အခန်း (၂၈) ဝိညာဉ်စွမ်းအားများကို ချက်ချင်းစုပ်ယူနိုင်သည့်ကျင့်စဉ်

ရှောင်ချီတစ်ယောက် လျှောက်သွားနေရင်းနှင့် တကယ်ပင် သဲလွန်စအချို့ကို ရှာတွေ့ခဲ့သည်။

ဝိညာဉ်ကျောက်တုံးမိုင်းတွင်း တောင်တန်း၏ ထောင့်တစ်နေရာတွင် အပေါက်ကြီးတစ်ခုကို ထွင်းထုထားသည်ကို တွေ့ရသည်။ ၎င်းမှာ တစ်စုံတစ်ဦးက မှော်လက်နက်တစ်ခုခုကို အသုံးပြုပြီး တောင်နံရံကို ဖောက်ထွင်းထားပုံရကာ မိုင်းတွင်းထဲသို့ တိုက်ရိုက်ရောက်ရှိနိုင်သည့် လမ်းကြောင်းတစ်ခု ဖြစ်နေသည်။

"စီနီယာအစ်ကို... ဒါ... ဒါ အစ်ကိုပြောတဲ့ ဝင်ပေါက်လားဟင်" ကောင်မလေးမှာ တောင်တန်းရှိ ထိုဝင်ပေါက်ကို ကြည့်ပြီး အံ့အားသင့်သွားသည်။ သူမ၏ စီနီယာအစ်ကို ပြောသကဲ့သို့ မိုင်းတွင်းထဲသို့ ဦးတည်သည့် လမ်းကြောင်းတစ်ခု တကယ်ရှိနေလိမ့်မည်ဟု သူမ မထင်ထားခဲ့ပေ။

"သတိထားနော်။ ဒီလမ်းကြောင်းက ဟို အနက်ရောင်ဝတ်စုံဝတ်လူတွေ ကမှော်လက်နက်သုံးပြီး ဖောက်ထားတာ ရှင်းနေတာပဲ။ သူတို့ အတွင်းထဲမှာ ထောင်ချောက်တွေ ဆင်ထားနိုင်တယ်" ရှောင်ချီက အတွင်းဘက်ကို သတိကြီးစွာ တစ်ချက်ကြည့်လိုက်ပြီး ဘေးမှ ကောင်မလေးကို ပြောလိုက်သည်။

"ဒါဆိုရင် ကျွန်မတို့ဘယ်လိုလုပ်ကြမလဲ အတွင်းထဲ မဝင်တော့ဘူးလား" ကောင်မလေးက သူမ၏ စီနီယာအစ်ကို ဘာလုပ်မည်ကို မသိသဖြင့် ကြောင်တောင်တောင်လေး ကြည့်နေရှာသည်။

ရှောင်ချီက နှုတ်ခမ်းပေါ် လက်တင်ကာ တိတ်တိတ်နေရန် အချက်ပြလိုက်ပြီး ကောင်မလေးကို ဂူအတွင်းသို့ ခေါ်ဆောင်သွားတော့သည်။

သူ လျှောက်လှမ်းသွားသည်နှင့်အမျှ မွေးရာပါ ဝိညာဉ်အဆီအနှစ်အစအနလေးတစ်ခုမှာ သူနှင့် ကောင်မလေး၏ အနီးတွင် ကပ်ပါလာပြီး ဟောက်ထျန်း စေတီတော်၏ ပုံရိပ်ယောင်တစ်ခုအဖြစ် ပြောင်းလဲသွားသည်။

ထိုဝိညာဉ်အဆီအနှစ်မှာ ဟောက်ထျန်းစေတီတော်၏ပုံသဏ္ဌာန်ကို ခဏတာ ယူဆောင်ထားနိုင်သည်။ ၎င်းမှာ ဒြပ်သားမရှိသော ပုံရိပ်မျှသာ ဖြစ်သော်လည်း ဟောက်ထျန်းစေတီတော်၏ စွမ်းအား ၆၀ ရာခိုင်နှုန်းခန့်ကို ထုတ်ဖော်နိုင်စွမ်းရှိသည်။

ကံမကောင်းသည်မှာ ရှောင်ချီတွင် ထိုဝိညာဉ်အဆီအနှစ်၏ တစ်ဝက်သာ ရှိနေခြင်းပင်။ ကျန်တစ်ဝက်မှာ ယဲ့ဖန်၏ လက်ထဲတွင် ရှိနေသဖြင့် ယခု ထုတ်ဖော်နိုင်သည့် စွမ်းအားမှာ ၃၀ ရာခိုင်နှုန်းပင် ပြည့်ချင်မှ ပြည့်ပေလိမ့်မည်။

သို့သော်လည်း ရှောင်ချီ၏ ကျယ်ပြန့်လှသော နတ်သန္ဓေအလယ်အလတ်အဆင့် ကျင့်ကြံအဆင့်၏ ထောက်ပံ့မှုကြောင့် ထိုစေတီတော်ပုံရိပ်မှာ သူတို့နှစ်ဦးကို လုံခြုံစွာ လွှမ်းခြုံထားနိုင်သည်။ အကယ်၍ ဝိညာဉ်ပြောင်းလဲခြင်းအဆင့်ရှိ ကျွမ်းကျင်သူတစ်ဦးက ရုတ်တရက် တိုက်ခိုက်လာလျှင်တောင် ဤကာကွယ်ရေးကို ဖောက်ထွင်းနိုင်ရန် လွယ်ကူမည် မဟုတ်ပေ။

ချလွင်၊ ချလွင်... ရှောင်ချီနှင့် ကောင်မလေးတို့ မီတာ သုံးရာမှ ငါးရာခန့် လျှောက်လာပြီးနောက် ဝိညာဉ်စွမ်းအား ဓားမိုးများမှာ သူတို့ဆီသို့ လျင်မြန်စွာ ပစ်ခတ်လာတော့သည်။

ရှောင်ချီသည် သူ၏ ခန္ဓာကိုယ်အတွင်းရှိ ဝိညာဉ်အဆီအနှစ်ကို အရှိန်အဟုန်ဖြင့် လှည့်ပတ်လိုက်ရာ သူတို့နှစ်ဦးလုံးကို လေလုံအောင် ဖုံးအုပ်ထားလိုက်သည်။ ထိုဝိညာဉ်ဓားများသည် စေတီတော် ပုံရိပ်ယောင်ကို လာရောက်ထိမှန်ပြီး ကြည်လင်သော အသံများ ထွက်ပေါ်လာကာ ပျောက်ကွယ်သွားတော့သည်။

"စီနီယာအစ်ကို... ဒါက ဘာလဲဟင် အရမ်း အစွမ်းထက်တာပဲ" ကောင်မလေးသည် သူမ၏ ခေါင်းပေါ်တွင် လွင့်မျောနေပြီး အပြာနုရောင် အလင်းတန်းများ ထွက်ပေါ်နေသော စေတီတော်ကို ကြည့်ကာ အံ့ဩတကြီး မေးလိုက်သည်။ တိုက်ခိုက်မှု အားလုံးကို ခုခံပေးနိုင်သည်ကို မြင်သောအခါ သူမ အလွန်ပင် မှင်သက်သွားရသည်။

"ဒါကတော့ ဂိုဏ်းတစ်ခုလုံးလိုက်ရှာနေတဲ့ မွေးရာပါ ဝိညာဉ်အဆီအနှစ်ပဲတစ်ဝက်က ငါ့လက်ထဲမှာ ရှိပြီး ကျန်တစ်ဝက်ကတော့ ယဲ့ဖန်ဆီမှာ ရှိတယ်"

ကောင်မလေးမှာ ငယ်သော်လည်း အတော်လေး အခြေအနေ သိတတ်သူ ဖြစ်သည်။ ရှောင်ချီသည် ဘာမှဖုံးကွယ်မထားဘဲ အဖြစ်အပျက် အလုံးစုံကို ရှင်းပြလိုက်သည်။

ဟောက်ထျန်းစေတီတော်ကို ယဲ့ဖန်က တကယ်ပင် ခိုးယူသွားခြင်းဖြစ်ကြောင်းနှင့် သူကတော့ ယဲ့ဖန် စေတီတော်ကို ယူနေစဉ်အတွင်း ဝိညာဉ်အဆီအနှစ် အချို့ကိုသာ ခိုးယူခဲ့ခြင်းဖြစ်ကြောင်း ပြောပြလိုက်သည်။

"ဒီယဲ့ဖန်က တကယ်ကို ရွံစရာကောင်းတာပဲ၊ စီနီယာအစ်ကို့ကို အပြစ်ဖို့ရက်တယ်" ကောင်မလေးမှာ သူမ၏ ခေါင်းပေါ်ရှိ စေတီတော်ကိုကြည့်ရင်း ယဲ့ဖန်ကို တစ်လမ်းလုံး ပွစိပွစိနှင့် ဆဲဆိုလာတော့သည်။

အမွှေးတိုင်တစ်တိုင် ကုန်ဆုံးလောက်သော အချိန်အကြာတွင်တော့ တောက်ပလှသော အလင်းရောင်တစ်ခု သူတို့၏ မျက်စိရှေ့တွင် ပေါ်လာခဲ့သည်။

ထိုအလင်းမှာ အလွန်ပင် စူးရှလှသဖြင့် မျက်စိကိုပင်ဖွင့်ရန် ခက်ခဲလှသည်။ အလင်းပေါ်လာသည့် နေရာတွင် အဆုံးမဲ့သော ဝိညာဉ်စွမ်းအားများမှာ ရူးသွပ်စွာ ထွက်ပေါ်နေလေသည်။ ရှောင်ချီမှာ အသက်တစ်ချက် ရှူလိုက်ရုံနှင့်ပင် သူ၏ ကျင့်ကြံဆင့် အနည်းငယ် တိုးတက်လာသလို ခံစားလိုက်ရသည်။

"ဝါး... ဒါက ဝိညာဉ်ကျောက်တုံး မိုင်းတွင်းလား ဝိညာဉ်စွမ်းအားတွေက အရမ်းသိပ်သည်းတာပဲ" ကောင်မလေးမှာ မိုင်းတွင်းဝင်ပေါက်ဆီသို့ အပြေးအလွှား သွားလိုက်သည်။ မျက်စိကျိန်းမတတ် တောက်ပနေသော ဝိညာဉ်အလင်းတန်းများကို မြင်ရသောအခါ သူမ အလွန်ပင် အံ့အားသင့်သွားရသည်။

"အသံတိုးတိုးလုပ်ဦး ဒီနေရာကို တစ်ယောက်ယောက် သိမ်းပိုက်ထားပြီးလောက်ပြီ ငါတို့ လက်ရှိမှာ ဝိညာဉ်ကျောက်တုံး အချို့ကိုပဲယူလို့ရမယ်။ ငါ့နောက်မှာပဲနေပြီး ဘာအသံမှမထွက်စေနဲ့"

ရှောင်ချီက ကောင်မလေး၏ ခေါင်းကို တစ်ချက်ပုတ်ကာ တိတ်တိတ်နေရန် အချက်ပြလိုက်သည်။

ထို့နောက် သူတို့နှစ်ဦးသည် ဝင်ပေါက်ကို သတိကြီးစွာ ဖြတ်ကျော်ပြီး ကျယ်ပြောလှသော မိုင်းတွင်းထဲသို့ ဝင်လာခဲ့ကြသည်။

ကျောက်နံရံများတွင် ဝိညာဉ်ကျောက်တုံးများမှာ သိပ်သည်းစွာ ကပ်နေကြသလို မြေကြီးထဲတွင်မြုပ်နေသည်များ၊ သာမန်အတိုင်း ပေါ်နေသည်များလည်း ရှိကာ မြင်ရသူကို တံတွေးပင် မြိုချမိစေသည်။

"ငါ့ရဲ့ ခန္ဓာကိုယ်ထဲကို ဝိညာဉ်စွမ်းအား အားလုံးကိုချက်ချင်း စုပ်ယူနိုင်မယ့် ကြောက်စရာကောင်းတဲ့ ကျင့်စဉ်တစ်ခုခုသာ ရှိရင် သိပ်ကောင်းမှာပဲ" တောက်ပနေသော ဝိညာဉ်ကျောက်တုံးများကို ကြည့်ရင်း ရှောင်ချီမှာ စိတ်ကူးယဉ်မိနေသည်။

သို့သော် ထိုကဲ့သို့ အဆင့်အတန်းရှိသော ကျင့်စဉ်မျိုးမှာ ကောင်းကင်ဘုံ၏ ရွေးချယ်ခံကဲ့သို့သော ပုဂ္ဂိုလ်များသာ ရနိုင်ပေလိမ့်မည်။ သူကဲ့သို့ ဘေးထွက်ဇာတ်ကောင် တစ်ယောက်အဖို့တော့ အတိတ်ဘဝ အနှစ်နှစ်ဆယ်လုံးလုံးတောင် ထိုကဲ့သို့သော ပြိုင်ဘက်ကင်း ကျင့်စဉ်မျိုးကိုရှာမတွေ့ခဲ့ဖူးပေ။

ဝိညာဉ်အဆီအနှစ်ကို သိမ်းယူနိုင်သည့် ကျင့်စဉ်ကိုရရှိခဲ့ခြင်းကပင် သူ၏ကံတရားအားလုံးကို သုံးစွဲခဲ့ပြီးသား ဖြစ်နေပေလိမ့်မည်။

သို့သော် အချိန်မှာ နည်းပါးလှသဖြင့် ရှောင်ချီသည် အများကြီး တွေးမနေတော့ပေ။ သူသည် သိုလှောင်အိတ် တစ်ဒါဇင်ကျော်ကို ထုတ်လိုက်ပြီး မိုင်းတွင်းရှိ ဝိညာဉ်ကျောက်တုံးများကို အငမ်းမရစတင်စုဆောင်းတော့သည်။

သူသည် ဂိုဏ်း၏ လေးစားထိုက်သော နတ်ဘုရားသားတော်ဖြစ်သော်လည်း ဂိုဏ်းအတွင်း သူ၏အနေအထားမှာ အတော်လေး အဆင်မပြေလှပေ။

မည်သူ၏ မျက်နှာသာပေးမှုကိုမှ မရရှိသလို မည်သူကမှလည်း မချစ်ကြသည့် အမျိုးအစားဖြစ်သည်။

ထို့ကြောင့် သူ့တွင် ကောင်းမွန်သော သိုလှောင်လက်စွပ်ပင် မရှိပေ။ ဤမိုင်းတွင်းသို့ မလာခင်မှာ သူသည် ဝိညာဉ်ကျောက်တုံး အမြောက်အမြား အကုန်အကျခံကာ သိုလှောင်အိတ်များကို ပြင်ဆင်ဝယ်ယူခဲ့ခြင်း ဖြစ်သည်။

တပည့်နှစ်ဦးလုံးမှာ သိုလှောင်အိတ်များကို ကိုင်ဆောင်ကာ မိုင်းတွင်းထဲသို့ ခုန်ဝင်ပြီး ကြည်လင်တောက်ပနေသော ဝိညာဉ်ကျောက်တုံးများကို အသည်းအသန် စုဆောင်းနေကြတော့သည်။ ၎င်းမှာ ဆောင်းဦးရိတ်သိမ်းချိန်တွင် ပြောင်းဖူးခူးနေသောတောင်သူတစ်ဦးနှင့်ပင် ဆင်တူလှသည်။

ကောင်မလေး၏ ကျင့်ကြံဆင့်မှာ နိမ့်လွန်းသဖြင့် သူမ၏ ဝိညာဉ်ကျောက်တုံး စုဆောင်းနှုန်းမှာ သိသိသာသာ နှေးကွေးနေသည်။

ရှောင်ချီမှာမူ အစွမ်းကုန် ကြိုးစားနေပြီး တစ်စက္ကန့်လျှင် ကျောက်တုံး တစ်ရာနီးပါးနှုန်းဖြင့် မိုင်းတွင်းရှိ ဝိညာဉ်ကျောက်တုံး အများစုကို ရိတ်သိမ်းနေတော့သည်။

"သေသေချာချာ ရှာစမ်း ဝိညာဉ်ကျောက်တုံး တစ်တုံးတောင် မကျန်စေနဲ့" သို့သော် ရှောင်ချီနှင့် ကောင်မလေးတို့ ဝိညာဉ်ကျောက်တုံး စုဆောင်းနေသည့် ပျော်ရွှင်မှုတွင် နစ်မွန်းနေစဉ်မှာပင် ဆူညံသော အသံအချို့ အနီးနားမှ ရုတ်တရက် ထွက်ပေါ်လာသည်။

"စီနီယာအစ်ကို... လူတွေ လာနေပြီ" ကောင်မလေးမှာ အသံမထွက်ဘဲ ပါးစပ်လှုပ်ရုံဖြင့် ရှောင်ချီကို သတိပေးလိုက်သည်။

ရှောင်ချီက ခေါင်းညိတ်လိုက်သည်။

နောက်ဆုံး ကျောက်တုံး တစ်ထောင်ခန့်ကို စုဆောင်းပြီးနောက် သူသည် ကောင်မလေးနှင့်အတူ အမြန်ဆုံး ပုန်းကွယ်လိုက်သည်။

အနက်ရောင်ဝတ်စုံဝတ်လူ ခြောက်ယောက် ခုနစ်ယောက်ခန့်မှာ မိုင်းတွင်းအနက်ပိုင်းမှ ထွက်လာကြပြီး တစ်ယောက်စီတွင် သိုလှောင်အိတ်များကို ကိုင်ဆောင်ထားကြသည်။

 ခေါင်းဆောင်ဖြစ်သူမှာ အမိန့်များကို အော်ဟစ်ပေးနေလေသည် သူတို့၏ ကျင့်ကြံဆင့်များမှာ အများအားဖြင့် အမြုတေဖွဲ့စည်းခြင်းအဆင့်တွင်သာ ရှိကြပြီး ခေါင်းဆောင်မှာမူ နတ်သန္ဓေအဆင့် ဖြစ်သည်။

ရှောင်ချီသည် စိတ်ထဲက ခေါင်းညိတ်လိုက်မိသည်။ သူသည် အလုပ်သမား နည်းပါးနေမည်ကို စိုးရိမ်နေခဲ့ရာ ယခုတော့ ထိုလူများက သူ့အတွက် အခမဲ့ လာလုပ်ပေးနေကြပြီ မဟုတ်ပါလား။

သူတို့တွေ ဝိညာဉ်ကျောက်တုံးတွေ အကုန်သိမ်းပြီးပြီဆိုမှ သူက ထွက်ပြီး လုယက်လိုက်ရုံပင် အရာအားလုံးက သူ့အပိုင် ဖြစ်လာတော့မည်။

ရှောင်ချီက စိတ်ထဲက တွက်ချက်နေစဉ်မှာပင် ဝိညာဉ်ကျောက်တုံး မိုင်းတွင်းထဲ၌ မယုံနိုင်စရာ ကိစ္စတစ်ခု ရုတ်တရက် ဖြစ်ပေါ်လာသည်။

မိုင်းတွင်းရှိ ဝိညာဉ်စွမ်းအားများမှာ ရုတ်တရက် လားရာတစ်ခုတည်းသို့ ရူးသွပ်စွာ စီးဆင်းသွားတော့သည်။ ၎င်းမှာ ဝဲကယက်တစ်ခုကဲ့သို့ ဖြစ်နေပြီး ပတ်ဝန်းကျင်ရှိ ဝိညာဉ်စွမ်းအား အားလုံးကို စုပ်ယူနေခြင်း ဖြစ်သည်။

"တောက်... ငါကပဲ ကောင်းကင်ဘုံရဲ့ ရွေးချယ်ခံမှာ ဝိညာဉ်စွမ်းအားတွေကို အတင်းအကျပ် စုပ်ယူနိုင်တဲ့ ကျင့်စဉ် ရှိနိုင်တယ်လို့ ပြောလိုက်တာ အခု မိုင်းတွင်းထဲက ဝိညာဉ်စွမ်းအားတွေ တကယ်စုပ်ယူခံနေရပြီ။ ငါက ဘယ်လိုတောင် နိမိတ်မကောင်းတဲ့သူလဲ"

ရှောင်ချီသည် အဝေးတွင် ဖြစ်ပေါ်နေသော ဝဲကယက်ကို ကြည့်ကာ သွားကြိတ်ပြီး ပြောလိုက်သည်။

စဉ်းစားနေစရာပင် မလိုတော့ပေ ဤသည်မှာ ယဲ့ဖန်၏ လက်ချက်ဖြစ်နိုင်ခြေ ၈၀ ရာခိုင်နှုန်းရှိနေသည်။ ထိုကောင့်၏ ကံတရား က ကြောက်စရာကောင်းလောက်အောင် ကောင်းလှသည် သူသည် ဤဝင်ပေါက်ကို ရှောင်ချီထက်ပင် စောပြီး ရှာတွေ့ထားပုံရသည်။

အနက်ရောင်ဝတ်စုံဝတ်လူတွေ ဝင်လာပြီးနောက် သူကတိတ်တဆိတ် ခိုးဝင်လာခဲ့ကာ ယခုအခါ ဂူအတွင်းရှိ ဝိညာဉ်စွမ်းအားများကို ကြောက်စရာကောင်းသော ကျင့်စဉ်တစ်ခု အသုံးပြုပြီး စုပ်ယူနေခြင်းပင် ဖြစ်ရမည်။

အခန်း (၂၉)  လူသတ်လုယက်ခြင်း

"ဘာတွေဖြစ်နေတာလဲ ဘာဖြစ်သွားတာလဲ" စိုးရိမ်ပူပန်နေသည်မှာ ရှောင်ချီတို့တစ်စုတည်း မဟုတ်ပေ။ ဝိညာဉ်ကျောက်တုံးမိုင်းတွင်းထဲသို့ ခိုးဝင်လာကြသော အနက်ရောင်ဝတ်စုံဝတ်လူများ သည်လည်း ရှေ့ဘက်တွင် ဝိညာဉ်စွမ်းအား အမြောက်အမြား စုပ်ယူခံနေရသည်ကို ကြည့်ပြီး ပျာပျာသလဲ ဖြစ်နေကြသည်။

သူတို့သည် အင်အားအမြောက်အမြား အသုံးပြုခဲ့ရပြီး လူအင်အား ထက်ဝက်ကျော် ဆုံးရှုံးပြီးမှ ဤလျှို့ဝှက်လမ်းကြောင်းကို ဖွင့်ကာ မိုင်းတွင်းထဲသို့ ဝင်နိုင်ခဲ့ခြင်း ဖြစ်သည်။ အခုတော့ သူတို့ ကြိုးစားသမျှက တခြားသူအတွက် အလကား ဖြစ်သွားတော့မှာလား။

"ဝိညာဉ်ကျောက်တုံးတွေကို ဆက်ပြီး စုဆောင်းကြ ငါလူအချို့ခေါ်ပြီး သွားကြည့်လိုက်မယ်"

လူတိုင်း ဂယောက်ဂယက် ဖြစ်နေစဉ်မှာပင် မိုင်းတွင်းအနက်ပိုင်းမှ လူအချို့ ထွက်ပေါ်လာသည်။ သူတို့ကို ဦးဆောင်လာသူမှာ ငွေရောင်ဝတ်စုံ ဝတ်ဆင်ထားသော ခန့်ညားထည်ဝါသည့် လူသန်ကြီးတစ်ဦးဖြစ်သည်။

ထိုသူ့ထံမှ ထွက်ပေါ်နေသော အငွေ့အသက်မှာ အလွန်ပင် သိပ်သည်းလှသဖြင့် ရှောင်ချီပင်လျှင် သေသေချာချာ မမြင်နိုင်ပေ။ သူ၏ ကျင့်ကြံဆင့်မှာ အနည်းဆုံး ဝိညာဉ်ပြောင်းလဲခြင်းအဆင့်ရှိ ကျွမ်းကျင်သူတစ်ဦး ဖြစ်လိမ့်မည်ဟု ရှောင်ချီ ခန့်မှန်းလိုက်သည်။

လူတိုင်းက "ဟုတ်ကဲ့" ဟု ပြန်ထူးကာ ဝိညာဉ်ကျောက်တုံး စုဆောင်းခြင်းကို အရှိန်မြှင့်လိုက်ကြသည်။ ထိုစဉ် ဝိညာဉ်ပြောင်းလဲခြင်း အဆင့် ကျွမ်းကျင်သူမှာ လူအချို့ကို ခေါ်ဆောင်ကာ ဝဲကယက် ဖြစ်ပေါ်နေသည့် ဘက်သို့ အရှိန်အဟုန်ဖြင့် ပြေးထွက်သွားတော့သည်။

လက်ရှိတွင်စုပ်ယူမှု အရှိန်မှာသိပ်မမြန်သေးပေ။ ထိုနေရာရှိ ဝိညာဉ်ကျောက်တုံးများ၏ မျက်နှာပြင်ပေါ်တွင် ကပ်နေသော ဝိညာဉ်စွမ်းအားများကိုသာ စုပ်ယူနေခြင်းဖြစ်သည်။

သို့သော် ဤအတိုင်းသာ ဆက်သွားလျှင် ဤကြောက်စရာကောင်းသောစုပ်ယူမှု အရှိန်ကြောင့် ဤမိုင်းတွင်းရှိ ဝိညာဉ်စွမ်းအား အနည်းဆုံး ထက်ဝက်ခန့်မှာ ထိုသူ၏စုပ်ယူခြင်းကို ခံရပေလိမ့်မည်။

ဤအခိုက်အတန့်တွင် ရှောင်ချီ အနည်းငယ် ပူပန်လာသည်။ ထို ယဲ့ဖန်ဆိုသည့် ကောင်ကို သွားတားလို့ ရမလားဆိုသည်ကို သူ စဉ်းစားနေမိသည်။

သို့သော် မကြာမီမှာပင် သူ သက်ပြင်းချနိုင်သွားသည်။ ရှေ့ဘက်မှ စုပ်ယူအားမှာ အကြောင်းရင်းမရှိဘဲ ပျောက်ကွယ်သွားခဲ့သည်။ ဝိညာဉ်ပြောင်းလဲခြင်း အဆင့် ကျွမ်းကျင်သူက ယဲ့ဖန်ကို ရှာတွေ့သွားပြီး လိုက်လံ တိုက်ခိုက်နေပြီ ဖြစ်ပုံရသည်။

ယဲ့ဖန်၏ ကျင့်ကြံဆင့်မှာ မမြင့်သော်လည်း သူ၏ အသက်ဘေးမှ လွတ်မြောက်နိုင်သည့် နည်းလမ်းများမှာ အဆုံးမရှိပေ။ အထူးသဖြင့် သူနှင့်အတူ အမြဲပါနေပြီး လိုအပ်လျှင် ဝိညာဉ်စွမ်းအားများ ထုတ်ပေးနိုင်သည့် "အိတ်ဆောင်အဘိုးကြီး"မှာ သူ၏ အကြီးမားဆုံးသော ဖဲချပ်တစ်ချပ်ဖြစ်သည်။

ယဲ့ဖန်သည် လက်တစ်ဖက် ဆုံးရှုံးထားသော်လည်း ဝိညာဉ်စွမ်းအားများကို အတင်းအကျပ် ထုတ်ယူသုံးစွဲခြင်းဖြင့် ဝိညာဉ်ပြောင်းလဲခြင်းအဆင့် ကျွမ်းကျင်သူတစ်ဦးကိုပင် ရင်ဆိုင်နိုင်စွမ်းရှိသည်။

ဒါကြောင့်လည်း ယဲ့ဖန်သည် ဤမိုင်းတွင်းထဲတွင် ဝိညာဉ်ကျောက်တုံးများကို ဗြောင်ကျကျ စုပ်ယူရဲခြင်းဖြစ်သည်။

တစ်နာရီခန့် ကြာပြီးနောက်တွင်တော့ ပျောက်ကွယ်သွားသော ဝဲကယက်မှာ ပြန်လည် ထွက်ပေါ်လာပြန်သည်။ ကြည့်ရတာ ယဲ့ဖန်သည် ထိုဝိညာဉ်ပြောင်းလဲခြင်း အဆင့်ကျွမ်းကျင်သူကို ဖြေရှင်းနိုင်ခဲ့ပုံရသည်။

ယဲ့ဖန်၏ စွမ်းဆောင်ရည်ကို ရှောင်ချီပင် ချီးကျူးမိသွားသည်။ ဒဏ်ရာအပြင်းအထန် ရထားသည့်တိုင်အောင် ဝိညာဉ်ပြောင်းလဲခြင်း အဆင့် ကျွမ်းကျင်သူကို ပြန်သတ်နိုင်သည်အထိ စွမ်းသည် မဟုတ်ပါလား။

အရင်တစ်ခေါက် သူနှင့် တိုက်ခဲ့စဉ်က ရှောင်ချီဘက်က ကျင့်ကြံဆင့်အနည်းငယ် သာနေ၍သာ တော်တော့သည်။

အကယ်၍ ယဲ့ဖန်သာ မောက်မာမနေဘဲ သူ၏ ကျင့်ကြံအဆင့်ကို နတ်သန္ဓေနောက်ဆုံးအဆင့်အထိ အတင်းအကျပ် မြှင့်တင်ခဲ့လျှင် ရလဒ်မှာ ပြောင်းလဲသွားနိုင်သည်။

တခြားသူ၏ ဝိညာဉ်စွမ်းအားကို စိတ်ကြိုက် ချေးသုံးနိုင်ပြီး အိတ်ဆောင်အဘိုးကြီး တစ်ယောက်ပါရှိနေသည့် ဤရန်သူမျိုးကို ရှောင်ချီ တကယ်ပင် စကားမဆိုနိုင်တော့ပေ။ ဤကဲ့သို့သော ရန်သူကို အနိုင်ယူဖို့ ဖြစ်နိုင်ပါ့မလား။

အကယ်၍ ယဲ့ဖန်၏ဒဏ်ရာများ ပျောက်ကင်းသွားပြီး နောက်တစ်ကြိမ် ပြန်တိုက်ရလျှင် သူ အနိုင်ရချင်မှ ရပေလိမ့်မည်။ အဓိက အရေးကြီးဆုံးမှာ သူ၏ ကျင့်ကြံဆင့်ကို အမြန်ဆုံး မြှင့်တင်ရန်သာဖြစ်သည်။

ဝိညာဉ်ကျောက်တုံး စုဆောင်းနေသော အနက်ရောင်ဝတ်စုံဝတ်လူများမှာ ရှေ့ဘက်မှ ဝဲကယက် ပြန်ပေါ်လာသည်ကို မြင်သောအခါ မျက်နှာများ ချက်ချင်း ဖြူဖျော့သွားကြတော့သည်။

ထိုဝိညာဉ်ပြောင်းလဲခြင်း အဆင့် ကျွမ်းကျင်သူမှာ ဤမိုင်းတွင်း စစ်ဆင်ရေး၏ စစ်သေနာပတိ ဖြစ်သည်။

သူ၏ သေဆုံးမှုက သူတို့၏ရင်ထဲတွင် ကြောက်စိတ်များကို ဖြစ်ပေါ်စေခဲ့သည်။

"ဒု-ဗိုလ်မှူး... အခု ကျွန်တော်တို့ ဘာဆက်လုပ်ကြမလဲ ဗိုလ်မှူးကတော့ ဟိုလူ့လက်ချက်နဲ့ သေသွားပြီ။ ကြည့်ရတာ အဲဒီလူရဲ့ ကျင့်ကြံဆင့်ကအနည်းဆုံး ဝိညာဉ်ပြောင်းလဲခြင်း အဆင့်မှာ ရှိပုံရတယ် ကျွန်တော်တို့ ရင်ဆိုင်နိုင်မယ့်သူ မဟုတ်ဘူး"

ပိန်ပိန်ပါးပါး အနက်ရောင်ဝတ်စုံဝတ်လူတစ်ဦးက နာဆင့်ဆိုးလ် နောက်ဆုံးအဆင့်ရှိသည့် ဝတုတ်တုတ် လူကြီးကို ကြည့်ကာ သတိကြီးစွာ မေးလိုက်သည်။

"ဝိညာဉ်ကျောက်တုံးတွေ ဘယ်လောက် စုမိပြီလဲ" ဒု-ဗိုလ်မှူးဟု ခေါ်သော လူဝကြီးက သွားကြိတ်ရင်း သူ၏ လက်အောက်ငယ်သားများကို မေးလိုက်သည်။

ဤအချိန်တွင် မိုင်းတွင်းအတွင်းရှိ အနက်ရောင်ဝတ်စုံဝတ်လူအားလုံး ထွက်လာကြပြီ ဖြစ်သည်။ စုစုပေါင်း ၂၀ ကျော်ခန့် ရှိပြီး တစ်ယောက်စီတွင် အနည်းဆုံး သိုလှောင်အိတ် သုံးလေးအိတ်စီပါရှိကြသည်။

"ဒီတစ်ခေါက်မှာတော့ ဝိညာဉ်ကြောထဲက ကျောက်တုံး ၄၀ ရာခိုင်နှုန်းလောက်ကို စုဆောင်းနိုင်ခဲ့ပါတယ်။ မျှော်လင့်ထားတာထက် အများကြီးပိုရပါတယ်" ပိန်ပိန်ပါးပါး လူက စိတ်လှုပ်ရှားစွာ ပြန်ဖြေသည်။

"ကျောက်တုံးတွေကို သေသေချာချာ သိမ်းဆည်းပြီးဒီကနေ အမြန်ဆုတ်ကြမယ် အားလုံးထွက်သွားတာနဲ့ ဒီဝင်ပေါက်ကို ဖောက်ခွဲပစ်လိုက် ဟိုလူ့ကို အတွင်းထဲမှာ ပိတ်မိပြီးသေအောင် ထားခဲ့မယ်" ခဏမျှ စဉ်းစားပြီးနောက် လူဝကြီးက ပြတ်ပြတ်သားသား အမိန့်ပေးလိုက်သည်။

ရှောင်ချီကတော့ စိတ်ထဲကနေ ကဲ့ရဲ့နေမိသည် "ဒီလူယုတ်မာတွေမှာ ဦးနှောက် မရှိကြဘူးလား"

ဝင်ပေါက်ကို ဖောက်ခွဲလိုက်ခြင်းက ဟို ယဲ့ဖန် ဆိုသည့်ကောင်ကို အကြိုက်တွေ့စေမှာ မဟုတ်လား။ ဒါဆိုရင် ဝိညာဉ်ဓားဂိုဏ်းက လူတွေက ဒီလျှို့ဝှက်ဝင်ပေါက်ကို ရှာတွေ့မှာ မဟုတ်တော့သလို ဝင်စစ်မှာလည်း မဟုတ်တော့ပေ။

အဲဒီကျရင် ယဲ့ဖန်က အတွင်းထဲမှာ စိတ်ကြိုက် ကျင့်ကြံပြီး ရွှေအမြုတေ အဆင့် အထိတောင် တိုက်ရိုက် ရောက်သွားနိုင်သည်။

ဇာတ်လိုက်ရဲ့ လမ်းကြောင်းက ဒီလောက်အထိ ချောမွေ့နေတာ မဆန်းပါဘူး ဒီလို ငတုံး ရန်သူတွေကပဲ လမ်းခင်းပေးနေတာကိုး

ထိုသို့တွေးနေသော်လည်း ရှောင်ချီသည် သူတို့ကို ထိုအတိုင်း လုပ်ခွင့်ပေးမှာ မဟုတ်ပေ။

"မင်းတို့တွေ ငါ့ရဲ့ဝိညာဉ်ဓားဂိုဏ်းကို လာပြီး ကျောက်တုံးတွေ ခိုးနေကြတာပဲ။ နေရာလေးတောင် မနွေးသေးခင်မှာပဲ ထွက်သွားဖို့ ကြိုးစားနေကြတာလား" ရှောင်ချီသည် ပုန်းကွယ်ရာမှ ထွက်လာပြီး အနက်ရောင်ဝတ်စုံဝတ်လူ ၂၀ ကျော်ကို ကြည့်ကာ ခပ်ပြုံးပြုံး ပြောလိုက်သည်။

"ဟင်း... နတ်သန္ဓေအဆင့်ရှိတဲ့ ကလေးလေးပဲ။ ငါတို့လမ်းကို ပိတ်ရဲတယ်ပေါ့ ငါ မင်းကို အကြံပေးမယ် အမြန်ဖယ်ပေးလိုက်စမ်း ငါ မင်းအသက်ကို ချမ်းသာပေးကောင်း ပေးနိုင်လိမ့်မယ်" ရှောင်ချီ ရုတ်တရက် ထွက်လာသည်ကို မြင်သောအခါ လူဝကြီးမှာ တင်းမာသွားသည်။ ဤကဲ့သို့ အခြေအနေမျိုးတွင် ထွက်လာရဲသူမှာ အားနည်းသူ မဟုတ်နိုင်ပေ။

ဒီမှာ အချိန်အကြာကြီး နှောင့်နှေးနေလျှင် မလိုလားအပ်သော ကိစ္စများဖြစ်လာနိုင်သည်။ ထို့ကြောင့် သူက ရှောင်ချီကို ခြိမ်းခြောက်ပြီး မောင်းထုတ်ချင်နေခြင်း ဖြစ်သည်။

"ငါ မင်းတို့ကို အသက်ရှူ သုံးကြိမ်စာ အချိန်ပေးမယ် မင်းတို့ လက်ထဲက သိုလှောင်အိတ် အားလုံးကို ချထားပြီး အခုချက်ချင်း ထွက်သွားကြ။ မဟုတ်ရင်တော့ ဒီသခင်လေးက သတ်ဖြတ်ပွဲ စတင်ရလိမ့်မယ်" ရှောင်ချီက ဓားရှည်ကို ပခုံးပေါ် တင်ထားပြီး လူအုပ်ကို အေးစက်စွာ ဝေ့ကြည့်လိုက်သည်။

သူ၏ လေသံမှာ ဟိုလူဝကြီးထက် အဆ ၁၀၀ မက ပိုပြီး ပြတ်သားလှသည်။

"ကောင်းပြီ... ကောင်းပြီ ငါက ဒီနေ့ စိတ်ကောင်းဝင်ပြီး မင်းအသက်ကို ချမ်းသာပေးမလို့ပါပဲ ဒါပေမဲ့ မင်းက သေတွင်းထဲ အတင်းတိုးဝင်နေမှတော့ ငါ့ကို အပြစ်မတင်နဲ့တော့ သတ်ကြစမ်း အမြန်လုပ် လွတ်သွားတာနဲ့ အကြီးအကဲဆီ ချက်ချင်း သတင်းပို့ပြီး ဒီဝိညာဉ်ကြောကနေ ဆုတ်ခွာဖို့ ပြောလိုက်"

လူဝကြီး၏ အမိန့်ပေးသံနှင့်အတူ အနက်ရောင်ဝတ်စုံဝတ်လူ ၂၀ ကျော်မှာ ရှောင်ချီဆီသို့ အလုံးအရင်းနှင့် ပြေးဝင်လာကြတော့သည်။

"လင်ရှောင် ဓားကိုးချက်၊ သတ္တမမြောက် အကွက်— ဓားတစ်သောင်း မူလသို့ ပြန်ခြင်း" ရှောင်ချီသည် ဤလူများနှင့် အချိန်ဖြုန်းမနေတော့ပေ။ သူသည် သူ၏ အစွမ်းထက်ဆုံးသော ဧရိယာအနှံ့ တိုက်ခိုက်သည့် ကွက်စိပ်ကို တိုက်ရိုက်ထုတ်ဖော်လိုက်သည်။

ကောင်းကင်တစ်ခုလုံးတွင် ဓားဝိညာဉ်များ ပြည့်နှက်သွားပြီး ဓားမိုးများအလား၊ နဂါးကြီးတစ်ကောင်အလား အနက်ရောင်ဝတ်စုံဝတ်လူ ၂၀ ကျော်ကို ဝိုင်းရံ သတ်ဖြတ်လိုက်တော့သည်။

ကြောက်စရာကောင်းလှသော ဓားဝိညာဉ်များသည် ထိုလူအုပ်၏ ကာကွယ်ရေးကို ခဏချင်းမှာပင် အစိတ်စိတ်အမြွှာမြွှာ ဖျက်ဆီးပစ်လိုက်သည်။

ဤနေရာတွင် ရှိနေသော အနက်ရောင်ဝတ်စုံဝတ်လူ အများစုမှာ အမြုတေဖွဲ့စည်းခြင်း အဆင့်သာ ရှိကြသူများဖြစ်သည် သူတို့သည် ဓားဝိညာဉ်နှင့် ထိတွေ့လိုက်သည်နှင့် သူတို့၏ ခန္ဓာကိုယ်များမှာ ပြာအဖြစ် ပြောင်းလဲကာ ပျောက်ကွယ်သွားကြတော့သည်။

နတ်သန္ဓေအဆင့်ရှိသည့် ကျွမ်းကျင်သူ အနည်းငယ်မှာပင် စက္ကန့်ပိုင်းမျှသာ တောင့်ခံနိုင်ပြီး ခန္ဓာကိုယ်များ ထက်ပိုင်းပြတ်တောက်သွားခဲ့ရသည်။

ခေါင်းဆောင်ဖြစ်သူ လူဝကြီးတစ်ဦးတည်းသာဓားဝိညာဉ်ကို ခဏမျှ ယှဉ်ပြိုင်နိုင်ခဲ့သည် သို့သော် အသက်ရှူသုံးလေးကြိမ် အကြာမှာပင် သူ့ကို ပတ်ပျံနေသော ဓားပျံပေါင်း တစ်ထောင်ကျော်က သူ၏ ကာကွယ်ရေး အငွေ့အသက်ကို အတင်းအကျပ် ဖောက်ထွင်းလိုက်ပြီး သူ၏ဝိညာဥ်နှင့်အတူ ခန္ဓာကိုယ်ကိုပါ တစ်စစီ ဖြစ်အောင် သတ်ဖြတ်လိုက်တော့သည်။

ရှောင်ချီသည် မြေပြင်ပေါ်ရှိ သိုလှောင်အိတ် အားလုံးကို အမြန်ဆုံး ကောက်ယူလိုက်ပြီး သိုလှောင်အိတ် အကြီးတစ်ခုထဲသို့ စုထည့်လိုက်သည်။

ထို့နောက် အလောင်းအားလုံးကို သိမ်းဆည်းကာ တိုက်ပွဲဖြစ်ပွားခဲ့သည့် အမှတ်အသားများကိုပါ ဖျက်ဆီးပစ်လိုက်တော့သည်။