အခန်း (၂၅)  ဝိညာဉ်ကြောကို တိုက်ခိုက်ခြင်း

သို့သော် စကားကလည်း ပြောပြီးသွားပြီဖြစ်ရာ နုတ်ထွက်ရန်မှာ လုံးဝမဖြစ်နိုင်တော့ပေ။ မဟုတ်လျှင် သူ၏ စည်းကမ်းထိန်းသိမ်းရေး အကြီးအကဲဟူသော ဂုဏ်သိက္ခာမှာလည်း ပျောက်ကွယ်သွားပေလိမ့်မည်။

ပါရမီရှင်တွေဆိုတာ သူတို့ရဲ့ ခရီးလမ်းမှာ အခက်အခဲတွေနဲ့ အမြဲရင်ဆိုင်ရမှာပဲ။ နောက်ဆုံးအထိ အသက်ရှင်နိုင်တဲ့ ပါရမီရှင်ကမှ အစွမ်းထက်တဲ့ ပုဂ္ဂိုလ်ဖြစ်လာမှာ။ မတော်တဆမှုတစ်ခုနဲ့ သေသွားတဲ့ ပါရမီရှင်ဆိုတာကတော့ နောက်ဆုံးမှာ မြေကြီးတစ်ဆုပ်ထက် မပိုပါဘူး။

ထိုသို့တွေးတောပြီးနောက် ပြစ်ဒဏ်ပေးရေး အကြီးအကဲသည် တွန့်ဆုတ်မနေတော့ပေ။ လက်ရှိတွင် ဂိုဏ်းချုပ်မှာ အောင်မြင်စွာ ကျင့်ကြံနိုင်သည့် အစွမ်းထက် ပုဂ္ဂိုလ်တစ်ဦး ဖြစ်သည်။ ယခု သူပြသသည့် သဘောထားမှာ ဂိုဏ်းအတွင်း သူ၏အနာဂတ် ပြစ်ဒဏ်ပေးရေး အကြီးအကဲအဆင့်အတန်းကို ဆုံးဖြတ်ပေးမည် မဟုတ်ပါလား။

"သူ့ကို နှိမ်နှင်းစမ်း" အကြီးအကဲက ဟိန်းဟောက်လိုက်သည်။ ခန့်ညားထည်ဝါသော ဝိညာဉ်စွမ်းအားများမှာ သူ၏ ခန္ဓာကိုယ်မှ ထွက်ပေါ်လာပြီး ရှောင်ချီအပေါ်သို့ ပြင်းထန်စွာ ဖိနှိပ်ကျဆင်းလာသည်။

ထို့နောက်တွင် ကြိုးနှစ်ချောင်းမှာ အလွန်ခက်ခဲလှသော ထောင့်များမှ ရှောင်ချီကို တင်းတင်းကျပ်ကျပ် ချည်နှောင်လိုက်တော့သည်။

အကြီးအကဲ... ကျေးဇူးပြုပြီး သက်ညှာပေးပါ ဒီ မိုးကြိုးကြိမ်ဒဏ်က ဝိညာဉ်ဓားဂိုဏ်းမှာ အပြင်းထန်ဆုံး ပြစ်ဒဏ်ပါ။ ၎င်းဟာ အရေပြားကို လောင်ကျွမ်းစေရုံတင်မကဘဲ အရိုးတွေအထိပါ စားပွားစေနိုင်တာပါ။ အကယ်၍ ဒီကြိမ်ဒဏ် ၃၀ သာ ကျရောက်သွားမယ်ဆိုရင် စီနီယာအစ်ကို မသေရင်တောင် သူ၏ ကျင့်ကြံခြင်း အခြေခံဟာ လုံးဝ ပျက်စီးသွားပါလိမ့်မယ်။

စီနီယာအစ်ကိုဟာ အရင်က ဝိညာဉ်ဓားဂိုဏ်းအတွက် အသက်စွန့်ခဲ့ဖူးတာကို ထောက်ထားပြီး ဒီတစ်ကြိမ်တော့ ချမ်းသာပေးပါ လင်းယွီရှို့သည် ရှောင်ချီ၏ ဘေးတွင် ရပ်နေပြီး ယခုအချိန်အထိ တိတ်ဆိတ်နေခဲ့သော်လည်း သူမ၏စီနီယာအစ်ကိုက အလျှော့ပေးစကား မပြောသည့်အပြင် အကြီးအကဲကလည်း ဆုံးဖြတ်ချက် ခိုင်မာနေသည်ကို မြင်သောအခါ ချက်ချင်းပင် ဒူးထောက်ကာ ကရုဏာသက်ရန် တောင်းပန်တော့သည်။

သူမသည် သူမ၏ စီနီယာအစ်ကို၏ စရိုက်ကို သိသည် သူသည် သူမကို သူ့ကိုယ်စား တောင်းပန်စေချင်မည် မဟုတ်ပေ။ သို့သော် သူ၏ ကျင့်ကြံခြင်း အခြေခံ ပျက်စီးတော့မည့် အခြေအနေကို ကြည့်ပြီး သူမ တကယ်ကို မခံစားနိုင်တော့ပေ။

ယဲ့ဖန်သည် ရှောင်ချီကို ကြည့်ကာ ကျေနပ်အားရသော အပြုံးတစ်ခု ပြုံးလိုက်သည်။ သူတစ်ပါးလက်ကို ငှားကာ ကလဲ့စားချေခြင်းမှာ သူ၏ဆန္ဒနှင့် အနည်းငယ် ဆန့်ကျင်နေသော်လည်း၊ ရှောင်ချီ၏ အသားများ စုတ်ပြတ်သတ်သွားပြီး သူ၏ အခြေခံများ ပျက်စီးသွားမည်ကို မြင်ရခြင်းက သူ့ကို အလွန်ပင် ပျော်ရွှင်စေသည်။

ရှောင်ချီ... မင်း မသေစေနဲ့ဦးနော် ဒီပြစ်ဒဏ်ကို မင်း ခံနိုင်ရည်ရှိရမယ်။

မှတ်ထားပါ ငါ့ရဲ့ကတိကတော့ တည်မြဲနေတုန်းပဲ။ မင်းရဲ့ အရေပြားနဲ့ အသားတွေကို ခွေးစာကျွေးမယ် မင်းရဲ့ အရိုးတွေကို အမှုန့်လုပ်ပြီး ငါးစာကျွေးမယ် ပြီးတော့ မင်းရဲ့ ဦးခေါင်းခွံကိုတော့ နေ့ညမပြတ် သုံးဖို့အတွက် ကျင်ငယ်ခွက်လုပ်ပစ်မယ်။

ယဲ့ဖန်က ရှောင်ချီဘက်သို့ လှည့်ကြည့်ကာ ရူးသွပ်သော အပြုံးတစ်ခုနှင့်အတူ အေးစက်လှသော လေသံဖြင့် ပြောလိုက်သည်။

ပြစ်ဒဏ်ပေးရေး အကြီးအကဲမှာ မျက်မှောင် အနည်းငယ် ကြုတ်သွားခဲ့သည်။ သူ၏ ရှေ့မှောက်မှာပင် အခြားတပည့်တစ်ဦးကို ခြိမ်းခြောက်ရဲသည်ဆိုကတည်းက ဂိုဏ်းချုပ်၏ ဤတပည့်မှာလည်း မရိုးရှင်းသည့် ပုဂ္ဂိုလ်တစ်ဦး ဖြစ်ပုံရသည်။

ရှောင်ချီသည် ရုန်းကန်ရန် ကြိုးစားသော်လည်း ချည်နှောင်ထားသည့် ကြိုးများမှာ အလွန်ပင် တင်းကျပ်လွန်းနေသည်။ သူ၏ လက်ရှိ ကျင့်ကြံဆင့်ဖြင့် လုံးဝ ရုန်းထွက်နိုင်ခြင်း မရှိပေ။ သူ၏ ဒဏ်ရာများ အပြည့်အဝ ပျောက်ကင်းနေလျှင်တောင် ဤဘေးဒုက္ခမှ လွတ်မြောက်နိုင်မည် မဟုတ်ပေ။

"လာစမ်းပါ... မင်းတို့ စည်းကမ်းထိန်းသိမ်းရေးဌာနက အမှိုက်တွေမှာ ဘာလက်ကွက်တွေ ရှိသလဲဆိုတာ ငါ ကြည့်ချင်သေးတယ်" ရှောင်ချီမှာ မြေပြင်ပေါ်တွင် လှဲလျက် သူ၏ အရေးကြီးသော သွေးကြောများ ဒန်ထျန်းနှင့် ချီပင်လယ်တို့ကို ဝိညာဉ်စွမ်းအားဖြင့် ကာကွယ်ထားလိုက်သည်။

ဘလက်ဝမ်း နှင့် ဘလက်သရီးတို့သည် သူတို့၏ သိုလှောင်အိတ်များထဲမှ လျှပ်စစ်များ လက်ကနဲ လက်ကနဲ ဖြစ်နေသော အနက်ရောင် ကြိမ်လုံးနှစ်လုံးကို ထုတ်လိုက်ကြသည်။

ထိုကြိမ်လုံးများမှ အပြာနုရောင် အလင်းတန်းများ ထွက်ပေါ်နေပြီး တဲအတွင်းတွင် လျှပ်စစ်ဓာတ်စီးနေသည့် အသံများမှာလည်း ရံဖန်ရံခါ ထွက်ပေါ်နေလေသည်။

သူ၏ လက်ဖက်ရည်အိုးထဲတွင် ရေကုန်နေသည်ကို မြင်သောအခါ ပြစ်ဒဏ်ပေးရေး အကြီးအကဲမှာ မတ်တပ်ရပ်လိုက်ပြီး အနီးနားရှိ ရေနွေးအိုးကို ယူကာ ရေနွေးထည့်လိုက်သည်။

လက်ဖက်ရည်နံ့များ ပျံ့လွင့်လာသည်အထိ စောင့်ပြီးနောက်တွင် သူသည် လက်ဖက်ရည်ကို ခွက်ထဲသို့ ငှဲ့လိုက်ပြီး တစ်ငုံချင်း အရသာခံ သောက်လိုက်သည်။ ထို့နောက် သက်ပြင်းတစ်ချက် ချလိုက်ကာ "ကဲ... ပြစ်ဒဏ်ကို စတင်လိုက်တော့" ဟု ပြောလိုက်လေသည်။

ဖြောင်း... ကြိမ်လုံးရိုက်သံ ထွက်ပေါ်လာသည်နှင့်အမျှ လျှပ်စစ်များ လက်နေသော အနက်ရောင် ကြိမ်လုံးမှာ ရှောင်ချီ၏ ခန္ဓာကိုယ်ပေါ်သို့ ပြင်းထန်စွာ ကျရောက်သွားခဲ့သည်။

ရှောင်ချီသည် ပထမဦးစွာ သူ၏ ခန္ဓာကိုယ်ပေါ်သို့ ပူလောင်လှသော အပူရှိန်တစ်ခု စီးဆင်းသွားသည်ကို ခံစားလိုက်ရပြီး နောက်တစ်ခဏတွင်တော့ စူးရှလှသော နာကျင်မှုတစ်ခုမှာ သူ၏ အရေပြားမှသည် အရိုးများအထိ အရိုးများမှသည် အတွင်းကလီစာများအထိ ထိုးဖောက်ဝင်ရောက်သွားခဲ့သည်။

ထိုပြိုင်ဘက်ကင်းလှသော နာကျင်မှုက သူ၏ အသိစိတ်ကိုပင် ပျောက်ကွယ်သွားစေမတတ် ဖြစ်စေခဲ့သည် သို့သော် သူသည် သွားကို တင်းတင်းကြိတ်ထားပြီး မည်သည့် အသံမျှ ထွက်မလာအောင် ထိန်းထားလိုက်သည်။

လင်းယွီရှို့သည် သူတို့ကို တားဆီးရန်အတွက် ရှေ့သို့ တိုးချင်သော်လည်း အခြား အနက်ရောင်ဝတ်စုံဝတ်လူတစ်ဦးက သူမကို ပိတ်ဆို့ထားလိုက်သည်။

"ကျွန်မရဲ့ စီနီယာအစ်ကိုကို လွှတ်ပေးပါ ကျွန်မရဲ့စီနီယာအစ်ကိုမှာ အပြစ်မရှိဘူး ဘာအကြောင်းနဲ့ သူ့ကိုရိုက်နေကြတာလဲ" ကောင်မလေးသည် ရှောင်ချီကို ကူညီရန်အတွက် အစွမ်းကုန် ရုန်းကန်နေရှာသည်။

သို့သော် သူမမှာ အလွန်အားနည်းလွန်းလှသဖြင့် ထိုလူများ၏ တားဆီးမှုမှ လုံးဝ ရုန်းမထွက်နိုင်ပေ။

ဘေးတစ်ဖက်တွင်မူ လင်းကျောင်လန်နှင့် ယဲ့ဖန်တို့သည် ရှောင်ချီ ပြစ်ဒဏ်ခံနေရသည့် ကောင်းကွက်ကို မျက်တောင်မခတ်ဘဲ ကြည့်နေကြသည်။ သူတို့အတွက်တော့ ၎င်းမှာ ကမ္ဘာပေါ်တွင် အလှပဆုံး ရှုခင်းတစ်ခုကို ကြည့်နေရသကဲ့သို့ပင်။

မကြာသေးမီက လင်းကျောင်လန်မှာ ရှောင်ချီကြောင့် စိတ်စွဲလမ်းမှုဖြစ်လုနီးပါး ဖြစ်ခဲ့ရသည်။ တွေ့တိုင်း တွေ့တိုင်း သူမမှာ ဒဏ်ရာဗရပွနှင့် ကျန်ရစ်ခဲ့ရသည် မဟုတ်ပါလား။ ယခုအခါ ရှောင်ချီ၏သနားစရာ အခြေအနေကို မြင်ရသဖြင့် သူမ အလွန်ပင် စိတ်ကျေနပ်သွားခဲ့သည်။ သူမ၏ ကျင့်ကြံဆင့်မှာပင် သူမ မသိလိုက်ဘဲ အနည်းငယ် တိုးတက်သွားခဲ့သည်။

သို့သော်လည်း ကြိမ်ဒဏ် ဆယ်ချက်ကျော်ခန့် ရိုက်ပြီးချိန်မှာပင် အပြင်ဘက်မှ ဆူညံသံများ ရုတ်တရက် ပေါ်ထွက်လာတော့သည်။

"အကြီးအကဲ... မကောင်းတော့ဘူး အစွမ်းထက်တဲ့ ပုဂ္ဂိုလ်တစ်ယောက်က ဝိညာဉ်ကြောကို လာပြီး တိုက်ခိုက်နေပါတယ်" တပည့်တစ်ဦးမှာ တဲအတွင်းသို့ အသည်းအသန် ပြေးဝင်လာပြီး ပြစ်ဒဏ်ပေးရေး အကြီးအကဲ၏ ရှေ့တွင် ဒူးထောက်လိုက်သည်။

"အကြီးအကဲချန် ကဘာလုပ်နေတာလဲ သူက ဒီဝိညာဉ်ကြောကို စောင့်ရှောက်ဖို့ တာဝန်ရှိတာ မဟုတ်ဘူးလား ဒီလို သေးဖွဲတဲ့ကိစ္စမျိုးကို ငါ့ကို လာပြောနေဖို့ လိုလို့လား"

ပြစ်ဒဏ်ပေးရေး အကြီးအကဲ ကျန်းချီနင်က သတင်းလာပို့သော တပည့်ကို အေးစက်စွာ တစ်ချက်ကြည့်လိုက်ပြီး တည်ငြိမ်စွာ ပြောလိုက်သည်။

မကြာသေးမီက ဝိညာဉ်မိုင်းတွင်းကို လာရောက်တိုက်ခိုက်သူများမှာ အားနည်းသူများသာ ဖြစ်ကြသည်။ ဝိညာဉ်ပြောင်းလဲခြင်း အဆင့်ရှိသည့် အကြီးအကဲတစ်ဦးက သူတို့ကို လုံးဝ နှိမ်နှင်းနိုင်သည် မဟုတ်ပါလား။ သူသည် ဤနေရာသို့ ရှောင်ချီကို ပြစ်ဒဏ်ပေးရန်သာ လာခဲ့ခြင်း ဖြစ်သဖြင့် တခြားကိစ္စများကို စိတ်မဝင်စားပေ။

ပြစ်ဒဏ်ပေးရေး အကြီးအကဲကို တင်ပြရရင်... ဒီတစ်ကြိမ်မှာတော့ ဟင်းလင်းပြင်သို့ ပြန်ခြင်းအဆင့်ရှိတဲ့ ကျွမ်းကျင်သူတစ်ဦးက တိုက်ခိုက်နေတာပါ။ အကြီးအကဲချန်ဟာ ထိပ်တိုက်ရင်ဆိုင်မှု တစ်ခုတည်းမှာတင် ပြင်းပြင်းထန်ထန် ဒဏ်ရာရသွားပြီး အခု ထွက်ပြေးနေရပါပြီ။ ကျေးဇူးပြုပြီး ပြစ်ဒဏ်ပေးရေးအကြီးအကဲ အမြန်ဆုံး ကြွရောက်ပြီး ဝိညာဉ်ဓားဂိုဏ်း တပည့်တွေကို ကယ်တင်ပေးပါဦး"

တပည့်ဖြစ်သူ၏ အသံမှာ တုန်ရီနေပြီး သူ၏ မျက်ရည်များဖြင့် အမူအရာမှာ ကြည့်ရသူကို သနားစရာ ကောင်းလှသည်။

"ဘယ်လိုဖြစ်ရတာလဲ ဒီကောင်တွေက ငါတို့ ဝိညာဉ်ဓားဂိုဏ်းကို တကယ်ပဲ ဖျက်ဆီးပစ်ချင်နေကြတာလား" ကျန်းချီနင်၏ ရင်ထဲတွင် ထိတ်ခနဲ ဖြစ်သွားပြီး မကောင်းသော နိမိတ်တစ်ခုကို ခံစားလိုက်ရသည်။

မူလက မည်သည့်ဂိုဏ်းက ဝိညာဉ်ကြောကို လာရောက်တိုက်ခိုက်သည်ဖြစ်စေ သူတို့စေလွှတ်သည့် အစွမ်းထက်ဆုံးသူမှာ ဝိညာဉ်ပြောင်းလဲခြင်း အဆင့်မှာသာရှိတတ်သည်။

၎င်းမှာ နှစ်ဖက်စလုံး၏ တိတ်တဆိတ် သဘောတူညီချက်တစ်ခုလို ဖြစ်နေခဲ့သည်။ ဝိညာဉ်ဓားဂိုဏ်း၏ အထက်လူကြီးများမှာလည်း ဤအခြေအနေကို ပုံမှန်ဟုသာ သတ်မှတ်ထားခဲ့ကြသည်။

ယခုကဲ့သို့ ကြီးမားသော ပြောင်းလဲမှု ဖြစ်လာလိမ့်မည်ဟု သူ မထင်ထားခဲ့ပေ။ ထိုဂိုဏ်းများသည် ဝိညာဉ်ဓားဂိုဏ်း၏ အခြေခံများကို စမ်းသပ်ပြီးပြီဖြစ်ကာ နောက်ဆုံး သေစေနိုင်သော ထိုးနှက်ချက်ကို ပေးရန် ပြင်ဆင်ထားကြပုံရသည်။

အဆင့်နိမ့်တဲ့ကောင်တွေကများ ငါ့ရဲ့ ဝိညာဉ်ဓားဂိုဏ်းကို ဒီလောက်အထိ အထင်သေးရဲတယ်ပေါ့။

ဘလက်ဝမ်း၊ဘလက်သရီး... ဒီကောင့်ကို ခဏထားလိုက်ဦး ငါနဲ့အတူ တဲအပြင်ကို လိုက်ခဲ့ပြီး ရန်သူတွေကို သတ်ကြမယ်။

ခဏမျှ စဉ်းစားပြီးနောက် ပြစ်ဒဏ်ပေးရေး အကြီးအကဲက ဆုံးဖြတ်ချက် ချလိုက်သည်။ ဂိုဏ်း၏ ကိစ္စက အရေးကြီးဆုံး ဖြစ်သည်။ တပည့်တစ်ဦးကို ပြစ်ဒဏ်ပေးသည့် ကိစ္စမှာ ဘယ်အချိန်မဆို လုပ်နိုင်သည် မဟုတ်ပါလား။

သို့သော် သူတို့ ထွက်မသွားခင်မှာ ရှောင်ချီ၏ ခန္ဓာကိုယ်ပေါ်ရှိ ကြိုးများကို ဖြည်မပေးခဲ့ကြပေ။

ရှောင်ချီမှာမူ သတ်ရန်ပြင်ထားသော သိုးငယ်တစ်ကောင်ကဲ့သို့ ချည်နှောင်ခံထားရဆဲ ဖြစ်သည်။ အကယ်၍ ရန်သူဘက်မှ အစွမ်းထက်သူတစ်ဦးသာ ဤအချိန်တွင် ဝင်လာခဲ့လျှင် ရှောင်ချီ သေချာပေါက် သေဆုံးပေလိမ့်မည်။

၎င်းမှာ ပြစ်ဒဏ်ပေးရေး အကြီးအကဲ၏ မကောင်းသော ရည်ရွယ်ချက်လည်းဖြစ်သည် သူသည်လည်း သူတစ်ပါးလက်ကို ငှားကာ ရှောင်ချီကို သတ်ချင်သည့် ဆန္ဒရှိနေသည် မဟုတ်ပါလား။

ပြစ်ဒဏ်ပေးရေး အကြီးအကဲ ထွက်သွားသည်ကို ကြည့်ရင်း ဘေးတွင် ရပ်နေသော လင်းကျောင်လန်နှင့် ယဲ့ဖန်တို့မှာ ခဏမျှ မှင်သက်သွားခဲ့ကြသည်။

လင်းကျောင်လန်က သူမ၏ ဘေးမှ ယဲ့ဖန်ကို ကြောက်ရွံ့စွာဖြင့်ပြောလိုက်သည် "ဖန်လောင်... ငါတို့ အမြန်ထွက်သွားရအောင် အကယ်၍ တစ်ယောက်ယောက် တကယ်ဝင်လာရင် ငါတို့နှစ်ယောက်ရဲ့ လက်ရှိ အခြေအနေနဲ့ဆိုရင် သူတို့ကို ယှဉ်နိုင်မှာ မဟုတ်ဘူး"

သူမကိုယ်တိုင်မှာ အမြုတေဖွဲ့စည်းခြင်းအဆင့်၏ အလယ်အလတ်ပိုင်း ကျင့်ကြံသူတစ်ဦးသာဖြစ်ပြီး ဒဏ်ရာရထားသူလည်း ဖြစ်သည်။ အများဆုံးဆိုလျှင် အမြုတေဖွဲ့စည်းခြင်း အဆင့်ရှိသည့် နောက်လိုက်တစ်ဦးကိုသာ ရင်ဆိုင်နိုင်ပေလိမ့်မည်။

ယဲ့ဖန်မှာမူ နတ်သန္ဓေ သို့မဟုတ် ဝိညာဉ်ပြောင်းလဲခြင်းအဆင့်ရှိသည့် တိုက်ခိုက်ရေးစွမ်းအားကို ပေါက်ကွဲထုတ်နိုင်သော်လည်း လက်ရှိတွင် သူ၏ ခန္ဓာကိုယ်မှာ အပြင်းအထန် ပျက်စီးနေသည်။ သူသည် အမြုတေဖွဲ့စည်းခြင်း အဆင့်ရှိသည့် နောက်လိုက်တစ်ဦးကိုပင် ရင်ဆိုင်ရန် ခက်ခဲနေပေလိမ့်မည်။

ယဲ့ဖန်က ခေါင်းညိတ်ကာ သဘောတူလိုက်သော်လည်း မြေပြင်ပေါ်တွင် မလှုပ်မယှက် လဲလျောင်းနေသော ရှောင်ချီကို မြင်လိုက်ရသည့်အခါ သူ၏ စိတ်ထဲတွင် အတွေးတစ်ခု ချက်ချင်း ပေါ်လာတော့သည်။