အခန်း ၄၂။ ငါ မင်းကို ဘယ်တော့မှ စိတ်ပျက်အောင် မလုပ်ဘူး။

နန်းတော်ရှိ စာကြည့်ဆောင်သို့ ဝင်ရောက်လာသည်နှင့် တစ်ပြိုင်နက် လျှို့ဝှက်အေးဂျင့်သည် ချက်ချင်းပင် ဒူးထောက်ကာ ဂါရဝပြုလိုက်သည်မှာ။

"ဧကရာဇ်မင်းမြတ်ကို ဂါရဝပြုပါတယ်ခင်ဗျာ။"

"ဟင်။" ယခင်လျှို့ဝှက်အေးဂျင့် ထွက်ခွာသွားသည်မှာ မကြာသေးမီမှာပင် နောက်ထပ် လျှို့ဝှက်အေးဂျင့်တစ်ဦး ရောက်ရှိလာသည်ကို မြင်သောအခါ ဝူဧကရာဇ် ရှချန်းသည် မျက်မှောင်အနည်းငယ် ကြုတ်လိုက်ပြီး အမိန့်စာလွှာများကို ပြင်ဆင်နေသော စုတ်တံကို ချကာ မေးမြန်းလိုက်သည်မှာ။

"ချင်ချန်ဂိုဏ်းမှာ တစ်ခုခု ဖြစ်လို့လား။"

"အစီရင်ခံပါတယ် မင်းမြတ်၊ ဂိုဏ်းကြီးဆယ်ဂိုဏ်း အပါအဝင် အင်အားစု အသီးသီးဟာ သမက်တော်ချန်နဲ့ သမီးတော်မင်းသမီးတို့ဆီက ထိပ်တန်းပါရမီတွေ နိုးထလာတာကို သိပြီးနောက်မှာ သူတို့ကို အပြိုင်အဆိုင် လုယူဖို့အတွက် အပြေးအလွှား ရောက်ရှိလာကြပါတယ်ခင်ဗျာ။"

ထိုစကားကို ကြားသောအခါ ရှချန်း၏ တွန့်ချိုးနေသော မျက်မှောင်များ ပြေလျော့သွားတော့သည်။ ထိုကဲ့သို့သော ကိစ္စရပ်မျိုးကို သူ ကြိုတင်ခန့်မှန်းထားပြီးသား ဖြစ်သည်။

ချန်ချင်းနှင့် ရှယွီချင်းတို့ထံမှ ကောင်းကင်အဆင့် ထိပ်တန်းဝိညာဉ်အမြုတေများ နိုးထလာသည့် သတင်းမှာ လျှို့ဝှက်ထား၍ ရမည်မဟုတ်ကြောင်း သူသိရှိသည်၊ ဤကမ္ဘာပေါ်တွင် လေလုံသော နံရံဟူ၍ မရှိပေ။

ထိုဂိုဏ်းအင်အားစုများ အမှန်တရားကို သိရှိသွားသည်နှင့် တစ်ပြိုင်နက် သူတို့နှစ်ဦးကို မိမိတို့၏ အုပ်စုထဲသို့ သွင်းနိုင်ရန် အသည်းအသန် ကြိုးပမ်းကြမည်မှာ မြေကြီးလက်ခတ်မလွဲပင်။

ရှချန်းသည် ချန်ချင်းနှင့် ရှယွီချင်းတို့ကို ရှမျိုးနွယ်စု၏ လက်အောက်ရှိ ဂိုဏ်းများသို့ ဝင်ရောက်စေကာ တော်ဝင်မိသားစုကို အကျိုးပြုစေချင်သည်မှာ အမှန်ပင်ဖြစ်သော်လည်း ဝူအင်ပါယာတွင် ထိုသူနှစ်ဦးကို သီးသန့် ထိန်းသိမ်းထားနိုင်လောက်သည့် ယုံကြည်ချက်မျိုး မရှိကြောင်းကိုလည်း သူနားလည်သည်။

သူတို့ကို အတင်းအဓမ္မ ထိန်းသိမ်းထားခြင်းက ချန်ချင်းနှင့် ရှယွီချင်းတို့၏ အနှိုင်းမဲ့ပါရမီများကို နှောင့်နှေးစေကာ ဖြုန်းတီးပစ်ရာ ရောက်ပေလိမ့်မည်။

ထို့ကြောင့် ရှချန်းသည် ချန်ချင်းနှင့် ရှယွီချင်းတို့ကို ထိန်းချုပ်ရန်ထက် ပို၍ သိချင်နေသည်မှာ။

"ဒါဆို သူတို့နှစ်ယောက်က နောက်ဆုံးမှာ ဘယ်အင်အားစုထဲကို ဝင်သွားကြလဲ။"

"အစီရင်ခံပါတယ် မင်းမြတ်၊ သမက်တော်ချန်နဲ့ သမီးတော်မင်းသမီးတို့ဟာ ဘယ်အင်အားစုထဲကိုမှ မဝင်ခဲ့ပါဘူးခင်ဗျာ။" လျှို့ဝှက်အေးဂျင့်က ပြန်လည်ဖြေကြားလိုက်သည်။

"မဝင်ဘူး ဟုတ်လား။ အဲ့ဒီဂိုဏ်းတွေက အလွယ်တကူ လက်လျှော့ကြမှာ မဟုတ်ဘူး မဟုတ်လား။" ရှချန်းသည် နှစ်ဖက်အကြား ပဋိပက္ခဖြစ်ပွားပြီး ရှယွီချင်း ထိခိုက်ဒဏ်ရာရမည်ကို စိုးရိမ်နေမိသည်။

ထိုဂိုဏ်းများသည် ထိုကဲ့သို့သော ပါရမီရှင်များကို အလွယ်တကူ လွှတ်ပေးမည်မဟုတ်ကြောင်း သူကောင်းစွာသိသည်။ အကယ်၍ ထိုသူများကို အခြားဂိုဏ်းများက သိမ်းသွင်းသွားပါက သူတို့အကြား ကြာမြင့်စွာ တည်ဆောက်ထားသော ဟန်ချက်ညီမှုမှာ ဧကန်မုချ ပျက်စီးသွားပေလိမ့်မည်။

"မင်းမြတ်၊ သမက်တော်ချန်ဟာ သူတစ်ယောက်တည်းနဲ့ ရောက်ရှိလာတဲ့ ဂိုဏ်းအင်အားစုအားလုံးကို သူ့လက်အောက်ခံဖြစ်အောင် လုပ်လိုက်ပြီး သူ့ကို ဘယ်တော့မှ သစ္စာမဖောက်ဘူးဆိုတဲ့ ကောင်းကင်ဘုံသစ္စာကို ဆိုခိုင်းလိုက်ပါတယ်ခင်ဗျာ။" လျှို့ဝှက်အေးဂျင့်က အမှန်အတိုင်း ထုတ်ဖော်ပြောကြားလိုက်သည်။

သူကိုယ်တိုင် မြင်တွေ့ခဲ့ရသော်လည်း ထိုစကားလုံးများကို သူ၏ပါးစပ်မှ ထုတ်ပြောလိုက်ရသောအခါတွင်မူ မယုံကြည်နိုင်လောက်အောင် ဖြစ်နေဆဲပင်။

"မင်း ငါ့ကို လာနောက်နေတာတော့ မဟုတ်ပါဘူးနော်။" ရှချန်းသည် နဂါးပလ္လင်ပေါ်မှ ထရပ်လိုက်ပြီး ထိုအဖြေကြောင့် အလွန်အမင်း တုန်လှုပ်သွားကာ ဤလျှို့ဝှက်အေးဂျင့်မှာ အသက်ရှင်ရသည်ကို ငြီးငွေ့နေ၍ သူ့ကို လာရောက်နောက်ပြောင်နေခြင်း ဖြစ်မည်ဟု သံသယဝင်မိသည်။

"ဒါကို ကျွန်တော်မျိုး ကိုယ်တိုင် မြင်တွေ့ခဲ့တာပါ၊ စကားလုံးတိုင်းဟာ အမှန်တွေချည်းပါပဲ၊ တစ်လုံးမှ မမှားပါဘူး။ ကျေးဇူးပြုပြီး မင်းမြတ် ဝေဖန်ပိုင်းခြားပေးပါခင်ဗျာ။" ရှချန်းကို ယုံကြည်စေရန်အတွက် လျှို့ဝှက်အေးဂျင့်သည် အကယ်၍ သူပြောသောစကားထဲတွင် မှားယွင်းမှု တစ်လုံးတစ်ပါဒမျှ ပါရှိခဲ့လျှင် ထိုနေရာ၌ပင် ပွဲချင်းပြီး သေပါစေဟူ၍ ကောင်းကင်ဘုံကို သစ္စာဆိုလိုက်တော့သည်။

လျှို့ဝှက်အေးဂျင့် သစ္စာဆိုပြီးနောက် ဘာမျှဖြစ်မလာသည်ကို မြင်သောအခါ ရှချန်းမှာ မယုံချင်သော်လည်း ယုံကြည်လိုက်ရတော့သည်။

ကောင်းကင်ဘုံလျှို့ဝှက်ဆန်းကြယ်တိုက်ကြီးပေါ်တွင် ကောင်းကင်ဘုံနှင့် ပတ်သက်၍ မည်သူမျှ နောက်ပြောင်ခြင်း မပြုဝံ့ကြပေ၊ မဟာဧကရာဇ်တစ်ဦးပင်လျှင် မပြုဝံ့ပေ။

ကောင်းကင်ဘုံ၏ စွမ်းအားမှာ ချိုးဖောက်၍ မရနိုင်သောအရာပင် ဖြစ်သည်။

"ဂိုဏ်းကြီးဆယ်ဂိုဏ်းလုံးက သူ့ကို အညံ့ခံလိုက်ကြတာလား။" ရှချန်းက ထပ်မံအတည်ပြုလိုက်သည်။

"ဂိုဏ်းကြီးဆယ်ဂိုဏ်းလုံးပါ၊ တစ်ဂိုဏ်းမှ မကျန်ပါဘူး။" လျှို့ဝှက်အေးဂျင့်က အလေးအနက် ခေါင်းညိတ်ပြလိုက်သည်။

ထို့နောက် ရှချန်းသည် ကိစ္စရပ်အားလုံးကို အသေးစိတ် ပြန်လည်မေးမြန်းခဲ့သည်။

လျှို့ဝှက်အေးဂျင့်သည်လည်း မည်သည့်အရာကိုမျှ ဖုံးကွယ်ထားခြင်းမပြုဘဲ အလုံးစုံကို ရှင်းပြခဲ့သည်။

"ငါနားလည်ပြီ။ မင်း သွားလို့ရပြီ။ သတင်းထူးရှိရင် အချိန်မရွေး လာတင်ပြပါ။"

"ဟုတ်ကဲ့ပါ၊ ကျွန်တော်မျိုး ခွင့်ပြုပါဦး။"

လျှို့ဝှက်အေးဂျင့် ပျောက်ကွယ်သွားပြီးနောက် ရှချန်းသည် စာကြည့်ဆောင်ထဲတွင် တစ်ဦးတည်း ကျန်ရစ်ခဲ့ကာ စိတ်နှလုံးမှာ အလွန်အမင်း လေးလံနေတော့သည်။

"မိစ္ဆာဧကရာဇ်အဆင့် အိမ်မွေးတိရစ္ဆာန်၊ ကောင်းကင်အဆင့် အဆင့်မြင့် ဝိညာဉ်အမြုတေ၊ အသက် ၁၈ နှစ်အရွယ် ဝိညာဉ်ဖြစ်ပေါ်ခြင်းအဆင့်..."

ရှချန်းသည် ထိုစကားစုများကို အထပ်ထပ်အခါခါ ရေရွတ်နေမိသည်။

ချန်ချင်းသည် ဝူမင်းဆက်အပေါ် ရှမျိုးနွယ်စု၏ ထိန်းချုပ်မှုကို ပုန်ကန်ဖြုတ်ချမည် မဟုတ်ကြောင်း သူ၏လုပ်ရပ်များဖြင့် သက်သေပြခဲ့ပြီး ဖြစ်သော်လည်း။

သို့သော် သူထုတ်ဖော်ပြသလိုက်သည့် စွမ်းအားမှာ ရှချန်းကို အလွန်အမင်း ကြောက်ရွံ့တုန်လှုပ်စေဆဲပင် ဖြစ်သည်။

ချန်ချင်းသည် ဤကဲ့သို့ အကန့်အသတ်မရှိ ဆက်လက်ကြီးထွားနေပါက ရှယွီချင်းအပေါ် ယခုကဲ့သို့ပင် ဆက်လက်၍ သစ္စာရှိနေပါဦးမည်လောဟု သူ ပို၍ စိုးရိမ်နေမိသည်။

ဖခင်တစ်ဦးအနေဖြင့် ချန်ရှုန်းသည်လည်း ချင်ချန်ဂိုဏ်းအတွင်း သူထားရှိခဲ့သော သတင်းပေးများမှတစ်ဆင့် ဖြစ်ပျက်ခဲ့သမျှကို သိရှိခဲ့သည်။

ရှချန်းနှင့် မတူသည်မှာ ချန်ရှုန်း၏ ပါးစပ်မှာ နားရွက်တက်ချိတ်လုမတတ် ပြုံးနေခြင်းပင်၊ သူ၏အပြုံးမှာ အလွန်တောက်ပနေပြီး သူ၏ပေါင်ကို ပုတ်ကာ ပြောလိုက်သည်မှာ။

"ကောင်းတယ်၊ အလွန်ကောင်းတယ်။ အသက် ၁၈ နှစ်အရွယ် ဝိညာဉ်ဖြစ်ပေါ်ခြင်းအဆင့် ပညာရှင်၊ ကောင်းကင်အဆင့် အဆင့်မြင့် လျှပ်စီးဝိညာဉ်အမြုတေကို ပိုင်ဆိုင်ထားရုံတင်မကဘဲ မိစ္ဆာဧကရာဇ်အဆင့် အိမ်မွေးတိရစ္ဆာန်ကိုတောင် အညံ့ခံခိုင်းနိုင်ခဲ့တာပဲ။ ငါ့ရဲ့ ရတနာလိုသားလေးက တကယ်ကို အနှိုင်းမဲ့ပါပဲလား။"

ချန်ရှုန်းသည် ချန်ချင်း၏ ဆုံးဖြတ်ချက်အပေါ် မည်သို့မျှ သံသယ မဝင်တော့ပေ။

အကယ်၍ ချန်မျိုးနွယ်စုကသာ အမှန်တကယ် ပုန်ကန်လိုပါက ထိုသံချပ်ကာတပ်သား တစ်သိန်းကို အဘယ်မှာ လိုအပ်ပါဦးမည်နည်း။

ယခုအခြေအနေတွင် ချန်ချင်း၏ စကားတစ်ခွန်းဖြင့်ပင် ရှချန်းသည် ရာဇပလ္လင်ကို လိမ္မာယဉ်ကျေးစွာ လွှဲအပ်ပေးရပေလိမ့်မည်။

အကယ်၍ မလေးမစား ပြုမူခဲ့ပါက ရှမျိုးနွယ်စုသာမက ဝူမင်းဆက် တစ်ခုလုံးပင် သူတို့နှင့်အတူ မြေမြှုပ်ခံရပေလိမ့်မည်။

ချန်ချင်းသည် မည်သည့်အချိန်တွင် ဤမျှ ကြောက်မက်ဖွယ်ကောင်းသော အဆင့်သို့ ရောက်ရှိသွားမှန်း သူ မသိသော်လည်း ၎င်းမှာ အရေးမကြီးပေ။ ချန်ရှုန်းသည် သူ၏သားအတွက် ဂုဏ်ယူနေမိသည်။

သူသည် သူ၏ယခင်ဘဝတွင် ကုသိုလ်ကောင်းမှုများစွာ ပြုလုပ်ခဲ့ပြီး အနည်းဆုံး လူသန်းပေါင်းများစွာ၏ အသက်ကို ကယ်တင်ခဲ့ဖူးရမည်ဟု ခံစားမိသည်၊ မဟုတ်လျှင် ဤမျှ စွမ်းအားကြီးသော သားမျိုးကို မည်သို့ မွေးဖွားနိုင်မည်နည်း။

သူစဉ်းစားလေလေ စိတ်ထဲတွင် ချိုမြိန်လေလေ ဖြစ်နေတော့သည်။ သူ၏ပျော်ရွှင်မှုကြောင့် လက်ကိုဝှေ့ယမ်းကာ အိမ်တော်အတွင်းရှိ လူတိုင်းကို ရက်ရက်ရောရော ဆုလာဘ်များ ပေးသနားကာ အတူတကွ ဆင်နွှဲစေခဲ့သည်။

ချင်ချန်ဂိုဏ်းသို့ ပြန်သွားရသော်။

(ဇနီးသည်ကို အလိုလိုက်ခြင်း အောင်မြင်ပါသည်။ အိမ်ရှင်အား ကျပန်းဆုလာဘ်အဖြစ် ကောင်းကင်အဆင့် အဆင့်မြင့် မှော်လက်နက်ဖြစ်သော နတ်ဘုရားကျောက်တုံး +၁ ကို ပေးအပ်သည့်အတွက် ဂုဏ်ယူပါသည်။)

ရှယွီချင်းသည် နောက်ဆုံး ဆဋ္ဌမအဆင့်ဆေးလုံးကို အဆင့်မြှင့်တင်ပြီးသွားခဲ့ပြီဖြစ်ရာ သူမ၏ကျင့်ကြံမှုမှာ အခြေခံအုတ်မြစ် တည်ဆောက်ခြင်းအဆင့်၏ အထွဋ်အထိပ်သို့ ရောက်ရှိသွားပြီး ရွှေအမြုတေအဆင့်သို့ ရောက်ရန် ခြေတစ်လှမ်းသာ လိုတော့သည်။

ဤကျင့်ကြံခြင်းအရှိန်မှာ ကောင်းကင်ဘုံ၏ ကံကြမ္မာပါသော ဇာတ်လိုက်မင်းသမီးတစ်ဦးနှင့် ထိုက်တန်လှသည်ဟု ချန်ချင်းကသာ ပြောနိုင်ပေလိမ့်မည်။

အကယ်၍ သူ့မှာ စနစ်သာမရှိပါက သူသည် ဧကန်မုချ သူမ၏နှိပ်စက်မှုကို ခံရပေလိမ့်မည်။

ကံကောင်းထောက်မစွာဖြင့် သူမသည် ရန်သူမဟုတ်တော့ဘဲ သူ၏ဇနီးသည် ဖြစ်နေလေပြီ။

"ဇနီးသည်၊ ကျင့်ကြံခြင်းလမ်းစဉ်ထဲကို စတင်ဝင်ရောက်ရတာ ဘယ်လိုခံစားရလဲ။" ရှယွီချင်း၏ မျက်ဝန်းများမှာ ပိုမိုထက်မြက်ပြီး စိုပြည်လာသည်ကို မြင်သောအခါ ချန်ချင်းက မေးမြန်းလိုက်သည်။

"တကယ်ကို အံ့ဩဖို့ကောင်းပါတယ်။ ကျွန်မရဲ့ တစ်ကိုယ်လုံး အသစ်တစ်ဖန် ပြန်လည်မွေးဖွားလာသလို ခံစားရတယ်။ ကျွန်မရဲ့ကျင့်ကြံမှုတွေ ဒီလောက်မြန်မြန် တိုးတက်လာတာက ခင်ပွန်းရဲ့ ဆေးလုံးတွေကြောင့်ပါ။" ရှယွီချင်းသည် ယဉ်ကျေးပြနေခြင်းမဟုတ်ဘဲ ချန်ချင်းကို အမှန်တကယ် ကျေးဇူးတင်နေခြင်းဖြစ်သည်။

ချန်ချင်းသည် ဤကိစ္စမှ ရရှိခဲ့သော အကျိုးကျေးဇူးများမှာ ထိုဆေးလုံးခုနစ်လုံး ပေးစွမ်းနိုင်သည်ထက် များစွာသာလွန်ကြောင်း သူမ မသိရှိပေ။

"ကျင့်ကြံမှု ရှိနေရုံနဲ့ မလုံလောက်သေးဘူး။ ကျင့်ကြံသူတွေကြားမှာ ရပ်တည်နိုင်ဖို့အတွက် ဇနီးသည်အနေနဲ့ စွမ်းအားကြီးတဲ့ ကျင့်စဉ်တစ်ခု လိုအပ်သေးတယ်။" ချန်ချင်းသည် "နှင်းကမ္ဘာလျှို့ဝှက်ကျင့်စဉ်" ကို ရှယွီချင်းအား လွှဲပြောင်းပေးရန် အချိန်တန်ပြီဟု ခံစားလိုက်ရသည်။

ကောင်းကင်အဆင့် ကျင့်စဉ်တစ်ခုကို ပေးအပ်လိုက်ပါက မည်သို့သော ဇနီးသည်ကို အလိုလိုက်ခြင်း ဆုလာဘ်မျိုး ရရှိမည်ကို သူအမှန်တကယ် သိချင်နေမိသည်။

"စွမ်းအားကြီးတဲ့ ကျင့်စဉ်လား။" ရှယွီချင်းက ဆိုသည်မှာ "ကျွန်မ 'နှင်းကြာကိုးပွင့်ကျင့်စဉ်' ကို ပထမအဆင့်အထိ ကျင့်ကြံပြီးပါပြီ။"

"မလုံလောက်ဘူး။" ချန်ချင်းသည် လက်ကိုမြှောက်ကာ ရှယွီချင်း၏ မျက်ခုံးနှစ်ခုကြားသို့ လက်ဖျားဖြင့် အသာအယာ ထိတွေ့လိုက်သည်။

(ကျင့်စဉ်တေဖတ်လို့ကောင်းအောင် ပြောင်းပါမယ်ခင်ဗျာ သည်းခံပေးကြပါ🥹)

'မလုံလောက်ဘူး ဟုတ်လား။'

ရှယွီချင်းသည် ချန်ချင်း၏စကားကို နားမလည်နိုင်ခင်မှာပင် သူမ၏စိတ်ထဲသို့ သူမကိုယ်ပိုင်မဟုတ်သော ထူးဆန်းသည့် မှတ်ဉာဏ်တစ်ခု တိုးဝင်လာသည်ကို ခံစားလိုက်ရသည်။

၎င်းမှာ ကျင့်စဉ်တစ်ခုဖြစ်ပြီး "နှင်းကမ္ဘာလျှို့ဝှက်ကျင့်စဉ်" ဟု အမည်ရသော ကောင်းကင်အဆင့် အဆင့်နိမ့် ကျင့်စဉ်တစ်ခုပင် ဖြစ်သည်။

"ကောင်းကင်အဆင့်ကျင့်စဉ်လား။" ရှယွီချင်းသည် မယုံကြည်နိုင်လောက်အောင် ဖြစ်သွားရသည်၊ ချန်ချင်းက သူမကို ဤမျှအဖိုးတန်သော ကျင့်စဉ်မျိုး ပေးအပ်လိမ့်မည်ဟု သူမ မယုံကြည်နိုင်ပေ။

စကားလုံးပေါင်းများစွာ ပြောဆိုနေခြင်းထက် လက်တွေ့လုပ်ရပ်ကသာ ပို၍ စစ်မှန်ပေသည်။

"..." ချန်ချင်းက ရှယွီချင်းအပေါ် ကောင်းမွန်လေလေ ရှယွီချင်းသည် သူ့အပေါ် ပို၍ အားနာစိတ် ဖြစ်ပေါ်လာလေလေပင်။

အသေအချာ စဉ်းစားပြီးနောက်။

ရှယွီချင်းသည် လက်သီးကို ရုတ်တရက် ကျစ်ကျစ်ပါအောင် ဆုပ်လိုက်ပြီး ပြတ်သားသော အကြည့်များဖြင့် သူမ၏နှလုံးသားထဲမှ စိတ်လှုပ်ရှားစွာ ပြောလိုက်သည်မှာ။

"ရှယွီချင်းက ဒီဘဝမှာ ခင်ပွန်းကို ဘယ်တော့မှ စိတ်ပျက်အောင် မလုပ်စေရဘူး။ အကယ်၍ အနာဂတ်မှာ တစ်စုံတစ်ယောက်က ငါ့ခင်ပွန်းကို အနိုင်ကျင့်ဝံ့ရင် ငါက ပထမဆုံး ကန့်ကွက်မယ့်သူ ဖြစ်လိမ့်မယ်။"

"ဒါဆိုရင် အခုကစပြီး ငါ့ကို စောင့်ရှောက်ဖို့ ဇနီးသည်ကိုပဲ အားကိုးရတော့မှာပေါ့။ မင်း အမြန်ဆုံး သန်မာလာအောင် လုပ်ရမယ်နော်။" ချန်ချင်းက ပြုံးလျက် ပြောလိုက်သည်၊ သူသည် မဟာဧကရာဇ်အဆင့် ကျင့်ကြံမှုဆီသို့ ခြေလှမ်းကြီးတစ်လှမ်း ပိုမိုနီးကပ်သွားပြီဟု ခံစားလိုက်ရသည်။

"ကောင်းပါပြီ။ ကျွန်မ ချက်ချင်း ကျင့်ကြံပါ့မယ်။" ရှယွီချင်းသည် အပိုစကားမပြောတော့ဘဲ ချန်ချင်း ပေးအပ်ခဲ့သော နှင်းကမ္ဘာလျှို့ဝှက်ကျင့်စဉ်ကို လေ့လာရန် မျက်လုံးကို ချက်ချင်း မှိတ်လိုက်တော့သည်။

ထို့နောက် ချန်ချင်းသည် ဆုလာဘ်ကို ရယူရန် စနစ်စာမျက်နှာကို ခေါ်ယူလိုက်တော့သည်။