အခန်း (၁၄၇)  ဝူသောက်ဇီ၏နိဂုံး

ရှောင်ချီ၏ ခန္ဓာကိုယ်သည် မြေပြင်ပေါ်သို့ အရှိန်ဖြင့် ကျဆင်းသွားသည် သူသည် နတ်မိမယ် လင်ယွင်နောက်သို့ လိုက်လံတိုက်ခိုက်ရန် အင်အားမရှိတော့ပေ။ အင်အားရှိလျှင်ပင် သူမ၏ တည်ရှိမှုကို လုံးဝ ခြေဖျက်ပစ်နိုင်ရန်မှာ မလွယ်ကူလှပေ။

လင်ယွင်အသုံးပြုသွားသော နည်းစနစ်အကြောင်းကို သူ၏အရင်ဘဝက အနည်းငယ် ကြားဖူးခဲ့သည်။

ဤကျင့်စဉ်၏ အဓိကထူးခြားချက်မှာ ရုပ်ခန္ဓာကို စွန့်လွှတ်ကာ ဝိညာဉ်ကို သီးသန့် ရှင်သန်ခွင့်ပြုခြင်းပင် ဖြစ်သည်။

ဝိညာဉ်အသွင်ဖြင့် ဆက်လက်ကျင့်ကြံခြင်းဖြင့် ဝိညာဉ်ပုံစံဖြင့်ပင် နတ်ဘုရားအဆင့်သို့ တက်လှမ်းနိုင်ပြီး တစ္ဆေနတ်ဘုရားထက် သာလွန်သော တည်ရှိမှုတစ်ခု ဖြစ်လာနိုင်သည်။

အနီးအနားရှိ အစွမ်းထက်သော ပညာရှင်များစွာမှာ သေလုမျောပါး ဖြစ်နေသော ရှောင်ချီကို ကြည့်ကာ မကောင်းသော စိတ်ကူးများ စတင်ဝင်လာကြသည်။

ရှောင်ချီ၏တစ်ကိုယ်လုံးမှာ ရတနာတစ်ခုလို ဖြစ်နေသည်ဟု ဆိုနိုင်သည်။ ယဲ့ဖန်ထံမှ လုယူထားသော စည်းစိမ်များကို မပြောနှင့်ဦး သူကိုယ်တိုင် ပိုင်ဆိုင်သော ပစ္စည်းများမှာပင် မယုံနိုင်လောက်အောင် များပြားလှသည်။ ထို့အပြင် သူ၏ ရုပ်ခန္ဓာကို ရုပ်သေးဖော်စပ်ရန် သို့မဟုတ် ဝိညာဉ်ရတနာများ ပြုလုပ်ရန်အတွက်ပင် အသုံးပြုနိုင်သည် မဟုတ်ပါလား။

သို့သော် အားလုံးက တွေဝေနေကြစဉ်မှာပင် သေလုမျောပါး ဖြစ်နေသော ရှောင်ချီသည် သူ၏ သိုလှောင်အိတ်ထဲမှ ဝိညာဉ်ဆေးပင်တစ်ခုကို ထုတ်ယူလိုက်သည်။

၎င်းမှာ ယဲ့ဖန် စုဆောင်းထားသော အဖိုးတန်ဆေးမြစ်သုံးခုထဲမှ တစ်ခုဖြစ်ပြီး ကြောက်မက်ဖွယ်ကောင်းသော ကုသမှုစွမ်းပကား ရှိသည်။

အကယ်၍ယဲ့ဖန်သာ ရှောင်ချီ၏ လက်ထဲမှ လွတ်မြောက်သွားပြီး ဤဆေးလုံးကို သောက်သုံးနိုင်ခဲ့ပါက သူ၏ ပြတ်တောက်သွားသော ခြေလက်များ ပြန်ပေါက်လာပြီး အထွတ်အထိပ် အခြေအနေသို့ ပြန်ရောက်နိုင်မည် ဖြစ်သည်။

ကံမကောင်းစွာဖြင့် ထိုအခြေအနေတွင် ယဲ့ဖန်မှာ ထွက်ပြေးရန် လမ်းစ မရှိခဲ့ပေ။ ဆေးလုံးကို သောက်ခဲ့လျှင်ပင် ရှောင်ချီက သူ၏ခြေလက်များကို အချိန်မရွေး ပြန်လည်ဖြတ်တောက်နိုင်သဖြင့် အချည်းနှီးသာ ဖြစ်ပေလိမ့်မည်။

ဂလု...

ရှောင်ချီသည် ရွှေရောင်တောက်ပနေသော ထိပ်တန်းဝိညာဉ်ဆေးလုံးကို မျိုချလိုက်သည်။ ချက်ချင်းဆိုသလိုပင် သူ၏ ခန္ဓာကိုယ်မှ ကြောက်မက်ဖွယ်ကောင်းသော သက်စောင့်အားအင်များ ပွင့်ထွက်လာသည်ကို ခံစားလိုက်ရသည်။

သူ၏ ရုပ်ခန္ဓာမှာ လျင်မြန်စွာ ပြန်လည်ကောင်းမွန်လာပြီး ရင်ဘတ်ရှိ ထိတ်လန့်ဖွယ် သွေးပေါက်ကြီးမှာလည်း တဖြည်းဖြည်း ပြန်လည် ပြည့်တင်းလာတော့သည်။

ရှောင်ချီ၏ ခန္ဓာကိုယ်မှာ မမြင်ရသော ဆွဲငင်အားတစ်ခုကြောင့် တဖြည်းဖြည်း အထက်သို့ မြောတက်သွားပြီး ခြေလက်များမှာ အောက်သို့ တွဲလောင်းကျနေသည်။ ပေတစ်သောင်းခန့် မြင့်သော ကောင်းကင်ယံသို့ ရောက်သောအခါ သူသည် ဟင်းလင်းပြင်ထဲတွင် တင်ပျဉ်ခွေထိုင်ကာ ပတ်ဝန်းကျင်ရှိ ဝိညာဉ်ချီများကို စုပ်ယူလေတော့သည်။

ရှောင်ချီ၏ခန္ဓာကိုယ်အတွင်းရှိ ကျင့်ကြံခြင်း အရှိန်အဝါမှာ ပို၍ထူထပ်လာသည်။ သူ၏ ဒဏ်ရာများ အပြည့်အဝ ပျောက်ကင်းသွားသည့်တိုင်အောင် သူ၏ကျင့်ကြံခြင်းမှာ နောက်တစ်ဆင့်သို့ တက်လှမ်းသွားပြီး ဟင်းလင်းပြင်ပြန်လည်ရောက်ရှိခြင်းအဆင့်၏ အထွတ်အထိပ်သို့ ရောက်ရှိသွားတော့သည်။

ရှူး... လူတိုင်း စောင့်ကြည့်နေစဉ်မှာပင် ရှောင်ချီ၏ပုံရိပ်မှာ ထိုနေရာတွင် တစ်ခါမှ မရှိခဲ့ဖူးသကဲ့သို့ ချက်ချင်း ပျောက်ကွယ်သွားတော့သည်။ ကောင်းကင်နှင့် မြေကြီးကြားရှိ ပျက်စီးနေသော ရှုခင်းများကသာ ခုနက ဖြစ်ပွားခဲ့သော ကြောက်မက်ဖွယ် တိုက်ပွဲအကြောင်းကို သက်သေခံနေကြတော့သည်။

တောရိုင်းမြေတစ်ခုတွင် ဂိုဏ်းချုပ်ဝူသောက်ဇီနှင့် ဝိညာဉ်ဆရာကြီး လင်ယွီတို့သည် ကျန်ရှိနေသော တပည့်အချို့ကို ဦးဆောင်ကာ အသည်းအသန် ထွက်ပြေးနေကြသည်။

ဝိညာဉ်ဆရာကြီး လင်ယွီသည် မူလက ဂိုဏ်းအတွက် အသက်ပေးရန် ရည်ရွယ်ခဲ့သော်လည်း ယွီရှောင်ဇီက လင်ယွီသည် ယဲ့ဖန်ထက် ပို၍ အားကိုးထိုက်သည်ဟု ယူဆခဲ့သည်။ ထို့ကြောင့် လင်ယွီကိုပါရမီမြင့်သော တပည့်အချို့ကို ရွေးချယ်စေကာ ယဲ့ဖန်ထက် အရင်ထွက်ပြေးခိုင်းခဲ့ခြင်း ဖြစ်သည်။

ဂိုဏ်းချုပ်ဝူသောက်ဇီမှာမူ သူ၏ကြောက်ရွံ့တတ်သော စိတ်ကြောင့် ထွက်ပြေးရန် ကြိုတင် ပြင်ဆင်နေခဲ့သည်မှာ ကြာပြီဖြစ်သည်။ ထူးဆန်းသော ကံတရားကြောင့် ဤတစ်ကြိမ်တွင် ဝိညာဉ်ဓားဂိုဏ်းမှ လူအများအပြား အသက်ရှင် လွတ်မြောက်လာခဲ့ကြသည်။

ဘုန်း...

ကြောက်မက်ဖွယ်ကောင်းသော ဝိညာဉ်အလင်းတန်းကြီး တစ်ကမ္ဘာလုံးကို ပေါက်ကွဲသွားစေသည်။

ဓားရှည်တစ်လက်မှာ ဟင်းလင်းပြင်ကို ဖြတ်ကျော်လာပြီး ဂိုဏ်းချုပ်ဝူသောက်ဇီတို့၏ ရှေ့တွင် စိုက်ဝင်သွားကာ မိုင်ပေါင်းများစွာ ကျယ်ဝန်းသော ကျင်းကြီးတစ်ခုကို ဖြစ်ပေါ်စေခဲ့သည်။

ထိုတိုက်ခိုက်မှု၏ တုန်ခါမှုလှိုင်းကြောင့် ဝိညာဉ်ဓားဂိုဏ်းမှ ကျန်ရှိနေသော တပည့်တစ်ရာကျော်မှာ လွင့်ထွက်သွားကြတော့သည်။

ရှောင်ချီသည် လှံတစ်လက်ကို ကိုင်ဆောင်ကာ ဟင်းလင်းပြင်ထဲမှ တစ်ယောက်တည်း ထွက်လာသည် သူ၏ခန္ဓာကိုယ်မှ လျှပ်စီးတန်းများ ဖြာထွက်နေသဖြင့် လောကသို့ ဆင်းသက်လာသော ကောင်းကင်နတ်ဘုရားတစ်ပါးနှင့် တူနေသည်။

"ဒါ... ဒါ ဘယ်လိုဖြစ်နိုင်မှာလဲ မင်းက ဘယ်လိုလုပ် ဟင်းလင်းပြင်ကိုဖြတ်ကျော်နိုင်တဲ့ စွမ်းအား ရှိနေတာလဲ"

ဂိုဏ်းချုပ်ဝူသောက်ဇီသည် ဟင်းလင်းပြင်ထဲမှ ထွက်လာသော ရှောင်ချီကို ကြည့်ကာ သရဲမြင်လိုက်ရသကဲ့သို့ အော်ဟစ်လိုက်သည် သူသည် ဂိုဏ်းချုပ်တစ်ဦး၏ တည်ငြိမ်မှုကို လုံးဝ ဆုံးရှုံးသွားခဲ့ပြီ။

"ဝူသောက်ဇီ... မင်းရဲ့ခေါင်းကို ဖြတ်ဖို့ ငါတစ်နေ့နေ့ လာခဲ့မယ်လို့ ပြောခဲ့သားပဲ အဲ့ဒီနေ့အတွက် မင်းကိုစောင့်ခိုင်းထားတာ ကြာသွားပြီ"

ရှောင်ချီသည် ကောင်းကင်ယံမှ ဆင်းသက်လာပြီး ဝူသောက်ဇီထံသို့ ဖြည်းညှင်းစွာ လျှောက်သွားသည်။ သူသည် အနက်ရောင် ဝတ်စုံကို ဝတ်ဆင်ထားသော်လည်း ယခုအခါ သူ၏ အဝတ်အစားများမှာ သွေးရောင်များဖြင့် စွန်းထင်းနေသည်။

အချို့နေရာများတွင် လောင်ကျွမ်းနေပြီး စုတ်ပြဲနေသည် ၎င်းမှာ နတ်မိမယ်လင်ယွင်နှင့် တိုက်ခိုက်ခဲ့သော တိုက်ပွဲကြီး၏ အမှတ်အသားများပင် ဖြစ်သည်။

"ရှောင်ချီ... ငါ မင်းအပေါ် မကောင်းခဲ့တာ မရှိပါဘူး မဟုတ်လား မင်း မေ့သွားပြီလား ငါ့ရဲ့ သမီးအရင်းကိုတောင် မင်းနဲ့ လက်ထပ်ပေးမလို့ လုပ်ခဲ့တာလေ အကယ်၍ယဲ့ဖန်သာ ကြားထဲက နှောင့်ယှက်ခြင်း မရှိရင် ငါတို့ဟာ အခုဆို ယောက္ခမနဲ့ သမက်တွေ ဖြစ်နေမှာ"

ဂိုဏ်းချုပ် ဝူသောက်ဇီသည် ထိတ်လန့်တုန်လှုပ်နေသော မျက်နှာဖြင့် ရှောင်ချီကို တစ်ခုခု ရှင်းပြရန် ကြိုးစားနေသည်။

"ဟုတ်တယ် မင်းငါ့အပေါ်မှာ တကယ်ကို ကောင်းခဲ့တာပဲ အရမ်းကို ကောင်းခဲ့တာ ယဲ့ဖန်က ဝိညာဉ်ကျောက်တုံးတွင်းကို အဓမ္မစုပ်ယူခဲ့တာတောင် မင်းသူ့ကိုအပြစ်မပေးခဲ့ဘူး။ ဒါပေမဲ့ ငါက သူ့ကို တစ်ခါပဲတိုက်ခိုက်မိတာကို မင်းက ငါ့ကို ၁၀ နှစ်လောက် အကျဉ်းချချင်ခဲ့တယ်။ ဒါကိုပဲ မင်းကကောင်းတယ်လို့ ခေါ်တာလား"

"ငါ့ရဲ့ စိတ်ထဲမှာ သတ်ရမယ့်သူတွေစာရင်း ရှိတယ်ဆိုတာ မင်းကိုပြောပြလိုက်မယ်။ ယဲ့ဖန်က နံပါတ် (၁) လင်ယွင်က နံပါတ် (၂) ယွီရှောင်ဇီက နံပါတ် (၃) မင်းက နံပါတ် (၄) ပြီးတော့ နောက်ကွယ်မှာ ပုန်းနေတဲ့ အဲ့ဒီစည်းကမ်းထိန်းသိမ်းရေး အကြီးအကဲက နံပါတ် (၅) ပဲ"

"ယဲ့ဖန်ကတော့ ငါ့လက်ချက်နဲ့ သေလုနီးပါး ဖြစ်သွားပေမယ့် ကျိုယိုအဘိုးကြီးက ကယ်သွားခဲ့တယ်။ သူ အသက်ရှင်နေပေမယ့်လည်း အကြာကြီးခံမှာ မဟုတ်ပါဘူး။"

"လင်ယွင်အတွက်ကတော့ သူမရဲ့ ရုပ်ခန္ဓာကို ငါဖျက်ဆီးပစ်လိုက်ပြီ အခုတော့ သူမရဲ့ ဝိညာဉ် အစအနလေးပဲ ကျန်တော့တယ်။ ငါ့ရဲ့ကျင့်ကြံခြင်းအဆင့် လုံလောက်ပြီဆိုရင် အဲ့ဒီဝိညာဉ်ကိုလည်း ငါထပ်ပြီးဖျက်ဆီးပစ်ဦးမှာ"

"အကြီးအကဲချုပ်ယွီရှောင်ဇီကတော့ ဝိညာဉ်ဓားဂိုဏ်းကို ကာကွယ်ရင်း တိုက်ပွဲမှာ သေဆုံးသွားခဲ့ပြီ။ ဒါကတော့ နည်းနည်း နှမြောစရာပဲ သူ့ကိုငါ့လက်နဲ့ကိုယ်တိုင် မသတ်လိုက်ရတာ တကယ်ကို ဝမ်းနည်းစရာပဲ ဒါပေမဲ့ သူရဲရဲဝံ့ဝံ့ သေဆုံးသွားတာကို ထောက်ထားပြီး ငါတို့ကြားက အရင်ဘဝက အာဃာတတွေကို အပြတ်အသတ် ရှင်းလိုက်ပြီလို့ သတ်မှတ်လိုက်မယ်။"

"အခုတော့ နံပါတ် (၄) ဖြစ်တဲ့ မင်းရဲ့ အလှည့်ပဲ ကဲ... ငါ့ရဲ့ ချစ်လှစွာသော ဂိုဏ်းချုပ်ကြီး မင်းရဲ့ လည်ပင်းကို ဆေးကြောပြီးပြီလား"

ရှောင်ချီ၏ လေသံမှာ အေးစက်ပြီး ပြတ်သားလှသည် သူသည် ဂိုဏ်းချုပ် ဝူသောက်ဇီကို လူသေတစ်ယောက်ကဲ့သို့ ကြည့်နေသည်။

"ရှောင်ချီ... မင်း သန်မာတယ်ဆိုတာ ငါဝန်ခံပါတယ်။ မင်းနယ်စပ်မှာ မိစ္ဆာမျိုးနွယ်ဝင်တွေကို မရေမတွက်နိုင်အောင် သတ်ခဲ့တယ် စစ်မှုထမ်းကောင်း တံဆိပ်တွေ ရခဲ့တယ် နာမည်ကျော်ကြားခဲ့တယ်"

"ဒါပေမဲ့ မမေ့နဲ့ဦး အခုမင်းရဲ့ ရှေ့မှာရှိနေတာက ဝိညာဥ်ခန္ဓာပေါင်းစည်းခြင်းအဆင့် ပညာရှင် နှစ်ယောက်လေ။ ဝိညာဥ်ခန္ဓာပေါင်းစည်းခြင်းအဆင့်ကို မရောက်မချင်း မင်းဒီအဆင့်ရဲ့ လျှို့ဝှက်ချက်တွေကို ဘယ်တော့မှ နားလည်မှာမဟုတ်ဘူး။"

"မင်း အရင်က အဆင့်ကျော်ပြီး တိုက်ခိုက်နိုင်ခဲ့ရင်တောင် ဒီအဆင့်မှာတော့ မင်းဟာ ငါ့မျက်စိထဲမှာ ပုရွက်ဆိတ်တစ်ကောင်ထက် မပိုဘူး"

ဂိုဏ်းချုပ် ဝူသောက်ဇီသည် ရှောင်ချီကို ကြောက်လန့်စေရန် မိမိကိုယ်မိမိ တည်ငြိမ်အောင် အတင်းကြိုးစားရင်း ပြောလိုက်သည်။

"အော်... ဟုတ်လား ဒါဆိုမင်းအတွက် ငါကပုရွက်ဆိတ်တစ်ကောင်ပေါ့ ဒါဆိုဒီပုရွက်ဆိတ်က ကောင်းကင်က ဆင်းသက်လာတဲ့ မြင့်မြတ်လှတဲ့ နတ်ဘုရားတစ်ပါးကို ခုတ်ပိုင်းနိုင်မလားဆိုတာ ငါ ကြည့်ချင်သေးတယ်။"

"စကားမစပ် မင်းကို ပြောဖို့ မေ့သွားလို့ မင်းပြောနေတဲ့ အဲ့ဒီအနိုင်မခံတဲ့ ဝိညာဥ်ခန္ဓာပေါင်းစည်းခြင်းအဆင့် ပညာရှင် အချို့ကို ငါသတ်ခဲ့ပြီးပြီ"

ရှောင်ချီသည် ကိုယ့်ကိုယ်ကိုယ် ယုံကြည်မှုလွန်ကဲနေသော ဂိုဏ်းချုပ် ဝူသောက်ဇီကို ကြည့်ကာ လှောင်ပြောင်လိုက်မိသည် သူဤမျှရယ်စရာကောင်းသော ပြက်လုံးမျိုး မကြားရသည်မှာ ကြာပြီဖြစ်သည်။

"ဝိညာဉ်ဆရာကြီးလင်ယွီ... ငါတို့နှစ်ယောက် ပူးပေါင်းပြီး ဒီသစ္စာဖောက် တပည့်ကို သတ်ရမယ် မဟုတ်ရင် ငါတို့အားလုံး အသက်ရှင်မှာ မဟုတ်ဘူး"

ဂိုဏ်းချုပ်ဝူသောက်ဇီသည် ဝိညာဉ်ဆရာကြီးလင်ယွီကို အသည်းအသန် အော်ဟစ်လိုက်သည်။

ဝိညာဉ်ဆရာကြီး လင်ယွီသည် ရှောင်ချီကို ရှုပ်ထွေးသော အကြည့်ဖြင့် ကြည့်နေသည်။

သူနှင့် ရှောင်ချီကြားတွင် မည်သည့် ပတ်သက်မှုမှ မရှိခဲ့ပေ။ သူဂိုဏ်းကို စီမံခန့်ခွဲနေစဉ် အချိန်အတွင်း ရှောင်ချီမှာ မိုးကြိုးရေကန်တွင် အကျဉ်းချခံနေရသည် နောက်ပိုင်းတွင် သူတံခါးပိတ် ကျင့်ကြံနေစဉ်မှာပင် ရှောင်ချီက မိုးကြိုးရေကန်မှ ဖောက်ထွက်သွားခဲ့ခြင်း ဖြစ်သည်။

ရှောင်ချီဟူသော နာမည်မှာ သူ့အတွက် အတော်လေး သူစိမ်းဆန်သည်ဟု ဆိုနိုင်သည်။ သို့သော် အချိန်တစ်ခုတွင် ရှောင်ချီသည် မယုံကြည်နိုင်လောက်သော အခွင့်အလမ်းများကို ရရှိခဲ့ပုံရပြီး သူ၏ နာမည်မှာ ကျင့်ကြံခြင်း လောကတွင် အမြဲတမ်း ပဲ့တင်ထပ်လာခဲ့သည်။

ပထမဦးစွာ သူသည် ဝိညာဉ်ဓားဂိုဏ်းမှအကြိမ်ကြိမ် ထွက်ပြေးခဲ့သည် ထို့နောက် နယ်စပ်တွင် အစွမ်းပြခဲ့ပြီး ဝေနိုင်ငံကြီး၏ ပထမတန်းစား မင်းသားဘွဲ့ကို အပ်နှင်းခြင်း ခံခဲ့ရသည်။

ထို့ကြောင့် သူသည် ဤနာမည်ကို အလေးအနက်ထားခဲ့ရသည်။ ယခု ရှောင်ချီနှင့် ပြန်လည်တွေ့ဆုံချိန်တွင် နှစ်ဦးသား၏ အင်အားမှာ ကမ္ဘာနှင့်အမျှ ကွာခြားသွားခဲ့ပြီဖြစ်သည်။

တစ်ချိန်က လက်တစ်ဖက်တည်းဖြင့် ချေမှုန်းနိုင်ခဲ့သော ပုရွက်ဆိတ်လေးမှာ ယခုအခါ ကောင်းကင်သို့ ထိုးတက်နေသော ဧရာမ သစ်ပင်ကြီးတစ်ပင်အဖြစ် ကြီးထွားလာခဲ့ပြီ ဖြစ်သည်။