အခန်း (၃၈) သေလုမြောပါးဖြစ်သွားရရှာတဲ့ ရှောင်ချီ

"ဒါ ဘယ်သူ့တပည့်လဲ" မဟာအကြီးအကဲက အသံနက်ကြီးဖြင့် မေးလိုက်ရင်း လင်ယုရှု ကို အေးစက်စွာ တစ်ချက်ကြည့်လိုက်သည်။

မဟာအကြီးအကဲကို တင်ပြရရင် လင်ယုရှုက ကျွန်မရဲ့စတုတ္ထမြောက် တပည့်ပါ မင်းလို ကောင်မလေးကများ မဟာအကြီးအကဲ စကားပြောနေတာကို ကြားဖြတ်ပြောရဲတယ်ပေါ့ အခုချက်ချင်း နောက်ကို ပြန်ဆုတ်စမ်း။

နတ်သမီး လင်ယွင်သည် သူမ၏ ညာဘက်လက်ကို အသာအယာ မြှောက်လိုက်ရာ ဝိညာဉ်စွမ်းအားတစ်ခုက လင်ယုရှုကို ပတ်လည်ဝိုင်းသွားပြီး သူမ၏ ဘေးနားသို့ ဆွဲခေါ်သွားတော့သည်။

ဟက်... မိုးကြိုးနှင်တံ အချက်သုံးဆယ်ပဲဟာ ကြောက်စရာ ဘာရှိလို့လဲ ညီမလေး မင်း ကျင့်ကြံခြင်းကိုပဲ အာရုံစိုက်ထားပါ စီနီယာအစ်ကို မိုးကြိုးရေကန်ကနေ ပြန်ထွက်လာတဲ့အခါ မင်းအတွက် လက်ဆောင်တစ်ခု ယူလာခဲ့မယ် ရှောင်ချီက လှောင်ပြုံးပြုံးလိုက်သည်။ ပလ္လင်မြင့်ပေါ်က မဟာအကြီးအကဲကို ကြည့်နေသော သူ၏လေသံမှာ တည်ငြိမ်လွန်းလှသည်။

"မင်းမှာ တကယ့်ကို သတ္တိရှိတာပဲ သူ့ကို ခေါ်သွားကြ" မဟာအကြီးအကဲက ကျေနပ်စွာ ခေါင်းညိတ်ပြီး လက်ဝှေ့ယမ်းလိုက်ရာ စည်းကမ်းထိန်းသိမ်းရေး ခန်းမမှ တပည့်အချို့က ရှောင်ချီကို ဖမ်းဆီးပြီး ခန်းမအပြင်ဘက်သို့ တရွတ်တိုက် ဆွဲခေါ်သွားကြတော့သည်။

ရှောင်ချီကို သေသေချာချာ တုတ်နှောင်ပြီးနောက် လူအချို့က သူနှင့် အလွန်ရင်းနှီးနေသည့် အနက်ရောင် နှင်တံကြီးကို ထုတ်ယူလာကြသည်။

လျှပ်စီးလက်နေသော အနက်ရောင် နှင်တံကြီးသည် ရှောင်ချီ၏ ကိုယ်ပေါ်သို့ ပြင်းထန်စွာ ကျရောက်လာသည်။ လေထဲတွင် လျှပ်စီးကြောင်းများ တဖျတ်ဖျတ် ထွက်ပေါ်လာပြီး ရှောင်ချီ၏ အသားများကို လွှာပစ်ကာ အဝတ်အစားများကိုလည်း အစုတ်စုတ်အပြတ်ပြတ် ဖြစ်သွားစေတော့သည်။

လင်ယုရှုသည် ခန်းမအပြင်ဘက်က သနားစဖွယ် ပုံရိပ်ကိုကြည့်ကာ နတ်သမီး လင်ယွင်၏ ချုပ်နှောင်မှုမှ ရုန်းထွက်ရန် ကြိုးစားနေရှာသည်။ သို့သော် သူမ၏ အင်အားက သိပ်နည်းလွန်းလှရာ ဘယ်လိုပင် ရုန်းကန်စေကာမူ မလွတ်မြောက်နိုင်ခဲ့ပေ။

နတ်သမီး လင်ယွင်သည် အစွမ်းကုန် ရုန်းကန်နေသော မိန်းကလေးငယ်ကို ကြည့်ရင်း သူမ၏ အတွေးများက နယ်ချဲ့လာသည်။

ကြည့်ရတာ ဒီရှောင်ချီမှာ တစ်ဂိုဏ်းလုံးမှာ ဒီကောင်မလေး တစ်ယောက်ပဲ သူငယ်ချင်း ရှိပုံရတယ်။ ဆယ့်သုံးနှစ်ဆိုတာ တကယ့်ကို ရှည်လျားတဲ့ အချိန်ပဲ ရှောင်ချီ ပြန်ထွက်လာတဲ့ အချိန်ကျရင် ဒီကောင်မလေးကို ယဉ်ကျေးလိမ္မာတဲ့သူဖြစ်အောင် ငါ သေချာဆုံးမထားမယ်။

ရှောင်ချီကို မြင်တာနဲ့ ရှောင်သွားအောင် ငါ သေချာလုပ်ထားမယ် အဲ့ကျရင် သူဟာ တစ်ဂိုဏ်းလုံးမှာ သူငယ်ချင်းတစ်ယောက်မှ မရှိတဲ့သူ ဖြစ်သွားလိမ့်မယ်။

နတ်သမီး လင်ယွင်သည် သူမ၏ စိတ်ထဲ၌ နောက်ထပ် ဆယ့်သုံးနှစ်အတွက် လင်ယုရှုကို မည်သို့ ပြုစုပျိုးထောင်မည်ဆိုသည်ကို ကြိုတင် စီစဉ်ထားပြီး ဖြစ်သည်။

ဖြန်း... ဖြန်း... ဖြန်း... နှင်တံရိုက်သံများက ခန်းမအပြင်ဘက်တွင် စည်းချက်ကျကျ ထွက်ပေါ်နေသော်လည်း ခန်းမအတွင်းသို့ အော်ဟစ်သံ တစ်စွန်းတစ်စမျှ မကြားရပေ။

အပြင်ဘက်တွင်မူ ရှောင်ချီသည် သွားကို တင်းတင်းကြိတ်ထားရသဖြင့် သွားများပင် တုန်ယင်ကာ သွေးများ ထွက်နေရှာသည်။

"ဒီကောင်လေးက တကယ်ကို ခံနိုင်ရည်ရှိပြီး ဇွဲကောင်းလွန်းတယ် ဝိညာဉ်ဓားဂိုဏ်းအပေါ် ထားတဲ့ သူ့ရဲ့အမုန်းတရားနဲ့ ပေါင်းစပ်လိုက်ရင် နောင်တစ်ချိန်မှာ ငါတို့အတွက် ခြိမ်းခြောက်မှု ဖြစ်လာနိုင်တယ်" ဂိုဏ်းချုပ် ဝူတောက်စီသည် မထွက်သွားသေးဘဲ မဟာအကြီးအကဲ၏ ဘေးနား၌ ရပ်ကာ တိုးတိုးလေး ကပ်ပြောလိုက်သည်။

ဓားတစ်လက်ရဲ့ အသွားဟာ သွေးမှ ထက်မြက်လာတာပဲ ဇီးပန်းရဲ့ ရနံ့ဟာလည်း ခါးသီးတဲ့ အအေးဒဏ်ကို ခံနိုင်မှ ပေါ်ထွက်လာတာ အခက်အခဲတွေကို မဖြတ်ကျော်ဘဲနဲ့ အားလုံးရဲ့ အထက်မှာ ရှိနေမယ့် နတ်ဘုရားသတ်ဓားဘယ်လိုလုပ် ဖြစ်လာနိုင်မှာလဲ။

ရိုင်းစိုင်းတဲ့ မြင်းတစ်ကောင်ကို ယဉ်ပါးလာအောင်ပြင်းထန်တဲ့ နည်းလမ်းတွေ သုံးရတာ သဘာဝပဲ အကယ်၍ ငါတို့က နာခံမှုမရှိတဲ့ တပည့်တိုင်းကို ချက်ချင်းသတ်ပစ်မယ်ဆိုရင် ဂိုဏ်းက ဘယ်လိုလုပ် တိုးတက်မှာလဲ ဒါ့အပြင် ရှောင်ချီက အကန့်အသတ်မရှိတဲ့ ပါရမီရှင် တစ်ယောက်ပဲ။

"သူသာ ကြီးပြင်းလာနိုင်မယ်ဆိုရင် ဂိုဏ်းအတွက် တကယ့်ကို အားကိုးရတဲ့ လက်နက်တစ်ခု ဖြစ်လာမှာပဲ" မဟာအကြီးအကဲက ဝူတောက်စီကို တစ်ချက်ကြည့်ကာ အေးစက်စွာ ပြောလိုက်သည်။

မဟာအကြီးအကဲ၏ ပြတ်သားသော သဘောထားကို မြင်လိုက်ရသဖြင့် ဝူတောက်စီသည် လက်အုပ်ချီ ဦးညွှတ်ကာ နောက်သို့ ဆုတ်လိုက်ရပြီး ဘာမှ ထပ်မပြောရဲတော့ပေ။

မိုးကြိုးနှင်တံ အချက်သုံးဆယ် ပြစ်ဒဏ်မှာ မကြာခင်မှာပင် ပြီးဆုံးသွားသည်။ စည်းကမ်းထိန်းသိမ်းရေး ခန်းမမှ တပည့်နှစ်ဦးက ရွှံ့နွံလို ပျော့ခွေနေပြီး သွေးချင်းချင်းနီနေသော ရှောင်ချီကို ခန်းမအတွင်းသို့ ပြန်လည် ဆွဲခေါ်လာကြသည်။

ရှောင်ချီ၏ ဒဏ်ရာဗရပွနှင့် ပုံစံကို မြင်လိုက်ရသောအခါ လင်ယုရှုမှာ မထိန်းနိုင်တော့ဘဲ ငိုကြွေးရှာတော့သည်။ သူမသည် အသံမထွက်အောင် ပါးစပ်ကို ပိတ်ထားသော်လည်း သူမ၏ နှလုံးသားမှာမူ အကြီးအကဲ နာကျင်နေရသည်။

သူမသည် သူမ၏ နောက်ကွယ်က အမျိုးသမီး (လင်ယွန်း) ကို လှည့်ကြည့်လိုက်ရာ သူမ၏ ရင်ထဲတွင်ကြောက်မက်ဖွယ်ကောင်းသော အမုန်းတရားများ စတင် ပေါက်ဖွားလာတော့သည်။

သူမ၏ စီနီယာအစ်ကိုကို မိစ္ဆာလမ်းစဉ်ထဲ ကျရောက်အောင် တွန်းပို့ခဲ့တာလည်း ဒီမိန်းမပဲ စီနီယာအစ်ကို အကူအညီ အလိုအပ်ဆုံး အချိန်မှာ သူမကို တားဆီးထားခဲ့တာလည်း ဒီမိန်းမပဲ။

မိန်းကလေးငယ်သည် ဂိုဏ်းသို့ ဝင်ရောက်သည်မှာ တစ်နှစ်ခန့်သာ ရှိသေးသည်။

သူမဝင်လာပြီးနောက် နတ်သမီး လင်ယွင်သည် ကျင့်စဉ်တစ်ခုကို သူမဆီ ပစ်ပေးပြီး ပစ်ထားခဲ့သည်။ တစ်နှစ်အတွင်းမှာ သူတို့ သုံးကြိမ်သာ တွေ့ဖူးကြသည်။ လင်ယုရှုသည် သူမ၏ဆရာအပေါ် ဘာသံယောဇဉ်မှ မရှိပေ။

ဒီတစ်နှစ်အတွင်းမှာ သူမ၏ စားဝတ်နေရေးကို ဂရုစိုက်ပေးပြီး ကျင့်စဉ်တွေကို သေသေချာချာ ရှင်းပြပေးခဲ့တာက သူမ၏ စီနီယာအစ်ကို ရှောင်ချီသာ ဖြစ်သည်။

သူမ၏ စီနီယာအစ်ကို ရှိနေခဲ့ခြင်းကြောင့်သာ သူမ၏ အိမ်လွမ်းစိတ်တွေ တဖြည်းဖြည်း ပျောက်ကွယ်သွားခဲ့ရခြင်းဖြစ်သည်။

ယခုအခါ အမြဲတမ်း ပြုံးရွှင်ပြီး သဘောကောင်းလှသော စီနီယာအစ်ကိုမှာ ဤကဲ့သို့ သနားစဖွယ် အခြေအနေသို့ ရောက်သွားသည်ကို မြင်လိုက်ရသောအခါ သူမ၏ ရင်ထဲက အမုန်းတရားများမှာ တားဆီး၍မရအောင် ပေါက်ကွဲထွက်လာတော့သည်။

သို့သော်လည်း သူမသည် ချက်ချင်း ထပ်မတုံ့ပြန်ခဲ့ပေ။ သူမသည် ယခုအချိန်တွင် အလွန်အားနည်းနေသေးကြောင်း သိသဖြင့် အလိုက်သင့်သာ နေလိုက်ရသည်။

သူမ အစွမ်းထက်လာသည့် တစ်နေ့ကျမှ ဤမိန်းမ၏အရိုးတွေကို ပြာဖြစ်အောင် လုပ်ပြီး စီနီယာအစ်ကိုအတွက် လက်စားချေမည်ဟု စိတ်ထဲက ကျိန်ဆိုလိုက်တော့သည်။

"ရှောင်ချီ... ဒီနေ့ရဲ့ ပြစ်ဒဏ်ကို မင်း လက်ခံသလား" အထက်မှ မဟာအကြီးအကဲ၏ အသံမှာ ဘာခံစားချက်မှ မပါဘဲ အေးစက်စွာ ထွက်ပေါ်လာသည်။ ဂိုဏ်း၏ အင်အားအကောင်းဆုံး ကျွမ်းကျင်သူဖြစ်သည့်အတိုင်း သူ၏ စကားမှာ အမိန့်ပင် ဖြစ်သည်။

"လက်ခံတာပေါ့... သေချင်းဆိုးရဲ့" ရှောင်ချီတွင် အင်အား မရှိတော့ပေ။ သူသည် မြေပြင်ပေါ်တွင် ဝပ်နေရင်း ခေါင်းကို ခက်ခဲစွာ မော်ကြည့်လိုက်သည်။

မျက်လုံးထဲသို့ စီးကျနေသော သွေးများကြားမှ ပလ္လင်ပေါ်က ခန့်ညားသော ပုံရိပ်ကို စိုက်ကြည့်ကာ သွေးတစ်ချက် အန်ထုတ်ပြီး ခက်ခက်ခဲခဲ ပြောလိုက်သည်။

"သူကတော့ တကယ်ကို ယဉ်ပါးအောင် လုပ်ဖို့ ခက်တာပဲ ကောင်းပြီ သူ့ကို မိုးကြိုးရေကန်ထဲကို ပစ်ထည့်လိုက်ကြ" မဟာအကြီးအကဲက အနည်းငယ် ပြုံးလိုက်ပြီး စည်းကမ်းထိန်းသိမ်းရေး တပည့်နှစ်ဦးကို ရှောင်ချီအား ဝိညာဉ်ဓားဂိုဏ်း၏ အကြောက်စရာအကောင်းဆုံး နေရာဖြစ်သည့် မိုးကြိုးရေကန်သို့ ခေါ်သွားရန် အမိန့်ပေးလိုက်တော့သည်။

ရှောင်ချီ၏ ခန္ဓာကိုယ်ကို ခန်းမအပြင်သို့ ဆွဲခေါ်သွားရာ သွေးစွန်းသော လမ်းကြောင်းတစ်ခု ကျန်ရစ်ခဲ့သည်။

"ခဏနေရင် ခန်းမကို သန့်ရှင်းရေး လုပ်ခိုင်းလိုက်ပါ။ လင်ယွင်၊ ဝူတောက်စီ မင်းတို့ နှစ်ယောက်လည်း ပြစ်ဒဏ်ပေးတဲ့ နေရာကို သွားပြီး ပြစ်ဒဏ်ကို ခံယူကြ" မဟာအကြီးအကဲသည် ခန်းမအတွင်းရှိ သွေးကွက်များကို ကြည့်ကာ လင်ယွင်နှင့် ဝူတောက်စီကို အမိန့်ပေးလိုက်သည်။

ထိုနှစ်ဦးစလုံးသည် ချက်ချင်းပင် ဦးညွှတ်ပြီး နန်းတော်မှ ထွက်ခွာကာ တောင်နောက်ဘက်သို့ ဦးတည်သွားကြတော့သည်။

မဟာအကြီးအကဲက ကျေနပ်စွာ ခေါင်းညိတ်လိုက်ပြီးနောက် သူ၏ ပုံရိပ်မှာလည်း နန်းတော်ထဲမှ ပျောက်ကွယ်သွားတော့သည်။

ကျန်ရှိနေသော အကြီးအကဲများနှင့် တောင်ထိပ်သခင်နှစ်ဦးမှာမူ ဖြစ်ပျက်သွားသည့် ကိစ္စကြီးများအကြောင်း တိုးတိုးတိုးတိုးဖြင့် ဆွေးနွေးနေကြတော့သည်။

ဂိုဏ်းအတွင်း၌ အပြောင်းအလဲကြီးတစ်ခု ဖြစ်ပေါ်တော့မည်မှာ အသေအချာပင်။

ခန်းမအတွင်း၌ ဖြစ်ပျက်ခဲ့သည့် ကိစ္စများသည် မိုးအပြီး မှိုတက်သလိုပင် တစ်ဂိုဏ်းလုံးသို့ လျင်မြန်စွာ ပျံ့နှံ့သွားသည်။ သုံးရက်အတွင်းမှာပင် တစ်ဂိုဏ်းလုံး၌ ဤထူးဆန်းသော ဖြစ်ရပ်များအကြောင်းသာ ပြောနေကြတော့သည်။

လူတွေ အပြောအများဆုံးနှင့် အနှစ်သက်ဆုံး ကိစ္စမှာ နတ်သမီး လင်ယွင်နှင့် ယဲ့ဖန်တို့၏ အဆင့်အတန်းနှင့် အသက်အရွယ်ကို ကျော်လွန်သော တားမြစ်ထားသည့် အချစ်ဇာတ်လမ်းပင်ဖြစ်သည်။

ရက်အနည်းငယ်သာ ရှိသေးသော်လည်း ဤဇာတ်လမ်းနှင့် ပတ်သက်၍ ပုံစံပေါင်း ဆယ်မျိုးမက ထွက်ပေါ်နေသည်။ အချို့က ယဲ့ဖန်သည် အတင်းအကျပ် ခံလိုက်ရခြင်းဖြစ်သည်ဟု ဆိုကြသည်။

အချို့ကလည်း ယဲ့ဖန်သည် နတ်သမီး လင်ယွင် အဆိပ်မိနေချိန်တွင် အခွင့်ကောင်းယူပြီး သူမကို စော်ကားခဲ့ခြင်းဖြစ်သည်ဟု ဆိုကြသည်။

နောက်ထပ် အချို့ကမူ ထိုနှစ်ဦးမှာ ဟိုးအရင်ကတည်းက တစ်ဦးကိုတစ်ဦး သဘောကျနေကြခြင်းဖြစ်ပြီး မိစ္ဆာတွေ တိုက်ခိုက်တာနှင့် အဆိပ်မိတာတွေမှာ သူတို့၏ အချစ်ဇာတ်လမ်းအတွက် အကြောင်းပြချက် ပေးခဲ့ခြင်းသာ ဖြစ်သည်ဟု ဆိုကြပြန်သည်။

မည်သို့ပင်ဆိုစေကာမူကောလာဟလများမှာအရှိန်အဟုန်ပြင်းစွာပျံ့နှံ့နေပြီးအတင်းအဖျင်းများမှာအထွတ်အထိပ်သို့ရောက်ရှိနေတော့သည်။