အခန်း (၂၄) မိုးကြိုးနတ်မင်း ကြိမ်ဒဏ် အချက်ပေါင်း သုံးရာ
"ပါးစပ်ပိတ်ထားစမ်း မဟုတ်ရင် မင်းရဲ့ နောက်ထပ်ခြေထောက်တစ်ဖက်ကိုပါ ငါချိုးပစ်မယ်" ရှောင်ချီက ယဲ့ဖန်ကို အေးစက်စွာ စိုက်ကြည့်ရင်း ခြိမ်းခြောက်လိုက်သည်။
"မင်း..." ယဲ့ဖန်သည် ငယ်စဉ်ကတည်းက ဤကဲ့သို့သော အရှက်ရမှုကို တစ်ခါမျှ မခံစားခဲ့ဖူးပေ။
သူသည် အမြဲတမ်း အရှုံးမပေးတတ်သူ ဖြစ်သော်လည်း ဤတိုက်ပွဲတွင် သူ၏ အစွမ်းအားလုံးကို ထုတ်သုံးခဲ့သည်။ သူ၏ ဆရာထံမှ စွမ်းအားများကိုပင် ငှားရမ်းခဲ့သော်လည်း ရှောင်ချီကို အနိုင်မရခဲ့ပေ။ ထို့အပြင် လက်တစ်ဖက်နှင့် ခြေတစ်ဖက် ဆုံးရှုံးခဲ့ရသဖြင့် ယခုအခါ မသန်စွမ်းသူတစ်ပိုင်း ဖြစ်နေရပြီ ဖြစ်သည်။
သို့သော် သူ၏ ဆရာတွင်ရှိသည့် နည်းလမ်းများနှင့် မွေးရာပါ ဝိညာဉ်အဆီအနှစ်၏ ကုသနိုင်စွမ်းတို့ဖြင့် သူ၏လက်မောင်းနှင့် ခြေထောက်ကို မကြာမီ ပြန်လည်ရရှိနိုင်မည်ဟု သူ ယုံကြည်နေသည်။
သို့သော်လည်း ယဲ့ဖန်မှာ အလွန်ပင် မကျေမနပ် ဖြစ်နေရသည်။ ရှောင်ချီကို မြင်တိုင်း သူသည် ဖိနှိပ်ခံထားရသလို ခံစားရပြီး အသက်ရှူရပင် ခက်ခဲနေစေသည်။ ၎င်းမှာ သူ၏ ကျင့်ကြံခြင်း တိုးတက်မှုကိုပင် ထိခိုက်စေသည်အထိဖြစ်နေတော့သည်။
"ရှောင်ချီ မင်းမှာ အစွမ်းရှိရင် ငါ့ကို အခုသတ်လိုက်။ မဟုတ်ရင် ဒီနေ့ရတဲ့ အရှက်ကို နောင်တစ်ချိန်မှာ ငါအဆတစ်ရာ ပြန်ပေးဆပ်စေရမယ်" ယဲ့ဖန်က ရှောင်ချီကို အေးစက်စွာ စိုက်ကြည့်လိုက်ရာ သူ၏ အငွေ့အသက်များ ထွက်ပေါ်လာသည်။ သူသည် အခြေခံအုတ်မြစ်တည်ဆောက်ခြင်း အဆင့်မှာသာ ရှိသေးသော်လည်း ထိုအငွေ့အသက်မှာ အလွန်ပင် ထက်ရှလှသည်။
"ငါ မလုပ်ရဲဘူး ထင်နေတာလား အခုထိ ဟန်ဆောင်နေတုန်းပဲလား မင်းအရိုက်ခံရတာ နည်းနေသေးတာပဲ" ရှောင်ချီက သူ၏ လက်များကို လိပ်တင်လိုက်ပြီး လက်စပြုရန် ပြင်လိုက်တော့သည်။
"နတ်ဘုရားသားတော်... ခင်ဗျားက ကျွန်တော်တို့ရဲ့ စည်းကမ်းထိန်းသိမ်းရေးဌာနကို အထင်သေးလွန်းနေတာမဟုတ်ဘူးလား"
ထိုအနက်ရောင်ဝတ်စုံဝတ်လူက ရှောင်ချီကို လှည့်ကြည့်လိုက်ပြီး သူ၏ အကြည့်မှာ အေးစက်နေကာ နတ်သန္ဓေကျင့်ကြံအဆင့်မှာ ပေါက်ကွဲထွက်ပေါ်လာသည်။
"ငါ အထင်သေးသလား မသေးဘူးလားဆိုတာ ခဏနေရင်မင်းတို့ရဲ့ အကြီးအကဲ က ငါ့အပေါ် ဘယ်လိုသဘောထားမလဲ ဆိုတာပေါ်မှာ မူတည်တယ် ဒီစီနီယာအစ်ကိုက ပြောလာမှတော့ ငါ မင်းကိုမျက်နှာသာပေးတဲ့အနေနဲ့ ဒီကောင့်ကို ဒီတစ်ခါတော့ လွှတ်ပေးလိုက်မယ်"
ရှောင်ချီ၏နှုတ်ခမ်းဖျားတွင် အပြုံးတစ်ခု ပေါ်လာပြီး အနက်ရောင်ဝတ်စုံဝတ်လူကို ကြည့်ကာ ခေါင်းညိတ်ပြလိုက်သည်။
အတိတ်ဘဝတုန်းက သူသည် ဤပြစ်ဒဏ်ပေးရေး အကြီးအကဲအပေါ်တွင် အမှတ်အသား အများကြီး မရှိခဲ့ပေ။
သူ မှတ်မိသလောက်ဆိုလျှင် ထိုလူမှာ အနည်းငယ် ရှေးရိုးစွဲသော်လည်း အားကိုးထိုက်သည့် အဘိုးကြီးတစ်ဦးသာ ဖြစ်သည်ထိုစဉ်က ဘေးဒုက္ခကြီးအတွင်း၌ သူသည်လည်း အခြားအကြီးအကဲများနှင့်အတူ တိုက်ပွဲဝင်ရင်း သေဆုံးသွားခဲ့သူ ဖြစ်သည်။
အနက်ရောင်ဝတ်စုံဝတ်လူမှာ သူ၏ အကြည့်ကို ပြန်ရုပ်သိမ်းလိုက်ပြီး ဘာမှထပ်မပြောတော့ပေ။ မကြာမီမှာပင် သူသည် လူအချို့ကို ဦးဆောင်ကာ အဓိကတဲအတွင်းသို့ ဝင်သွားတော့သည်။ ထိုအချိန်တွင် ဆံပင်ဖြူ၊ မုတ်ဆိတ်ဖြူနှင့် အဘိုးကြီးတစ်ဦးသည် တဲအတွင်းရှိ မြင့်မားသော စားပွဲတွင် ထိုင်နေလေသည်။
ထိုနေရာတွင် ထိုင်နေရုံမျှဖြင့် သူ၏ ထွက်ပေါ်လာသော ခန့်ညားထည်ဝါသည့် အငွေ့အသက်မှာ ဘေးပတ်ဝန်းကျင်ရှိ လူများကို သူ့ကို သေချာပင် မကြည့်ရဲအောင် ပြုလုပ်ထားလေသည်။
"တပည့် ယဲ့ဖန်က ပြစ်ဒဏ်ပေးရေး အကြီးအကဲကို ဂါရဝပြုပါတယ်။ ကျေးဇူးပြုပြီး တပည့်အတွက် တရားမျှတမှုကို ရှာဖွေပေးပါ"
ယဲ့ဖန်သည် လက်တစ်ဖက်ဖြင့် အားပြုကာ ကျန်ရှိနေသော ခြေထောက်တစ်ဖက်တည်းနှင့် ဖြည်းဖြည်းချင်း ဒူးထောက်လိုက်သည် အကယ်၍ စိတ်နှလုံး နူးညံ့လှသော သူဌေးကတ္တီပါ မျိုးနွယ်စုမှ သခင်မလေးများသာ ဤမြင်ကွင်းကို မြင်လျှင် မျက်ရည်ကျမိကြပေလိမ့်မည်။
ယခုအချိန်တွင် ယဲ့ဖန်မှာ တကယ်ကို သနားစရာ ကောင်းလှသည်။ သူသာ လမ်းဘေးမှာ ထိုင်နေမည်ဆိုလျှင် တစ်စုံတစ်ယောက်က သူ့ကို ကြေးပြားအချို့ပင် ပစ်ပေးမိကြပေလိမ့်မည်။
"အင့်..." လင်းကျောင်လန်သည် သူမ၏ ငိုသံကို သူများမကြားအောင် ပါးစပ်ကို အတင်းအုပ်ထားရှာသည်။
တစ်ချိန်တည်းမှာပင် ရှောင်ချီမှာမူ အေးစက်စွာ ရပ်နေပြီး သူတို့နှစ်ဦးကို အေးအေးဆေးဆေး စိုက်ကြည့်နေသည်။ ထို့နောက်တွင် သူသည် အဓိကနေရာတွင် ထိုင်နေသော စည်းကမ်းထိန်းသိမ်းရေး အကြီးအကဲကို ကြည့်လိုက်သည်။
"ဘယ်လောက်တောင် ရဲတင်းလိုက်လဲ ရှောင်ချီ ပြစ်ဒဏ်ပေးရေး အကြီးအကဲကို မြင်တာတောင် ဘာလို့ဒူးမထောက်တာလဲ" အကြီးအကဲ၏ဘေးရှိ အနက်ရောင်ဝတ်စုံဝတ်လူက ဒေါသတကြီး အော်ဟစ်လိုက်သည်။
"အဲဒီ အဘိုးကြီးဂိုဏ်းချုပ် နဲ့ တွေ့ရင်တောင် ငါ တစ်ခါမှဒူးမထောက်ခဲ့ဖူးဘူး။ ပြစ်ဒဏ်ပေးရေး အကြီးအကဲတစ်ယောက်က ငါ့ကို ဦးညွှတ်ခိုင်းချင်တာလား လုံးဝမဖြစ်နိုင်ဘူး" ရှောင်ချီသည် အကြီးအကဲ၏ ရှေ့မှ အနက်ရောင်ဝတ်စုံဝတ်လူကို ဂရုမစိုက်သလို တစ်ချက်ကြည့်လိုက်ပြီး အေးစက်တည်ငြိမ်စွာ ပြောလိုက်သည်။
"မင်း သေချင်နေပြီပဲ" အနက်ရောင်ဝတ်စုံဝတ်လူမှာ ဟိန်းဟောက်လိုက်ပြီး တိုက်ခိုက်ရန် ပြင်လိုက်တော့သည်။
"ထားလိုက်စမ်း ဘလက်ဝမ်း ဒီကလေးရဲ့ အင်အားက အရမ်းကြီးတယ်၊ မင်းက သူ့ရဲ့ ပြိုင်ဘက် မဟုတ်ဘူး" အဓိကနေရာတွင် ထိုင်နေသော ပြစ်ဒဏ်ပေးရေး အကြီးအကဲ ကျန်းချီနင်က သူ့ဘေးမှ အနက်ရောင်ဝတ်စုံဝတ်လူကို ကြည့်ကာ အေးဆေးစွာ ပြောလိုက်သည်။
"ဟုတ်ကဲ့ပါ" ဘလက်ဝမ်းက ရှောင်ချီကို အေးစက်စွာ တစ်ချက်ကြည့်လိုက်ပြီး လက်အုပ်ချီ ဦးညွှတ်ကာ ဘေးသို့ ဆုတ်ခွာသွားတော့သည်။
"ရှောင်ချီ... မင်းရဲ့ အပြစ်ကိုမင်းသိလား" အဓိကနေရာမှ အဘိုးကြီးက မျက်လုံးကို အနည်းငယ်မြှင့်ကာ အောက်ဘက်မှ မောက်မာနေသော ရှောင်ချီကို မေးလိုက်သည်။
"ကျွန်တော့်မှာ အပြစ်မရှိဘူး။ ဘာအပြစ်ကို ဝန်ခံရမှာလဲ" ရှောင်ချီက ကျောကို မတ်မတ်ဆန့်ကာ ကျယ်လောင်သော အသံဖြင့် ပြောလိုက်သည်။
"မင်းမှာ အပြစ်ရှိမရှိဆိုတာက မင်းဆုံးဖြတ်ရမှာ မဟုတ်ဘူး။ ဂိုဏ်းချုပ်က မင်းအတွက် ပြစ်ဒဏ်ကို ဆုံးဖြတ်ပြီးသား ဖြစ်နေပြီ"
"ဒီအဖိုးကြီးကတော့ မင်းကို ပြစ်ဒဏ်ပေးဖို့အတွက် ဂိုဏ်းချုပ်ရဲ့ ကိုယ်စားလှယ်အနေနဲ့ ရောက်လာတာပဲ" အဘိုးကြီးက သူ၏ မုတ်ဆိတ်ရှည်ကို သပ်လိုက်ပြီး ရှောင်ချီကို အေးစက်သော မျက်နှာထားဖြင့် ကြည့်လိုက်သည်။
"အပြစ်ကို ဆုံးဖြတ်ပြီးသားဆိုရင်လည်း ပေးစရာရှိတဲ့ ပြစ်ဒဏ်ကို ပေးလိုက်ရုံပဲလေ။ ဘာလို့ စကားတွေအများကြီး ပြောနေမှာလဲ" ရှောင်ချီက ဂရုမစိုက်သည့် အမူအရာဖြင့် ခေါင်းညိတ်လိုက်သည်။
ရှပ် ဓားဆွဲထုတ်သံတစ်ခု ထွက်ပေါ်လာသည်။ ရှောင်ချီတို့ကို စခန်းတဲဆီမှ ဦးဆောင်ခေါ်လာသော အနက်ရောင်ဝတ်စုံဝတ်လူမှာ လျင်မြန်စွာ လှုပ်ရှားလိုက်ပြီး ရှောင်ချီ၏ ဘယ်ဘက်လက်မောင်းကို ခုတ်ချလိုက်တော့သည်။
"ပြစ်ဒဏ်ပေးရေး အကြီးအကဲကို ထပ်ခါတလဲလဲ မလေးမစား လုပ်တာဟာ အသက်ရှင်ဖို့ မတန်တော့ဘူး" အနက်ရောင်ဝတ်စုံဝတ်လူ၏ မျက်နှာမှာ အေးစက်နေပြီး သူ၏ တိုက်ကွက်မှာ လျင်မြန်ပြီး ပြတ်သားလှသည်။
ဘုန်း... ရှောင်ချီကလည်း ပြတ်သားစွာ တုံ့ပြန်လိုက်သည်။ သူသည် အနက်ရောင်ဝတ်စုံဝတ်လူ၏ ရင်ဘတ်ကို ပြင်းထန်စွာ ကန်ထုတ်လိုက်ရာ ထိုသူမှာအနီးနားရှိ စားပွဲတစ်ခုပေါ်သို့ ကျယ်လောင်သော အသံနှင့်အတူ လွင့်စင်သွားတော့သည်။
"ကိုယ့်အင်အားကို ကိုယ်မသိဘဲ ငါ့ကို လာတိုက်ခိုက်ရဲတယ်ပေါ့" ရှောင်ချီသည် ထိုသူရှိရာဘက်သို့ တံတွေးထွေးလိုက်ပြီး အထင်သေးစွာ ပြောလိုက်သည်။
"ဘလက်သရီး.. အဆင်ပြေရဲ့လား" ဘလက်ဝမ်းက ရှေ့သို့ အမြန်တိုးကာ အနက်ရောင်ဝတ်စုံဝတ်လူကို ထူပေးရင်း စိုးရိမ်တကြီး မေးလိုက်သည်။
"အဆင်ပြေပါတယ်... ဒီကောင်က တကယ်ကို သန်မာတာပဲ" ဘလက်သရီးသည် သွေးတစ်လုပ် အန်ထုတ်လိုက်ပြီး မနည်းရုန်းထကာ ရှောင်ချီကို သတိထားသည့် အကြည့်ဖြင့် ကြည့်လိုက်သည်။
"ငါ့ရဲ့ ရှေ့မှောက်မှာတင် လူကို ရိုက်ရဲတယ်ပေါ့ မင်းကတော့ မောက်မာလှတဲ့ နတ်ဘုရားသားတော်ဆိုတဲ့ နာမည်နဲ့ တကယ်ကို လိုက်ဖက်တာပဲ" အဘိုးကြီးသည် စားပွဲပေါ်မှ လက်ဖက်ရည်ကို တစ်ငုံသောက်လိုက်ပြီး သူ၏ အကြည့်မှာ ရုတ်တရက် အေးစက်သွားခဲ့သည်။
"ခင်ဗျားမျက်စိကန်းနေတာလား ခင်ဗျားရှေ့က ဒီအနက်ရောင်ဝတ်ထားတဲ့ ခွေးနှစ်ကောင်က လူကို အကြောင်းမဲ့ လာကိုက်ဖို့ လုပ်နေတာလေ ဒါကြောင့် ကျွန်တော်က သူတို့ကို သင်ခန်းစာ ပေးလိုက်တာပေါ့" ရှောင်ချီမှာ ဘာကိုမှ ဂရုမစိုက်သည့် အငွေ့အသက်မျိုး ရှိနေသည်။ သူ့ရှေ့မှ လူမှာ ပြစ်ဒဏ်ပေးရေး အကြီးအကဲ ဖြစ်နေသော်လည်း သူသည် အနည်းငယ်မျှပင် ကြောက်ရွံ့ခြင်း မရှိပေ။
"ဟားဟားဟား... စိတ်ဝင်စားဖို့ ကောင်းလိုက်တာ။ ဒီလို စိတ်ဝင်စားဖို့ကောင်းတဲ့ ဂျူနီယာ မျိုးကို ငါပထမဆုံးအကြိမ် တွေ့ဖူးတာပဲ"
"အစကတော့ ဂိုဏ်းချုပ်က မင်းကို မိုးကြိုးနတ်မင်း ကြိမ်ဒဏ်၁၀ ချက်ပဲ ပေးဖို့ ပြောထားတာပါ။ နောက်ဆုံးတော့ မင်းက ဒဏ်ရာရထားသူဖြစ်သလို ၎င်းဟာ တခြားသူတွေကို သတိပေးတဲ့အနေနဲ့ပဲ ပေးချင်တာလေ။ မင်းရဲ့ အခြေခံတွေ ပျက်စီးသွားရင်လည်း ငါတို့ ဝိညာဉ်ဓားဂိုဏ်းအတွက် ဆုံးရှုံးမှုတစ်ခုပဲ မဟုတ်လား"
ဒါပေမဲ့ မင်းရဲ့ဆရာ က မင်းက အရမ်းကို ဆိုးသွမ်းပြီး ပြုပြင်လို့မရတဲ့အတွက် ပြင်းပြင်းထန်ထန် အပြစ်ပေးသင့်တယ်လို့ ပြောတာကြောင့် ကြိမ်ဒဏ် ၂၀ အထိ တိုးလိုက်တာ။
"အခု မင်း ဒီလောက်အထိ မောက်မာနေတာကို မြင်ရတော့ ငါတကယ်ပဲ မင်းကို ချီးကျူးမိပါတယ်။ ဒါဆိုရင် ဒီအဖိုးကြီးကပဲ ဆုံးဖြတ်ပြီး မင်းကို မိုးကြိုးနတ်မင်း ကြိမ်ဒဏ် နောက်ထပ် အချက်တစ်ရာ ထပ်တိုးပေးလိုက်မယ် ဘယ်လိုလဲ"
အဘိုးကြီးသည် လက်ဖက်ရည်ခွက်ကို ဖြည်းဖြည်းချင်း ချလိုက်ပြီး သူ၏ အငွေ့အသက်မှာ ရှောင်ချီဆီသို့ ရုတ်တရက် ဖိနှိပ်ကျဆင်းလာတော့သည်။
ရှောင်ချီက နှာခေါင်းရှုံ့လိုက်ပြီး အဘိုးကြီး၏ အကြည့်ကို မကြောက်မရွံ့ ရင်ဆိုင်လိုက်သည်။ သူ အမြုတေဖွဲ့စည်းခြင်းအဆင့်မှာတုန်းကတောင် လင်းယွင် နတ်သမီးရဲ့ ဖိအားကို အံတုခဲ့ဖူးသူ ဖြစ်သည်။ ယခုအခါ သူသည် နတ်သန္ဓေအဆင့်၏ အလယ်အလတ်ပိုင်းသို့ ရောက်ရှိနေသည့် ကျွမ်းကျင်သူတစ်ဦး ဖြစ်နေပြီဖြစ်သည်။
လင်းယွင်ထက် အနည်းငယ် အားနည်းသည့် ပြစ်ဒဏ်ပေးရေး အကြီးအကဲ၏ဖိအားကို ရင်ဆိုင်ရသည့်အခါ သူသည် အနည်းငယ်မျှပင် ကြောက်ရွံ့ခြင်း မရှိဘဲ ကျောကိုပင် မကုန်းခဲ့ပေ။
"ကောင်းပြီလေ။ ဒီရက်ပိုင်းအတွင်းမှာ ကျွန်တော့် ခန္ဓာကိုယ်ကလည်း နည်းနည်း ယားနေတာနဲ့ အတော်ပဲ။ ဒီကြိမ်ဒဏ် ၃၀ ကတော့ ကျွန်တော့်ရဲ့ ယားယံမှုကို သက်သာစေဖို့လောက်ပဲ ရှိမှာပါ" ရှောင်ချီက သူ၏ လက်များကို နောက်ပစ်ထားကာ မတ်မတ်ရပ်ရင်း ပြစ်ဒဏ်ပေးရေး အကြီးအကဲကို ကြည့်လိုက်သည်။
ပြစ်ဒဏ်ပေးရေး အကြီးအကဲ ကျန်းချီနင်မှာ ယခုအခါ အတော်လေး အံ့အားသင့်သွားခဲ့ပြီ ဖြစ်သည် သူသည် ဟင်းလင်းပြင်သို့ ပြန်ခြင်း အဆင့်၏ အစောပိုင်းအဆင့်ရှိ ကျွမ်းကျင်သူ ဖြစ်ပြီး ရှောင်ချီထက် အဆင့်ကြီး နှစ်ဆင့်မျှ မြင့်မားသည်။
သူ၏ ဖိအားအောက်တွင် ဤကလေးမှာ လုံးဝ ကြောက်ရွံ့ခြင်း မရှိဘဲ ကျောကိုပင် မကုန်းသည်မှာအံ့ဩစရာပင် ဒီလောက်အထိ ပါရမီထူးတဲ့သူမျိုးက နောင်တစ်ချိန်မှာ သေမသွားဘူးဆိုရင် သေချာပေါက် ကြီးကျယ်တဲ့သူ ဖြစ်လာလိမ့်မယ်။ ငါ ဒီနေ့ နည်းနည်း လက်လွန်သွားတာလား အကယ်၍ ငါ သူ့ကို အငြိုးအတေး ထားသွားအောင် လုပ်မိရင် သူကြီးပြင်းလာတဲ့အခါ ငါ့ကို ကလဲ့စားမချေဘူးလို့ မပြောနိုင်ဘူး။
ပြစ်ဒဏ်ပေးရေး အကြီးအကဲသည် သူ၏ မျက်လုံးများကို မှေးစိုက်လိုက်ပြီး ရှောင်ချီအပေါ် ထားရှိမည့် သူ၏သဘောထားကို စိတ်ထဲတွင် တွက်ချက်နေတော့သည်။