အခန်း (၁၁၅) မိစ္ဆာမျိုးနွယ်တို့၏ အသေခံလောင်းကြေး

လူသားမျိုးနွယ်နှင့် မိစ္ဆာမျိုးနွယ်တို့၏ ကြားတွင် မိုင်ပေါင်းရာနှင့်ချီ ရှည်လျားသော မြို့ရိုးကြီးတစ်ခုသည် အတားအဆီးအဖြစ် တည်ရှိနေသည်။

ဤရှည်လျားလှသော မြို့ရိုးကြီးမှာ လူသားနှင့် မိစ္ဆာတို့ကို ပိုင်းခြားထားသည့် သဘာဝအတိုင်း ဖြစ်ပေါ်နေသော ချောက်ကြီးတစ်ခုကဲ့သို့ပင်။

ယခုအခါ မျိုးနွယ်စုနှစ်ခုမှာ ထိပ်တိုက်ရင်ဆိုင်နေကြပြီဖြစ်သည်။ ဤမြို့ရိုးသည် အသက်ရှင်ခြင်းနှင့် သေဆုံးခြင်းကို ခွဲခြားထားသည့် မျဉ်းနီတစ်ကြောင်းကဲ့သို့ပင် ထိုမျဉ်းကို ကျော်ဖြတ်လိုက်သည်နှင့် အသက်ဇီဝိန်ချုပ်ငြိမ်းပြီး သေမင်းထံသို့ ရောက်ရှိသွားမည်ဟု အဓိပ္ပာယ်ရသည်။

ရှောင်ချီသည် မကြာမီမှာပင် ​ေကျာက်စိမ်းကညာဂိုဏ်းစောင့်ကြပ်ရသည့် မြို့ရိုးအပိုင်းသို့ ရောက်ရှိလာခဲ့သည်။

မြို့ရိုးမှာ အလွန်ရှည်လျားလှသဖြင့် အပိုင်းအလိုက် ခွဲခြားထားသည်။ ထိုအပိုင်းများကို ဂိုဏ်းကြီးခုနစ်ဂိုဏ်း၊ မဟာဝေနိုင်ငံ၊ အလတ်တန်းစားနှင့် ဂိုဏ်းငယ်များအပြင် တစ်ကိုယ်တော် ကျင့်ကြံသူများကပါ တာဝန်ယူ စောင့်ကြပ်ကြခြင်း ဖြစ်သည်။

မှန်ပါသည် တစ်ကိုယ်တော် ကျင့်ကြံသူများသည် မျိုးချစ်စိတ်တစ်ခုတည်းဖြင့် ဤနေရာကို စောင့်ကြပ်နေကြခြင်း မဟုတ်ပေ။

မဟာဝေနိုင်ငံသည် လွန်ခဲ့သော အချိန်ကတည်းကပင် ရန်သူကို သတ်ဖြတ်သည့် တစ်ကိုယ်တော် ကျင့်ကြံသူများအနေဖြင့် မိစ္ဆာသလင်းခဲများရရှိနိုင်ရုံသာမက သတ်လိုက်သည့် မိစ္ဆာတစ်ကောင်ချင်းစီအတွက်လည်း သတ်မှတ်ထားသည့် ဝိညာဉ်ကျောက်တုံးဆုလာဘ်များကို ထပ်မံ ရရှိမည်ဖြစ်ကြောင်း အတိအလင်း ကြေညာထားပြီးသား ဖြစ်သည်။

မိစ္ဆာသလင်းခဲများကိုယ်တိုင်က ဝိညာဉ်ကျောက်တုံးများနှင့် လဲလှယ်နိုင်ပြီး မဟာဝေနိုင်ငံကပါ ထပ်ဆင့်ဆုလာဘ်များ ပေးအပ်ခြင်းကြောင့် ဤနှစ်ထပ်ကွမ်း မက်လုံးမှာ သေဘေးကို ရင်ဆိုင်ရဲသည့် စစ်သည်တော်များစွာကို ဆွဲဆောင်နိုင်ခဲ့ခြင်းပင်။

ဘယ်တွေသွားနေတာလဲ စောစောက မင်းရဲ့ အိမ်ရာလေးဆီ သွားရှာတာ မရှိဘူး မင်း ကြောက်လွန်းလို့ ပုန်းနေပြီလို့တောင် ငါ ထင်နေတာ။

ရှောင်ချီက လင်ယုရှုကို ခေါ်ပြီး မြို့ရိုးပေါ်သို့ တက်လာသည့်အခါ ပုံရိပ်တစ်ခု အပြေးအလွှား ရောက်လာသည်။ ယုလင်လုံသည် ရှောင်ချီကို အလောတကြီး မေးမြန်းလိုက်ပြီး သူမ၏ အကြည့်မှာ ရှောင်ချီ၏ အနောက်ဘက်ဆီသို့ ခဏခဏ ရောက်သွားတတ်သည်။

လင်ယုရှုတွင် ကိုယ်ယောင်ဖျောက် အဆောင်လက်ဖွဲ့နှင့် အငွေ့အသက်ကို ဖုံးကွယ်ထားသည့် အထူးပြုလုပ်ထားသော အစီအရင်ပါရှိသည်။ သာမန်ကျင့်ကြံသူများအနေဖြင့် သူမကို ရှာဖွေတွေ့ရှိရန် ခက်ခဲလှသည် သူမကို အာရုံခံနိုင်သည့် အစွမ်းထက် ကျင့်ကြံသူများပင်လျှင် သူမကို ကျင့်စဉ်အဆင့်မရှိသလောက် နိမ့်ပါးသည့် ကျင့်ကြံသူလေးတစ်ဦးအဖြစ်သာ သတ်မှတ်ပြီး သတိမထားဘဲ ကျော်သွားကြမည် ဖြစ်သည်။

"စိတ်ကြည်လင်အောင် လမ်းခဏ ထွက်လျှောက်တာပါ ပထမဆုံးအကြိမ် ထွက်လျှောက်တာနဲ့ အခုလို အခြေအနေမျိုးနဲ့ တိုးမယ်လို့ မထင်ထားဘူး။ နောက်ခါကျရင်တော့ အပြင်မထွက်မိအောင် နေရတော့မယ် ထင်တယ်" ရှောင်ချီက စိတ်ပျက်လက်ပျက်ဖြင့် သက်ပြင်းချလိုက်သည်။

"ယုရှုကို ငါ့ဘေးမှာ ထားလိုက်ပါလား တိုက်ပွဲ တကယ်စပြီဆိုရင် မင်းသူမကို ဂရုစိုက်နိုင်မှာ မဟုတ်မှာ စိုးလို့" ယုလင်လုံက ရှောင်ချီ၏ နားနားသို့ ကပ်ကာ တိုးတိုးလေး ပြောလိုက်သည်။

"ရပါတယ် သူမကို ငါ့နောက်မှာပဲ ထားလိုက်မယ်။ ငါ သူမကိုကာကွယ်နိုင်ပါတယ် မင်းလည်း သတိထားနော်။ အကယ်၍ မင်းမနိုင်တဲ့ ရန်သူနဲ့ တွေ့ရင် ငါ့ဆီကိုသာ ခေါ်လာခဲ့လိုက်" ရှောင်ချီကလည်း သူမ၏ နားနားသို့ ကပ်ကာ ပြန်ပြောလိုက်သည်။

ယခုအကြိမ် ​ေကျာက်စိမ်းကညာဂိုဏ်းကို ဦးဆောင်လာသူမှာ ဝိညာဥ်ခန္ဓာပေါင်းစည်ခြင်းအဆင့်သို့ တစ်ဝက်တစ်ပျက် ရောက်ရှိနေသည့် အကြီးအကဲချုပ်ပင် ဖြစ်သည်။

သူမ၏ အစွမ်းမှာဂိုဏ်းအတွင်း၌ ဂိုဏ်းချုပ်၊ ဘိုးဘွားကြီးနှင့် အကြီးအကဲချုပ်တို့ပြီးလျှင် အစွမ်းအထက်ဆုံး ဖြစ်သည်။

လင်ကျူးတိုက်ကြီးတွင် ဝိညာဥ်ခန္ဓာပေါင်းစည်းခြင်းအဆင့် ကျင့်ကြံသူများသည် နျူကလီးယား လက်နက်များကဲ့သို့ပင် သူတို့ကို အလွယ်တကူ တိုက်ပွဲဝင်ခွင့် မပြုပေ။

ဤလူသားမိစ္ဆာ စစ်မြေပြင်တွင်ပင် တိုက်ပွဲမှာ အသေအကြေ အကျပ်အတည်း မဆိုက်မချင်း ဝိညာဥ်ခန္ဓာပေါင်းစည်းခြင်းအဆင့် ပညာရှင်များကို အလွယ်တကူ ထုတ်သုံးမည် မဟုတ်ပေ။

"မင်းတို့ နှစ်ယောက်က ဘယ်တုန်းက အဲ့ဒီလောက်တောင် ရင်းနှီးသွားတာလဲ" နင်ယိုဝေသည် ရှောင်ချီနှင့် ယုလင်လုံတို့၏ ဘေးသို့ ရောက်လာသည်။ သူမက တစ်ယောက်နှင့်တစ်ယောက် တိုးတိုးလေး ပြောနေသည့် သူတို့နှစ်ဦးကို ကြည့်ကာ အံ့သြတကြီး မေးလိုက်သည်။

"ဘယ်သူ... ဘယ်သူက သူ့နဲ့ ရင်းနှီးလို့လဲ" နင်ယိုဝေ၏ အသံကို ကြားလိုက်ရသည့်အခါ ယုလင်လုံမှာ အမြန် နောက်ဆုတ်လိုက်သည်။

သူမ၏ ပါးပြင်ပေါ်တွင် ရှက်သွေးဖြာနေသည်မှာ သိသာလှသည်။

သူတော်စင်မလေး နေမကောင်းလို့လား ဘာလို့ မျက်နှာက ဒီလောက်တောင် နီနေရတာလဲ ဖျားနေတာလား။

အချိန်ကလည်း မကောင်းလိုက်တာ မိစ္ဆာတွေ တိုက်ခိုက်လာတဲ့ အချိန်မှ လာဖျားရတယ်လို့။ ခဏနေရင် ငါ့အနောက်မှာပဲနေနော် မဟုတ်ရင် အန္တရာယ်ရှိနိုင်တယ်

နင်ယိုဝေက ယုလင်လုံ၏ ဘေးသို့ လျှောက်သွားပြီး သူမ၏ နူးညံ့လှသော လက်ကလေးဖြင့် ယုလင်လုံ၏ ပါးကို စမ်းကြည့်ကာ စိုးရိမ်တကြီး ပြောလိုက်သည်။

ဘယ်သူက ဖျားနေလို့လဲ ငါ ဘာမှမဖြစ်ဘူး အခု ငါအရမ်း နေကောင်းနေတယ်။ ငါ့ကို လာမထိနဲ့တော့ ထပ်ထိရင် ငါတကယ်စိတ်ဆိုးမှာနော်။

ယုလင်လုံမှာ လန့်သွားသည့် ကြောင်ပေါက်လေးတစ်ကောင်ကဲ့သို့ အနောက်သို့ အမြန် ခုန်ဆုတ်သွားတော့သည်။

မင်းက ဒီနေ့ တော်တော် ထူးဆန်းနေတာပဲ။ အရင်က လူသားမိစ္ဆာ စစ်မြေပြင်မှာ ငါတို့ ကင်းလှည့်တုန်းကတောင် မင်း အခုလိုမဖြစ်ဖူးပါဘူး။

နင်ယိုဝေက သူမ၏ မေးစေ့ကို ပွတ်ရင်း ယုလင်လုံကို သံသယရှိသော အမူအရာဖြင့် ကြည့်နေသည်။

အခုက အဲ့ဒီလို ကိစ္စသေးသေးလေးတွေကို စိတ်ပူနေရမယ့် အချိန်လား မိစ္ဆာစစ်တပ်ကြီးက ရောက်တော့မယ်လေ မြို့ရိုးအောက်ကိုပဲ အာရုံစိုက်သင့်တာ မဟုတ်ဘူးလား။

ထိုအမျိုးသမီးနှစ်ဦး၏ ကလေးကလား အပြုအမူများကို ကြည့်ရင်း ရှောင်ချီမှာ ခေါင်းခါလိုက်မိပြီး မြို့ရိုးအောက်ရှိ မည်းမှောင်နေသော မိစ္ဆာစစ်တပ်ကြီးကို လက်ညှိုးထိုးပြလိုက်သည်။

ရှောင်ချီ၏ စကားကို ကြားမှ ထိုအမျိုးသမီးနှစ်ဦးမှာ ငြိမ်သက်သွားကြသည်။ အမှန်အတိုင်း ပြောရလျှင် တိုက်ပွဲကြီး မစခင်မှာ စိတ်အပန်းဖြေလိုက်ခြင်းကလည်း မဆိုးလှပေ။

ယခုအချိန်တွင် မြို့ရိုးပေါ်ရှိ လူသားအများအပြားမှာ အလွန်အမင်း ထိတ်လန့်တုန်လှုပ်နေကြသည် တိုက်ပွဲပင် မစရသေးသော်လည်း စစ်မြေပြင်၏ အေးစက်လှသော သတ်ဖြတ်လိုစိတ်ကို ခံစားနေရပြီ ဖြစ်သည်။

"​ေကျာက်စိမ်းကညာဂိုဏ်း တပည့်များအားလုံး ငါ့အမိန့်ကို နာခံကြ နတ်စင်ဝိညာဉ်အဆင့်တပ်ရင်းခုနစ်ခု အမြုတေအဆင့်တပ်ရင်း ဆယ်တစ်ခု အသီးသီးသော တပ်ရင်းမှူးများ၏အမိန့်ကို နာခံကြ ရန်သူကို ရင်ဆိုင်တဲ့အခါ အစုအဖွဲ့လိုက်တိုက်ကြပါ တစ်ယောက်တည်း မတိုက်ကြနဲ့။

ပုံမှန်အားဖြင့် ငါတို့က မိစ္ဆာတွေရဲ့ မြို့သိမ်းတိုက်ပွဲကို အဆင့်သုံးဆင့်နဲ့ ကာကွယ်ရမယ်။

ပထမအဆင့်ကတော့ အဝေးပစ် ကျိန်စာတွေ တိုက်ခိုက်မှုတွေနဲ့ စတိုက်ရမယ် ဒုတိယအဆင့်ကတော့ အသေခံတပ်ရင်းတွေက မြို့တံခါးကနေ ထွက်ပြီး မိစ္ဆာတွေကို အသေအလဲ တိုက်ရမယ် တတိယအဆင့်ကတော့ အကယ်၍မိစ္ဆာတွေ မြို့ရိုးပေါ် တက်လာပြီဆိုရင်တော့ ကျင့်ကြံသူအားလုံး မြို့နဲ့အတူ အသေခံတိုက်ရတော့မယ်။

အကယ်၍ တတိယအဆင့်ထိ ရောက်သွားပြီဆိုရင် ငါတို့ရဲ့နယ်စပ်တစ်ဝက်လောက်ကို မိစ္ဆာတွေ သိမ်းပိုက်သွားပြီလို့ ပြောလို့ရတယ်။ မြို့ကိုဆက်ထိန်းထားနိုင်ဖို့ မျှော်လင့်ချက်ကလည်း အလွန်နည်းသွားလိမ့်မယ်။

ဒါကြောင့် အားလုံးက ပထမအဆင့်နှစ်ဆင့်မှာတင် အစွမ်းကုန် တိုက်ကြပါ တိုက်ပွဲမှာ သေသွားရင်တောင် မိစ္ဆာတစ်ကောင်ကိုမှ မြို့ထဲ ဝင်ခွင့်မပေးရဘူး။

​ေကျာက်စိမ်းကညာဂိုဏ်း၏ ဤနေရာမှ အမြင့်ဆုံး တပ်မှူးဖြစ်သူ အကြီးအကဲချုပ်က အောက်ဘက်ရှိ တပည့်များကို မိန့်ခွန်းပြောနေခြင်း ဖြစ်သည်။

ဤရှည်လျားလှသော မြို့ရိုးတစ်လျှောက်တွင် အလားတူ မြင်ကွင်းများကို နေရာအနှံ့ တွေ့မြင်နေရသည်။

ဂိုဏ်းတိုင်း၏ တပ်မှူးများနှင့် စစ်စခန်းတိုင်း၏ အရာရှိများသည် သူတို့၏ စစ်သည်များကို ဤတိုက်ပွဲအတွက် နောက်ဆုံး မိန့်ခွန်းများ ပြောကြားနေကြသည်။

ဤတိုက်ပွဲတွင် လူအများအပြား သေဆုံးနိုင်သည် အတွေ့အကြုံမရှိသေးသော စစ်သည်သစ်များ၏ မျက်လုံးထဲတွင်လည်း ဖော်မပြနိုင်သော ကြောက်ရွံ့မှုများ ရှိနေသည်။

သို့သော် သူတို့သည် ဂိုဏ်းကျင့်ကြံသူများ ဖြစ်စေ အင်ပါယာစစ်သည်များဖြစ်စေ တစ်ယောက်မှအနောက်သို့ မဆုတ်ကြပေ။

ဘာကြောင့်လဲဆိုတော့ သူတို့ရဲ့ အနောက်မှာ သူတို့ရဲ့အိမ်တွေ ရှိနေလို့ပါပဲ။ အကယ်၍ သူတို့သာ တစ်လှမ်းဆုတ်လိုက်ရင် သူတို့ ချစ်ရတဲ့သူတွေ သူတို့ရဲ့ ဂိုဏ်းတွေနဲ့ သူတို့ရဲ့ နိုင်ငံဟာ ဒီမိစ္ဆာတွေရဲ့ သတ်ဖြတ်မှုအောက်မှာ သွေးပင်လယ် ဝေသွားနိုင်လို့ပါပဲ။

တစ်ခုခုတော့ မှားနေပြီ ဘာလို့ မိစ္ဆာတွေက ဒီလောက်တောင် အများကြီး စုဝေးနေရတာလဲ အရင်က အသေးစား တိုက်ပွဲတွေမှာဆိုရင် မိစ္ဆာစစ်သည်နဲ့ သားရဲ ငါးသိန်းလောက်ပဲ လာတတ်တာ။

အခုကတော့ တစ်သန်းထက်တောင် ကျော်နေပြီ။ သူတို့ ငါတို့နဲ့ အသေအကြေ ဆုံးဖြတ်ချက်ချဖို့ ကြံနေတာလား။

​ေကျာက်စိမ်းကညာဂိုဏ်း၏ အကြီးအကဲချုပ်သည် ကျင့်ကြံသူများကို မိန့်ခွန်းပြောပြီးနောက် အောက်ဘက်ရှိ အခြေအနေကို စိုးရိမ်တကြီး ကြည့်လိုက်သည်။

အဆက်မပြတ် တိုးပွားလာနေသော မိစ္ဆာစစ်သည်နှင့် သားရဲများကို မြင်လိုက်ရသည့်အခါ သူမ၏ တည်ငြိမ်နေသော မျက်နှာမှာ ချက်ချင်းပင် လေးနက်သွားတော့သည်။

ဤအကြီးအကဲချုပ်သည် နယ်စပ်တွင် နှစ်ပေါင်းများစွာ နေထိုင်လာသူဖြစ်ပြီး တိုက်ပွဲတိုင်းကို နားလည်ထားသူ ဖြစ်သည်။

မိစ္ဆာမျိုးနွယ်များသည် အချိန်မရွေး တိုက်ခိုက်တတ်သော်လည်း သူတို့၏ တိုက်စစ်တစ်ခုချင်းစီတွင် ပုံသေနည်းရှိတတ်သည်။

အသေးစား တိုက်ပွဲများတွင် စစ်သည်အင်အား ငါးသောင်းထက် ပို၍ မသုံးတတ်ပေ။

မိစ္ဆာမျိုးနွယ်၏ သားရဲများနှင့် စစ်သည်များသည်လည်း လေထဲကနေပေါ်လာခြင်း မဟုတ်ပေ သူတို့လည်း အင်အား စုဆောင်းရသည်။

အချိန်အတော်များများတွင် သူတို့က အသေးစား စစ်ပွဲများကိုသာ ဆင်နွှဲတတ်ကြသည် ပျမ်းမျှအားဖြင့် ဆယ်နှစ်ကျော်မှ တစ်ကြိမ်သာ အကြီးစား စစ်ပွဲကြီးတစ်ပွဲကို ဆင်နွှဲတတ်ကြသည်။

သို့သော် အကြီးအကဲချုပ် မှတ်မိသလောက်ဆိုလျှင် နောက်ဆုံး အကြီးစား စစ်ပွဲကြီးမှာ လွန်ခဲ့သော သုံးနှစ်ကမှ ပြီးဆုံးခဲ့ခြင်း ဖြစ်သည် ဘာကြောင့် ဒီတစ်ခါမှာ မိစ္ဆာတွေက ဒီလောက် မြန်မြန် အင်အားပြန်စုပြီး နောက်ထပ် ကြောက်စရာကောင်းတဲ့ အကြီးစား တိုက်ပွဲကြီးတစ်ပွဲကို ဖော်ဆောင်နိုင်ရတာလဲ။