အခန်း (၃၃) ကျင့်ကြံဆင့်ကို ဖျက်ဆီးပြီး ဂိုဏ်းမှနှင်ထုတ်ခြင်း

တိုက်ပွဲဖြစ်ပွားနေသည့် အရေးကြီးအချိန်တွင် မိမိဂိုဏ်း၏ ဝိညာဉ်မိုင်းတွင်းမှ ဝိညာဉ်စွမ်းအားများကို ခိုးယူစုပ်ယူခဲ့သည်ဟူသော သတင်းသာ အပြင်သို့ ပျံ့နှံ့သွားပါက ဂိုဏ်းချုပ်၏ မျက်နှာကြီးမှာ အရှက်ရစရာ အကြီးအကျယ်ဖြစ်ပေလိမ့်မည်။

"အယုတ်တမာ တပည့်... ဒူးထောက်စမ်း" ဂိုဏ်းချုပ်သည် ဟိန်းဟောက်လိုက်ပြီး သူ၏ ကြီးမားလှသော အငွေ့အသက်ဖြင့် ယဲ့ဖန်ကို ဖိနှိပ်လိုက်သည်။

အမှန်တော့ သူသည် ဤကောင်လေးကို သဘောကျခဲ့သည်မဟုတ် သူ၏ သမီးဖြစ်သူကသာ သူ့ကို တိုက်ရိုက်တပည့် အဖြစ် လက်ခံရန် အတင်းအကျပ် ပူဆာခဲ့ခြင်းဖြစ်သည်။ သမီးဖြစ်သူကသာ အသေအလဲ ဆန္ဒမပြခဲ့လျှင် သူသည် ဘယ်သောအခါမှ အလျှော့ပေးခဲ့မည် မဟုတ်ပေ။

"လန်အာ... ဒါ မင်းရွေးထားတဲ့ အတော်ဆုံး ခင်ပွန်းလောင်းပေါ့လေ တကယ့်ကို ထူးချွန်တဲ့ လူငယ်လေး ကောင်းကင်ဘုံရဲ့ ရွေးချယ်ခံလေးပါပဲ" ဂိုဏ်းချုပ်က သူ၏သမီးကို ရွဲ့တဲ့တဲ့ လေသံဖြင့် ပြောလိုက်သည်။

"အဖေ... ဖန်လောင် ဒီလိုလုပ်တာက ဂိုဏ်းအတွက်ပါပဲ။ ဟို အနက်ရောင်ဝတ်စုံဝတ်လူတွေ ဝိညာဉ်ကြောတစ်ခုလုံးကို သိမ်းပိုက်သွားမှာကို သူမကြည့်ရက်လို့ပါ အဲဒါကြောင့် သူတို့တွေ အောင်မြင်မသွားအောင် သူက အရင်ဦးအောင် ဝိညာဉ်စွမ်းအားတွေကို စုပ်ယူလိုက်တာပါ"

လင်းကျောင်လန်သည် ဂိုဏ်းချုပ်ရှေ့တွင် ဒူးထောက်ကာ ယဲ့ဖန်ဘက်မှ အသည်းအသန် အကြောင်းပြချက် ပေးနေရှာသည်။

"မင်းက ဒီတိရစ္ဆာန်အတွက် ဆင်ခြေပေးနေတုန်းပဲလားဂိုဏ်းမှာ လူပေါင်း ၇၈၀ ရှိတာ သူတို့မျက်လုံးတွေက ကန်းနေကြလို့လား သူတို့မှာ အမှားအမှန် ခွဲခြားနိုင်တဲ့ အစွမ်းမရှိဘူးလား။

ဂိုဏ်းရဲ့ စည်းကမ်းတွေအရဆိုရင် ယဲ့ဖန်ဟာ အကြိမ်တစ်ရာ သေသင့်တဲ့ အပြစ်တွေကို ကျူးလွန်ထားတာ။

ဒီနေ့ ဘယ်သူတောင်းပန်တောင်းပန် မရဘူး။ သေဆုံးသွားတဲ့ ဂိုဏ်းတပည့်တွေကို အဖြေပေးဖို့အတွက် ငါ ဒီကောင့်ကို ကိုယ်တိုင် ကွပ်မျက်မယ်။

ဂိုဏ်းချုပ်သည် လင်းကျောင်လန်ကို ဒေါသတကြီး စိုက်ကြည့်လိုက်ရာ သူ၏ ပြင်းထန်လှသော အရှိန်အဝါကြောင့် သူမမှာ နောက်သို့ လွင့်ထွက်သွားတော့သည်။

လင်းကျောင်လန်သည် သူမ၏ဖခင်ကို ထိတ်လန့်စွာ ကြည့်နေမိသည်။ ဖခင်ဖြစ်သူ ယခုတစ်ကြိမ်တွင် ဤမျှအထိ ဒေါသထွက်နေလိမ့်မည်ဟု သူမ မထင်ထားခဲ့ပေ။

သူမ မသိသည်မှာ လတ်တလောတွင် ယဲ့ဖန်၏ဂုဏ်ပြောင်သော လုပ်ရပ်များမှာ ဂိုဏ်းတစ်ခုလုံးသို့ ပျံ့နှံ့နေပြီ ဖြစ်သည်။

ဂိုဏ်းတပည့်များက ရှေ့တန်းတွင် အသက်ပေးပြီး ရန်သူကို ခုခံနေချိန်၌ ယဲ့ဖန်ကတော့ အနောက်ဘက်တွင် ဝိညာဉ်စွမ်းအားများကို ဇိမ်နှင့် စုပ်ယူနေခြင်းမှာ ဂိုဏ်းတူညီအစ်ကိုများ၏ အလောင်းများကို နင်းကာ အပေါ်တက်နေခြင်းပင် ဖြစ်သည်။

ဤသတင်းကို ဘယ်သူက ဂိုဏ်းသို့ အရင်ပို့လိုက်သည်ကို မည်သူမှမသိသော်လည်း ယခုအခါ ဂိုဏ်းတစ်ခုလုံးမှာ ဆူညံပွက်လောရိုက်နေပြီး ယဲ့ဖန်၏ ဂုဏ်သတင်းသာမက ဂိုဏ်းချုပ်၏ ဂုဏ်သိက္ခာပါ ထိုးဆင်းသွားခဲ့ရသည်။

ထို့ကြောင့် ဂိုဏ်းချုပ်သည် တပည့်များကို အဖြေပေးရန်နှင့် လူအများရှေ့တွင် ဟန်ပြရန်အတွက် ဤသို့ လုပ်ဆောင်ရခြင်း ဖြစ်သည်။ သူသည် တရားမျှတမှုကို ရှေ့တန်းတင်ပြီး မိမိလူကိုပင် အပြစ်ပေးဝံ့သော ဂိုဏ်းချုပ်တစ်ဦး ဖြစ်ကြောင်း ပြသချင်နေခြင်း ဖြစ်သည်။

ဂိုဏ်းချုပ် မလုပ်ပါနဲ့ဦး ယဲ့ဖန်မှာ အပြစ်ရှိတာ မှန်ပေမဲ့ သေဒဏ်ပေးလောက်တဲ့အထိတော့ မဟုတ်ပါဘူး ကျွန်တော် ရှေ့တန်းက အခြေအနေကို စုံစမ်းပြီးပါပြီ။ ယဲ့ဖန်ဟာ ဝိညာဉ်မိုင်းတွင်းထဲကို ဝင်ပြီး ဝိညာဉ်ပြောင်းလဲခြင်းအဆင့် ကျွမ်းကျင်သူတစ်ယောက်ကို သတ်ခဲ့ပါတယ်။

သူ ဘယ်လိုနည်းလမ်း သုံးခဲ့သလဲဆိုတာ မသိရပေမဲ့ အဲဒီကျွမ်းကျင်သူဟာ သူ့လက်ချက်နဲ့ သေခဲ့တာ အမှန်ပါပဲ။

ဒီကောင်းမှုဟာ သူ့ရဲ့အပြစ်တွေကို ပြင်ဆင်ဖို့ လုံလောက်ပါတယ် ဤစကားကို ကြားလိုက်ရသည်နှင့် ဂိုဏ်းချုပ်၏နောက်တွင် ရပ်နေသော အကြီးအကဲများအားလုံး အံ့ဩမှင်သက်သွားကြသည်။

ဝိညာဉ်ပြောင်းလဲခြင်း အဆင့်ဆိုသည်မှာ ဘယ်လို အဆင့်မျိုးလဲ ဂိုဏ်း၏ အကြီးအကဲ အားလုံးနီးပါးမှာ ဤအဆင့်တွင်သာ ရှိကြသည်။ အဆင့်မြင့် အကြီးအကဲ အချို့နှင့် တောင်ထိပ်သခင်များသာလျှင် နောက်တစ်ဆင့်ဖြစ်သော ဟင်းလင်းပြင်သို့ ပြန်ခြင်းအဆင့်သို့ ရောက်နိုင်ကြခြင်း ဖြစ်သည်။

အကယ်၍ ယဲ့ဖန်တွင် လျှို့ဝှက်ချက်မရှိဘူးဟု တစ်ယောက်ယောက်က ပြောလာလျှင် သူတို့ သေအောင် ရိုက်လျှင်တောင် ယုံကြမည်မဟုတ်ပေ။

သို့သော်လည်း ယဲ့ဖန်မှာ ဂိုဏ်းချုပ်၏ တိုက်ရိုက်တပည့် ဖြစ်နေသဖြင့် သူ၏ လျှို့ဝှက်ချက်များကို သူတို့မက်မောခွင့် မရှိကြပေ။

ဂိုဏ်းချုပ်ကိုယ်တိုင်ပင်လျှင် ဤသတင်းကို ကြားသောအခါ ယဲ့ဖန်ဘက်သို့ အကြည့်တစ်ချက် လွှဲလိုက်မိသည်။

အမှန်တော့ သူသည်အကြီးအကဲ အချို့က ယဲ့ဖန်အတွက် တောင်းပန်ပေးရန် စောင့်နေခြင်း ဖြစ်သည်။ သို့မှသာ ယဲ့ဖန်၏ ကောင်းမှုအချို့ကို အကြောင်းပြကာ သေဒဏ်မှ ကင်းလွတ်ခွင့်ပေးပြီး အပြစ်ဒဏ် အနည်းငယ်သာ ပေးခြင်းဖြင့် သမီးဖြစ်သူ၏ မျက်နှာကို ကြည့်နိုင်မည် မဟုတ်ပါလား။

ယဲ့ဖန်က ဤမျှ ကြီးမားသော စွမ်းဆောင်ရည်မျိုး ပြသနိုင်ခဲ့လိမ့်မည်ဟု သူမထင်ထားခဲ့ပေ ဤဝိညာဉ်မိုင်းတွင်း ကာကွယ်ရေး တိုက်ပွဲကြီးတွင် သူတို့သတ်နိုင်ခဲ့သော အင်အားအကောင်းဆုံး ရန်သူမှာ နတ်သန္ဓေအဆင့်သာ ရှိသေးသည်။

ယခုအခါ ယဲ့ဖန်က ဝိညာဉ်ပြောင်းလဲခြင်း အဆင့် ကျွမ်းကျင်သူကို သတ်နိုင်ခဲ့သည်ဆိုသော အချက်မှာ ဂိုဏ်း၏ သမိုင်းမှတ်တမ်းတွင် ရေးထိုးထိုက်သော ကောင်းမှုတစ်ခု ဖြစ်သည်။

ကြည့်ရတာ မင်းက အသုံးဝင်သေးတာပဲ။ မင်း ဘယ်လိုနည်းလမ်း သုံးခဲ့သလဲဆိုတာကိုတော့ မင်းရဲ့ဆရာတစ်ယောက်အနေနဲ့ ငါ မမေးတော့ဘူး။ ဒါပေမဲ့ ကောင်းမှုက အပြစ်ကို လုံးဝ မဖုံးကွယ်နိုင်ဘူး။ မင်းကိုယ်တိုင် ပြစ်ဒဏ်ပေးခြင်းဆိုင်ရာ ခန်းမကို သွားပြီး မိုးကြိုးနှင်တံ အချက် ၁၀ ချက် ခံယူလိုက် ဒီကိစ္စကို ဒီလောက်နဲ့ပဲ အဆုံးသတ်ကြမယ်။

ပြစ်ဒဏ်ပေးခြင်းဆိုင်ရာ အကြီးအကဲက လမ်းခင်းပေးလိုက်သည်ကို မြင်သောအခါ ဂိုဏ်းချုပ်သည် ချက်ချင်းပင် အခွင့်အရေးကို ဆုပ်ကိုင်ကာ ယဲ့ဖန်ကိုအပြစ်မှ လွှတ်ပေးလိုက်သော်လည်း သင့်တော်သော အပြစ်ဒဏ်တစ်ခုကိုတော့ ချမှတ်လိုက်သည်။

"ကျေးဇူးတင်ပါတယ် ဆရာ... ကျွန်တော့်အသက်ကို ချမ်းသာပေးလို့။ ကျေးဇူးတင်ပါတယ် အကြီးအကဲ ကူညီစကား ပြောပေးလို့" ယဲ့ဖန်သည် ခြေတစ်ဖက်တည်းဖြင့် ကိုယ်ကို ထိန်းကာ ဂိုဏ်းချုပ်ကို ဦးညွှတ်လိုက်ပြီးနောက် ကျန်းချီနင်ဘက်သို့ လှည့်၍ ဦးညွှတ်လိုက်ပြန်သည်။

ကျန်းချီနင်က ခေါင်းတစ်ချက် ငြိတ်ပြလိုက်သည် သူ လိုချင်သော ကျေးဇူးတရားကို အောင်မြင်စွာ ရရှိသွားပုံရသည်။

သူ့အမြင်တွင်တော့ ရှောင်ချီမှာ လက်ရှိတွင် နတ်ဘုရားသားတော်ဖြစ်နေသော်လည်း ယဲ့ဖန်၏ အလားအလာမှာ ရှောင်ချီထက် မလျော့ပေ။

ထို့အပြင် ဂိုဏ်းချုပ်ဆိုသည့် နောက်ခံအင်အားကြီးရှိနေသဖြင့် ယဲ့ဖန်၏ အောင်မြင်မှုမှာ ရှောင်ချီထက် အများကြီး သာလွန်သွားပေလိမ့်မည်။ ရှောင်ချီ တစ်ယောက်တည်းကို အပြစ်ပြုမိတာ ဘာအရေးလဲ ယဲ့ဖန်ကိုသာ သူ့ဘက်ပါအောင် ဆွဲထားနိုင်လျှင် ရှောင်ချီဆိုသည်မှာ နောင်တွင်လူပြက်တစ်ယောက်သာ ဖြစ်သွားပေလိမ့်မည်။

ယဲ့ဖန်ကို စည်းကမ်းထိန်းသိမ်းရေး အဖွဲ့က ခေါ်သွားပြီးနောက်တွင်တော့ ဂိုဏ်းချုပ် တောင်ထိပ်သခင်များနှင့် အကြီးအကဲများ၏ အကြည့်မှာ ရှောင်ချီထက်သို့ ကျရောက်လာတော့သည်။

ဤအချိန်တွင် ရှောင်ချီ၏ ဆရာဖြစ်သူ နတ်သမီး လင်ယွန်းလည်း သူတို့ကြားတွင် ရှိနေသည်။ ရှောင်ချီအပေါ် ထားရှိသော လူတိုင်း၏ အကြည့်မှာ လုံးဝမဖော်ရွေကြပေ။

"ရှောင်ချီ မင်းရဲ့ကိစ္စတွေကို ငါတို့ ကြားပြီးပြီ ကျင့်ကြံမယ့်နေရာလေး တစ်ခုအတွက်နဲ့ မင်းရဲ့ ဂိုဏ်းတူညီလေးကို တမင်တကာ ရန်စပြီး ဒဏ်ရာအပြင်းအထန် ရအောင် လုပ်ခဲ့တယ်။ သူ့ရဲ့ ခြေတစ်ဖက် လက်တစ်ဖက်ကိုတောင် ဖြတ်ပစ်ခဲ့သေးတယ်။ ဒီလို အပြစ်မျိုးအတွက် ဘယ်လို ပြစ်ဒဏ်က သင့်တော်မယ်လို့ မင်းထင်သလဲ။

ဂိုဏ်းချုပ်မှာ အလောတကြီး မရှိတော့ပေ။ သူသည် ရှောင်ချီတို့ တစ်စုကို ဂိုဏ်း၏ ခန်းမဆောင်ကြီးထဲသို့ ခေါ်ဆောင်လာပြီးနောက် ရှောင်ချီကို တည်တင်းသော မျက်နှာဖြင့် ကြည့်ကာ မေးလိုက်သည်။

ဤအခိုက်အတန့်တွင် ခန်းမဆောင်ကြီးအတွင်း၌ ရှောင်ချီ၏ ဆရာအပါအဝင် တောင်ထိပ်သခင် အဆင့်ရှိသူ ၃ ဦးမှာ ဂိုဏ်းချုပ်နှင့် တစ်တန်းတည်း နေရာတွင် ထိုင်နေကြသည်။

အောက်ဘက်ရှိ ထိုင်ခုံများတွင်တော့ အကြီးအကဲ ၁၁ ဦးမှာ ရှောင်ချီနှင့် နောက်ကလိုက်လာသော လင်းယုရှုတို့ကို ရှုပ်ထွေးသော အကြည့်များဖြင့် ကြည့်နေကြသည်။

အမြုတေတည်ဆောက်ခြင်းအဆင့်ရှိတဲ့ ပုရွက်ဆိတ်လေးတစ်ကောင်က ငါ့ကိုကျင့်ကြံဖို့ရတနာမြေအတွက် လာပြိုင်ရဲတယ်ပေါ့။

အကယ်၍ ဂိုဏ်းချုပ်ရဲ့မျက်နှာကို မထောက်ထားဘူးဆိုရင် ယဲ့ဖန်ဆိုတဲ့ကောင်က အခုဆို အလောင်းဖြစ်နေပြီ ရှောင်ချီသည် လက်နှစ်ဖက်ကိုနောက်ပစ်ကာ မျက်နှာအမူအရာ မပျက်ဘဲ ဂိုဏ်းချုပ်ကို တည့်တည့်စိုက်ကြည့်ရင်း ပြောလိုက်သည်။

"ကောင်းပြီ... ကောင်းပြီ... တကယ်ကို မောက်မာတာပဲ။ ညီမလေးလင်ယွန်း... မင်းရဲ့ တပည့်ကို ဘယ်လို ကိုင်တွယ်သင့်တယ်လို့ ထင်သလဲ" ဂိုဏ်းချုပ်သည် ရှောင်ချီ၏ မောက်မာသော လေသံကြောင့် ဒေါသထွက်ကာ အေးစက်စွာ ရယ်မောလိုက်ပြီး နတ်သမီး လင်ယွင်ကို လှည့်မေးလိုက်သည်။

ဒါတွေအားလုံးက ကျွန်မရဲ့ဆုံးမမှု အားနည်းချက်ကြောင့်ပါ ကျွန်မရဲ့ဒီတပည့်ဟာ ခဏခဏပြဿနာရှာတတ်တယ် အခုတော့ သူက နတ်ဘုရားသားတော်ဆိုတဲ့ ဂုဏ်ပုဒ်ကို အသုံးချပြီး ပိုလို့တောင် စည်းမဲ့ကမ်းမဲ့ လုပ်လာပြီ ကျွန်မ သူ့ရဲ့ ကျင့်ကြံဆင့်ကို ဖျက်ဆီးပြီး ဂိုဏ်းကနေ နှင်ထုတ်ပစ်မယ်"

မျက်စိမှိတ် နားနေသော နတ်သမီး လင်ယွင်သည် ရုတ်တရက် မျက်လုံးများကို ဖွင့်လိုက်သည်။ သူမ၏ မျက်လုံးများတွင် ရှောင်ချီအပေါ် ထားရှိသော ရက်စက်မှုနှင့် အလွန်အမင်း ရွံရှာမုန်းတီးမှုများ ပြည့်နှက်နေသည်။

လွန်ခဲ့သော အချိန်အချို့က သူမတောင်အောက်ဆင်းစဉ်တွင် ရန်သူများ၏ ချုံခိုတိုက်ခိုက်ခြင်းကို ခံရပြီး အသက်အန္တရာယ်ရှိသော အဆိပ်မိခဲ့ဖူးသည်။

ထိုစဉ်က သူမကို ကယ်တင်ပြီး ခန္ဓာကိုယ်ထဲက အဆိပ်တွေကို ဖယ်ရှားပေးခဲ့သူမှာ ယဲ့ဖန် ဖြစ်သည် အဆိပ်ဖြေသည့် နည်းလမ်းမှာ အနည်းငယ်ညစ်ပတ်ခဲ့သော်လည်း ၎င်းမှာ ယဲ့ဖန်၏ ရည်ရွယ်ချက် မဟုတ်ခဲ့ပေ။

သူတို့၏ အဆင့်အတန်းများကြောင့် ထိုကိစ္စကို နှစ်ယောက်လုံးက လျှို့ဝှက်ထားခဲ့ကြသည်။

သို့သော် သူမ၏ ရင်ထဲတွင်တော့ ယဲ့ဖန်၏ ပုံရိပ်မှာ အမြစ်တွယ်နေပြီဖြစ်သည်။ တစ်ချိန်က သူမကို အသေခံ ကယ်တင်ခဲ့ဖူးသော ထိုကောင်လေး၏ ခြေလက်တွေကို ရှောင်ချီက ဖြတ်ပစ်ခဲ့သည်ကို မြင်ရသောအခါ နတ်သမီး လင်ယွင်မှာ ရင်ထဲက သွေးထွက်မတတ် ခံစားရပြီး ရှောင်ချီကို ထိုနေရာမှာတင် အပိုင်းပိုင်း အပြတ်ဖြတ်ပစ်ချင်နေမိတော့သည်။