အခန်း (၁၀၄)  မူဝမ်အာကို ခေါင်းဖြတ်သတ်ခြင်း

ယဲ့ဖန်ပြန်ရောက်လာတာ ရက်အတော်ကြာပြီဖြစ်သော်လည်း သူမဆီ လာမတွေ့ခဲ့သည်မှာ တစ်ခုခုကို ကြားသိထားပြီးဖြစ်ကြောင်း မူဝမ်အာကောင်းကောင်းသိသည်။

ထို့ကြောင့် သူမဘက်မှ အစပျိုးကာ အပြစ်အားလုံးကို ရှောင်ချီအပေါ် ပုံချလိုက်ခြင်းဖြစ်သည်။ ဤနည်းဖြင့် ယဲ့ဖန်၏ အမုန်းတရားအားလုံးကို ရှောင်ချီဆီသို့ ဦးတည်သွားစေရန် သူမ ကြိုးပမ်းလိုက်ခြင်းပင်။

ယဲ့ဖန်သည် သဘာဝအရ စိတ်ကျဉ်းမြောင်းသူဖြစ်ပြီး အမုန်းတရားများ ဖုံးလွှမ်းနေချိန်တွင် အသေးစိတ်အချက်အလက်များကို သတိပြုမိမည်မဟုတ်ပေ။ အခြေအနေသာ ကောင်းမွန်သွားပါက သူမအနေဖြင့် သူနှင့် ပြန်လည်သင့်မြတ်နိုင်မည်ဟု မျှော်လင့်နေသည်။

ယဲ့ဖန်သည် မျက်လုံးချင်းမဆုံဘဲ ရှောင်ဖယ်နေသော မူဝမ်အာကို ကြည့်ကာ စိတ်ထဲတွင် ခံစားချက်မျိုးစုံ ဖြစ်ပေါ်နေမိသည်။

မူဝမ်အာသည် သူ့ကို အများကြီး ကူညီခဲ့ဖူးပြီး သူ့အပေါ် ပထမဆုံး စိတ်ဝင်စားမှုပြခဲ့သည့် မိန်းကလေးလည်း ဖြစ်သည်။

သူမသည် သူ့အတွက်ကြောင့်နှင့် သူမ၏ စီနီယာအစ်မနှင့် ဆရာကိုပင် သစ္စာဖောက်ခဲ့ဖူးသည်။

လင်ကျောက်လန်ကို လိုက်ခဲ့စဉ်က သူသည် ယုတ်ညံ့သော နည်းလမ်းအချို့ကို သုံးခဲ့ရသည်။ လျိုချင်အာနှင့် နတ်မိမယ် လင်ယွင်တို့ကို လိုက်ခဲ့စဉ်ကမူ သူ၏နည်းလမ်းများမှာ ပို၍ပင် မရိုးသားခဲ့ပေ။ ဤမူဝမ်အာ တစ်ယောက်သာလျှင် သူ့ရင်ခွင်ထဲသို့ မိမိအလိုအလျောက် တိုးဝင်လာခဲ့ခြင်း ဖြစ်သည်။

"မင်း... မင်း အရင်ပြန်နှင့်ဦး မင်းရဲ့ကိစ္စတွေကိုလည်း ငါ ဖြေရှင်းပေးပါ့မယ်" ယဲ့ဖန်သည် မူဝမ်အာကို ရှုပ်ထွေးသော အကြည့်ဖြင့် ကြည့်လိုက်ပြီးနောက် ရှောင်ချီဘက်သို့ ပြန်လှည့်လိုက်သည်။ သူ၏ အကြည့်များတွင် ရွံရှာမှုနှင့် ရှောင်ဖယ်လိုသော ဆန္ဒများ ပိုမိုပါဝင်နေသည်။

ယဲ့ဖန်၏ အထင်သေးပြီး အေးစက်သော အမူအရာကို မြင်လိုက်ရသောအခါ မူဝမ်အာ၏ နှလုံးသားမှာ သေဆုံးသွားသကဲ့သို့ ခံစားလိုက်ရပြီး အလွန်အမင်း နာကျင်သွားတော့သည်။

ဘာလို့လဲ ဘာလို့ ငါ့ကိုဒီလို ဆက်ဆံရတာလဲ ငါ မင်းအတွက်အများကြီး လုပ်ပေးခဲ့တာလေ အမှားသေးသေးလေး တစ်ခုလုပ်မိရုံနဲ့ မင်းက ငါ့ကို တစ်ကြိမ်လေးတောင် ခွင့်မလွှတ်နိုင်ဘူးလား။

"လင်ကျောက်လန်က စိတ်သဘောထားကျဉ်းမြောင်းပြီး ငါ့ကို နေရာတကာ လိုက်နှောင့်ယှက်နေလို့သာ ငါ အခုလို အမှားမျိုး လုပ်မိတာပေါ့"

မင်းကတော့ နေရာတကာမှာ ပွေရှုပ်နေပြီး မင်းနဲ့ အတူအိပ်ခဲ့တဲ့ မိန်းမတွေက ရေတွက်လို့တောင် မရဘူး မင်းကို ငါတစ်ယောက်တည်း ပိုင်ဆိုင်နိုင်မှာမဟုတ်မှန်း သိလို့ ငါ ဘယ်တုန်းကမှ ဂရုမစိုက်ခဲ့ဘူး။

ဒါပေမဲ့ မင်းဘေးမှာ ဆက်ရှိနေဖို့ ငါနည်းမျိုးစုံ သုံးခဲ့ရတယ်။ အခု ငါ့ကိုကြည့်ဦးလူလည်းမဟုတ် သရဲလည်းမဟုတ်တဲ့ ပုံစံမျိုး ဖြစ်နေပြီ။ ဒါတောင် မင်းက ငါ့ကို ဒီလို အေးစက်စက် ဆက်ဆံနေတုန်းလား။

"ငါ့ကို သတ်ချင်လည်း သတ်လိုက်ပါတော့ ဒီလို အသက်ရှင်နေရတာက သေတာထက် ပိုဆိုးတယ်။ လွန်ခဲ့တဲ့ ငါးနှစ်လုံးလုံး မင်းကို စောင့်နေခဲ့လို့သာ ငါ ဒီနေ့အထိ အသက်ရှင်နေတာ။ မဟုတ်ရင် သူတို့ရဲ့ နှိပ်စက်မှုကြောင့် ငါ ကိုယ့်ကိုယ်ကိုယ် သတ်သေသွားတာ ကြာလှပြီ မူဝမ်အာသည် ရင်ပြင်ပေါ်တွင် အရှက်မရှိသော မိန်းမတစ်ယောက်ကဲ့သို့ အော်ဟစ်ငိုယိုနေတော့သည်။

ယဲ့ဖန်၏ အကြည့်ထဲမှ အထင်သေးမှုနှင့် ရွံရှာမှုကို ခံစားလိုက်ရခြင်းမှာ အသတ်ခံရခြင်းထက် ပို၍ နာကျင်ရသည်။ ၎င်းမှာ သူမ၏ ခန္ဓာကိုယ်ကို ဓားဖြင့် မွှန်းနေသကဲ့သို့ ခံစားရစေသည်။

ယဲ့ဖန်သည် မူဝမ်အာကို ကြည့်ကာ ဘာလုပ်ရမှန်းမသိဘဲ နှုတ်ခမ်းများ တုန်ယင်နေမိသည်။

မူဝမ်အာ ပြောသကဲ့သို့ပင် သူမသည် အရင်က သူ့ကို အများကြီး ကူညီခဲ့ဖူးသည်။ အကယ်၍ သူမကို အခု ဂရုမစိုက်ဘဲ ထားခဲ့လျှင် ကျေးဇူးကန်းရာ ရောက်ပေလိမ့်မည်။ 

သို့သော်လည်း သူ့ကို သစ္စာဖောက်ခဲ့သော အမျိုးသမီးတစ်ဦးကို ခွင့်လွှတ်ပေးရန်မှာလည်း ယဲ့ဖန်အတွက် ခက်ခဲနေသဖြင့် အကျပ်ရိုက်နေတော့သည်။

ထိုအခါမှသာ ယဲ့ဖန်သည် ရှောင်ချီ ကြုံတွေ့ခဲ့ရသော အခြေအနေကို ကိုယ်ချင်းစာမိသွားသည်။ လင်ကျောက်လန်သည် ရှောင်ချီ၏ စေ့စပ်ထားသူ ဖြစ်စဉ်က သူ့ကို တောင်ပေါ်သို့ ခေါ်ဆောင်လာခဲ့သည်။

ထိုအချိန်က ရှောင်ချီ ခံစားခဲ့ရသည်မှာ ယခု သူခံစားနေရသည်ထက် အဆပေါင်းများစွာ ပိုဆိုးပေလိမ့်မည်။

တစ်ခါတစ်ရံတွင် လူတစ်ယောက်သည် တူညီသောအရာကို ကိုယ်တိုင်ကြုံတွေ့ရမှသာ အခြားသူကို အမှန်တကယ် ကိုယ်ချင်းစာနိုင်ခြင်း ဖြစ်သည်။ ယဲ့ဖန်သည် ဤအမှန်တရားကို ယခုအချိန်မှသာ နားလည်သွားခဲ့သည်။

"ကောင်းပြီ ငါ နားလည်ပြီ အခုတော့ အာလန်တို့နဲ့ သွားနေဦး။ မင်းရဲ့ ဒေါသတွေကို ဖြေဖျောက်ပေးဖို့ ငါ ရှောင်ချီကို သတ်ပေးမယ်" ယဲ့ဖန်သည် သက်ပြင်းအရှည်ကြီး ချလိုက်ပြီး နောက်ဆုံးတွင်တော့ လမ်းစကို အကုန်မပိတ်လိုက်ပေ။

မူဝမ်အာ၏ မျက်လုံးထဲတွင် မျှော်လင့်ချက်အရောင်များ လက်ခနဲ ဖြစ်သွားသည်။

သူမ၏ နည်းလမ်းက တကယ် ထိရောက်သည်ဟု ထင်ရသည်။ ရှောင်ချီကို အရင် အပြစ်ပုံချပြီးမှ သနားစဖွယ် ပုံစံဖမ်းပြခြင်းဤနည်းလမ်းနှစ်ခု ပေါင်းစပ်လိုက်လျှင် ယဲ့ဖန်ကဲ့သို့ အေးစက်သော နှလုံးသားပိုင်ရှင်ပင်လျှင် စိတ်လှုပ်ရှားသွားပေလိမ့်မည်။

သူ့ကို အရင် ဒေါသထွက်အောင်လုပ်ပြီးမှ သနားစိတ်ဝင်အောင် လုပ်ခြင်းသည် မည်သူ့အပေါ်တွင်မဆို အမြဲတမ်း အောင်မြင်သည့် နည်းလမ်းပင်ဖြစ်သည်။

မူဝမ်အာသည် ခေါင်းညိတ်ပြကာ မျက်ရည်များကို အမြန်သုတ်ပြီး ထရပ်လိုက်သည်။ ထို့နောက် လင်ကျောက်လန်နှင့် လျိုချင်အာတို့ရှိရာဘက်သို့ လျှောက်သွားလိုက်သည်။

သို့သော်လည်း သူမ အနားသို့ ရောက်သွားသည့်အခါ ထိုနှစ်ဦးမှာ ကူးစက်ရောဂါတစ်ခုကို ရှောင်ရှားသကဲ့သို့ သူမနှင့် ခပ်လှမ်းလှမ်းတွင် ခပ်ခွာခွာ နေလိုက်ကြသည်။

သူမ၏ စီနီယာအစ်မဖြစ်သူ လျိုချင်အာပင်လျှင် မူဝမ်အာကို ရွံရှာသော မျက်လုံးများဖြင့် ကြည့်နေသည်။

မူဝမ်အာမှာ စိတ်ထဲတွင် အလွန်ခံရခက်သွားပြီး သူမ၏ မျက်လုံးထဲတွင် အမှောင်ရိပ်တစ်ခု လက်ခနဲ ဖြစ်သွားသော်လည်း သူမ ချက်ချင်း ပြန်ထိန်းလိုက်သည်။

သူမသည် စိတ်ကို ပြန်လည်တည်ငြိမ်အောင်ထားပြီး လျိုချင်အာနှင့် နီးစပ်အောင် ကြိုးစားလိုသည်။ သူမသည် သူမ၏ စီနီယာအစ်မဖြစ်သဖြင့် သံယောဇဉ်အကြွင်းအကျန် အချို့တော့ ရှိသင့်သည် မဟုတ်ပါလား။

ရှောင်ချီသည် သူတို့၏လုပ်ဇာတ်ကို ကြည့်ကာ နှုတ်ခမ်းထောင့်များ အနည်းငယ် တွန့်ကွေးသွားသည်။ သူ သတ်ဖြတ်ခဲ့သော ဂုဏ်သတင်းများက သူတို့ကို လုံလောက်သော ကြောက်ရွံ့မှုမျိုး မပေးနိုင်သေးပုံရသည်။

"ယဲ့ဖန်လေး မင်း အတော်လေး အကျပ်ရိုက်နေပုံရတယ်နော်။ ငါတို့က တစ်ချိန်က ဂိုဏ်းတူညီအစ်ကိုတွေပဲဆိုတော့ မင်းရဲ့ စီနီယာအစ်ကိုကြီးက မင်းကို ကူညီပေးပါ့မယ်"

 ရှောင်ချီသည် အနည်းငယ် ပြုံးလိုက်ပြီး လက်ချောင်းများကို ခပ်ဖွဖွလေး ခါယမ်းလိုက်သည်။ နောက်တစ်စက္ကန့်တွင် ဓားချီ တစ်ခုမှာ ဟင်းလင်းပြင်ထဲသို့ ပျောက်ကွယ်သွားတော့သည်။

"လင်ရှောင်ဓားကိုးသွယ် စတုတ္ထပုံစံ: ဟင်းလင်းပြင်ခွဲဓား" ရှောင်ချီ၏ အသံအဆုံးတွင် မူဝမ်အာ၏ အနောက်ဘက် ဟင်းလင်းပြင်မှာ ရုတ်တရက် တုန်ခါသွားသည်။ နောက်တစ်ခဏတွင် ဓားချီတစ်ခုမှာ ဟင်းလင်းပြင်ထဲမှ ထွက်ပေါ်လာပြီး မူဝမ်အာ၏ ခေါင်းကို အပြတ်ဖြတ်ပစ်လိုက်တော့သည်။

သွေးများ ပန်းထွက်လာသည်နှင့်အမျှ တက်ကြွလှပသော အသက်တစ်ချောင်းမှာ လူတိုင်း၏ မျက်စိရှေ့မှောက်တွင်ပင် လုံးဝ ချုပ်ငြိမ်းသွားတော့သည်။

"ဘယ်လိုလဲ ယဲ့ဖန်လေး မင်းရဲ့စီနီယာအစ်ကိုကြီးက မင်းအပေါ် ကောင်းတယ်မလား အခုဆိုရင် မင်းလည်း စိတ်အကျပ်ရိုက်စရာ မလိုတော့ဘူးပေါ့" ပြစ်မှုကျူးလွန်သူ ရှောင်ချီမှာမူ ဘာမှမဖြစ်ခဲ့သကဲ့သို့ပင် ယဲ့ဖန်ကို ကြည့်ကာ ခပ်ပြုံးပြုံးဖြင့် နောက်ပြောင်နေသည်။

"မင်း... မင်း... မင်း သူမကို သတ်လိုက်ပြီ" ယဲ့ဖန်၏ ဖြူစင်သော မျက်နှာမှာ ချက်ချင်းပင် နီမြန်းသွားတော့သည်။ သူ၏ မျက်လုံးများမှာလည်း ချက်ချင်းပင် သွေးရောင်လွှမ်းသော သတ်ဖြတ်လိုစိတ်များဖြင့် ပြည့်နှက်သွားသည်။

မူဝမ်အာ၏ နုနယ်သော အသံမှာ သူ၏ နားထဲတွင် ကြားနေရဆဲ ဖြစ်သော်လည်း အေးစက်နေသော အလောင်းကို ကြည့်ရင်း ယဲ့ဖန်၏ နှလုံးသားမှာ ရေခဲကဲ့သို့ အေးစက်သွားတော့သည်။

ယဲ့ဖန်သည် ခုနက မူဝမ်အာကို မည်သို့ ရင်ဆိုင်ရမည်ဆိုသည်ကို အမှန်တကယ် အကျပ်ရိုက်နေခဲ့ခြင်းဖြစ်သည်။ သို့သော် သူမ၏ အလောင်းကို မြင်လိုက်ရသည့်အခါမှသာ သူမကို သူအမှန်တကယ် ချစ်ခဲ့ကြောင်း သိရှိသွားသည်။

နုနယ်သော ပန်းလေးတစ်ပွင့်မှာ သူ၏ရှေ့မှောက်တွင်ပင် ကြွေလွင့်သွားသည်ကို ကြည့်ရင်း ယဲ့ဖန်၏ နှလုံးသားထဲတွင် ရန်လိုမှုများ ပြည့်နှက်လာသည်။ ရှောင်ချီကို ကြည့်သော သူ၏ အကြည့်များတွင် သတ်ဖြတ်လိုစိတ်များ အပြည့်ရှိနေသည်။

"ငါ... မင်းကို... သတ်... မယ်" ယဲ့ဖန်သည် ရှောင်ချီကို ကြည့်ကာ စကားလုံးများကို လေးလေးနက်နက် ပြောလိုက်သည်။

"ဟုတ်လို့လား ညီလေးယဲ့ဖန် မင်းရဲ့ ရန်လိုမှုက အတော်လေး ပြင်းထန်တာပဲ ငါကတော့ မင်းနဲ့ မတူဘူး ငါက မင်းကို မြန်မြန် မသေစေချင်သေးဘူး"

"မင်း တန်ဖိုးထားတဲ့ လူတွေနဲ့ အရာအားလုံးက မင်းရဲ့မျက်စိရှေ့မှာတင် တစ်ခုပြီးတစ်ခု ပျောက်ကွယ်သွားတာကို ငါ မင်းကို ကြည့်စေချင်တယ်"

"လင်ကျောက်လန်၊ မူဝမ်အာ၊ လျိုချင်အာ၊ လင်ယွင်၊ နတ်ဘုရားနန်းတော်၊ ကျန့်မိသားစု၊ နဂါးနက်လေး၊ ပြီးတော့ ဝိညာဉ်ဓားဂိုဏ်းတောင် ပါသေးတယ်။ ဒီလူတွေနဲ့ အင်အားစုအားလုံး ပျောက်ကွယ်သွားလိမ့်မယ်"

"သူတို့ နာကျင်စွာ ရုန်းကန်နေရတာကို ငါမင်းကို ကြည့်စေချင်တယ်။ မင်းရဲ့ အချစ်ရဆုံးလူတွေကို ဆုံးရှုံးရတဲ့ နာကျင်မှုကို မင်း ခံစားစေချင်တယ်"

ရှောင်ချီသည် ရဲ့ဖန်ကို တည်ငြိမ်စွာ ကြည့်ကာ နေ့စဉ်သုံး စကားပြောနေသကဲ့သို့ အေးစက်သော လေသံဖြင့် ပြောလိုက်သည်။

"ဒီလူက ဘယ်သူလဲ သူ့ရဲ့ လေသံက အတော်လေး မောက်မာလွန်းမနေဘူးလား"

"မောက်မာတယ်လို့ပဲ ပြောနေတာလား သူက တကယ် အရည်အချင်းရှိလို့ ပြောနေတာလေ နတ်ဘုရားသားတော်ချစ်တဲ့မိန်းမကို သူ့ရှေ့မှာတင် သတ်လိုက်တာ ဝေနိုင်ငံတော် တစ်ခုလုံးမှာ ဒီလို အစွမ်းနဲ့ သတ္တိမျိုး ဘယ်နှစ်ယောက် ရှိမှာလဲ"

အောက်ခြေရှိ တစ်ကိုယ်တော် ကျင့်ကြံသူ နှစ်ဦးမှာ တီးတိုး ပြောဆိုနေကြသည်။ ယခုအချိန်တွင် ရင်ပြင်တစ်ခုလုံးမှာ ဖရိုဖရဲ ဖြစ်နေပြီဖြစ်သည်။

ကျင့်ကြံသူများမှာ ကြောက်လန့်တကြား ပြေးလွှားနေခြင်းမျိုး မဟုတ်သော်လည်း ဆူညံသော ပြောဆိုသံများမှာ ဝိညာဉ်ဓားဂိုဏ်း တစ်ခုလုံးသို့ ပျံ့နှံ့သွားတော့သည်။