အခန်း (၂၁)  ပြတ်တောက်သွားတဲ့ ခြေလက်တွေ ပြန်ပေါက်နိုင်ပါ့မလား

ဝိညာဉ်ကျောက်တုံး မိုင်းတွင်းအနီးရှိ ဝိညာဉ်ဓားဂိုဏ်း၏ ယာယီတဲအတွင်းတွင် လူတစ်စုမှာ စိုးရိမ်တကြီးဖြင့် ခေါက်တုံ့ခေါက်ပြန် လမ်းလျှောက်နေကြသည်။

တဲအတွင်း၌ ခရမ်းရောင်ဝတ်စုံဝတ် အမျိုးသမီးတစ်ဦးသည် ကုတင်ပေါ်ရှိ လူနှစ်ယောက်ထံသို့ ဝိညာဉ်စွမ်းအားများ ပို့လွှတ်ပေးနေလေသည်။

ဤခရမ်းရောင်ဝတ်စုံဝတ် အမျိုးသမီးမှာ ဝိညာဉ်ဓားဂိုဏ်း၏ အသစ်ခန့်အပ်ခံရသော အကြီးအကဲ ဇီယီဖြစ်သည်။ သူမ၏ ကျင့်ကြံဆင့်မှာ ဝိညာဉ်ပြောင်းလဲခြင်းအဆင့်၏ အစောပိုင်းအဆင့်မှာသာ ရှိသေးသော်လည်း သူမ၏ ဝိညာဉ်စွမ်းအားမှာ အလွန်ပင် နူးညံ့သိမ်မွေ့သဖြင့် ကုသရေးအပိုင်းတွင် အထူးပင် သင့်လျော်လှသည်။ ထို့ကြောင့် သူမသည် ဆေးဝါးနှင့် ဆေးလုံးဖော်စပ်ခြင်းလမ်းစဉ်ကို လိုက်စားခဲ့သူ ဖြစ်သည်။

သူမ၏ ထိုစဉ်က ရွေးချယ်မှုမှာ အလွန်ပင် မှန်ကန်ခဲ့သည်ဟု ဆိုရမည်။

ဝိညာဉ်ပြောင်းလဲခြင်း အဆင့်သို့ ရောက်ရှိပြီးကတည်းက ဂိုဏ်းအတွင်း သူမ၏ အဆင့်အတန်းမှာ တစ်နေ့ထက်တစ်နေ့ မြင့်မားလာခဲ့သည်။

အကြောင်းမှာ သူမ၏ ဆေးပညာနှင့် ဆေးလုံးဖော်စပ်မှု အတတ်ပညာမှာ ဟင်းလင်းပြင်သို့ ပြန်ခြင်းအဆင့်ရှိသည့် ကျွမ်းကျင်သူများကိုပင် သေမင်း၏လက်တွင်းမှ ဆွဲထုတ်နိုင်စွမ်း ရှိသောကြောင့် ဖြစ်သည်။

ယခုတစ်ကြိမ်တွင် ဂိုဏ်းချုပ်၏ကိုယ်ပိုင်တပည့် ယဲ့ဖန်နှင့် ဂိုဏ်း၏ သူတော်စင် ရှောင်ချီတို့မှာ အသက်အန္တရာယ်နှင့် ရင်ဆိုင်နေရသည်ဟု ကြားသဖြင့် သူမကို ရှေ့တန်းသို့ အထူးစေလွှတ်လိုက်ခြင်း ဖြစ်သည်။

ထို့အပြင် ဂိုဏ်းအနေဖြင့် သူမကို ဟင်းလင်းပြင်သို့ ပြန်ခြင်းအဆင့်ရှိသည့် တောင်ထိပ်သခင်အဆင့်ရှိ ကျွမ်းကျင်သူတစ်ဦးကိုယ်တိုင် လိုက်ပါပို့ဆောင်ပေးမှသာ စိတ်အေးနိုင်ခဲ့ခြင်းဖြစ်သည်။

"စီနီယာအစ်ကို မသေဘူး မဟုတ်လားဟင်" လင်းယွီရှို့က လျူချင်းအာ၏ ခါးကို ဖက်ကာ ရှိုက်ကြီးတငင် ငိုယိုရင်း မေးလိုက်သည်။

လျူချင်းအာနှင့် မုဝမ်အာတို့မှာလည်း ဤဝိညာဉ်ကျောက်တုံး မိုင်းတွင်းတွင် တာဝန်ကျနေသူများ ဖြစ်ကြသည်။ သူတို့၏ ဂျူနီယာမောင်လေး သေလုမျောပါး ဖြစ်နေသည်ဟု ကြားသဖြင့် လာကြည့်ကြခြင်း ဖြစ်သော်လည်း သူတို့၏စိတ်ရင်းအမှန်မှာ ဘယ်လိုရှိနေသည်ကိုတော့ မည်သူမျှ မသိနိုင်ပေ။

သို့သော်လည်း ဤအခိုက်အတန့်တွင် ကောင်မလေးမှာ အားကိုးရာမဲ့နေရှာသည်။ သူမ၏ စီနီယာအစ်မများကို မြင်သည့်အခါ သူတို့ကို မနှစ်သက်သော်လည်း သူမ၏ ဝေဒနာများကို ရင်ဖွင့်ရန်အတွက် ရှေ့သို့ တိုးသွားမိခြင်း ဖြစ်သည်။

ထိုစီနီယာအစ်မနှစ်ယောက်မှာမူ ကောင်မလေး၏ ငိုယိုသံအပေါ် အနည်းငယ်မျှပင် ကိုယ်ချင်းစာနာစိတ် မရှိကြပေ။

ထိုသို့ဖြစ်မည့်အစား သူတို့၏ ရင်ထဲတွင် ဝမ်းသာသလိုပင် ဖြစ်နေကြသည်။ ရှောင်ချီသည် သူ၏ မြင့်မားလှသော ကျင့်ကြံဆင့်နှင့် ပါရမီကို အားကိုးကာ သူ၏ စီနီယာအစ်မများဖြစ်သော သူတို့ကို တစ်ခါမျှ လေးစားမှု မပြခဲ့ဖူးပေ။

ယခုအခါ သူ သေလုမျောပါး ဖြစ်နေခြင်းမှာ သူ့အတွက် သင်ခန်းစာတစ်ခုပင် ဖြစ်သည်။ နောင်တစ်ချိန်တွင် သူ ဤမျှအထိ မောက်မာနိုင်ပါဦးမည်လား။

အခြားတစ်ဖက်တွင်မူ လင်းကျောင်လန်သည်လည်း မျက်ရည်များ မိုးပေါက်ပမာ ကျဆင်းလျက် ရှိနေပြီး သူမ၏ မျက်လုံးများမှာ အဆက်မပြတ် ငိုထားသဖြင့် ဖောင်းအစ်နေပြီ ဖြစ်သည်။

နင်လို စုတ်ပြတ်သတ်နေတဲ့ ကောင်မလေးက ငိုရဲသေးတယ်ပေါ့။ နင့်ရဲ့ စီနီယာအစ်ကိုကသာ ပြဿနာမရှာဘဲ ငါနဲ့ ဖန်လောင်ကို အတင်းအကျပ် နှိပ်စက်ဖို့ မကြိုးစားခဲ့ရင် ဒီလိုမျိုး ဖြစ်ပါ့မလား။

လင်းယွီရှို့ အသည်းအသန် ငိုနေသည်ကို မြင်သောအခါ လင်းကျောင်လန်၏ ဒေါသများမှာ ထွက်ပေါ်လာတော့သည်။ သူမသည် ရှေ့သို့ အားမာန်ပါပါ လှမ်းလာပြီး ကောင်မလေးကို လျူချင်းအာ၏ လက်ထဲမှ အတင်းဆွဲထုတ်ကာ သူမ၏ ဝမ်းဗိုက်ကို ပြင်းထန်စွာ ကန်ထုတ်လိုက်ပြီး ဒေါသတကြီး အော်ဟစ်လိုက်သည်။

သို့သော် ဤမြင်ကွင်းကို ကြည့်နေကြသော လျူချင်းအာနှင့် မုဝမ်အာတို့မှာ တစ်ဦးကိုတစ်ဦး တစ်ချက်ကြည့်လိုက်ရုံမှလွဲ၍ ဝင်ရောက်တားဆီးခြင်း မပြုခဲ့ကြပေ။ သူတို့သည် ဝမ်းဗိုက်ကို ဖက်ကာ အော်ဟစ်ငိုယိုနေသော ကောင်မလေးကို ပြဇာတ်တစ်ပုဒ် ကြည့်နေသကဲ့သို့ အေးအေးလူလူပင် ကြည့်နေကြသည်။

သူတို့၏ စရိုက်မှာ သူတို့၏ ဆရာနှင့် အလွန်ပင် တူညီလှပြီး အမြဲတမ်း အေးစက်နေတတ်ကြသည်။ ရှောင်ချီသည် ငါးနှစ်တိုင်တိုင် သူတို့ကို အဖက်ဖက်မှ ဂရုစိုက်ပေးခဲ့သော်လည်း သူတို့၏ အေးစက်လှသော နှလုံးသားများကို အရည်မဖျော်နိုင်ခဲ့ပေ ဂိုဏ်းထဲသို့ ရောက်လာသည်မှာ တစ်နှစ်ကျော်သာ ရှိသေးသော ကောင်မလေးဆိုလျှင်တော့ ပြောနေစရာပင် မလိုတော့ပေ။

ဤစီနီယာအစ်မနှစ်ယောက်အတွက်မူ ဤကောင်မလေးမှာ နာမည်အရသာ ဂျူနီယာညီမလေး ဖြစ်ပြီး သူမနှင့် သူတို့မှာ ဘာမှပင် မပတ်သက်သကဲ့သို့ ဖြစ်နေသည်။

"နင် ငိုချင်သေးလား ငါ နင့်ကို ငိုလို့ဝအောင် လုပ်ပေးမယ်နင်က ဘယ်မျက်နှာနဲ့ လာငိုနေတာလဲ" ထိုစီနီယာအစ်မနှစ်ယောက်မှာ ဝင်ရောက်တားဆီးရန် ဆန္ဒမရှိသည်ကို မြင်သောအခါ လင်းကျောင်လန်သည် သူမ၏ လက်သီးလေးများဖြင့် ကောင်မလေး၏ မျက်နှာကို အချက်ပေါင်းများစွာ ထိုးနှက်လိုက်တော့သည်။

"တော်တော့ ဂိုဏ်းရဲ့ ရှင်သန်ရပ်တည်မှုက အရေးကြီးနေတဲ့ အချိန်မှာ နင်တို့တွေက အချင်းချင်း ရန်ဖြစ်နေကြတာလား" ဝိညာဉ်စွမ်းအားတစ်ခု ပေါက်ကွဲထွက်လာပြီး လင်းကျောင်လန်ကို နောက်သို့ လွင့်ထွက်သွားစေသည်။

လင်းယွန်းသည် ဒေါသကြောင့် မျက်နှာတစ်ခုလုံး မည်းမှောင်နေပြီး လင်းယွီရှို့၏ ဘေးသို့ သွားကာ သူမကို ထူပေးလိုက်သည်။

စီနီယာအစ်ကိုလင်းယွန်း... ကျွန်မ အကြံပေးချင်တာကတော့ ဒီကိစ္စထဲမှာ ဝင်မပါပါနဲ့ဒီကောင်မလေးရဲ့ စီနီယာအစ်ကိုက ကျွန်မရဲ့ ဖန်လောင်ကို ပြင်းပြင်းထန်ထန် ဒဏ်ရာရအောင် လုပ်ခဲ့တာ ဒါကြောင့် ဒီနေ့ ငါလည်း သူ့ကိုပြန်ပြီး ဒဏ်ရာရအောင် လုပ်မှာပဲ။ ရှောင်ချီကို တကယ်ပဲ ဝမ်းနည်းပူဆွေးသွားအောင် ငါလုပ်ပြမယ်။

"တော်ကြစမ်း ဒါက ဘာအမူအရာတွေလဲ" အကြီးအကဲ ချန်၏ အသံ ထွက်ပေါ်လာမှသာ ဤရုတ်ရုတ်သည်းသည်း ဖြစ်မှုမှာ အဆုံးသတ်သွားခဲ့သည်။

ကောင်မလေးသည် သူမ၏ မျက်ဝန်းမှ မျက်ရည်များနှင့် ပါးစပ်မှ သွေးများကို သုတ်လိုက်ပြီး ငိုခြင်းကို ရပ်လိုက်သည်။ ထို့နောက်တွင် သူမသည် မတ်မတ်ရပ်လိုက်ပြီး သူမ၏ စီနီယာအစ်မနှစ်ယောက်ကို အေးစက်သော အကြည့်များဖြင့် စိုက်ကြည့်လိုက်သည်။

ထိုအခိုက်အတန့်တွင် သူမသည် ချက်ချင်းပင် လူကြီးတစ်ယောက်အလား ရင့်ကျက်သွားခဲ့ပြီး သူမ၏ စီနီယာအစ်မနှစ်ယောက်၏ စိတ်ရင်းအမှန်ကို မြင်တွေ့သွားခဲ့သည်။

သူမ၏စီနီယာအစ်ကိုက ဘာကြောင့် သူတို့နှင့် ဝေးဝေးနေရန် ပြောခဲ့သည်ကိုလည်း သူမ နားလည်သွားခဲ့ပြီ ဖြစ်သည်။

သူတို့၏ စိတ်နေစိတ်ထားမှာ အလွန်ပင် အေးစက်လှသည် သူတို့မှာ လူသားနှင့်ပင် မတူဘဲ စက်ရုပ်များနှင့် ပိုတူနေသည်။ ဖြစ်နိုင်သည်မှာ သူတို့သည် သူတို့တကယ်တန်ဖိုးထားသည့် တစ်စုံတစ်ဦး သို့မဟုတ် တစ်စုံတစ်ခုနှင့် ကြုံတွေ့ရမှသာ လက်တွဲကူညီကြပေလိမ့်မည်။

သူတို့အတွက်တော့ သူမနှင့် သူမ၏ စီနီယာအစ်ကိုမှာ အမြဲတမ်း သူစိမ်းများသာ ဖြစ်ကြပြီး ဂိုဏ်းအတွင်းရှိ သာမန်တပည့်များထက် အနည်းငယ်သာ သာလွန်သူများ ဖြစ်နေခဲ့ကြသည်။

လွန်ခဲ့သော တစ်နှစ်အတွင်း သူမ၏ စီနီယာအစ်ကိုသည် ဤစီနီယာအစ်မနှစ်ယောက်အပေါ် မည်ကဲ့သို့ ဆက်ဆံခဲ့သည်ကို သူမ အထင်အရှား မြင်တွေ့ခဲ့ရသည် သူမ၏ စီနီယာအစ်ကို သေလုမျောပါး ဖြစ်နေချိန်တွင်တောင်မှ သူတို့မှာ မည်သည့် ခံစားချက်မျှ မပြဘဲ ဤမျှအထိ အေးစက်နေကြလိမ့်မည်ဟု သူမ တစ်ခါမျှ မထင်မှတ်ခဲ့ဖူးပေ။

အကြီးအကဲ ချန်သည် ထိုလူစုကို ဝေ့ကြည့်လိုက်ပြီး သူ၏ရင်ထဲတွင် ဒေါသများ ဟုန်းဟုန်းတောက်လာခဲ့သည်။

ဂိုဏ်းကြီး ဤကဲ့သို့ အခြေအနေမျိုးသို့ ဆိုက်ရောက်နေရခြင်းမှာ မဆန်းတော့ပေ။ ဤကဲ့သို့သော တပည့်မျိုးတွေနှင့် ဂိုဏ်းကြီး ဘယ်လိုလုပ်ပြီး တိုးတက်လာနိုင်ပါ့မလဲ

ပထမဦးစွာ ပါရမီရှင်နှစ်ယောက်မှာ အာဃာတကြောင့် ကမ္ဘာပျက်မတတ် တိုက်ခိုက်ခဲ့ကြပြီး တစ်ဦးကိုတစ်ဦး သေလုနီးပါး ဖြစ်အောင် လုပ်ခဲ့ကြသည်။

အခြေအနေတွေ ငြိမ်သက်သွားကာရှိသေး အမျိုးသမီးနှစ်ယောက်မှာလည်း သူတို့ကြောင့် ထပ်ပြီး ရန်ဖြစ်နေကြပြန်သည်။ ၎င်းမှာ ဂိုဏ်းချုပ်၏ သမီးဖြစ်သူက သူမထက် ငယ်ရွယ်သူတစ်ဦးကို နှိပ်စက်နေခြင်းပင်။

အကြီးအကဲတစ်ဦးအနေဖြင့် သူသည် ဂိုဏ်းချုပ်၏သမီးကို ပြစ်ဒဏ်မပေးရဲသော်လည်း သူ၏ရင်ထဲတွင်တော့ ဂိုဏ်းအပေါ် ထားရှိသည့် ယုံကြည်မှုများ ပျောက်ဆုံးကုန်ပြီ ဖြစ်သည်။

အထက်မှ ဂိုဏ်းချုပ်မှာ အားကိုး၍မရသလိုအောက်မှ တပည့်များမှာလည်း အကြမ်းဖက်မှုများကိုသာ အသုံးပြုနေကြသည်။

အကယ်၍ ဤအတိုင်းသာ ဆက်သွားနေမည်ဆိုပါက ဂိုဏ်းကြီး ပျက်စီးဖို့ရန်မှာ သိပ်မဝေးတော့ပေ။

အကြီးအကဲ ချန် အတွေးထဲ နစ်ဝင်နေစဉ်မှာပင် တဲ၏ လိုက်ကာကို ဆွဲဖွင့်လိုက်သံ ကြားလိုက်ရသည်။

ကျွန်မ သူတို့ဆီကို သစ်သားဓာတ် ဝိညာဉ်စွမ်းအားတွေ ထည့်သွင်းပေးထားပြီး သူတို့ရဲ့ နှလုံးသွေးကြောတွေနဲ့ အတွင်းကလီစာတွေကို ကာကွယ်ပေးထားပါတယ်။ သူတို့ အသက်ရှင်မရှင် ဆိုတာကတော့ သူတို့ရဲ့ ကံတရားအပေါ်မှာပဲ မူတည်ပါတော့တယ်။

ဂိုဏ်းချုပ်ရဲ့တပည့် ယဲ့ဖန်ကတော့ သူ၏ ဘယ်ဘက်လက်မောင်းနဲ့ ညာဘက်ခြေထောက် အောက်ပိုင်းတို့ ပြတ်တောက်သွားခဲ့ပါတယ်။ ပြန်ဆက်ဖို့အတွက် အကောင်းဆုံး အချိန်ကလည်း ကျော်လွန်သွားပြီ ဖြစ်တဲ့အတွက် သူဟာ မသန်စွမ်းသူ တစ်ယောက် ဖြစ်သွားဖို့ များပါတယ်။

အကြီးအကဲ ဇီယီသည် သူမ၏ နဖူးပေါ်မှ ချွေးစက်များကို သုတ်ရင်း အကြီးအကဲ ချန်နှင့် အနီးနားရှိ တပည့်များကို ပြောလိုက်သည်။

"ဇီယီ... တခြားနည်းလမ်း တကယ်ပဲ မရှိတော့ဘူးလား ယဲ့ဖန်က အလွန်ပါရမီထူးတဲ့ ကလေးတစ်ယောက်ပါ သူဟာ အတိုင်းအဆမရှိတဲ့ အနာဂတ်မျိုး ပိုင်ဆိုင်ထားသူပါ။ အခုလိုမျိုး ခြေလက်တွေ ပျက်စီးသွားမယ်ဆိုရင် သူ၏ ရှေ့ရေးဟာ အများကြီး ထိခိုက်သွားနိုင်တယ်"

အကြီးအကဲ ချန်က ပင်ပန်းနွမ်းနယ်နေသော အကြီးအကဲ ဇီယီကို ကြည့်ကာ လေးလံသော မျက်နှာထားဖြင့် မေးလိုက်သည်။

လုံးဝ မရှိတာတော့ မဟုတ်ပါဘူး။ အခြေအနေပေးမယ်ဆိုရင်တော့ အဲဒီလက်မောင်းနဲ့ ခြေထောက်ကို အာဟာရဓာတ်တွေ ကျွေးပြီး ထိန်းသိမ်းထားလို့ ရပါတယ်။ အကယ်၍ အဆင့်မြင့် ဝိညာဉ်ဆေးပင်ဖြစ်တဲ့ အရိုးဆက်နတ်မင်းပင်ကိုသာ ရှာတွေ့နိုင်မယ်ဆိုရင်တော့ ပြန်ဆက်နိုင်မယ့် အခွင့်အရေး ရှိပါသေးတယ်။

အကြီးအကဲ ဇီယီက သူမ၏ ချွေးများကို သုတ်ရင်း အကြီးအကဲ ချန်ကို ပြန်ပြောလိုက်သည်။

အရိုးဆက်နတ်မင်းပင်ဆိုတာက နတ်မင်းအဆင့် ဆေးပင်တစ်ပင်ပဲ။ ၎င်းကို ရှင်သန်နိုင်ဖို့အတွက် ဝိညာဉ်စိုက်ခင်း မိုင်ပေါင်း တစ်ရာလောက် လိုအပ်သလို ရင့်ကျက်ဖို့အတွက်လည်း အနှစ်တစ်ရာလောက် ကြာတတ်တာ

ဒီလို ဆေးပင်မျိုး ပေါ်ထွက်လာပြီဆိုရင် အင်အားကြီးအဖွဲ့အစည်းတိုင်းက ဝိုင်းလုကြမှာပဲ ငါတို့ဂိုဏ်းရဲ့ အခုအခြေအနေနဲ့ဆိုရင် ဒီလို အဆင့်ရှိတဲ့ ဝိညာဉ်ရတနာမျိုးကို ရဖို့ဆိုတာ အလွန်ပဲ ခက်ခဲပါလိမ့်မယ်။ ဂျူနီယာညီမလေးဇီယီတကယ်ပဲ တခြားနည်းလမ်း မရှိတော့ဘူးလား" အကြီးအကဲ ချန်က စိုးရိမ်တကြီးဖြင့် ဇီယီကို ထပ်မေးလိုက်သည်။

"နောက်ထပ် နည်းလမ်းတစ်ခုကတော့ မဟာယာနအဆင့်ကို တက်လှမ်းနိုင်ဖို့ပါပဲ။ ထိုအဆင့်ကို ရောက်ရင်တော့ ပြတ်တောက်သွားတဲ့ ခြေလက်တွေကို ပြန်ပေါက်စေနိုင်တဲ့ အစွမ်း ရှိပါတယ်" အကြီးအကဲ ဇီယီက ခေါင်းခါရင်း အဖြေမဟုတ်သော အဖြေတစ်ခုကို ပြောလိုက်သည်။

ဤသည်မှာ အားလုံးသိထားပြီးသား ဖြစ်သည်မဟာယာနအဆင့်ရှိသည့် ကျွမ်းကျင်သူများသည် ပြတ်တောက်သွားသည့် ခြေလက်များကို ပြန်ပေါက်စေနိုင်ပြီး သူတို့ကို နတ်ဘုရားများ အဆင့်ဝင်နေပြီဟုပင် ဆိုနိုင်သည်။

သို့သော် ထိုအဆင့်မှာ အလွန်ပင် ဝေးကွာလှသည်။ ပြိုင်ဘက်ကင်းပါရမီရှင်များထဲတွင်ပင် ထိုအဆင့်သို့ ရောက်ရှိနိုင်သူမှာ တစ်သောင်းတွင် တစ်ယောက်သာရှိတတ်သည်။

ဤကမ္ဘာပေါ်တွင် မဟာယာနအဆင့်ရှိ ကျွမ်းကျင်သူတစ်ဦးကို မမြင်တွေ့ရသည်မှာ အနှစ်တစ်ထောင်နီးပါး ရှိနေပြီ ဖြစ်သည်။