အခန်း (၁၂၅) ယဲ့ဖန် လှုပ်ရှားခြင်းနှင့် နတ်မိမယ်လင်ယွင်၏ ပွဲကြည့်ပွဲ

ဟေးဟူ၏ နောက်လိုက်များသည် သူ၏နောက်မှ ထပ်ကြပ်မကွာ လိုက်ပါလာပြီး ထိုဝိညာဉ်လှေငယ်လေးနောက်သို့ လိုက်လံဖမ်းဆီးနေကြသည်။

"အသုံးမကျတဲ့ကောင်တွေ အားလုံး အသုံးမကျဘူး သေလုမြောပါး ဖြစ်နေတဲ့လူကိုတောင် မသတ်နိုင်ကြဘူးလား" ယုလင်လုံက ရှောင်ချီ ကို ခေါ်ပြီး ထွက်ပြေးသွားသည်ကို မြင်လိုက်ရသောအခါ ယဲ့ဖန်မှာ ချက်ချင်းပင် ဒေါသတကြီး ပေါက်ကွဲသွားတော့သည်။

"အစ်ကိုကျိရှုး မင်း အရင်ပုန်းနေလိုက်ပါ။ ငါ လူတွေကို ခေါ်ပြီး ရှောင်ချီကို ကြားဖြတ်သတ်ဖို့ သွားလိုက်ဦးမယ်" ယဲ့ဖန်က ချောင်ကျိရှုးကို တစ်ချက်ကြည့်လိုက်ပြီး ခါးမှ ဓားရှည်ကို ဆွဲထုတ်ကာ လေထဲသို့ လျင်မြန်စွာ ပျံတက်သွားသည်။

ချောင်ကျိရှုးသည် သူ၏ရှေ့မှ ယဲ့ဖန် ပျောက်ကွယ်သွားသည်ကို ကြည့်ရင်း မျက်မှောင် အနည်းငယ် ကြုတ်လိုက်သည်။

"ယဲ့ဖန်... ယဲ့ဖန် အခုကစပြီး ငါ့မှာ မင်းကို ချုပ်ကိုင်ဖို့ အချက်အလက်တစ်ခုရပြီ မင်းရဲ့ ကျင့်စဉ်နဲ့ ပါရမီက တကယ့်ကို အားကျစရာပဲ။ ဒီနေ့ကစပြီး မင်းက ငါ့လက်ထဲက ဓားတစ်လက် ဖြစ်လာစေရမယ်"

ချောင်ကျိရှုးက သူ၏ နှုတ်ခမ်းကို လျှာဖြင့် သပ်လိုက်ပြီးနောက် သူ၏ ယုံကြည်ရသော နောက်လိုက်အချို့နှင့်အတူ ထိုနေရာမှ ထွက်ခွာသွားတော့သည်။

...

"အကြီးအကဲ ကျွန်မတို့လည်း ရှောင်ချီကို ကြားဖြတ် ဖမ်းဖို့ သွားသင့်သလား" အနောက်ဘက် အနည်းငယ်ဝေးသော စခန်းတွင်နတ်မိမယ်လင်းယွင်သည်လည်း သူမ၏ ဝိညာဉ်အာရုံကို အသုံးပြုကာ စစ်မြေပြင်မှ အခြေအနေကို စောင့်ကြည့်နေသည်။

တစ်ချိန်တည်းမှာပင် ယဲ့ဖန် လုပ်ဆောင်နေသော အစီအစဉ်လေးကိုလည်း သူမ သတိပြုမိလိုက်သည်။

"မလိုပါဘူး ပွဲကြည့်နေရုံပဲ" လင်ယွင်က တည်ငြိမ်စွာ ပြောလိုက်သည်။

သူမ၏ တပည့်အချို့က သူမကို သစ္စာဖောက်သွားကတည်းက လင်ယွင်သည် သူမ၏ ကိုယ်ပိုင်အင်အားကို တည်ဆောက်ရန် စဉ်းစားနေခဲ့သည်။ ထို့ကြောင့် မကြာသေးမီက သူမသည် သူမ၏ဘက်သို့ အကြီးအကဲ အများအပြားကို စည်းရုံးထားနိုင်ခဲ့သည်။

"ဒါပေမဲ့ အကြီးအကဲက ရှောင်ချီရဲ့ မျက်နှာသာပေးမှုကို ပြန်ရချင်တာ မဟုတ်ဘူးလား အခု သူ့ကိုကယ်လိုက်ရင် သူ့ရဲ့ စိတ်ကို ပြောင်းလဲအောင် လုပ်နိုင်မှာ သေချာပါတယ်"

သူမ၏ဘေးမှ အကြီးအကဲက လင်ယွင်ကို နားမလည်သလို ကြည့်လိုက်မိသည် သူမ၏ လုပ်ရပ်နောက်ကွယ်မှ နက်ရှိုင်းသော အဓိပ္ပာယ်ကို သဘောမပေါက်နိုင် ဖြစ်နေခြင်းပင်။

ယောက်ျားတွေဆိုတာ အားကိုးလို့ မရဘူး။ သူတို့ရဲ့ ခွင့်လွှတ်မှုကို တောင်းခံနေတာထက် ကိုယ့်ဘာသာကိုယ် ပြန်လည် ကုစားတာက ပိုကောင်းတယ်

ယဲ့ဖန်ဖြစ်ဖြစ် ရှောင်ချီဖြစ်ဖြစ် အခုကစပြီး သူတို့ နှစ်ယောက်လုံးက ငါ့ရဲ့နယ်ရုပ်တွေပဲ

ရှောင်ချီက ငါ့ရဲ့နယ်ရုပ်ဖြစ်ဖို့ အရည်အချင်း ရှိမရှိ ဆိုတာကတော့ သူဒီဘေးဒုက္ခကနေ အသက်ရှင် လွတ်မြောက်နိုင်မလား ဆိုတဲ့အပေါ်မှာပဲ မူတည်တယ်။

ဒီလို အသက်အန္တရာယ်ရှိတဲ့ အကျပ်အတည်းကိုတောင် မကျော်လွှားနိုင်ရင် ဒီလို အမှိုက်ကောင်ကို ငါက ဘာအတွက် သုံးရမှာလဲ။

လင်ယွင်နတ်မိမယ်သည် ရှေ့တန်းမှ တိုက်ပွဲကို သူမနှင့် မသက်ဆိုင်သည့် အရာတစ်ခုကဲ့သို့ အေးအေးဆေးဆေး ကြည့်နေသည်။

"အကြီးအကဲချုပ်က တကယ့်ကို ပညာရှိတာပဲ" လင်ယွင်၏ စကားကို ကြားသောအခါ ထိုအကြီးအကဲမှာ ခဏမျှ ကြောင်သွားသော်လည်း နောက်တစ်ခဏတွင်တော့ မြှောက်ပင့်စကား ပြောရန် မမေ့ခဲ့ပေ။

ဤအကြီးအကဲချုပ်၏ အတွေးအခေါ်က တကယ့်ကို ထူးဆန်းလွန်းလှသည် တစ်ခါတစ်ရံတွင် သူမက အကြောင်းပြချက်မရှိဘဲ ယုံကြည်မှု လွန်ကဲနေတတ်သဖြင့် သူမ၏ လက်အောက်ငယ်သားများမှာပင် ဝေခွဲမရ ဖြစ်နေကြရသည်။

ယဲ့ဖန်နှင့် ရှောင်ချီကဲ့သို့ ထိပ်တန်း ပါရမီရှင်များက လင်ယွင်၏ နယ်ရုပ်များအဖြစ် နေချင်ကြပါ့မလား ဒါက စိတ်ကူးယဉ်လွန်းရာ မရောက်ဘူးလား။

သို့သော် ၎င်းမှာ သူတို့ကဲ့သို့ လက်အောက်ငယ်သားများ ဝင်ရောက် စီမံရမည့် ကိစ္စမဟုတ်သည်မှာလည်း အမှန်ပင်။

...

ဘုန်း... ယုလင်လုံသည် ဝိညာဉ်လှေငယ်လေးကို စစ်မြေပြင် အလယ်မှ လျင်မြန်စွာ ဖောက်ထွက်နိုင်ရန် အတတ်နိုင်ဆုံး ထိန်းကျောင်းနေသည်။ မကြာမီမှာပင် သူတို့ မြို့ပြင်သို့ ရောက်ရှိသွားပြီး အနောက်ဘက်သို့ အရှိန်အဟုန်ဖြင့် မောင်းနှင်သွားတော့သည်။

သို့သော် အားလုံး အဆင်ပြေသွားပြီ လွတ်မြောက်သွားပြီဟု ထင်လိုက်ချိန်မှာပင် ဝိညာဉ်လှေငယ်လေးကို ပြင်းထန်သော မှော်စွမ်းအား လှိုင်းတစ်ခုက ရုတ်တရက် ထိမှန်သွားသည်။ လှပသေသပ်လှသော ဝိညာဉ်လှေမှာ ချက်ချင်းပင် အစိပ်စိပ်အမွှာမွှာ ပျက်စီးသွားပြီး အတွင်းမှ လူများမှာလည်း အပြင်သို့ လွင့်ထွက်သွားကြတော့သည်။

"ဟားဟားဟား...ရှောင်ချီ... ရှောင်ချီ မင်း နောက်ဆုံးတော့ ငါ့လက်ထဲမှာ သေရမယ်လို့ ဘယ်တုန်းကမှ ထင်ခဲ့မှာ မဟုတ်ဘူး"

ရိုင်းစိုင်းပြီး မောက်မာသော အသံကြီးမှာ တောရိုင်းမြေပြင်တစ်ခုလုံးကို ပဲ့တင်ထပ်သွားသည်။

ချက်ချင်းဆိုသလိုပင် ယဲ့ဖန်သည် ရှောင်ချီ ယုလင်လုံတို့၏ ရှေ့တွင် ပေါ်လာပြီး သူ၏နောက်၌ ဝိညာဉ်ပြောင်းလဲခြင်းအဆင့်ရှိ ကျင့်ကြံသူ အများအပြား ပါဝင်လာသည်။

ရှောင်ချီမှာမူ သူ၏ ဒဏ်ရာများကို အတတ်နိုင်ဆုံး ပြန်လည် ကုစားရန် ကြိုးစားနေသည်။ သူ၏ ရင်ထဲမှ ဒေါသများက သူ၏ ခန္ဓာကိုယ်ကို လျင်မြန်စွာ ပြန်ကောင်းလာစေရန် အသည်းအသန် တောင့်တနေစေသည်။

သို့သော် အကာသက်သက်သာ ကျန်တော့သော ဤခန္ဓာကိုယ်ကို ပြန်လည် ပြုပြင်ရန်မှာ မလွယ်ကူပေ အချိန်ယူပြီး အားအင် ပြန်လည် စုဆောင်းရဦးမည် ဖြစ်သည်။

ဒါပေမဲ့ ယဲ့ဖန်ကတော့ သူ့ကို အဲ့ဒီအချိန်ပေးမှာ မဟုတ်ဘူးဆိုတာ ထင်ရှားနေပါတယ်။

"ယဲ့ဖန်... ဒါတွေအားလုံးကို မင်း စီစဉ်ထားတာပဲ မဟုတ်လား" ယခုအချိန်တွင် ရှောင်ချီမှာ အားအင် အချို့ ပြန်လည် ရရှိလာပြီ ဖြစ်သဖြင့် သူ၏ အသံမှာ အရင်ကလောက် မအားနည်းတော့ပေ။

မှန်တယ် ဒါတွေအားလုံးကို ငါစီစဉ်ခဲ့တာ။ အခုမှ ဒါကို သဘောပေါက်တာက နည်းနည်းတော့ နောက်ကျသွားပြီ မဟုတ်လား ရှောင်ချီမင်း ဘာလို့ ငါ့ကို အမြဲတမ်း ဆန့်ကျင်နေရတာလဲဆိုတာ ငါတကယ်ကို နားမလည်နိုင်ဘူး။

ငါ့ရဲ့ ပါရမီက အတိုင်းအဆ မရှိဘူး ငါ့ရဲ့ ကံတရားကလည်း ကောင်းကင်ဘုံနဲ့ တန်းတူပဲ။ မင်းလို သာမန်လူတစ်ယောက်က ငါ့ကို ဆန့်ကျင်တာက ကိုယ့်သေတွင်းကိုယ် တူးတာပဲ။

မင်းက မီးပုံထဲ တိုးဝင်တဲ့ ပိုးဖလံတစ်ကောင်လိုပဲ အခါခါ သေကြောင်းကြံနေတာ။

ယဲ့ဖန်က ရှောင်ချီကို ပုံပျက်ပန်းပျက် အမူအရာဖြင့် ကြည့်နေပြီး သူ၏ လေသံမှာ အလွန်ပင် အေးစက်လှသည်။

"ယဲ့ဖန်... မင်း ဒီနေ့ ငါ့ကို သတ်နိုင်မှာလား အကယ်၍ မသတ်နိုင်ခဲ့ရင်တော့ သုံးနှစ်အတွင်းမှာ မင်း သေချာပေါက် သေရမယ်လို့ ငါ ကတိပေးတယ်" ရှောင်ချီ၏ အသံမှာ ရဲ့ဖန်ထက်ပင် ပို၍ အေးစက်နေပြီး သူ၏ မျက်လုံးထဲမှ သတ်ဖြတ်လိုသော အငွေ့အသက်များမှာ အထင်အရှား ပေါ်လွင်နေသည်။

ဟီးဟီး... ရှောင်ချီ သေခါနီးဖြစ်နေတာတောင် မင်းက မောက်မာနေတုန်းပဲ။ မင်း အဲ့လို ပြောမှတော့ မင်းကို အသက်ရှင်လျက် လွှတ်ပေးလို့ မဖြစ်တော့ဘူးပေါ့။

ရှောင်ချီ၏ စကားကို ကြားသောအခါ ယဲ့ဖန်မှာ ဒေါသထွက်မသွားဘဲ သဘောတူသည့်ပုံစံဖြင့် ခေါင်းညိတ်လိုက်သည်။

"ယဲ့ဖန်... မိစ္ဆာစစ်တပ်က ငါတို့ရဲ့ နောက်နားတင် ရှိနေပြီ။ နင် အခု မပြေးရင် နောက်ကျသွားလိမ့်မယ်" ယုလင်လုံက ယိုင်တိုင်တိုင်ဖြင့် ထရပ်လိုက်ပြီး ရှောင်ချီ၏ ဘေးတွင် ရပ်ကာ လေးနက်သော လေသံဖြင့် ခြိမ်းခြောက်လိုက်သည်။

ဟားဟားဟား ငါက မိစ္ဆာမျိုးနွယ်တွေကို ကြောက်နေမယ်လို့ ထင်နေတာလား ဒီနေ့ ငါ ရှောင်ချီကို သတ်မယ့်အပြင် နင်တို့ နှစ်ယောက်လုံးကိုလည်း ငါ့ရဲ့ မယားငယ်တွေအဖြစ် သိမ်းပိုက်ဦးမှာ။

ဒီလောက် လှပပြီး အနှိုင်းမဲ့တဲ့ မိန်းကလေး နှစ်ယောက်က ငါ့ကို မကြိုက်ဘူးဆိုတာ ကောင်းကင်က ပေးတဲ့ လက်ဆောင်တွေကို ဖြုန်းတီးပစ်တာပဲ။

ယဲ့ဖန်က ယုလင်လုံနှင့် နင်းယိုဝေတို့ကို ကြည့်ကာ ရန်စသော လေသံဖြင့် ပြောလိုက်သည်။

အစ်မလင်လုံ... အစ်မ သူ့ကို ခေါ်ပြီး အရင်သွားလိုက်ပါ။ ဒီလူယုတ်မာကို ကျွန်မ တားထားလိုက်မယ်။

နင်းယိုဝေ၏ ပန်းရောင် လက်သီးဆုပ်လေးများမှာ တင်းကျပ်သွားပြီး ယုလင်လုံ၏ ဘေးသို့ ရောက်လာကာ ယဲ့ဖန်ကို ဒေါသတကြီး ကြည့်လိုက်သည်။

စကားပြောနေစဉ်မှာပင် သူမသည် လက်ထဲမှ ဓားရှည်ကို မြှောက်ကာ ယဲ့ဖန်ဆီသို့ ပြေးဝင်သွားတော့သည်။

နင်းယိုဝေ၏ ပါရမီနှင့် အစွမ်းမှာ အတော်လေး ကောင်းမွန်လှပြီး ယုလင်လုံနှင့် များစွာ မကွာခြားပေ။ သူမ၏ တစ်ခုတည်းသော အားနည်းချက်မှာ ယုလင်လုံထက် အသက် အများကြီး ငယ်နေခြင်း ဖြစ်သည်။

ဒါတောင်မှ သူမ၏ ကျင့်စဉ်မှာ ဝိညာဉ်ပြောင်းလဲခြင်း အဆင့်သို့ ရောက်ခါစပဲ ရှိပါသေးသည်။

ဤကျင့်စဉ်အဆင့်မှာ ကျင့်ကြံခြင်းလောကတွင် အတော်လေး ထင်ရှားလှသော်လည်း ၎င်းမှာ မည်သူနှင့် နှိုင်းယှဉ်သနည်း ဆိုသည့်အပေါ်တွင် မူတည်သည်။ သာမန်ကျင့်ကြံသူများနှင့် နှိုင်းယှဉ်ပါက သူမက သာလွန်သော်လည်း ယဲ့ဖန်ကဲ့သို့ ထိပ်တန်း ပါရမီရှင်နှင့် နှိုင်းယှဉ်ပါကတော့ အားနည်းနေသေးသည်မှာ အမှန်ပင်။

ပုစွပ်... တစ်ကွက်တည်းမှာတင် နင်းယိုဝေ၏ ရင်ဘတ်ကို ယဲ့ဖန်၏ လက်ဝါးက ပြင်းထန်စွာ ထိမှန်သွားသည်။ သွေးတစ်လုတ် ထွေးလိုက်ပြီးနောက် သူမသည် မီတာပေါင်းများစွာ နောက်သို့ လွင့်စင်သွားပြီး ခက်ခက်ခဲခဲ ပြန်လည် ဟန်ချက်ထိန်းလိုက်ရသည်။

ယဲ့ဖန်သည် အခွင့်အရေးကို အသုံးချပြီး ယုနုဂိုဏ်းမှ အလှနတ်သမီး နှစ်ပါးကို တစ်ပြိုင်နက်တည်း ဖမ်းဆီးရန် ပြင်လိုက်သည်။

ရွှမ်း... ဓားလက်ညှိုး တစ်ချက်က ကောင်းကင်ကို ခွဲထုတ်ပြီး ယဲ့ဖန်၏ နှလုံးသားကို တိုက်ရိုက် ဖောက်ထွက်သွားသည်။

ယဲ့ဖန်သည် ဤထူးဆန်းသော တိုက်ခိုက်မှုကြောင့် မီတာ ရာနှင့်ချီ၍ နောက်သို့ လွင့်စင်သွားပြီး ကျောက်တောင်ကြီး တစ်ခုကို ပြင်းထန်စွာ ရိုက်မိသွားတော့သည်။

ရှောင်ချီသည် ခက်ခဲစွာဖြင့် ထိုင်လိုက်ပြီး သူ၏ မျက်လုံးထဲတွင် နက်ရှိုင်းသော နာကျည်းမှုများ တောက်လောင်နေသည်။

"အားလုံး ထွက်သွားကြစမ်း" ကျန်ရှိနေသော ဝိညာဉ်ပြောင်းလဲခြင်း အဆင့်ရှိ ကျင့်ကြံသူ အများအပြားကို ရှောင်ချီက ဟောက်လိုက်သည်။

ကျန်ရှိနေသော ကျင့်ကြံသူများသည် ရှောင်ချီကို လှမ်းကြည့်လိုက်ကြပြီး ကြောက်လန့်တကြား ငြိမ်သက်သွားကြသည်။

 ခုနက တိုက်ခိုက်မှု၏ နည်းပညာနှင့် စွမ်းအားမှာ သူတို့၏ နားလည်နိုင်စွမ်းထက် ကျော်လွန်နေသည်။

၎င်းမှာ တရားဓမ္မ နှင့် အလွန်ပင် နီးစပ်လှသော တိုက်ခိုက်မှု ဖြစ်ပြီး ဤဝိညာဉ်ပြောင်းလဲခြင်း အဆင့်ငယ်လေးများ နားမလည်နိုင်သော တိုက်ခိုက်မှုမျိုး ဖြစ်သည်။

ရှောင်ချီက ဟန်ရေးပြနေခြင်း ဟုတ်မဟုတ်ကိုပင် သူတို့ မစဉ်းစားရဲတော့ဘဲ နောက်တစ်ခဏမှာပင် အနောက်သို့ ပြန်လှည့်ပြေးကြပြီး သေလုမြောပါး ဖြစ်နေသော ယဲ့ဖန်ကို ခေါ်ကာ အမြန် ဆုတ်ခွာသွားကြပါတော့သည်။