အခန်း (၁၃၅)  ယဲ့ဖန်က ဝိညာဉ်မျိုးနွယ်စု၏သူတော်စင်ကို သတ်ဖြတ်ခြင်း

"ဘိုးဘေးတို့... ကျွန်တော့်ကို ကယ်ပါဦး" ယဲ့ဖန်၏ အော်ဟစ်သံမှာ ဝိညာဉ်ဓားဂိုဏ်း၏ ထောင့်တိုင်းတွင် ဟိန်းထွက်သွားသည်။

ဒဏ်ရာဗရပွနှင့် ခန္ဓာကိုယ်ကို ဆွဲကာ ယဲ့ဖန်သည် ဝိညာဉ်ဓားဂိုဏ်းသို့ ပြန်ရောက်လာခဲ့သည်။

ဝိညာဉ်ဓားဂိုဏ်းမှ တပည့်အမြောက်အမြားမှာ ပြင်းထန်စွာ ဒဏ်ရာရထားသော ယဲ့ဖန်ကို အံ့အားသင့်စွာ ကြည့်ရင်း သူ့ကို ဝိုင်းအုံလာကြသည်။

"ဂိုဏ်းချုပ်... အဆင်ပြေရဲ့လား"

"ဘယ်သူက ဂိုဏ်းချုပ်ကို ဒီလောက်အထိ ဒဏ်ရာရအောင် လုပ်လိုက်တာလဲ သူတို့က ငါတို့ ဝိညာဉ်ဓားဂိုဏ်းကို တကယ်ပဲအထင်သေးလွန်းတာပဲ"

"ဖန်လောင်း... အဆင်ပြေရဲ့လား" တပည့်များစွာက ယဲ့ဖန်ကို ဝိုင်းထားကြပြီး သူနှင့် ရင်းနှီးသော တပည့်အချို့က ဒဏ်ရာများကို စစ်ဆေးရန် ရှေ့သို့ တိုးလာကြသည်။

လင်းကျောက်လန်က လူအုပ်ကို တိုးဝှေ့ကာ အလယ်သို့ ရောက်လာပြီး စိုးရိမ်တကြီး မျက်နှာပေးဖြင့် ယဲ့ဖန်ကို မေးလိုက်သည်။

"ငါပင်လယ်ရပ်ခြား အင်အားစုတစ်ခုက သူတော်စင်ကို သတ်လိုက်မိလို့ပါ။ အဲ့ဒီအဘိုးကြီးတွေက တကယ့်ကို အရှက်မရှိဘူး။ ငါလိုဂျူနီယာ တစ်ယောက်ကို သတ်ဖို့အတွက် သူတို့ လူအင်အား အကုန်သုံးပြီး လိုက်နေကြတာ"

လင်းကျောက်လန်၏ တွဲကူမှုဖြင့် ယဲ့ဖန်သည် မတ်တတ်ရပ်ရန် ကြိုးစားလိုက်သည်။

သူသည် ထိုနေ့က ကြုံတွေ့ခဲ့ရသည်များကို ပတ်ဝန်းကျင်ရှိ တပည့်များအား အကျဉ်းချုပ် ပြောပြလိုက်သည်။

ခြုံငုံပြောရလျှင် ၎င်းမှာ အခွင့်အလမ်းတစ်ခုအတွက် တိုက်ခိုက်ခြင်းသာ ဖြစ်သည် နက်နဲသော နယ်မြေတစ်ခုတွင် ယဲ့ဖန်သည် ထိပ်တန်းကျင့်စဉ်တစ်ခုကို ရှာဖွေတွေ့ရှိခဲ့သည်။ သူက ထိုအရာကို ကိုယ်ပိုင်ပြုလုပ်ချင်သော်လည်း ထိုအချိန်မှာပင် ဝိညာဉ်မျိုးနွယ်စု၏ သူတော်စင်ကလည်း ၎င်းကို တွေ့သွားခဲ့သည်လေ။

ပါရမီရှင်များကြားက တိုက်ပွဲမှာ လှည့်ပတ်ပြောနေစရာ မလိုပေ အစွမ်းထက်သူကသာ အရာရာကို ဆုံးဖြတ်ခြင်းပင်။

ထို့ကြောင့် သူတို့နှစ်ဦး ပြတ်ပြတ်သားသား တိုက်ခိုက်ခဲ့ကြသည်။ အဆုံးတွင် ယဲ့ဖန်က အလွယ်တကူ အနိုင်ရရှိခဲ့ပြီး ဝိညာဉ်မျိုးနွယ်စု သူတော်စင်ကို ထိုနေရာမှာတင် သတ်ဖြတ်လိုက်သည်။

ဤတိုက်ပွဲကို ကျင့်ကြံခြင်းလောကမှ ကျင့်ကြံသူ အမြောက်အမြား မြင်တွေ့ခဲ့ကြပြီး တစ်ရက်အတွင်းမှာပင် ထိုသတင်းမှာ ဝိညာဉ်မျိုးနွယ်စုထံ ရောက်ရှိသွားခဲ့သည်။

ဝိညာဉ်မျိုးနွယ်စု၏ဘိုးဘေးမှာ ချက်ချင်းပင် ဒေါသအမျက်ထွက်သွားပြီး ယဲ့ဖန်ကို ဝိုင်းရံသတ်ဖြတ်ရန် မျိုးနွယ်စုတစ်ခုလုံး၏အင်အားကို အသုံးပြုခဲ့သည် သူတို့သည် ယဲ့ဖန်ကို ပင်လယ်ရပ်ခြားမှ နယ်စပ်အထိ နယ်စပ်မှ ဝေနိုင်ငံတော် နယ်နိမိတ်အတွင်းအထိ လိုက်လံတိုက်ခိုက်ခဲ့ကြသည်။ ယခုမူ သူ့ကို သတ်ရန်အတွက် ဝိညာဉ်ဓားဂိုဏ်း၏ အပြင်ဘက်အထိ လိုက်ပါလာကြခြင်းပင်။

ယဲ့ဖန်က တပည့်များကို သူ၏အတွေ့အကြုံများ ပြောပြနေစဉ်မှာပင် သက်ကြီးပိုင်း ပုံရိပ်နှစ်ခုမှာ သူ၏ဘေးတွင် တိတ်ဆိတ်စွာ ပေါ်လာသည်။ သူတို့၏ မျက်နှာများမှာ အတော်လေး ကြည့်မကောင်းလှပေ ပြဿနာရှာလွန်းသော ဤလူငယ်ကို ကြည့်ပြီး သူတို့ ဘာပြောရမှန်းမသိ ဖြစ်နေကြခြင်းပင်။

ယဲ့ဖန် ဂိုဏ်းချုပ်ဖြစ်လာကတည်းက သူတို့အတွက် အကျိုးအမြတ် ဘာမှမရှိခဲ့ဘဲ သူရှာသမျှ ပြဿနာတွေကိုပဲ လိုက်လံရှင်းလင်းပေးနေရသည် မဟုတ်ပါလား။

လွန်ခဲ့သော နှစ်နှစ်ကလည်း ယဲ့ဖန်သည် ဂိုဏ်း၏တပည့်များကို နယ်စပ်သို့ ခေါ်သွားကာ မိစ္ဆာများကို သတ်ရန် ကြိုးစားခဲ့သည်။ ရလဒ်မှာ သူသည် စစ်မြေပြင်မှ ထွက်ပြေးပြီး လမ်းခုလတ်တွင် ရှောင်ချီကို တိုက်ခိုက်ခဲ့သည်ဟူသော သတင်းများ ပျံ့နှံ့သွားခဲ့သည်။

သိပ်မကြာသေးမီမှာပင် ယခုအခါ ပင်လယ်ရပ်ခြားတွင် ဤကဲ့သို့သော ဘေးဒုက္ခမျိုးကို ထပ်မံ ရှာခဲ့ပြန်ပြီ။

ဒီလောက်ကြီးမားတဲ့ ဘေးဒုက္ခကို ရှာခဲ့ရင် အပြင်မှာ နှစ်အနည်းငယ်လောက် ပုန်းနေသင့်တာပေါ့ ဒါပေမဲ့ ယဲ့ဖန်ကတော့ ပြောင်းပြန်လုပ်ပြီး ရန်သူအမြောက်အမြားကို ဝိညာဉ်ဓားဂိုဏ်းဆီ ခေါ်လာခဲ့သဖြင့် ဂိုဏ်းတစ်ခုလုံးကို ဘေးဒုက္ခအတွင်းသို့ ဆွဲသွင်းလိုက်သကဲ့သို့ ဖြစ်သွားခဲ့သည်။

ကျိန်းချီ ပညာရှိ နှင့် ဝူတောက်ကျိတို့သည် ယဲ့ဖန်ကို တွဲကူကာ နောက်တောင်ကုန်းသို့ လျှောက်သွားကြသည် ကိစ္စက ဖြစ်ပြီးသွားပြီဖြစ်ရာ ယဲ့ဖန်ကို အပြစ်တင်နေလည်း အပိုပင်။ သူ့ကို တောင်ပေါ်သို့ ခေါ်ဆောင်သွားကာ ဒဏ်ရာများကို ကုသပေးရင်း လာမည့် တိုက်ပွဲအတွက် ပြင်ဆင်ရုံသာ ရှိတော့သည်။

"တပည့်အားလုံး ငါ့အမိန့်ကို နာခံကြ ဂိုဏ်းကာကွယ်ရေး အစီအရင်ကို အသက်သွင်းပြီး အချိန်မရွေး တိုက်ပွဲဝင်ဖို့ ပြင်ထားကြ" ဝူတောက်ကျိ၏ အသံမှာ ဝိညာဉ်ဓားဂိုဏ်း၏ ထောင့်တိုင်းတွင် ဟိန်းထွက်သွားသည်။

ဘာပဲဖြစ်ဖြစ် ယဲ့ဖန်က ဝိညာဉ်ဓားဂိုဏ်း၏ ဂိုဏ်းချုပ်ဖြစ်နေသဖြင့် သူ့ကို အပြင်သို့ ထုတ်ပစ်ကာ ပစ်ထား၍ မရပေ။ အကယ်၍ ထိုသို့လုပ်ခဲ့မည်ဆိုလျှင် ဝိညာဉ်ဓားဂိုဏ်း လွတ်မြောက်သွားလျှင်တောင် ကျင့်ကြံခြင်းလောကတွင် ဘယ်တော့မှ ခေါင်းမော့နိုင်တော့မည် မဟုတ်ပေ။

"ဟုတ်ကဲ့ပါ" ဝိညာဉ်ဓားဂိုဏ်းမှ တပည့်အမြောက်အမြားက ချက်ချင်းပင် အမိန့်ကို နာခံလိုက်ကြပြီး ပုံရိပ် ထောင်ပေါင်းများစွာမှာ ဂိုဏ်းအတွင်း လျင်မြန်စွာ လှုပ်ရှားလာကြသည်။

ဤမြင်ကွင်းမှာ သားရဲယဉ်ပါးစေခြင်းဂိုဏ်းက အစီအရင်ကို အသက်သွင်းစဉ်ကနှင့် အနည်းငယ် ဆင်တူနေသည်။

သို့သော် စွမ်းအားနှင့် လူအင်အားတွင်မူ အနည်းငယ် ကွာခြားချက် ရှိသည်။ ဂိုဏ်းတစ်ခု၏ အခြေခံ ခိုင်မာမှုကို ဤဂိုဏ်းအစီအရင်လေးကို ကြည့်ရုံနှင့် သိနိုင်သည်လေ။

ဝိညာဉ်ဓားဂိုဏ်းမှာ အဓိကဂိုဏ်းကြီး ခုနစ်ဂိုဏ်းထဲတွင် အားအနည်းဆုံးဟု အမည်ကျော်သည်မှာ အဟုတ်ပင် ဂိုဏ်းအစီအရင် တစ်ခုကို ပြင်ဆင်ခြင်းမှာပင် အားနည်းလှသည်ဟု ထင်ရသည်။

ဝုန်း... ဝိညာဉ်ဓားဂိုဏ်း၏ တောင်တံခါးတွင် တောက်ပသော အလင်းတန်းတစ်ခု ရုတ်တရက် ပွင့်ထွက်လာသည်။ ကြောက်မက်ဖွယ်ကောင်းသော စွမ်းအားတစ်ခုက တံခါးတစ်ခုလုံးကို မြေလှန်ပစ်လိုက်သည်။

ဤအချိန်တွင် ဝိညာဉ်မျိုးနွယ်စုဝင်များသည် တံခါးအပြင်ဘက်တွင် တဖြည်းဖြည်း စုဝေးလာကြသည်။ ဝိညာဉ်မျိုးနွယ်စု တပည့်အမြောက်အမြားမှာ အရပ်မျက်နှာ အသီးသီးမှ စီးဝင်လာကြသည်။

ဝိညာဉ်မျိုးနွယ်စုသည် လူသားမျိုးနွယ်စု၏ မဟာမိတ်ဖြစ်ပြီး နှစ်ပေါင်းများစွာ အေးအတူပူအမျှ နေထိုင်ခဲ့ကြသူများ ဖြစ်သည်။

သို့သော် ယဲ့ဖန်၏လုပ်ရပ်ကြောင့် လူမျိုးစုနှစ်ခုကြားက ဆက်ဆံရေးမှာ ချက်ချင်းပင် ပျက်ပြားသွားပြီး တစ်ဦးနှင့်တစ်ဦး ရန်ဘက်များအဖြစ်သို့ မျက်တောင်တစ်ခတ်အတွင်း ရောက်ရှိသွားခဲ့ရသည်။

ယခုအချိန်တွင် ရှောင်ချီသည် ဝိညာဉ်ဓားဂိုဏ်းနှင့် မနီးမဝေးသို့ ရောက်ရှိနေပြီ ဖြစ်သည် သူသည် ဤဝိညာဉ်မျိုးနွယ်စုဝင်များကို စိတ်ဝင်တစား စောင့်ကြည့်နေမိသည်။

ဤလူများသည် လူသားများနှင့် အတော်လေး ဆင်တူသော်လည်း သူတို့၏ ခန္ဓာကိုယ်များမှာ မြွေအရေခွံကဲ့သို့ အကြေးခွံများဖြင့် ဖုံးလွှမ်းနေပြီး နောက်ကျောတွင်မူ လင်းနို့တောင်ပံများကဲ့သို့ တောင်ပံများ ရှိကြသည်။

လူသားတွေရဲ့ အလှအပအမြင်အရဆိုရင် ဒီလူတွေက အတော်လေး ကြည့်ကောင်းကြပါတယ်။ အနည်းဆုံးတော့ ကြောက်စရာကောင်းတဲ့ မိစ္ဆာမျိုးနွယ်တွေထက်တော့ အများကြီးသာတာပေါ့။

ဝိညာဉ်မျိုးနွယ်စုနှင့် လူသားမျိုးနွယ်စုတို့ ထိစပ်နေသော နယ်စပ်ဒေသများတွင် လူမျိုးအချင်းချင်း လက်ထပ်ထိမ်းမြားမှုများလည်း အများအပြား ရှိခဲ့ဖူးသည်ဟု ဆိုကြသည်။

"ဝိညာဉ်မျိုးနွယ်စုက စီနီယာတို့ ခဏလောက် ဆိုင်းငံ့ပေးပါဦး ကျွန်တော်တို့ လူမျိုးစုနှစ်ခုက မျိုးဆက်ပေါင်းများစွာ ချစ်ကြည်ရင်းနှီးခဲ့ကြတာပါ။ ဒီကိစ္စလေးတစ်ခုကြောင့် ကျွန်တော်တို့ကြားက သံယောဇဉ်ကို အပျက်မခံပါနဲ့"

ဝိညာဉ်ဓားဂိုဏ်း၏ မဟာအကြီးအကဲဖြစ်သူ ယွီရှောင်ကျိက ဟင်းလင်းပြင်ထဲသို့ လှမ်းထွက်လိုက်သည်။ သူသည် ကောင်းကင်ယံတွင် တောင်ပံများကို ခတ်ရင်း ပျံသန်းနေကြသည့် ဝိညာဉ်မျိုးနွယ်စု တပည့် တစ်ထောင်ကျော်နှင့် သူတို့၏ နောက်ကွယ်မှ အကြီးအကဲ အချို့ကို လေးနက်စွာ ကြည့်လိုက်သည်။

ကောင်းကင်ယံတွင် ငှက်များကဲ့သို့ တောင်ပံခတ်နေကြသည့် ဤဝိညာဉ်မျိုးနွယ်စု ပညာရှင်များသည် ကြောက်မက်ဖွယ်ကောင်းသော ဖိအားကို ပေးစွမ်းနေကြသည် ဟင်းလင်းပြင်အဆင့်၏ အထွတ်အထိပ်တွင် ရှိနေသော မဟာအကြီးအကဲပင်လျှင် သူတို့ကို ရင်ဆိုင်ရာတွင် ဖော်ပြမရနိုင်သော ကြောက်ရွံ့မှုကို ခံစားနေရသည်။

ထို့အပြင် ယွီရှောင်ကျိသည် ဤနေရာသို့ ရောက်ရှိလာသော ဝိညာဉ်မျိုးနွယ်စုဝင် အရေအတွက်မှာ တဖြည်းဖြည်း တိုးလာနေပြီး အရပ်မျက်နှာ အသီးသီးမှ ငှက်လူသားများ ဤနေရာသို့ စုပြုံရောက်ရှိလာနေကြောင်း ခံစားမိသည်။

စစ်ပွဲကြီးတစ်ခုမှာ ဖြစ်လုနီးပါး ဖြစ်နေပြီဟု ပြောနိုင်ပါသည်။ ဝိညာဉ်ဓားဂိုဏ်း လွတ်မြောက်နိုင်မည့် အခွင့်အရေးမှာ အလွန်ပင် နည်းပါးလှသည်။

"ယဲ့ဖန်ကို အပ်မလား ဒါမှမဟုတ် သေမလား" မိန်းကလေးဆန်သော အသွင်အပြင်ရှိသည့် ဝိညာဉ်မျိုးနွယ်စု အမျိုးသမီးတစ်ဦးက ရှေ့သို့ ပျံထွက်လာသည်။ သူမသည် မဟာအကြီးအကဲ ယွီရှောင်ကျိကို အေးစက်စွာ ကြည့်ပြီး တည်ငြိမ်သော လေသံဖြင့် ပြောလိုက်သည်လေ။

ဤဝိညာဉ်မျိုးနွယ်စု အမျိုးသမီး စကားပြောလိုက်သောအခါ သူမ၏အသံနေအသံထားမှာ အတော်လေး ထူးဆန်းနေသည်။ သူမသည် လူသားဘာသာစကားကို အလွန်အကျွံ ကျွမ်းကျင်ပုံမရသဖြင့် သူမ၏ စကားလုံးများမှာ ထူးထူးခြားခြား ဖြစ်နေခြင်းပင်။

"ကျွန်တော်တို့ ဝိညာဉ်ဓားဂိုဏ်းက လျော်ကြေးပေးဖို့ အသင့်ပါပဲ စီနီယာတို့ရဲ့ သူတော်စင် သေဆုံးသွားတဲ့အတွက် ကျွန်တော်တို့ အလွန်ပဲ စိတ်မကောင်းဖြစ်ရပါတယ်။ ဒါပေမဲ့ သေသွားတဲ့သူက ပြန်မရှင်နိုင်တော့ပါဘူး အသက်ရှင်နေတဲ့သူတွေက ပိုပြီး လက်တွေ့ကျသင့်ပါတယ်" ယွီရှောင်ကျိက ခေါင်းခါလိုက်သည် သူသည် ယဲ့ဖန်ကို လွှဲအပ်ပေးရန် လုံးဝ မဖြစ်နိုင်ပေ။

ဟင်း... ဝိညာဉ်မျိုးနွယ်စုဝင်များသည် နောက်ဆုံးတွင် သည်းခံနိုင်စွမ်း ကုန်ဆုံးသွားကြပြီ သူတို့၏ စိတ်ခံစားချက်မှာ လူသားများနှင့် သဘာဝချင်း မတူညီကြပေ။

ယွီရှောင်ကျိနှင့် စကားအနည်းငယ် ပြောပေးခြင်းမှာပင် သူ့ကို မျက်နှာသာ ပေးပြီးသားဖြစ်သည်။ ရလဒ်အနေဖြင့် ဤလူမှာ အချိန်ဆွဲနေပြီး အဓိပ္ပာယ်မရှိသော စကားများကိုသာ ပြောနေသဖြင့် ဝိညာဉ်မျိုးနွယ်စု အုပ်စုမှာ သူတို့၏ နောက်ဆုံး သည်းခံမှုကို လက်လွှတ်လိုက်ကြတော့သည်။

ဝုန်း... ဝုန်း... ဝုန်း... ကြောက်မက်ဖွယ်ကောင်းသော အနီရောင် အလင်းတိုင်များက ဝိညာဉ်ဓားဂိုဏ်းဆီသို့ ပြင်းထန်စွာ ပစ်လွှတ်လိုက်သည်။

"ရပ်လိုက်ကြစမ်း" ယွီရှောင်ကျိ၏ မျက်လုံးများမှာ ပြာနှမ်းသွားသည်။ ဝိညာဉ်မျိုးနွယ်စုဝင်များက မည်သည့် ကရုဏာမှ မထားဘဲ တိုက်ရိုက် တိုက်ခိုက်လိမ့်မည်ဟု သူ မထင်ထားခဲ့ပေ။

ယွီရှောင်ကျိသည် သူ၏မှော်စွမ်းအားကို အသုံးပြုကာ ထိုအနီရောင် အလင်းတန်းကို တားဆီးရန် ပြင်လိုက်သော်လည်း နောက်တစ်စက္ကန့်တွင် သူ၏ အသက်အန္တရာယ်ကို စိုးရိမ်ရလောက်သော ထိတ်လန့်မှုကို ခံစားလိုက်ရသည်။

ထိုအချိန်တွင်မှ ဤကြောက်မက်ဖွယ် အနီရောင် အလင်းတန်းမှာ သူ၏ အသက်ကို တကယ်ပဲ ယူသွားနိုင်ကြောင်း သူ နားလည်သွားခဲ့သည်။

ယွီရှောင်ကျိသည် လျင်မြန်စွာပင် ဂိုဏ်းအတွင်းသို့ ပြန်ဝင်သွားခဲ့သည် သူသည် ဂိုဏ်းကာကွယ်ရေး အစီအရင်ကို အသက်သွင်းရန် သူ၏စွမ်းအားအားလုံးကို အသုံးပြုလိုက်သည် အခြား တပည့်များကလည်း သူတို့၏ နေရာများသို့ အမြန်ဆုံး သွားရောက်ကြပြီး ရွှေရောင် အလင်းတန်း အစီအရင်တစ်ခုက ဝိညာဉ်ဓားဂိုဏ်း တစ်ခုလုံးကို ဖုံးလွှမ်းသွားကာ ထိုကမ္ဘာပျက်မည့် အနီရောင် အလင်းတန်းကို မနည်း တောင့်ခံထားနိုင်ခဲ့တော့သည်။