အခန်း (၃၇)  ချင်းချီတောင်ထိပ်၏ လင်းယွီကျိရန်

ဒီကိစ္စက မင်းအပြစ်မဟုတ်ဘူးဆိုတာ ငါသိပါတယ်။ မင်းက ဂိုဏ်းအတွက် အလုပ်အကျွေးပြုရင်း ချုံခိုတိုက်ခိုက်ခံရတာဆိုတော့ ဂိုဏ်းကပဲ မင်းကို ကျေးဇူးတင်ရမှာပါ။

ဒါပေမဲ့ မင်းရဲ့ တပည့်အပေါ် ဆက်ဆံပုံကတော့ တကယ်ကိုမှားယွင်းခဲ့တယ်။ ရှောင်ချီက မောက်မာတယ် ရိုင်းစိုင်းတယ်ဆိုတာ မှန်နိုင်ပေမဲ့ သူ့အပြစ်က ခွင့်မလွှတ်နိုင်စရာတော့ မဟုတ်ပါဘူး။

ဂိုဏ်းတူညီအစ်ကိုတွေကို ရိုက်နှက်တာနဲ့ သေရေးရှင်ရေး စိန်ခေါ်ပွဲကို ကိုယ်တိုင်ဆုံးဖြတ်တာတွေက မဖြစ်သင့်ဘူးဆိုတာ မှန်တယ်။ ဒါပေမဲ့ ဂိုဏ်းချုပ်က ပြစ်ဒဏ်ပေးပြီးသားပဲ မဟုတ်လား။ မိုးကြိုးနှင်တံ အချက် ၂၀ နဲ့ စည်းကမ်းထိန်းသိမ်းရေး အကြီးအကဲက ထပ်တိုးလိုက်တဲ့ အချက် ၁၀၀... ဒါတွေက မလုံလောက်သေးဘူးလား မင်းက သူ့ဆရာဖြစ်ပြီးတော့မှ ကိုယ်တိုင်ကိုယ်ကျ ကျင့်ကြံဆင့်ကို ဖျက်ဆီးပြီး ဂိုဏ်းကနှင်ထုတ်မှ ကျေနပ်မှာလား။

မဟာအကြီးအကဲသည် ခန္ဓာကိုယ် အနည်းငယ် အားနည်းနေဆဲဖြစ်သော နတ်သမီး လင်ယွင်ကို ကြည့်ကာ ခေါင်းညိတ်လိုက်သည်။ သူမကို အလွန်အမင်း အပြစ်တင်ရန် ရည်ရွယ်ချက်မရှိသော်လည်း တပည့်အပေါ် ထားရှိသော သူမ၏ သဘောထားကိုတော့ ပြင်ဆင်ရန် သတိပေးလိုက်ခြင်း ဖြစ်သည်။

ဤဖြစ်ရပ်နှစ်ခုကို ပေါင်းစပ်ကြည့်လိုက်လျှင် မျက်စိရှိသူတိုင်း မြင်နိုင်ပါသည်။ နတ်သမီး လင်ယွင်သည် သူမ၏ ချစ်သူအတွက် လက်စားချေပေးချင်နေခြင်းသာဖြစ်ပြီး သူမချစ်သူ၏ရင်ထဲက အာဃာတတွေကို ဖြေဖျောက်ရန်အတွက် ဤတပည့်ကို အသုံးမကျသလို စွန့်ပစ်ချင်နေခြင်း ဖြစ်သည်။

သို့သော်လည်း လူတိုင်းက သိနေသော်လည်း ဘယ်သူမှထုတ်မပြောကြပေ ဘာပဲဖြစ်ဖြစ် သူတို့အားလုံးက လုပ်ဖော်ကိုင်ဖက်တွေ ဖြစ်ကြပြီး နေ့တိုင်း မျက်နှာချင်းဆိုင်နေရသူများ ဖြစ်သဖြင့် အခြေအနေကို တင်းမာအောင် မလုပ်လိုကြခြင်း ဖြစ်သည်။ ဒီကိစ္စက သူတို့နဲ့လည်း တိုက်ရိုက်မသက်ဆိုင်သဖြင့် ပွဲကြည့်ရုံသာ ကြည့်နေကြသည်။

"ဒီကိစ္စက ဒီအဆင့်အထိ ရောက်လာတာ မင်းတို့အားလုံးမှာ တာဝန်ရှိတယ်။ အထူးသဖြင့် ဂိုဏ်းချုပ် ဝူတောက်စီ  မင်းက ငါ့ကို တကယ်ပဲ စိတ်ပျက်စေတယ်။

မဟာအကြီးအကဲသည် အမြင့်ဆုံး ပလ္လင်ပေါ်သို့ ပေါ့ပါးစွာ ခုန်တက်လိုက်ပြီး ဖြည်းဖြည်းချင်း ထိုင်လိုက်သည်။

သူသည် အောက်ဘက်ရှိ အကြီးအကဲများ၊ အသိစိတ် ပြန်လည်ကြည်လင်လာသော ရှောင်ချီနှင့် ဘေးတွင် တိတ်ဆိတ်စွာ ရပ်နေသော ဂိုဏ်းချုပ်တို့ကို ကြည့်ကာ ပြင်းထန်စွာ ပြစ်တင်မောင်းမဲလိုက်သည်။

"ဒါတွေအားလုံးက ကျွန်တော့်အမှားတွေပါပဲ။ ကျေးဇူးပြုပြီး ကျွန်တော့်ကို အပြစ်ပေးပါ ဘိုးဘေးကြီး" ဝူတောက်စီသည် ဘိုးဘေးကြီးကို မော့မကြည့်ရဲဘဲ ခေါင်းကို ငုံ့ထားမိသည်။

အကြောင်းပြချက်တွေ ဘယ်လိုပဲရှိရှိ ရှောင်ချီ မိစ္ဆာပူးကပ်သွားတာကတော့ အရှိတရားပဲ။ မိစ္ဆာပူးတဲ့ တပည့်တွေအတွက် ဂိုဏ်းမှာ သီးခြားပြစ်ဒဏ်တွေ ရှိတယ်။ ရှောင်ချီရဲ့ စိတ်မိစ္ဆာကို ဖယ်ရှားဖို့အတွက် သူ့ကို မိုးကြိုးရေကန်ထဲမှာ ဆယ်နှစ်ကြာ အကျဉ်းချထားမယ်။ ဒါမှပဲ သူ့ရင်ထဲက မိစ္ဆာမီးတွေနဲ့ သူ့ကိုယ်ပေါ်က မိစ္ဆာအငွေ့အသက်တွေကို သန့်စင်နိုင်လိမ့်မယ်။

ဂိုဏ်းချုပ်ကတော့ သူ့ရဲ့ တာဝန်တွေကို အကြိမ်ကြိမ် ပျက်ကွက်ခဲ့ပြီး ငါ့ကို အကြီးအကျယ် စိတ်ပျက်စေခဲ့တယ်။ ဒါကြောင့် မင်းကို ဂိုဏ်းချုပ်ရာထူးကနေ ယာယီ ရပ်စဲလိုက်ပြီ  တောင်နောက်ဘက်က နံရံကြည့်တရားအားထုတ်ရာ ချောက်ကမ်းပါးမှာ ဆယ်နှစ်ကြာ အမှားကို ပြန်လည်သုံးသပ်ဖို့ အမိန့်ချမှတ်လိုက်တယ်။

"ချင်းချီတောင်ထိပ်ရဲ့ လင်းယွီကျိရန်ကို ဂိုဏ်းချုပ်အဖြစ် ယာယီ ခန့်အပ်လိုက်မယ်"

လင်ယွင်ကတော့ တပည့်ကို ဆုံးမရာမှာ ပျက်ကွက်ခဲ့သလို အမှားအမှန်ကိုလည်း မခွဲခြားနိုင်ဘူး။ သူမဟာ ဆရာတစ်ယောက် ဖြစ်ဖို့ မထိုက်တန်သေးဘူး ဒါကြောင့် သူမကို ယွီရှင်းဆီမှာ ဆယ်နှစ်ကြာ အစေခံအဖစ်ေနရမယ်။

ဆရာကို ရိုသေတဲ့ တရားနဲ့ တပည့်ကို ဆုံးမတဲ့ တရားတွေကို သူမ သေချာ နားလည်သွားအောင် လုပ်ခိုင်းလိုက် ဂိုဏ်း၏ အမြင့်ဆုံးနေရာတွင် ထိုင်ရင်း မဟာအကြီးအကဲက အေးအေးဆေးဆေးပင် အမိန့်များ ထုတ်ပြန်လိုက်သည်။

သူ စကားတစ်ခွန်း ပြောလိုက်တိုင်း အောက်က လူတွေမှာ အသက်ရှူမှားရလောက်အောင် အံ့ဩနေကြသည်။ သူ ထုတ်ပြန်လိုက်တဲ့ အမိန့်တိုင်းဟာ ဂိုဏ်းတစ်ခုလုံးကို တုန်လှုပ်စေမယ့် ကိစ္စတွေချည်း ဖြစ်နေသည်။

မိုးကြိုးရေကန် ဆိုတာ ဘယ်လိုနေရာမျိုးလဲ အဲ့ဒါဟာ ဂိုဏ်းရဲ့ အလျှို့ဝှက်ဆုံးနဲ့ အန္တရာယ်အရှိဆုံး နေရာပဲ အဲ့ဒီထဲမှာ ဆယ်နှစ်နေရမယ်ဆိုရင် စိတ်မိစ္ဆာကို ဖယ်ရှားနိုင်တာ မှန်ပေမဲ့ မိုးကြိုးတွေရဲ့ ဒဏ်ကြောင့် အရိုးတောင် မကျန်ဘဲ ဝိညာဉ်ပါ ပျောက်ကွယ်ပြီး ခန္ဓာကိုယ် ပြာဖြစ်သွားနိုင်တဲ့ နေရာမျိုးပါ။

အစောပိုင်းက ဘိုးဘေးကြီးရဲ့ သဘောထားက ရှောင်ချီဘက်ကို ပါနေသလိုပဲ မဟုတ်လား အခုကျမှ ဘာလို့ ဒီလောက် ပြင်းထန်တဲ့ ပြစ်ဒဏ် ပေးလိုက်ရတာလဲ။

ထို့အပြင် ဤလင်းယွီကျိရန်ဆိုသူမှာလည်း ဂိုဏ်းအတွင်း၌ လူ့လောကသို့ ဆင်းသက်လာသော နတ်သားဟု တင်စားခံရသူ တစ်ဦးဖြစ်သည်။

သူသည် ဂိုဏ်းချုပ်နှင့် နတ်သမီး လင်ယွင်တို့နှင့် တစ်ဆက်တည်းဖြစ်သော်လည်း သူ၏ အစွမ်းမှာ မဟာအကြီးအကဲ အချို့နှင့်ပင် ရင်ပေါင်တန်းနိုင်သည်။ သူသည် တောင်နောက်ဘက်တွင် တစ်ဦးတည်း တရားအားထုတ်နေသူဖြစ်ပြီး အပြင်သို့ ထွက်ခဲလှသည်။

အကယ်၍သူသာ ဂိုဏ်းချုပ် ဖြစ်ချင်ခဲ့လျှင် ဝူတောက်စီအတွက် အခွင့်အရေး လုံးဝ ရှိမည်မဟုတ်ပေ။ ထိုစဉ်ကတည်းက သူသည် အကောင်းဆုံးလောင်းလျာဖြစ်ခဲ့သည်။

လင်းယွီကျိရန်သည် အာဏာကို မမက်မောဘဲ ခက်ခဲသော ကျင့်ကြံခြင်းတွင်သာ နစ်မြောနေလိုသူ ဖြစ်သဖြင့် ဂိုဏ်းအကြီးအကဲများကလည်း သူ့ကို အတင်းအကျပ် မတိုက်တွန်းခဲ့ကြပေ။

ယခု သူ့ကိုထုတ်သုံးလိုက်ပြီ ဆိုကတည်းက ဂိုဏ်း၏ အုပ်ချုပ်ရေး ယန္တရားမှာ အပြောင်းအလဲကြီး တစ်ခု ဖြစ်တော့မည်မှာ သေချာသည်။

ထို့အပြင် လင်းယွီကျိရန်တွင် နောက်ထပ် အဆင့်အတန်းတစ်ခု ရှိသေးသည် သူသည် အောက်တွင် အလင်းတန်းများအကြား ရှိနေသော အမျိုးသမီး (လင်ယွန်း) ၏ စီနီယာအစ်ကိုလည်း ဖြစ်သည်။

လင်းယွီနှင့် လင်ယွင်တို့သည် ကျင့်ကြံခြင်းလောက၏ အလားအလာအရှိဆုံး မျိုးဆက်သစ်များ ဖြစ်ခဲ့ကြသည်။ ဟိုးအရင်က ဆရာတူ မောင်နှမနှစ်ယောက်ကြားက ဆက်ဆံရေးမှာ အလွန်ကောင်းမွန်ခဲ့သော်လည်း ဆရာဖြစ်သူ ကွယ်လွန်သွားပြီးနောက်ပိုင်းတွင် သူတို့နှစ်ဦးမှာ တွေ့ဆုံမှု နည်းပါးသွားခဲ့သည်။

နတ်သမီး လင်ယွင်သည် တစ်ချိန်က လင်းယွီကျိရန်ကို စိတ်ကူးရှိခဲ့ဖူးသည်ဟု ကောလာဟလများ ရှိခဲ့သော်လည်း အမှန်တရားကိုတော့ မည်သူမှ မသိကြပေ။

ယခု အတင်းအဖျင်းများကြားတွင် လင်းယွီကျိရန် ဂိုဏ်းချုပ်အဖြစ် ပြန်ပေါ်လာခြင်းမှာ ဂိုဏ်းအတွင်း အပြောင်းအလဲ၏ လေပြင်းများ စတင်တိုက်ခတ်တော့မည်ကို ပြသနေသည်။

မဟာအကြီးအကဲ ပြောသွားသော ယွီရှင်းဆိုသူမှာလည်း သာမန်လူ မဟုတ်ပေ သူမသည် မဟာအကြီးအကဲ၏ ဂျူနီယာညီမဖြစ်သလို ဒုတိယ မဟာအကြီးအကဲ ဖြစ်သော ဘိုးဘေး ယွီရှင်းပင် ဖြစ်သည်။

နတ်သမီး လင်ယွန်းကို ဒုတိယ မဟာအကြီးအကဲထံ အစေခံခိုင်းခြင်းမှာ သိသာထင်ရှားသော ဆိုလိုရင်းများ ရှိသော်လည်း အနည်းငယ်တော့ ဇဝေဇဝါ ဖြစ်စေသည်။

အပြင်ပန်းတွင် သူသည် ရှောင်ချီဘက်က ပါသလို ရှိသော်လည်း ရှောင်ချီကို မိုးကြိုးရေကန်ထဲမှာ ဆယ်နှစ်ကြာအောင် နေခိုင်းလိုက်သည်။

နတ်သမီး လင်ယွင်ကို အပြစ်ပေးသလို ရှိသော်လည်း အကြီးအကဲတစ်ဦးဆီမှာ အစေခံခိုင်းခြင်းမှာ သူမအတွက် နောက်ခံအင်အားတစ်ခုကို ဟန်ဆောင်ရှာပေးလိုက်သလိုပင် ဖြစ်နေသည်။

အဓိကအချက်မှာ နတ်သမီး လင်ယွင်၏ စီနီယာအစ်ကိုမှာ ဂိုဏ်းချုပ်ရာထူးကို ရတော့မည် ဖြစ်ခြင်းပင်။

ဤစီစဉ်မှုများကြောင့် ထိုင်နေကြသော အကြီးအကဲများနှင့် အခြားတောင်ထိပ်သခင်နှစ်ဦးမှာပင် မျက်စိလည်သွားကြတော့သည်။

ရှောင်ချီသည် ဤလင်းယွီကို မှတ်မိသေးသည် လင်းယွီကျိရန်၏ အစွမ်းနှင့်ဆိုလျှင် ထိုစဉ်က ဂိုဏ်း၏ ဘေးဒုက္ခကြီးအတွင်း၌ သူတစ်ယောက်တည်းလွတ်အောင် ပြေးနိုင်ခဲ့ပါမည်။

သို့သော် နောက်ဆုံးတွင် သူသည် မိမိကိုယ်ကိုယ် ဖောက်ခွဲဖျက်ဆီးပြီး ဝိညာဉ်ဓားဂိုဏ်း၏ မျိုးဆက်သစ်များအတွက် မျှော်လင့်ချက် အလင်းတန်းတစ်ခုကို ချန်ထားပေးခဲ့သည်။

လင်းယွီကျိရန်၏ ပြတ်သားသော ဆုံးဖြတ်ချက်ကြောင့်သာ တိုက်ပွဲတစ်ခုလုံး၏ အခြေအနေမှာ ပြောင်းလဲသွားခဲ့ရသည်။ ယဲ့ဖန်တို့တစ်စု လွတ်မြောက်သွားရုံသာမက ရှောင်ချီနှင့် အခြားတပည့်အချို့ပါ စစ်မြေပြင်ကနေ ထွက်ပြေးခွင့် ရခဲ့ခြင်း ဖြစ်သည်။

"ရှောင်ချီ ငါပေးတဲ့ ပြစ်ဒဏ်အပေါ် မင်းမှာ ကန့်ကွက်စရာ ရှိသလား" မဟာအကြီးအကဲသည် ခန်းမအောက်ရှိ ရှောင်ချီကို ကြည့်ကာ ဟိန်းဟောက်သော အသံဖြင့် မေးလိုက်သည်။

"တပည့်တော်မှာ ကန့်ကွက်စရာ မရှိပါဘူး။ ပြစ်ဒဏ်ကို ကြည်ဖြူစွာ ခံယူပါ့မယ်" ရှောင်ချီသည် ဤမျှ အစွမ်းထက်သော ကျွမ်းကျင်သူရှေ့တွင် သူသည် ယှဉ်နိုင်သူ မဟုတ်ကြောင်း သိသည်။ မိစ္ဆာမီးကို ထွန်းညှိရင်တောင် အလကားပဲဖြစ်လိမ့်မည်။

ဒါကြောင့် တိုက်ရိုက်ပဲ မိုးကြိုးရေကန်ထဲကို သွားပြီး ခန္ဓာကိုယ်ကို သန့်စင်လိုက်တာက ပိုကောင်းပါလိမ့်မည်။ တစ်ခါတစ်ရံမှာ ဒါဟာ ထူးခြားတဲ့ အခွင့်အလမ်းတစ်ခုတောင် ဖြစ်လာနိုင်သည် မဟုတ်ပါလား။

"ဘိုးဘေးကြီး တပည့်တော်မှာ ကန့်ကွက်စရာ ရှိပါတယ်" မဟာအကြီးအကဲက ကျေနပ်စွာ ခေါင်းညိတ်လိုက်စဉ်မှာပင် နတ်သမီး လင်ယွင်က ရှေ့သို့ တစ်လှမ်းတိုးလာကာ မဟာအကြီးအကဲကို လှမ်းကြည့်လိုက်သည်။

"ဟော... မင်းမှာ ဘာကန့်ကွက်စရာ ရှိလို့လဲ" မဟာအကြီးအကဲသည် မကျေမနပ်ဖြင့် မျက်မှောင်ကြုတ်ကာ နတ်သမီး လင်ယွင်ကို ကြည့်မေးလိုက်သည်။

ရှောင်ချီမှာ ကျန်သေးတဲ့ ပြစ်ဒဏ် နှစ်ခု ရှိပါသေးတယ် အရင်တုန်းက ရှောင်ချီဟာ တောင်နောက်ဘက်မှာ သုံးနှစ်ကြာ နံရံကြည့် တရားအားထုတ်ဖို့ ပြစ်ဒဏ်ပေးခံခဲ့ရပေမဲ့ နှစ်လတောင် မပြည့်ခင်မှာ သူ ထွက်သွားခဲ့ပါတယ်။ ဒီပြစ်ဒဏ်ကို ဆက်ပြီး ကျခံသင့်တယ်လို့ တပည့်တော် ယူဆပါတယ် ဒါကြောင့် သူ့ရဲ့ ပြစ်ဒဏ်ထဲမှာ နောက်ထပ် သုံးနှစ် ထပ်တိုးသင့်ပါတယ်။

နောက်ပြီး ရှောင်ချီဟာ ဝိညာဉ်မိုင်းတွင်းအနီးမှာ အကြောင်းမဲ့ တိုက်ခိုက်ခဲ့ပြီး ဂိုဏ်းတပည့်တွေကို ဒဏ်ရာရစေခဲ့ပါတယ်။ ဂိုဏ်းချုပ်နဲ့ တိုင်ပင်ပြီး သူ့ကို မိုးကြိုးနှင်တံ အချက် ၂၀ ပြစ်ဒဏ်ပေးခဲ့သလို နောက်ပိုင်း စည်းကမ်းထိန်းသိမ်းရေး အကြီးအကဲက အချက် ၁၀၀ ထပ်တိုးခဲ့ပါတယ်။

စုစုပေါင်း အချက် ၃၀၀ ကျော်မှာ အချက် ၂၀ လောက်ပဲ ပေးရသေးခင်မှာ ကြားဖြတ်နှောင့်ယှက်ခံခဲ့ရတာပါ။ ဒါကိုလည်း အပြီးသတ်အောင် လုပ်သင့်တယ်လို့ တပည့်တော် ယူဆပါတယ်။ အလင်းတန်းများကြားက နတ်သမီး လင်ယွန်းသည် လက်အုပ်ချီ ဦးညွှတ်ရင်း ပြောလိုက်သည်။

မဟာအကြီးအကဲသည် မျက်မှောင်ကြုတ်ကာ ခဏမျှ စဉ်းစားပြီးနောက်"ခွင့်ပြုတယ် ရှောင်ချီရဲ့ မိုးကြိုးရေကန် ဆယ်နှစ်ပြစ်ဒဏ်ကို ဆယ့်သုံးနှစ် ပြောင်းလဲသတ်မှတ်လိုက်တယ်။ နောက်ပြီး ကျန်နေတဲ့ မိုးကြိုးနှင်တံ ပြစ်ဒဏ်ကိုလည်း တစ်ချက်မကျန် အပြီးသတ်စေရမယ်"

"မလုပ်ပါနဲ့ ဘိုးဘေးကြီး စီနီယာအစ်ကိုက အခု ဒဏ်ရာရထားတာပါ။ မိုးကြိုးရေကန်လို အန္တရာယ်ရှိတဲ့ နေရာကို သွားရတော့မှာ ဖြစ်သလို အချက် ၃၀၀ ကျော် မိုးကြိုးနှင်တံဒဏ်ကိုသာ ခံရရင်သူ မိုးကြိုးရေကန်ထဲမှာ အသက်ရှင်နိုင်မှာ မဟုတ်ပါဘူး" လင်းယုရှုသည် မြေပြင်ပေါ်မှာ ဒူးထောက်ကာ ဘိုးဘေးကြီးကို အသည်းအသန် တောင်းပန်တိုးလျှိုးနေရှာတော့သည်။

နတ်သမီး လင်ယွင်ကတော့ ရှောင်ချီကို အသေသတ်ဖို့အထိ ကြံစည်နေပုံရပါတယ်။