အခန်း (၁၄၅)  ဆရာနှင့် တပည့်ကြားက ကံပါလာသော ထိပ်တိုက်တွေ့ဆုံမှု

"တကယ်တော့ မင်း ငါ့ကို မုန်းနေဖို့ မလိုပါဘူး။ ငါ့အတွက်တော့ မင်းဟာ ရင်းနှီးသလိုလိုရှိတဲ့ သူစိမ်းတစ်ယောက်ပါပဲ"

ငါ့ရဲ့ ရှည်လျားလှတဲ့ ဘဝသက်တမ်းတစ်လျှောက်မှာ မင်းဟာ ဘေးနားကနေ ဖြတ်ပြေးသွားတဲ့ ပုရွက်ဆိတ်လေးတစ်ကောင်သာသာပါပဲ ဒါပေမဲ့ ငါတို့နှစ်ယောက်လုံး ပြန်လည်ရှင်သန်လာကြပြီဆိုတော့ အရင်ဘဝက ကိစ္စတွေကို ဘာလို့ မေ့မပစ်လိုက်ကြတာလဲ

အခု မင်းရဲ့ ပုံစံကို ငါတော်တော်လေး စိတ်ဝင်စားတယ်။ အကယ်၍ မင်းသာ ငါ့ရဲ့ လက်အောက်ကို ဝင်မယ်ဆိုရင် မင်းကို ဒီကမ္ဘာထဲကနေ ငါခေါ်ထုတ်သွားပေးနိုင်တယ်။

"မင်း မသိသေးဘူးမလား ငါတို့ရှိနေတဲ့ဒီကမ္ဘာဟာ တကယ်တော့ အစွမ်းထက်တဲ့ ပညာရှင်ကြီးတစ်ယောက်က ဖန်တီးထားတဲ့ ကမ္ဘာငယ်လေးတစ်ခုပဲ"

"ဒီကမ္ဘာငယ်လေးရဲ့ အပြင်ဘက်မှာတော့ မဟာစကြဝဠာကြီးရှိတယ် အဲ့ဒီမှာတော့ လောကနိယာမတွေကပြည့်စုံပြီး ကြယ်တာရာတွေလို များပြားလှတဲ့ ပညာရှင်ကြီးတွေ ရှိကြတယ်"

"အဲ့ဒီမှာတော့ မိစ္ဆာမျိုးနွယ်ဆိုတာ မရှိသလို လူသားမျိုးနွယ်ကလည်း အစားအစာသက်သက် ဖြစ်မနေတော့ဘူး"

"ကျင့်ကြံသူတွေဟာ ဘာကိုမှပူပန်စရာမလိုဘဲ ပိုမြင့်မားတဲ့ ကျင့်ကြံခြင်းအဆင့်တွေကို တက်လှမ်းနိုင်ကြတယ်။ အဲ့ဒီကအလှအပတွေက မင်းစိတ်ကူးယဉ်နိုင်တာထက်ကို ပိုပါတယ်"

"ဘယ်လိုလဲ ခေါင်းညိတ်လိုက်စမ်းပါ ငါ့ရဲ့ခွေးတစ်ကောင်အဖြစ်နေဖို့ သဘောတူလိုက်ရင် မင်းကို အဲ့ဒီကို ငါခေါ်သွားပေးမယ်"

နတ်မိမယ်လင်ယွင်သည် ရှောင်ချီကို တည်ငြိမ်စွာ ကြည့်လိုက်သည်။ သူမ၏ဟန်ဆောင်မှုများကို ဖယ်ရှားလိုက်ပြီးနောက် သူမ၏ဖဲချပ်အားလုံးကို ထုတ်ပြလိုက်ခြင်းပင်။ ရှောင်ချီကို ပြန်လည်သိမ်းသွင်းချင်သည့်ဟန်ဖြင့် အရင်ကလို သနားစဖွယ် သရုပ်ဆောင်နေဖို့ မလိုတော့ပေ။

"ငါ တကယ် သိချင်မိတာက... အနာဂတ်မှာ မင်းဘာတွေနဲ့ ကြုံခဲ့လို့ ဒီလောက်တောင် မောက်မာပြီး ဦးနှောက်မရှိတဲ့ လူတစ်ယောက် ဖြစ်သွားတာလဲ"

"ပြီးတော့ ငါသိသလောက်ဆိုရင် အရင်ဘဝမှာ မင်းယဲ့ဖန်ကို အသေအလဲ ချစ်ခဲ့တာလေ အခု ပြန်လည်ရှင်သန်လာလို့ ယဲ့ဖန်က မင်းကိုအသုံးချခဲ့တာ သိရင်တောင် မင်းဒီလောက်အထိ ရက်စက်မသွားသင့်ဘူး"

"မင်းရဲ့ စရိုက်အရဆိုရင် အရင်ဘဝက နှစ်ပေါင်းရာချီထောင်ချီခဲ့တဲ့ သံယောဇဉ်တွေကို ထောက်ပြီး ယဲ့ဖန်ကို ခွင့်လွှတ်ပေးဖို့က ပိုများပါတယ်"

ရှောင်ချီသည် မိမိကိုယ်မိမိ အထင်ကြီးပြီး လွယ်လွယ်ကူကူ စကားပြောနေသော အမျိုးသမီးကို ကြည့်ကာ ခေါင်းခါလိုက်မိသည်။ လင်ယွင်ကို ပထမဆုံးအကြိမ် တွေ့ဖူးသကဲ့သို့ပင်။

သူမသည် အနာဂတ်မှာ ဒီလောက်အကြာကြီး နေခဲ့တာတောင် ဘာလို့လူအတစ်ယောက်လို စကားပြောပြီး ပြုမူနေရတာလဲ။

"ငါ့ရှေ့မှာ သူ့အကြောင်း လာမပြောနဲ့ အဲ့ဒီ အသည်းနှလုံးမရှိတဲ့ လူယုတ်မာက မဟာယနအဆင့်ကို ရောက်ဖို့အတွက် ငါတို့အားလုံးကို ယဇ်ပူဇော်ခဲ့တာ"

"မင်းက ငါ့ထက် အရင်လက်ဦးသွားလို့သာပေါ့ မဟုတ်ရင် သူ့အရိုးတွေကို ကြိတ်ပြီး ပြာတွေကို လေထဲ လွင့်ပစ်လိုက်မှာ"

နတ်မိမယ် လင်ယွင်သည် အလွန်အမင်း ဒေါသထွက်ကာ အော်ဟစ်လိုက်သည်။

"ဟားဟား..."

"ဒါဆို ဒီလိုကိုး နောက်ဆုံးတော့ မင်းလည်း ယဲ့ဖန်ရဲ့ သစ္စာဖောက်တာကို ခံလိုက်ရတာပေါ့"

ရှောင်ချီသည် ခပ်ဖွဖွ ရယ်မောလိုက်ပြီး လင်ယွင်ကို အထင်အမြင်သေးစွာ ကြည့်လိုက်သည်။

ပြောရမယ်ဆိုရင် အရင်ဘဝက လင်ယွင်ဟာ တကယ်ကို ကံဆိုးခဲ့တာပဲ အစပိုင်းမှာ ယဲ့ဖန်ရဲ့ လှည့်စားတာကို ခံရတယ် နောက်တော့ ယဲ့ဖန်ကိုကယ်ရင်း သေဆုံးခဲ့ရတယ်။ အဲ့ဒီနောက်မှာ ယဲ့ဖန်က သူမကို ပြန်ရှင်အောင်လုပ်ပေးတော့ သူမဟာ ပျော်ရွှင်တဲ့ဘဝကို ရပြီလို့ ထင်ခဲ့မှာပဲ။ ဒါပေမဲ့ ကောင်းစားတဲ့နေ့တွေက နှစ်ပေါင်း ထောင်ဂဏန်းတောင် မကြာလိုက်ဘဲ ယဲ့ဖန်ရဲ့ ယဇ်ပူဇော်တာကို ခံလိုက်ရပြန်တယ်။

"မင်း နောက်တစ်ခါ ထပ်ရယ်ရင် ငါမင်းကို သတ်ပစ်မယ်" လင်ယွင်သည် အေးစက်သော မျက်လုံးများဖြင့် ရှောင်ချီကို စိုက်ကြည့်လိုက်ပြီး လူသတ်ချင်စိတ်များ ပွင့်ထွက်လာသည်။

"မင်းက ကိုယ့်ကိုယ်ကိုယ် ဘာမှတ်နေတာလဲ ငါ့ကိုသတ်မယ် ဟုတ်လား မင်းရဲ့ အရည်အချင်းကို အရင် ပြန်ဆန်းစစ်ကြည့်ဦး"

ရှောင်ချီသည် လင်ယွင်ကို အထင်သေးစွာ ကြည့်လိုက်သည်။ အမှန်အတိုင်း ပြောရလျှင် ယခုလက်ရှိ နတ်မိမယ် လင်ယွင်ကို သူ လုံးဝအရေးမလုပ်ပေ။

"တပည့်ကောင်းလေး... လူဆိုတာ အရမ်းမောက်မာမနေသင့်ဘူး လောကကြီးမှာ ပါရမီရှင်တွေ အများကြီး ရှိတာပဲ မင်း တစ်ယောက်တည်းက အားလုံးကိုဖိနှိပ်ထားနိုင်မယ် ထင်နေတာလား"

"မင်းရဲ့အမြင်က အခုထိကျဉ်းမြောင်းလွန်းနေသေးတယ်။ မင်းလိုပါရမီမျိုးက ဟို မဟာစကြဝဠာကြီးမှာဆိုရင် သာမန်လူထက် နည်းနည်းပဲ ပိုသာတဲ့သူဖြစ်မှာ"

"ငါက အရင်ဘဝမှာနှစ်ပေါင်း ထောင်ချီ နေခဲ့ဖူးသလို အခုလည်းပြန်လည်ရှင်သန်လာတာ ဒါ့အပြင် ငါ့ရဲ့ကျင့်ကြံခြင်း အဆင့်က မင်းထက်တစ်ဆင့်အပြည့် မြင့်နေတာလေ။ ငါတို့တိုက်ခိုက်ကြရင် မင်း နိုင်မယ်လို့ ထင်နေတာလား"

နတ်မိမယ် လင်ယွင်သည် မာန်တက်ကာ ရပ်နေပြီး ရှောင်ချီကို လူအတစ်ယောက်လို ကြည့်နေသည်။

"မင်းမှာ အခု ရွေးချယ်စရာ တစ်ခုပဲ ရှိတယ် ငါ့ကို အညံ့ခံဖို့ပဲ မဟုတ်ရင် မင်းကို မျက်စိတစ်မှိတ်အတွင်း ငါ သတ်ပစ်နိုင်တယ်"

"ဒါမှမဟုတ် ခုနက အဘွားကြီးကိုခေါ်မလား ဒါပေမဲ့ သူက မဟာယာနအဆင့်ရှိတဲ့ ပညာရှင်ကြီးတစ်ယောက်လေ ခွေးတစ်ကောင် မဟုတ်ဘူး။ တစ်နေ့တည်းမှာ မင်းက သူ့ကို နှစ်ခါ ခေါ်ခိုင်းနေတာက သူ့အတွက်တော့ အရှက်ရစရာကြီး ဖြစ်မှာပေါ့"

လင်ယွင်သည် အေးအေးဆေးဆေး ပြောနေသည်။ သူမသည် ရှောင်ချီကို အပိုင်ကိုင်ထားနိုင်ပြီဟု ထင်နေပုံရသည်။

"ကိုယ့်ကိုယ်ကိုယ် အထင်မကြီးစမ်းပါနဲ့ မင်းလို အမှိုက်မျိုးကိုသတ်ဖို့ ငါ့ဆရာ ပေါ်လာစရာတောင် မလိုဘူး ငါ့ရဲ့ ဓားတစ်ချက်နဲ့ မင်းကို ဘယ်လိုခုတ်ပိုင်းပစ်မလဲဆိုတာ စောင့်ကြည့်နေလိုက်"

ရှောင်ချီက အေးစက်စွာ နှာမှုတ်လိုက်ပြီး သူ၏အရှိန်အဝါများ လျင်မြန်စွာ မြင့်တက်လာတော့သည်။

ယခုအချိန်တွင် ရှောင်ချီသည် အရင်ကထက် ပို၍ ဒေါသထွက်နေသည်။

နတ်မိမယ်လင်ယွင် ပြောခဲ့သလိုပင် အရင်ဘဝမှာ သူဟာ လင်ယွင်ရဲ့မျက်စိထဲကို လုံးဝ မဝင်ခဲ့ဘူး အလွန်ဆုံးရှိမှ ဖြတ်သွားဖြတ်လာ တစ်ယောက်ပဲ သူဟာ လင်ယွင်ရဲ့ ဂရုမစိုက်မှုတွေအတွက် အမြဲတမ်း မုန်းတီးခဲ့တယ် လင်ယွင်က သူမရဲ့ တပည့်အပေါ် ဒီလောက် အေးစက်ရက်စက်တာကိုလည်း အမြဲတမ်း မုန်းခဲ့တယ်။

ဒါပေမဲ့ ရယ်စရာကောင်းတာက... လင်ယွင်ဟာ သူ့ကို တပည့်တစ်ယောက်အဖြစ် တစ်ခါမှ မသတ်မှတ်ခဲ့ဘူးတာပဲ။ ၅ နှစ်ဆိုတဲ့ အချိန်ဟာ ရှောင်ချီအတွက်တော့ အလွန်ရှည်လျားပြီး တစ်သက်လုံး မှတ်မိနေမယ့် အရာတစ်ခုပါ ဒါပေမဲ့ လင်ယွင်အတွက်တော့ မျက်စိတစ်မှိတ်စာ အချိန်လေးပါပဲ သူမရဲ့ ရှည်လျားလှတဲ့ မှတ်ဉာဏ်တွေထဲမှာ အစအနလေးတောင် ကျန်ရစ်မှာ မဟုတ်ဘူး။

ဒီအချိန်မှာ ရှောင်ချီဟာ မိမိကိုယ်မိမိ အတော်လေး ရယ်ချင်မိသွားတယ်။ ဒါဆို ငါကတစ်ဖက်လူကို မုန်းဖို့တောင် အခွင့်အရေး မရှိဘူးပေါ့လေ ဒါဆိုစကားတွေ အများကြီး ပြောနေစရာ မလိုတော့ဘူး။ အကုန်သတ်ပစ်လိုက်ရင် ရပြီမလား မုန်းဖို့ မရဘူးဆိုရင် သတ်ဖို့ကတော့ ရမှာပေါ့။

ရှောင်ချီသည် တွေးလေလေ ပို၍ရူးသွပ်လာလေလေပင် သူ၏ ခန္ဓာကိုယ်မှ မိစ္ဆာချီများသည် ရူးသွပ်စွာ ပွင့်ထွက်လာသည် အချိန်ကြာလာသည်နှင့်အမျှ ထိုမိစ္ဆာချီများသည် ရှောင်ချီ၏ ပတ်ပတ်လည်တွင် စုစည်းလာပြီး ကောင်းကင်တစ်ခုလုံးကို အရောင်ပြောင်းသွားစေသည်။ ဤမိစ္ဆာချီများသည် သမုဒ္ဒရာကြီးကဲ့သို့ပင် လှိုင်းတံပိုးများ တစ်ခုပြီးတစ်ခု ရိုက်ခတ်နေသကဲ့သို့ ရှိနေသည်။

"ဒီညစ်ပတ်တဲ့အနံ့က ပြန်လာပြန်ပြီ အရင်ဘဝက မင်းသေခါနီးအချိန်တုန်းကလည်း မင်းရဲ့ ခန္ဓာကိုယ်က ဒီလိုမျိုး ရွံစရာကောင်းတဲ့ အနံ့တွေ ထွက်နေတာ ငါမှတ်မိသေးတယ်"

နတ်မိမယ်လင်ယွင်သည် သူမ၏ နုနယ်လှပသော လက်ကို မြှောက်လိုက်ပြီး သူမ ရွံရှာသော အရာတစ်ခုကို ဖယ်ရှားသကဲ့သို့ နှာခေါင်းရှေ့တွင် ဝေ့ယမ်းလိုက်သည်။

"သေစမ်း..." ရှောင်ချီသည် ဒေါသတကြီး အော်ဟစ်လိုက်သည်။ သူ၏ ခန္ဓာကိုယ်မှ မိစ္ဆာချီများသည် သွေးရောင်ဓားရှည်ကြီးတစ်ခုအဖြစ် စုစည်းသွားပြီး လင်ယွင်ဆီသို့ ပြင်းထန်စွာ ခုတ်ပိုင်းလိုက်သည်။

ဘုန်း... နှစ်ယောက် ထိပ်တိုက်တွေ့လိုက်သည့် ခဏမှာပင် ကောင်းကင်နှင့် မြေကြီး၏ အရောင်အဝါများ ပြောင်းလဲသွားသည်။ ကြောက်မက်ဖွယ်ကောင်းသော မိစ္ဆာချီနှင့် ဝိညာဉ်စွမ်းအားများသည် ဤဟင်းလင်းပြင်ထဲတွင် ရောယှက်ကာ ပေါက်ကွဲနေတော့သည်။

ရှောင်ချီသည် သူ၏အစွမ်းကုန် တိုက်ခိုက်ခဲ့ပြီး မိစ္ဆာအသွင်ကိုပင် တိုက်ရိုက် ပြောင်းလဲခဲ့သော်လည်း လင်ယွင်ကို ဘာမှ မလုပ်နိုင်သေးပေ။

လင်ယွင်သည် အပိုပြောနေခြင်း မဟုတ်ကြောင်း ရှောင်ချီ သိလိုက်ရသည် သူမ၏ နည်းစနစ်များမှာ အလွန်ပင် များပြားလှသည် သူမ၏ နည်းစနစ်အချို့မှာ ရှောင်ချီ နားလည်နိုင်စွမ်းရှိသည်ထက်ပင် သာလွန်နေသည်။

လင်ယွင်၏ ရှေ့တွင် ရှောင်ချီသည် ကလေးတစ်ယောက်လို ဖြစ်နေပြီး မသိနားမလည်ဘဲ ရယ်စရာကောင်းနေသကဲ့သို့ပင် ဒါပေမဲ့ ကံကောင်းတာက သူ၏ဝိညာဉ်စွမ်းအားမှာ အလွန် တည်ငြိမ်ပြီး သူ၏ကျင့်ကြံခြင်း အခြေခံမှာလည်း အလွန်ခိုင်မာလှသည် သူ၏မိစ္ဆာချီနှင့် မိုးကြိုးစွမ်းအားကို တစ်လှည့်စီ အသုံးပြု၍ တိုက်ခိုက်နေသဖြင့် လင်ယွင်လည်း ခေတ္တမျှ ခက်ခဲနေရသည်။

နှစ်ယောက်လုံး အစွမ်းကုန် တိုက်ခိုက်နေကြသော်လည်း လောလောဆယ်တွင် မည်သူကမှ အသာမရနိုင်ဘဲ ဖြစ်နေကြသည်။

ဤတိုက်ပွဲမှာ ရက်ပေါင်းများစွာ ကြာမြင့်ခဲ့သည် သူတို့ တိုက်ခိုက်မှုကြောင့် ဖြစ်ပေါ်လာသော တုန်ခါမှုလှိုင်းများမှာ ကြောက်စရာကောင်းလောက်အောင် ပြင်းထန်လှသည်။ ဝိညာဥ်ခန္ဓာပေါင်းစည်းခြင်းအဆင့်ရှိ ပညာရှင်တစ်ဦးပင်လျှင် ဤနေရာထဲသို့ မှားယွင်းစွာ ဝင်ရောက်မိပါက ထိုလှိုင်းများကြောင့် အစအနမကျန် ပျက်စီးသွားနိုင်သည်။

နှစ်ယောက်ကြားက အငြင်းပွားမှု ပြင်းထန်လာသည်နှင့်အမျှ ဤမြေပြင်မှာ လူသူမနီးသော သေမင်းတမန်ဇုန် ဖြစ်လာတော့သည်။

မြေပြင်မှာ တဖြည်းဖြည်း ခြောက်သွေ့လာသည် တစ်ချိန်က စိမ်းလန်းစိုပြေခဲ့သော မြက်ခင်းပြင်မှာ ချက်ချင်းပင် ညှိုးနွမ်းခြောက်သွေ့သွားသည်။ မြေပြင်ပေါ်မှာ ပြေးလွှားနေတဲ့ သားရဲတွေ ကောင်းကင်မှာ ပျံသန်းနေတဲ့ ငှက်တွေ... အားလုံးနီးပါးဟာ ဒီနေ့နဲ့ ညအတောအတွင်းမှာ ပြာအဖြစ် ပြောင်းလဲသွားခဲ့ရသည်။

ငှက်နှင့် သားရဲ အနည်းငယ်သာလျှင် ဤကပ်ဆိုးမှ သီသီလေး လွတ်မြောက်ကာ ဤဒေသမှ ထွက်ပြေးနိုင်ခဲ့ကြသည်။

ဤတိုက်ပွဲသည် ကျင့်ကြံခြင်း လောကရှိ အဖွဲ့အစည်းအသီးသီး၏ အာရုံစိုက်မှုကို လျင်မြန်စွာ ရရှိသွားသည်။

ဤတိုက်ပွဲဖြစ်ပွားရာနေရာနှင့် မဝေးသော နေရာမှာတော့ ဝိညာဉ်ဓားဂိုဏ်း၏ ဗဟိုချက်မရှိနေသည်။

အဲ့ဒီမှာတော့ ဒီတိုက်ပွဲထက် မလျော့တဲ့ နောက်ထပ် ကြောက်စရာကောင်းတဲ့ ပဋိပက္ခတစ်ခု ဖြစ်ပွားနေပြန်သည် ဝိညာဉ်မျိုးနွယ်နှင့် ဝိညာဉ်ဓားဂိုဏ်းတို့၏ တိုက်ပွဲမှာလည်း အလွန်အမင်း ကြာမြင့်နေပြီဖြစ်သည်။