အခန်း (၁၃၇)  ယွီရှောင်ကျိ သူ၏သက်စောင့်အဆီအနှစ်ကို လောင်ကျွမ်းစေခြင်း

"ဝူကျီဓား" တတိယမဟာအကြီးအကဲဖြစ်သူ ကျိန်းချီပညာရှိ၏ ဒေါသတကြီး ဟိန်းဟောက်သံနှင့်အတူ ကောင်းကင်ယံကို ထိုးဖောက်နိုင်လောက်သော ဓားချီတစ်ခုသည် ဝိညာဉ်မျိုးနွယ်စု တန်းစီထားသည့် အလယ်ဗဟိုဆီသို့ ပြင်းထန်စွာ တိုးဝင်သွားသည်။

ဝုန်း... ပြင်းထန်သော ပေါက်ကွဲသံကြီး ထွက်ပေါ်လာပြီး ဝိညာဉ်မျိုးနွယ်စု တပည့် ဒါဇင်ပေါင်းများစွာမှာ ထိုတိုက်ကွက်တစ်ခုတည်းဖြင့် ဖုန်မှုန့်အဖြစ်သို့ ပြောင်းလဲသွားကြသည်။

ဖူး... သို့သော် ကျိန်းချီပညာရှိက ကျေနပ်အားရနေပြီး သူ၏ တိုက်စစ်ကို ဆက်လက်ဆင်နွှဲရန် ပြင်လိုက်စဉ်မှာပင်။

ထက်မြက်လှသော ဓားရှည်တစ်လက်မှာ မည်သည့်အချိန်က ရောက်လာသည်မသိဘဲ သူ၏ နောက်ကျောကို ထိုးဖောက်သွားခဲ့သည်။

ထိုဓားသွားမှာ သွေးနှင့် သက်စောင့်အားကို စုပ်ယူနိုင်သော ဝဲဂယက်တစ်ခုကဲ့သို့ပင်။ ၎င်းသည် ကျိန်းချီပညာရှိ၏ ခန္ဓာကိုယ်အတွင်းရှိ ကျင့်စဉ်အခြေခံနှင့် ဇီဝအင်အားကို မရပ်မနား စုပ်ယူနေတော့သည်။

"ညီလေး..." ယွီရှောင်ကျိ၏ မျက်လုံးများမှာ ဒေါသကြောင့် ပြူးထွက်မတတ် ဖြစ်သွားသည်။ သူသည် ခန္ဓာကိုယ်အတွင်းရှိ စွမ်းအားအားလုံးကို ရုတ်တရက် ထုတ်လွှတ်လိုက်ပြီး ရန်သူကို ခဏမျှ နောက်ဆုတ်သွားစေသည်။

ထို့နောက် လျှပ်ခနဲ လှုပ်ရှားလိုက်ပြီး သူ၏ ညီငယ်ရှေ့တွင် ချက်ချင်း ပေါ်လာသည်

သို့သော် အားလုံးက နောက်ကျသွားခဲ့ပြီ။ ယခုအချိန်တွင် ကျိန်းချီပညာရှိမှာ အရေနှင့်အရိုးသာ ကျန်တော့သည့် ခြောက်ကပ်ကပ် အလောင်းတစ်ခုအဖြစ် စုပ်ယူခံလိုက်ရပြီ ဖြစ်သည်။

"ညီလေး... အဆင်ပြေရဲ့လား ညီလေး" ယွီရှောင်ကျိက ကျိန်းချီ ပညာရှိကို သူ၏ လက်မောင်းထဲတွင် ပွေ့ပိုက်ထားရင်း စိုးရိမ်တကြီး အော်ဟစ်နေမိသည်။

"ဟင်း... မင်းက ကိုယ့်ကိုယ်ကိုယ်တောင် မကြည့်နိုင်ဘဲ သူများအတွက် စိုးရိမ်နေသေးတာလား" အေးစက်သော နှာခေါင်းရှုံ့သံနှင့်အတူ ကျိန်းချီပညာရှိကို စုပ်ယူခဲ့သည့် သွေးဓားမှာ ယွီရှောင်ကျိဆီသို့ နောက်တစ်ကြိမ် ဝဲပျံလာပြန်သည်။

ဖူး... ယွီရှောင်ကျိက ရှိသမျှ အင်အားဖြင့် ကာကွယ်လိုက်သော်လည်း သူ၏ ခန္ဓာကိုယ်မှာ နောက်သို့ လွင့်စင်သွားပြီး ပါးစပ်မှ သွေးများ အန်ထုတ်လိုက်ရသည်။

ပျက်စီးယိုယွင်းနေသော ဂိုဏ်းကိုကြည့်ရင်း ယွီရှောင်ကျိမှာ သွေးမျက်ရည်များ ကျဆင်းလာရသည် သူနောက်ထပ် အမှားတစ်ခု လုပ်မိပြန်ပြီလား ဂိုဏ်းကို ဒီလို ဘေးဒုက္ခကနေ ကယ်တင်ဖို့အတွက် ယဲ့ဖန်ကို သူတို့လက်ထဲ အပ်လိုက်သင့်တာလား။

ဘာလို့ သူက အမြဲတမ်း မှားယွင်းတဲ့ ရွေးချယ်မှုတွေကိုပဲ လုပ်နေမိတာလဲ ယွီရှောင်ကျိက ကိုယ့်ကိုယ်ကိုယ်ပြန်လည် ဆင်ခြင်မိသည်။ ရှောင်ချီကိစ္စဖြစ်စေ ယဲ့ဖန်ကိစ္စဖြစ်စေ ဂိုဏ်းချုပ် ဝူတောက်ကျိကိစ္စဖြစ်စေ အခုဂိုဏ်းပေါ် ကျရောက်နေတဲ့ ဘေးဒုက္ခပဲဖြစ်ဖြစ် အချိန်တိုင်းမှာ သူက မှားယွင်းစွာ ရွေးချယ်ခဲ့မိပုံရသည်။

ဟုတ်ပါသည် ၎င်းမှာ သူက အရမ်းမာနကြီးလွန်းပြီး ကိုယ့်ကိုယ်ကိုယ် ယုံကြည်မှု လွန်ကဲလွန်းခြင်းကြောင့်ပင် မည်သည့်ကိစ္စမဆို သူတစ်ခါ ဆုံးဖြတ်ပြီးလျှင် ထိုအတိုင်းသာ ဖြစ်ရမည်ဟု သူက ယူဆခဲ့သည်။

ဘယ်အချိန်ကစတာလဲ သူက ဒီလိုမျိုး အာဏာရှင်ဆန်ပြီး မိုက်မဲတဲ့ ဆုံးဖြတ်ချက်ချသူ တစ်ယောက် ဖြစ်လာခဲ့တာလဲ ဖြစ်နိုင်သည်မှာ သူမဟာအကြီးအကဲ ဖြစ်လာပြီးနောက် သို့မဟုတ် ဝိညာဥ်ခန္ဓာပေါင်းစည်းခြင်းအဆင့်ကို တက်လှမ်းနိုင်ပြီးနောက် ဖြစ်ပေလိမ့်မည်။ သို့သော် ၎င်းမှာ သူ၏ ကျင့်ကြံခြင်းအဆင့်နှင့် ရာထူးအဆင့်အတန်းနှင့် သေချာပေါက် ဆက်စပ်နေသည်။

သူ၏ပါရမီ သူ၏ရာထူး သူ၏အာဏာတို့က သူ့ကိုတည်ဆောက်ခဲ့သလို ယခုမူ ထိုအရာများကပင် သူ့ကို ပြန်လည် ဖျက်ဆီးနေပြီ ဖြစ်သည်။

ယခုအခါ မျှော်လင့်ချက် ကုန်ဆုံးလုနီးပါး အခြေအနေတွင် ယွီရှောင်ကျိမှာ နောင်တတရားကို မြင်လာခဲ့သော်လည်း အားလုံးက နောက်ကျလွန်းသွားခဲ့ပြီ။ ဂိုဏ်းအတွင်းတွင် တပည့်အမြောက်အမြားမှာ တိုက်ပွဲတွင် ကျဆုံးသွားကြပြီး ငယ်ရွယ်သော တပည့်အချို့သာ သွေးချောင်းစီး တိုက်ပွဲဝင်နေကြရသည်။ အကြီးအကဲ အသီးသီးမှာလည်း တစ်ဦးချင်း တိုက်ခိုက်နေကြရပြီး အနည်းငယ်သာ ကျန်တော့သည်

"ယဲ့ဖန်... မင်းက ငါတို့ဝိညာဉ်ဓားဂိုဏ်းကို လမ်းမှားဆီ ခေါ်သွားခဲ့တာပဲ" ယွီရှောင်ကျိက ခပ်တိုးတိုး သက်ပြင်းချလိုက်သည်။

ထို့နောက် သူသည် ယဲ့ဖန်၏ ဘေးသို့ ခုန်ဆင်းသွားပြီး: "ယဲ့ဖန်... ဒီနေ့ ဖြစ်ပျက်သမျှက မင်းကြောင့်ပဲ။ ငါမင်းကို ဒီမှာပဲပစ်ထားခဲ့ပြီး ဝိညာဉ်မျိုးနွယ်စုလက်ထဲ အပ်လိုက်သင့်တာ အဲ့ဒါမှ ငါတို့ ဝိညာဉ်ဓားဂိုဏ်းအတွက် ရှင်သန်ခွင့် အခွင့်အရေးတစ်ခုရမှာ"

"ဒါပေမဲ့ အခုအခြေအနေအရဆိုရင် ဝိညာဉ်ဓားဂိုဏ်းက ဒီဘေးဒုက္ခကနေ လွတ်မြောက်သွားရင်တောင် နာမည်ပဲကျန်တော့မယ့် အခြေအနေပဲ"

"ယဲ့ဖန်... မင်း ငါ့ကိုတစ်ခုကတိပေးစမ်းပါ ငါတို့ ဂိုဏ်းရဲ့ မျိုးစေ့လေးတွေကို ခေါပြီး ထွက်ပြေးပါ"

"မင်း ဝိညာဉ်ဓားဂိုဏ်းဆိုတဲ့ စကားလုံး သုံးလုံးကို ယွန်းကျူးတိုက်ကြီးရဲ့ ထိပ်ဆုံးမှာ နောက်တစ်ကြိမ် ခန့်ညားစွာ ပြန်ပြီး ရပ်တည်နိုင်အောင် လုပ်ပေးရမယ်"

ယွီရှောင်ကျိသည် ယဲ့ဖန်ကို နက်နက်ရှိုင်းရှိုင်း ကြည့်လိုက်ပြီး သူ၏နဖူးကို ဖြည်းည်းချင်း ထိလိုက်သည်။ နူးညံ့သော စွမ်းအင်တစ်ခုက ယဲ့ဖန်၏ခန္ဓာကိုယ်တစ်ခုလုံးကို ဖုံးလွှမ်းသွားသည်။

"ယဲ့ဖန်... မှတ်ထားပါ မင်းမှာ အမွှေးတိုင်တစ်တိုင် ကုန်ဆုံးတဲ့ အချိန်ပဲရှိတယ်။ ငယ်ရွယ်ပြီး အလားအလာရှိတဲ့ တပည့်တွေကို ရွေးပြီး သူတို့နဲ့အတူ ထွက်ပြေးတော့"

"ငါ ဒီဝိညာဉ်မျိုးနွယ်စုဝင်တွေကို မင်းအတွက် တားထားပေးမယ်။ ငါ့စကားကို မှတ်ထားပါ ငါတို့ ဝိညာဉ်ဓားဂိုဏ်းကို ပြန်ပြီးတိုးတက်အောင် လုပ်ပေးရမယ်"

ယွီရှောင်ကျိ၏ မျက်လုံးများမှာ နီရဲလာသည်။ ထို့နောက် သူ၏ ခန္ဓာကိုယ်မှ ကြောက်မက်ဖွယ်ကောင်းသော အနီရောင် အလင်းတန်းများ ပွင့်ထွက်လာသည် သူ၏ ခန္ဓာကိုယ်မှ ကြီးမားလှသော တိုက်ခိုက်လိုစိတ်များ ဟိန်းထွက်လာတော့သည်။

"ဟင်း... ဒီအဘိုးကြီးတော့ တကယ်ရူးသွားပြီပဲ သူ၏ သက်စောင့်အဆီအနှစ်ကိုတောင် လောင်ကျွမ်းနေပြီ ခင်ဗျားရဲ့ အင်အားနဲ့ဆိုရင် ခင်ဗျားထွက်ပြေးချင်တယ်ဆိုရင် ငါတို့ ဝိညာဉ်မျိုးနွယ်စု ကျင့်ကြံသူတွေ အားလုံးဝိုင်းတိုက်ရင်တောင် တားနိုင်မှာ မဟုတ်ဘူး။"

"ဒါပေမဲ့ ခင်ဗျားက ဒီအမှိုက်တွေအတွက်နဲ့ ကိုယ့်အသက်ကို စတေးဖို့ ဆုံးဖြတ်လိုက်တာပဲ။ ခင်ဗျားတို့ လူသားမျိုးနွယ်စုတွေရဲ့ အတွေးအခေါ်က တကယ်ပဲ ရယ်စရာကောင်းလိုက်တာ"

ယွီရှောင်ကျိနှင့် တိုက်ခိုက်နေသော ဝိညာဉ်မျိုးနွယ်စု အကြီးအကဲက အထင်အမြင်သေးသော လေသံဖြင့် လှောင်ပြောင်လိုက်သည်။

"ငါတို့ လူသားမျိုးနွယ်စုက မျိုးဆက်ဆက်ခံခြင်းကို အမြဲတမ်း တန်ဖိုးထားတယ်။ မီးပွားလေး တစ်ခုပဲ ကျန်ရင်တောင် မျှော်လင့်ချက်က ဘယ်တော့မှ သေဆုံးမှာမဟုတ်ဘူး"

"ဝိညာဉ်မျိုးနွယ်စုက ဘိုးဘေးတွေ ဒါကိုမှတ်ထားပါ ဒီနေ့ရန်ငြိုးအတွက် ငါ့ရဲ့ ဝိညာဉ်ဓားဂိုဏ်းက တစ်နေ့မှာ ခင်ဗျားတို့ဆီကနေ အဆတစ်ရာ ပြန်ပြီး တောင်းဆိုလိမ့်မယ်"

ယခုအချိန်တွင် ယွီရှောင်ကျိမှာ မျက်နှာရှိ အပေါက်ခုနစ်ပေါက်မှ သွေးများ ယိုစီးနေပြီး တစ်ကိုယ်လုံးမှာ ကြောက်စရာကောင်းသော သွေးရောင် အရှိန်အဝါများ တောက်လောင်နေပြီ ဖြစ်သည်။

ယွီရှောင်ကျိသည် ဝိညာဉ်မျိုးနွယ်စု တန်းစီထားသည့် ကြားထဲသို့ တိုက်ရိုက် တိုးဝင်သွားတော့သည်။

ဝုန်း... သွေးရောင် ချီလှိုင်းများမှာ မီးရှူးမီးပန်းများကဲ့သို့ ကောင်းကင်ယံတွင် လှပသော်လည်း ကြေကွဲဖွယ်ကောင်းစွာ ပွင့်ထွက်လာသည်။

ရွှူး... ရွှူး... ရွှူး... သွေးရောင် အလင်းတန်းများမှာ ဝိညာဉ်မျိုးနွယ်စု ကျင့်ကြံသူများ၏ ခေါင်းများကို ကရုဏာမဲ့စွာ ရိတ်သိမ်းနေတော့သည်။

တကယ့် ပညာရှင်ကြီးတစ်ဦး၏ရှေ့တွင် ဤအဆင့်နိမ့် ဝိညာဉ်မျိုးနွယ်စုဝင်များမှာ သတ်ဖြတ်ခံရမည့် သိုးသူငယ်များကဲ့သို့ပင် ဖြစ်ပြီး မည်သို့မျှ မခုခံနိုင်ကြပေ။

"ဒီအဘိုးကြီးစုတ်... အခုချက်ချင်း ရပ်စမ်း" ဝိညာဉ်မျိုးနွယ်စုမှာ ဘိုးဘေးတစ်ဦးက ဒေါသတကြီး ဟိန်းဟောက်ကာ ယွီရှောင်ကျိ ရှိရာသို့ ပြေးဝင်လာသည်။

မူလက သူသည် အချိန်ဆွဲရန်သာ ရည်ရွယ်ထားသည်။ ယွီရှောင်ကျိ သူ၏ သွေးနှင့် စွမ်းအားများ ကုန်ဆုံးသွားလျှင် သူက ဘာမှ ခြိမ်းခြောက်နိုင်တော့မည် မဟုတ်ပေ။

သို့သော် ယွီရှောင်ကျိမှာလည်း အရူးမဟုတ်ကြောင်း သူမထင်မှတ်ထားခဲ့ပေ။ ယွီရှောင်ကျိက ဝိညာဉ်မျိုးနွယ်စုဝင်များကိုသာ ပစ်မှတ်ထားတိုက်ခိုက်နေခြင်းပင်။ ဤသို့ဆိုလျှင် ဝိညာဉ်မျိုးနွယ်စု ဘိုးဘေးမှာ ဝင်မပါချင်လျှင်တောင် ဝင်ပါရတော့မည် ဖြစ်သည်။ မဟုတ်ပါက ဤခဏအတွင်းမှာပင် ဝိညာဉ်မျိုးနွယ်စု အင်အားစုများမှာ အမြစ်ပြတ် သုတ်သင်ခံရပေလိမ့်မည်။

"မင်း... မင်း... ပြီးတော့ မင်းတို့အားလုံး... ငါ့နောက်ကို လိုက်ခဲ့ကြ" ယဲ့ဖန်က ဝိညာဉ်ဓားဂိုဏ်း တပည့်များကို သေမင်းကဲ့သို့ တစ်ဦးချင်း ညွှန်ပြလိုက်သည်။

သို့သော် သူသည် သေမင်းနှင့် ပြောင်းပြန်ပင်။ သေမင်းညွှန်ပြသူမှာ သေရမည်ဖြစ်သော်လည်း ယဲ့ဖန် ညွှန်ပြသူမှာမူ ရှင်သန်ခွင့် မျှော်လင့်ချက်ကို ရရှိကြခြင်းပင်။

ဝိညာဉ်ဓားဂိုဏ်းဝင်များ အားလုံးက ယဲ့ဖန် သူတို့ကို ညွှန်ပြလိမ့်မည်ဟု မျှော်လင့်တကြီး ကြည့်နေကြသည်။

သို့သော် အမှန်တကယ်တွင် ယဲ့ဖန်သည် သူ၏ကိုယ်ပိုင် အင်အားစုမှ ပညာရှင်များနှင့် အလားအလာရှိသော ကျင့်ကြံသူများကိုသာ ရွေးချယ်ခေါ်ယူခဲ့သည်။ ပါရမီကောင်းပြီး အလားအလာ ရှိသော်လည်း ယဲ့ဖန်နှင့် မတည့်သောသူများကိုမူ သူကအလွယ်တကူပင် လျစ်လျူရှုခဲ့သည်လေ။

ထိုသူများသည် နာကျည်းမှုများ ရှိနေသော်လည်း ဘာမှမပြောနိုင်ကြပေ။ ရွေးချယ်ခံရခြင်း သို့မဟုတ် မခံရခြင်းမှာ ယဲ့ဖန်နှင့် ဂိုဏ်း၏ဆုံးဖြတ်ချက်သာ ဖြစ်သည်။ ဂိုဏ်းက ပေးအပ်သော အရင်းအမြစ်များကို ခံစားခဲ့ကြသူများ ဖြစ်သဖြင့် ဂိုဏ်းပျက်စီးမည့် အချိန်တွင် ဂိုဏ်းနှင့်အတူ အေးအတူပူအမျှ ရင်ဆိုင်ရမည်သာ ဖြစ်သည်။

တစ်ချိန်တည်းမှာပင် လင်ယွင်သည် သူမ၏ ယုံကြည်ရသော နောက်လိုက်များကို ဂိုဏ်း၏ နောက်တောင်ကုန်းဆီသို့ ခေါ်ဆောင်သွားခဲ့သည်မှာ ကြာပြီဖြစ်သည်။

မဟာအကြီးအကဲ ယွီရှောင်ကျိက ဝိညာဉ်မျိုးနွယ်စုဝင်များကို အသည်းအသန် တားဆီးပေးနေသည်ကို မြင်သောအခါ လင်ယွင်သည် သူမအတွက် အခွင့်အရေး ရောက်လာပြီဟု သိလိုက်သည်။ ထို့ကြောင့် သူမသည် နောက်တောင်ကုန်းရှိ လျှို့ဝှက်လမ်းကြောင်းကို ချက်ချင်းဖွင့်ကာ လျင်မြန်စွာ ထွက်ပြေးခဲ့သည်။

လင်ယွင် ထွက်ခွာတော့မည့် အချိန်မှာပင် သူမ ခဏမျှ ရပ်တန့်သွားပြီး အသက်ကြီးပိုင်း အမျိုးသမီးတစ်ဦး ရှိရာဘက်သို့ လှည့်ကြည့်လိုက်သည်။

"ဒေါ်ဒေါ်ယွီရှင်း လင်ယွင်က ကျေးဇူးမသိတဲ့သူ ဖြစ်သွားပါပြီ ဒီဘဝမှာတော့ ကျွန်မ ဒေါ်ဒေါ်ကို မပြုစုနိုင်တော့ဘူး။ နောက်ဘဝ ရှိခဲ့မယ်ဆိုရင်တော့ ဒေါ်ဒေါ်ရဲ့ ဘေးမှာပဲနေပြီး ဝတ္တရားကျေပွန်အောင် လုပ်ပါ့မယ်"

လင်ယွင်သည် ကောင်းကင်ယံရှိရာ အရပ်သို့ ဒူးထောက်ကာ သုံးကြိမ်တိုင်တိုင် ဦးခိုက်နှုတ်ဆက်လိုက်သည်။ ထို့နောက် ပြတ်သားစွာပင် ဂိုဏ်းမှ ထွက်ခွာကာ ဝေးရာသို့ လျင်မြန်စွာ ထွက်ပြေးသွားတော့သည်။

ကောင်းကင်ယံရှိ ပုံရိပ်မှာ တစ်ခုခုကို ခံစားမိပုံရသည်။ သူမသည် လင်ယွင် ထွက်ပြေးသွားရာ ဘက်သို့ တစ်ချက် ကြည့်လိုက်ပြီး နောက်ဆုံးတွင် နူးညံ့သိမ်မွေ့သော ပြုံးရယ်မှုကို ပြသလိုက်သည်လေ။

ထိုအချိန်တွင် ဝိညာဉ်မျိုးနွယ်စုဝင် အချို့မှာ လင်ယွင်နှင့် သူမ၏ အုပ်စု ထွက်ပြေးရန် ကြိုးစားနေသည်ကို တွေ့ရှိသွားပြီးနောက် လျင်မြန်စွာ လိုက်လံတိုက်ခိုက်ကြတော့သည်။