အခန်း (၁၀)  ကောင်းကင်ကြည့်မှန်ကို ပင့်ဖိတ်ခြင်း

အတန်ကြာ ကြိုးစားအားထုတ်ပြီးနောက် နောက်ဆုံးတွင် သူတို့နှစ်ဦးသည် ဟောက်ထျန်းစေတီကို ဝိညာဉ်အစီအရင်အတွင်း၌ အောင်မြင်စွာ တံဆိပ်ခတ်နိုင်ခဲ့ကြသည်။

စေတီအတွင်းမှ မူလဝိညာဉ်အနှစ်သာရများ ပျောက်ကွယ်သွားသည့်နှုန်းမှာ တဖြည်းဖြည်း နှေးကွေးသွားသည်ကို ခံစားလိုက်ရသဖြင့် ဆရာနှင့်တပည့်နှစ်ဦးလုံးမှာ နောက်ဆုံးတွင် သက်ပြင်းချနိုင်တော့သည်။

တပည့်... ဒီစေတီထဲမှာ ကျန်နေတဲ့ မူလဝိညာဉ်အနှစ်သာရတွေကို မြန်မြန်စုပ်ယူလိုက်တော့။ အဲဒီသူခိုးက စေတီထဲက အနှစ်သာရ ၄၀ ရာခိုင်နှုန်းကို စုပ်ယူသွားပြီးပြီ။ မင်း မြန်မြန်လုပ်ပြီး ကျန်တဲ့ ၆၀ ရာခိုင်နှုန်းကို အကုန်ရအောင် စုပ်ယူလိုက်

မင်း ကျင့်ကြံနေတုန်း ငါကအကာအကွယ်ပေးထားမယ် တစ်ချိန်တည်းမှာပဲ အဲဒီသူခိုး ဘယ်မှာရှိလဲဆိုတာကို ငါလိုက်ရှာကြည့်မယ်။

ဖြူဖွေးသော ဝတ်စုံနှင့် ဝိညာဉ်ပုံရိပ်သည် ယဲ့ဖန်ကို အစီအရင်အတွင်းသို့ ပို့ဆောင်ပေးလိုက်ပြီး ဟောက်ထျန်းစေတီ၏ မူလဝိညာဉ်အနှစ်သာရကို ချက်ချင်းစုပ်ယူရန် ပြောကြားလိုက်သည်။

ယဲ့ဖန်သည်လည်း တစ်စက္ကန့်မျှပင် မနှောင့်နှေးဝံ့ပေ။ သူသည် ချက်ချင်း တင်ပျဉ်ခွေထိုင်လိုက်ပြီး သူ၏ဆရာ သင်ကြားပေးထားသော ကျင့်စဉ်ကို အသုံးပြုကာ စေတီအတွင်းမှ အနှစ်သာရများကို အရှိန်အဟုန်ဖြင့် စုပ်ယူတော့သည်။

သူနှင့် အပြိုင်အဆိုင် အနှစ်သာရများကို လုယူစုပ်ယူနေသော ဆွဲအားတစ်ခုကို သူ ခပ်ရေးရေးခံစားနေရသည်။

ကံကောင်းသည်မှာ ဝိညာဉ်အစီအရင်၏ ပိတ်ဆို့ထားမှုကြောင့် ထိုဆွဲအားမှာ သူ့အတွက် ကြီးမားသော ပြဿနာမပေးနိုင်တော့ခြင်းပင်။

အချိန်များ တဖြည်းဖြည်း ကုန်ဆုံးသွားသည်။ ယဲ့ဖန်သည် မျက်လုံးမှိတ်၍ အနှစ်သာရများကို အငမ်းမရ စုပ်ယူနေစဉ် ဖြူဖွေးသော ဝတ်စုံနှင့် အမျိုးသမီးမှာ ထိုဆွဲအား၏ အရင်းအမြစ်ကို လိုက်ရှာရန် အရပ်မျက်နှာအနှံ့ စူးစမ်းနေတော့သည်။

ဖြူဖွေးသော ဝတ်စုံနှင့် အမျိုးသမီးသည် သဲလွန်စအချို့ကို တွေ့ရှိပြီး တောင်နောက်ဘက်သို့ ပျံသန်းသွားရန် ပြင်ဆင်နေစဉ်မှာပင် ဂိုဏ်းအတွင်း၌ တစ်စုံတစ်ခုကို ရှာဖွေနေပုံရသော ပုံရိပ်တစ်ခု ရုတ်တရက် ပေါ်လာသည်။

ထိုပုံရိပ်မှ ထွက်ပေါ်နေသော အရှိန်အဝါကို ခံစားလိုက်ရသဖြင့် အမျိုးသမီးသည် သူမ၏ကိုယ်ကို အလျင်အမြန် ဖုံးကွယ်လိုက်ပြီး ယဲ့ဖန်၏အနားသို့ ပြန်လာခဲ့သည်။

လောလောဆယ်တွင် သူမသည် ဝိညာဉ်ခန္ဓာကိုယ်တစ်ခုသာ ဖြစ်သဖြင့် အာရုံစိုက်ခံရမည်ကို အလွန်ကြောက်ရွံ့နေသည်။

ဆရာ... ကျွန်တော် စေတီထဲက မူလဝိညာဉ်အနှစ်သာရတွေကို အကုန်စုပ်ယူပြီးပါပြီ။ ဒါပေမဲ့ ကံဆိုးတာက တချို့ကိုတော့ အဲဒီသူခိုးက လုသွားနိုင်ခဲ့တယ်။

မင်းတို့နှစ်ယောက် လုယူလိုက်တဲ့ အနှစ်သာရပမာဏက အတူတူလောက်ပဲ တစ်ယောက်ကို ၅၀ ရာခိုင်နှုန်းစီလောက် ရသွားကြတာ မင်း ဝိညာဉ်ဓားဂိုဏ်းထဲကို ရောက်သွားတဲ့အခါ အဲဒီလူကို သတိထားရမယ်။ သူက အနာဂတ်မှာ မင်းအတွက် ခြိမ်းခြောက်မှုတစ်ခု ဖြစ်လာမှာ အသေအချာပဲ။

ကောင်းပြီ... အချိန်က သိပ်မရှိတော့ဘူး တခြားဟာတွေကို စိုးရိမ်မနေနဲ့တော့။ အခုချက်ချင်း လျှို့ဝှက်နည်းစနစ်ကို သုံးပြီး ဒီစေတီကို ရှောင်ချီရဲ့ ကျင့်ကြံရေးဂူထဲ ပို့လိုက်တော့။

ငါ ခုနက ပုံရိပ်တစ်ခုကို မြင်လိုက်တယ်၊ အဲဒါ မင်းတို့ဂိုဏ်းရဲ့ ဘိုးဘေးဟောင်းဖြစ်လိမ့်မယ်။ သူတို့ ဂိုဏ်းရဲ့ အဖိုးတန်ရတနာ ခိုးယူခံရတာကို သိသွားပြီး အပြင်းအထန် လိုက်ရှာနေကြပြီ ထင်တယ်။

ဖြူဖွေးသော ဝတ်စုံနှင့် ပုံရိပ်က အလောတကြီး ပြောလိုက်သည်။ အကယ်၍ ထိုအဖိုးကြီးများသာ သူတို့လက်ထဲတွင် ဟောက်ထျန်းစေတီရှိနေစဉ်မှာပင် မူလဝိညာဉ်အနှစ်သာရများ အစုပ်ယူခံထားရသည်ကို သိသွားပါက ချက်ချင်း ဒေါသပေါက်ကွဲကြပေလိမ့်မည်။

ယဲ့ဖန်ကို ထိုနေရာတွင်တင် သတ်ပစ်လျှင်တောင် အံ့သြစရာ မဟုတ်ပေ။

ယဲ့ဖန်က ခေါင်းညိတ်လိုက်ပြီး အခန်းပြင်သို့ အမြန်ထွက်လာသည်။ သူသည် ကြိုတင်ပြင်ဆင်ထားသော ဝိညာဉ်အစီအရင်ကို အသက်သွင်းလိုက်ပြီး စေတီကို ၎င်းအတွင်း၌ ထားလိုက်သည်။ နောက်တစ်စက္ကန့်တွင် အစီအရင်မှ အလင်းများ တောက်ပလာပြီး စေတီမှာ ဘာမှမရှိခဲ့သလိုပင် ရုတ်တရက် ပျောက်ကွယ်သွားတော့သည်။

တစ်ချိန်တည်းမှာပင် ရှောင်ချီ၏ ကျင့်ကြံရေးဂူအတွင်း၌လည်း လျှို့ဝှက်ထားသော အစီအရင်အသေးစားလေးတစ်ခု ရှိနေသည်။ မှိန်ပြပြအလင်းရောင်တစ်ခု လက်သွားပြီးနောက် ဟောက်ထျန်းစေတီသည် ဂူ၏ထောင့်တစ်နေရာတွင် ပေါ်လာတော့သည်။

အကယ်၍ ရှောင်ချီသာ ဒီမှာ ရှိနေမယ်ဆိုရင် ဒီအစီအရင်က တစ်စုံတစ်ယောက်က တမင်လုပ်ထားတာဆိုတာကို အသေအချာ သိသွားမှာပဲ။

ပြီးတော့ သူ့ရဲ့ ကျင့်ကြံရေးဂူထဲကို သံသယမဖြစ်ဘဲ ဝင်ထွက်နိုင်တာက သူ့နဲ့ နီးစပ်သူတွေပဲ ရှိတာ မဟုတ်လား။

တောင်နောက်ဘက်တွင် ရှောင်ချီသည် ဖြည်းညှင်းစွာ မျက်လုံးဖွင့်လိုက်သည် သူသည် ညစ်ညမ်းသော လေများကို အပြင်သို့ သက်ပြင်းချသလို မှုတ်ထုတ်လိုက်သည်။

ဒီမူလဝိညာဉ်အနှစ်သာရက တကယ်ကို အံ့မခန်းတာပဲ ဒါနဲ့ သန့်စင်လိုက်တဲ့ ချီစွမ်းအင်တွေက ပိုပြီး ထူထပ်သန့်စင်လာတယ်။ ဒါနဲ့ ဆေးကြောလိုက်တဲ့ ခန္ဓာကိုယ်ကလည်း ပိုပြီး ကြံ့ခိုင်သန်စွမ်းလာတယ်။

နတ်သန္ဓေအဆင့်ကို တက်လှမ်းပြီး တစ်လတောင် မပြည့်သေးခင်မှာပဲ သူ၏ကျင့်ကြံဆင့်က အစောပိုင်းအဆင့်၏ထိပ်ဆုံးသို့ ရောက်ရှိသွားခဲ့ပြီ။

ဒါ့အပြင် ဒီမူလဝိညာဉ်အနှစ်သာရရဲ့ သန့်စင်ပေးမှုကြောင့် သူ၏တိုက်ခိုက်ရေးစွမ်းရည်က အရင်ကထက် အဆပေါင်းများစွာ တိုးတက်လာခဲ့ပြီ။

အခု ပြန်စဉ်းစားကြည့်မှပဲ ယဲ့ဖန်ရဲ့ ကျင့်ကြံဆင့်က ဘာလို့ ဒီလောက်မြန်မြန် တိုးတက်ပြီး တိုက်ခိုက်ရေးစွမ်းရည်က ဘာလို့ အဲဒီလောက် ကြောက်ဖို့ကောင်းနေရတာလဲဆိုတာ နားလည်သွားတော့တယ်။

ဒါတွေအားလုံးက မှော်ရတနာတွေရဲ့ ဝိညာဉ်အနှစ်သာရကို စုပ်ယူတဲ့ဒီကျင့်စဉ်ကြောင့်ပဲကိုး။

ပြန်စဉ်းစားကြည့်ရင် အကယ်၍သာ သူ အတိတ်ဘဝတုန်းက ဒီကျင့်စဉ်ကို ရခဲ့ပြီး မူလဝိညာဉ်အနှစ်သာရရှိတဲ့ မှော်ရတနာ အနည်းငယ်လောက်သာ ရှာတွေ့ခဲ့မယ်ဆိုရင် သူ အဲဒီလို နောင်တတွေနဲ့ သေဆုံးသွားမှာ မဟုတ်ဘူး။

ဒါပေမဲ့ ဘာမှမတတ်နိုင်ဘူးလေ။ ယဲ့ဖန်က ဒီကမ္ဘာရဲ့ ကံကြမ္မာရွေးချယ်ခံဖြစ်နေတာကိုး။

သူ့လို နင်းခြေခံတစ်ယောက်အတွက် ဒီကျင့်စဉ်ကို ရခဲ့တာကတင် အကြီးမားဆုံးသော အခွင့်အရေးဖြစ်နေပါပြီ။ မှော်ရတနာတွေကိုပါရဖို့ မျှော်လင့်တာကတော့ စိတ်ကူးယဉ်အိပ်မက်သက်သက်ပါပဲ။

"(၃) နှစ်လားရပါတယ်။ သူတို့ တကယ်ပဲ ငါ့ကိုဒီမှာ (၃) နှစ် ထားမယ်ဆိုရင်လည်း အေးအေးဆေးဆေး နေရတာပေါ့" ရှောင်ချီသည် စိတ်အေးလက်အေး ပြုံးလိုက်ပြီး သူ၏ခန္ဓာကိုယ်ကို ကျောက်နံရံတွင် မှီလိုက်သည်။ ကောင်းကင်ယံမှ ကြယ်ပွင့်များကို ကြည့်ရင်း သူသည် နားလည်မှုရှိသော အပြုံးတစ်ခုကို ပြုံးလိုက်မိသည်။

ဘုန်း... ဘုန်း... ဘုန်း... ရှောင်ချီ လဲလျောင်းနေရင်းကနေ ဘယ်လိုဖြစ်ပြီး အိပ်ပျော်သွားမှန်းမသိပေ။

သို့သော် သူသည် တဝက်နိုးတဝက်အိပ် ဖြစ်နေစဉ်မှာပင် ကမ္ဘာပျက်မတတ် ဟိန်းထွက်လာသော စည်တီးသံများကြောင့် ထိတ်လန့်နိုးလာခဲ့ရသည်။

ဂိုဏ်းရဲ့ အဖိုးတန်ရတနာ ခိုးယူခံရတာကို သူတို့ သိသွားကြပြီ ထင်တယ်။ အဲဒီ အဖိုးကြီးတွေ နောက်ဆုံးတော့ ကျင့်ကြံခြင်းကနေ ထွက်လာကြပြီပေါ့။

ရှောင်ချီသည် သူ၏မျက်လုံးများကို ပွတ်လိုက်ပြီး ဂိုဏ်းခန်းမဆောင်ကြီးဘက်သို့ လှည့်ကြည့်ကာ မျက်မှောင်အနည်းငယ်ကြုတ်လျက် သူ့ဘာသာ ရေရွတ်လိုက်သည်။

ဒါပေမဲ့ ဒါတွေအားလုံးက သူ့နဲ့ ဘာမှမဆိုင်တော့ဘူး သူကတော့ တောင်နောက်ဘက်မှာပဲ အေးအေးဆေးဆေး နေမှာပါ။ အကယ်၍ အဲဒီလူတွေက သူ့ကို သံသယဖြစ်ပြီး သူ့ရဲ့ ကျင့်ကြံရေးဂူကို လာရှာရင်တောင် သူ့မှာ ခိုင်လုံတဲ့ အထောက်အထား ရှိပြီးသားပဲ။ ဒီတောင်နောက်ဘက်မှာ ကျင့်ကြံသူတွေကို စောင့်ကြည့်တဲ့ ဝိညာဉ်အစီအရင်တွေနဲ့ ပြည့်နေတာလေ။

အရင်တုန်းကတော့ ဒီအစီအရင်တွေက အလွန် စိတ်အနှောင့်အယှက် ဖြစ်စရာ ကောင်းသော်လည်း အခုတော့ ရှောင်ချီအတွက် အပြစ်မရှိကြောင်း သက်သေပြဖို့ အကောင်းဆုံး အထောက်အထားတွေ ဖြစ်လာတော့သည်။

ယခုအချိန်တွင် ဂိုဏ်းခန်းမဆောင်ကြီးအတွင်း၌ အကြီးအကဲ ၃၀ ကျော်တို့သည် ရှေ့ဆုံးတွင် ဘေးတစ်ဖက်တစ်ချက်စီ စီတန်းရပ်နေကြသည်။

ခန်းမအောက်ဘက်ရှိ ရင်ပြင်တွင် တပည့်ပေါင်း ၆၀၀ ကျော်တို့မှာ စနစ်တကျ စီတန်းရပ်နေကြသည်။ လူအုပ်ကြီးမှာ ထူထပ်လှသော်လည်း အလွန်ပင် ငြိမ်သက်နေကြသည်။

အပြစ်ပေးခံထားရသော တပည့်များနှင့် တာဝန်ဖြင့် အပြင်ရောက်နေသူများမှလွဲ၍ ဝိညာဉ်ဓားဂိုဏ်း၏ တပည့်အားလုံး ရောက်ရှိနေကြခြင်း ဖြစ်သည်။

အစည်းအဝေး၏ ထိပ်ဆုံးတွင် ဂိုဏ်းချုပ်သည် အောက်ဘက်ရှိ တပည့်များကို အေးစက်သော မျက်နှာပေးဖြင့် ကြည့်နေသည်။

ဂိုဏ်းချုပ်၏ ဘယ်ဘက်နှင့် ညာဘက်တွင် အကြီးအကဲ သုံးဦး ရပ်နေသည်  အမျိုးသား နှစ်ဦးနှင့် အမျိုးသမီး တစ်ဦးဖြစ်သည်။ ထိုသုံးဦးမှာ ဆံပင်များ ဖြူဖွေးနေသော်လည်း မျက်နှာများမှာ လူငယ်များကဲ့သို့ပင် နုပျိုနေကြသည်။

သို့သော် သူတို့၏ မျက်လုံးများထဲတွင်မူ လူတစ်ယောက်ကို ဝဲကယက်တစ်ခုထဲ ဆွဲခေါ်သွားနိုင်မည့် ထူးဆန်းသော ရင့်ကျက်မှုများ ကိန်းအောင်းနေသည်။

ဂိုဏ်းရဲ့အဖိုးတန်ရတနာဖြစ်တဲ့ ဟောက်ထျန်းစေတီ ခိုးယူခံလိုက်ရပြီ။ တပည့်အားလုံး ဒီမှာပဲရပ်နေကြ ဘယ်သူမှ နည်းနည်းလေးတောင် မလှုပ်ရဘူး။

အကြီးတန်း အကြီးအကဲ ဂိုဏ်းရဲ့ မှော်လက်နက်ဖြစ်တဲ့ ကောင်းကင်ကြည့်မှန်ကို ပင့်ဖိတ်ပေးပါ ဂိုဏ်းချုပ်၏အသံမှာ အေးစက်နေပြီး အောက်ဘက်ရှိ အကြီးအကဲ ၃၀ ကျော်ထဲမှ တစ်ဦးကို လှမ်းအော်လိုက်သည်။

"ဟုတ်ကဲ့ပါ ဂိုဏ်းချုပ်" မျက်နှာတွင် အရေးအကြောင်း အနည်းငယ်ရှိသော ဆံပင်ဖြူ အကြီးအကဲတစ်ဦးက ရှေ့သို့တက်၍ ဦးညွှတ်ပြောဆိုလိုက်သည်။

ထို့နောက် သူ၏လက်များကို ခါယမ်းလိုက်ရာ ဝိညာဉ်ဓားဂိုဏ်း၏ အထက်ကောင်းကင်ယံ၌ ဝိညာဉ်စွမ်းအားများ တဟုန်ထိုး ထွက်ပေါ်လာသည်။ မှန်တစ်ချပ်သည် ကောင်းကင်ယံတွင် နေမင်းတစ်စင်းကဲ့သို့ တောက်ပသော အလင်းတန်းများ ထုတ်လွှတ်လျက် ဖြည်းညှင်းစွာ ပေါ်လာတော့သည်။

"အကြီးအကဲတွေ ဂိုဏ်းချုပ်နဲ့ အကြီးတန်း အကြီးအကဲ သုံးဦးကျွန်တော်နဲ့အတူ ပူးပေါင်းပြီး ဒီမှန်ကို အသက်သွင်းပေးကြပါ" အကြီးတန်း အကြီးအကဲသည် ကြမ်းပြင်ပေါ်တွင် တင်ပျဉ်ခွေထိုင်လိုက်သည် ပြင်းထန်သော ဝိညာဉ်စွမ်းအားများမှာ ကောင်းကင်ယံရှိ တောက်ပနေသော မှန်ဆီသို့ စီးဝင်သွားတော့သည်။

ရှိနေသော သူများအားလုံး တင်ပျဉ်ခွေထိုင်လိုက်ကြပြီး သူတို့၏ ဝိညာဉ်စွမ်းအားများကို ကောင်းကင်ရှိ ကောင်းကင်ကြည့်မှန်အတွင်းသို့ အင်တိုက်အားတိုက် ထည့်သွင်းလိုက်ကြသည်။

ထို့နောက် ချက်ချင်းပင် ကောင်းကင်ကြည့်မှန်အတွင်း၌ ပုံရိပ်တစ်ခု ပေါ်လာသည် မှောင်မည်းနေသော ကျင့်ကြံရေးဂူတစ်ခု၏ ထောင့်တစ်နေရာတွင် စေတီတစ်ဆူမှာ တိတ်ဆိတ်စွာ ရှိနေသည်။

စေတီပေါ်မှ အလင်းရောင်မှာ မှိန်ဖျော့နေပြီး လူ့လောကရှိ သာမန်ပစ္စည်းတစ်ခုကဲ့သို့ပင် ဖြစ်နေသည်။ ၎င်းတွင် မည်သည့်နတ်ဘုရားအရှိန်အဝါမျှမရှိဘဲ ဈေးထဲတွင် တွေ့ရတတ်သည့် သာမန်ပစ္စည်းတစ်ခုနှင့်ပင် တူနေတော့သည်။

မှန်ထဲမှ ပုံရိပ်မှာ တဖြည်းဖြည်း ကျယ်ပြန့်လာပြီးနောက် ထိုကျင့်ကြံရေးဂူ၏ တည်နေရာမှာ လူတိုင်း၏မျက်စိရှေ့တွင် ပေါ်လာတော့သည်။

ဒါ... ဒါက ခရမ်းရောင်တိမ်တိုက်တောင်ထိပ်မဟုတ်လား။

မဟုတ်သေးပါဘူး... ဒီနေရာက ဘာလို့ ဒီလောက် ရင်းနှီးနေရတာလဲ။

ဒါကနတ်ဘုရားသားတော်ညီလေးရှောင်ချီရဲ့ ကျင့်ကြံရေးဂူပဲ ရင်ပြင်ပေါ်ရှိ ထောင်နှင့်ချီသော တပည့်များသည် မှန်ထဲမှ ပုံရိပ်ကို ကြည့်ရင်း အချင်းချင်း တီးတိုးပြောဆိုနေကြတော့သည်။