အခန်း (၁၀၁) နတ်ဘုရားနန်းတော်

ဝိညာဉ်ဓားဂိုဏ်း၏ ပထမအကြီးအကဲ ယွီရှောင်ဇီ ဒုတိယအကြီးအကဲနတ်အရှင်ယွီရှင်း တတိယအကြီးအကဲ ကျိန်းရန်ကျင်းချီ၊ လောကီပြင်ပတွင်ကျင့်ကြံနေသော နတ်အရှင် လင်းယွီနှင့် အသစ်တက်လှမ်းလာသောဝိညာဥ်နှင့်ခန္ဓာပေါင်းစပ်ခြင်းအဆင့်ပညာရှင် ဂိုဏ်းချုပ် ဝူတောက်ဇီတို့သည် ဝတ်စုံသစ်များကိုယ်စီ ဝတ်ဆင်လျက် ဝိညာဉ်ဓားဂိုဏ်း၏ နောက်တောင်ကုန်းမှ ဂိုဏ်းချုပ်နန်းဆောင် အထက်သို့ ပျံသန်းထွက်ပေါ်လာကြသည်။

သူတို့သည် ဟင်းလင်းပြင်ကို နင်းလျှောက်လာကြပြီး ကောင်းကင်ယံမှ ဝိညာဉ်ချီများ ပါဝင်သော နတ်ပန်းများ ကြွေကျလာခြင်းမှာ သူတို့၏ ထူးခြားလှသော အရှိန်အဝါကို ပေါ်လွင်စေသည်။

ဂုဏ်ပြုရန် ရောက်ရှိနေကြသော ကျင့်ကြံသူများစွာမှာ နန်းဆောင်အပြင်ဘက်၌ စောင့်ဆိုင်းနေကြသည်မှာ ကြာပြီဖြစ်သည်။

တည်းခိုဆောင်များ စီစဉ်ပေးခဲ့သကဲ့သို့ပင် အစွမ်းထက်ပြီး နောက်ခံတောင့်တင်းသော ကျင့်ကြံသူများကို နန်းဆောင်အတွင်း၌ နေရာချပေးထားကာ စားပွဲများပေါ်တွင် ဝိညာဉ်ဝိုင်နှင့် မြိန်ဖွယ်ရာ အစားအစာများဖြင့် ပြည့်နှက်နေသည်။

အင်အားနည်းပြီး ဂိုဏ်းနောက်ခံ မတောင့်တင်းသူများမှာမူ နန်းဆောင်အပြင်ဘက်၌ ရပ်ကာ ကောင်းကင်ယံမှ လှပသော မြင်ကွင်းကို အားကျစွာ ငေးကြည့်နေရုံသာ တတ်နိုင်ကြသည်။

ဝိညာဉ်ဓားဂိုဏ်း၏ အတွင်းဂိုဏ်းတပည့်များမှာ ဝတ်စုံသစ်များ ဝတ်ဆင်လျက် နန်းဆောင်ကို စောင့်ကြပ်နေသည့် နဂါးကြီးနှစ်ကောင်ကဲ့သို့ ဝဲယာတစ်ဖက်စီတွင် တန်းစီရပ်နေကြသည်။

ဝိညာဉ်ဓားဂိုဏ်း၏ ဝိညာဥ်နှင့်ခန္ဓာပေါင်းစပ်ခြင်းအဆင့် ပညာရှင်ကြီးငါးဦးမှာ ဟင်းလင်းပြင်မှ ဖြည်းညင်းစွာ ဆင်းသက်လာပြီး ကော်ဇောနီပေါ်သို့ နင်းကာ နန်းဆောင်အတွင်းသို့ ဝင်ရောက်လာကြသည်။

သူတို့သည် အမြင့်ဆုံးအဆင့်အတန်းကို ကိုယ်စားပြုသည့် ဂိုဏ်းချုပ်ပလ္လင်ပေါ်တွင် မထိုင်ကြပေ။ ယင်းအစား ဘေးဘက်နေရာများတွင်သာ ထိုင်လိုက်ကြခြင်းဖြင့် ဂိုဏ်းချုပ်အသစ်ကို စောင့်ရှောက်မည်ဟူသော သူတို့၏ သန္နိဋ္ဌာန်ကို ပြသလိုက်ကြသည်။

"ကျွန်တော်တို့ ဝိညာဉ်ဓားဂိုဏ်းရဲ့ ဂိုဏ်းချုပ် ရာထူးဆက်ခံပွဲကို အလုပ်များတဲ့ကြားက အချိန်ပေးပြီး တက်ရောက်ပေးကြတဲ့ မိတ်ဆွေအားလုံးကို ကျေးဇူးတင်ပါတယ်"

"မကြာသေးမီက ကျွန်တော်တို့ ဝိညာဉ်ဓားဂိုဏ်းဟာ အခက်အခဲများစွာ ကြုံခဲ့ရပြီး ဂိုဏ်းချုပ်ရာထူးကလည်း ခဏခဏ ပြောင်းလဲခဲ့ရပါတယ်"

"ကျွန်တော်ရာထူးမှာ ရှိနေစဉ်အတွင်းမှာ အမှားအယွင်းများစွာ ပြုလုပ်ခဲ့မိတာကြောင့် ဝိညာဉ်ဓားဂိုဏ်းရဲ့ ပါရမီရှင်တွေ ဆုံးရှုံးခဲ့ရတယ်ဆိုတာ ကျွန်တော် ကောင်းကောင်း သိပါတယ်"

"ဒါပေမဲ့ ကောင်းကင်ဘုံက ကျွန်တော်တို့ ဝိညာဉ်ဓားဂိုဏ်းကို နောက်ဆုံးမှာတော့ စောင့်ရှောက်ခဲ့ပါတယ်။ ဘေးဒုက္ခကြုံနေရတဲ့ ဂိုဏ်းကို ကယ်တင်ဖို့အတွက် ပြိုင်ဘက်ကင်း ပါရမီရှင် နတ်ဘုရားသားတော် ယဲ့ဖန်ကို စေလွှတ်ပေးခဲ့ပါတယ်"

"ဒီနေ့ကစပြီး ကျွန်တော်ဟာ ဂိုဏ်းချုပ်ပလ္လင်ကို ယဲ့ဖန်ဆီ လွှဲပြောင်းပေးအပ်သွားမှာပါ။ ဒီလူငယ်ပါရမီရှင်က ကျွန်တော်တို့ ဝိညာဉ်ဓားဂိုဏ်းကို ကမ္ဘာသစ်တစ်ခုဆီ ဦးဆောင်ခေါ်သွားပါလိမ့်မယ်"

"ဝိညာဉ်ဓားဂိုဏ်းရဲ့ တပည့်အားလုံးဟာ ဂိုဏ်းချုပ်ယဲ့ဖန်ရဲ့ အမိန့်ကို နာခံကြရမယ် ဒီနေ့မှာ မိတ်ဆွေအားလုံးက သက်သေအဖြစ် ကြည့်ရှုပေးကြဖို့ မျှော်လင့်ပါတယ်"

ဂိုဏ်းချုပ် ဝူတောက်ဇီ၏ အသံမှာ နန်းဆောင်အတွင်း ပဲ့တင်ထပ်သွားသည်။ သူသည် အနည်းငယ် နှမြောတသ ဖြစ်မိသော်လည်း ယခုအချိန်မှစ၍ သူသည် ဂိုဏ်းချုပ်ရာထူးနှင့် မည်သို့မျှ ပတ်သက်တော့မည် မဟုတ်ပေ။

ကံကောင်းသည်မှာ ယဲ့ဖန်သည် သူ၏သမက်ဖြစ်သဖြင့် သားအရင်းကဲ့သို့ပင် ဖြစ်သည်။ ထို့ကြောင့် ရာထူးလွှဲပေးရခြင်းမှာ သူ့အတွက် အလွန်အမင်း နာကျင်စရာ မဟုတ်ခဲ့ပေ။

ယဲ့ဖန်သည် ဆံပင်ကို အနုစိတ်ထုံးဖွဲ့ကာ ဝတ်စုံဖြူကို ဝတ်ဆင်ထားသည်။ သူသည် ခရမ်းရောင်လှံကို ကိုင်ဆောင်လျက် လူတိုင်း၏ အကြည့်အောက်တွင် နန်းဆောင်အပြင်ဘက်မှ အထဲသို့ ဖြည်းညင်းစွာ လျှောက်လှမ်းလာသည်။

ကော်ဇောနီပေါ်သို့ နင်းကာ အမြင့်ဆုံး ဂိုဏ်းချုပ်ပလ္လင်သို့ တက်လှမ်းသွားပြီးနောက် ဝူတောက်ဇီ၏ လက်ထဲမှ ဂိုဏ်းချုပ်ကျောက်စိမ်းတံဆိပ်ကို လက်ခံယူလိုက်သည်။

ဝုန်း... ခန့်ညားထည်ဝါသော ဝိညာဉ်ချီများမှာ ယဲ့ဖန်၏ ခန္ဓာကိုယ်မှ ပေါက်ကွဲထွက်ပေါ်လာသည် ထိုဝိညာဉ်ချီများမှာ ကျောက်စိမ်းတံဆိပ်ဆီသို့ စီးဝင်သွားတော့သည်။

ယဲ့ဖန် ကျောက်စိမ်းတံဆိပ်ကို ကိုင်လိုက်သည့် အခိုက်အတန့်မှာပင် ဝိညာဉ်ဓားဂိုဏ်း တစ်ခုလုံး၏ ကံကြမ္မာအရှိန်အဝါမှာ သိသိသာသာ တဟုန်ထိုး မြင့်တက်သွားတော့သည်။

ကံကြမ္မာအရှိန်အဝါဆိုသည့် အယူအဆမှာ အလွန်ဆန်းကြယ်လှသဖြင့် သာမန်ကျင့်ကြံသူများ လုံးဝမမြင်နိုင်ပေ ဝိညာဥ်နှင့်ခန္ဓာပေါင်းစပ်ခြင်းအဆင့် ပညာရှင်များသာလျှင် အရိပ်အယောင်အချို့ကို ဝေဝါးစွာ မြင်နိုင်ခြင်း ဖြစ်သည်။

ဝိညာဉ်ဓားဂိုဏ်း၏ ပထမအကြီးအကဲ ယွီရှောင်ဇီသည် ဂိုဏ်း၏ကံကြမ္မာအရှိန်အဝါ မြင့်တက်လာသည်ကို မြင်သောအခါ အလွန် စိတ်လှုပ်ရှားသွားသည်။ ယဲ့ဖန်ကို ဂိုဏ်းချုပ်အဖြစ် တင်မြှောက်လိုက်သည့် သူ၏ ဆုံးဖြတ်ချက်မှာ မှန်ကန်ခဲ့သည်ဟု သူ တွေးလိုက်မိသည်။

စင်အောက်ရှိ အမျိုးသမီးအချို့မှာ ယဲ့ဖန်ကို မျှော်လင့်ချက်များစွာဖြင့် ကြည့်နေကြသည်။ အထူးသဖြင့် လင်ကျောက်လန်၏ မျက်လုံးများမှာ ဝေဝါးနေပြီး နက်ရှိုင်းသော နေရာတွင် ရူးသွပ်မှုများ ဖုံးကွယ်နေသည်။

"စောင့်နေလိုက်ပါ ယဲ့ဖန် မင်းက ငါ့တစ်ယောက်တည်းအတွက်ပဲ ဖြစ်ရမယ်။ မင်းဘေးက တခြားမိန်းမတွေကိုတော့ ငါ တစ်ယောက်ပြီးတစ်ယောက် သေမင်းဆီ ပို့ပေးမယ်" လင်ကျောက်လန်သည် သူမ၏ နှုတ်ခမ်းကို လျက်လိုက်ပြီး မျက်နှာမှာ ထူးဆန်းသော အဖျားတက်သည့်အလား နီမြန်းနေသည်။

လျိုချင်အာသည် အကြီးအကဲများ၏ နေရာအစွန်ဆုံးတွင် ထိုင်နေသည်။ သူမ၏ မျက်နှာမှာ ဖြူဖျော့နေဆဲဖြစ်ပြီး ဒဏ်ရာများမှာ လုံးဝ မပျောက်ကင်းသေးသည်မှာ သိသာလှသည်။

သူမယဲ့ဖန်ကို ကြည့်နေသော အကြည့်များတွင် နူးညံ့မှု၊ ဝမ်းနည်းမှုနှင့် နာကျင်မှုများ ရောပြွမ်းနေသည်။

သူတို့သည် တစ်ဦးကိုတစ်ဦး အလွန်ချစ်ခဲ့ကြပြီး နောက်ဆုံးတွင် ချစ်ခြင်း၏ အသီးအပွင့်ကို ရရှိခဲ့သော်လည်း သူမ မကာကွယ်နိုင်ခဲ့ပေ။

ဒါတွေအားလုံးက ရှောင်ချီကြောင့်ပဲ ရှောင်ချီသာ မရှိရင် သူမနဲ့ ယဲ့ဖန်က ကောင်းကင်အောက်မှာ အပျော်ဆုံးစုံတွဲ ဖြစ်နေမှာ သေချာသည်။

"ညီမလေး မင်းရဲ့ယောက်ျားသူငယ်ချင်းမှာ ချစ်သူတွေ အများကြီး ရှိပုံရတယ်နော်"

ဧည့်သည်တော်နေရာ အထက်ဆုံးတွင် ထိုင်နေသော အိမ်ရှေ့စံ ကျောက်ဝူကျိက ဘေးနားရှိ အမျိုးသမီးကို ကြည့်ကာ ခပ်ဖွဖွ ရယ်မောလျက် ခေါင်းခါပြလိုက်သည်။

"ထူးချွန်တဲ့လူတွေ ဘေးမှာ ယင်ကောင်တွေ ဝိုင်းနေတာ သဘာဝပါပဲ ဒါပေမဲ့ ယဲ့ဖန်ရဲ့ ဘေးမှာရှိတဲ့ တစ်ဦးတည်းသော ကံပါလာတဲ့ အမျိုးသမီးက ကျွန်မပဲ" သတ္တမမင်းသမီး က ယုံကြည်မှုရှိရှိ ပြုံးလိုက်ပြီး လင်ကျောက်လန်နှင့် အခြားသူများကို အထင်သေးစွာ ကြည့်လိုက်သည်။

လူတိုင်း၏ အာရုံစိုက်ခြင်းကို ခံနေရသော ယဲ့ဖန်မှာမူ ထိုမနာလိုဖြစ်နေကြသော အမျိုးသမီးများကို ဂရုမစိုက်ပေ။

ယင်းအစား ဝိညာဉ်ဓားဂိုဏ်း၏ ဂိုဏ်းချုပ်ရာထူးကို လေးလေးနက်နက် လက်ခံနေသည်။ ယနေ့မှစ၍ သူသည် နတ်ဘုရားနန်းတော်၏ နတ်ဘုရားသားတော် ဖြစ်ရုံသာမက ဝိညာဉ်ဓားဂိုဏ်း၏ ဂိုဏ်းချုပ်လည်း ဖြစ်လာခဲ့ပြီဖြစ်သည်။

ဤဂုဏ်ပုဒ်နှစ်ခုနှင့်ဆိုလျှင် ယဲ့ဖန်သည် ဝေနိုင်ငံတော်တစ်ခုလုံးတွင် ရေရရှိသော ငါးကဲ့သို့ ဖြစ်လာပေလိမ့်မည် သူသည် ကမ္ဘာပေါ်ရှိ ပညာရှင်များနှင့် ပါရမီရှင် အားလုံးကို ခြေဖဝါးအောက်တွင် နင်းခြေနိုင်တော့မည်ဖြစ်သည်။

"နတ်ဘုရားနန်းတော်ရဲ့ ဌာနခွဲ ရှစ်ခုဟာ နောက်လိုက်တွေနဲ့အတူ ဝိညာဉ်ဓားဂိုဏ်းဆီမှာ သစ္စာခံပါတယ်" ယဲ့ဖန်က အောက်ရှိ လူအုပ်ကို စကားပြောမည်အပြုမှာပင် ကောင်းကင်ယံ၌ အလံရှစ်ခု ရုတ်တရက် လွင့်ပျံလာပြီး ဝိညာဉ်ဓားဂိုဏ်း တောင်ခြေတွင် နောက်လိုက်ပေါင်း သောင်းချီ၍ ပေါ်လာတော့သည်။

"မြောက်ပင်လယ်ကျန့်မိသားစုကလည်း ဝိညာဉ်ဓားဂိုဏ်းထံ သစ္စာခံဖို့ ဆန္ဒရှိပါတယ်"

နန်းဆောင်အတွင်းရှိ လူများ မတုံ့ပြန်နိုင်ခင်မှာပင် လူပုံရိပ်ပေါင်း တစ်ထောင်ကျော်မှာ အဝေးမှ ပျံသန်းလာကြသည်။

အလံများ လွင့်ပျံနေသော ပျံသန်းသည့် လှေပေါင်း ဒါဇင်နှင့်ချီကာ ခန့်ညားလှသော အရှိန်အဝါနှင့်အတူ ဆိုက်ရောက်လာကြသည်။

"နဂါးပျံမျိုးနွယ်က နဂါးနက်လေးကလည်း အစ်ကိုကြီးယဲ့ဖန်ဆီမှာ သစ္စာခံဖို့ ဆန္ဒရှိပါတယ် ကျေးဇူးပြုပြီး ကျွန်တော့်ကို လက်ခံပေးပါ အစ်ကိုကြီး" ဝိညာဉ်ဓားဂိုဏ်း အထက်တွင် နဂါးပျံ၏ ပုံရိပ်ယောင်တစ်ခု ပေါ်လာပြီး ကျယ်လောင်စွာ ဟိန်းဟောက်လိုက်သဖြင့် လူတိုင်း၏ အာရုံမှာ ထိုနေရာသို့ ရောက်သွားတော့သည်။

ဒါတွေက ဘာတွေလဲ နတ်ဘုရားနန်းတော်က ယဲ့ဖန် ပိုင်တာဆိုတော့ ဝိညာဉ်ဓားဂိုဏ်းဆီ သစ္စာခံတာက နားလည်ပေးလို့ရတယ်။ ဒါပေမဲ့ မြောက်ပင်လယ်ကျန့်မိသားစုက နာမည်ကြီးတဲ့ ဒေသခံမိသားစုကြီးလေ။

သူတို့က ဘာလို့ အခုလိုအချိန်မှာ ဝိညာဉ်ဓားဂိုဏ်းဆီမှာ သစ္စာခံဖို့ ရွေးချယ်လိုက်တာလဲ ဒါကလည်း ယဲ့ဖန်ကြောင့်ပဲလား။

ရေကန်ထဲမှာရှိနေတဲ့ ရွှေငါးက သာမန်မဟုတ်ဘူး လေနဲ့ တိမ်ကို တွေ့လိုက်တာနဲ့ နဂါးဖြစ်သွားတာပဲ။ ယဲ့ဖန်ဆိုတဲ့ ဒီကောင်လေးက သာမန်မဟုတ်ဘူးဆိုတာ ငါ အစကတည်းက သိသားပဲ။

ဒီနေ့က သူ့ရဲ့တက်လမ်းနေ့ပဲ အခုကစပြီး ယဲ့ဖန်ဆိုတဲ့ နာမည်က ယွီကျူကျွန်းတစ်ခုလုံးမှာ ဟိန်းထွက်သွားတော့မှာပဲ။

အောက်ရှိ လူအုပ်မှာ တီးတိုးပြောဆိုနေကြပြီး ဝိညာဉ်ဓားဂိုဏ်း တံခါးဝရှိ ထောင်ပေါင်းများစွာသော လူပုံရိပ်များကို စိတ်လှုပ်ရှားစွာ ကြည့်နေကြသည်။

နဂါးနက်လေး မင်းက လူသားတွေရဲ့ နယ်မြေထဲကို ပေါ်ပေါ်ထင်ထင် လာရဲသေးတယ်ပေါ့ မင်း ငါ့မိသားစုရဲ့ လူကြီးပေါင်း ၃၀ ကျော်ကို ဝါးမြိုခဲ့တယ် မိန်းမငယ်လေး တစ်ဒါဇင်ကျော်ကိုလည်း ပြန်ပေးဆွဲသွားခဲ့တယ် ဒီနေ့ ငါ့မိသားစုရဲ့ လူကြီးတွေအတွက် ငါ မင်းကို သတ်ပြီးကင်စားမယ်။

သန်မာထွားကြိုင်းသော အမျိုးသားတစ်ဦးသည် ဟင်းလင်းပြင်ရှိ နဂါးပျံပုံရိပ်ကို လက်ညှိုးထိုးကာ ဒေါသတကြီး အော်ဟစ်လိုက်သည်။

ဂလန်း... သတ္တုချင်း ထိခိုက်သံနှင့်အတူ ခန့်ညားလှသော ဝိညာဉ်ချီများ လွင့်စင်သွားသဖြင့် လူတိုင်း၏ အာရုံမှာ လေပေါ်သို့ ရောက်သွားကြသည်။

ငါမှတ်မိပြီ ဒီနဂါးနက်လေးက ဘယ်သူလဲဆိုတာ လွန်ခဲ့တဲ့ ရက်အနည်းငယ်က ဒီနဂါးပျံလေးက နယ်စပ်က ရွာတစ်ရွာလုံးကို ဝါးမြိုခဲ့တာလေ။ သူ ဒီနေရာကို လာရဲလိမ့်မယ်လို့ ငါ မထင်ထားဘူး။

"အဲ့ဒီ လူသန်ကြီးက ယန်မိသားစုက ထင်တယ် ယန်မိသားစုက မြောက်ဘက်နယ်စပ်ကို မျိုးဆက်အလိုက် စောင့်ရှောက်လာတဲ့ သစ္စာရှိမျိုးချစ်တွေလေ သူတို့က ဒီနဂါးပျံလေးနဲ့ ဘယ်လိုလုပ်ရန်ငြိုးရှိနေရတာလဲ"

မင်း မမြင်ဘူးလားနဂါးပျံတွေမှာ ထူးခြားချက် ၃ ခု ရှိတယ် ပထမက ကာမရာဂကြီးတာ ဒုတိယက လောဘကြီးတာ တတိယက လူသားတွေကို စားတာပဲ ခုနက လူငယ်လေး ပြောသွားတယ် မဟုတ်လား။

ဒီနဂါးပျံလေးက သူ့ရဲ့ဘိုးဘေးတွေနဲ့ အကြီးအကဲ ၃၀ ကျော်ကို စားခဲ့တယ်တဲ့။ ရန်ငြိုးက အဲ့ဒီက စတာနေမှာပေါ့။

ရင်ပြင်ပေါ်ရှိ ကျင့်ကြံသူ အများအပြားမှာ ဝင်ရောက်မတားဆီးကြဘဲ ပွဲကြည့်ပရိသတ်အဖြစ်သာ စောင့်ကြည့်နေကြသည်။ သူတို့အတွက်ကတော့ ပြဿနာ ပိုကြီးလာလေ ပိုကောင်းလေပင်။

ထို့အပြင် ဤနေရာမှာ ဝိညာဉ်ဓားဂိုဏ်း၏ နယ်မြေဖြစ်သဖြင့် မည်သည့်အရာ ဖြစ်ပျက်ပါစေ ဝိညာဉ်ဓားဂိုဏ်းတွင်သာ နှိမ်နင်းရန် သို့မဟုတ် ဖြေရှင်းရန် တာဝန်ရှိပေသည်။