အခန်း (၃၅) - ကြောက်မက်ဖွယ် မိစ္ဆာစွမ်းအား

မူလကတော့ မင်းကို သတ်ဖို့ ငါနည်းနည်း တွန့်ဆုတ်နေမိသေးတယ် ဒါပေမဲ့ အခုတော့ အတော်ပဲ ငါဒီမိစ္ဆာခေါင်းဆောင်ကို သတ်ပြီး တရားဓမ္မအတွက် ယဇ်ပူဇော်ရမယ်။

ရှောင်ချီဟာ မိစ္ဆာအဖြစ် ကူးပြောင်းသွားပြီ။ သူ့ရဲ့ ဆရာတစ်ယောက်အနေနဲ့ ဒီနေ့ သူ့ကို ဒီနေရာမှာတင် ငါကိုယ်တိုင်ကွပ်မျက်မယ်

ဒါတင်မကဘူး ငါ လင်ယွင်းဟာ တစ်သက်လုံး သိက္ခာရှိရှိ နေထိုင်လာခဲ့တာ။

ဒီအယုတ်တမာ တပည့်က ငါ့ကို ခုနတင် လုပ်ကြံစွပ်စွဲသွားတာပဲ။ စီနီယာ အစ်ကိုတို့ ခင်ဗျားတို့သာ လျှာအရိုးမရှိ တောင်စဉ်ရေမရ ဆက်ပြောနေဦးမယ်ဆိုရင်တော့ ညီမလေးက ရိုင်းစိုင်းမိရင် ခွင့်လွှတ်ကြတော့။

ရှောင်ချီ၏ ခန္ဓာကိုယ်မှ မိစ္ဆာအငွေ့အသက်ကို မြင်လိုက်ရသည့် ကနဦး အံ့ဩမှုများပြီးနောက် နတ်သမီး လင်ယွင်၏မျက်နှာတွင် ဝမ်းသာရိပ်များ ယှက်သန်းသွားသည်။

သူမသည် ရှောင်ချီ၏ ကျင့်ကြံဆင့်ကို ဖျက်ဆီးပြီး ဂိုဏ်းမှ နှင်ထုတ်ရန်သာ ကြံစည်ခဲ့ခြင်း ဖြစ်သည်။

ဤလုပ်ရပ်သည် အကြီးအကဲများနှင့် တောင်ထိပ်သခင်များ၏ ဝေဖန်မှုကို ခံရနိုင်သလို တောင်နောက်ဘက်တွင် တရားအားထုတ်နေသည့် ဘိုးဘေးများကပင် သူမကို အပြစ်တင်နိုင်ပေသည်။

သို့သော် ယခု ရှောင်ချီက မိစ္ဆာအဖြစ် ကူးပြောင်းသွားပြီဖြစ်ရာ သူမအတွက် ခိုင်လုံသော အကြောင်းပြချက် ရရှိသွားပြီ ဖြစ်သည် သူမသည် ရှောင်ချီ၏ ကျင့်ကြံဆင့်ကို ဖျက်ဆီးရုံသာမက ဤနေရာ၌ပင် သတ်ပစ်နိုင်ပြီ ဖြစ်သည်။ ဘာပဲဖြစ်ဖြစ် ဒါဟာ တရားဓမ္မကို ကာကွယ်ဖို့ မိစ္ဆာကို နှိမ်နင်းတာပဲ မဟုတ်ပါလား။

"ဝုန်း..."

မြင့်မြတ်လှပါသည်ဆိုသော စကားများအပြီးတွင် နတ်သမီးလင်ယွင်က ပြတ်ပြတ်သားသား တိုက်ခိုက်လိုက်သည်။

သူမ၏ လက်ဖဝါးမှ ခရမ်းရောင် ဝိညာဉ်စွမ်းအားများမှာ ရုတ်တရက် ပွင့်ထွက်လာပြီး ဂိုဏ်း၏ ခန်းမဆောင်ကြီးတစ်ခုလုံးကို လွှမ်းခြုံသွားတော့မည့်အလား ပြင်းထန်လှသည်။

ရှောင်ချီမှာမူ လုံးဝကြောက်ရွံ့ခြင်း မရှိဘဲ သူ့ကိုယ်ပေါ်က အနက်ရောင် အငွေ့အသက်များကို ပိုမိုပြင်းထန်စေလိုက်သည်။ ကြောက်မက်ဖွယ် မိစ္ဆာလက်ဝါးကြီးတစ်ချက်မှာ ဟိန်းထွက်နေသော ခရမ်းရောင် စွမ်းအားများနှင့် ထိပ်တိုက်တွေ့သွားပြီး ပြင်းထန်သော လေလှိုင်းများကြောင့် ခန်းမအတွင်းရှိ အလှဆင်ပစ္စည်းများမှာ လွင့်စင်ကုန်တော့သည်။

ကံကောင်းထောက်မစွာဖြင့် အကြီးအကဲများ တောင်ထိပ်သခင်များနှင့် ဂိုဏ်းချုပ်တို့ ရှိနေသဖြင့် ထိုတိုက်ခိုက်မှုနှစ်ခု၏ အရှိန်အဝါကို လူအများက လျင်မြန်စွာပင် တားဆီးလိုက်နိုင်ကြသည်။

"ဒါ ဘယ်လိုလုပ် ဖြစ်နိုင်မှာလဲ မင်းက ငါ့တိုက်ခိုက်မှုကို ဘယ်လိုလုပ် ခုခံနိုင်တာလဲ" နတ်သမီးလင်ယွင်သည် သူမ၏ တိုက်ခိုက်မှုကို တည့်တည့် တားဆီးထားနိုင်သော ရှောင်ချီကို ကြည့်ကာ မယုံနိုင်အောင် မေးလိုက်မိသည်။

သူမသည် ဂိုဏ်း၏ထိပ်တန်း တိုက်ခိုက်ရေးသမား တစ်ဦးဖြစ်သလို ခရမ်းရောင်တိမ်တိုက်တောင်ထိပ်၏ အရှင်သခင်လည်း ဖြစ်သည်။ ဟင်းလင်းပြင်သို့ ပြန်ခြင်းအလယ်အလတ်အဆင့် ကျင့်ကြံဆင့်ရှိသူ ဖြစ်ရာ ဂိုဏ်း၏ ထိပ်တန်း အယောက် ဆယ်ဂဏန်းအတွင်း ပါဝင်သူ ဖြစ်သည်။

ဤမျှအစွမ်းထက်သော ကျင့်ကြံအဆင့် ရှိပါလျက်နှင့် ဘာကြောင့် နတ်သန္ဓေအဆင့်သို့ အခုမှ ဝင်ကာစ တပည့်တစ်ယောက်က သူမကို ခုခံနိုင်နေရသနည်း လင်ယွင်သာမက ခန်းမအတွင်းရှိ လူတိုင်းမှာလည်း အခြေအနေကို ကြည့်ကာ အံ့ဩတုန်လှုပ်နေကြသည်။

မိစ္ဆာအဖြစ် ကျရောက်သွားတာမှာပုံစံ နှစ်မျိုး ရှိတယ်။ ပထမတစ်ခုကတော့ မိမိရဲ့စိတ်နေစိတ်ထားကို မထိန်းချုပ်နိုင်ဘဲ စိတ်မိစ္ဆာက ခန္ဓာကိုယ်ထဲ ဝင်ရောက်သွားပြီး သတိလက်လွတ်ဖြစ်သွားတာပဲ အဲ့ဒီလူဟာ စိတ်မိစ္ဆာရဲ့ ရုပ်သေးရုပ် ဖြစ်သွားပြီး လူသေကောင်လို လောကထဲ လျှောက်သွားနေတော့တာ။

ဒုတိယတစ်ခုကတော့ မိမိကိုယ်တိုင် မိစ္ဆာအဖြစ်ပြောင်းလဲလိုက်တာပဲ။ ခိုင်မာတဲ့ စိတ်ဓာတ်ရှိတဲ့ ကျင့်ကြံသူတစ်ဦးဟာ မတရားမှုတွေနဲ့ ကြုံလာရတဲ့အခါ အခြေအနေအရ သူ့ရဲ့အစွမ်းတွေ တိုးလာအောင် ဒီနည်းလမ်းကိုရွေးချယ်တတ်ကြတယ်။

ဒါကိုလုပ်နိုင်ဖို့ဆိုရင် အနည်းဆုံး လူ့လောကထဲမှာ နှစ်ပေါင်း တစ်ရာလောက် ကျင်လည်ခဲ့ဖူးရမယ်။ ဒီရှောင်ချီဆိုတဲ့ ကောင်လေးက ကျင့်ကြံခြင်းလောကထဲ ခြေချတာ ငါးနှစ်ပဲ ရှိသေးတာ သူက ဘယ်လိုလုပ်ပြီး မိမိကိုယ်တိုင် မိစ္ဆာအဖြစ် ကူးပြောင်းနိုင်ရတာလဲ"

လူတိုင်း ဇဝေဇဝါ ဖြစ်နေစဉ်ခန်းမ၏ အမြင့်ဆုံးနေရာတွင် ရပ်နေသော ဂိုဏ်းချုပ်က မျက်မှောင်ကြုတ်ကာ ဖြည်းဖြည်းချင်း ပြောလိုက်သည်။

"နှမြောစရာပဲ ဒီလောက် ပါရမီရှိတဲ့သူက ဒီလိုပဲ ပျက်စီးသွားရတော့မှာလား" သူ၏ ဘေးတွင် ရပ်နေသော ပါးလျသော မျက်နှာရှိသည့် အမျိုးသားတစ်ဦးက ထရပ်လိုက်ပြီး ရှောင်ချီကို နှမြောတသစွာ ကြည့်လိုက်သည်။

"စီနီယာအစ်ကိုလင်... မင်း သူ့ကို ကယ်ချင်လို့လား" ဂိုဏ်းချုပ်က မျက်မှောင်ကြုတ်ကာ ဘေးက လူကို မကျေမနပ် ကြည့်မေးလိုက်သည်။

ဤသူမှာ ဝူချန်းတောင်ထိပ် ၏ အရှင်သခင် ဖြစ်သည် သူ၏ ကျင့်ကြံဆင့်မှာ ဟင်းလင်းပြင်သို့ ပြန်ခြင်းနောက်ဆုံးအဆင့်သို့ ရောက်နေပြီဖြစ်ရာ ဂိုဏ်းချုပ်ထက် အနည်းငယ်သာ နိမ့်ကျပြီး ဝိညာဉ်ဓားဂိုဏ်း၏ အင်အားအကောင်းဆုံး ကျွမ်းကျင်သူများထဲမှ တစ်ဦး ဖြစ်သည်။

"ကယ်တော့ ကယ်ချင်တာပေါ့ ဒါပေမဲ့ ငါ့မှာ အဲ့ဒီလောက် အစွမ်းမရှိဘူး။ အခုချိန်မှာ ကျင့်ကြံအားထုတ်နေတဲ့ ဘိုးဘေးထွက်လာမှပဲ သူ့ကိုပြန်ဆွဲတင်နိုင်လိမ့်မယ်" ထိုသူက ခေါင်းယမ်းကာ အားကိုးရာမဲ့စွာ ပြောလိုက်သည်။

ဒုန်း ဒုန်း ဒုန်း... သူတို့ စကားပြောနေစဉ်မှာပင် အောက်က တိုက်ပွဲမှာ အထက်သို့ ရောက်နေပြီ ဖြစ်သည်။

နတ်သမီး လင်ယွင်သည် သူမ၏ ဝိညာဉ်စွမ်းအားအားလုံးကို ထုတ်သုံးလိုက်ရာ ခန်းမအတွင်း၌ ဓားရိပ်ပေါင်းများစွာ ပေါ်ထွက်လာပြီး အပြီးသတ် တိုက်ခိုက်ရန် ပြင်လိုက်သည်။

နတ်သမီး လင်ယွင်မှာလည်း ဓားသမားတစ်ဦး ဖြစ်သည်။ ရှောင်ချီ၏ ဓားသိုင်းများ ဤမျှ ထူးချွန်နေရခြင်းမှာလည်း ရှေ့မှ နတ်သမီး လင်ယွင်ကိုယ်တိုင် အခြေခံချပေးခဲ့ခြင်းကြောင့် မဟုတ်ပါလား။

ယခုအခါ ဆရာနှင့် တပည့် ထိပ်တိုက်တွေ့နေကြသည်မှာ တကယ်ပင် ထူးခြားလှသော မြင်ကွင်းတစ်ခု ဖြစ်သည်။

"လင်ရှောင်ဓားကိုးသွယ် ရှစ်ခုမြောက်ဓား - နတ်ဘုရားကွပ်မျက်ခြင်း " ရှောင်ချီ၏ မျက်လုံးများမှာ သွေးရောင်လွှမ်းနေပြီး သူ့ကိုယ်ပေါ်က မိစ္ဆာအငွေ့အသက်များမှာ လက်ထဲက ဓားရှည်ပေါ်သို့ စုပြုံသွားတော့သည်။

မူလကတော့ ရှောင်ချီ၏ ကျင့်ကြံဆင့်နှင့်ဆိုလျှင် ရှစ်ခုမြောက်ဓားကို အသုံးမပြုနိုင်ပေ။ သို့သော် ယခု မိစ္ဆာအဖြစ် ကူးပြောင်းသွားသည့် အရှိန်နှင့် ဝိညာဉ်ပြောင်းလဲခြင်းအလယ်အလတ်အဆင့်သို့ တက်လှမ်းနိုင်ခဲ့သည့်အတွက် ဤရှစ်ခုမြောက်ဓားကို အောင်မြင်စွာ ထုတ်ဖော်နိုင်ခဲ့ခြင်းဖြစ်သည်။

ချင်းဖုန်းဓားမှာ တုန်ယင်နေပြီး ပြင်းထန်လှသော မိစ္ဆာအငွေ့အသက်များက ဓားသွားပေါ်တွင် ရစ်ပတ်နေသည်။ ရှေးဟောင်း သားရဲကြီးတစ်ကောင်က ၎င်း၏ ကြီးမားလှသော ပါးစပ်ကြီးကို ဟလိုက်သည့်အလား။

"သေစမ်း" ရှောင်ချီက ဟိန်းဟောက်လိုက်သည်။ နန်းတော်၏ တစ်ဝက်ခန့်ကို လွှမ်းခြုံထားသော အနက်ရောင် သားရဲကြီးမှာ နတ်သမီး လင်ယွင်ဆီသို့ ခုန်အုပ်လိုက်တော့သည်။ ၎င်းဖြတ်သန်းသွားသော နေရာတိုင်းရှိ ပရိဘောဂများမှာ အရည်ပျော်ကာ ပျက်စီးကုန်သည်။

"ဂလု... ဂိုဏ်းချုပ် ကျွန်တော်တို့ ဘာမှမလုပ်ကြသေးဘူးလား" ဂိုဏ်းချုပ်ဘေးက အခြားတောင်ထိပ်သခင်တစ်ဦးက စိုးရိမ်တကြီး မေးလိုက်သည်။

"အကြီးအကဲတို့... အစီအရင်လုပ်ဆောင်ကြ မိစ္ဆာခေါင်းဆောင်ကို ဖမ်းဆီးဖို့ပြင်ကြ" ဂိုဏ်းချုပ်က ရှောင်ချီကို ကြည့်ကာ မျက်လုံးများ ကျဉ်းမြောင်းသွားသော်လည်း နောက်ဆုံးတွင်တော့ သွားကိုကြိတ်ကာ အသံနက်ကြီးဖြင့် အမိန့်ပေးလိုက်သည်။

ထိုတွေဝေနေသည့် အခိုက်အတန့်မှာပင် အနက်ရောင် သားရဲကြီးသည် နတ်သမီး လင်ယွင်၏ ဓားရိပ်များကို ဝါးမြိုပစ်လိုက်ပြီ ဖြစ်သည်။

ပြင်းထန်လှသော မိစ္ဆာအငွေ့အသက်များက တားဆီး၍မရအောင် တိုးဝင်လာသည်။ ဓားရိပ်များကို ဝါးမြိုပြီးနောက် နတ်သမီး လင်ယွင်ကိုပါ ၎င်း၏အတွင်းသို့ ဆွဲသွင်းလိုက်တော့သည်။

"ရှဲ... ရှဲ..." ကြောက်စရာကောင်းသော အနက်ရောင် စွမ်းအားများသည် ပူလောင်လှသော မီးလျှံများကဲ့သို့ပင်။ မျက်စိတစ်မှိတ်အတွင်းမှာပင် နတ်သမီး လင်ယွင်၏ အဝတ်အစားများမှာ လောင်ကျွမ်းပျက်စီးကုန်သည်။

သူမ၏ ဖြူဝင်းလှသော အသားအရေမှာ နီမြန်းလာပြီး လက်မောင်းရှိ အရိုးဖြူဖြူလေးများကိုပင် မြင်နေရပြီ ဖြစ်သည်။

"အား..." နတ်သမီးလင်ယွင်၏ အော်ဟစ်သံမှာ ခန်းမတစ်ခုလုံး ပဲ့တင်ထပ်သွားသည်။ သူမသည် သားရဲကြီးတစ်ကောင်၏ ဗိုက်ထဲတွင် အဝါးခံနေရသလို ခံစားနေရကာ ကောင်းကင်တစ်ခုလုံး မီးတောက်နေသည့်ကြားတွင် အပူလောင်ခံနေရသကဲ့သို့ ပြင်းထန်လှသည်။

"ဝုန်း... ဒီတိုက်ခိုက်မှုက အရမ်းပြင်းထန်တယ် ကျွန်တော်တို့ မထိန်းနိုင်တော့ဘူးဂိုဏ်းချုပ်" အကြီးအကဲတစ်ဦးမှာ ရုတ်တရက် သွေးတစ်ချက် အန်ထုတ်လိုက်ပြီး လေထဲသို့ လွင့်စင်သွားကာ ခန်းမ၏ ကျောက်နံရံနှင့် သွားတိုက်မိတော့သည်။

"ဂျောက်... ဂျောက်..." နံရံနှင့် တိုက်မိသည့် အရှိန်ကြောင့် ထိုအကြီးအကဲ၏ အရိုးများမှာ ကြေမွသွားပြီး စူးရှသော အသံများ ထွက်ပေါ်လာသည်။

"ပျက်စီးစမ်း" ဂိုဏ်းချုပ်က ရှေ့သို့ တစ်လှမ်းတိုးကာ အပြာရောင် ဝိညာဉ်စွမ်းအားများကို ထုတ်သုံးလိုက်သည်။ သူသည် ဟင်းလင်းပြင်ထဲသို့ ခြေချလိုက်ပြီး ခန်းမ၏ အမြင့်ဆုံးနေရာမှနေ၍ အနက်ရောင် သားရဲကြီးဆီသို့ လက်ဝါးဖြင့် ရိုက်ချလိုက်သည်။

"ဝူး..." သားရဲကြီးမှာ အပေါ်က လူကို သတိထားမိပုံရသည်။ ၎င်းက ရုတ်တရက် အပေါ်သို့ မော့ကြည့်ကာ ပါးစပ်ကြီးကို ဟပြီး ဟိန်းဟောက်လိုက်တော့သည်။

"ဝုန်း..."

"ဝု..."

ဂိုဏ်းချုပ်မှာ သွေးတစ်ချက် အန်လိုက်ရပြီး နောက်သို့ လွင့်ထွက်သွားသည်။ မိစ္ဆာအငွေ့အသက်များဖြင့် ဖွဲ့စည်းထားသော ရှေးဟောင်း သားရဲကြီးမှာလည်း ပြင်းထန်သော တုန်ခါမှုကြောင့် မြေပြင်ပေါ်သို့ ရိုက်ချခံလိုက်ရသည်။

"အား..." နတ်သမီး လင်ယွင်၏ အော်ဟစ်သံမှာ ပိုမို စူးရှလာသည်။ သူမ၏ အဝတ်အစားများမှာ လုံးဝ မရှိတော့ပေ။ သို့သော် ပေါ်လာသည်မှာ လှပသော ခန္ဓာကိုယ်မဟုတ်ဘဲ ညိုမည်းနေသော အသားအရေနှင့် တစ်ခါတစ်ရံ မြင်နေရသော အရိုးဖြူဖြူများသာ ဖြစ်သည်။

"နောက်ကျသွားပြီ ညီမလေး လင်ယွင်တော့ သေဖို့နီးနေပြီ ထင်တယ်" ပါးလျသော မျက်နှာနှင့် တောင်ထိပ်သခင်သည် မိစ္ဆာအငွေ့အသက်များကို ခက်ခဲစွာခုခံနေရင်း နတ်သမီးလင်ယွင်၏ စူးရှသော အော်သံကို ကြားရသည့်အခါ ခေါင်းယမ်းလိုက်မိသည်။ သူကတော့ သူမအတွက် သေဒဏ်ကို စိတ်ထဲမှာ ချမှတ်လိုက်ပြီ ဖြစ်သည်။

"မင်းတို့ လူငယ်တွေ ဘာတွေလျှောက်လုပ်နေကြပြန်တာလဲ" ခပ်အေးအေး အသံတစ်သံ ခန်းမအတွင်း ပဲ့တင်ထပ်သွားသည် နောက်တစ်ခဏတွင်တော့ ခန်းမအပြင်ဘက်မှ ပြင်းထန်လှသော ဝိညာဉ်စွမ်းအားများ ကျဆင်းလာကာ ခန်းမတစ်ခုလုံးကို ဆေးကြောလိုက်သလို ဖြစ်သွားပြီး ကြောက်မက်ဖွယ် မိစ္ဆာအငွေ့အသက်များမှာ မျက်စိတစ်မှိတ်အတွင်း ကွယ်ပျောက်သွားတော့သည်။