အခန်း (၁၅)  မှင်သက်သွားရသော မူဝမ်အာ

"စီနီယာအစ်ကို... ကျွန်မကို စောင့်ပါဦး" သို့သော် ရှောင်ချီတစ်ယောက် တောင်အောက်သို့ ပျံသန်းရန်ပြင်ဆင်နေစဉ်မှာပင် အောက်ဘက်မှ နူးညံ့လှပသော အော်ဟစ်သံတစ်ခု ထွက်ပေါ်လာသည်။

ရှောင်ချီအသံလာရာဘက်သို့ ကြည့်လိုက်သောအခါ သူ၏ ဂျူနီယာညီမလေး ဖြစ်နေသည်ကို တွေ့လိုက်ရသည်။

ဤညီမလေးမှာ ဂိုဏ်းထဲသို့ နောက်ကျမှ ရောက်လာသူဖြစ်ပြီး ရှောင်ချီ အသက် (၁၆) နှစ်ဝန်းကျင်လောက်တွင် နတ်မိမယ် လင်းယွင်၏ တပည့်အဖြစ် ဝင်ရောက်လာခဲ့ခြင်း ဖြစ်သည်။

ရှောင်ချီ မှတ်မိသလောက်ဆိုလျှင် ဤညီမလေးမှာ အလွန်စကားတတ်ပြီး ချစ်စရာကောင်းသူဖြစ်သဖြင့် သူကလည်း သူမကို အတော်လေး ဂရုစိုက်ပေးခဲ့ဖူးသည်။

သို့သော် သူ အသက် (၁၇) နှစ်တွင် အပြစ်ပေးခံရပြီး (၃) နှစ်လုံးလုံး တောင်နောက်ဘက်မှာ နံရံကိုကြည့်ကာ နောင်တရနေခဲ့ရသဖြင့် သူမနှင့် တွေ့ရခဲလှသည်။

သူမမှာ ဂိုဏ်းအတွင်း အဆင့်အတန်းနိမ့်ပြီး ကျင့်ကြံဆင့်လည်း နိမ့်ပါးသူဖြစ်သဖြင့် တောင်နောက်ဘက်ရှိ ရှောင်ချီကို တစ်ခေါက်တွေ့နိုင်ဖို့တောင် အတော်လေး ကြိုးစားခဲ့ရသည်။

ရှောင်ချီ အသက် (၂၀) တွင် အကျဉ်းစံဘဝမှ လွတ်မြောက်လာချိန်မှာတော့ သူ၏ညီမလေး အမြုတေဖွဲ့စည်းခြင်းအဆင့်သို့ တက်လှမ်းနိုင်သည့် အချိန်နှင့် တိုက်ဆိုင်နေခဲ့သည်။

ထိုအချိန်တုန်းက ရှောင်ချီသည် မိမိကိုယ်ကို အားငယ်နေသဖြင့် ဂုဏ်ပြုစားပွဲသို့ မသွားရဲခဲ့ပေ။ ညီမလေးဖြစ်သူက အထပ်ထပ်အခါခါ တောင်းပန်လွန်း၍သာ သူ သွားရောက်ခဲ့ပြီး လက်ဆောင်အဖြစ် အဆင့်နိမ့်မှော်ရတနာတစ်ခုကိုသာ မဝံ့မရဲ ယူဆောင်သွားခဲ့ရသည်။

စားပွဲတစ်ခုလုံးတွင် သူသည် လေထုလိုပင် သဘောထားခံခဲ့ရသည်။ ညီမလေးမှလွဲ၍ မည်သူမျှသူ့ကို အရေးမစိုက်ကြပေ။ သူ၏ စီနီယာမမ နှစ်ယောက်နှင့် ဆရာဖြစ်သူတောင်မှ သူ့ကို အေးစက်စွာ တစ်ချက်ကြည့်ပြီးနောက် လုံးဝပင် အလှမ်းဝေးအောင် နေခဲ့ကြသည်။

ထိုအချိန်မှစ၍ သူသည် မိမိကိုယ်ကို ယုံကြည်မှု လုံးဝပျောက်ဆုံးသွားခဲ့ပြီး သူ၏ ကျင့်ကြံရေးဂူထဲမှာပင် နှစ်ပေါင်းများစွာ အောင်းနေခဲ့ကာ အပြင်သို့ လုံးဝမထွက်တော့ပေ။

ဤညီမလေးသည်သာ တာအိုဆွေးနွေးရန်ဟူသော အကြောင်းပြချက်ဖြင့် ရှောင်ချီ၏ ဂူအတွင်းသို့ မကြာခဏ လာရောက်လည်ပတ်လေ့ရှိသည်။

ပြောရမည်ဆိုလျှင် ဂိုဏ်းအတွင်း သူနေထိုင်ခဲ့သည့် နောက်ဆုံး (၁၀) နှစ်တာကာလအတွင်း ရှောင်ချီတစ်ယောက် သူမ၏အဖော်ပြုပေးမှုသာမရှိခဲ့လျှင် ဤမျှအထိ တောင့်ခံနိုင်လိမ့်မည် မဟုတ်ပေ။

မင်းလို ချီစုစည်းခြင်းအဆင့်လေးနဲ့ ဘာလိုက်လုပ်မလို့လဲ အခု ဂိုဏ်းအပြင်ဘက်မှာ ကျားတွေ၊ ဝံပုလွေတွေလို အန္တရာယ်များတဲ့သူတွေ အပြည့်ပဲ။ မင်း ဂိုဏ်းထဲမှာပဲ နေပြီး သေသေချာချာ ကျင့်ကြံနေတာက ပိုကောင်းလိမ့်မယ် ရှောင်ချီက လင်းယွီရှို့၏ နဖူးကို လက်ချောင်းဖြင့် ခပ်ဖွဖွလေး တောက်လိုက်သည်။

ကျွန်မက အခြေခံအုတ်မြစ်တည်ဆောက်ခြင်းအဆင့်ကို ရောက်နေပြီနော် မယုံရင် ကြည့်လိုက် ကောင်မလေးက ရတနာတစ်ခုကို ထုတ်ပြနေသကဲ့သို့ သူမ၏ကျင့်ကြံအဆင့်ကို ထုတ်ဖော်ပြသလိုက်သည်။ သူမ၏ ဝိညာဉ်စင်္ကြံအထက်တွင် ကျင့်ကြံခြင်းအခြေခံမှာ ထင်ရှားစွာ ပေါ်ထွက်လာပြီး အလွန်ပင် ခိုင်မာနေပုံရသည်။

ဒါတောင်မရသေးဘူး အခု ဂိုဏ်းကြီးတွေအားလုံးက ဝိညာဉ်ဓားဂိုဏ်းက တပည့်တွေကို လိုက်လံသတ်ဖြတ်နေကြတာ။ မင်းသာ လိုက်လာရင် စီနီယာအစ်ကိုက မင်းကို ကာကွယ်ပေးနိုင်မယ်လို့ အာမမခံနိုင်ဘူး။ ရှောင်ချီက ငြင်းဆိုသည့်အနေဖြင့် ခေါင်းခါလိုက်သည်။

 ဤညီမလေးသည် ယခုအခါ သူ၏တစ်ဦးတည်းသော ဂရုစိုက်ရသူဖြစ်သဖြင့် သူမကို အန္တရာယ်မဖြစ်စေချင်သည်မှာ သဘာဝပင်။

"မရဘူး... မရဘူး... ကျွန်မ လိုက်မှာပဲ" သို့သော် နောက်ထပ်ဖြစ်ပျက်လာသည့် အရာက ရှောင်ချီကို မျက်လုံးအပြူးသားဖြင့် မှင်သက်သွားစေသည်။

သူ့ညီမလေးမှာ မြေကြီးပေါ်တွင် လှဲချလိုက်ပြီး ဟိုလိမ့်ဒီလိမ့်ဖြင့် အသည်းအသန် ကလေးဆိုး ဆိုးနေတော့သည်။

စဉ်းစားကြည့်လျှင်လည်း သူ့ညီမလေးမှာ ယခုအချိန်တွင် (၁၃) နှစ်အရွယ် မိန်းကလေးငယ်တစ်ဦးသာ ရှိသေးသည် မဟုတ်ပါလား ဤမျှ ကလေးဆန်သည့် စိတ်ထားရှိနေသည်မှာ မထူးဆန်းပေ။

"ထတော့... ထတော့... မရှက်ဘူးလား" ရှောင်ချီက လေထဲမှ ဖြည်းဖြည်းချင်း ဆင်းသက်လာပြီး အပြာရောင်ကျောက်ပြားခင်းထားသော မြေပြင်ပေါ်တွင် လူးလိမ့်နေသည့် ညီမလေးကို ထူပေးလိုက်သည်။

"ဒါဆို စီနီယာအစ်ကိုက ကျွန်မကို လိုက်ခွင့်ပြုပြီပေါ့" လင်းယွီရှို့က မျှော်လင့်ချက်အပြည့်ဖြင့် မေးလိုက်သည်။

"အေးပါ... မင်းကို ရှုံးပါတယ် လာ... သွားကြမယ်" ရှောင်ချီက သူမကို အလိုလိုက်သည့်အနေဖြင့် ခေါင်းကို ခပ်ဖွဖွလေး ခေါက်လိုက်သည်။ ထို့နောက် လက်ချောင်းဖြင့် တောက်လိုက်ရာ ကျောပေါ်ရှိဓားပျံမှာ အိမ်ထဲမှ ထွက်လာပြီး သူတို့ရှေ့တွင် ဝဲပျံနေတော့သည်။

 သူက လက်ကွက်များဖြင့် အမိန့်ပေးလိုက်ရာ ဓားမှာ တဖြည်းဖြည်း ကြီးမားလာပြီး (၁၀) ပေခန့် ရှည်လျားကာ (၁) မီတာခန့် ကျယ်ဝန်းသည့် ဓားကြီးတစ်လက် ဖြစ်သွားတော့သည်။

တကယ်တော့ ငါကလေထဲမှာ တိုက်ရိုက်ပျံသွားမလို့ပဲ ဒါပေမဲ့ မင်းလို အပိုဝန်ထုတ်ဝန်ပိုးလေး ပါနေတော့ ဓားစီးပြီး ပျံသန်းခြင်းကိုပဲ သုံးရတော့မှာပေါ့ ရှောင်ချီက သူ့ခြေဖျားနားက ဓားကြီးကို ညွှန်ပြရင်း သက်ပြင်းချကာ ပြောလိုက်သည်။

ကျွန်မက ဝန်ထုတ်ဝန်ပိုး မဟုတ်ပါဘူး ကျွန်မက အရမ်းတော်တာနော် ခဏနေရင် စီနီယာအစ်ကို့ကို ကျွန်မရဲ့ စွမ်းရည်တွေပြမယ် ကောင်မလေးက မျက်စောင်းလေးခဲကာ ပြန်ပြောလိုက်ပြီး ဓားကြီးပေါ်သို့ ခုန်တက်ကာ ထိုင်ချလိုက်သည်။

ထိုအချိန်တွင် တပည့်အချို့ ဖြတ်သွားကြသည်။ ထိုအုပ်စုကို ဦးဆောင်လာသူမှာ ရှောင်ချီ အလွန်ပင် ရင်းနှီးလှသောသူ ရှောင်ချီ၏ ဒုတိယစီနီယာမမ မူဝမ်အာပင် ဖြစ်သည်။

ယခုအချိန်တွင် သူမသည် တပည့်အချို့နှင့်အတူ ရယ်မောပျော်ရွှင်စွာဖြင့် ဂိုဏ်းတံခါးဆီသို့ လျှောက်လှမ်းနေသည်။ သူတို့မှာ ဂိုဏ်း၏ တာဝန်များကို ထမ်းဆောင်ရန် ထွက်လာကြခြင်းဖြစ်သော်လည်း ဘာဖိအားမှမရှိဘဲ အပန်းဖြေခရီးထွက်သကဲ့သို့ ဖြစ်နေကြသည်။

"ဂိုဏ်းရဲ့နတ်ဘုရားသားတော်ကို နှုတ်ဆက်ပါတယ်" ရှောင်ချီကို မြင်သောအခါ တပည့်အချို့က ဦးညွှတ်နှုတ်ဆက်ကြသည်။

"ဂျူနီယာမောင်လေး... တောင်အောက်ဆင်းမလို့လား ငါတို့နဲ့အတူ သွားကြတာပေါ့" ရှောင်ချီ ဓားပေါ်တက်ကာ ထွက်ခွာတော့မည်ကို မြင်သောအခါ မူဝမ်အာသည် စိတ်လှုပ်ရှားစွာဖြင့် ဓားပေါ်သို့ လိုက်တက်လာသည်။ သူမက ရှောင်ချီ၏ လက်မောင်းကို ဆွဲကိုင်ကာ ချိုသာသော အကြည့်များဖြင့် ပြောလိုက်သည်။

ခဏတာမျှ ရှောင်ချီတစ်ယောက် ငိုင်သွားမိသည်။ သူ အလွမ်းဆုံအချိန်ကာလများဆီသို့ ပြန်ရောက်သွားသကဲ့သို့ ခံစားလိုက်ရသည်။

သူ၏ ဒုတိယစီနီယာမမက သူ့ကို ဤကဲ့သို့ ပြုံးပြခဲ့သည်မှာ ဘယ်လောက်တောင် ကြာခဲ့ပြီနည်း အတိတ်ဘဝတုန်းကတော့ သူသည် နိုးလာသည့်အခါ ဒါတွေအားလုံးက မုသာဝါဒတွေသာဖြစ်ဖို့ အမြဲတမ်း စိတ်ကူးယဉ်ခဲ့ဖူးသည်။

သူ့ဆရာက သူ့ကိုဂူထဲခေါ်ပြီး သင်ခန်းစာတွေ ပို့ချပေးမယ် စီနီယာမမ နှစ်ယောက်ကလည်း အရင်လိုပဲ တောက်ပတဲ့ အပြုံးတွေနဲ့ သူ့ကို နူးညံ့စွာ စကားပြောပေးမယ်။

အခုဆိုရင် သူသာ အလိုရှိမယ်ဆိုရင် သူ တစ်ချိန်က အိပ်မက်မက်ခဲ့တဲ့ ဘဝဟာ လက်တစ်ကမ်းမှာတင် ရှိနေပါပြီ။ ဒါပေမဲ့ အခုတော့ သူ ဒါတွေကိုဘာမှ ဂရုမစိုက်တော့ပါဘူး။

"ထွက်သွားစမ်း" ရှောင်ချီ၏ ဝိညာဉ်စွမ်းအားများ ပေါက်ကွဲထွက်လာပြီး မူဝမ်အာကို အေးစက်သော လေသံဖြင့် ပြောလိုက်သည်။

သူ အမုန်းဆုံးလူမှာ ယခုရှေ့တွင်ရှိနေသည့် ဒုတိယစီနီယာမမ မူဝမ်အာပင်ဖြစ်သည်။

သူ၏ဆရာနှင့် စီနီယာအစ်မကြီးတို့ ယဲ့ဖန်နောက်ကို ပါသွားခဲ့ခြင်းမှာ ကံကြမ္မာနှင့် တိုက်ဆိုင်မှုအချို့ ရှိနိုင်သော်လည်း ဤဒုတိယစီနီယာမမမှာမူ ယဲ့ဖန်နောက်သို့ အရှက်မရှိ တကောက်ကောက် လိုက်ခဲ့ခြင်းသာ ဖြစ်သည်။

ယဲ့ဖန်မှာ လက်တွဲဖော်ရှိနေမှန်း သိသိကြီးနှင့် ထိုလက်တွဲဖော်မှာလည်း သူမ၏ ကိုယ်ပိုင်ဂျူနီယာညီလေး၏ စေ့စပ်ထားသူဖြစ်နေမှန်း သိသိကြီးနှင့်ပင် သူမသည် အရှက်မရှိဘဲ ယဲ့ဖန်အပေါ် ထားရှိသည့် သူမ၏ခံစားချက်တွေကို ထုတ်ဖော်ပြောကြားခဲ့ပြီး ယဲ့ဖန်၏ ရင်ခွင်ထဲသို့ အတင်းတိုးဝင်ခဲ့သူ ဖြစ်သည်။

ရှောင်ချီ၏ ရုတ်တရက် ပေါက်ကွဲထွက်လာသော ဝိညာဉ်စွမ်းအားနှင့် အေးစက်သော စကားလုံးများကြောင့် မူဝမ်အာမှာ ခဏတာ မှင်သက်သွားရသည်။

သူမ၏ ဂျူနီယာမောင်လေးမှာ သူမနောက်ကို အမြဲတမ်း တကောက်ကောက်လိုက်ပြီး သူမကို အလေးစားဆုံးလူမဟုတ်ပါလား ဘာလို့ ဒီနေ့မှာ ဒီလောက်တောင် ထူးဆန်းနေရတာလဲ။

မောင်လေး ပြီးခဲ့တဲ့တစ်ခေါက်က နင့်ကို ငါ ကြိုးနဲ့တုတ်ခဲ့လို့ စိတ်ဆိုးနေတာလား အဲဒါက ဆရာ့ရဲ့ အမိန့်မို့လို့ပါ တပည့်တစ်ယောက်အနေနဲ့ ငါလည်း မလွန်ဆန်နိုင်ဘူး မဟုတ်လား မူဝမ်အာက အပြစ်မရှိသလို ပုံစံမျိုးဖြင့် ပြောလိုက်သည်။

"စကားတွေ အများကြီး မပြောနဲ့တော့ အခုချက်ချင်း ဆင်းမသွားရင် ငါ နင့်ကို ကန်ချလိုက်မယ် ငါ့ရဲ့ ဝိညာဉ်ဓားပေါ်ကို တက်နင်းဖို့ နင်က ဘာကောင်မမို့လို့လဲ"

ရှောင်ချီ၏ ပတ်ဝန်းကျင်ရှိ ဝိညာဉ်စွမ်းအားများမှာ အလွန်အမင်း ထကြွလာပြီး သူ၏ မျက်ဝန်းများမှာ နီမြန်းလာသည် တကယ်ပင် တိုက်ခိုက်တော့မည့်ပုံမျိုး ပေါက်နေသည်။

"ငါ... ငါ ဆင်းပါ့မယ်" မူဝမ်အာမှာ အကြီးအကျယ် ထိတ်လန့်သွားပြီး ဓားပေါ်မှ အမြန်ခုန်ဆင်းလိုက်ရသည်။ သူမ၏ ခြေထောက်များမှာ ထိန်းမနိုင်သိမ်းမရ တုန်ယင်နေတော့သည်။

ရှောင်ချီက သူမကို မျက်စောင်းတစ်ချက်ခဲကာ လျစ်လျူရှုလိုက်သည်။ သူက လက်ကွက်များကို အသက်သွင်းလိုက်ရာ ဓားကြီးမှာ ကောင်းကင်ယံသို့ လျင်မြန်စွာ ပျံတက်သွားပြီး အဝေးသို့ ထွက်ခွာသွားတော့သည်။

"စီနီယာမမ ဝမ်အာ... ဘာတွေဖြစ်ကုန်တာလဲ ဂိုဏ်းရဲ့နတ်ဘုရားသားတေယ်က မမအပေါ် ဘာလို့ ဒီလောက်တောင် အေးစက်နေရတာလဲ"

"ဟုတ်ပ မမဝမ်အာရယ်။ အရင်တုန်းကဆိုရင် နတ်ဘုရားသားတော်က စီနီယာမမ နှစ်ယောက်ပြောသမျှကို အမြဲတမ်း နားထောင်ပြီး အလိုက်သင့်နေပေးခဲ့တာ မဟုတ်လား။ ဒီနေ့ကျမှ ဘာလို့ ဒီလောက်ထူးဆန်းနေရတာလဲ"

မူဝမ်အာ ဓားပေါ်က အကန်ခံရပြီးနောက် သူမ၏ သူငယ်ချင်း နှစ်ယောက်က မယုံနိုင်စွာဖြင့် မေးမြန်းလိုက်ကြသည်။

"သူ ဒီနေ့ ဘာတွေ ရူးနေလဲဆိုတာ ဘယ်သူသိမှာလဲ နတ်သန္ဓေအဆင့်ကို တက်လှမ်းနိုင်သွားရုံနဲ့ သူကိုယ်သူ နတ်သားတစ်ပါး ဖြစ်သွားပြီလို့ ထင်နေတာလား မသိဘူး"

မူဝမ်အာ၏ မျက်နှာမှာ အနည်းငယ် နီမြန်းနေပြီး ဒေါသတွေ အလွန်အမင်းထွက်နေသည်။ ငယ်ငယ်ကတည်းက သူမကို ဤကဲ့သို့ ရိုင်းရိုင်းစိုင်းစိုင်း ဆက်ဆံသည့် အမျိုးသားတစ်ဦးတစ်ယောက်မျှ မရှိခဲ့ဖူးပေ။ 

ယခုမှာမူ တစ်စုံတစ်ယောက်က သူမကို ဤကဲ့သို့ ပြောဆိုလိုက်ခြင်းကြောင့် သူမ၏ ခန္ဓာကိုယ်ထဲကို ပျံလွှားဓားမြှောင် တစ်သောင်းနဲ့ ထိုးလိုက်သလို ခံစားလိုက်ရပြီး အလွန်အမင်း နာကျင်နေမိတော့သည်။

ရှောင်ချီကတော့သူ့ကိုသစ္စာဖောက်ခဲ့တဲ့စီနီယာမမကိုလုံးဝမျက်နှာသာမပေးတော့ပါဘူး။