မည်သို့သော အခြေအနေမျိုး ဖြစ်နေမည်ကိုပင် မတွေးရဲတော့ပေ။

"ယုရှု... ဆရာမဆီ လာပါဦး ဆရာမ သမီးကို ဖက်ထားပါရစေ" နတ်သမီး လင်ယွန်းသည် လင်ယုရှုကို သူမအနားသို့ ခေါ်ရန် လက်ကမ်းလိုက်သည်။

"မလာချင်ပါဘူး" လင်ယုရှုက နှုတ်ခမ်းကို တင်းတင်းစေ့ကာ ခေါင်းကို ခါယမ်း၍ ခေါင်းမာစွာ ငြင်းဆန်လိုက်သည်။

"ချီအာ... ဆရာမ မှားခဲ့ပါတယ်။ ဆရာမကို ခွင့်လွှတ်ပေးလို့ မရဘူးလား" နတ်သမီး လင်ယွင်သည် ထိုနေရာတွင်ပင် ကျောက်ရုပ်ကဲ့သို့ အကြာကြီး ရပ်နေမိသည်။ နောက်ဆုံးတွင်တော့ သူမသည် မြေပြင်ပေါ်သို့ ဒူးထောက်ကျသွားပြီး မျက်ဝန်းအစုံမှာ မျက်ရည်များဖြင့် ပြည့်နှက်လာတော့သည်။

သူမ၏ လှပလှသော မျက်နှာပြင်မှာလည်း မျက်ရည်များကြောင့် ပေပွကာ နွမ်းလျနေတော့သည်။

"ဒါတွေ အကုန်လုံးက ဆရာမ အမှားတွေပါ။ ဆရာမ မင်းအပေါ် ဒီလိုမဆက်ဆံခဲ့သင့်ဘူး ဆရာမသာ မရှိခဲ့ရင်ချီအာ မင်းဒီမှာ ဒီလောက် ဒုက္ခခံနေရမှာ မဟုတ်ဘူး။

မင်းရဲ့ ဆရာမအနေနဲ့ ငါလည်း ယဲ့ဖန်ရဲ့ လှည့်ကွက်တွေထဲမှာ ကျရောက်ခဲ့ရတာပါ။ ငါလည်း သူ့ရဲ့အကွက်ဆင်မှုကို ခံခဲ့ရတာပါ နတ်သမီး လင်ယွန်းသည် ရှိုက်ကြီးတငင် ငိုကြွေးရင်း ဝမ်းနည်းပက်လက် ပြောနေတော့သည်။

သို့သော်လည်း ရှောင်ချီ နှင့် လင်ယုရှုတို့က တစ်ယောက်ကိုတစ်ယောက် ကြည့်လိုက်ကြပြီး သူတို့၏ မျက်နှာများမှာ အေးစက်မြဲ အေးစက်နေဆဲ ဖြစ်ကာ အနည်းငယ်မျှပင် စိတ်လှုပ်ရှားခြင်း မရှိကြပေ။

သူတို့သည် နတ်သမီး လင်ယွင်အပေါ် မည်သည့် ယုံကြည်မှုမှ မရှိတော့ပေ။ သူတို့၏ စိတ်ထဲတွင် နတ်သမီး လင်ယွင်၏ ယခုကဲ့သို့ အမူအရာပြခြင်းမှာ နောက်ကွယ်တွင် တစ်စုံတစ်ခုသော အစီအစဉ် ရှိနေလိမ့်မည်ဟုသာ ထင်နေကြသည်။

ဒီလို ဟန်ဆောင်နေတာတွေကို ရပ်လိုက်ပါတော့ ခင်ဗျား မှားတာ မမှားတာက ကျွန်တော်နဲ့ ဘာမှမဆိုင်ဘူး။ ယဲ့ဖန်က ခင်ဗျားကို လိမ်တာ မလိမ်တာကလည်း ခင်ဗျားတို့နှစ်ယောက် ကိစ္စပဲ ကျွန်တော်တို့နဲ့ မဆိုင်ဘူး နောင်ကျရင် ကျွန်တော်နဲ့ ကျွန်တော့်ရဲ့ဂျူနီယာညီမလေးနားကို လုံးဝ မလာပါနဲ့တော့ ခင်ဗျားကို မြင်ရတာကိုက စိတ်ကုန်နေပြီ ရှောင်ချီက မျက်နှာသေဖြင့် အေးစက်စွာ ပြောလိုက်သည်။

ထိုမျှအထိ ပြင်းထန်လှသော စကားများကို ကြားလိုက်ရသောအခါ နတ်သမီး လင်ယွင်သည် တစ်ကိုယ်လုံး အေးစိမ့်သွားသလို ခံစားလိုက်ရသည်။

နောက်ဆုံးတော့ သူမသည် လူတိုင်း၏ စွန့်ပစ်ခြင်းကို အမှန်တကယ် ခံလိုက်ရပြီ ဖြစ်သည်။ သူမ၏ အကြီးဆုံးတပည့်မှာ သူမကဲ့သို့ပင် အေးစက်သော စရိုက်ရှိသဖြင့် သူမကို မြင်လျှင်ပင် မည်သည့် အမူအရာမှ ပြလေ့မရှိပေ။

ဒုတိယတပည့်မ (မူဝမ်အာ) ကတော့ ယဲ့ဖန်အတွက်နှင့် သူမကို အကွက်ဆင်ခဲ့ပြီး ယခုအခါ ယဲ့ဖန်၏ ခြေဖဝါးအောက်က ခွေးတစ်ကောင် ဖြစ်နေပြီ။

တတိယတပည့် (ရှောင်ချီ) ကတော့ သူမကို အရိုးထဲထိ နာကျည်းနေပြီး သူမ၏ အသားကို စား၊ အရေကို ဆုတ်ပစ်ချင်လောက်အောင် မုန်းတီးနေသည်။

အငယ်ဆုံးဖြစ်သူ စတုတ္ထတပည့်မလေးမှာလည်း သူမကို မြင်သည့်အခါ မည်သည့် ရင်းနှီးမှုကိုမှ မပြပေ။ စုစုပေါင်း သုံးကြိမ်သာ တွေ့ဖူးကြသဖြင့် ဆရာတပည့် သံယောဇဉ်ဆိုသည်မှာလည်း မရှိသလောက်ပင်။

ငါ အခုချက်ချင်း မဟာအကြီးအကဲဆီ သွားပြီး မင်းကို လွှတ်ပေးဖို့ သွားတောင်းပန်မယ် နတ်သမီး လင်ယွင်သည် တစ်စုံတစ်ခုကို သတိရသွားဟန်ဖြင့် မတ်တပ်ရပ်လိုက်ပြီး ဂူထဲမှ အသည်းအသန် ပြေးထွက်သွားတော့သည်။

ရှောင်ချီကတော့ ထိုထွက်သွားသည့် ပုံရိပ်ကို လှောင်ပြုံးဖြင့်သာ ကြည့်နေလိုက်သည်။

ညီမလေး... တောင်ပေါ်မှာအေးအေးဆေးဆေး ကျင့်ကြံနေပြီး ယဲ့ဖန်တို့နဲ့ သွားမပတ်သက်နဲ့ဦးနော်။ ငါ အပြင်ရောက်လာတဲ့အခါကျရင်တော့ နင်ကြိုက်သလောက် သောင်းကျန်းလို့ရပြီ" ရှောင်ချီက ဝက်ခြေထောက်ကို စားရင်း လင်ယုရှု၏ ဆံပင်တွေကို ပွတ်သပ်ကာ ပြောလိုက်သည်။

သူ၏ လက်ကို ဝိညာဉ်စွမ်းအားဖြင့် ဖုံးအုပ်ထားသဖြင့် ဝက်သားထဲက ဆီတွေမှာ သူ၏ လက်သို့ မထိတွေ့နိုင်ပေ။ လက်အိတ်အကြည်လေးကို စွပ်ထားသလိုပင်။

စီနီယာအစ်ကို... ဆရာမ ဘာဖြစ်တာလဲလို့ ထင်လဲ အရင်တုန်းကဆို ကျွန်မတို့နှစ်ယောက်ကို လုံးဝ ဂရုမစိုက်တဲ့သူလေ အခုလေးတင် ပြခဲ့တဲ့ မျက်နှာထားက ဝိညာဉ်လွင့်နေတဲ့ လူတစ်ယောက်လိုပဲ သို့သော် မိန်းကလေးငယ်၏ စိတ်ထဲတွင်မူ နတ်သမီး လင်ယွန်း ပြသသွားခဲ့သည့် နူးညံ့သော အခြမ်းကိုသာ အာရုံရောက်နေမိသည်။

ဒီလို ဆရာမမျိုးက တကယ်ကို ထူးဆန်းလွန်းလှသဖြင့် လင်ယွင် ဘာတွေဖြစ်နေလဲဆိုတာကို သူမ စဉ်းစားမရဘဲ ဖြစ်နေသည်။ တစ်ချိန်တည်းမှာပင် သူမ၏ အတင်းပြောချင်စိတ်တွေကလည်း တဟုန်းဟုန်း တောက်လောင်လာတော့သည်။

"သူ့ကို ဂရုမစိုက်နဲ့။ ဒါက အစပဲ ရှိသေးတာ သူ နောင်တရရမှာတွေ အများကြီး ကျန်သေးတယ်"

ရှောင်ချီက ခေါင်းကို အသာခါလိုက်သည် လင်ယွင်ဘာကြောင့် ဒီလို ဖြစ်သွားလဲဆိုတာ သူ ခန့်မှန်းမိပါသည်။ ဒါပေမဲ့ ဒါတွေက သူနဲ့ ဘာဆိုင်လို့လဲ။

အခု သူ မျှော်လင့်နေတာက နောက်ထပ် ရှစ်နှစ်ကြာတဲ့အခါ မိုးကြိုးရေကန်ထဲကနေ ထွက်လာပြီး ယဲ့ဖန်ကို ထိပ်တိုက်ရင်ဆိုင်ဖို့ပဲ။

သူ့ရဲ့ သာမန် ခန္ဓာကိုယ်နဲ့ ဒီလို ကောင်းကင်ဘုံက ရွေးချယ်ထားတဲ့ ဇာတ်လိုက်ကို အနိုင်ယူနိုင်မလားဆိုတာ သူသိချင်နေသည်။ ယဲ့ဖန်သည် သူ၏ အရင်ဘဝက အကြီးမားဆုံးသော ရင်ထဲကအမုန်းတရားလည်း ဖြစ်သည်။

အတိတ်ဘဝတုန်းက လင်းကျောင်လန်၏ သစ္စာဖောက်မှု၊ ဂိုဏ်း၏ စွန့်ပစ်မှုနှင့် ယဲ့ဖန်၏ အကွက်ဆင်မှုတွေကြောင့် သူဟာ ချောက်ထဲကို ကျဆင်းသွားခဲ့ပြီး ဘယ်တော့မှ ပြန်မတက်နိုင်ခဲ့ဘူး။ တစ်သက်လုံး ကျင့်ကြံခဲ့သော်လည်း နတ်သန္ဓေအဆင့်ထိသာ ရောက်ခဲ့ရသည်။

ဒီဘဝမှာတော့ သူအစကနေ ပြန်စနေပြီ ကောင်းကင်ဘုံက ရွေးချယ်ထားတဲ့ ဇာတ်လိုက်ကိုတောင် သူ ခြေဖဝါးအောက်မှာ နင်းခြေနိုင်တယ်ဆိုတာကို သူ သက်သေပြချင်နေသည်။

နတ်သမီး လင်ယွင်သည် တောင်နောက်ဘက်သို့ ပြေးသွားပြီး တံခါးပိတ် ကျင့်ကြံနေသော မဟာအကြီးအကဲကို သွားရှာခဲ့သည်။

ဂူဗိမာန်ရှေ့မှာ နာရီဝက်ခန့် စောင့်ဆိုင်းပြီးနောက် မဟာအကြီးအကဲ ယွီရှောင်းထွက်လာသည်ကို တွေ့လိုက်ရသည်။

"လင်ယွင်... ဘာလို့ ဒီကို ရောက်လာတာလဲ မင်းကို တောင်နောက်ဘက်မှာ ယွီရှင်းကို ပြုစုဖို့ ငါ ပြောထားတယ် မဟုတ်လား" မဟာအကြီးအကဲက မျက်မှောင်ကြုတ်ကာ မေးလိုက်သည်။

ကျွန်မ အဒေါ်ရဲ့ ခိုင်းစေချက်အရ ပစ္စည်းဝယ်ဖို့ တောင်အောက်ကို ဆင်းလာတာပါ။ စီနီယာဦးလေး ယွီရှောင်း... ကျွန်မ တောင်းပန်ပါတယ်။ ရှောင်ချီကို ပြန်လွှတ်ပေးပါဦးဒါတွေ အကုန်လုံးက ကျွန်မအမှားတွေပါ ကျွန်မကိုယ်တိုင်ပဲ သူ့ကို မိစ္ဆာဝင်အောင် လုပ်ခဲ့မိတာပါ။

နတ်သမီး လင်ယွင်က သူမ၏ ရင်ဘတ်ကို ဖိကာ နာကျင်စွာ ပြောလိုက်သည်။

ဒါက ဘယ်လိုဖြစ်နိုင်မှာလဲ အဲ့ဒီတုန်းက ငါကိုယ်တိုင် သူ့ကို (၁၃) နှစ် ပြစ်ဒဏ်ပေးခဲ့တာ၊ အဲ့ဒီထဲက သုံးနှစ်က မင်းကိုယ်တိုင် တိုးခဲ့တာလေ အခုမှ ဘာလို့ ဒီလိုမျိုး ပြောင်းလဲချင်နေရတာလဲ ဒါက လုံးဝ မဖြစ်နိုင်ဘူး။

မဟာအကြီးအကဲက ခေတ္တမျှ မှင်တက်သွားသော်လည်း လင်ယွင်၏ ရှင်းပြချက်ကို ကြားပြီးနောက် အေးစက်သော မျက်နှာဖြင့် ချက်ချင်း ငြင်းဆိုလိုက်သည်။

နတ်သမီး လင်ယွင်၏ မျက်နှာမှာ တန့်သွားမိသည် ဟုတ်ပါသည် ရှောင်ချီကို မိစ္ဆာဝင်အောင်တွန်းပို့ခဲ့တာလည်း သူမ၊ မိုးကြိုးနှင်တံနှင့် အချက် (၃၀) အပြင် ပြစ်ဒဏ်ကို နောက်ထပ် သုံးနှစ် တိုးခဲ့တာလည်း သူမကိုယ်တိုင်ပင်။

ဒါတွေ အကုန်လုံးက ဆရာဖြစ်သူ သူမကိုယ်တိုင် လုပ်ခဲ့တာပဲ။ အခုမှ ဘယ်မျက်နှာနဲ့ ဘယ်လို အကြောင်းပြချက်နဲ့ ရှောင်ချီကို ခွင့်လွှတ်ဖို့ တောင်းဆိုရမှာလဲ။

နတ်သမီး လင်ယွင်သည် ထိုနေရာတွင် နာရီဝက်ခန့် ငေးငိုင်စွာ ဒူးထောက်နေမိသည်။ နောက်ဆုံးတွင်တော့ မဟာအကြီးအကဲက သူမကို နှင်ထုတ်လိုက်သဖြင့် သူမသည် ယွီရှင်း၏ ဂူဗိမာန်ဆီသို့ ယိုင်နဲ့နဲ့ ခြေလှမ်းများဖြင့် ပြန်လာခဲ့ရတော့သည်။

တစ်ဂိုဏ်းလုံးမှာ ယွီရှင်းတစ်ယောက်သာ သူမအပေါ် နွေးထွေးမှုပေးနိုင်မည့်သူ ဖြစ်နေတော့သည်။

ဒီကိစ္စပြီးနောက် ယဲ့ဖန်သည် ထိုပုံရိပ်များကို ကျင့်ကြံခြင်းလောကသို့ တကယ် မဖြန့်ဝေခဲ့ပေ သူလည်း မလောင်းရဲသဖြင့် နတ်သမီး လင်ယွင်းနှင့် ထိပ်တိုက်မတွေ့ဘဲ အသာလေး နေနေခြင်း ဖြစ်သည်။

သူ ယုံကြည်နေသည်မှာ ဤသက်သေကို ကိုင်ထားသရွေ့ နတ်သမီး လင်ယွင်သည် သူ့ကို ဆန့်ကျင်ရဲမှာ မဟုတ်သလို အတိတ်က ကိစ္စတွေကိုလည်း မဟာအကြီးအကဲကို တိုင်ရဲမှာ မဟုတ်ဘူးဟူ၍ ဖြစ်သည်။

နောက်ထပ် ရှစ်နှစ် ဆယ်နှစ်လောက်သာ အချိန်ရလျှင် သူ၏ ကျင့်ကြံဆင့်မှာ နတ်သမီး လင်ယွင်ကို ကျော်တက်သွားလိမ့်မည်ဟု သူ ယုံကြည်နေသည်။

နောက်ထပ် အနှစ်နှစ်ဆယ်၊ သုံးဆယ်လောက်သာ ရလျှင် ဝိညာဉ်ဓားဂိုဏ်းက လူတိုင်းကို သူ ခြေဖဝါးအောက်မှာ နင်းခြေထားနိုင်လိမ့်မည်။

အဲ့ဒီအချိန်ကျရင် နတ်သမီး လင်ယွင်က သူ့လက်ထဲက အရုပ်လေး ဖြစ်မသွားပေဘူးလား။

ဒီအတောအတွင်းမှာ လင်းကျောင်လန်သည် ယဲ့ဖန်နှင့် နေ့တိုင်း ရန်ဖြစ်နေရသည်။ ယဲ့ဖန်၏ အမျိုးသမီး မိတ်ဆွေအတော်များများက သူမကို လာရှာကြပြီး ယဲ့ဖန်ကို သူမလက်ထဲက လုယူဖို့ ကြိုးစားနေကြသည် အချို့ကဆို ယဲ့ဖန်ကို သူမနှင့် အတူတူ မျှသုံးဖို့အထိ ဗြောင်ပြောလာကြသည်။

ဒီကိစ္စတွေကြောင့် လင်းကျောင်လန်မှာ သိသိသာသာ ပိန်ကျသွားပြီး ပါးရိုးတွေတောင် ပေါ်လာတော့သည်။ သူမသည် နွမ်းလျနေသော အမျိုးသမီးတစ်ဦးနှင့် တဖြည်းဖြည်း တူလာတော့သည်။

ယဲ့ဖန်သည် နှလုံးသားမရှိသူတော့ မဟုတ်ပေ၊ လင်းကျောင်လန်မှာ သူ၏ ပထမဆုံးသော အမျိုးသမီးဖြစ်ပြီး သူမ၏ အကူအညီများမှာလည်း မရေမတွက်နိုင်အောင် များပြားလှသည်။

လင်းကျောင်လန်သာ မရှိလျှင် သူသည် ကျင့်ကြံခြင်းလောကထဲက သာမန်ကျင့်ကြံသူလေးတစ်ဦးသာ ဖြစ်နေဦးမည်။

ဒါပေမဲ့လည်း ယဲ့ဖန်သည် ဒီရက်ပိုင်းမှာ အတော်လေး စိတ်ကုန်လာရပြီ နွမ်းလျနေတဲ့ အမျိုးသမီးတစ်ယောက်က သူ့နားမှာ နေ့တိုင်း တတွတ်တွတ်နဲ့ အပြစ်ပြောနေပြီး တခြားမိန်းကလေးတွေနဲ့ မပတ်သက်ဖို့ တားမြစ်နေတာဟာ ကောင်းကင်ဘုံက ရွေးချယ်ထားတဲ့ ဇာတ်လိုက်တစ်ယောက်အတွက်တော့ သည်းမခံနိုင်စရာ ဖြစ်နေသည်။

ကံကောင်းထောက်မစွာဖြင့် ယဲ့ဖန်သည် ခရီးထွက်မည်ဟု အကြောင်းပြကာ ဝိညာဉ်ဓားဂိုဏ်းကနေ ထွက်ခွာသွားခဲ့တော့သည်။

လင်းကျောင်လန်က သူနှင့်အတူ လိုက်ချင်သော်လည်း ယဲ့ဖန်၏ ချိုသာသော စကားများကြောင့် ကျန်ရစ်ခဲ့ရသည်။

အပြင်မှာ အန္တရာယ်များလွန်းလှသဖြင့် လင်းကျောင်လန်အနေဖြင့် ဂိုဏ်းမှာပဲ နေခဲ့တာ အကောင်းဆုံးဖြစ်ကြောင်း နောင်ကျရင် သူ့ရဲ့ ကျင့်ကြံအဆင့်က အထွတ်အထိပ် ရောက်သွားတဲ့အခါ လင်းကျောင်လန်ကို တစ်ကမ္ဘာလုံးက အလှအပတွေကို လိုက်ပြမည်ဖြစ်ကြောင်း သူက ချော့မော့ပြောဆိုခဲ့ခြင်း ဖြစ်သည်။