အခန်း (၁၁၉) လင်ယွင်နှင့် ယဲ့ဖန်တို့ စစ်မြေပြင်မှ ထွက်ပြေးခြင်း

"ငါသွားပြီး သူ့ကို တားလိုက်မယ် ငါသာ တိုက်ပွဲမှာကျဆုံးသွားခဲ့ရင် မင်းတို့က ငါ့နေရာကို ဆက်ခံကြရမယ် ဘာပဲဖြစ်ဖြစ် မိစ္ဆာတွေကို ငါတို့မြို့ရိုးရဲ့ တစ်လှမ်းတောင် ကျော်ခွင့် မပေးရဘူး" ရွှေရောင်ချပ်ဝတ် စစ်သူကြီး သည် သူ၏လက်ထောက်စစ်ဗိုလ်များကို တစ်ချက်ကြည့်လိုက်ပြီးနောက် လက်နက်စင်ပေါ်မှ လှံရှည်တစ်လက်ကို ဆွဲယူကာ စစ်ဌာနချုပ်တဲကြီးထဲမှ ထွက်ခွာသွားတော့သည်။

ဤရွှေရောင်ချပ်ဝတ် စစ်သူကြီးမှာ မဟာဝေနိုင်ငံမှ စေလွှတ်လိုက်သော အမြင့်ဆုံးစစ်သေနာပတိ ချန်ရှင်းဟိုင်ပင် ဖြစ်သည်။

သူသည် လွန်ခဲ့သော ဆယ်နှစ်ကတည်းကပင် ဝိညာဥ်ခန္ဓာပေါင်းစည်းခြင်းအဆင့်သို့ တက်လှမ်းနိုင်သူဖြစ်သော်လည်း နယ်စပ်ကို ဆက်လက်စောင့်ရှောက်ရန်အတွက် သူ၏ ကျင့်စဉ်အဆင့်ကို ဆယ်နှစ်တိတိ ဖိနှိပ်ထားခဲ့ခြင်း ဖြစ်သည်။

အကယ်၍ ဤလူများထဲတွင် မိစ္ဆာဗိုလ်ချုပ်ကို ရင်ဆိုင်နိုင်သူရှိသည်ဆိုပါက ၎င်းမှာ ရွှေရောင်ချပ်ဝတ် စစ်နတ်ဘုရား ချန်ရှင်းဟိုင် တစ်ဦးတည်းသာ ရှိပေလိမ့်မည်။

"ဗိုလ်ချုပ် မသွားပါနဲ့"

"ဟုတ်ပါတယ် ဗိုလ်ချုပ် ဗိုလ်ချုပ်က ကျွန်တော်တို့ရဲ့ပင်မကျောရိုးပဲ။ ဗိုလ်ချုပ် တစ်ခုခုဖြစ်သွားရင် ကျွန်တော်တို့ ဘယ်လိုလုပ်ကြမလဲ"

လက်ထောက်စစ်ဗိုလ် အများအပြားမှာ ချန်ရှင်းဟိုင်၏ ရှေ့တွင် ပိတ်ရပ်ကာ တားဆီးရန် ကြိုးစားကြသည်။

"အားလုံး ဖယ်ကြစမ်း" ချန်ရှင်းဟိုင်က သူ၏ လှံရှည်ကို ဝေ့ယမ်းလိုက်ရာ သူတို့ကို လွင့်ထွက်သွားစေသည်။

ဤလက်ထောက်စစ်ဗိုလ် အများစုမှာ သာမန် ဟင်းလင်းပြင်ပြန်လည်ရောက်ရှိခြင်းအဆင့်များသာ ဖြစ်သဖြင့် ချန်ရှင်းဟိုင်၏ တစ်ချက်တည်းသော တိုက်ခိုက်မှုကိုပင် မခုခံနိုင်ကြပေ။

ညီအစ်ကိုတို့ အကယ်၍ စစ်သူကြီးသာ ကျဆုံးသွားရင်မြို့ကတော့ ပျက်စီးမှာ အသေအချာပဲ ကျွန်တော်တို့လည်း ဒီအတိုင်း ထိုင်စောင့်နေလို့ မရတော့ဘူး။ စစ်သူကြီးနောက်ကို လိုက်ပြီး အသေခံ တိုက်ကြရအောင်။

ဤလက်ထောက်စစ်ဗိုလ်များသည် သေမှာ ကြောက်ကြသော်လည်း သူရဲဘောကြောင်သူများတော့ မဟုတ်ကြပေ။ စစ်မြေပြင်တွင် ဆယ်စုနှစ်တစ်ခုကျော် ဖြတ်သန်းလာခဲ့သူများပီပီ လိုအပ်သော သတ္တိဗျတ္တိတော့ ရှိကြသေးသည်။

...

ပုစွပ်... လှံတစ်ချက်က အသားထဲသို့ ထိုးဖောက်ဝင်ရောက်သွားသံနှင့်အတူ ဝိညာဉ်ဓားဂိုဏ်းဝူချန်းတောင်၏ တောင်သခင် လင်းဖုန်း ၏ ရင်ဘတ်မှာ လှံဖြင့် အထိုးခံလိုက်ရသည်။

ဝိညာဉ်ဓားဂိုဏ်းမှ အသေခံတပ်ရင်း အများစုလည်း တိုက်ပွဲတွင် ကျဆုံးကုန်ကြပြီဖြစ်ပြီး မိစ္ဆာစစ်တပ်မှာ မြို့ရိုးနှင့် မီတာ တစ်ရာပင် မဝေးတော့ပေ။

လင်ယွင်နတ်မိမယ်သည် အောက်ဘက်ရှိ အခြေအနေကို ကြည့်ကာ မျက်မှောင်ကြုတ်လိုက်ပြီး အမိန့်တစ်ခုကို သာမန်ကာလျှံကာ ပေးလိုက်သည် "အားလုံး အခုချက်ချင်း ဆုတ်ခွာကြမယ်"

"မင်း ရူးနေတာလား ငါတို့သာ ဆုတ်လိုက်ရင် ငါတို့ဘေးက မဟာမိတ်တပ်တွေ ဘယ်လိုမှ တောင့်ခံနိုင်မှာမဟုတ်ဘူး ငါတို့ စောင့်နေတဲ့ မြို့ရိုးအပိုင်းက ဟာကွက်ဖြစ်သွားပြီး မိစ္ဆာတွေ ချက်ချင်း ကျော်တက်လာလိမ့်မယ်"

"ရှင်နေချင်ရင်တော့ ရှင့်လူတွေနဲ့ နေခဲ့လိုက်ပေါ့။ ငါ့နောက်လိုက်ချင်တဲ့သူတွေ အားလုံး မြို့ထဲကနေ အရင်ဆုတ်ကြမယ်။ အနောက်ဘက် သုံးမိုင်အကွာမှာ စခန်းချမယ်" လင်ယွင်က ယဲ့ဖန်ကို တစ်ချက်ကြည့်ကာ လျစ်လျူရှုလိုက်ပြီး ဆုတ်ခွာရန်သာ ဆက်လက် ပြောဆိုနေသည်။

ယဲ့ဖန်က သွားကြိတ်လိုက်ပြီး မြို့ရိုးပေါ်တွင် ကျန်ရှိနေသေးသော ဝိညာဉ်ဓားဂိုဏ်း တပည့် သုံးဆယ်ကျော်ကို ကြည့်ကာ အားကိုးရာမဲ့စွာ သက်ပြင်းချလိုက်သည်"ဆုတ်ကြမယ် တောင်စိမ်းကြီးရှိနေသရွေ့ ထင်းအတွက် ပူစရာမလိုဘူး" ယဲ့ဖန်၏ အမိန့်နှင့်အတူ နောက်ဆုံးကျန်ရှိနေသော ဝိညာဉ်ဓားဂိုဏ်း တပည့် ၃၀၀ ခန့်သည်လည်း မြို့ရိုးပေါ်မှ ဆုတ်ခွာသွားကြတော့သည်။

ဘုန်း... မိစ္ဆာမျိုးနွယ်မှ ဗိုလ်မှူးငယ်တစ်ဦးသည် ဤမြို့ရိုးအပိုင်းတွင် လူမရှိတော့သည်ကို မြင်လိုက်ရသည်။ သူသည် အခွင့်အရေးကို ချက်ချင်းအရယူကာ မိစ္ဆာစစ်သည် ၃၀၀ နှင့် မိစ္ဆာသားရဲများကို ဦးဆောင်၍ မြို့ရိုးပေါ်သို့ တက်လာတော့သည်။

"သူတို့ကို တားကြ" ဝိညာဉ်ဓားဂိုဏ်း၏ ဘေးပတ်ပတ်လည်တွင် အလတ်တန်းစား ဂိုဏ်းသုံးဂိုဏ်းနှင့် အင်အား ၅,၀၀၀ ရှိသော မဟာဝေနိုင်ငံ တပ်ရင်းတစ်ခု ရှိနေသည်။

သို့သော် မိစ္ဆာမျိုးနွယ်များ မြို့ရိုးပေါ် တက်လာသည်ကို မြင်သောအခါ အမြဲတမ်း အနှိမ်ခံနေရသော ထိုသာမန်ဂိုဏ်းတပည့်များနှင့် နယ်စပ်စောင့်တပ်သားများသည် နောက်ဆုတ်မသွားကြပေ။

ထိုအစား သူတို့သည် မိစ္ဆာစစ်သည်များနှင့် သားရဲများကို ပြန်လည်မောင်းထုတ်ရန် ပြတ်ပြတ်သားသား ရှေ့သို့ တိုးဝင်တိုက်ခိုက်ကြသည်။

သို့သော်လည်း ကြမ်းတမ်းလှသော ထိုမိစ္ဆာစစ်သည်များနှင့် ယှဉ်လျှင် သူတို့၏ အင်အားမှာ အလွန်ပင် သေးငယ်လွန်းလှသည်။

သူတို့သည် အမွှေးတိုင်တစ်တိုင် ကုန်ဆုံးချိန်ပင် မရှိဘဲ အားလုံးသတ်ဖြတ်ခြင်း ခံလိုက်ရသည်။

မြို့ရိုး၏ ကာကွယ်ရေးတွင် ဟာကွက်ကြီးတစ်ခု ချက်ချင်း ဖြစ်ပေါ်သွားပြီး ထိုနေရာမှတစ်ဆင့် မိစ္ဆာစစ်တပ် အမြောက်အမြား မြို့ထဲသို့ စီးဝင်လာကြတော့သည်။

...

ဖူး... စစ်မြေပြင်တွင် မိစ္ဆာဗိုလ်ချုပ်နှင့် ဆယ်ကြိမ်မက တိုက်ခိုက်ပြီးနောက် ရွှေရောင်ချပ်ဝတ် စစ်သူကြီး ချန်ရှင်းဟိုင်မှာ လွင့်ထွက်သွားပြီး သွေးတစ်လုတ် ထွေးထုတ်လိုက်ရသည်။

"သတင်းပို့ပါတယ် ဗိုလ်ချုပ် အခြေအနေ မကောင်းတော့ပါဘူး မြို့ရိုးရဲ့အပိုင်းတစ်ခု ကျသွားပါပြီ မိစ္ဆာစစ်တပ်တွေက မြို့ထဲကို ဝင်တိုက်နေကြပါပြီ" စစ်သည်တစ်ဦးမှာ ချန်ရှင်းဟိုင်၏ ဘေးသို့ ထိတ်လန့်တကြား ပြေးလာပြီး အလောတကြီး သတင်းပို့သည်။

မင်း ဘာပြောလိုက်တာလဲ ဒါက ဘယ်လိုလုပ် ဖြစ်နိုင်မှာလဲ။

ဖူး......

ချန်ရှင်းဟိုင်သည် သတင်းပို့သူကို မယုံနိုင်သလို ကြည့်ရင်း နောက်ထပ် သွေးတစ်လုတ် ထပ်မံ ထွေးထုတ်လိုက်ပြန်သည်။

သူသည် မြို့ရိုးကာကွယ်ရေးကို ဂိုဏ်းတစ်ခုချင်းစီနှင့် တပ်ရင်းတစ်ခုချင်းစီ၏ အင်အားပေါ် မူတည်ပြီး တိတိကျကျ ချထားခဲ့ခြင်း ဖြစ်သည် အကယ်၍ ကျရှုံးခဲ့လျှင်တောင် ဤမျှ မြန်မြန်ဆန်ဆန် မဖြစ်သင့်ပေ။

"ဝိညာဉ်ဓားဂိုဏ်းကကျင့်ကြံသူ ၂၀၀ ကျော်ဟာ အကြီးအကဲချုပ် လင်ယွင်နတ်မိမယ်နဲ့ ဂိုဏ်းချုပ်ယဲ့ဖန်တို့ရဲ့ ဦးဆောင်မှုနဲ့ မြို့ထဲကနေ ဆုတ်ခွာသွားကြပါပြီ" စစ်သူကြီး၏ ဇဝေဇဝါ ဖြစ်နေသော အမူအရာကို မြင်သဖြင့် သတင်းပို့သူက ထပ်မံ တုန်တုန်ရင်ရင်ဖြင့် သတင်းပို့သည်။

ဘာ အဲ့ဒီ သူရဲဘောကြောင်တဲ့ အကောင်တွေ အဲ့ဒီယဲ့ဖန်က သူရဲကောင်းဆို မိစ္ဆာစစ်သည် ၃၀၀ ကို အပြတ်ရှင်းခဲ့တဲ့ နတ်ဘုရားနန်းတော်ရဲ့ သူရဲကောင်းဆို တကယ့်တိုက်ပွဲ စတာနဲ့ ထွက်ပြေးတယ်ဆိုတော့ ဘာသူရဲကောင်းလဲဟ။

ငါသာ ဒီတိုက်ပွဲကနေ အသက်ရှင်ခဲ့ရင် ဝိညာဉ်ဓားဂိုဏ်းဆီကို သွားပြီး သူတို့ဆီက အဖြေတောင်းရမယ်။

ရွှေရောင်ချပ်ဝတ် စစ်သူကြီး ချန်ရှင်းဟိုင်သည် လက်သီးကို တင်းတင်းဆုပ်လိုက်ရာ အဆစ်များမှ မြည်သံများ ထွက်ပေါ်လာသည်၊ သူ၏ ဒေါသမှာ ပေါက်ကွဲထွက်လုနီးပါး ဖြစ်နေသည်။

"အိမ်မက် မက်မနေပါနဲ့ မင်းတို့ အားလုံး ဒီနေ့ ဒီမှာပဲ အသေခံရမှာ" ဆယ်မီတာကျော် မြင့်မားသော ဧရာမ သတ္တဝါကြီးတစ်ကောင်သည် ချန်ရှင်းဟိုင်၏ ရှေ့တွင် ရုတ်တရက် ပေါ်လာသည်။

"မိစ္ဆာဗိုလ်ချုပ် မင်းက ငါတို့ လူသားမျိုးနွယ်ကို ဖျက်ဆီးချင်တာလား မင်းမှာ အရည်အချင်း မရှိသေးပါဘူး" ချန်ရှင်းဟိုင်က သူ၏ လှံရှည်ကို ဝေ့ယမ်းလိုက်ရာ ခန့်ညားထည်ဝါသော ဝိညာဉ်စွမ်းအား လှိုင်းတစ်ခု မိစ္ဆာဗိုလ်ချုပ်ဆီသို့ ပြေးဝင်သွားသည်။

ဒေါင်... သို့သော် မိစ္ဆာဗိုလ်ချုပ်က ထိုတိုက်ခိုက်မှုကို အလွယ်တကူပင် ပယ်ဖျက်လိုက်သည်။

ငါဝန်ခံရမယ် မင်းက ဟိုအမှိုက်တွေနဲ့တော့ ကွာခြားပါတယ်။ ငါ့ရဲ့ တိုက်ခိုက်မှု ဆယ်ကြိမ်ကျော်ကို အဆင့်တူချင်းမှာ တောင့်ခံနိုင်တာဟာ ဂုဏ်ယူစရာပဲ ဒါပေမဲ့ အခုတော့ အားလုံး ပြီးဆုံးသွားပါပြီ။

မိစ္ဆာဗိုလ်ချုပ်၏ လက်ဖဝါးမှ မိစ္ဆာအငွေ့အသက်များ ထွက်ပေါ်လာသည် မည်းမှောင်နေသော မိစ္ဆာအငွေ့အသက်များသည် မှောင်မိုက်နေသော ညထဲတွင် ပျော်ဝင်သွားပြီး တစ်ညလုံးနှင့် တစ်သားတည်း ဖြစ်သွားတော့သည်။

စုတ်... ချန်ရှင်းဟိုင်သည် သူ၏ ဘယ်ဘက်လက်မောင်းမှာ ဧရာမ အားတစ်ခုဖြင့် ဆွဲဖြတ်ခံလိုက်ရသည်ဟု ရုတ်တရက် ခံစားလိုက်ရပြီးနောက် သူ၏ဘယ်ဘက်လက်မောင်း တစ်ခုလုံးသည် သွေးမြူများအဖြစ် ပေါက်ကွဲထွက်သွားတော့သည်။

ရှူး... သို့သော် မိစ္ဆာဗိုလ်ချုပ်က အောင်နိုင်သူအမူအရာဖြင့် နောက်ထပ် တိုက်ခိုက်ရန် ပြင်နေစဉ်မှာပင် လှံရိပ်တစ်ခုက သူ၏ ကျောကုန်းထဲသို့ နက်ရှိုင်းစွာ ထိုးဝင်သွားသည်။

ပုစွပ်... လှံဖြင့် ထိုးခံလိုက်ရသဖြင့် မိစ္ဆာဗိုလ်ချုပ်သည် ယိုင်သွားပြီး စိမ်းပုပ်ရောင် သွေးတစ်လုတ် ထွေးထုတ်လိုက်ရသည်။

"ဒါ ဘယ်လိုလုပ် ဖြစ်နိုင်မှာလဲ မင်းဒါကို ဘယ်လို လုပ်လိုက်တာလဲ" မိစ္ဆာဗိုလ်ချုပ်သည် ဒေါသတကြီး ဟောက်ရင်း သေလုမြောပါး ဖြစ်နေသော ချန်ရှင်းဟိုင်ကို မယုံနိုင်သလို ကြည့်ကာ မေးလိုက်သည်။

"ငါက ဟင်းလင်းပြင်နည်းပညာအချို့ကို သိထားလို့ပါ စောစောကနေ အခုအထိ ငါ အားနည်းချင်ယောင် ဆောင်နေတာက ဒီလို အသေအလဲ တိုက်ခိုက်မှုတစ်ခုအတွက်ပဲ

တကယ်ကိုနှမြောစရာပဲ မင်းတို့ မိစ္ဆာမျိုးနွယ်တွေက တကယ်ကို အသားထူတာပဲ။ ဒီလို တိုက်ခိုက်မှုတောင် မင်းရဲ့ နှလုံးသားကို မဖောက်နိုင်ခဲ့ဘူး"

မြေပြင်ပေါ်က သွေးမြူတွေကို ကြည့်ရင်း ချန်ရှင်းဟိုင်က နောင်တရစွာ ပြောလိုက်သည်။

"ကောင်းပြီ ကောင်းပြီ ကောင်းပြီ မင်းတို့ အောက်တန်းစားလူသားတွေ ငါ့ကို တကယ် ဒေါသထွက်အောင် လုပ်လိုက်တာပဲ။

ငါ့ရဲ့သူရဲကောင်းတို့ ငါ့နောက်ကို လိုက်ပြီး မြို့ကို သိမ်းကြစမ်း ငါတို့ကို တားတဲ့ လူသားမှန်သမျှ သတ်ပစ်ကြ  စားပစ်ရင်လည်းရတယ်။

မိစ္ဆာဗိုလ်ချုပ်က သူ၏ လက်ထဲမှ ဧရာမ လှံကြီးကို ဝေ့ယမ်းကာ အကျယ်ကြီး ဟောက်လိုက်သည်။

စောစောက တိုက်ခိုက်မှုက သူ့ကို အတော်လေး ဒဏ်ရာရစေခဲ့သည်မှာ မှန်သော်လည်း ၎င်းမှာ ဒဏ်ရာမျှသာ ဖြစ်ပြီး အသက်အန္တရာယ်မရှိပေ။

တစ်ဖက်တွင်မူ ချန်ရှင်းဟိုင်မှာ အားအင်ကုန်ခမ်းကာ သေလုမြောပါး ဖြစ်နေပြီ ဖြစ်သည်

မိစ္ဆာဗိုလ်ချုပ်၏ အမိန့်နှင့်အတူ မိစ္ဆာမျိုးနွယ်တို့၏ တိုက်စစ်မှာ ပို၍ ကြမ်းတမ်းလာတော့သည်။

...

ဘုန်း... ရှောင်ချီသည် မြားတစ်ရာလုံးကို ပစ်ပြီးနောက် မိစ္ဆာသားရဲ ၃၀ ခန့်နှင့် မိစ္ဆာ ၁၀၀ ကျော်ကို သတ်ဖြတ်နိုင်ခဲ့သည်။

သူက နောက်ထပ် မြားများ ထပ်ယူရန် ပြင်လိုက်စဉ်မှာပင် မိစ္ဆာမျိုးနွယ်များ မြို့ထဲသို့ ကျူးကျော်ဝင်ရောက်လာပြီ ဖြစ်ကြောင်း တွေ့လိုက်ရသည် မြို့ထဲရှိ အရန်တပ်ဖွဲ့များသည် မိစ္ဆာများကို အသေအလဲ ပြန်လည် တိုက်ခိုက်နေကြသည်။

သို့သော် အခြေအနေမှာ မကောင်းပေ အပြင်ဘက်မှ မိစ္ဆာများ အဆက်မပြတ် စီးဝင်နေပြီး မြို့ထဲရှိအရန်တပ်ဖွဲ့များမှာမူ တစ်ယောက်ပြီးတစ်ယောက် သတ်ဖြတ်ခြင်း ခံနေရသည်။