အခန်း (၈) မင်းရဲ့အရည်အချင်းတွေကို ဖုံးကွယ်ထားတာပဲ

တစ်ယောက်ထက်မကသော သူတို့၏ အကြည့်များမှာ သိသိသာသာပင် ရန်လိုနေကြရာ ချန်ချင်းသည် မိမိ၏ကျောပြင်ထက်၌ အေးစိမ့်သော လေအေးတစ်ခု ဖြတ်သန်းသွားသကဲ့သို့ မသိစိတ်မှ တုန်လှုပ်သွားရသည်၊၊

ထို့နောက် ချက်ချင်းဆိုသလိုပင် အရပ်မျက်နှာအသီးသီးမှ မျက်နှာဖုံးစွပ် အဝတ်နက်ဝတ် လူတစ်ဒါဇင်ကျော် ထွက်ပေါ်လာပြီး တိုက်ခိုက်လာကြတော့သည်၊၊

သူတို့သည် ဓားများကို ကိုင်ဆောင်ထားပြီး ထိုကဲ့သို့ ဝတ်ဆင်ထားသည်ကို မြင်သောအခါ လမ်းသွားလမ်းလာများမှာ ထိတ်လန့်တကြား အော်ဟစ်ရင်း ထွက်ပြေးလွတ်မြောက်ရာသို့ ပြေးကြလေသည်၊၊

ချန်ချင်းသည် လျင်မြန်စွာ တုံ့ပြန်လိုက်သည်၊၊ ဤလူများသည် သူ့ထံသို့ ဦးတည်လာခြင်းဖြစ်ကြောင်း သူ သိလိုက်သည်၊၊ သူသည် ရှယွီချင်း၏ လက်ကောက်ဝတ်ကို လှမ်းဖမ်းလိုက်ပြီး သူမကို သူ၏နောက်သို့ ဆွဲခေါ်ကာ သဘာဝကျကျပင် ကာကွယ်ပေးလိုက်သည်၊၊

ထို့နောက် သူသည် ရှယွီချင်းကို စိတ်အေးစေမည့် အကြည့်ဖြင့် ကြည့်ကာ “မကြောက်ပါနဲ့၊ အရာအားလုံးအတွက် ကိုယ်ရှိတယ်” ဟု ဆိုလိုက်သည်၊၊

【ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အတွက် ကျပန်းဆုလာဘ်- နားလည်သဘောပေါက်နိုင်စွမ်း +၂၀ ရရှိသည့်အတွက် ဂုဏ်ယူပါသည်၊၊】

နားလည်သဘောပေါက်နိုင်စွမ်း!

ချန်ချင်းသည် ဤဆုလာဘ်ကို အလွန်ကျေနပ်မိသည်၊၊ ရှန်ဟွမ်ကမ္ဘာမှ ကျင့်ကြံသူများအတွက် နားလည်သဘောပေါက်နိုင်စွမ်း မည်မျှမြင့်မားသည်ဟူသောအချက်မှာ ထိုသူ၏ အနာဂတ် အမြင့်ဆုံးအဆင့်ကို ဆုံးဖြတ်ပေးလေ့ရှိသည်၊၊

နားလည်သဘောပေါက်နိုင်စွမ်းမှာ မွေးရာပါ အရည်အချင်းထဲတွင် ပါဝင်ပြီး မွေးကတည်းက သတ်မှတ်ထားခြင်း ဖြစ်သည်၊၊ သို့သော် စနစ်တစ်ခုကို ပိုင်ဆိုင်ထားသော ချန်ချင်းမှာမူ ဇနီးသည်ကို အလိုလိုက်ခြင်းဖြင့် သူ၏ နားလည်သဘောပေါက်နိုင်စွမ်းကို စဉ်ဆက်မပြတ် မြှင့်တင်နိုင်သည်၊၊

သူ၏ နားလည်သဘောပေါက်နိုင်စွမ်းသာ လုံလောက်စွာ မြင့်မားနေပါက ကျင့်စဉ်လျှို့ဝှက်ကျမ်းစာများကို ကြည့်ရုံမျှဖြင့် တတ်မြောက်နိုင်ရုံသာမက မိမိကိုယ်ပိုင် ထူးခြားသော ကျင့်စဉ်များကိုပင် ဖန်တီးနိုင်ခြင်းမှာ မဖြစ်နိုင်သောအရာ မဟုတ်ပေ၊၊

ထို့ကြောင့် ဤဆုလာဘ်၏ တန်ဖိုးမှာ ချန်ချင်း၏ အမြင်တွင် အလွန်ပင် ကြီးမားလှပြီး များလေလေ ကောင်းလေလေပင် ဖြစ်သည်၊၊

‘မကြောက်ပါနဲ့၊ အရာအားလုံးအတွက် ကိုယ်ရှိတယ်’

အခြားတစ်ဖက်တွင်မူ ချန်ချင်း၏ အနောက်သို့ ရောက်ရှိနေသော ရှယွီချင်းအတွက် ထိုစကားတိုလေးမှာ သူမ၏ ရင်ထဲသို့ မသေးငယ်သော ရိုက်ခတ်မှုတစ်ခုကို ယူဆောင်လာခဲ့သည်၊၊

မိမိ၏ အာဏာကို အလွဲသုံးစားလုပ်ကာ သူတပါးကို နှိပ်စက်တတ်သည်ဟု နာမည်ကြီးနေသော အသုံးမကျသည့် ဤသခင်လေးသည် အဘယ်ကြောင့် ယခုကဲ့သို့ အသက်အန္တရာယ်နှင့် ကြုံတွေ့ရချိန်တွင် သူမကို ကာကွယ်ရန် ဦးစားပေးနေရသနည်းဆိုသည်ကို သူမ နားမလည်နိုင်ပေ၊၊

ရှယွီချင်း၏ အမြင်အရ ထိုကဲ့သို့သော အခြေအနေမျိုးတွင် အတ္တကြီးသော သူသည် သူမကို တိုက်ရိုက် ပစ်ပယ်ထားခဲ့ပြီး ထွက်ပြေးသွားရမည် ဖြစ်သည်၊၊

အဘယ်ကြောင့်ဆိုသော် ချန်ရှုန်းက ချန်ချင်း၏ ဘေးတွင် ထားပေးထားသော တာအိုကာကွယ်သူမှာလည်း ဆီးသီးတုတ်ထိုး ဈေးသည်ထံသို့ ပိုက်ဆံပေးရန် ချန်ချင်းကပင် စေလွှတ်လိုက်ပြီ ဖြစ်သောကြောင့်ပင်၊၊

(အိမ်ထိလိုက်သွားလားမသိ🥲)

ရှုပ်ထွေးလှသည်၊၊ ရှယွီချင်း၏ စိတ်အစဉ်မှာ ယခုအခါ အလွန်ပင် ရှုပ်ထွေးနေသည်၊၊

ချန်ချင်းအပေါ် ထားရှိသော သူမ၏ အရင်က အစွဲအလမ်းများမှာ မသိစိတ်မှ ယိုင်နဲ့လာရသည်၊၊

‘ဒီလူက သူ့ရဲ့ အရည်အချင်းအစစ်အမှန်တွေကို အမြဲတမ်း ဖုံးကွယ်ထားတာလား၊ တမင်တကာ သခင်လေးတစ်ယောက်လို ဟန်ဆောင်နေပြီး လူတွေ သူ့ကို လျစ်လျူရှုအောင် လုပ်ထားတာလား၊ တစ်နေ့မှာ လူအားလုံးကို အံ့အားသင့်အောင် လုပ်ဖို့အတွက်လား’

ယခုအချိန်ကို ထားပါဦး၊ သမိုင်းကြောင်းကို ပြန်ကြည့်လျှင်ပင် ထိုကဲ့သို့သော ဖြစ်ရပ်မျိုးနှင့် လူပုဂ္ဂိုလ်များစွာကို သမိုင်းမှတ်တမ်းများတွင် တွေ့ရှိနိုင်သည်၊၊

ပို၍ တွေးလေလေ ရှယွီချင်းမှာ ပို၍ ထိတ်လန့်လာလေလေ ဖြစ်သည်၊၊

အာဏာရှိသော ဝန်ကြီးဖြစ်သူ ချန်ရှုန်းမှာ ဝူအင်ပါယာအတွက် ရင်ဆိုင်ရန် ခက်ခဲနေပြီ ဖြစ်သည်၊၊ ဝူဘုရင်ပင်လျှင် သူ၏ ခံစားချက်ကို ထည့်သွင်းစဉ်းစားပေးနေရပြီး အလေးထား ဆက်ဆံနေရသည်၊၊

ယခုအခါ မိမိ၏ အရည်အချင်းများကို ဖုံးကွယ်ထားပြီး မည်သည့် ရည်မှန်းချက် ရှိနေသည်ကို မသိရသော ဝန်ကြီးချုပ်၏ သခင်လေး တစ်ဦးပါ ထပ်တိုးလာပြန်ရာ...

ရှယွီချင်း၏ စိတ်ထဲတွင် အတွေးတစ်ခုသာ ရှိတော့သည်- ‘ဝူအင်ပါယာတော့ အန္တရာယ် ကြုံနေပြီ!’

သို့သော် ချန်ချင်း၏ နောက်ထပ် စကားများကြောင့် ရှယွီချင်း၏ စိတ်မှာ ထပ်မံ ယိုင်နဲ့သွားရပြန်သည်၊၊ “မင်းတို့ ငါ့ကို ကိုင်တွယ်ချင်တာလား၊ အဲဒါ ပြဿနာမရှိဘူး၊ ဒါပေမဲ့ အပြစ်မရှိတဲ့ လူတွေကိုတော့ ဆွဲမထည့်ပါနဲ့လား၊ သူမကို သွားခွင့်ပြုလိုက်ပါ”

ဤစကားကို ကြားသောအခါ အဝတ်နက်ဝတ် လူအုပ်စုမှာ အချင်းချင်း ကြည့်လိုက်ကြပြီးနောက် သူတို့၏ ခေါင်းဆောင်က ပြောလိုက်သည်၊၊ “ငါတို့ သူမကို အန္တရာယ်မပြုပါဘူး၊ ဒါပေမဲ့ ငါတို့အကြောင်း သတင်းသွားပို့မှာ စိုးလို့ သူမကိုတော့ လွှတ်ပေးလို့ မရဘူး၊ မင်းသာ အသာတကြည် အဖမ်းခံမယ်ဆိုရင် သူမလည်း ဘာမှဖြစ်မှာ မဟုတ်ပါဘူး”

သူတို့ သဘောတူခြင်း၊ မတူခြင်းမှာ ချန်ချင်းအတွက် အရေးမကြီးပေ၊၊

အရေးကြီးသည်မှာ စနစ်က မည်သို့ ရှုမြင်သနည်း ဆိုသည်ပင် ဖြစ်သည်၊၊

【ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အတွက် ကျပန်းဆုလာဘ်- ရွှမ်အဆင့် အဆင့်မြင့် မှော်လက်နက်ဖြစ်သော အရိပ်ရုပ်သေး +၁ ရရှိသည့်အတွက် ဂုဏ်ယူပါသည်၊၊ မှတ်ချက်- အရိပ်ရုပ်သေး တစ်ရုပ်၏ အစွမ်းမှာ ဝိညာဉ်ဖြစ်ပေါ်ခြင်း အထွတ်အထိပ် အဆင့်နှင့် ညီမျှပါသည်!】

ဝိညာဉ်ဖြစ်ပေါ်ခြင်း အထွတ်အထိပ် အဆင့်လား?

ဤအရာမှာ သူ၏ ဖခင် ချန်ရှုန်းက သူ့ဘေးတွင် ထားပေးခဲ့သော တာအိုကာကွယ်သူထက် များစွာ ပိုမို အစွမ်းထက်လှသည်၊၊

အမြတ်ထွက်ပြီ၊ အကြီးအကျယ် အမြတ်ထွက်ပြီ!

နောက်ထပ် ဝှက်ဖဲတစ်ခု ထပ်တိုးလာခဲ့ပြန်ပြီ၊၊

“ဧကရာဇ်မင်းမြတ် စံမြန်းရာ မြေပေါ်မှာ၊ လမ်းပေါ်မှာ လူသတ်နေကြတာ၊ မင်းတို့ မျက်လုံးထဲမှာ ဥပဒေဆိုတာ ရှိသေးရဲ့လား!”

ထို့နောက် ချက်ချင်းပင် သူ၏ ဘေးနားမှ ထွက်ပေါ်လာသော ရှယွီချင်း၏ အသံက ချန်ချင်း၏ အာရုံကို ဖမ်းစားလိုက်သည်၊၊ သူသည် လက်ကို ဝှေ့ယမ်းကာ စနစ်ဘောင်ကို ဖျောက်လိုက်ပြီး အနည်းငယ် အံ့သြသွားရသည်၊၊

ဤကဲ့သို့သော အခြေအနေမျိုးတွင် ရှယွီချင်းသည် တိတ်ဆိတ်နေပြီး ဤလူသတ်သမားများက သူ့ကို သတ်လိုက်ရန်သာ ဆုတောင်းနေလိမ့်မည်ဟု သူက ထင်ထားခဲ့ခြင်း ဖြစ်သည်၊၊

ရှယွီချင်းက ဧကရာဇ်မင်းမြတ်နှင့် ဝူအင်ပါယာ ဥပဒေများကို ထုတ်ဖော်ကာ ဤလူသတ်သမားများကို ဟန့်တားရန် ကြိုးစားလိမ့်မည်ဟု သူ လုံးဝ မမျှော်လင့်ထားခဲ့ပေ၊၊

“ဝူအင်ပါယာ ဥပဒေလား?” ဤစကားကို ကြားသောအခါ လူသတ်သမားက ရယ်မောလိုက်ပြီး “သူ့ရဲ့ တည်ရှိမှုကတင် ဥပဒေကို လျစ်လျူရှုနေတာပဲ၊ ငါတို့ သူ့ကို သတ်တာက ကောင်းကင်ဘုံကိုယ်စား အပြစ်ပေးတာပဲ!”

“သတ်တာက သတ်တာပဲ၊ ဘယ်လောက်ပဲ အကြောင်းပြချက်တွေ ရှိရှိ ဒါဟာ လူသတ်မှုပဲ၊ သူ့ရဲ့ မကောင်းမှုတွေကို ဥပဒေအရပဲ စီရင်ဆုံးဖြတ်ရမယ်!”

ရှယွီချင်း၏ ပြတ်သားသော အမူအရာဖြင့် ငြင်းခုံနေသည်ကို ကြည့်ရင်း၊ ချန်ချင်းအနေဖြင့် သူမသည် နောင်တွင် ကောင်းကင် သတ်မှတ်ထားသော ဧကရီ ဖြစ်လာမည့် လမ်းခရီး၌ မည်သည်တို့ကို ကြုံတွေ့ရမည်နည်းဆိုသည်ကို စိတ်ကူးကြည့်ရန် ခက်ခဲလှသည်၊၊

ဤမျှအထိ ဖြူစင်နေပါက သူမသည် ဧကရီပလ္လင်ပေါ်တွင် ခိုင်ခိုင်မာမာ ထိုင်နိုင်မည်မဟုတ်ပေ၊၊

“စကားများမနေနဲ့တော့၊ ညီအစ်ကိုတို့၊ အလုပ်စကြစို့၊ အမြန်ဆုံး ဇာတ်သိမ်းလိုက်ကြ!” လူသတ်သမား ခေါင်းဆောင်က အမိန့်ပေးလိုက်သည်၊၊

တစ်စုံတစ်ယောက်သည် ဓားကို ကိုင်ဆောင်ကာ ချန်ချင်းထံသို့ ချက်ချင်း ချဉ်းကပ်လာပြီး ဓားဖြင့် ခုတ်ချလိုက်သည်၊၊

ချန်ချင်းကမူ သူ၏ လက်ဝါးထဲတွင် ဝိညာဉ်စွမ်းအင်များကို လှည့်ပတ်လိုက်ပြီး အရင်က ရရှိထားသော အဝါရောင်အဆင့် အလယ်အလတ် ကျင့်စဉ်ဖြစ်သော တောင်ဖြိုလက်ဝါးကို အသုံးပြုလိုက်သည်၊၊

သူ၏ ယခုလက်ရှိ နားလည်သဘောပေါက်နိုင်စွမ်းနှင့်ဆိုလျှင် ဤကျင့်စဉ်ကို ခဏလေး ကြည့်လိုက်ရုံမျှဖြင့် အလွယ်တကူ တတ်မြောက်သွားနိုင်သည်၊၊

သူသည် လက်ဝါးဖြင့် ရိုက်ထုတ်လိုက်သောအခါ ဝိညာဉ်စွမ်းအင်များသည် ဟင်းလင်းပြင်ထဲတွင် လူတစ်ရပ်စာခန့်ရှိသော လက်ဝါးရိပ်တစ်ခုအဖြစ် ပြောင်းလဲသွားပြီး လူသတ်သမားကို တည့်တည့်မှန်ကာ ခုနစ်မီတာ၊ ရှစ်မီတာခန့် အကွာသို့ လွင့်ထွက်သွားစေသည်၊၊

သူသည် မြေပြင်ပေါ်သို့ ပြုတ်ကျသွားပြီး နှစ်ကြိမ်ခန့်ပင် မလှုပ်ရှားနိုင်ဘဲ သတိမေ့သွားတော့သည်၊၊

“...” ကျန်ရှိသော လူသတ်သမားများသည် သူတို့၏ အဖော်ကို လှည့်ကြည့်လိုက်ကြပြီး သူတို့၏ မျက်နှာများမှာ ပျက်ယွင်းသွားကြသည်၊၊

ကာမဂုဏ်၌သာ ပျော်မွေ့နေတတ်သည်ဟု နာမည်ကြီးသော ဤနတ်ဆိုးဘုရင်သည် အမှန်တကယ်တွင် ကျင့်ကြံသူတစ်ဦး ဖြစ်နေလိမ့်မည်ဟု သူတို့ လုံးဝ မမျှော်လင့်ထားခဲ့ကြပေ!

ဤလူများမှာ သိုင်းပညာ အနည်းငယ် ရှိကြသော်လည်း အားလုံးမှာ သာမန်လူများသာ ဖြစ်ကြပြီး ဝိညာဉ်အမြုတေ မရှိသဖြင့် ကျင့်ကြံခြင်း မပြုနိုင်ကြပေ၊၊

သာမန်လူတစ်ယောက်သည် သူ၏ သိုင်းပညာကို မည်မျှပင် အထွတ်အထိပ်သို့ ရောက်အောင် လေ့ကျင့်ထားပါစေ၊ ချီသန့်စင်ခြင်း အဆင့်သို့ ရောက်ခါစ ကျင့်ကြံသူတစ်ဦးကိုပင် မယှဉ်နိုင်ကြောင်း သူတို့ သိရှိထားကြသည်၊၊

ခဏချင်းအတွင်းမှာပင် သူတို့သည် တုန်လှုပ်ချောက်ချားသွားကြသည်၊၊

ချန်ချင်းက တာအိုကာကွယ်သူကို လွှတ်လိုက်သဖြင့် ချန်ချင်း တစ်ယောက်တည်းသာ ကျန်ရှိတော့ပြီး သူတို့ လူတစ်ဒါဇင်ကျော်သည် သူ့ကို သတ်ရန် လုံလောက်သည်ဟု ထင်မှတ်ကာ ကောင်းကင်ဘုံက ပေးသော အခွင့်အရေးဟု ယူဆခဲ့ကြခြင်း ဖြစ်သည်၊၊

ချန်ချင်းသည် တိတ်တဆိတ် ကျင့်ကြံနေခဲ့လိမ့်မည်ဟု သူတို့ လုံးဝ မထင်ထားခဲ့ကြပေ!

ဤမြင်ကွင်းကို တွေ့မြင်လိုက်ရသော ရှယွီချင်းမှာလည်း ချန်ချင်းသည် သူ၏ အရည်အချင်းများကို ဖုံးကွယ်ထားသည်ဟူသော သူမ၏ အရင်က အတွေးကို ပို၍ ခိုင်မာသွားစေသည်၊၊

‘ဒီလူက တကယ်ကို ရိုးရှင်းတဲ့ သခင်လေးတစ်ယောက် မဟုတ်ဘူးပဲ!’

ထို့နောက် လူသတ်သမား အုပ်စုမှာ ဘာလုပ်ရမှန်း မသိ ဖြစ်နေစဉ်မှာပင်၊ ဝေးကွာသော နေရာမှ မိုးကြိုးသံကဲ့သို့ အားကောင်းပြီး အာဏာပါသော အသံတစ်ခု ဟိန်းထွက်လာသည်၊၊ “ရဲတင်းလှချည်လား လူမိုက်‌တွေ၊ ငါ့ရဲ့ သခင်လေးကို အန္တရာယ်မပြုနဲ့!”

ဟုတ်ပါသည်၊ တာအိုကာကွယ်သူ ပြန်လည် ရောက်ရှိလာခြင်းပင် ဖြစ်သည်၊၊

ချန်ချင်းသည် ထိုအခါမှ လှည့်ကြည့်လိုက်ပြီး ရှယွီချင်း၏ လက်ကို ဆွဲကာ “သွားကြစို့” ဟု ပြောလိုက်သည်၊၊

ရှယွီချင်းသည် ချန်ချင်းနှင့်အတူ လှည့်ထွက်လာခဲ့သည်၊၊ သူမ၏ ကျောပြင်မှာ လူသတ်သမား အုပ်စုဘက်သို့ လှည့်နေသဖြင့် သူမသည် မသိစိတ်မှ ခေါင်းလှည့်ကြည့်လိုစိတ် ပေါ်လာသည်၊၊

သို့သော် ချန်ချင်းက သူမကို တားမြစ်လိုက်သည်၊၊ “အဲဒီလို မကြည့်တာ ပိုကောင်းလိမ့်မယ်၊ မဟုတ်ရင် ညကျရင် အိပ်ပျော်မှာ မဟုတ်ဘူး”

ရှယွီချင်း၏ အကြည့်နှင့် ဆုံသောအခါ ချန်ချင်းသည် သူမ၏ အတွေးများကို ရိပ်မိသွားပြီး “ဒီလောကကြီးက ဒီလိုပါပဲ၊ အားကြီးသူက အားနည်းသူကို အနိုင်ကျင့်တတ်ကြတယ်၊ တစ်နည်းပြောရရင် သူတို့သာ ငါ့ကို သတ်ဖို့ အခွင့်အရေး ရခဲ့ရင် သူတို့လည်း ငါ့ကို လွှတ်ပေးမှာ မဟုတ်ဘူး” ဟု ဆိုလိုက်သည်၊၊

“...” ရှယွီချင်းသည် ဤစကားကို မငြင်းနိုင်ခဲ့ပေ၊၊ သူမသည် ချန်ချင်း၏ စကားကို အမှန်တကယ်ပင် ငြင်းဆန်လိုသော်လည်း သူပြောသည်မှာလည်း အလွန်ပင် ကျိုးကြောင်းဆီလျော်နေသည်ဟု သူမ ခံစားရသည်၊၊

သူတို့၏ အနောက်တွင်မူ ရောက်ရှိလာသော တာအိုကာကွယ်သူသည် လက်ကို ဝှေ့ယမ်းလိုက်ရုံမျှဖြင့် ထိုလူအနည်းငယ်တို့၏ အသွေးအသားနှင့် အရိုးများမှာ ဟင်းလင်းပြင်ထဲတွင် ပျောက်ကွယ်သွားတော့သည်၊၊

သာမန်လူများသည် ကျင့်ကြံသူများကို ရင်ဆိုင်ရပါက၊ အထူးသဖြင့် အဆင့်မြင့် ကျင့်ကြံသူများကို ရင်ဆိုင်ရပါက ခုခံနိုင်စွမ်း လုံးဝ မရှိပေ၊၊

အခြားတစ်ဖက်တွင်မူ၊

ချန်ချင်းသည် ရှယွီချင်းကို သကြားရုပ်ကလေးများ ရောင်းသည့် ဆိုင်သို့ ခေါ်ဆောင်သွားသည်၊၊

ချန်ချင်းသည် ဇွန်းတစ်ချောင်းဖြင့် သကြားရည်များကို ချကာ သကြားရုပ်ကလေး တစ်ရုပ်ကို အာရုံစိုက်ပြီး ဆွဲနေသည်ကို ကြည့်ရင်း၊ ရှယွီချင်းသည် သတ္တိမွေးကာ မေးလိုက်သည်၊၊ “ရှင်က အမြဲတမ်း သရုပ်ဆောင်နေတာလား၊ တခြားလူတွေ ရှင့်ကို သခင်လေးတစ်ယောက်လို့ ထင်အောင် လုပ်ထားပြီးတော့ တကယ်တော့ အရည်အချင်းတွေကို ဖုံးကွယ်ပြီး တိတ်တဆိတ် ကျင့်ကြံနေတာလား”

“မင်းက ကိုယ့်ကို အဲဒီလို မြင်တာလား”

ချန်ချင်းက ထိုသို့ ပြောလိုက်သော်လည်း သူ၏ ရင်ထဲတွင်မူ ဤသည်မှာ အလွန်ကောင်းသော လက္ခဏာတစ်ခုဟု တွေးလိုက်သည်၊၊

ရှယွီချင်းကို လိုလိုလားလားနှင့် မင်္ဂလာဆောင် အိပ်ခန်းထဲသို့ ဝင်လာစေရန်နှင့် မဟာဧကရာဇ် ကျင့်စဉ်ကို ရရှိရန်အတွက်၊ သူမ၏ စိတ်ထဲမှ အစွဲအလမ်းကြီးသော ပုံရိပ်ကို ဖယ်ရှားပစ်ခြင်းသည် ပထမဆုံး အဆင့်ပင် ဖြစ်သည်၊၊

“ဒီနေ့ ရှင့်ရဲ့ လုပ်ရပ်တွေက အရင်က ရှင်နဲ့ လုံးဝ မတူဘူး” ဟု ရှယွီချင်းက ရှင်းရှင်းလင်းလင်း ပြောလိုက်သည်၊၊

ချန်ချင်းက ဘာမှ ပြန်မပြောဘဲ သကြားရုပ် ဆွဲခြင်းကိုသာ အာရုံစိုက်နေသည်၊၊

သူ မည်မျှပင် ပြောပါစေ၊ ရှယွီချင်းကို သူမဘာသာ သူမ တွေးတောစေပြီး လိုအပ်သည်များကို ဖြည့်စွက် စဉ်းစားစေခြင်းက ပို၍ ကောင်းသည်၊၊

ချန်ချင်း မျှော်လင့်ထားသည့်အတိုင်းပင်၊ သူ၏ တိတ်ဆိတ်နေမှုကို မြင်သောအခါ ရှယွီချင်းသည် သူမ၏ ခန့်မှန်းချက်မှာ မှန်ကန်နေပြီး သူသည် ငြင်းခုံရန်ပင် ပျင်းရိနေခြင်း ဖြစ်သည်ဟု ကောက်ချက်ချလိုက်သည်၊၊

“ရှင်နဲ့ ချန်ရှုန်းက ဝူအင်ပါယာ တစ်ခုလုံးကို သိမ်းပိုက်ဖို့ ကြံစည်နေတာ မဟုတ်လား! ကျွန်မကို လက်ထပ်တာကလည်း ပုန်ကန်ပြီးတဲ့နောက်မှာ လင်မယားဆိုတဲ့ နာမည်ကို သုံးပြီး ပြည်သူတွေရဲ့ စိတ်ကို ငြိမ်သက်အောင် လုပ်ဖို့အတွက်ပဲ” ဟု ရှယွီချင်းက ဆက်လက် ခွဲခြမ်းစိတ်ဖြာနေသည်၊၊

သကြားရုပ်ရောင်းသူမှာမူ ရှေ့ဆက်နားထောင်ရန် မဝံ့ရဲတော့ဘဲ စကားသံများ ကြားသွားကာ အသတ်ခံရမည်ကို စိုးရိမ်၍ ထွက်ပြေးသွားလေပြီ၊၊

ချန်ချင်းသည် အဖြေပေးရန် မလောပေ၊၊ သူသည် နောက်ဆုံးအချက်ကို ချလိုက်ပြီး ပုံဆွဲခြင်းကို အဆုံးသတ်လိုက်သည်၊၊

ထို့နောက် ချက်ချင်းပင် သူသည် စက္ကူပေါ်မှ အချောသတ်ထားသော သကြားရုပ်ကို ဂရုတစိုက် မလိုက်သည်၊၊

၎င်းမှာ ရှယွီချင်း၏ ချစ်စဖွယ် ပုံစံငယ်လေး ပင် ဖြစ်သည်၊၊

“ဘယ်လိုလဲ၊ မင်းနဲ့ တူရဲ့လား” ချန်ချင်းက မေးလိုက်သည်၊၊

“ဖြေပါဦး! ရှင့်ရဲ့ ချန်မိသားစုက ပုန်ကန်ဖို့ ကြံနေတာလား!” ဤမေးခွန်း၏ အဖြေမှာ ရှယွီချင်းအတွက် အလွန်ပင် အရေးကြီးလှသည်၊၊

ရှယွီချင်း၏ တိကျသော အဖြေကို လိုချင်သည့် ပြတ်သားသော အမူအရာကို မြင်သောအခါ ချန်ချင်းက သက်ပြင်းချလိုက်ပြီး “စိတ်မပူပါနဲ့၊ အနည်းဆုံးတော့ အခုအချိန်မှာ ငါတို့မှာ အဲဒီလို အတွေးမျိုး မရှိသေးပါဘူး”

“ဒါ့အပြင် မင်းဆက်တွေ အပြောင်းအလဲဖြစ်တာ၊ အရည်အချင်းရှိသူက အာဏာကို ချုပ်ကိုင်တာဆိုတာ ပုံမှန်ကိစ္စတစ်ခု မဟုတ်ဘူးလား၊ ဒီမြေကြီးက အစကတည်းက ‘ရှ’ လို့ နာမည်တွင်ခဲ့တာမှ မဟုတ်တာ”

“...” ချန်ချင်း၏ စကားများကို ရှယွီချင်း မငြင်းနိုင်ခဲ့ပေ၊၊

ဝူအင်ပါယာသည်လည်း အလောင်းပေါင်း ထောင်သောင်းချီသော မြေပုံပေါ်တွင် တည်ဆောက်ထားခြင်း ဖြစ်ကြောင်း သူမ သေချာပေါက် သိရှိထားသည်၊၊

“ဒါပေမဲ့ အနည်းဆုံးတော့ ဝူအင်ပါယာ တည်ထောင်ခဲ့တဲ့ အနှစ်တစ်ရာအတွင်းမှာ စစ်ပွဲတွေ အဆက်မပြတ် မဖြစ်ခဲ့ဘူး၊ ပြည်သူတွေ ဒုက္ခမရောက်ခဲ့ဘူး၊ အိုးမဲ့အိမ်မဲ့တွေ မဖြစ်ခဲ့ဘူး!” ရှယွီချင်းက ဝူအင်ပါယာ၏ အောင်မြင်မှုများကို ပြန်လည် ပြောပြနေသည်၊၊

သူမ ပို၍ စိတ်လှုပ်ရှားလာသည်ကို မြင်သောအခါ ချန်ချင်းက “စိတ်အေးအေးထားပါ၊ မင်းက အခု ငါ ချန်ချင်းရဲ့ ဇနီးပဲ၊ ဧကရာဇ်မင်းမြတ်ကလည်း ငါ့ရဲ့ ယောက္ခမပဲ၊ ငါက ဘာလို့ ကိုယ့်မိသားစုကို ပြန်ပြီး ပုန်ကန်ရမှာလဲ”

“ကဲ၊ ဇနီးသည်၊ သကြားလုံးလေး စားလိုက်ဦး” ချန်ချင်းက သကြားရုပ်ကို ထပ်မံ ကမ်းပေးလိုက်သည်၊၊

ရှယွီချင်းသည် သကြားရုပ်ကို ယူလိုက်သော်လည်း သူမ၏ မျက်ခုံးများမှာ သံသယများဖြင့် အနည်းငယ် တွန့်နေဆဲ ဖြစ်ကာ “ရှင် တကယ်ပဲ အဲဒီလို ထင်တာလား၊ တကယ်ပဲ ပုန်ကန်ဖို့ အစီအစဉ် မရှိဘူးလား” ဟု မေးလိုက်သည်၊၊

“တကယ်ပါ၊ တကယ်ပါ၊ မင်း ငါ ချန်ချင်းရဲ့ ဇနီးအဖြစ် တစ်ရက် ရှိနေသရွေ့၊ ချန်မိသားစုက ဘယ်တော့မှ ပုန်ကန်မှာ မဟုတ်ဘူးလို့ ငါ ကတိပေးပါတယ်” ရှယွီချင်း၏ သံသယများကို ပယ်ဖျောက်ရန်အတွက် ချန်ချင်းသည် လက်ကို မြှောက်ကာ ကျိန်ဆိုလိုက်သည်၊၊

ရှယွီချင်းက အသိအမှတ်ပြုသည့်အနေဖြင့် အင်းဟု ဆိုလိုက်သည်၊၊

ချန်ချင်း၏ ရည်မှန်းချက်မှာ သာမန် ဝူအင်ပါယာ တစ်ခုတည်းတွင် ကန့်သတ်ထားမည် မဟုတ်ကြောင်း သူမ မည်သို့ သိနိုင်ပါမည်နည်း၊၊

စိတ်တည်ငြိမ်သွားပြီးနောက် သူမသည် လက်ထဲမှ သကြားရုပ်ကို ပြန်ကြည့်လိုက်သည်၊၊

‘တကယ် လှတာပဲ!’

စောစောက တခြားကိစ္စများကိုသာ အာရုံစိုက်နေသဖြင့် ရှယွီချင်းသည် ယခုမှပင် ချန်ချင်း ကိုယ်တိုင် ဆွဲပေးထားသော သကြားရုပ်မှာ သူမ၏ ပုံတူဖြစ်ကြောင်း သတိထားမိလိုက်သည်၊၊

အပြင်က လူနှင့် တစ်ထေရာတည်း မတူသော်လည်း အလွန်ပင် ချစ်စရာကောင်းလှသည်၊၊

ချန်ချင်းတွင် ဤကဲ့သို့သော အနုပညာ အရည်အချင်း ရှိလိမ့်မည်ဟု ရှယွီချင်း လုံးဝ မထင်ထားခဲ့ပေ၊၊

【ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အတွက် ကျပန်းဆုလာဘ်- အခြေခံအုတ်မြစ် တည်ဆောက်ခြင်း ကျင့်စဉ် လက်ဆောင်ထုပ် +၁ ရရှိသည့်အတွက် ဂုဏ်ယူပါသည်၊၊ မှတ်ချက်- အသုံးပြုပြီးပါက သင်၏ လက်ရှိအစွမ်းကို အခြေခံအုတ်မြစ် တည်ဆောက်ခြင်း အထွတ်အထိပ် အဆင့်သို့ ချက်ချင်း မြှင့်တင်နိုင်ပါသည်!】

ကျင့်စဉ် လက်ဆောင်ထုပ်လား? တစ်ချက်နှိပ်ရုံနဲ့ အစွမ်းတွေ တက်လာမှာပေါ့!

ချန်ချင်းက တွက်ချက်လိုက်သည်၊၊ သူ၏ လက်ရှိ ကျင့်စဉ်မှာ ချီသန့်စင်ခြင်း အဆင့် (၂) သာ ရှိသေးသည်၊၊ အကယ်၍ အခြေခံအုတ်မြစ် တည်ဆောက်ခြင်း အထွတ်အထိပ်သို့ ရောက်သွားပါက... ၎င်းမှာ အဆင့်ငယ် (၁၆) ဆင့်ကို ချက်ချင်း ကျော်တက်သွားခြင်းနှင့် ညီမျှသည်!

‘လန်းတယ်၊ တကယ် လန်းတယ်! ငါ တမင်တကာ အာရုံစိုက်ပြီး ဆွဲပေးခဲ့ရတာ တန်သွားပြီ!’

ချန်ချင်းသည် ဤဆုလာဘ်ကို အလွန်ကျေနပ်သွားပြီး အသုံးပြုရန် ချက်ချင်း အတည်ပြုလိုက်တော့သည်၊၊