အခန်း (၁) နင်းကန်ခံရသည့် ကျောက်တုံးလေးတစ်တုံး၏ဘဝ

ဝိညာဉ်ဓားဂိုဏ်းအတွင်း၌ ပျော်ပွဲရွှင်ပွဲ အငွေ့အသက်များလွှမ်းခြုံနေပြီး ဂိုဏ်းတစ်ခုလုံးအပေါ်သို့မင်္ဂလာရှိသော ရောင်ခြည်တော်များ ဖြာကျနေသည်။

ယနေ့သည် ဝိညာဉ်ဓားဂိုဏ်း၏နတ်ဘုရားသားတော် စေ့စပ်ကြောင်းလမ်းသည့် အခမ်းအနားဖြစ်သည်။ ဂိုဏ်း၏အကြီးအကဲများစွာတို့သည်လည်း သူတို့၏ကျင့်ကြံခြင်းမှ ထွက်လာကြပြီး ကောင်းချီးပေးရန်ရောက်ရှိနေကြသည်။

ဂိုဏ်း၏ခန်းမဆောင်ကြီးအတွင်း၌ လူသားလောကတွင် အသုံးပြုသည့် အနီရောင်ပိတ်စများကိုချိတ်ဆွဲထားသည်။ ခန်းမအတွင်းရှိ ဝိညာဉ်စွမ်းအင်များနှင့် ပေါင်းစပ်လိုက်သောအခါ ၎င်းမှာအလွန်တရာ တောက်ပလွန်းလှသည်။

သို့သော်လည်း ဧည့်သည်များကို ဧည့်ခံရမည့် တောက်ပသော အနီရောင် မင်္ဂလာဝတ်စုံ ဝတ်ဆင်ထားသည့် သတို့သားမှာမူ သူ၏အခန်းထဲတွင် ကျင့်ကြံနေဆဲပင် ဖြစ်သည်။

သတို့သား၏ခန္ဓာကိုယ်မှာ အနည်းငယ် ထူးဆန်းနေသည်။ သူ့ကိုတောက်ပသော အနီရောင်အလင်းတန်းများ ဝန်းရံထားသည်။ ၎င်းက သူ၏ချောမောသောမျက်နှာကို နတ်ဘုရားဆန်သော ဆွဲဆောင်မှုနှင့် ခန့်ညားမှုကို ပေးစွမ်းနေသော်လည်း တစ်ချိန်တည်းမှာပင် စစ်မြေပြင်မှပြန်လာသော သတ်ဖြတ်ခြင်း နတ်ဘုရားတစ်ပါးကဲ့သို့ ကြောက်မက်ဖွယ်ကောင်းပြီး အန္တရာယ်ရှိသောပုံစံမျိုး ပေါက်နေသည်။

ရှောင်ချီသည် ရုတ်တရက် မျက်လုံးများကို ပြူးကျယ်စွာ ဖွင့်လိုက်သည်။ ပဲစေ့ခန့်ရှိသော ချွေးစက်များမှာ သူ၏ခန္ဓာကိုယ်နှင့် အဝတ်အစားများကို ရွှဲနစ်စေခဲ့သည်။

"ဒါက ဘယ်နေရာလဲ ဘာလိုငါ့ ဒီကို ရောက်နေတာလဲ" ရှောင်ချီက ပတ်ဝန်းကျင်ကို ဝေ့ကြည့်လိုက်ရာ အနီရောင်ဝတ်စုံကို ဝတ်ဆင်ထားသည်ကို တွေ့လိုက်ရသည်။

ဒါက သတို့သားဝတ်စုံလား မျက်စိထဲ စူးရှနေသော အနီရောင်ဝတ်စုံကို ကြည့်ရင်း ရှောင်ချီသည် အလွန်ဝေးကွာလှသော အတိတ်မှ အဖြစ်အပျက်များကို ပြန်လည်အမှတ်ရလာသည်။

ငါ့ရဲ့မိစ္ဆာစွမ်းအင်တွေ ဘယ်မှာလဲ ငါ့ရဲ့ ကျင့်ကြံအဆင့်ရောပဲ ရှောင်ချီက သူ၏ ခန္ဓာကိုယ်ကို ပြန်လည်စစ်ဆေးကြည့်သည်။

သူ၏ငယ်ရွယ်နုပျိုသော သွေးနှင့် စွမ်းအင်များမှာ အလွန်ပင် ပြည့်ဝနေသော်လည်း သူ၏ကျင့်ကြံအဆင့်နှင့် မိစ္ဆာစွမ်းအင်များမှာ လုံးဝ ပျောက်ကွယ်သွားခဲ့ပြီဖြစ်သည်။

ငါပြန်ရောက်လာပြီ ငါတကယ်ကြီး ပြန်ရောက်လာတာပဲ။

မင်္ဂလာဝတ်စုံနှင့် သူ၏ပြည့်ဝနေသော ဇီဝအင်အားကိုကြည့်ရင်း ရှောင်ချီသည် မျက်ရည်များကို မထိန်းနိုင်တော့ပေ။

သူ၏ဦးနှောက်အတွင်း၌ မရေမတွက်နိုင်သော မှတ်ဉာဏ်များသည် လျှပ်စီးလက်သကဲ့သို့ တဟုန်ထိုး ဖြတ်သန်းသွားကြသည်။

ရှောင်ချီသည် ငယ်စဉ်ကတည်းက မိဘမဲ့တစ်ဦးဖြစ်ခဲ့သည်။ သူအသက် (၁၂) နှစ်အရွယ်တွင် ဝိညာဉ်ဓားဂိုဏ်းမှ နတ်မိမယ် လင်းယွင်က မိစ္ဆာများကို နှိမ်နင်းရန် တောင်ပေါ်မှ ဆင်းလာစဉ် သူနှင့်ဆုံတွေ့ခဲ့သည်။

သူ၏ ထူးခြားသော အရိုးတည်ဆောက်ပုံကို မြင်သောအခါ သူမက သူ့ကိုတောင်ပေါ်သို့ ခေါ်ဆောင်သွားပြီး တပည့်အဖြစ်လက်ခံခဲ့သည်။

ရောက်ရောက်ချင်းမှာပင် ရှောင်ချီသည် ကြောက်မက်ဖွယ်ကောင်းသော ပါရမီကို ပြသခဲ့သည်။ သုံးလအတွင်းမှာပင် သူ၏ ကျင့်ကြံဆင့်မှာ အခြေခံအုတ်မြစ်တည်ဆောက်ခြင်းအဆင့်သို့ တက်လှမ်းနိုင်ခဲ့ပြီး ဝိညာဉ်ဓားဂိုဏ်း၏စံချိန်ကို ချိုးဖျက်နိုင်ခဲ့သည်။

နောက်ထပ် တစ်နှစ်အကြာတွင် သူသည် ရွှေအမြုတေအဆင့်သို့ ရောက်ရှိခဲ့သည်။ သူသည် ဝိညာဉ်ဓားဂိုဏ်း သမိုင်းတစ်လျှောက် အချိန်အတိုဆုံးနှင့် အသက်အငယ်ဆုံး ရွှေအမြုတေအဆင့်ကျင့်ကြံသူ ဖြစ်လာခဲ့သည်။

နောက်ထပ် သုံးနှစ်ခွဲအကြာတွင်မူ သူသည် ရွှေအမြုတေအထွတ်အထိပ်အဆင့် သို့ ရောက်ရှိခဲ့သည်။

အသက် (၁၆) နှစ်အရွယ်တွင် ဝိညာဉ်ဓားဂိုဏ်း၏နတ်ဘုရားသားတော်ဘွဲ့ကို အပ်နှင်းခြင်း ခံခဲ့ရသည်။ ထိုအချိန်မှစ၍ သူ၏ ကျင့်ကြံခြင်း လမ်းခရီးမှာ အတားအဆီးမရှိ ချောမွေ့ခဲ့သည်။

ထိုသို့သော ပါရမီဖြစ်ဆိုလျှင် သူသည် အောင်မြင်မည့် လမ်းထက်တွင် ရောက်ရှိနေပြီ ဖြစ်သည်။

သို့သော်လည်း အချို့သော လူများနှင့် အချို့သောအဖြစ်အပျက်များကြောင့် သူသည် ချောက်နက်ထဲသို့ ကျဆင်းသွားကာ ထာဝရ ပျက်စီးခြင်းသို့ ရောက်ရှိခဲ့ရသည်။

အသက် (၁၆) နှစ်အရွယ်တွင်နတ်ဘုရားသားတော်အဖြစ် သတ်မှတ်ခံရရုံသာမက ဂိုဏ်းချုပ်ကလည်း သူ့ကို အိမ်ထောင်ဖက် တစ်ဦး သတ်မှတ်ပေးခဲ့သည်။

ဂိုဏ်းချုပ်၏သမီးဖြစ်သူ လင်းကျောင်လန် သည်လည်း ပါရမီထူးချွန်သူဖြစ်သည်။

အသက် (၁၇) နှစ်သာ ရှိသေးသော်လည်း သူမ၏ကျင့်ကြံဆင့်မှာ ရွှေအမြုတေ အလယ်အလတ်အဆင့်သို့ ရောက်ရှိနေပြီ ဖြစ်သည်။

ဂိုဏ်းချုပ်က ရှောင်ချီနှင့် လင်းကျောင်လန်တို့ကို နောက်တစ်နှစ် (ရှောင်ချီ အသက် ၁၇ နှစ်အရွယ်) တွင် စေ့စပ်ရန် အမိန့်ပေးခဲ့သည်။

သို့သော်လည်း ဤစေ့စပ်သည့် နေ့မှစ၍ ရှောင်ချီသည် ချောက်နက်ထဲသို့ တဖြည်းဖြည်း စတင်ခြေချခဲ့ရခြင်း ဖြစ်သည်။

စေ့စပ်ပွဲမတိုင်မီ လင်းကျောင်လန်သည် လေ့ကျင့်ရန်တောင်အောက်သို့ ဆင်းသွားခဲ့သည်။ ထိုစဉ်လူငယ်တစ်ဦးနှင့် မတော်တဆ ဆုံတွေ့ခဲ့ပြီး သူမ၏ဘဝကို ထိုသူအား ပေးအပ်ရန် တိတ်တဆိတ်ကတိပြုခဲ့သည်။

ထို့အပြင် စေ့စပ်ပွဲနေ့တွင် သူမသည် ထိုလူကို ဂိုဏ်း၏ခန်းမဆောင်ကြီးထဲသို့ ခေါ်ဆောင်လာခဲ့သည်။ ဂိုဏ်းချုပ်က သူ၏ သိက္ခာကို စိန်ခေါ်ခံရသည်ဟုခံစားရသဖြင့် ထိုလူကို တောင်ပေါ်မှ ချက်ချင်းနှင်ထုတ်ရန် အမိန့်ပေးခဲ့သည်။

သို့သော် လင်းကျောင်လန်က သေလျှင်သေပါစေဟုဆိုကာ အမိန့်ကိုမနာခံဘဲရှိနေပြီ အကယ်၍ ဂိုဏ်းချုပ်က သူမကို ရှောင်ချီနှင့် အတင်းအဓမ္မ လက်ထပ်ခိုင်းပါက ထိုနေ့၌ပင် ခန်းမထဲ၌ အသေခံမည်ဟု ကြေညာခဲ့သည်။

သူမသည် ယဲ့ဖန်ဆိုသည့် ထိုလူနှင့်အတူ သေအတူရှင်မကွဲ ချစ်သူများ ဖြစ်သွားမည်ဟု ဆိုသည်။

ဂိုဏ်းချုပ်က အစပိုင်းတွင် မယုံကြည်ဘဲ ထိုလူကို အတင်းအဓမ္မ နှင်ထုတ်ရန် ကြိုးစားခဲ့သည်။ သို့သော် လင်းကျောင်လန်က ဝိညာဉ်ပူဇော်ခြင်းနည်းလမ်းကို ချက်ချင်း လုပ်ဆောင်လိုက်သဖြင့် ဂိုဏ်းချုပ် အံ့အားသင့်သွားခဲ့သည်။

သူမသည် သူမ၏ခန္ဓာကိုယ်နှင့်အတူ ဝိညာဉ်ကိုပါ ချေဖျက်ပြီး ကောင်းကင်ဘုံထံသို့ ပြန်လည်ပေးအပ်ရန် ကြိုးစားခဲ့ခြင်း ဖြစ်သည်။

၎င်းက ဂိုဏ်းချုပ်ကို ထိတ်လန့်သွားစေပြီး လင်းကျောင်လန်၏ ပြတ်သားမှုကို မြင်တွေ့သွားစေသည်။ ထို့ကြောင့် မတတ်သာသည့်အဆုံး ယဲ့ဖန်ကို ဂိုဏ်းထဲ၌ နေထိုင်ခွင့်ပြုရန် သဘောတူလိုက်ရသည်။

သို့သော် ဝိညာဉ်ဓားဂိုဏ်းချုပ်နှင့် အကြီးအကဲများ မမျှော်လင့်ထားသည်မှာ ယဲ့ဖန်၏ကျင့်ကြံခြင်းပါရမီမှာ ရှောင်ချီထက်ပင် ပိုမို ကြောက်မက်ဖွယ်ကောင်းနေခြင်း ဖြစ်သည်။

သူသည် ကျင့်ကြံပြီး တစ်လအကြာတွင် အခြေခံအုတ်မြစ်အဆင့်သို့ရောက်ခဲ့ပြီး ရှစ်လအကြာတွင် ရွှေအမြုတေအဆင့်သို့ ရောက်ခဲ့သည်။ နောက်ထပ် သုံးနှစ်အကြာတွင်မူ နတ်သန္ဓေအဆင့်သို့ တိုက်ရိုက် ရောက်ရှိသွားခဲ့သည်။

တစ်ချိန်တည်းမှာပင် ရှောင်ချီကိုယ်တိုင်မှာမူ ကြီးမားသော ပြဿနာတစ်ခုနှင့် ရင်ဆိုင်ခဲ့ရသည်။

ယဲ့ဖန်တောင်ပေါ်သို့ ရောက်လာပြီး တစ်လအကြာတွင် ဂိုဏ်း၏အဖိုးတန် ရတနာဖြစ်သော ဟောက်ထျန်းစေတီအခိုးခံရသည်။

 အကြီးအကဲများက ၎င်းတည်ရှိရာကို တွက်ချက်ကြည့်သောအခါ ရှောင်ချီ၏ ကျင့်ကြံရာဂူအတွင်း၌ ဝှက်ထားသည်ကို တွေ့ရှိခဲ့ကြသည်။

ရှောင်ချီသည် မိမိကိုယ်ကိုယ် မကာကွယ်နိုင်ခဲ့ဘဲ သူ၏အရိုးတည်ဆောက်ပုံမှာ ပိတ်ဆို့ခြင်းခံရကာ တောင်နောက်ဘက်တွင် သုံးနှစ်တိုင်တိုင် အကျဉ်းချခံခဲ့ရသည်။

ထိုသုံးနှစ်အတွင်းများစွာသော ညီငယ်၊ ညီမငယ်များက သူ့ကိုကျော်တက်သွားကြသည်။

ယဲ့ဖန်၏ကျင့်ကြံဆင့်မှာမူ သူ့ကို ကျော်တက်တော့မည့်အခြေအနေတွင် ရှိနေသည်။

ပို၍ဆိုးဝါးသည်မှာ ဂိုဏ်း၏ ရတနာ ဟောက်ထျန်းစေတီကို ပြန်လည်ရရှိခဲ့သော်လည်း ၎င်းအတွင်းရှိ သဘာဝဝိညာဉ်အနှစ်သာရပျောက်ဆုံးသွားသည်ကို ဂိုဏ်းချုပ်က တွေ့ရှိခဲ့ခြင်းဖြစ်သည်။

ဤဝိညာဉ်အနှစ်သာရမှာ စေတီအတွင်းရှိ သဘာဝစွမ်းအင်အစအနတစ်ခု ဖြစ်သည်။ ၎င်းက ကျင့်ကြံခြင်းကို ကူညီပေးနိုင်ရုံသာမက ဤအနှစ်သာရကြောင့်ပင် ဟောက်ထျန်းစေတီမှာ အလွန်စွမ်းအားကြီးမားခဲ့ခြင်း ဖြစ်သည်။

ထို့ကြောင့်သာ ကမ္ဘာ့မှော်လက်နက် အဆင့်သတ်မှတ်ချက်တွင် နံပါတ် (၅) ရရှိခဲ့ခြင်း ဖြစ်သည်။

ဝိညာဉ်အနှစ်သာရမရှိတော့သဖြင့် စေတီ၏ အဆင့်မှာ တဟုန်ထိုး ကျဆင်းသွားခဲ့သည်။ တစ်ချိန်တည်းမှာပင် ဝိညာဉ်ဓားဂိုဏ်းသည်လည်း ဝေနိုင်ငံ၏ အင်အားကြီး ဂိုဏ်းခုနစ်ခု စာရင်းမှ ပြုတ်ကျသွားခဲ့သည်။

ဂိုဏ်း၏အရင်းအမြစ်များ အလုခံရပြီး တပည့်များမှာလည်း အနှိမ်ခံခဲ့ရသည်။ ဤအဖြစ်အပျက် အားလုံးအတွက် ဝိညာဉ်ဓားဂိုဏ်း၏ တပည့်များနှင့် အကြီးအကဲများက ရှောင်ချီကိုသာ အပြစ်တင်ခဲ့ကြသည်။

ရှောင်ချီသည် လူအများ ကြည်ညိုရသော နတ်ဘုရားသားတော်ဘဝမှ ဝိညာဉ်ဓားဂိုဏ်း၏ထာဝရ အပြစ်သားအဖြစ်သို့ ချက်ချင်း ကျရောက်သွားခဲ့သည်။

ထိုအချိန်မှစ၍ ရှောင်ချီ၏ စိတ်နေစိတ်ထားမှာ အေးစက်လာခဲ့သည်။ သူ၏ အတွင်းစိတ်မိစ္ဆာကြောင့် ဆယ်နှစ်တိုင်တိုင် နတ်သန္ဓေအဆင့်သို့ မတက်လှမ်းနိုင်ခဲ့ပေ။

နောက်ပိုင်းတွင် လင်းကျောင်လန်သည် ယဲ့ဖန်နှင့် လက်ထပ်ခဲ့ပြီး သူမ၏သတို့သားဟောင်းဖြစ်သူ ရှောင်ချီကို လုံးဝမေ့လျော့သွားခဲ့သည်။

သူ့ကို သင်ကြားပေးခဲ့သော ဆရာ၊ စီနီယာ မမကြီးနှင့် ဒုတိယ မမကြီးတို့သည်လည်း တစ်နေ့ထက်တစ်နေ့ အေးစက်လာကာ သူ့ကို အဝေးသို့တွန်းပို့ခဲ့ကြသည်။ နောက်ဆုံးတွင် သူတို့၌ ဤကဲ့သို့သော တပည့်နှင့် ညီငယ်ရှိသည်ကိုပင် အသိအမှတ် မပြုတော့ပေ။

သို့သော်လည်း ကံကြမ္မာ၏ဇာတ်လိုက်ဖြစ်သူ ယဲ့ဖန်နှင့် တွေ့သောအခါတွင်မူ သူတို့မှာ လုံးဝ တခြားစီဖြစ်သွားကြသည်။

ဒုတိယ မမကြီးဆိုလျှင် ယဲ့ဖန်တွင် မိသားစုရှိနေသည်ကို သိလျက်နှင့်ပင် သူ၏မယားငယ်အဖြစ် နေထိုင်ရန် အရှက်မရှိ တောင်းဆိုခဲ့သည်။

ရှောင်ချီ နတ်သန္ဓေအဆင့်သို့ ရောက်ချိန်တွင် ယဲ့ဖန်မှာ ဂိုဏ်း၏ဘိုးဘေးအဆင့် ပုဂ္ဂိုလ်များကိုပင် ယှဉ်နိုင်သည့် ဝိညာဉ်ပြန်လည်ခြင်းအဆင့်သို့ ရောက်ရှိနေပြီ ဖြစ်သည်။

သို့သော် ပါရမီရှင်များမှာ အမြဲတမ်း ပြဿနာရှာတတ်ကြသည်။ ယဲ့ဖန်သည် ပြင်ပအင်အားစုများကို သွားရောက် ရန်စခဲ့သဖြင့် ၎င်းတို့က ဝိညာဉ်ဓားဂိုဏ်းတစ်ခုလုံးကို သတ်ဖြတ်ရန် ရောက်ရှိလာကြသည်။

ထိုအချိန်တွင် ယဲ့ဖန်မှာ ဝိညာဉ်ဓားဂိုဏ်း၏ ဂိုဏ်းချုပ်ဖြစ်နေပြီဖြစ်သည်။ ဂိုဏ်းချုပ်ဟောင်းနှင့် ဘိုးဘေးအဆင့် ပုဂ္ဂိုလ်များက အပြင်းအထန် ခုခံခဲ့ကြသော်လည်း ရန်သူကို မယှဉ်နိုင်ခဲ့ကြပေ။

ဂိုဏ်းချုပ်ဟောင်းက ဂိုဏ်း၏မျိုးဆက်သစ်များကို ယဲ့ဖန်ထံ အပ်နှံပြီး ထွက်ပြေးရန် ပြောခဲ့သည်။

တစ်ချိန်တည်းမှာပင် ရှောင်ချီမှာမူ ယဲ့ဖန် ရန်စခဲ့သော ရန်သူများကို ခုခံရန် နောက်ချန်ထားခြင်းခံခဲ့ရသည်။

ယဲ့ဖန်ကို ကာကွယ်ရန်အတွက် သူ၏ဆရာဖြစ်သူ နတ်မိမယ် လင်းယွင်သည် သေစေနိုင်သော ဓားချက်တစ်ခုကို ကြားဖြတ် ခံယူပေးခဲ့သည်။ သူမသည် ခန္ဓာကိုယ်နှင့် ကျင့်ကြံဆင့်များ ပျက်စီးကာသေဆုံးသွားခဲ့ရသည်။ အစမှ အဆုံးထိ သူမသည် ရှောင်ချီကို တစ်ချက်ကလေးပင် လှည့်မကြည့်ခဲ့ပေ။

နောက်ပိုင်းမှသာ ရှောင်ချီ သိလိုက်ရသည်မှာ သူ၏ဆရာသည် တောင်ပေါ်မှဆင်း၍ မိစ္ဆာများကို သတ်စဉ်က ယဲ့ဖန်၏ ကယ်တင်ခြင်းကို ခံခဲ့ရခြင်းဖြစ်သည်။

သို့သော် သူမ၏ ခန္ဓာကိုယ်မှာ ကုသမရသော အဆိပ်မိနေပြီး ထိုအဆိပ်ကို လိင်ဆက်ဆံခြင်းဖြင့်သာ ဖြေဖျောက်နိုင်သဖြင့် သူမ၏ အပျိုစင်ဘဝကို စတေးခဲ့ရခြင်း ဖြစ်သည်။

ယဲ့ဖန်သည် သူမကို ကယ်တင်ရန်အတွက်သာ လုပ်ဆောင်ခဲ့ခြင်းဖြစ်ကြောင်း သူမ သိထားသည်။ ထို့ကြောင့် သူမက ယဲ့ဖန်ကို အပြစ်မတင်ဘဲ သူ့ကိုဝေးဝေးမှသာ ရှောင်နေခဲ့သည်။

သို့သော် အသက်အန္တရာယ်နှင့် ကြုံလာသောအခါ သူမသည် ယဲ့ဖန်ကို ကာကွယ်ရန် ပြတ်ပြတ်သားသား ရှေ့ထွက်ခဲ့သည်။ ထိုအချိန်မှသာ သူမသည် သူမ၏ စိတ်ရင်းကို ရှင်းရှင်းလင်းလင်း မြင်တွေ့သွားခြင်း ဖြစ်ပေလိမ့်မည်။

သူ၏ဆရာ တိုက်ပွဲတွင် သေဆုံးသွားပြီးနောက် ရှောင်ချီသည် အလွန်အမင်း ဒေါသထွက်သွားခဲ့သည်။ သူ၏ သွေးအနှစ်သာရ အားလုံးကို အသုံးပြုပြီး သူ၏ ကျင့်ကြံဆင့်ကို ဝိညာဉ်အသွင်ပြောင်းခြင်းအဆင့်သို့ အတင်းအဓမ္မ မြှင့်တင်လိုက်သည်။

ကြီးကျယ်သော တိုက်ပွဲကြီး ပြီးဆုံးသွားသည်။ ဝိညာဉ်ဓားဂိုဏ်းမှာ ပျက်စီးသွားပြီး အနည်းငယ်သာ လွတ်မြောက်ခဲ့သည်။

ရှောင်ချီသည် အသက်လုတိုက်ပွဲဝင်ခဲ့ပြီး ဝိညာဉ်အသွင်ပြောင်းခြင်းအဆင့် ပညာရှင် သုံးဦးကို သတ်ဖြတ်နိုင်ခဲ့သည်။ လက်တစ်ဖက် ဆုံးရှုံးသွားပြီးနောက် သူသည် ဂိုဏ်းမှ ထွက်ပြေးနိုင်ခဲ့ပြီး အသက်ရှင်ရန် ခက်ခဲစွာ ရုန်းကန်ခဲ့ရသည်။