အခန်း (၁၃၀)  နယ်စပ်စစ်သည်များကို နှုတ်ဆက်ခြင်း

ဤအတောအတွင်း သဘာဝကျကျ အကြောက်ဆုံးနှင့် အထိတ်လန့်ဆုံး ဖြစ်နေသည့် ဂိုဏ်းနှစ်ဂိုဏ်းမှာ ဝိညာဉ်ဓားဂိုဏ်းနှင့် သားရဲယဉ်ပါးစေခြင်းဂိုဏ်းတို့ပင် ဖြစ်သည်။

အထူးသဖြင့် သားရဲယဉ်ပါးစေခြင်းဂိုဏ်းမှ သူတော်စင် ချောင်ကျိရှုနှင့် ဟေးဟူတို့ ဖြစ်သည်။ အမှန်စင်စစ် ချောင်ကျိရှုသည် ဤကာလအတွင်း သူ၏ မူလနာမည်ကို ပြန်လည်အသုံးပြုရန် စီစဉ်ထားခဲ့သည်။

ထိုစဉ်က သူသည် မြေအောက်တွင် မြှုပ်နှံခံထားရရုံသာဖြစ်ပြီး အမှန်တကယ် သေဆုံးသွားခြင်း မဟုတ်ကြောင်း ကြေညာရန် ရည်ရွယ်ခဲ့ခြင်းပင်။

သို့သော် စစ်မြေပြင်တွင် ရှောင်ချီပြသခဲ့သည့် စွမ်းဆောင်ရည်များကို သိရှိလိုက်ရပြီးနောက် ချောင်ကျိရှုမှာ လုံးဝကို ထိတ်လန့်တုန်လှုပ်သွားတော့သည်။ သူသည် ထိုနာမည်ကို တစ်သက်လုံး မသုံးတော့ပါဟု ကျိန်ဆိုလိုက်တော့သည် ယနေ့မှစ၍ ကျင့်ကြံခြင်းလောကတွင် ချောင်ကျိရှု ဆိုသောသူ ရှိတော့မည် မဟုတ်ပေ။

ဟေးဟူမှာမူ ပို၍ပင် ပျာယာခတ်နေတော့သည် ဟေးဟူသည် သားရဲယဉ်ပါးစေခြင်းဂိုဏ်းတွင် သာမန်လူတစ်ယောက် မဟုတ်ပေ။ ဆန့်ကျင်ဘက်အနေဖြင့် သူသည် ဂိုဏ်းအတွင်း အရေးပါသော အဆင့်အတန်းတစ်ခုကို ပိုင်ဆိုင်ထားသူဖြစ်သည်။

သူ၏ ထူးချွန်မှုမှာ ချောင်ကျိရှု၏ လက်အောက်တွင် ဖုံးကွယ်နေခဲ့ခြင်းသာ ဖြစ်သည်။ သို့သော် ဂိုဏ်း၏ မျိုးဆက်သစ်လူငယ်များထဲတွင် ဟေးဟူမှာ ကျင့်စဉ်ရော ပါရမီပါ ထိပ်တန်းသုံးယောက်စာရင်းတွင် သေချာပေါက် ပါဝင်သူဖြစ်သည်။

မူလက ဟေးဟူသည် ယဲ့ဖန်အတွက် ဤအရေးကြီးသော အလုပ်ကို ကူညီပေးပြီး ရှောင်ချီကို သတ်ပေးလိုက်လျှင် ယဲ့ဖန်၏ မျက်နှာသာပေးမှုကို ရလိမ့်မည်ဟု ထင်ခဲ့သည်။

ဒါပေမဲ့ ရှောင်ချီကို မသတ်နိုင်ခဲ့ရုံတင်မကဘဲ သူ့ကိုယ်သူ သေမိန့်ပေးလိုက်သလို ဖြစ်သွားခဲ့ရပြီ။

နောက်ပိုင်းတွင် ဟေးဟူမှာ စားမဝင် အိပ်မပျော် ဖြစ်နေပြီး သူသတ်ခဲ့မိသော အမျိုးသမီးမှာ မည်သူနည်းဟု အမြဲ စုံစမ်းနေခဲ့သည်။

ထိုအမျိုးသမီး၏ အမည်မှာ လင်ယုရှုဖြစ်ပြီး ရှောင်ချီ အမြတ်နိုးဆုံးသော ဂျူနီယာညီမလေးဖြစ်ကြောင်း သူ နောက်ပိုင်းတွင် သိရှိခဲ့ရသည်။

လင်ယုရှုသည် ရှောင်ချီအတွက် အသက်ပေးသွားခဲ့ခြင်းဖြစ်ကြောင်း သူ သတိရလိုက်ချိန်တွင် ရှောင်ချီမှာ သူ့အပေါ် မည်မျှအထိ နာကျည်းနေမည်ကို သူ မတွေးရဲတော့ပေ။

ယခုအခါ ဟေးဟူသည် သားရဲယဉ်ပါးစေခြင်းဂိုဏ်းသို့ပင် ပြန်မသွားရဲတော့ဘဲ ကျင့်ကြံခြင်းလောကထဲတွင် ဝိညာဉ်လွင့်နေသော သရဲတစ်ကောင်လို အဓိပ္ပာယ်မဲ့ လှည့်လည်နေရတော့သည် သနားစရာရော အောက်တန်းကျစရာပါ ကောင်းလှသည်။

တစ်ဖက်တွင်လည်း ဆုလာဘ်ကြီးကြီးမားမား ပေးမည်ဟု ကတိပေးခဲ့သော ယဲ့ဖန်မှာလည်း သူ့ကို အရေးလုပ်မည့်ပုံ မပေါ်ပေ ဟေးဟူအနေဖြင့် ယဲ့ဖန်ထံ ခိုလှုံရန် မစဉ်းစားခဲ့သည်တော့ မဟုတ် သူ့အမြင်တွင် ယဲ့ဖန်၏ ကျင့်စဉ်မှာ ရှောင်ချီလောက် မမြင့်သော်လည်း ပါရမီမှာ ရှောင်ချီထက် သာလွန်မည်ဟု ယူဆထားသည်။

 ယဲ့ဖန်သာ အချိန်ရလျှင် တစ်နေ့တွင် ရှောင်ချီကို ကျော်တက်နိုင်လိမ့်မည်ဟု သူ ထင်နေခြင်းပင်။

သို့သော် ဟေးဟူ ဝိညာဉ်ဓားဂိုဏ်းသို့ သွားသောအခါ ယဲ့ဖန်မှာ အတွေ့အကြုံသစ်များ ရှာဖွေရန် ထွက်သွားသည်မှာ တစ်နှစ်ကျော်ပြီဖြစ်ပြီး မည်သူမှ မတွေ့ရကြောင်း သိလိုက်ရသည်။

လက်ရှိတွင် ရှောင်ချီဟူသော အမည်ကြောင့် ကျင့်ကြံခြင်းလောကတစ်ခုလုံး ထိတ်လန့်တုန်လှုပ်နေကြသည်။ တစ်ချိန်က သူနှင့် ရန်ငြိုးရှိခဲ့သူများမှာလည်း အလွန်ပင် စိတ်မသက်မသာ ဖြစ်နေကြတော့သည်။

မင်းသားကြီး နယ်စပ်ကနေ ထွက်ခွာတော့မှာလား ရွှေရောင်ချပ်ဝတ်ဝတ်ထားသော လက်တစ်ဖက်ပြတ် စစ်သူကြီးတစ်ဦးက ရှောင်ချီကို နှမြောတသဟန်ဖြင့် မေးလိုက်သည်။

အင်း... အခု မိစ္ဆာမျိုးနွယ်တွေကို မိုင်ပေါင်းတစ်သောင်းအထိ မောင်းထုတ်ခဲ့ပြီးပြီဆိုတော့ သူတို့ဘက်က ဝိညာဥ်ခန္ဓာပေါင်းစည်းခြင်းအဆင့် ပညာရှင်တွေကို မစေလွှတ်သရွေ့ အနည်းဆုံး အနှစ်တစ်ရာအတွင်း လူသားနယ်မြေကို ကျူးကျော်ရဲမှာ မဟုတ်တော့ဘူး။

ကျွန်တော့်ရဲ့ ကိုယ်ပိုင်ကိစ္စတွေကို ဖြေရှင်းဖို့ ပြန်ရမယ့် အချိန်လည်း ရောက်ပြီ ရှင်းဟိုင် ဒီနယ်စပ်ဒေသကို ခင်ဗျားလက်ထဲ အပ်ခဲ့မယ်။

ခင်ဗျား ကျင့်စဉ်ကို အတင်းဖိနှိပ်ထားတာ ကြာပြီဆိုတာ ကျွန်တော် သိပါတယ်။ အခု နယ်စပ်မှာ မိစ္ဆာတွေ ဆုတ်ခွာသွားပြီဆိုတော့ ကျင့်စဉ်ကို ဆက်ပြီး ဖိနှိပ်ထားဖို့ မလိုတော့ဘူး။ ကိုယ့်အတွက်ကိုယ် ရှင်သန်ရမယ့် အချိန် ရောက်ပြီ။

ရှောင်ချီက ချန်ရှင်းဟိုင်၏ ပုခုံးကို ပုတ်ကာ နူးညံ့သောအသံဖြင့် ပြောလိုက်သည်။

ရှောင်ချီသည် အသက်အရွယ်အားဖြင့် သိပ်မကြီးသေးဘဲ ဤရွှေချပ်ဝတ် စစ်သူကြီးနှင့် နှိုင်းယှဉ်လျှင် ကလေးတစ်ယောက်နှင့်ပင် တူသော်လည်း ရှောင်ချီ၏ လက်ရှိ အဆင့်အတန်းမှာမူ အလွန်မြင့်မြတ်လှသည်။

 သူသည် နဂါးပလ္လင်ပေါ်မှ ဧကရာဇ်ကိုယ်တိုင် ချီးမြှင့်ထားသော ပထမတန်းစား မင်းသားဖြစ်ပြီး တော်ဝင်မင်းသားတစ်ပါးနှင့် အဆင့်အတန်း တူညီသည် ထို့ကြောင့် ရွှေချပ်ဝတ် စစ်သူကြီးမှာလည်း မလေးမစား မလုပ်ဝံ့ပေ။

စိတ်ချပါ မင်းသားကြီး လူ့လောကထဲ ပြန်ရောက်တဲ့အခါမှာလည်း ပိုပြီး သတိထားပါ။ လူ့စိတ်ဆိုတာ အရှုပ်ထွေးဆုံး အရာပဲ။

ကျင့်ကြံခြင်းလောကက ကျွန်တော်တို့ နယ်စပ်စစ်သည်တွေလို ပွင့်လင်းရိုးသားတာ မဟုတ်ဘူး။ သူတို့မှာ လှည့်ကွက်တွေ အများကြီး ရှိတယ် သူတို့ရဲ့ လှည့်စားမှုကို မခံရစေနဲ့။

ရွှေချပ်ဝတ် စစ်သူကြီး၏ မျက်လုံးထဲတွင် နှမြောတသမှုများ ရှိနေသည် သူနှင့် ရှောင်ချီတို့ တစ်နှစ်ခန့်သာ အတူရှိခဲ့သော်လည်း

သူသည် မိမိရှေ့မှ အစွမ်းထက်ပြီး ပြတ်သားလှသော ဤလူငယ် ပါရမီရှင်အပေါ် လုံးဝ ဥဿုံ ကြည်ညိုလေးစားသွားခဲ့ခြင်းပင်။

နယ်စပ်ရှိ စစ်သည်များကို နှုတ်ဆက်ပြီးနောက် ရှောင်ချီက လက်တစ်ချက် ဝှေ့ယမ်းလိုက်ရာ စစ်စခန်းအပြင်ဘက်တွင် ခန့်ညားလှသော ဝိညာဉ်လှေတစ်စင်း ပေါ်လာသည်။

ငွေရောင်ချပ်ဝတ်ဝတ်ပြီး လှံရှည်များ ကိုင်ဆောင်ထားသော စစ်သည် ဒါဇင်ပေါင်းများစွာမှာ ဝိညာဉ်လှေပေါ်သို့ အလျင်အမြန် တက်လိုက်ကြသည်။

ရှောင်ချီမှာ အနည်းငယ် အားနာမိသည် ဤလူများမှာ ဧကရာဇ်အိုကြီးက သူ၏ လုံခြုံရေးအတွက်ဟုဆိုကာ စေလွှတ်လိုက်သော ကိုယ်ရံတော်များ ဖြစ်ကြသည်။

ဒါပေမဲ့ သူ့ရဲ့ လုံခြုံရေးအတွက် ဒီလူတွေ တကယ်လိုအပ်လို့လား သူက လူသားမျိုးနွယ်တွေ စစ်နတ်ဘုရားလို့ တလေးတစား ခေါ်ရတဲ့သူလေ။

နယ်စပ်မှာ တစ်နှစ်ခွဲကြာအောင် စောင့်ရှောက်ပြီး မိစ္ဆာမျိုးနွယ်တွေကို မိုင်ပေါင်းတစ်သောင်းနီးပါး ဆုတ်ခွာသွားအောင် လုပ်နိုင်ခဲ့တဲ့သူ ရှောင်ချီကို ကာကွယ်ပေးဖို့ဆိုတာ ဘယ်လိုလူမျိုးမှ အရည်အချင်း ပြည့်မီမှာလဲ။

သို့သော်လည်း လိုအပ်သော အပေါ်ယံ အခမ်းအနားများကိုတော့ လိုက်နာရမည်ပင်။ အဆုံးတွင် ရှောင်ချီသည် ယခုအခါ ဝေနိုင်ငံတော်ကြီး၏ ပထမတန်းစား မင်းသားဖြစ်နေပြီဖြစ်ရာ သင့်တင့်လျောက်ပတ်သော အဆောင်အယောင်များ ရှိနေရန် လိုအပ်သည် မဟုတ်ပါလား။

ရှောင်ချီ၏ ပထမဆုံး ဦးတည်ချက်မှာ ကျောက်စိမ်းကညာဂိုဏ်းပင် ဖြစ်သည် သူ ထွက်ခွာသွားသည်မှာ နှစ်အနည်းငယ် ရှိပြီဖြစ်ပြီး သူ၏ ဆရာကို မတွေ့ရသည်မှာ ကြာပြီဖြစ်သည်။

ထိုဆရာအိုကြီးနှင့် အချိန်အကြာကြီး အတူမနေခဲ့ရသော်လည်း ရှင်းယွဲ့ဘိုးဘွားသည် ရှောင်ချီအပေါ် တကယ်ကို ကောင်းခဲ့သူဖြစ်သည်။

သူမသည် ဝိညာဉ်ဓားဂိုဏ်းအထိ လိုက်လာပြီး သူ့ကို အားပေးကူညီခဲ့သည့်အပြင် ထိပ်တန်းအဆင့် ပင်ကိုယ်စွမ်းအားပါမှော်ရတနာဖြစ်သော ကျိတောက်ရွှေကြာကိုပါ လက်ဆောင်ပေးခဲ့သည်။

ရှောင်ချီက ဤအရာအားလုံးကို မှတ်မိနေပြီး ရှင်းယွဲ့ဘိုးဘွားကို သူ၏ ဆရာအစစ်အမှန်အဖြစ် စိတ်ရင်းဖြင့် သတ်မှတ်ထားသည်။

အကယ်၍ သူတစ်ပါးက သူ့အပေါ် မကောင်းတဲ့ စိတ်ထားသုံးပုံထားရင် သူက အဆပေါင်းတစ်ရာ ပြန်ဆပ်ပါလိမ့်မယ် အကယ်၍ တစ်စုံတစ်ယောက်က သူ့အပေါ် စေတနာသုံးပုံထားရင်တော့ ရှောင်ချီက အဆပေါင်းတစ်ထောင် ပြန်ဆပ်ဖို့ အသင့်ပါပဲ။

ရှောင်ချီသည် ပျံသန်းသည့်လှေ၏ ကုန်းပတ်ပေါ်တွင် ရပ်နေရင်း အောက်မှ လျင်မြန်စွာ ကျန်ရစ်ခဲ့သော ရှုခင်းများကို ကြည့်ကာ မျက်လုံးထဲတွင် အနည်းငယ် ဆွေးမြည့်နေဟန် ရှိသည်။

သူ့ရဲ့ ဂျူနီယာညီမလေး အခု ဘယ်လိုနေမလဲဆိုတာ သူ သိချင်နေမိတယ်။ အဲ့ဒီ အစွမ်းထက်တဲ့ ပုဂ္ဂိုလ်ကြီးက သူမကို တကယ် ကယ်တင်နိုင်ပါ့မလား။

ရှောင်ချီ၏ အတွေးများသည် သူ၏ ဂျူနီယာညီမလေးနှင့်အတူ ရှိခဲ့စဉ်က အမှတ်တရလေးများဆီသို့ တဖြည်းဖြည်း လွင့်မျောသွားသည် သူ၏ နှလုံးသားထဲမှ နူးညံ့သော နေရာလေးတစ်ခုကို တစ်စုံတစ်ခုက လာထိတွေ့လိုက်သကဲ့သို့ပင်။

မိစ္ဆာမျိုးနွယ်များကို နယ်စပ်မှ မောင်းထုတ်နိုင်ခဲ့သဖြင့် လူသားမျိုးနွယ်နှင့် ကျင့်ကြံခြင်းလောက၏ လူနေမှုဘဝမှာ သိသိသာသာ တိုးတက်လာခဲ့သည်။

အောက်ဘက်ရှိ စည်ကားနေသော မြင်ကွင်းများကို ကြည့်ရင်း ရှောင်ချီသည် ဂုဏ်ယူမှုနှင့် ကျေနပ်မှုကိုလည်း ခံစားနေရသည်။

တစ်ရက်ခန့်အကြာတွင် ပျံသန်းသည့်လှေမှာ ကျောက်စိမ်းကညာဂိုဏ်း တည်ရှိရာနေရာသို့ နောက်ဆုံးတွင် ဆိုက်ရောက်ခဲ့ပါတော့သည်။

...

"ငါတို့ရဲ့ဂိုဏ်း နယ်မြေထဲကို ဘယ်သူက ကျူးကျော်ဝင်ရောက်ရဲတာလဲ" တောင်တံခါးကို စောင့်ကြပ်နေသူများမှာ အသစ်ဝင်ထားသော အတွင်းစည်းတပည့်အချို့ ဖြစ်ကြသည်။

သူတို့၏ ကျင့်စဉ်အဆင့်မှာ အလွန်မမြင့်မားဘဲ အခြေခံတည်ဆောက်ခြင်းအဆင့်ဝန်းကျင်သာ ရှိကြသည်။

အဝေးမှ လျှပ်ခနဲ ပေါ်လာသော ပျံသန်းသည့်လှေကို မြင်သောအခါ သူတို့က ဖြတ်သွားသူဟု ထင်ခဲ့ကြသည်။ သို့သော် နောက်တစ်ခဏတွင် ထိုခန့်ညားလှသော ဝိညာဉ်လှေမှာ သူတို့၏ တောင်တံခါးရှေ့တွင် ဆိုက်ရပ်လိုက်သည်။

"ရှောင်ချီ ပြန်လာပြီလို့ သွားသတင်းပို့ပေးပါ" ရှောင်ချီသည် ဝတ်ရုံဖြူကြီးကို ပုခုံးပေါ်တင်လျက် လှေခန်းထဲမှ ထွက်လာသည်။

သူသည် လေထဲတွင် လွင့်နေသော ကျောက်စိမ်းပင်တစ်ပင်ကဲ့သို့ ခန့်ညားသလို အလွန်ပင် မြင့်မြတ်သော အရှိန်အဝါလည်း ရှိနေသည် ခဏချင်းမှာပင် တံခါးစောင့် တပည့်မလေးများမှာ သူ့ကို ငေးကြည့်ရင်း မှင်သက်သွားကြတော့သည်။

ရှင်... ရှင်က နယ်စပ်ကို စောင့်ရှောက်ပြီး မိစ္ဆာစစ်သည် သိန်းပေါင်းများစွာကို သုတ်သင်ခဲ့တဲ့ လူသားမျိုးနွယ် စစ်နတ်ဘုရား မင်းသားကြီး ရှောင်ချီလား။

ရှောင်ချီ သူတို့ဆီသို့ ဖြည်းဖြည်းချင်း လျှောက်လာသည်ကို ကြည့်ရင်း တပည့်မလေး အချို့မှာ စကားပင် ထစ်ကုန်ကြသည်။

လက်ရှိတွင် ရှောင်ချီသည် သူတို့လို မိန်းကလေးငယ်လေးများအတွက် ထိပ်တန်းအိုင်ဒေါတစ်ယောက် ဖြစ်နေပြီဖြစ်သည်။

 ရှောင်ချီနှင့် နှိုင်းယှဉ်လျှင် တစ်ခါက နတ်ဘုရားနန်းတော်ကို ဦးဆောင်ပြီး မိစ္ဆာ ၃၀၀ ကို သတ်ခဲ့ဖူးသည့် ယဲ့ဖန်မှာအလွန်ပင် အဆင့်အတန်း နိမ့်ပါးနေပြီး ကလေးကစားစရာ ကစားနေသကဲ့သို့ ရယ်စရာကောင်းနေတော့သည်။

ထို့အပြင် လတ်တလော ထွက်ပေါ်နေသော ကောလာဟလများအရ ယဲ့ဖန်သည် နယ်စပ်ကို စောင့်ရှောက်စဉ်က ဝိညာဉ်ဓားဂိုဏ်း တပည့်များကို ဦးဆောင်ကာ စစ်မြေပြင်မှ စွန့်ခွာထွက်ပြေးခဲ့ကြောင်း ယင်းကြောင့်ပင် စစ်ပွဲတစ်ခုလုံး ရှုံးနိမ့်ခဲ့ရကြောင်း ကြားနေရသည်။

ဤစွပ်စွဲချက်မှာ အတည်မပြုနိုင်သေးသော်လည်း ကျင့်ကြံခြင်းလောကထဲတွင် အတော်လေး ပျံ့နှံ့နေပြီဖြစ်သည်။ ယဲ့ဖန်၏ နာမည်ဂုဏ်သတင်းမှာလည်း အတော်လေး ညစ်နွမ်းသွားခဲ့ပြီ ဖြစ်သည်။

အတိတ်ကို ပြန်တွေးကြည့်လျှင် ယဲ့ဖန်သည် ထိုစဉ်က အလွန်ပင် ဘုန်းတန်ခိုးကြီးမားခဲ့ပြီး သူ၏ ဘဝအကောင်းဆုံး အချိန်များကို ပိုင်ဆိုင်ခဲ့သည် သို့သော် ရှောင်ချီ လွတ်မြောက်လာချိန်မှစ၍ ယဲ့ဖန်၏ ကောင်းသောနေ့ရက်များမှာ ပျောက်ကွယ်သွားခဲ့ပြီး နောက်ထပ် ဘယ်တော့မှ ပြန်မလာတော့ပေ။