အခန်း (၁၁၁) အကြီးအကဲချုပ် နင်ချိုက်တဲ

သုံးရက်ကြာပြီးနောက်

မီတာရာနဲ့ချီ ရှည်လျားပြီး ဆယ်မီတာကျော် ကျယ်ဝန်းသော ဧရာမ ပျံသန်းရေးသင်္ဘောကြီးတစ်စင်းသည် ကောင်းကင်ယံတွင် ဖြည်းညင်းစွာ ပျံသန်းနေသည်။

ထိုသင်္ဘောတစ်စင်းလုံးတွင် မိန်းကလေးများသာ ပြည့်နှက်နေပြီး သင်္ဘောဦးပိုင်း ကုန်းပတ်ပေါ်တွင်မူ အမျိုးသားတစ်ဦးတည်းသာ ရပ်လျက် အောက်ဘက်မှ လျင်မြန်စွာ ကျန်ရစ်ခဲ့သော ရှုခင်းများကို ကြည့်ရှုနေသည်။

"သူတော်စင်မလေးက ဘာတွေ တွေးနေတာလဲ မသိဘူး ဒီလူကို ဘာလို့အတင်း လိုက်ခိုင်းရတာလဲ" အနောက်ဘက်ရှိ တပည့်မများက တတွတ်တွတ် အတင်းပြောနေကြသည်။

ဟုတ်ပ ပြီးခဲ့တဲ့အကြိမ်က သူလုပ်လိုက်လို့ ငါတို့ကျောက်စိမ်းကညာဂိုဏ်းတစ်ဂိုဏ်းလုံး မျက်နှာပျက်ခဲ့ရတာလေ အခုတော့ သူက ငါတို့နဲ့အတူ လူသားမိစ္ဆာ စစ်မြေပြင်ကို လိုက်လာမယ်တဲ့လေ ဘယ်သူက ထင်မှာလဲ

ရှောင်ချီ၏ အနောက်ဘက်မှ မိန်းကလေးများ၏ အသံများ ဆက်တိုက် ထွက်ပေါ်နေသည်။

ရှောင်ချီကတော့ ဘာမှပြန်မပြောဘဲ မကြားချင်ယောင်ဆောင်နေလိုက်သည် ဘာပဲဖြစ်ဖြစ် ကောင်းတဲ့စကားထွက်လာမှာ မဟုတ်မှန်း သူသိနေသည်မဟုတ်ပါလား။

ဘာတွေ ဆူညံနေကြတာလဲ သူက အခု ဘယ်လိုအဆင့်အတန်းရှိလဲဆိုတာ နင်တို့ သိကြရဲ့လား အားလုံးကို မိတ်ဆက်ပေးမယ်။

နင်တို့ရှေ့မှာ ရပ်နေတဲ့သူက ငါတို့ကျောက်စိမ်းကညာဂိုဏ်းရဲ့ ဘိုးဘွားကြီးစင်ယွီရဲ့ တိုက်ရိုက်တပည့်ပဲ

နောက်မှဝင်လာတဲ့ တပည့်အချို့ဆိုရင် ဘိုးဘွားကြီးစင်ယွီရဲ့ နာမည်ကို ကြားဖူးမှာ မဟုတ်ဘူး။

အဲ့ဒါဆိုရင် ငါကပဲ ဒီဘိုးဘွားကြီးရဲ့ အဆင့်အတန်းကို အကျဉ်းချုပ် ရှင်းပြပေးမယ်။

လက်ရှိဂိုဏ်းချုပ် ယုချန်ရှင်းတောင်မှ ဘိုးဘွားကြီးစင်ယွီကို ဦးလေးတော်ဘိုးဘွားကြီးလို့ ခေါ်ရတာ။

ဂိုဏ်းရဲ့ အကြီးအကဲချုပ် အတော်များများကလည်း ဘိုးဘွားကြီးစင်ယွီကို စီနီယာဦးလေး ဒါမှမဟုတ် ဂျူနီယာ ဦးလေးလို့ခေါ်ကြရတာ

တစ်နည်းအားဖြင့် ပြောရရင် ရှောင်ချီက ငါတို့ ကျောက်စိမ်းကညာဂိုဏ်းထဲကို တရားဝင် မဝင်ရသေးပေမဲ့ အဆင့်အတန်းအရ ပြောရရင် သူက နင်တို့ရဲ့ဘိုးဘေးဆရာပဲ

တပည့်များ ငြင်းခုံနေကြစဉ် ယုလင်လုံက ရှောင်ချီ၏ ဘေးတွင် ရုတ်တရက် ပေါ်လာသည်။

သူမက အော်ဟစ်ကာ ဆူညံနေသော တပည့်များကို တိတ်စေလိုက်ပြီး ရှောင်ချီကို လက်ညှိုးထိုးကာ ဗြောင်ကျကျ ပြောချင်ရာကို ပြောချင်ရာကို ပြောလိုက်တော့သည်။

ဘာယောက်ျားတစ်ယောက်က ငါတို့ရဲ့ ဘိုးဘေးဆရာ ဟုတ်လား ဒါကိုကျွန်မတို့ လက်မခံနိုင်ဘူး။

ဟုတ်တယ် ငါတို့ ကျောက်စိမ်းကညာဂိုဏ်းကို စတင်တည်ထောင်ခဲ့တဲ့ ဘိုးဘေးကြီး လက်ထက်ကတည်းက ဂိုဏ်းထဲကို အမျိုးသားတပည့် လက်မခံရဘူးလို့ အတိအလင်း ပြောထားတာလေ။

ဘယ်လိုလုပ်ပြီး ယောက်ျားတစ်ယောက်က ငါတို့ရဲ့ ဘိုးဘေးဆရာ ဖြစ်နိုင်မှာလဲ

ယုလင်လုံ၏ ရှင်းပြချက်ကို ကြားလိုက်ရသည့်အခါ ကုန်းပတ်ပေါ်ရှိ တပည့်မ ၁၀၀ ကျော်မှာ ချက်ချင်းပင် ဒေါသထွက်သွားကြပြီး ဝိုင်းဝန်း ကန့်ကွက်ကြတော့သည်။

အားလုံး တိတ်ကြစမ်း ငါပြောတာကို သေချာမကြားကြဘူးလား ရှောင်ချီက ငါတို့ ကျောက်စိမ်းကညာဂိုဏ်းကို ဝင်တာမဟုတ်ဘူး သူက ဘိုးဘွားကြီး စင်ယွီရဲ့ တပည့်ပဲ ဖြစ်တာ

ဒါကြောင့် ဒါဟာ ငါတို့ ​ေကျာက်စိမ်းကညာဂိုဏ်းရဲ့ ဘိုးဘေး စည်းကမ်းတွေကို ဖောက်ဖျက်တာမဟုတ်ဘူး ဆိုလိုတာက သူက နင်တို့ရဲ့ဘိုးဘေးဆရာ ဖြစ်နေတာဟာ ဂိုဏ်းနဲ့ မဆိုင်ဘူး သူ့ရဲ့ ကိုယ်ပိုင် အဆင့်အတန်းပဲ

ယုလင်လုံက အားလုံးကို တိတ်ဆိတ်ရန် လက်ဟန်ပြလိုက်ပြီး တပည့်များကို တစ်ယောက်ချင်းစီ နားလည်အောင် ရှင်းပြနေသည်။

သူတော်စင်မလေးရဲ့ ရှင်းပြချက်က နည်းနည်းတော့ ဝေးလံလွန်းတယ်လို့ မထင်ဘူးလား။

ပြာလဲ့လဲ့နှင့် ခရမ်းရောင် ရောယှက်နေသော ဝတ်စုံကို ဝတ်ဆင်ထားသည့် အမျိုးသမီးငယ်တစ်ဦး လူအုပ်ထဲမှ ထွက်လာသည်။

သူမက မျက်မှောင်ကြုတ်လျက် ယုလင်လုံကို မကျေမနပ် ကြည့်ကာ ပြောလိုက်သည်။

သူမက သေသေချာချာ ရှင်းပြထားပါလျက်နှင့် ရန်လာစနေသူကို မြင်လိုက်ရသည့်အခါ ယုလင်လုံမှာ ချက်ချင်း ဒေါသထွက်သွားသည်။

သို့သော် ထိုအမျိုးသမီးကို မြင်လိုက်ရသည့်အခါတွင်မူ သူမ၏ ဒေါသမှာ အနည်းငယ် လျော့ပါးသွားရသည်။

အကြောင်းရင်းကတော့ ထိုအမျိုးသမီးမှာလည်း ထူးခြားသော အဆင့်အတန်းရှိသူ ဖြစ်နေသောကြောင့်ပင်

သူမ၏ နာမည်မှာ နင်ယိုဝေဖြစ်ပြီး ယုနုဂိုဏ်း၏ အကြီးအကဲချုပ်၏ တစ်ဦးတည်းသော သမီးဖြစ်သည်။

တစ်နည်းအားဖြင့် ပြောရလျှင် ဤပါရမီရှင်မလေး၏ အဆင့်အတန်းမှာ သူတော်စင်မဖြစ်သော ယုလင်လုံထက်ပင် ပို၍ မြင့်မားနိုင်ပါသေးသည်။

အကြောင်းရင်းမှာ အကြီးအကဲချုပ် နင်ချိုက်တဲသည် သူမ၏ သမီးကို အလွန်အမင်း အလိုလိုက်ပြီး အစွန်းရောက်အောင် ကာကွယ်တတ်သောကြောင့်ပင်။

သူမ၏သမီးမှာ အနည်းငယ်မျှ ထိခိုက်ဒဏ်ရာရသွားလျှင်ပင် ထိုအကြီးအကဲချုပ်မှာ ပြဿနာကို အကြီးအကျယ် ရှာတတ်ပြီး သူမသမီးကို နာကျင်အောင် လုပ်သည့်သူကို အမြစ်ပြတ် မရှင်းရမချင်း ဘယ်တော့မှ အနားမယူတတ်ပေ

"ဂျူနီယာညီမလေးယိုဝေ သူက တကယ်ပဲ ဘိုးဘွားကြီးလက်ခံထားတဲ့ တပည့်အသစ်ပါ။ ဒီကိစ္စက ငါနဲ့လည်း မဆိုင်ဘူး ငါ့ကို လာပြီး ရန်စနေလို့ ဘာထူးမှာလဲ" ယုလင်လုံက သူမနှင့် မဆိုင်ကြောင်း လက်နှစ်ဖက်ကို ဖြန့်ပြလိုက်သည်။

ဂိုဏ်းအတွင်း၌ ယုလင်လုံနှင့် နင်ယိုဝေကို တပည့်များက ကြာပန်းအမြွှာဟု လေးစားစွာ ခေါ်ကြသည်။

အကယ်၍ နင်ယိုဝေသာ အနည်းငယ် စောပြီး မွေးခဲ့လျှင် သူတော်စင်မ ရာထူးမှာ ယုလင်လုံဆီ ရောက်လာမှာ မဟုတ်ပေ။

ဒါပေမဲ့ သူတို့နှစ်ဦးကြားက ပုဂ္ဂိုလ်ရေး ဆက်ဆံရေးကတော့ မဆိုးလှပါဘူး တွေ့တိုင်းလည်း အမြဲတမ်း နှုတ်ဆက်တတ်ကြသည်။

သို့သော် ယခုအကြိမ်တွင် သူမ၏ ချစ်လှစွာသော ညီမလေးယိုဝေက ဘာကြောင့် သူမကို အခုလို လာပြီး အကျပ်ရိုက်အောင် လုပ်နေသည်ကိုတော့ ယုလင်လုံ နားမလည်နိုင်ပေ။

"စီနီယာအစ်မ လင်လုံ အစ်မက ပြီးခဲ့တဲ့ အကြိမ်က သူ့ကိုရှုံးခဲ့တာကို အခုတော့ သူ့ဘက်ကနေ ကာကွယ်ပေးနေတာလား ငါတို့ ​ေကျာက်စိမ်းကညာဂိုဏ်းရဲ့ ဂုဏ်သိက္ခာကို အညှိုးနွမ်း မခံနိုင်ဘူး ကျွန်မ သူ့ကို စိန်ခေါ်တယ်" နင်ယိုဝေက ကုန်းပတ်ပေါ်တွင် ရပ်နေသော ရှောင်ချီကို ကြည့်ကာ ဒေါသတကြီး ပြောလိုက်သည်။

သူမသည် ငယ်စဉ်ကတည်းက ​ေကျာက်စိမ်းကညာဂိုဏ်းတွင် ကြီးပြင်းလာသူ ဖြစ်သဖြင့် ဂိုဏ်းကို ဘယ်သူထက်မဆို ပို၍ ချစ်မြတ်နိုးသည်။

ထို့ကြောင့် သူမ၏ ဂိုဏ်းတွင် အမည်းစက် ထင်ကျန်ရစ်မှာကို သူမ အဖြစ်မခံနိုင်ပေ။

ရှောင်ချီသည် အောက်ဘက်ရှိ ဆူညံနေသော တပည့်မများကို ကြည့်ရင်း ခေါင်းကိုက်လာတော့သည်။

သူ့ကို ဘိုးဘွားကြီးစင်ယွီ (သူ့ရဲ့ ဆရာ) က ကယ်တင်ပေးခဲ့ပြီးကတည်းက သူ ထိုအိမ်ရာလေးထဲတွင်သာ အနားယူနေခဲ့ခြင်း ဖြစ်သည်။

ဒီနေ့ မနက်အစောကြီးမှာတင် ဘိုးဘွားကြီးက သူ့ကို ခေါ်ခိုင်းလိုက်သည်။ သူမ၏ ရည်ရွယ်ချက်က ရှင်းပါသည် ရှောင်ချီနှင့် ယုလင်လုံတို့ကို အဖွဲ့ခေါင်းဆောင်များအဖြစ် ထားရှိကာ ​ေကျာက်စိမ်းကညာဂိုဏ်းတပည့်များကို လူသားမိစ္ဆာ စစ်မြေပြင်သို့ ခေါ်ဆောင်သွားရန်ပင် ဖြစ်သည်။

ဂိုဏ်းကြီးခုနစ်ဂိုဏ်းဆိုသည့် နာမည်ဂုဏ်သတင်းမှာ အလကားရထားခြင်းမဟုတ်ပေ အင်အားကြီးလေလေ တာဝန်ကြီးလေလေ ဖြစ်သည်။

ကျောက်စိမ်းကညာဂိုဏ်းတင်မကဘဲ ဝိညာဉ်ဓားဂိုဏ်း၊ ဝူချန်းဂိုဏ်း၊ သားရဲထိန်းဂိုဏ်း စသည့် ဂိုဏ်းကြီးများအားလုံးသည် နှစ်စဉ်နှစ်တိုင်း လူသားမျိုးနွယ်၏ နယ်စပ်ကို ကာကွယ်ရန်အတွက် တပည့်များနှင့် အကြီးအကဲများကို စစ်မြေပြင်သို့ စေလွှတ်ကြရသည်။

ဒါဟာ လူသားမျိုးနွယ်ဝင်တွေဖြစ်သလို အင်အားကြီးဂိုဏ်းတွေ ဖြစ်တဲ့အတွက် သူတို့ရဲ့ တာဝန်လည်း ဖြစ်ပါတယ်။

ဒီကိစ္စကို ရှောင်ချီကလည်း ကြိုတင် သဘောတူထားပြီးသားပါ။ စစ်မြေပြင်မှာ သူ့ရဲ့ ကျင့်စဉ်အဆင့်ကို တက်လှမ်းဖို့ အခွင့်အရေးကို သူ စောင့်မျှော်နေခဲ့တာပါ။

ဒါပေမဲ့ ဒီမိန်းကလေး အုပ်စုကြီးနဲ့အတူ သွားရမှာကိုတော့ သူ တကယ်မလိုလားပါဘူး သူတို့တွေ တတွတ်တွတ် ပြောနေတာက တကယ်ကို နားငြီးစရာ ကောင်းလွန်းလို့ပါ။

ဒါ့အပြင် မထွက်ခွာခင်မှာ ဘိုးဘွားကြီးက ဒီတပည့်မလေးတွေကို ကာကွယ်ပေးဖို့ သူ့ကို မှာကြားထားခဲ့သေးသည်။

ဒီလောက်များပြားလှတဲ့ ​ေကျာက်စိမ်းကညာဂိုဏ်းတပည့်မတွေကို ကြည့်ရင်း ရှောင်ချီ တကယ်ပဲ ခေါင်းကိုက်သွားရသည်။

ကုန်းပတ်ပေါ်မှာတင် တစ်ဒါဇင်ကျော်ရှိပြီး သင်္ဘောခန်းထဲမှာတော့ ၁၀၀ ကျော် ရှိသည်။ 

စုစုပေါင်း ၂၀၀ ကျော်ရှိတဲ့ အမျိုးသမီးတွေကို သူတစ်ယောက်တည်းက ဘယ်လိုကာကွယ်ပေးရမှာလဲ ဒီဘိုးဘွားကြီး စင်ယွီကတော့ သူ့ကို ခက်ခဲတဲ့ အလုပ်တွေ ပေးတာ တကယ်ကို တော်တာပဲ။

မင်းတို့ ငါ့ကို မုန်းနေကြတာ ငါနားလည်ပါတယ် ပြီးခဲ့တဲ့ အကြိမ်က ငါ့ကြောင့် ​ေကျာက်စိမ်းကညာဂိုဏ်း မျက်နှာပျက်ခဲ့ရတာကိုး။

မင်းတို့ တိုက်ချင်တယ်ဆိုရင်လည်း တိုက်ကြပါ ငါ ရှောင်ချီ ဒီမှာပဲရှိနေမယ် မင်းတို့ စိတ်ကြိုက်သာလုပ်ကြပါ။

မထွက်ခွာခင်မှာ ငါ့ဆရာက မင်းတို့အားလုံးကို ကာကွယ်ပေးဖို့ ငါ့ကို မှာကြားခဲ့တယ်။ ငါ့ဆရာက ငါ့အပေါ်မှာ ကျေးဇူးရှိတဲ့သူမို့ ငါ သူ့စကားကို မလွန်ဆန်နိုင်ဘူး။

ဒါကြောင့် ဘာပဲဖြစ်ဖြစ် ငါမင်းတို့ တစ်ယောက်ကိုမှ ပြန်ပြီး နာကျင်အောင် လုပ်မှာမဟုတ်ဘူး။

ရှောင်ချီသည် မျက်လုံးများကို ဖြည်းဖြည်းချင်း မှိတ်လိုက်ပြီး ကုန်းပတ်၏ အမြင့်ဆုံးနေရာတွင် အေးအေးဆေးဆေး ထိုင်ချလိုက်သည် မည်သည့် ရိုက်နှက်မှုကိုမဆို ငြိမ်ခံတော့မည့် ပုံစံမျိုးပင်။

ဟက်... ဒီမှာ လာပြီး လူကောင်းလုပ်မနေနဲ့ ဒါလေး ပြောရုံနဲ့ မင်းကို ငါတို့ ခွင့်လွှတ်မယ် ထင်နေတာလား။

အို... သူက ဟန်ဆောင်နေတာပဲဖြစ်မှာ စီနီယာအစ်မ ယိုဝေ သူ့ကို ကောင်းကောင်း သင်ခန်းစာ ပေးလိုက်စမ်းပါ။

မည်သည့် ရိုက်နှက်မှု၊ ကဲ့ရဲ့မှုကိုမဆို ငြိမ်ခံမည့် ရှောင်ချီ၏ ပုံစံကို မြင်လိုက်ရသည့်အခါ ​ေကျာက်စိမ်းကညာဂိုဏ်း တပည့်မများမှာ ခဏတာ မှင်တက်သွားကြသည်။

ထို့နောက် သတိပြန်ဝင်လာသည့် အခိုက်တွင် ရှောင်ချီကိုဆဲဆို ဝေဖန်သံများ ထပ်မံ ထွက်ပေါ်လာတော့သည်။

စီနီယာအစ်ကိုရှောင် အစ်ကို ဘာပဲတွေးတွေး အစ်ကိုက ငါတို့ ယုနုဂိုဏ်းကို အရှက်ရအောင် လုပ်ခဲ့တာ။ ကျောက်စိမ်းကညာဂိုဏ်းရဲ့ တပည့်တစ်ယောက်အနေနဲ့ ဒီဂုဏ်သိက္ခာကို ကျွန်မပြန်ယူရမယ်။

အကယ်၍ အစ်ကိုက ပြန်မတိုက်ဘူးဆိုရင်တော့ ကျွန်မရဲ့ ဓားကရက်စက်သွားရင် မပြောနဲ့တော့

နင်ယိုဝေမှာ ရှေ့တိုးရခက် နောက်ဆုတ်ရခက် ဖြစ်နေသောကြောင့် သွားကြိတ်လျက် ခါးမှ ဓားကို ဆွဲထုတ်ကာ ရှောင်ချီကို ချိန်ရွယ်လိုက်ပြီး ဒေါသတကြီး ပြောလိုက်သည်။

သို့သော် ရှောင်ချီကမူ သူမ၏ စကားများကို လုံးဝ မကြားသည့်အလား သူသည် တရားထိုင်နေသကဲ့သို့ ထိုနေရာတွင်ပင် ဆက်လက် ငြိမ်သက်စွာ ထိုင်နေတော့သည်။