အခန်း (၁၇) စိတ်နှလုံးနူးညံ့တဲ့ ဘိုင်လင်ထျန်း

စီနီယာအစ်ကိုလင်ထျန်း၏ အမည်အရင်းမှာ ဘိုင်လင်ထျန်းဖြစ်သည် သူသည် ဂိုဏ်းသို့ အစောပိုင်းကတည်းက ရောက်ရှိလာခဲ့သော တပည့်တစ်ဦးဖြစ်ပြီး အသက် (၁၀) နှစ်အရွယ်ကတည်းက ဂိုဏ်းထဲသို့ ရောက်ရှိကာ ယခုဆိုလျှင် ဂိုဏ်းအတွင်း နေထိုင်လာခဲ့သည်မှာ အနှစ် (၂၀) ကျော်ပြီ ဖြစ်သည်။

သူ၏ ကျင့်ကြံခြင်း ပါရမီမှာလည်း ရွယ်တူများထဲတွင် ထူးချွန်ထင်ရှားလှသည်။ အသက် (၃၃) နှစ်သာ ရှိသေးသော်လည်း သူ၏ ကျင့်ကြံဆင့်မှာ နတ်သန္ဓေအဆင့်၏ အလယ်အလတ်အဆင့်သို့ ရောက်ရှိနေပြီ ဖြစ်သည်။ သူသည် မျိုးဆက်သစ် တပည့်များထဲတွင် ဦးဆောင်ဦးရွက် ပြုနိုင်သူတစ်ဦးလည်း ဖြစ်သည်။

အတိတ်ဘဝတုန်းက ယဲ့ဖန်ကြောင့် ဘေးဒုက္ခများ ဆိုက်ရောက်လာသည့်အခါ ဂိုဏ်းမှ အကြီးအကဲများနှင့် အထူးချွန်ဆုံး တပည့်အများစုမှာ ဂိုဏ်းသားများ ဘေးကင်းရာသို့ ဆုတ်ခွာနိုင်ရန် နောက်ချန်နေခဲ့ပြီး ကာကွယ်ပေးခဲ့ကြသည်။

ထိုသူများထဲတွင် ဤစီနီယာအစ်ကို ဘိုင်လင်ထျန်းလည်း ပါဝင်ခဲ့သည်။

ထိုအချိန်တုန်းက သူသည် ဝိညာဉ်ပြောင်းလဲခြင်းအဆင့်သို့ ရောက်ရန် ခြေတစ်လှမ်းသာ လိုတော့သည်။

သူ၏ ပါရမီအရဆိုလျှင် သူသည် ယဲ့ဖန်နှင့်အတူ လွတ်မြောက်သွားနိုင်သည့် အရည်အချင်းရှိသော်လည်း.သူသည် သူ၏ အသက်ရှင်သန်ခွင့်ကို အခြားတပည့်များအတွက် ပေးဆပ်စွန့်လွှတ်ခဲ့သူ ဖြစ်သည်။

အတိတ်ဘဝတုန်းက ရှောင်ချီသည် အသက်ရှင်လွတ်မြောက်ရန် အရည်အချင်း မပြည့်မီခဲ့ပေ။ သူ ဂိုဏ်းအတွင်းမှ လွတ်မြောက်သွားနိုင်ခြင်းမှာလည်း ဤစီနီယာအစ်ကို ဘိုင်လင်ထျန်း၏ ကျေးဇူးကြောင့်သာ ဖြစ်သည်။

နောက်ဆုံးအချိန်တွင် ဘိုင်လင်ထျန်းသည် သူ၏ အသက်အနှစ်သာရကို လောင်ကျွမ်းစေပြီး ရှောင်ချီအပါအဝင် တပည့်သုံးဦးကို ဂိုဏ်းပြင်ပသို့ ပို့ဆောင်ပေးခဲ့သည်။

သူကိုယ်တိုင်ကမူ ဝိညာဉ်ပြောင်းလဲခြင်း အဆင့်ရှိသည့် ကျွမ်းကျင်သူတစ်ဦးနှင့်အတူ အသေခံ တိုက်ခိုက်ရင်း ကျဆုံးသွားခဲ့ရသည်။

ကျွန်တော်တို့ကို အရင်ဆုံး ဝိညာဉ်ကျောက်တုံး မိုင်းတွင်းဆီ ခေါ်သွားပေးပါ။ ကျွန်တော် နေဖို့နေရာ အရင်ရှာပြီးမှ ကာကွယ်ရေး အခြေအနေတွေကို စစ်ဆေးကြည့်မယ်ဟု ရှောင်ချီက ခေါင်းညိတ်ကာ တပည့်ဖြစ်သူကို ပြောလိုက်သည်။

"ဟုတ်ကဲ့ပါနတ်ဘုရားသားတော် ကျွန်တော့်နောက်က လိုက်ခဲ့ပါ" ထိုတပည့်က လမ်းပြသည့် အမူအရာ ပြုလုပ်ကာ ရှောင်ချီနှင့် ညီမလေးတို့ကို စိမ်းလန်းစိုပြည်သော တောင်တန်းများဆီသို့ ခေါ်ဆောင်သွားခဲ့သည်။

ဝိညာဉ်စွမ်းအားများ ကြွယ်ဝသောကြောင့် ဤနေရာရှိ အပင်များမှာ အလွန်ပင် ကြီးမားထွားကျိုင်းနေကြသည်။ ပတ်ဝန်းကျင်ရှိ တောတောင်ရေမြေများမှာလည်း ဝိညာဉ်စွမ်းအင်များဖြင့် ပြည့်နှက်နေလေသည်။

"စီနီယာအစ်ကိုလင်ထျန်း ဒါကဂိုဏ်းရဲ့နတ်ဘုရားသားတော်ရှောင်ချီပါ ဒါကတော့ ကျွန်တော် ပြောပြခဲ့တဲ့ စီနီယာအစ်ကိုဘိုင်လင်ထျန်းပါ"

သူတို့သည် ဝိညာဉ်ကျောက်တုံးကြော အနီးသို့ ရောက်ရှိသွားချိန်တွင် အသက် (၃၀) ဝန်းကျင်အရွယ်ရှိ လူငယ်တစ်ဦးသည် ဝတ်စုံပြာ ဝတ်ဆင်ထားသော တပည့် (၁၀) ကျော်ကို ဦးဆောင်လျက် တဲတစ်ခုအတွင်းမှ ထွက်လာကာ ရှောင်ချီ၏ အနီးသို့ ချဉ်းကပ်လာခဲ့သည်။

လမ်းပြလာသော တပည့်က သူတို့ကို မိတ်ဆက်ပေးလိုက်ခြင်း ဖြစ်သည်။

"ဂျူနီယာညီလေးရှောင်ချီ မတွေ့တာ ကြာပြီပဲ မင်း နတ်သန္ဓေအဆင့်ကို တက်လှမ်းနိုင်သွားပြီလို့ ကြားတယ် တကယ်ကို ဂုဏ်ယူပါတယ်"

ဘိုင်လင်ထျန်း၏ မျက်နှာမှာ အနည်းငယ် ဖြူဖျော့နေသော်လည်း သူသည် အလွန်ပင် နွေးထွေးပျူငှာစွာ ဆက်ဆံသည်။ သူက ခပ်သွက်သွက် လှမ်းလာပြီး ရှောင်ချီကို နှုတ်ဆက်ကာ အားရပါးရ ရယ်မောလိုက်သည်။

"စီနီယာအစ်ကိုက အရင်လိုပဲ ခန့်ညားနေတုန်းပါပဲ ဒါပေမဲ့ မျက်နှာက နည်းနည်းဖြူဖျော့နေတယ်။ မနေ့က တိုက်ပွဲမှာ အတော်လေး ရုန်းကန်ခဲ့ရပုံပဲ" ရှောင်ချီကလည်း ပြန်လည်နှုတ်ဆက်ကာ စိုးရိမ်ပူပန်သော လေသံဖြင့် မေးလိုက်သည်။

"မတတ်နိုင်ဘူးလေ ဂိုဏ်းက အကျပ်အတည်းနဲ့ ရင်ဆိုင်နေရတဲ့ အချိန်ဆိုတော့။ ငါတို့လို လူတွေက ရှေ့ကနေမရပ်တည်ပေးရင် အသစ်ဝင်လာတဲ့ ညီငယ် ညီမငယ်တွေကို သွားခိုင်းရမှာလား" ဘိုင်လင်ထျန်းက ရှောင်ချီကို လွှတ်ပေးလိုက်ပြီး သက်ပြင်းချကာ တဲအတွင်းသို့ ခေါ်ဆောင်သွားသည်။

"ဟော... ဒီကောင်မလေးက ဘယ်သူလဲ ဒီလို အန္တရာယ်များတဲ့ နေရာကို ကလေးမလေးတစ်ယောက် ဘာလို့ခေါ်လာရတာလဲ" ရှောင်ချီနောက်က လိုက်လာသည့် ကောင်မလေးကို ကြည့်ရင်း ဘိုင်လင်ထျန်း မျက်မှောင်ကြုတ်ကာ မေးလိုက်သည်။

"သူက ကျွန်တော့်ရဲ့ဂျူနီယာညီမလေးပါ။ သူက ငယ်ငယ်ကတည်းက အလိုလိုက်ခံထားရတော့ ဒီတစ်ခေါက် ကျွန်တော်နဲ့အတူ လိုက်ခဲ့မယ်ဆိုပြီး အတင်းပူဆာနေလို့ ဒါနဲ့ပဲ အတွေ့အကြုံ ရသွားအောင်ဆိုပြီး ခေါ်လာခဲ့တာပါ"

တဲအတွင်းသို့ ရောက်သောအခါ ရှောင်ချီက သစ်သားခုံတန်းပေါ်တွင် ထိုင်လိုက်ပြီး သူ့ညီမလေးကို ကြည့်ကာ အေးအေးလူလူပင် ပြောလိုက်သည်။

"ညီလေးရာ မင်းတကယ်ပဲ ဝေခွဲမရဖြစ်နေပြီလား ဒီနေရာကို ဘာမှတ်နေလို့လဲ အပန်းဖြေခရီး ထွက်တဲ့နေရာများမှတ်နေလား ဒီမှာက နေ့တိုင်းလူသေနေတာ မင်းညီမလေးကို ဒီလို အန္တရာယ်များတဲ့ နေရာကို ဘယ်လိုများ ခေါ်လာရတာလဲ" ဘိုင်လင်ထျန်းက သက်ပြင်းချရင်း မျက်မှောင်ကြုတ်ကာ ပြောလိုက်သည်။

"စိတ်မပူပါနဲ့ ကျွန်တော့်ရဲ့ အစွမ်းအပေါ်မှာ ကျွန်တော် ယုံကြည်ချက် ရှိပါတယ်။ ဒီကောင်မလေးကို ကျွန်တော် ကာကွယ်ပေးပါ့မယ်" စိုးရိမ်တကြီးဖြစ်နေသော ဘိုင်လင်ထျန်းကို ကြည့်ကာ ရှောင်ချီက ပြုံးပြီး ပြောလိုက်သည်။

"ထားပါတော့... ထားပါတော့ တကယ်လို့ ရန်သူတွေ ထပ်တိုက်လာရင် မင်းတိုက်ပွဲဝင်စရာ မလိုဘူး မင်းညီမလေးကိုပဲ လုံခြုံအောင် ကာကွယ်ပေးထား" ဘိုင်လင်ထျန်းက ရှောင်ချီကို ကြည့်ကာ မတတ်နိုင်သည့် အမူအရာဖြင့် လက်ကာပြလိုက်သည်။

ထို့နောက် သူသည် ရှောင်ချီတို့ အအေးပြေစေရန် လက်ဖက်ရည် တစ်ခွက်စီ ငှဲ့ပေးလိုက်သည်။

နေက ထွက်စပြုနေပြီ ဖြစ်သော်လည်း ကောင်းကင်မှာ လုံးဝမလင်းသေးပေ။ ၎င်းသည် တစ်နေ့တာတွင် အအေးဆုံးအချိန် ဖြစ်သည်။

ကျင့်ကြံသူများသည် အအေးဒဏ်ကို မကြောက်ကြသော်လည်း ကောင်မလေး၏ ကျင့်ကြံဆင့်မှာ အလွန်နိမ့်နေသဖြင့် သူမ၏ ခန္ဓာကိုယ်မှာ သာမန်လူသားထက် အနည်းငယ်သာ ပို၍ သန်မာခြင်း ဖြစ်သည်။

"စီနီယာအစ်ကို ကျွန်တော် ဒီဝိညာဉ်ကျောက်တုံး မိုင်းတွင်းထဲကို ဝင်ကြည့်ချင်တယ်" ဟု ရှောင်ချီက ရုတ်တရက် မော့ကြည့်ကာ ဘိုင်လင်ထျန်းကို ပြောလိုက်သည်။

"ဂိုဏ်းက ဝိညာဉ်ကျောက်တုံး တူးဖော်ရေးနဲ့ ပတ်သက်ရင် စည်းကမ်းချက်တွေ ရှိတယ်။ ငါတို့မှာ စောင့်ကြပ်ဖို့ တာဝန်ပဲရှိတာ မိုင်းတွင်းထဲကို ဝင်ခွင့်မရှိဘူး"

ဘိုင်လင်ထျန်းက ပြတ်ပြတ်သားသားပင် ငြင်းဆိုလိုက်သည်။ ဝိညာဉ်ကျောက်တုံး မိုင်းတွင်းကို အစောင့်အကြပ်များစွာ ချထားသဖြင့် သူတို့ကိုယ်တိုင်တောင်မှ အလွယ်တကူ ဝင်၍မရပေ။

ရှောင်ချီမှာ စကားပင် မပြောနိုင်တော့ပေ။ ယခုအချိန်တွင် သူသည် စီနီယာအစ်ကို ဘိုင်လင်ထျန်းနှင့် အတော်လေး ရင်းနှီးမှု မရှိသေးပေ ဂိုဏ်းအတွင်း၌ ခုနစ်ကြိမ် ရှစ်ကြိမ်ခန့်သာ ဆုံဖူးခြင်း ဖြစ်သည်။

သူ့အနေဖြင့် ဘိုင်လင်ထျန်းက ယခုကဲ့သို့ နွေးထွေးစွာ ဆက်ဆံနေခြင်းမှာ သူ၏နတ်ဘုရားသားတော်အဆင့်အတန်းကြောင့် ဖြစ်နိုင်သည်ဟု သံသယဝင်မိသည်။

"ဒါဆိုရင် အခု မြို့ထဲမှာ လူဘယ်လောက်ရှိလဲကာကွယ်ရေး အခြေအနေကရော ဘယ်လိုရှိလဲ" ရှောင်ချီက အပြင်ဘက်ကို တစ်ချက်ကြည့်ပြီး ဘိုင်လင်ထျန်းကို ပြန်မေးလိုက်သည်။

"လောလောဆယ် မြို့ထဲမှာ တပည့်ပေါင်း (၂၃) ယောက် ရှိနေပြီး ဝိညာဉ်ပြောင်းလဲခြင်း အဆင့်ရှိတဲ့ အကြီးအကဲတစ်ယောက်က ဦးဆောင်နေတယ်။ ဒဏ်ရာရထားတဲ့ တပည့်တွေလည်း (၃၀) ဝန်းကျင် ရှိနေသေးတယ်

ဂိုဏ်းကလည်း ဒီဝိညာဉ်ကျောက်တုံးကြောဆီကို စစ်ကူတွေ တစ်သုတ်ပြီးတစ်သုတ် ဆက်ပို့ပေးနေမှာပါ။

ဂိုဏ်းချုပ်ကတော့ တူးဖော်ရေး အရှိန်ကို မြှင့်ထားခိုင်းတယ်။ ငါတို့သာ နောက်ထပ် နှစ်လလောက်တောင့်ခံနိုင်ရင် ဒီဝိညာဉ်ကျောက်တုံး မိုင်းတွင်းတစ်ခုလုံးကို ငါတို့အပြီးတူးနိုင်မှာပဲ။

ပုံမှန်ဆိုရင်တော့ အဓိက ကျောက်တုံးကြောကို အကုန်မတူးထုတ်သရွေ့တော့ ဒီကြောတွေကနေ ဝိညာဉ်အသက်ဓာတ်တွေ ပြန်လည် နိုးထလာနိုင်စမြဲပဲ။

ဒါပေမဲ့ အခုက အရေးပေါ် အခြေအနေဆိုတော့ ဒါတွေကို ထည့်တွက်မနေနိုင်တော့ဘူး။ အဓိက ကျောက်တုံးကြောရော၊ အရန်ကြောတွေပါ အကုန်တူးထုတ်ရမယ်။ ဒီမိုင်းတွင်းကြီး ပျက်စီးသွားရင်တောင်မှ အဲဒီလူယုတ်မာတွေကိုတော့ အကျိုးအမြတ်မရစေရဘူး

ဘိုင်လင်ထျန်း၏ လေသံမှာ အေးစက်ပြီး ပြတ်သားနေသည်။

အဲဒီ ဝိညာဉ်ပြောင်းလဲခြင်း အဆင့်ရှိတဲ့ အကြီးအကဲအပြင် ဒီကျောက်တုံးကြောကို စောင့်ကြပ်ဖို့ နတ်သန္ဓေအဆင့်ရှိတဲ့ တပည့် သုံးယောက်ရှိတယ်။

အခု မင်းပါ ရောက်လာပြီဆိုတော့ ငါတို့ လေးယောက် ဖြစ်သွားပြီ။ ငါတို့ လေးယောက်က တစ်ယောက်ကို အဖွဲ့တစ်ဖွဲ့စီ ဦးဆောင်ပြီး ဒီကျောက်တုံးကြောရဲ့ အရပ်လေးမျက်နှာကို စောင့်ကြပ်ရမယ်။ ရန်သူတွေ တိုက်ခိုက်လာရင် တစ်ယောက်ကိုတစ်ယောက် ကူညီပေးနိုင်မှာပေါ့။

ဘိုင်လင်ထျန်းက ဖြည်းဖြည်းချင်း မတ်တတ်ရပ်ကာ တဲအပြင်ဘက်သို့ ထွက်လိုက်ပြီး တောင်တန်းတစ်ခုလုံး၏ မြေမျက်နှာသွင်ပြင်ကို ညွှန်ပြကာ ရှောင်ချီကို ပြောပြလိုက်သည်။

ရှောင်ချီမှာ တစ်စုံတစ်ခုကို စဉ်းစားနေသည့်အလား မျက်မှောင်ကို တင်းတင်းကြုတ်ထားပြီး ဘိုင်လင်ထျန်းကို ချက်ချင်း ပြန်မဖြေခဲ့ပေ။

"ညီလေး... ဘာတွေ တွေးနေတာလဲ" ဘိုင်လင်ထျန်းက ရှောင်ချီကို ကြည့်ကာ မေးလိုက်သည်။

"အာ... ဘာမှမဟုတ်ပါဘူး ကျင့်ကြံခြင်းနဲ့ ပတ်သက်တဲ့ ကိစ္စအချို့ကို စဉ်းစားနေလို့ပါ" တကယ်တော့ ရှောင်ချီသည် ဤဝိညာဉ်ကျောက်တုံးကြောထဲကို ဘယ်လို ခိုးဝင်ပြီး ဝိညာဉ်ကျောက်တုံးတွေ အကုန်လုံးကို ဘယ်လိုခိုးယူရမလဲဆိုတာကို တွေးနေခြင်း ဖြစ်သည်။

သူ၏ အတွေးများမှာ ရုတ်တရက် အနှောင့်အယှက် ခံလိုက်ရသဖြင့် သတိပြန်ဝင်လာခဲ့ခြင်း ဖြစ်သည်။

သိပ်ပြီး စိတ်မပူပါနဲ့ ညီလေးရှောင်ချီရာ။ ရန်သူတွေ တကယ်လာတိုက်ရင်တောင်မှ ငါတို့မှာ ဝိညာဉ်အသွင်ပြောင်းလဲခြင်းအဆင့်ရှိတဲ့ အကြီးအကဲက ဦးဆောင်ပေးနေတာပဲ။

 ဒါနဲ့ စကားမစပ် ဒီနေရာမှာ ကျင့်ကြံရင် အင်အားစိုက်ထုတ်မှု နည်းနည်းနဲ့ ရလဒ်ကောင်းတွေ ရနိုင်တယ်။ မင်း အားတဲ့အခါမှာ တရားထိုင်ပြီး ဝိညာဉ်စွမ်းအားတွေကို များများ စုပ်ယူထားဖို့ ကြိုးစားပါ။ ဒါက မင်းအတွက် အခွင့်အလမ်းကောင်း တစ်ခုတောင် ဖြစ်နိုင်တယ်။

ရှောင်ချီ ငိုင်နေသည်ကို မြင်သောအခါ ဘိုင်လင်ထျန်းက စစ်ပွဲကို စိုးရိမ်နေသည်ဟု ထင်မှတ်လိုက်သည်။ အဘယ်ကြောင့်ဆိုသော် ဤတပည့်များသည် ဂိုဏ်းအတွင်း၌သာ အသည်းအသန် ကျင့်ကြံနေကြသူများဖြစ်သဖြင့် သွေးထွက်သံယို မြင်ကွင်းများကို များများစားစား မတွေ့ဖူးကြသောကြောင့် ဖြစ်သည်။

ယခုကဲ့သို့ တိုက်ပွဲမြေပြင်သို့ ရောက်လာသည့်အခါ စိုးရိမ်စိတ်ဝင်တာ သို့မဟုတ် စိတ်ဓာတ်ကျတာမျိုး ရှိနေမည်မှာ သဘာဝပင်။

ထို့ကြောင့် ဘိုင်လင်ထျန်းက သူ၏ ညီငယ်ကို အားပေးလိုခြင်း ဖြစ်သည်။

ရှောင်ချီကတော့ဝိညာဉ်ကျောက်တုံးတွေကိုခိုးဖို့ပဲကြံစည်နေတာပါ။