အခန်း (၉) တုန်လှုပ်ချောက်ချားခြင်း
“အခြေခံအုတ်မြစ် တည်ဆောက်ခြင်း ကျင့်စဉ် လက်ဆောင်ထုပ်ကို အသုံးပြုလိုပါသလား၊၊”
“အသုံးပြုမယ်၊၊”
သူသည် ဝေခွဲမနေဘဲ ဆုံးဖြတ်လိုက်သည်၊၊
“အခြေခံအုတ်မြစ် တည်ဆောက်ခြင်း ကျင့်စဉ် လက်ဆောင်ထုပ်ကို အသုံးပြုနေပါသည်...”
“အခြေခံအုတ်မြစ် တည်ဆောက်ခြင်း ကျင့်စဉ် လက်ဆောင်ထုပ်ကို အောင်မြင်စွာ အသုံးပြုပြီးပါပြီ၊၊ အိမ်ရှင်၏ လက်ရှိကျင့်စဉ်မှာ အခြေခံအုတ်မြစ် တည်ဆောက်ခြင်း အထွတ်အထိပ် အဆင့်သို့ တက်လှမ်းသွားပါပြီ၊၊”
စနစ်၏ အချက်ပေးသံ ထွက်ပေါ်လာသည်နှင့်တစ်ပြိုင်နက် ချန်ချင်းသည် သူ၏ ဒန်တျန်အတွင်း၌ ကျယ်ပြောလှသော စွမ်းအင်များ ပြည့်နှက်သွားသည်ကို ချက်ချင်း ခံစားလိုက်ရသည်၊၊ အားကောင်းသော စွမ်းအင်များသည် သူ၏ သွေးကြောများတစ်လျှောက် ပျံ့နှံ့သွားပြီး ခန္ဓာကိုယ် အစိတ်အပိုင်းအားလုံးသို့ စီးဆင်းသွားကာ တစ်ကိုယ်လုံး စွမ်းအင်များဖြင့် ပြည့်လျှံနေတော့သည်၊၊
သူသည် အခြေခံအုတ်မြစ် တည်ဆောက်ခြင်း အထွတ်အထိပ် အဆင့်သို့ အမှန်တကယ် ရောက်ရှိသွားလေပြီ၊၊
ဂိုဏ်းတစ်ခုခုသို့ မဝင်ရောက်မီ အခြေခံအုတ်မြစ် တည်ဆောက်ခြင်း အဆင့်သို့ ရောက်ရှိခြင်းမှာ အမှန်တကယ်ပင် ချီးကျူးဖွယ်ရာ အောင်မြင်မှုတစ်ခု ဖြစ်သည်၊၊
ကြီးမားသော ဂိုဏ်းကြီးများ၏ အခြေခံ သတ်မှတ်ချက်မှာပင် ချီသန့်စင်ခြင်း အဆင့် (၂) သို့မဟုတ် (၃) ခန့်သာ ရှိခြင်း ဖြစ်သည်၊၊
အကယ်၍ ချန်ချင်းသာ သူ၏ အခြေခံအုတ်မြစ် တည်ဆောက်ခြင်း အထွတ်အထိပ် အဆင့်ဖြင့် ထိုဂိုဏ်းများသို့ သွားရောက်ခဲ့ပါက...
စစ်ဆေးမှုလား၊၊ စစ်ဆေးမှုပင် လိုအပ်မည်မဟုတ်ပေ၊၊ သူသည် အတွင်းစည်းသို့ တိုက်ရိုက်ဝင်ရောက်ခွင့်ရမည် ဖြစ်ပြီး ကိုယ်ပိုင်ဆရာတစ်ဦးကို ရွေးချယ်ကာ ပါရမီရှင်တစ်ဦးကဲ့သို့ ဆက်ဆံခံရမည် ဖြစ်သည်၊၊
သို့သော် ယခုအချိန်တွင် ချန်ချင်းသည် မည်သည့်ဂိုဏ်းသို့မျှ ဝင်ရောက်ရန် ဆန္ဒမရှိပေ၊၊ ဂိုဏ်းတစ်ခုက သူ့ကို ဘာပေးနိုင်မည်နည်း၊၊
အစီအစဉ်များကို စောစောစီးစီး ချမှတ်ထားပြီး ရှယွီချင်းကိုသာ ပို၍ အာရုံစိုက်ခြင်းက ပိုကောင်းသည်၊၊ သို့မှသာ သူမသည် သူ့ကို လိုလိုလားလားနှင့် မင်္ဂလာဆောင် အိပ်ခန်းထဲသို့ ဝင်လာစေပြီး သူသည် မဟာဧကရာဇ် ကျင့်စဉ်ကို ရရှိနိုင်မည် ဖြစ်သည်၊၊
ထိုအချိန်ရောက်လျှင် မသေနိုင်သော ခန္ဓာကိုယ်နှင့် မဟာဧကရာဇ် ကျင့်စဉ် နှစ်ခုလုံးကို ပိုင်ဆိုင်ထားပြီးမှတော့ ဇာတ်လိုက်လား၊၊ သူက လာပြီး မနှောင့်ယှက်လျှင် ပြဿနာမရှိသော်လည်း၊ အကယ်၍ လာရောက် ရန်စပါက ချန်ချင်းသည် သူ့ကို သေချာပေါက် အပြတ်ရှင်းပစ်မည် ဖြစ်သည်၊၊
စနစ်ဘောင်ကို ဖျောက်လိုက်ပြီးနောက်၊ ချန်ချင်းသည် သကြားရုပ်ကို ကြည့်ကာ လှုပ်ရှားမှုမရှိဘဲ ကြောင်အမ်းအမ်း ဖြစ်နေသည့် ရှယွီချင်းကို ကြည့်ရင်း “စားလိုက်ပါ၊ စိတ်မပူပါနဲ့၊ အဆိပ်မပါပါဘူး” ဟု ပြောလိုက်သည်၊၊
“သိပ်လှလွန်းလို့ မစားရက်ဘူး ဖြစ်နေတာပါ” ရှယွီချင်းသည် သူမ၏ ရင်ထဲရှိ စကားကို လွှတ်ခနဲ ပြောလိုက်မိသည်၊၊
ချန်ချင်းက အခွင့်အရေးကို လက်မလွှတ်ဘဲ “အို၊ မစားရက်စရာ ဘာရှိလို့လဲ၊ နောက်ကျလို့ ထပ်စားချင်ရင် ကိုယ် နောက်ထပ်တစ်ရုပ် ထပ်ဆွဲပေးမှာပေါ့” ဟု ဆိုလိုက်သည်၊၊
“...” ရှယွီချင်းသည် ဝေခွဲမရ ဖြစ်သွားရသည်၊၊ သူမ၏ လှပသော ဆောင်းဦးရေပြင်ကဲ့သို့ မျက်ဝန်းများက ချန်ချင်းကို ကြည့်လိုက်သောအခါ သူမကိုယ်တိုင်ပင် သတိမထားမိလိုက်သော လှိုင်းကလေးတစ်ခုမှာ ခဏချင်းအတွင်း ပေါ်ထွက်လာခဲ့သည်၊၊
ချန်ချင်းက ဤမျှအထိ ပြောနေမှတော့ သူမ မစားပါက သူ အထင်လွဲသွားမည်ကို ရှယွီချင်း စိုးရိမ်နေမိသည်၊၊
သူမသည် သူမ၏ နှုတ်ခမ်းလွှာကို ဟကာ သကြားရုပ်ကို ပါးစပ်ထဲသို့ ထည့်လိုက်သည်၊၊ သကြားရည်များ အရည်ပျော်သွားပြီး ချိုမြိန်သော အရသာမှာ ပါးစပ်တစ်ခုလုံး ပျံ့နှံ့သွားတော့သည်...
လမ်းလျှောက်နေရင်း ချန်ချင်းသည် ရှယွီချင်း၏ လမ်းလျှောက်ဟန်မှာ အနည်းငယ် ထူးဆန်းနေသည်ကို သတိပြုမိလိုက်သည်၊၊
“နေဦး!”
ချန်ချင်းက ရုတ်တရက် ပြောလိုက်သည်၊၊ ရှယွီချင်း ဘာမှ ပြန်မပြောနိုင်ခင်မှာပင် သူသည် သူမရှေ့၌ ဆောင့်ကြောင့်ထိုင်ကာ ရှယွီချင်း၏ ဂါဝန်စကို မလိုက်ပြီး သူမ၏ ခြေကျင်းဝတ်ကို ကြည့်လိုက်သည်၊၊
“ရှင်၊ ဘာလုပ်တာလဲ!” ရှယွီချင်းက ထိတ်လန့်တကြား ပြောလိုက်သည်၊၊
“ဒါက ဘယ်တုန်းက ဖြစ်သွားတာလဲ၊ ဘာလို့ စောစောက မပြောတာလဲ” ရှယွီချင်း၏ နီရဲပြီး ညိုမည်းနေသော ခြေကျင်းဝတ်ကို မြင်သောအခါ ချန်ချင်း၏ မျက်နှာတွင် အပြစ်တင်သည့် အမူအရာ ပေါ်လာသည်၊၊
“ဘာမှ မဟုတ်ပါဘူး၊ ဒဏ်ရာအနည်းငယ်ပါ၊ ရှင် စိတ်ပူနေစရာ မလိုပါဘူး” အမှန်စင်စစ် စောစောက လူသတ်သမားများနှင့် တွေ့စဉ်က ချန်ချင်းက သူမကို အနောက်သို့ ဆွဲလိုက်ရာ မြေပြင်မညီသဖြင့် ခြေခေါက်သွားခြင်း ဖြစ်သည်၊၊
“ဘယ်လိုလုပ် ရမှာလဲ!” ချန်ချင်းသည် ရှယွီချင်း၏ ရှေ့သို့ သွားကာ ကျောပေး၍ ဆောင့်ကြောင့်ထိုင်လိုက်သည်၊၊ “လာ၊ ကိုယ် မင်းကို ပိုးပြီး ပြန်မယ်”
ဇနီးသည်ကို အလိုလိုက်ရန် ယခုကဲ့သို့ ရှားပါးသော အခွင့်အရေးကို ချန်ချင်း မည်သို့ လက်လွတ်ခံနိုင်ပါမည်နည်း၊၊
“ဒါက...” ရှယွီချင်းက ဝေခွဲမရ ဖြစ်နေသည်၊၊
တစ်ဖက်တွင်လည်း သူမသည် ချန်ချင်းနှင့် ထိတွေ့မှု အလွန်အကျွံ မရှိလိုပေ၊၊
အခြားတစ်ဖက်တွင်မူ ဤနေရာသည် လူစည်ကားသော ဈေးလမ်း ဖြစ်သည်၊၊ လူပေါင်းများစွာ၏ အကြည့်အောက်တွင် ရှယွီချင်းမှာ အလွန်ပင် ရှက်ရွံ့နေမိသည်၊၊
“မင်းသာ မတက်လာရင် ကိုယ် ပုန်ကန်လိုက်မှာနော်” ချန်ချင်းက အတည်ပေါက် ပြောလိုက်သည်၊၊
“ကျွန်မကို ခြောက်မနေပါနဲ့၊ ရှင် ပြောသလို လုပ်ပါ့မယ်” ချန်ချင်း နောက်နေခြင်း ဖြစ်မှန်း သိသော်လည်း ရှယွီချင်းမှာ မစွန့်စားရဲပေ၊၊
သူမသည် ရှေ့သို့ တစ်လှမ်းတိုးကာ ချန်ချင်း၏ ကျောပေါ်သို့ မှီလိုက်သည်၊၊
ထို့နောက် ချန်ချင်းက ရှယွီချင်း၏ ပေါင်များကို လက်နှစ်ဖက်ဖြင့် မလိုက်ပြီး “မြဲမြဲကိုင်ထားနော်” ဟု ပြောကာ မတ်တတ်ရပ်လိုက်သည်၊၊
တစ်လမ်းလုံးတွင် ရှယွီချင်းသည် သူမ၏ မျက်နှာလေးကို ချန်ချင်း၏ ကျောပြင်ထဲ၌ မြှုပ်ထားပြီး ပတ်ဝန်းကျင်မှ လူများ၏ အကြည့်ကို မကြည့်ရဲပေ၊၊
သူမ မှတ်မိသလောက် နောက်ဆုံးအကြိမ် ဤကဲ့သို့ ပိုးခြင်းခံရသည်မှာ သားရဲတစ်ကောင်၏ တိုက်ခိုက်မှုကို ခံရစဉ်က ဖြစ်ပြီး သူမမှာ အလွန်ကြောက်လန့်ကာ လမ်းမလျှောက်နိုင်သဖြင့် ရဲ့ဖုန်းက ပိုးသွားခဲ့ခြင်း ဖြစ်သည်...
သူမသည် သူမ၏ အတွေးများကို အမြန်ရပ်လိုက်သည်၊၊
ပို၍ တွေးလေလေ ရှယွီချင်းမှာ ရဲ့ဖုန်းအပေါ် အပြစ်ရှိသလို ခံစားလာရလေလေ ဖြစ်သည်၊၊
သူသည် အသက်ရှင်နေသလား၊ သေသွားပြီလား မသိရသေးဘဲ ရှိနေချိန်တွင် သူမမှာမူ ဤနေရာ၌ အခြားအမျိုးသားတစ်ဦးနှင့်...
“အို! သူတို့တွေ ချစ်ပြနေကြတာဟေ့! သူတို့တွေ ချစ်ပြနေကြတာ!”
ကလေးငယ်များ၏ ပျော်ရွှင်စွာ အော်ဟစ်သံကို ကြားရသောအခါ ရှယွီချင်း၏ မျက်နှာမှာ ပို၍ပင် နီရဲသွားတော့သည်၊၊
သူမသည် မျက်နှာကို ဖုံးကွယ်ထားနိုင်သော်လည်း နီရဲနေသော နားရွက်ကလေးများကိုမူ ဖုံးကွယ်၍ မရပေ၊၊
ကလေးများ၏ မိဘများမှာ ပိုးလာသူမှာ နတ်ဆိုးဘုရင် ချန်ချင်း ဖြစ်နေကြောင်း မြင်သောအခါ ချက်ချင်းပင် ကလေးများ၏ ပါးစပ်ကို ပိတ်ကာ မြေပြင်ပေါ်သို့ ဒူးထောက်ကျလျက် ခွင့်လွှတ်ရန် တောင်းပန်ကြလေသည်၊၊
ချန်ချင်းကမူ ထိုအရာများကို ဂရုမစိုက်ပေ၊၊
သူ့အတွက် ပို၍ အရေးကြီးသော အရာများ ရှိနေသည်၊၊
“ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အတွက် ကျပန်းဆုလာဘ်- အဆင့် (၄) ကောင်းကင်ဘုံလျှို့ဝှက်ဆန်းကြယ်ဆေးလုံး +၁ ရရှိသည့်အတွက် ဂုဏ်ယူပါသည်၊၊”
‘အဆင့် (၄) ဆေးလုံးတောင်လား!’
ချန်ချင်းသည် ဤဆေးလုံးကို သန့်စင်ပြီး သူ၏ အစွမ်းများကို အမြန်ဆုံး မြှင့်တင်ရန် စိတ်အားထက်သန်နေပြီ ဖြစ်သည်၊၊
စဉ်းစားကြည့်လျှင် ဤအတိုင်းသာ ဆက်သွားပါက ရှယွီချင်းနှင့် မင်္ဂလာဆောင် အိပ်ခန်းထဲ မဝင်ခင်မှာပင် စနစ်၏ ဆုလာဘ်များကို အခြေခံ၍ မဟာဧကရာဇ် အဆင့်သို့ ကြိုတင် ရောက်ရှိသွားနိုင်သည်၊၊
ထိုသို့ တွေးမိသောအခါ သူ၏ စိတ်ထဲတွင် မေးခွန်းတစ်ခု ပေါ်လာသည်၊၊
သူက မေးလိုက်သည်၊ ‘စနစ်၊ အကယ်၍ ငါက ကြိုပြီး မဟာဧကရာဇ် အဆင့်ကို ရောက်သွားခဲ့ရင် ဒီဆုလာဘ်က အလဟဿ ဖြစ်မသွားဘူးလား၊၊’
“အိမ်ရှင် စိတ်အေးအေးထားပါ၊ စနစ်ရဲ့ ဆုလာဘ်တွေက တစ်ပေါင်းတစ်က နှစ် ဆိုတဲ့ ရလဒ်ကိုပဲ ပေးမှာပါ၊၊”
‘ဒါဆိုရင်တော့ ကောင်းတာပေါ့!’
စနစ်က ထိုသို့ ပြောသည်ကို ကြားသောအခါ ချန်ချင်း စိတ်အေးသွားသည်၊၊
မဟာဧကရာဇ် ကျင့်စဉ် နှစ်ထပ်ကွမ်း!
သူ့အတွက်မူ ဤသည်မှာ ဆွဲဆောင်မှု ရှိရုံသာမက အလွန်အမင်းပင် ဆွဲဆောင်မှု ရှိလှသည်၊၊
မဟာဧကရာဇ် ကျင့်စဉ် တစ်ခုတည်းနှင့်ပင် ကောင်းကင်ဘုံလျှို့ဝှက်ဆန်းကြယ်တိုက်ကြီး တစ်ခုလုံးကို စိုးမိုးရန် လုံလောက်နေပြီ ဖြစ်ရာ၊ နှစ်ထပ်ကွမ်း ကျင့်စဉ်နှင့်ဆိုပါက ထာဝရ စိုးမိုးအုပ်ချုပ်ရန် မည်သည့်အခက်အခဲ ရှိနိုင်ဦးမည်နည်း၊၊
၎င်းအပြင် သူသည် မသေနိုင်သော ခန္ဓာကိုယ်ကိုလည်း ပိုင်ဆိုင်ထားသဖြင့် အချိန်ကြာမြင့်စွာ တည်ရှိနေနိုင်ပြီး ကျင့်စဉ်များကိုလည်း ဆက်လက် မြှင့်တင်သွားနိုင်ဦးမည် ဖြစ်သည်!
မကြာမီမှာပင် ချန်ချင်းသည် ရှယွီချင်းကို ပိုးလျက် ချန်မိသားစု အိမ်တော်မှ သူတို့၏ မင်္ဂလာဆောင် အိပ်ခန်းထဲသို့ ပြန်လည် ရောက်ရှိလာခဲ့သည်၊၊
ရှယွီချင်းကို ခုတင်ပေါ်တွင် ချထားပေးပြီးနောက် သူသည် တစ်စုံတစ်ယောက်ကို ဆေးဆီ ယူလာရန် ခိုင်းလိုက်သည်၊၊
သူသည် ရှယွီချင်းကို ခုတင်ပေါ်တွင် ထိုင်ခိုင်းကာ သူမ၏ ခြေထောက်ကို မလိုက်ပြီး သူမ၏ ဖိနပ်နှင့် ခြေအိတ်များကို ချွတ်ပေးလိုက်ရာ ဖြူဖွေးနုနယ်လှသော ခြေဖဝါးလေးမှာ ပေါ်ထွက်လာသည်၊၊
ရှယွီချင်း၏ ရှက်ရွံ့နေသော အမူအရာနှင့် သူမ၏ ခြေထောက်ကလေးကို အဖန်ဖန် ပြန်လည် ဆွဲယူရန် ကြိုးစားနေသည်ကို မြင်သောအခါမှ၊
ချန်ချင်းသည် သူ၏ ယခင်ဘဝနှင့် မတူဘဲ ကောင်းကင်ဘုံလျှို့ဝှက်ဆန်းကြယ်တိုက်ကြီးရှိ အမျိုးသမီးများမှာ သူတို့၏ ခြေထောက်ကို အခြားသူများ မြင်တွေ့ခြင်းအပေါ် အလွန်အမင်း အလေးထားကြကြောင်း အတည်ပြုလိုက်နိုင်သည်၊၊
“နည်းနည်းတော့ နာလိမ့်မယ်၊ သည်းခံလိုက်နော်” ချန်ချင်းသည် သူ၏ လက်ချောင်းဖြင့် ဆေးဆီကို ယူလိုက်ရင်း ရှယွီချင်းကို သတိပေးလိုက်သည်၊၊
“အင်း” ရှယွီချင်းသည် သူမ၏ နှုတ်ခမ်းနီလေးကို စေ့ထားရင်း ခေါင်းညိတ်ပြသည်၊၊
သူမ စိတ်ပိုင်းဆိုင်ရာ ပြင်ဆင်ပြီးပြီဖြစ်ကြောင်း မြင်သောအခါ ချန်ချင်းသည် ဆေးဆီ စတင် လိမ်းပေးတော့သည်၊၊ သူ၏ လှုပ်ရှားမှုများမှာ အလွန်ပင် ညင်သာလှသည်၊၊
စတင် လိမ်းပေးစဉ်က အနည်းငယ် နာကျင်သွားသော်လည်း၊ နောက်ပိုင်းတွင် ရှယွီချင်းသည် နာကျင်မှုများ ပျောက်ကွယ်သွားပြီး နွေးထွေးသော ခံစားချက်ကို ရှင်းရှင်းလင်းလင်း ခံစားလိုက်ရသည်...
သူမအတွက် ဆေးကို အပတ်တကုတ် ဂရုတစိုက် လိမ်းပေးနေသော ချန်ချင်းကို ကြည့်ရင်း၊ ရှယွီချင်း၏ ရင်ထဲတွင် တည်ငြိမ်ရန် ခက်ခဲနေမိသည်၊၊
လောကအကြောင်း မသိသေးသော၊ အချစ်ရေးတွင် အဖြူထည်သက်သက် ဖြစ်ပြီး ငယ်စဉ်ကတည်းက နန်းတော်ထဲ၌သာ ကြီးပြင်းခဲ့သော မင်းသမီးတစ်ပါးအနေဖြင့်၊ အမျိုးသားတစ်ဦး၏ ယခုကဲ့သို့ ဆက်ဆံမှုကို ခံရသောအခါ ရှယွီချင်း မတွေးဘဲ မနေနိုင်တော့ပေ၊ ‘အကယ်၍ ဖုန်းအစ်ကိုသာ မရှိခဲ့ရင်၊ သူနဲ့ ငါနဲ့ကြားမှာ...’
အတွေး၏ တစ်ဝက်ခန့်မှာပင် ရှယွီချင်းသည် မိမိ၏ အတွေးကို မိမိ ပြန်လည် သတိပြုမိသွားပြီး ထိတ်လန့်သွားရသည်၊၊
သူမသည် သူမ၏ ခြေထောက်ကလေးကို အမြန်ပြန်ဆွဲလိုက်ပြီး ချန်ချင်းကို “ရပါပြီ” ဟု ပြောလိုက်သည်၊၊
【ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အတွက် ကျပန်းဆုလာဘ်- ဆက်သွယ်ရေး ကျောက်စိမ်းအဆောင် +၂ ရရှိသည့်အတွက် ဂုဏ်ယူပါသည်၊၊】
ဆုလာဘ်မှာ လက်ထဲသို့ ရောက်ရှိနေပြီ ဖြစ်သဖြင့် ချန်ချင်းက ဂရုမစိုက်ပေ၊၊
လေ့လာကြည့်ပြီးနောက် ဤဆက်သွယ်ရေး ကျောက်စိမ်းအဆောင်မှာ သူ၏ ယခင် ကမ္ဘာပေါ်ရှိ လက်ကိုင်ဖုန်းနှင့် ဆင်တူသော်လည်း စွမ်းဆောင်ရည်မှာ ပို၍ အားကောင်းသည်၊၊ မိုင်ပေါင်း သောင်းချီဝေးကွာသော နေရာမှပင် အနှောင့်အယှက်မရှိ ဆက်သွယ်နိုင်သည်၊၊
ချန်ချင်းသည် ယခုအချိန်တွင် ၎င်းကို အသုံးပြုရန် အကြောင်းမရှိသေးသဖြင့် စနစ်လွယ်အိတ်ထဲသို့သာ ထည့်ထားလိုက်သည်၊၊
“ဒါဆိုရင်လည်း အချိန်တော်တော် နောက်ကျနေပြီပဲ၊ မင်း အရင်နားလိုက်တော့” ဟု ချန်ချင်းက ပြောရင်း မတ်တတ်ရပ်လိုက်သည်၊၊
“ရှင်ကော” အမျိုးသားတစ်ဦးနှင့် အခန်းတစ်ခုတည်းတွင် ရှိနေရသဖြင့် ရှယွီချင်းမှာ မသိစိတ်မှ စိုးရိမ်စိတ် ပေါ်လာသည်၊၊
“ငါ ကျင့်ကြံရမယ်” ချန်ချင်းသည် နေရာတစ်ခု ရှာကာ တင်ပလ္လင်ခွေ ထိုင်လိုက်ပြီး ဆေးလုံးတစ်လုံးကို ထုတ်ယူကာ ကျင့်ကြံခြင်း အခြေအနေသို့ လျင်မြန်စွာ ဝင်ရောက်သွားတော့သည်၊၊
ချန်ချင်း၏ ခန္ဓာကိုယ်မှ ထွက်ပေါ်လာသော အားကောင်းပြီး ကြောက်မက်ဖွယ်ကောင်းသော ဝိညာဉ်အရှိန်အဝါကို ခံစားရသောအခါ၊ ရှယွီချင်းသည် ချန်ချင်းမှာ သာမန် အလိုလိုက်ခံရသော သူဌေးသားလေးတစ်ယောက် လုံးဝမဟုတ်ကြောင်း ရာနှုန်းပြည့် သေချာသွားတော့သည်၊၊
သူမသည် လဲလျောင်းလိုက်ပြီး တစ်ဖက်သို့ လှည့်ကာ မျက်လုံးများကို ပိတ်လိုက်သည်၊၊
ရှယွီချင်းသည် ရဲ့ဖုန်းနှင့် ပတ်သက်သော အတိတ်က အသေးစိတ် အချက်အလက်တိုင်းကို အစွမ်းကုန် ပြန်လည် အမှတ်ရရန် ကြိုးစားနေမိသည်၊၊ သူမအနေဖြင့် အရင်ကလို ခဏတာ ဝေခွဲမရဖြစ်ကာ ချန်ချင်းအပေါ် မလျော်ကန်သော ခံစားချက်များ ပေါ်ပေါက်လာမည်ကို စိုးရိမ်နေခြင်း ဖြစ်သည်၊၊
‘ဖုန်းအစ်ကို၊ စိတ်မပူပါနဲ့၊ ရှယွီချင်းက ရှင့်အပေါ် သစ္စာမဲ့မယ့်အရာကို ဘယ်တော့မှ လုပ်မှာ မဟုတ်ဘူး! ဘယ်တော့မှ! ရှယွီချင်းရဲ့ နှလုံးသားက အမြဲတမ်း ရှင့်အတွက်ပဲ!’
ခဏချင်းအတွင်းမှာပင် သန်းခေါင်ယံ အချိန်သို့ ရောက်ရှိသွားသည်၊၊
တာမန်တောင်တန်းပေါ်ရှိ အမည်မသိ နတ်ဘုရားဂူတစ်ခုအတွင်း၌၊၊
ရဲ့ဖုန်းသည် တရားထိုင်ခြင်းကို အဆုံးသတ်လိုက်သည်၊၊ ဂူအောင်းနေသည်မှာ နှစ်ဝက်ခန့် ရှိပြီဖြစ်ရာ၊ သူသည် ယခုအချိန်တွင် စနစ်ဘောင်ကို ဖွင့်လှစ်ပြီး အသစ်ပြန်လည် ရရှိလာသော လက်မှတ်ထိုးခြင်း အခွင့်အရေးကို အသုံးပြုရန် ကျင့်သားရနေပြီ ဖြစ်သည်၊၊
“ဒီတစ်ခါ လက်မှတ်ထိုးရင် ဘယ်လို အားကောင်းတဲ့ ဆုလာဘ်မျိုး ရဦးမလဲ မသိဘူး၊ ငါ့ကို ဒီဂူထဲကနေ စောစောထွက်ခွင့်ရအောင် ကူညီပေးနိုင်မယ့် အရာမျိုး ဖြစ်ရင်တော့ ကောင်းမှာပဲ” ရဲ့ဖုန်းသည် ဂူထဲမှ စောစောထွက်ခွာနိုင်ရန်၊ သူ၏ အဖေ၊ ညီမလေးတို့နှင့် ပြန်လည် ဆုံတွေ့နိုင်ရန်နှင့် သူ၏ ငယ်ချစ်ဦး ရှယွီချင်းနှင့် ပေါင်းဖက်နိုင်ရန် စိတ်ကူးယဉ်နေမိတော့သည်၊၊