အခန်း (၂၂) သွေးတစ်လုပ်ကို အောင့်အည်းရင်း တစ်ကွင်းလုံးကို ဖိနှိပ်ခြင်း

"ဒီကလေးတွေရဲ့ ဆိုးသွမ်းမှုကလည်း အကန့်အသတ်ရှိသင့်တာပေါ့။ အခုတော့ ပြန်ပြင်လို့မရတဲ့ ဒဏ်ရာတွေ ရကုန်ကြပြီ၊ဘယ်သူက တာဝန်ယူမှာလဲ" အကြီးအကဲ ချန်သည် တဲအတွင်းရှိ လူနှစ်ယောက်ကို ကြည့်ကာ စိတ်ရှုပ်ထွေးစွာဖြင့် ရင်ဘတ် တလှုပ်လှုပ် ဖြစ်နေတော့သည်။

"ဂိုဏ်းချုပ်က ဘာမိန့်မှာလိုက်လဲ" စိတ်ကို အနည်းငယ် တည်ငြိမ်အောင် ထားပြီးနောက် အကြီးအကဲ ချန်က အကြီးအကဲ ဇီယီကို မေးလိုက်သည်။

ဂိုဏ်းချုပ်ကတော့ တပည့်အချင်းချင်း အငြင်းပွားတာကို သူဝင်မပါချင်ဘူးလို့ ပြောပါတယ်။ ဒါပေမဲ့ ရှောင်ချီကအရမ်းကို မောက်မာရိုင်းစိုင်းလွန်းတယ် သူက ကျင့်ကြံချိန် ပိုကြာတာနဲ့ ကျင့်ကြံဆင့် ပိုမြင့်တာကို အားကိုးပြီး ယဲ့ဖန်ရဲ့ ကျင့်ကြံခြင်း နယ်မြေကို အတင်းအဓမ္မ လုယူဖို့ ကြိုးစားခဲ့တယ်။ ဒါကြောင့် သူ့ကို ပြစ်ဒဏ်ပေးရမယ်လို့ ဆိုပါတယ်။ အခု ဂိုဏ်းချုပ်က တောင်ထိပ်သခင် လင်းယွင်နဲ့ ဒီကိစ္စကို ဆွေးနွေးနေပါတယ်။

အကြီးအကဲ ဇီယီက ဂိုဏ်းချုပ်၏ ဆုံးဖြတ်ချက်ကို ပြောပြလိုက်ရာ ထိုနေရာရှိ တပည့်များအားလုံးနှင့် အကြီးအကဲ ချန်တို့ပါ အထင်အရှား ကြားလိုက်ရသည်။

ဤတိုက်ပွဲ၏ အစအဆုံးကို လင်းကျောင်လန် က လူသိရှင်ကြား ဖွင့်ချလိုက်ပြီ ဖြစ်သည်။

လင်းကျောင်လန်၏ ပြောပြချက်အရ သူမနှင့် ယဲ့ဖန်တို့သည် ကျင့်ကြံရန် အလွန်ကောင်းသော နေရာတစ်ခုကို ရှာတွေ့ခဲ့ကြသည်။ သူတို့ ထိုနေရာတွင် ကျင့်ကြံနေစဉ်မှာပင် ရှောင်ချီရုတ်တရက် ပေါ်လာပြီး ထိုနေရာမှ ထွက်သွားရန် အမိန့်ပေးကာ သူတို့ကို စတင်တိုက်ခိုက်ခဲ့ခြင်း ဖြစ်သည်ဟု ဆိုသည်။

ရှောင်ချီက အစွမ်းထက်လှသဖြင့် သူတို့နှစ်ဦးလုံးမှာ သူ၏ပြိုင်ဘက်မဟုတ်ခဲ့ကြပေ။ ထိုအရှက်ရမှုကို မခံစားနိုင်သဖြင့် ယဲ့ဖန်သည် သူ၏ အစွမ်းအစများကို အတင်းအကျပ် ပေါက်ကွဲစေခဲ့သည်။ သူ၏ အခြေခံပျက်စီးသွားမည်ကိုပင် ဂရုမစိုက်ဘဲ ရှောင်ချီနှင့်အတူ သေပွဲဝင်ရန်အတွက် နတ်သန္ဓေအဆင့်သို့ အတင်းအကျပ် တက်လှမ်းခဲ့ခြင်း ဖြစ်သည်ဟု ဆိုသည်။ သူသည် သူ၏ ဂုဏ်သိက္ခာကို ထိန်းသိမ်းရန်အတွက် ထိုသို့ လုပ်ဆောင်ခဲ့ခြင်းဖြစ်သည်။

တစ်ချိန်တည်းမှာပင် ၎င်းမှာ သာမန်တပည့်များနှင့် ကျင့်ကြံဆင့် နိမ့်ပါးသူများအတွက် တရားမျှတမှုကို ရှာဖွေပေးခြင်းလည်း ဖြစ်သည်ဟု ဆိုပြန်သည်။

ဤဇာတ်လမ်းထွက်လာသည်နှင့် တပြိုင်နက် တပည့်များမှာ ရှောင်ချီအပေါ် အမုန်းတရားများ ပြည့်နှက်သွားကြပြီး သူတို့၏ ဒေါသများမှာ ရှောင်ချီဆီသို့ ဦးတည်သွားတော့သည်။

လူအများစုမှာ မိမိတို့နှင့် အဆင့်တူသူများ၏ ဘက်မှနေ၍ တွေးတောတတ်ကြသည်။ အကယ်၍ ဤအဖြစ်အပျက်မှာ သူတို့အပေါ် ကျရောက်လာလျှင် ဘာဖြစ်မည်နည်း။

ထို့ကြောင့် တပည့်အများစုမှာ ယဲ့ဖန်၏ ကြုံတွေ့မှုကို ကိုယ်ချင်းစာမိကြပြီး ရှောင်ချီ၏ လုပ်ရပ်အပေါ် အလွန်အမင်း ဒေါသထွက်နေကြခြင်း ဖြစ်သည်။

"ယဲ့ဖန်အတွက် တရားမျှတမှု ရဖို့အတွက် ရှောင်ချီကို ပြင်းပြင်းထန်ထန် အပြစ်ပေးရမယ်"

"ဟုတ်တယ် သူက ကျင့်ကြံဆင့် မြင့်ရုံနဲ့ သူများရဲ့ ကျင့်ကြံတဲ့ နေရာကို ဘာလို့ အတင်းအဓမ္မ လုယူရတာလဲ"

"မှန်တယ် ငါတို့လို သာမန်တပည့်တွေက လူမဟုတ်ဘူးလား သူက လုချင်တိုင်းလု ရိုက်ချင်တိုင်း ရိုက်နေတာလား"

တပည့်အများအပြားမှာ တစ်ယောက်တစ်ပေါက် အော်ဟစ်ကြပြီး၊ အကြီးအကဲ ချန်အနေဖြင့် ဤကိစ္စကို ဘက်လိုက်မှုမရှိဘဲ ကိုင်တွယ်ရန် တောင်းဆိုနေကြတော့သည်။

"အဲဒီလိုမဟုတ်ပါဘူး ကျွန်မရဲ့ စီနီယာအစ်ကိုက ဒီကိုစရောက်တဲ့ သုံးရက်ကတည်းက အဲဒီနေရာမှာ ကျင့်ကြံနေတာပါ"

"သူက ကျွန်မနဲ့အတူ လမ်းခေတ္တ လျှောက်ထွက်သွားတုန်းမှာ ကျင့်ကြံတဲ့နေရာ အလုခံလိုက်ရတာပါ။ စီနီယာအစ်ကိုက ခဏတာ စိတ်မထိန်းနိုင်ဖြစ်သွားလို့ တိုက်ခိုက်မိတာပါ"

လင်းယွီရှို့သည် ရှေ့သို့ အမြန်တိုးလာပြီး တုန်ရီနေသော အသံဖြင့် ရှင်းပြလိုက်သည်။

သူမသည် ဤကဲ့သို့သော မြင်ကွင်းမျိုးကို တစ်ခါမျှ မကြုံဖူးပေ။ လူအများအပြား၏ ဖိအားအောက်တွင် စကားတစ်လုံး ပြောနိုင်ရန်ပင် သူမအတွက် အလွန်ခက်ခဲနေပြီး သူမ၏ ခန္ဓာကိုယ်နှင့် လက်ချောင်းများမှာ တုန်ရီနေခြင်းကို မရပ်တန့်နိုင်တော့ပေ။

အထူးသဖြင့် သူမသည် လင်းကျောင်လန်၏ အနှိပ်စက်ခံထားရသဖြင့် သူမ၏ အငွေ့အသက်မှာ မတည်မငြိမ် ဖြစ်နေဆဲဖြစ်ပြီး စကားပြောသည့်အခါတွင်လည်း အသံမှာ အလွန်အားနည်းနေရှာသည်။

"နင်လို ကောင်မလေးက ပြောရဲသေးတယ်ပေါ့ ခုနက ငါ နင့်ကို ရိုက်တာ နည်းနေသေးလို့လား"

"နင်ပြောသလိုပဲ နင့်ရဲ့ စီနီယာအစ်ကိုက အရင်က အဲဒီမှာ ကျင့်ကြံခဲ့တယ် ထားဦးတော့ သူထွက်သွားတာနဲ့ အဲဒီနေရာက ပိုင်ရှင်မဲ့ ဖြစ်သွားပြီလေ။ ငါတို့က ယူတော့ ဘာဖြစ်လဲ နင့်ရဲ့ စီနီယာအစ်ကိုက ဘာလို့ လူကို လာရိုက်ရတာလဲ"

ကောင်မလေးက ရဲရဲဝံ့ဝံ့ မတ်တတ်ရပ်နေသည်ကို မြင်သောအခါ လင်းကျောင်လန်မှာ ချက်ချင်းပင် ဒေါသထွက်လာသည်။ သူမသည် ရှေ့သို့ တိုးလာပြီး ကောင်မလေးကို ထပ်မံ ထိုးနှက်ရန် ပြင်လိုက်သည်။

သူမ၏ လက်သီးမှာ ကောင်မလေး၏ မျက်နှာပေါ်သို့ ကျရောက်တော့မည့် အခြေအနေ

ဘုန်း ဤအရေးကြီးသော အချိန်တွင် ခြေရာတစ်ခုမှာ လင်းကျောင်လန်၏ မျက်နှာပေါ်သို့ ပြင်းထန်စွာ ကျရောက်သွားခဲ့သည်။ ယခင်နည်းလမ်းအတိုင်း ယခင်အရွယ်အစားအတိုင်းပင်။ လင်းကျောင်လန်မှာ ချက်ချင်းပင် မီတာပေါင်းများစွာ လွင့်ထွက်သွားပြီး ကြီးမားသော ကျောက်ဆောင်တစ်ခုနှင့် တိုက်မိကာ ရပ်တန့်သွားတော့သည်။

"နင်... နင် ဘယ်လိုလုပ် ထွက်လာတာလဲ နင်က သေလုမျောပါး ဖြစ်နေတာ မဟုတ်ဘူးလား"

လင်းကျောင်လန်သည် မနည်းရုန်းထကာ မတ်တတ်ရပ်လိုက်ပြီး ထိတ်လန့်တုန်လှုပ်နေသော မျက်နှာဖြင့် ရှောင်ချီကို ကြည့်လိုက်သည်။

တစ်ချိန်တည်းမှာပင် ကျန်ရှိနေသော တပည့်များအားလုံးမှာလည်း ရှောင်ချီဆီသို့ လှည့်ကြည့်လိုက်ကြသည်။ ခုနက အော်ဟစ်နေကြသော တပည့်များမှာ ချက်ချင်းပင် ပါးစပ်ပိတ်သွားကြပြီး နောက်ထပ် စကားတစ်လုံးပင် မပြောရဲတော့ပေ။

ယဲ့ဖန်လိုကောင်က ငါ့ကို သေလုမျောပါး ဖြစ်အောင် လုပ်နိုင်မယ် ထင်နေတာလား ကုတင်ပေါ်မှာ ခေတ္တလှဲနေပေးလိုက်တာက သူ့ကို မျက်နှာသာ ပေးလိုက်တာပဲ။

ရှောင်ချီသည် လင်းကျောင်လန်ရှိရာဘက်သို့ တံတွေးထွေးလိုက်ပြီး အထင်အမြင်သေးသော အမူအရာဖြင့် ပြောလိုက်သည်။

သူ ဤသို့ပြောခြင်းမှာ သိက္ခာဆယ်ရန်အတွက်သာဖြစ်သည်။ သူ၏ ဒဏ်ရာများမှာ အလွန်ပင် ပြင်းထန်နေဆဲ ဖြစ်သည်။

အကြီးအကဲ ဇီယီက သူ၏ နှလုံးသွေးကြောများကို ဝိညာဉ်စွမ်းအားဖြင့် ကာကွယ်ပေးထားသော်လည်း သူ၏ဝိညာဉ်၊ ချီပင်လယ်၊ ဒန်ထျန်းနှင့် အတွင်းကလီစာများမှာ ပျက်စီးနေဆဲ ဖြစ်သည်။ လက်ရှိတွင် သူသည် သူ၏ တိုက်ခိုက်ရေးစွမ်းအား၏ ဆယ်ပုံတစ်ပုံကိုသာ အသုံးပြုနိုင်တော့သည်။

သူသည် အပြင်ဘက်မှ ဆူညံသံများကို ကြားရသဖြင့် သူ၏ ဝိညာဉ်အာရုံကို အသုံးပြုကာ ကြည့်လိုက်သည့်အခါ လင်းကျောင်လန်က သူ၏ ဂျူနီယာညီမလေးကို ရိုက်နှက်နေသည်ကို တွေ့လိုက်ရသည်။

သူသည် ထိုအချိန်ကတည်းက ထွက်လာချင်သော်လည်း သူ၏ ဒဏ်ရာများမှာ အလွန်ပြင်းထန်လှပြီး ကုသမှု၏ အရေးကြီးဆုံးအချိန် ဖြစ်နေသဖြင့် အောင့်အည်းသည်းခံနေခဲ့ခြင်း ဖြစ်သည်။ ယခုအခါ သူမက ထပ်မံ တိုက်ခိုက်ရန် ပြင်နေသည်ကို မြင်သောအခါ၊ သူ၏ ဒဏ်ရာများကို အတင်းအကျပ် တည်ငြိမ်အောင် လုပ်ပြီး လင်းကျောင်လန်ကို သင်ခန်းစာပေးရန် ထွက်လာခဲ့ခြင်း ဖြစ်သည်။

"ဘာလဲ နင်တို့တပည့်တွေက မကျေနပ်ကြဘူးလား"

မကျေနပ်တဲ့သူရှိရင် ရှေ့ထွက်ခဲ့စမ်း ငါ ရှောင်ချီက မင်းတို့ကိုရင်ဆိုင်ပေးမယ်ငါ့ရဲ့ ဂျူနီယာညီမလေးက စိတ်နုတယ်၊ အကယ်၍ ဘယ်သူမဆို သူမကို နောက်ထပ် စကားတစ်လုံးပဲ ပြောရဲကြည့် ယဲ့ဖန်ရဲ့ ကံကြမ္မာဟာ မင်းတို့ရဲ့ကံကြမ္မာပဲ ဖြစ်ရမယ်။

ရှောင်ချီသည် သူ၏အတွင်းကလီစာများကို ဝိညာဉ်စွမ်းအားဖြင့် တင်းတင်းကျပ်ကျပ် ကာကွယ်ထားပြီး လည်ချောင်းထဲသို့ တက်လာသော လတ်ဆတ်သော သွေးများကို အပြင်သို့ မထွက်အောင် အတင်းအကျပ် မြိုချထားလိုက်သည်။

သူသည် ထိုနေရာရှိ လူအားလုံးကို အေးစက်စွာ ဝေ့ကြည့်လိုက်ပြီး မောက်မာလှသော လေသံဖြင့် ပြောလိုက်သည်။

တူလေးရှောင်ချီ... မင်းက ဂိုဏ်းရဲ့နတ်ဘုရားသားတော် ဖြစ်နေရင်တောင် ဒီလောက်အထိတော့ မောက်မာလို့ မရဘူးလေ။

"ဝိညာဉ်ကျောက်တုံးကြောကို စောင့်ရှောက်ဖို့ လာကြတဲ့ တပည့်တွေဟာ ကြိုက်တဲ့ ကျင့်ကြံတဲ့နေရာကို ရွေးချယ်ပိုင်ခွင့် ရှိကြတယ်။ မင်းက ထွက်သွားပြီးပြီ ဖြစ်တဲ့အတွက် တူလေး ယဲ့ဖန်နဲ့ တခြားသူတွေ အဲဒီမှာ ကျင့်ကြံတာဟာ လုံးဝကို ကျိုးကြောင်းဆီလျော်ပါတယ်။ မင်းက ဘာလို့ ဒီလောက်အထိ လက်လွန်ရတာလဲ။

အကြီးအကဲ ချန်သည် မျက်မှောင်ကြုတ်ကာ ရှောင်ချီကို ကြည့်ပြီး မကြည်လင်သော မျက်နှာထားဖြင့် မေးလိုက်သည်။

သူသည် ဤဝိညာဉ်ကျောက်တုံးကြောကို တာဝန်ယူထားရသည့် အဓိကပုဂ္ဂိုလ် ဖြစ်သည်။ ဤကဲ့သို့ ကြီးမားသော အဖြစ်အပျက်တစ်ခု ဖြစ်ပွားခဲ့သဖြင့် သူသည်လည်း အပြစ်တင်ခြင်းခံရပေလိမ့်မည်။

ထို့အပြင် လက်ရှိတွင် သူတို့သည် အခြားဂိုဏ်းများ၏ တိုက်ခိုက်မှုကို ခံရမည့် အန္တရာယ်နှင့် အချိန်မရွေး ရင်ဆိုင်နေရသည်။ ယခုအခါ အဓိက တိုက်ခိုက်ရေးသမား နှစ်ဦးလုံး ဒဏ်ရာရသွားသဖြင့် အကြီးအကဲတစ်ဦးအနေဖြင့် သူ အလွန်ပင် ဒေါသထွက်နေရခြင်း ဖြစ်သည်။

ကျွန်တော် ဘာလုပ်လုပ် အကြီးအကဲက ဝေဖန်စရာ မလိုပါဘူး အကယ်၍ အကြီးအကဲက ကျွန်တော်နဲ့ ပညာစမ်းချင်တယ် ဆိုရင်လည်း ကျွန်တော် ရှောင်ချီက ဝမ်းမြောက်ဝမ်းသာ လက်ခံပေးပါ့မယ်။

ဗီလိန်တစ်ယောက်အတွက် အရေးကြီးဆုံးအရာက ဘာလဲ ၎င်းမှာ အကြောင်းပြချက် မရှိခြင်းနှင့် မောက်မာခြင်းပင် ဖြစ်သည်။ မဟုတ်လျှင် သူ ဘယ်လိုလုပ် ဗီလိန်တစ်ယောက်အဖြစ် ဂုဏ်ယူဝံ့ကြွားနိုင်ပါ့မလဲ

ရှောင်ချီသည် အကြီးအကဲ ချန်ကို အားနည်းသည့် အရိပ်အယောင် အနည်းငယ်မျှပင် မပြဘဲ ကြည့်လိုက်သည်။ သူ၏ လက်ရှိ ခန္ဓာကိုယ် အခြေအနေအရသာ အကြီးအကဲ ချန်နှင့် တကယ်တိုက်ရမည်ဆိုလျှင် သူ သေဆုံးဖို့ သေချာလှသည်။

ဒါပေမဲ့ သူသေရမယ်ဆိုရင်တောင် သူ၏ ဂုဏ်သိက္ခာကိုတော့ အလျှော့ပေးမှာ မဟုတ်ပါဘူး သူသည် ယခုလောင်းကစား လုပ်နေခြင်း ဖြစ်သည် အကြီးအကဲ ချန်အနေဖြင့် သူ့ကို တိုက်ခိုက်ရန် မဝံ့ရဲလောက်ဘူးဟု သူ လောင်းကြေးထပ်ထားခြင်း ဖြစ်သည်။

အဖိုးကြီးချန်သည် ယဲ့ဖန်နှင့် သူ၏ တိုက်ပွဲကို အရင်က မြင်တွေ့ခဲ့ဖူးသည်။ ထိုတိုက်ပွဲမှ ထွက်ပေါ်လာသော စွမ်းအားမှာ ဝိညာဉ်ပြောင်းလဲခြင်း အဆင့်နှောင်းပိုင်း ကျွမ်းကျင်သူများကိုပင် အထင်သေးနိုင်လောက်သည့် စွမ်းအားမျိုးဖြစ်သည် မဟုတ်ပါလား။

ထို့အပြင် သူသည် ဂိုဏ်း၏အကြီးအကဲတစ်ဦး ဖြစ်သဖြင့် ဂျူနီယာတစ်ဦးကို တိုက်ခိုက်လျှင် အကယ်၍ နိုင်ခဲ့လျှင်တောင် အားနည်းသူကို နှိပ်စက်သည်ဟု အပြောခံရပေလိမ့်မည်။ အကယ်၍ ရှုံးသွားခဲ့လျှင်မူ အကြီးအကဲတစ်ဦးအနေဖြင့် သူ၏ သိက္ခာအားလုံး မြေခသွားပေလိမ့်မည်။

"မင်း... မင်းလို တပည့်မျိုးကတော့ တကယ်ကို အကြောင်းပြချက် မရှိတာပဲ" အကြီးအကဲ ချန်သည် နှာခေါင်းရှုံ့လိုက်ပြီး အကြီးအကဲ ဇီယီကလည်း ရှောင်ချီကို နက်နက်ရှိုင်းရှိုင်း တစ်ချက်ကြည့်လိုက်ပြီးနောက် ဖြည်းဖြည်းချင်း ထွက်သွားခဲ့သည်။

ထိုနေရာတွင် သာမန်တပည့်အချို့ အနိုင်ကျင့်ခံရသဖြင့် အားငယ်နေသော လင်းကျောင်လန်နှင့် မျက်ရည်မခြောက်သေးဘဲ မှင်သက်နေသော လင်းယွီရှို့တို့သာ ကျန်ရစ်ခဲ့တော့သည်။

"မြန်မြန်... သွားကြစမ်း အကြီးအကဲတွေ ထွက်သွားပြီ"

ဟုတ်တယ် ဟုတ်တယ်။ ဒီအရူးက အရမ်းကြောက်ဖို့ ကောင်းတယ်။ ငါတို့သာ သူ့ကို ဆန့်ကျင်ရင် ငါတို့ရဲ့ လက်တွေ ခြေထောက်တွေ အဖြတ်ခံရမလား ဘယ်သူသိမှာလဲ။

"ဒီကိစ္စက အစကတည်းက ငါတို့နဲ့ မဆိုင်ပါဘူး။ ဘေးကနေ ကြည့်ရုံပဲ ကြည့်ကြစမ်းပါ ဘာလို့ သွားပြီး ဝင်ပါနေမှာလဲ"

အကြီးအကဲများ ထွက်သွားသည်ကို မြင်သောအခါတပည့်များမှာ တိုးတိုးတိတ်တိတ် ပြောဆိုကြပြီးနောက် ရှောင်ချီနှင့် ထိပ်တိုက်မရင်ဆိုင်လိုသဖြင့် တစ်ယောက်ပြီးတစ်ယောက် ဆုတ်ခွာသွားကြတော့သည်။

ရှောင်ချီကတော့ သူ၏ မောက်မာမှုနဲ့ ဒဏ်ရာတွေကို အောင့်အည်းပြီး အားလုံးကို ဖိနှိပ်နိုင်ခဲ့ပါပြီ။