အခန်း (၁၃၆)  ခေါင်းမာလွန်းသော ယွီရှောင်ကျိ

ဂိုဏ်း၏ မဟာအစီအရင်မှ ထွက်ပေါ်လာသော ရွှေရောင်အလင်းတန်းသည် ပထမလှိုင်း တိုက်ခိုက်မှုကို တားဆီးနိုင်ခဲ့သော်လည်း ၎င်း၏ စွမ်းအင်မှာ ထက်ဝက်ကျော် လျော့နည်းသွားခဲ့ပြီ ဖြစ်သည်။

ဝုန်း... ဝုန်း... ဝုန်း... ရပ်နားခြင်းမရှိဘဲ ဒုတိယလှိုင်း တိုက်ခိုက်မှုမှာ မျက်တောင်တစ်ခတ်အတွင်း ရောက်ရှိလာပြန်သည်။

ဖြောက်... ပဲ့... ရွှေရောင်အလင်း ဒိုင်းလွှားကြီးမှာ ပင့်ကူအိမ်ကဲ့သို့ အက်ကြောင်းများ ထင်သွားပြီး ချက်ချင်းပင် အစိတ်စိတ်အမွှာမွှာ ကွဲအက်သွားတော့သည်။

ဒုတိယလှိုင်း အနီရောင်အလင်းတန်း မိုးရွာသွန်းမှု ပြီးဆုံးသွားသောအခါ ဝိညာဉ်ဓားဂိုဏ်းတစ်ခုလုံး ထိတ်လန့်တုန်လှုပ်သွားကြသည်။ တပည့်များသည် ပျက်စီးလုနီးပါး ဖြစ်နေသော သူတို့ခေါင်းပေါ်က ရွှေရောင်အစီအရင် အလင်းတန်းကို ကြည့်ရင်း ကြောက်ရွံ့ခြင်းတွင်းထဲသို့ ကျရောက်သွားကြသည်လေ။

"ကျွန်တော် မသေချင်သေးဘူး ကျွန်တော် အခြေခံတည်ဆောက်ခြင်းအဆင့်ကို ခုမှ တက်လှမ်းနိုင်ခဲ့တာ ကျွန်တော့်မှာ တောက်ပတဲ့ အနာဂတ်တွေရှိသေးတယ်"

"ကျွန်တော် ပြီးခဲ့တဲ့ ဆယ်စုနှစ် အနည်းငယ်လုံး ကျင့်ကြံခြင်းမှာပဲ အာရုံစိုက်ခဲ့တာ။ အခုထိ အဖော် တောင် မရှာရသေးဘူး။ အခုလို သေရမယ်ဆိုရင်... ကျွန်တော် တကယ်ပဲ မကျေနပ်နိုင်ဘူး"

"လာလေ ငါမင်းတို့ကို မကြောက်ဘူး ဒီနေ့ ငါ့အသက်ကို ဂိုဏ်းအတွက်ပြန်ပေးဆပ်မယ်"

"ယဲ့ဖန်... မင်းကတော့ တကယ့် လူယုတ်မာပဲ မင်းဂိုဏ်းချုပ် ဖြစ်လာကတည်းက ငါတို့ ဝိညာဉ်ဓားဂိုဏ်းကို ဘယ်လောက်တောင် ဒုက္ခတွေပေးခဲ့ပြီလဲ"

"သူတော်စင်ရှောင်ချီရေ... ပြန်လာပါဦး ကျွန်တော်တို့ ဝိညာဉ်ဓားဂိုဏ်းက ခင်ဗျားကို လိုအပ်နေပါတယ်"

"ဟုတ်တယ် ရှောင်ချီက စစ်နတ်ဘုရားပဲ သူတစ်ယောက်တည်းနဲ့ မိစ္ဆာမျိုးနွယ်တွေ အများကြီးကို သတ်ခဲ့တာ မိစ္ဆာတွေတောင် နယ်စပ်ကို မဖြတ်ရဲကြဘူး။ သူကတော့ ငါတို့ကို လာကယ်မှာ သေချာတယ်"

ထိတ်လန့်ခြင်း ကျိန်ဆဲခြင်း သွေးဆာခြင်း ရူးသွပ်ခြင်းနှင့် မျှော်လင့်ခြင်း အမျိုးမျိုးသော စိတ်ခံစားချက်များမှာ ဂိုဏ်းတစ်ခုလုံးတွင် ပြည့်နှက်နေတော့သည်။

ယခုအချိန်မှသာ သူတို့သည် ဂိုဏ်းတွင် တစ်ချိန်ကရှောင်ချီဟူသော အခြားသူတော်စင်တစ်ဦး ရှိခဲ့ဖူးကြောင်း သတိရကြတော့သည်။ ယခုအခါ သူ၏ တိုက်ခိုက်ရေးစွမ်းရည်မှာ ကောင်းကင်အဆင့်သို့ ရောက်ရှိနေပြီဖြစ်ကာ နယ်စပ်တစ်ခုလုံးကို တစ်ကိုယ်တော် ထိန်းချုပ်ထားနိုင်သည် မဟုတ်ပါလား။

ယွီရှောင်ကျိ၏ နှလုံးသားမှာလည်း ခံစားချက်ပေါင်းစုံဖြင့် ပြည့်နှက်နေသည်။ သွေးမရှိတော့သလို ဖြူဖတ်ဖြူလျော် ဖြစ်နေသော ယဲ့ဖန်၏ မျက်နှာကို ကြည့်ရင်း သူ၏ စိတ်ထဲတွင် ရွံရှာစက်ဆုပ်မှုများ မထိန်းချုပ်နိုင်ဘဲ ပေါ်ပေါက်လာသည်။

ကိစ္စတွေက ဘယ်လိုဖြစ်လို့ ဒီအထိရောက်လာရတာလဲ ဝိညာဉ်ဓားဂိုဏ်းက ဘယ်သူ့ကို သွားပြီး စော်ကားမိလို့လဲ ဘာကြောင့် ယဲ့ဖန်လိုမျိုး ဂိုဏ်းတစ်ခုလုံးရဲ့ ကံတရားကို စုပ်ယူဖျက်ဆီးမယ့် တပည့်ဆိုးကြီး ပေါ်လာရတာလဲ။

ယခုအချိန်တွင် ယွီရှောင်ကျိ တကယ်ပင် နောင်တရမိသည် အကယ်၍ အရင်တုန်းက သူသည် ရှောင်ချီအပေါ် ထိုမျှအထိ မရက်စက်ခဲ့လျှင် ယခုအချိန်တွင် သူတို့၏သူတော်စင်မှာ ရှောင်ချီသာ ဖြစ်နေဦးမည်။ ဂိုဏ်းချုပ်ရာထူးကို ဆက်ခံမည့်သူမှာလည်း ရှောင်ချီသာ ဖြစ်ပေလိမ့်မည်။

မူလက ရှောင်ချီသည် မိစ္ဆာစိတ်ဝင်လွယ်ပြီး စိတ်ဓာတ်ခိုင်ခံ့မှုအပိုင်းတွင် ယဲ့ဖန်ထက် အများကြီး နိမ့်ကျသည်ဟု သူ ထင်ခဲ့မိသည်။ ထို့ကြောင့်ပင် ရှောင်ချီကို မိုးကြိုးရေကန်တွင် စိတ်ဓာတ်ကို ပွတ်တိုက်စေခဲ့ခြင်း ဖြစ်သည်။

အမှန်စင်စစ် ယွီရှောင်ကျိ၏ မူလရည်ရွယ်ချက်မှာ ရှောင်ချီကို ရေကန်ထဲမှ ပြန်ထွက်လာချိန်တွင် စိတ်ဓာတ်ကို ပိုမိုထိန်းချုပ်နိုင်စေရန်နှင့် ရှေ့သို့ ပိုတိုးတက်စေရန် ဖြစ်သည်။ သို့သော် သူ မထင်မှတ်ထားသည်မှာ ထိုလုပ်ရပ်က ပြောင်းပြန်ဖြစ်သွားပြီး ရှောင်ချီကို ဝိညာဉ်ဓားဂိုဏ်းအပေါ် ပိုမို နာကျည်းသွားစေခဲ့ခြင်းပင်။

ဝုန်း... ဝုန်း... ဝုန်း... တတိယလှိုင်း ကြောက်မက်ဖွယ် အနီရောင်အလင်းတန်းများ ကျရောက်လာပြန်သည်။ ပြင်းထန်သော ဟိန်းဟောက်သံများနှင့် ကွဲအက်သံများကြားတွင် ဂိုဏ်း၏ မဟာအစီအရင်ကြီးမှာ ချက်ချင်းပင် ပြိုလဲသွားတော့သည် အစီအရင်ကို ထိန်းသိမ်းထားရသော တပည့်အမြောက်အမြားမှာ သွေးများ အန်ထုတ်လိုက်ရသည်လေ။

"သတ်ကြဟေ့."

"ဝူး..."

ခရုသင်းသံများနှင့် စစ်ကြွေးကြော်သံများနှင့်အတူ ဝိညာဉ်မျိုးနွယ်စု အမြောက်အမြားမှာ ဝိညာဉ်ဓားဂိုဏ်း၏ တောင်တံခါးအတွင်းသို့ စုပြုံတိုးဝင်လာကြသည်။

မျက်တောင်တစ်ခတ်အတွင်းမှာပင် ဝိညာဉ်ဓားဂိုဏ်း တစ်ခုလုံးတွင် သွေးများ စင်ဟန်သွားပြီး အော်ဟစ်သံများမှာလည်း မပြတ်ထွက်ပေါ်လာတော့သည်။

သာမန်တပည့် အမြောက်အမြားမှာ လျင်မြန်စွာ သေဆုံးကုန်ကြပြီး သူတို့၏ ခေါင်းများမှာ ကောင်းကင်ယံတွင် လွင့်စင်နေကြသည်

ခဏအတွင်းမှာပင် ဝိညာဉ်ဓားဂိုဏ်း တစ်ခုလုံးမှာ အသူရာငရဲအဖြစ်သို့ ပြောင်းလဲသွားတော့သည်။

ဝိညာဉ်မျိုးနွယ်စု ကျင့်ကြံသူများသည် အလွန်ပင် ဖျတ်လတ်ဖျတ်လတ်ရှိကြပြီး သူတို့၏ တိုက်ပွဲအတွေ့အကြုံမှာ ဝိညာဉ်ဓားဂိုဏ်းမှ ကျင့်ကြံသူများထက် အများကြီး သာလွန်သည်။ အချိန်တိုအတွင်းမှာပင် ဝိညာဉ်မျိုးနွယ်စု ကျင့်ကြံသူ ထောင်ပေါင်းများစွာမှာ ဂိုဏ်း၏ ထောင့်တိုင်းသို့ ရောက်ရှိသွားကြသည်။

ဝိညာဉ်ဓားဂိုဏ်း တပည့်များသည် နောက်တောင်ကုန်း၏ ချောင်ကြိုချောင်ကြားများတွင် ပုန်းနေလျှင်ပင် ဝိညာဉ်မျိုးနွယ်စုဝင်များက ချက်ချင်းပင် ရှာတွေ့သွားကြသည်လေ။

ပု... ဓားသွားမှာ အသားထဲသို့ စိုက်ဝင်သွားသံနှင့်အတူ ယဲ့ဖန်၏ဓားမှာ ဝိညာဉ်မျိုးနွယ်စု တပည့်တစ်ဦး၏ ရင်ဘတ်ကို ရက်စက်စွာ ထိုးဖောက်သွားသည်။

"ဆရာ... အခု ဘာလုပ်ကြမလဲ ဒီအတိုင်းသာ ဆက်သွားရင် ဝိညာဉ်ဓားဂိုဏ်း တစ်ခုလုံး အမြစ်ပြတ် သုတ်သင်ခံရတော့မှာ"

ရန်သူများကို သတ်နေရင်း ယဲ့ဖန်က လက်စွပ်ထဲရှိ ဝတ်ရုံဖြူဝတ် အမျိုးသမီး ကို စိုးရိမ်တကြီး အော်မေးလိုက်သည်။

"အခုတော့ အချိန်ဆွဲဖို့ပဲ ရှိတော့တယ်။ တစ်မိနစ်က တစ်မိနစ်ပဲ။ အချိန်ပြည့်တာနဲ့ ငါ မင်းကို ဒီကနေ ခေါ်သွားပေးမယ်" ဝတ်ရုံဖြူဝတ် အမျိုးသမီး၏ စိတ်အခြေအနေမှာလည်း အတော်လေး ကြည့်မကောင်းလှပေ။ ယဲ့ဖန်သည် ပြဿနာရှာသည့် နေရာတွင် မည်မျှအထိ တော်ကြောင်း သူမ တအံ့တဩ ဖြစ်နေမိသည်။

ကိုင်တွယ်ရခက်သည့် ရန်သူတော်ကြီး ရှောင်ချီရှိနေတာတောင် မလုံလောက်သေးဘဲ အခုတော့ ဝိညာဉ်မျိုးနွယ်စုကို သွားပြီး စော်ကားလိုက်ပြန်ပြီ ဂိုဏ်းတစ်ခုလုံးကိုပါ သူနဲ့အတူ အသေခံခိုင်းနေသလိုပဲ။

"အား..."

"ကယ်ကြပါဦး..."

"လွှတ်... လွှတ်ပေးပါ ကျွန်တော် ခင်ဗျားတို့ ဝိညာဉ်မျိုးနွယ်စုနဲ့ ဘာရန်ငြိုးမှ မရှိပါဘူး"

ဝိညာဉ်ဓားဂိုဏ်း၏ တောင်တံခါးအထက်တွင် မရေမတွက်နိုင်သော အော်ဟစ်သံများ ဟိန်းထွက်နေသည်။ ဝိညာဉ်ဓားဂိုဏ်း တပည့်အမြောက်အမြားမှာ ကြောက်ရွံ့လွန်း၍ စိတ်များပင် လွတ်နေကြပြီ ဖြစ်သည် သူတို့သည် မြေပြင်ပေါ်တွင် ဒူးထောက်ကာ သူတို့၏ အသက်ကို ချမ်းသာပေးရန် တောင်းပန်နေကြသည်။ သို့သော် သူတို့ကို ပြန်လည် တုံ့ပြန်လိုက်သည်မှာ သွေးအိုင်များသာ ဖြစ်သည်။

ရွှူး... လင်ယွင်နတ်မိမယ်၏ ဓားမှာ ဝိညာဉ်မျိုးနွယ်စုဝင် တစ်ဦး၏ လည်ပင်းကို ဖြတ်ကျော်သွားပြီးနောက် သူမသည် လျင်မြန်စွာ နောက်ဆုတ်လိုက်သည်။

သူမ၏ နောက်တွင်မူ အကြီးအကဲများနှင့် တပည့်အမြောက်အမြား လိုက်ပါလာကြသည် ဤသည်မှာ သူမ၏ ကိုယ်ပိုင် အင်အားစုပင် ဖြစ်သည်။

"မဟာအကြီးအကဲ... အခု ဘာလုပ်ကြမလဲ" ဟင်းလင်းပြင်ပြန်လည်ရောက်ရှိခြင်းအဆင့်ရှိ အကြီးအကဲတစ်ဦးက ဝိညာဉ်မျိုးနွယ်စုဝင် အမြောက်အမြားကို လေးနက်စွာ ကြည့်ရင်း တိုးတိုးလေး မေးလိုက်သည်။

"ဒီလိုခေါင်းမာပြီး ဘာမှမသိတဲ့အကောင်တွေ အဲ့ဒီအကောင်စုတ်ယဲ့ဖန်ကို အခုထိ ဘာလို့ မအပ်ပေးကြသေးတာလဲ ငါတော့ သူတို့နဲ့အတူ ဒီမှာ အသေမခံနိုင်ဘူး အားလုံး ငါ့အမိန့်ကို နာခံကြ အခွင့်အရေးကို ကြည့်ပြီးတော့ အချိန်မရွေး ဖောက်ထွက်ဖို့ ပြင်ထားကြ"

ယခုအချိန်တွင် လင်ယွင်နတ်မိမယ်မှာ ဒေါသထွက်လွန်းသဖြင့် သွားပင်ကြိတ်နေရသည် ဤကဲ့သို့သော အခြေအနေမျိုးတွင် ထိုအဘိုးကြီးတွေက ဘာလို့ ရှင်းရှင်းလင်းလင်း မမြင်နိုင်ကြသေးတာလဲ ထိုယဲ့ဖန်မှာ လူကောင်းတစ်ယောက် လုံးဝမဟုတ်ပေ သူက ဝိညာဉ်မျိုးနွယ်စုကို ဝိညာဉ်ဓားဂိုဏ်းဆီ ခေါ်လာတာက သူ့အတွက် ဘေးဒုက္ခကို ဒိုင်းလွှားအဖြစ် အသုံးချဖို့ မဟုတ်လား။

ထိုအဘိုးကြီးတွေကလည်း ယဲ့ဖန်အတွက်နဲ့ ဝိညာဉ်ဓားဂိုဏ်း တပည့်အားလုံးကို အသေခံခိုင်းနေကြသည်မှာ သိက္ခာအတွက်ပင် ဖြစ်ရမည်။ ဤကဲ့သို့သော ဂိုဏ်းမျိုးတွင် ဆက်နေဖို့ မထိုက်တန်တော့ပေ။

လင်ယွင်နတ်မိမယ်သည် သူမ၏ နောက်ထပ်ခြေလှမ်းကို ဆုံးဖြတ်ပြီးသား ဖြစ်သည် သူမသည် သူမ၏ အင်အားစုများကို ခေါ်ဆောင်ကာ ဝိညာဉ်ဓားဂိုဏ်းမှ ထွက်ပြေးမည် ဖြစ်သည်။

ထို့နောက် အလယ်အလတ်စား ဂိုဏ်းတစ်ခုကို တည်ထောင်မည် ဖြစ်ပြီး သူမ ဝိညာဥ်ခန္ဓာပေါင်းစည်းခြင်းအဆင့်ကို တက်လှမ်းနိုင်ပြီးနောက် အစွမ်းထက်သော နောက်လိုက်အချို့ကို လေ့ကျင့်ပေးမည်။ အကယ်၍ သူမသာ ရှောင်ချီကို ရှာတွေ့နိုင်ခဲ့မည်ဆိုလျှင် ပို၍ပင် ကောင်းပေလိမ့်မည်။ သူမသည် ဝိညာဉ်ဓားဂိုဏ်းကို အသစ်ပြန်လည် တည်ထောင်နိုင်မည်ဖြစ်ပြီး ထိုအချိန်ကျလျှင် သူမသည် ဂိုဏ်းစတင်တည်ထောင်သူဖြစ်လာပေလိမ့်မည်။

ဝုန်း... တစ်ချိန်တည်းမှာပင် ယွီရှောင်ကျိသည် ကောင်းကင်ယံတွင် ဝိညာဉ်မျိုးနွယ်စုမှ အစွမ်းထက်သော ပညာရှင်တစ်ဦးနှင့် တိုက်ခိုက်နေသည်။ နှစ်ဦးလုံးမှာ အင်အားချင်း ညီမျှနေကြသည် သို့သော် ယွီရှောင်ကျိမှာ အောက်ရှိ တပည့်များ၏ အခြေအနေကို အမြဲ အာရုံစိုက်နေရသဖြင့် အနည်းငယ် အားနည်းနေသကဲ့သို့ ဖြစ်နေသည်။

"မိတ်ဆွေ... ဘာလို့ ဒီအထိ လုပ်နေရတာလဲ ခင်ဗျားတို့ ဝိညာဉ်ဓားဂိုဏ်းကို ဖျက်ဆီးနိုင်ခဲ့ရင်တောင် ဒီမှာ ဒီလိုရက်စက်မှုတွေ လုပ်ပြီးတဲ့နောက် ဝေနိုင်ငံတော်ထဲကနေ ဘေးကင်းကင်း ထွက်သွားနိုင်မယ်လို့ ထင်နေတာလား"

ယခုအချိန်တွင်ပင် ယွီရှောင်ကျိမှာ ဝိညာဉ်မျိုးနွယ်စု ပညာရှင်ကို ဖျောင်းဖျရန် မရပ်နားသေးပေ။ တပည့်များ တစ်ဦးပြီးတစ်ဦး သေဆုံးနေကြသည်ကို မြင်ရသောအခါ ယွီရှောင်ကျိ၏ နဖူးပေါ်ရှိ အကြောများမှာ တလှုပ်လှုပ်နှင့် ဖြစ်နေပြီး သူ၏ စိတ်ထဲမှ ဒေါသမီးမှာလည်း မထိန်းချုပ်နိုင်လုနီးပါး ဖြစ်နေပြီ ဖြစ်သည်။

"လူသားမျိုးနွယ်စုတွေက ယုတ်မာတယ် မင်းတို့က ငါတို့ဝိညာဉ်မျိုးနွယ်စုရဲ့ သူတော်စင်ကို သတ်ခဲ့တာလေ။ မင်းတို့က ယဲ့ဖန်ကို မအပ်ပေးချင်မှတော့ ငါတို့ဝိညာဉ်မျိုးနွယ်စုကလည်း ဒီကိစ္စကို ဘယ်တော့မှ လက်လျှော့မှာ မဟုတ်ဘူး"

"ဝေနိုင်ငံတော်ထဲကနေ ဘေးကင်းကင်း ထွက်သွားနိုင်မလားဆိုတာကတော့ ခင်ဗျား စိတ်ပူစရာ မလိုပါဘူး။ ငါတို့ ဝိညာဉ်မျိုးနွယ်စုက အစီအရင်တွေမှာ အတော်ဆုံးပဲ"

"ငါတို့မျိုးနွယ်စုက ဒီအနီးအနားမှာ ပြန်လည်ဆုတ်ခွာနိုင်မယ့် အစီအရင်ပေါင်း တစ်ဒါဇင်ကျော် ပြင်ဆင်ထားပြီးသား မင်းတို့ရဲ့ ဂိုဏ်းအသေးစားလေး တစ်ခုအတွက်နဲ့ ဝေနိုင်ငံတော်က ငါတို့ ဝိညာဉ်မျိုးနွယ်စုကို ရန်မူလိမ့်မယ်လို့ ငါမယုံဘူး"

ဝိညာဉ်မျိုးနွယ်စု ပညာရှင်မှာ အလွန်ပင် ယုံကြည်မှုရှိနေပြီး ယွီရှောင်ကျိ၏ စကားကို လုံးဝ အလေးမထားပေ။

ဝုန်း... မိုးကြိုးပစ်သံကဲ့သို့ ကျယ်လောင်သော အသံနှင့်အတူ ဝိညာဉ်ဓားဂိုဏ်း၏ ပင်မခန်းမကြီးမှာ ခဏအတွင်းမှာပင် ပြိုကျသွားတော့သည်။ တစ်ချိန်တည်းမှာပင် ဝိညာဉ်ဓားဂိုဏ်းအတွင်းရှိ အဆောက်အဦများ တစ်ခုပြီးတစ်ခုမှာ ကြောက်မက်ဖွယ်ကောင်းသော အနီရောင်အလင်းတန်းများကြောင့် ပြိုကျပျက်စီးသွားခဲ့ရသည်။ တစ်ချိန်က ခမ်းနားထည်ဝါခဲ့သော ဂိုဏ်းကြီးမှာ ယခုအခါ အပျက်အစီးများကြားတွင် ရှိနေတော့သည်လေ။

ဝိညာဉ်ဓားဂိုဏ်း တပည့်များမှာလည်း တစ်ဦးပြီးတစ်ဦး သေဆုံးနေကြသည်။ လက်ရှိအချိန်အထိ တိုက်ပွဲတွင် သေဆုံးသွားသော ဝိညာဉ်ဓားဂိုဏ်း တပည့်ဦးရေမှာ တစ်ထောင်ကျော်သွားခဲ့ပြီဖြစ်သည်။